| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੧੦. ਸੁਚਿਮੁਖੀਸੁਤ੍ਤવਣ੍ਣਨਾ
10. Sucimukhīsuttavaṇṇanā
੩੪੧. ਦਸਮੇ ਸੁਚਿਮੁਖੀਤਿ ਏવਂਨਾਮਿਕਾ। ਉਪਸਙ੍ਕਮੀਤਿ ਥੇਰਂ ਅਭਿਰੂਪਂ ਦਸ੍ਸਨੀਯਂ ਸੁવਣ੍ਣવਣ੍ਣਂ ਸਮਨ੍ਤਪਾਸਾਦਿਕਂ ਦਿਸ੍વਾ ‘‘ਇਮਿਨਾ ਸਦ੍ਧਿਂ ਪਰਿਹਾਸਂ ਕਰਿਸ੍ਸਾਮੀ’’ਤਿ ਉਪਸਙ੍ਕਮਿ। ਅਥ ਥੇਰੇਨ ਤਸ੍ਮਿਂ વਚਨੇ ਪਟਿਕ੍ਖਿਤ੍ਤੇ ‘‘ਇਦਾਨਿਸ੍ਸ વਾਦਂ ਆਰੋਪੇਸ੍ਸਾਮੀ’’ਤਿ ਮਞ੍ਞਮਾਨਾ ਤੇਨ ਹਿ, ਸਮਣ, ਉਬ੍ਭਮੁਖੋ ਭੁਞ੍ਜਸੀਤਿ ਆਹ। ਦਿਸਾਮੁਖੋਤਿ ਚਤੁਦ੍ਦਿਸਾਮੁਖੋ, ਚਤਸ੍ਸੋ ਦਿਸਾ ਓਲੋਕੇਨ੍ਤੋਤਿ ਅਤ੍ਥੋ। વਿਦਿਸਾਮੁਖੋਤਿ ਚਤਸ੍ਸੋ વਿਦਿਸਾ ਓਲੋਕੇਨ੍ਤੋ।
341. Dasame sucimukhīti evaṃnāmikā. Upasaṅkamīti theraṃ abhirūpaṃ dassanīyaṃ suvaṇṇavaṇṇaṃ samantapāsādikaṃ disvā ‘‘iminā saddhiṃ parihāsaṃ karissāmī’’ti upasaṅkami. Atha therena tasmiṃ vacane paṭikkhitte ‘‘idānissa vādaṃ āropessāmī’’ti maññamānā tena hi, samaṇa, ubbhamukho bhuñjasīti āha. Disāmukhoti catuddisāmukho, catasso disā olokentoti attho. Vidisāmukhoti catasso vidisā olokento.
વਤ੍ਥੁવਿਜ੍ਜਾਤਿਰਚ੍ਛਾਨવਿਜ੍ਜਾਯਾਤਿ વਤ੍ਥੁવਿਜ੍ਜਾਸਙ੍ਖਾਤਾਯ ਤਿਰਚ੍ਛਾਨવਿਜ੍ਜਾਯ। વਤ੍ਥੁવਿਜ੍ਜਾ ਨਾਮ ਲਾਬੁવਤ੍ਥੁ-ਕੁਮ੍ਭਣ੍ਡવਤ੍ਥੁ-ਮੂਲਕવਤ੍ਥੁ-ਆਦੀਨਂ વਤ੍ਥੂਨਂ ਫਲਸਮ੍ਪਤ੍ਤਿਕਾਰਣਕਾਲਜਾਨਨੁਪਾਯੋ। ਮਿਚ੍ਛਾਜੀવੇਨ ਜੀવਿਕਂ ਕਪ੍ਪੇਨ੍ਤੀਤਿ ਤੇਨੇવ વਤ੍ਥੁવਿਜ੍ਜਾਤਿਰਚ੍ਛਾਨવਿਜ੍ਜਾਸਙ੍ਖਾਤੇਨ ਮਿਚ੍ਛਾਜੀવੇਨ ਜੀવਿਕਂ ਕਪ੍ਪੇਨ੍ਤਿ, ਤੇਸਂ વਤ੍ਥੂਨਂ ਸਮ੍ਪਾਦਨੇਨ ਪਸਨ੍ਨੇਹਿ ਮਨੁਸ੍ਸੇਹਿ ਦਿਨ੍ਨੇ ਪਚ੍ਚਯੇ ਪਰਿਭੁਞ੍ਜਨ੍ਤਾ ਜੀવਨ੍ਤੀਤਿ ਅਤ੍ਥੋ। ਅਧੋਮੁਖਾਤਿ વਤ੍ਥੁਂ ਓਲੋਕੇਤ੍વਾ ਭੁਞ੍ਜਮਾਨવਸੇਨ ਅਧੋਮੁਖਾ ਭੁਞ੍ਜਨ੍ਤਿ ਨਾਮ। ਏવਂ ਸਬ੍ਬਤ੍ਥ ਯੋਜਨਾ ਕਾਤਬ੍ਬਾ। ਅਪਿ ਚੇਤ੍ਥ ਨਕ੍ਖਤ੍ਤવਿਜ੍ਜਾਤਿ ‘‘ਅਜ੍ਜ ਇਮਂ ਨਕ੍ਖਤ੍ਤਂ ਇਮਿਨਾ ਨਕ੍ਖਤ੍ਤੇਨ ਗਨ੍ਤਬ੍ਬਂ, ਇਮਿਨਾ ਇਦਞ੍ਚਿਦਞ੍ਚ ਕਾਤਬ੍ਬ’’ਨ੍ਤਿ ਏવਂ ਜਾਨਨવਿਜ੍ਜਾ। ਦੂਤੇਯ੍ਯਨ੍ਤਿ ਦੂਤਕਮ੍ਮਂ, ਤੇਸਂ ਤੇਸਂ ਸਾਸਨਂ ਗਹੇਤ੍વਾ ਤਤ੍ਥ ਤਤ੍ਥ ਗਮਨਂ। ਪਹਿਣਗਮਨਨ੍ਤਿ ਏਕਗਾਮਸ੍ਮਿਂਯੇવ ਏਕਕੁਲਸ੍ਸ ਸਾਸਨੇਨ ਅਞ੍ਞਕੁਲਂ ਉਪਸਙ੍ਕਮਨਂ। ਅਙ੍ਗવਿਜ੍ਜਾਤਿ ਇਤ੍ਥਿਲਕ੍ਖਣਪੁਰਿਸਲਕ੍ਖਣવਸੇਨ ਅਙ੍ਗਸਮ੍ਪਤ੍ਤਿਂ ਞਤ੍વਾ ‘‘ਤਾਯ ਅਙ੍ਗਸਮ੍ਪਤ੍ਤਿਯਾ ਇਦਂ ਨਾਮ ਲਬ੍ਭਤੀ’’ਤਿ ਏવਂ ਜਾਨਨવਿਜ੍ਜਾ। વਿਦਿਸਾਮੁਖਾਤਿ ਅਙ੍ਗવਿਜ੍ਜਾ ਹਿ ਤਂ ਤਂ ਸਰੀਰਕੋਟ੍ਠਾਸਂ ਆਰਬ੍ਭ ਪવਤ੍ਤਤ੍ਤਾ વਿਦਿਸਾਯ ਪવਤ੍ਤਾ ਨਾਮ, ਤਸ੍ਮਾ ਤਾਯ વਿਜ੍ਜਾਯ ਜੀવਿਕਂ ਕਪ੍ਪੇਤ੍વਾ ਭੁਞ੍ਜਨ੍ਤਾ વਿਦਿਸਾਮੁਖਾ ਭੁਞ੍ਜਨ੍ਤਿ ਨਾਮ। ਏવਮਾਰੋਚੇਸੀਤਿ ‘‘ਧਮ੍ਮਿਕਂ ਸਮਣਾ’’ਤਿਆਦੀਨਿ વਦਮਾਨਾ ਸਾਸਨਸ੍ਸ ਨਿਯ੍ਯਾਨਿਕਂ ਗੁਣਂ ਕਥੇਸਿ। ਤਞ੍ਚ ਪਰਿਬ੍ਬਾਜਿਕਾਯ ਕਥਂ ਸੁਤ੍વਾ ਪਞ੍ਚਮਤ੍ਤਾਨਿ ਕੁਲਸਤਾਨਿ ਸਾਸਨੇ ਓਤਰਿਂਸੂਤਿ।
