| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১০. সূচিমুখীসুত্তৰণ্ণনা
10. Sūcimukhīsuttavaṇṇanā
৩৪১. তস্মিং ৰচনে পটিক্খিত্তেতি – ‘‘অধোমুখো ভুঞ্জসী’’তি পরিব্বাজিকায ৰুত্তৰচনে – ‘‘ন খ্ৰাহং ভগিনী’’তি পটিক্খিত্তে। ৰাদন্তি দোসং। উব্ভমুখোতি উপরিমুখো। পুরত্থিমাদিকা চতস্সো দিসা। দক্খিণপুরত্থিমাদিকা চতস্সো ৰিদিসা।
341.Tasmiṃ vacane paṭikkhitteti – ‘‘adhomukho bhuñjasī’’ti paribbājikāya vuttavacane – ‘‘na khvāhaṃ bhaginī’’ti paṭikkhitte. Vādanti dosaṃ. Ubbhamukhoti uparimukho. Puratthimādikā catasso disā. Dakkhiṇapuratthimādikā catasso vidisā.
আরামআরামৰত্থুআদীসু ভূমিপরিকম্মবীজাভিসঙ্খরণাদিপটিসংযুত্তা ৰিজ্জা ৰত্থুৰিজ্জা, তস্সা পন মিচ্ছাজীৰভাৰং দস্সেতুং ‘‘তেস’’ন্তিআদি ৰুত্তং। তেসং তেসং অত্তনো পচ্চযদাযকানং। তত্থ তত্থ গমনন্তি তেসং সাসনহরণৰসেন তং তং গামন্তরদেসন্তরং। এৰমারোচেসীতি অত্তুক্কংসনপরৰম্ভনরহিতং কণ্ণসুখং পেমনীযং হদযঙ্গমং থেরস্স ধম্মকথং সুত্ৰা পসন্নমানসা এৰং ‘‘ধম্মিকং সমণা সক্যপুত্তিযা’’তিআদিনা সাসনস্স গুণসংকিত্তনৰাচং কুলানং আরোচেসি।
Ārāmaārāmavatthuādīsu bhūmiparikammabījābhisaṅkharaṇādipaṭisaṃyuttā vijjā vatthuvijjā, tassā pana micchājīvabhāvaṃ dassetuṃ ‘‘tesa’’ntiādi vuttaṃ. Tesaṃ tesaṃ attano paccayadāyakānaṃ. Tattha tattha gamananti tesaṃ sāsanaharaṇavasena taṃ taṃ gāmantaradesantaraṃ. Evamārocesīti attukkaṃsanaparavambhanarahitaṃ kaṇṇasukhaṃ pemanīyaṃ hadayaṅgamaṃ therassa dhammakathaṃ sutvā pasannamānasā evaṃ ‘‘dhammikaṃ samaṇā sakyaputtiyā’’tiādinā sāsanassa guṇasaṃkittanavācaṃ kulānaṃ ārocesi.
সূচিমুখীসুত্তৰণ্ণনা নিট্ঠিতা।
Sūcimukhīsuttavaṇṇanā niṭṭhitā.
সারিপুত্তসংযুত্তৰণ্ণনা নিট্ঠিতা।
Sāriputtasaṃyuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১০. সূচিমুখীসুত্তং • 10. Sūcimukhīsuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. সুচিমুখীসুত্তৰণ্ণনা • 10. Sucimukhīsuttavaṇṇanā