Vatthuvijjātiracchānavijjāyāti vatthuvijjāsaṅkhātāya tiracchānavijjāya. Vatthuvijjā nāma lābuvatthu-kumbhaṇḍavatthu-mūlakavatthu-ādīnaṃ vatthūnaṃ phalasampattikāraṇakālajānanupāyo. Micchājīvena jīvikaṃ kappentīti teneva vatthuvijjātiracchānavijjāsaṅkhātena micchājīvena jīvikaṃ kappenti, tesaṃ vatthūnaṃ sampādanena pasannehi manussehi dinne paccaye paribhuñjantā jīvantīti attho. Adhomukhāti vatthuṃ oloketvā bhuñjamānavasena adhomukhā bhuñjanti nāma. Evaṃ sabbattha yojanā kātabbā. Api cettha nakkhattavijjāti ‘‘ajja imaṃ nakkhattaṃ iminā nakkhattena gantabbaṃ, iminā idañcidañca kātabba’’nti evaṃ jānanavijjā. Dūteyyanti dūtakammaṃ, tesaṃ tesaṃ sāsanaṃ gahetvā tattha tattha gamanaṃ. Pahiṇagamananti ekagāmasmiṃyeva ekakulassa sāsanena aññakulaṃ upasaṅkamanaṃ. Aṅgavijjāti itthilakkhaṇapurisalakkhaṇavasena aṅgasampattiṃ ñatvā ‘‘tāya aṅgasampattiyā idaṃ nāma labbhatī’’ti evaṃ jānanavijjā. Vidisāmukhāti aṅgavijjā hi taṃ taṃ sarīrakoṭṭhāsaṃ ārabbha pavattattā vidisāya pavattā nāma, tasmā tāya vijjāya jīvikaṃ kappetvā bhuñjantā vidisāmukhā bhuñjanti nāma. Evamārocesīti ‘‘dhammikaṃ samaṇā’’tiādīni vadamānā sāsanassa niyyānikaṃ guṇaṃ kathesi. Tañca paribbājikāya kathaṃ sutvā pañcamattāni kulasatāni sāsane otariṃsūti.
ਸਾਰਿਪੁਤ੍ਤਸਂਯੁਤ੍ਤવਣ੍ਣਨਾ ਨਿਟ੍ਠਿਤਾ।
Sāriputtasaṃyuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧੦. ਸੂਚਿਮੁਖੀਸੁਤ੍ਤਂ • 10. Sūcimukhīsuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੧੦. ਸੂਚਿਮੁਖੀਸੁਤ੍ਤવਣ੍ਣਨਾ • 10. Sūcimukhīsuttavaṇṇanā
