| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৬. সুচিন্তিতত্থেরঅপদানৰণ্ণনা
6. Sucintitattheraapadānavaṇṇanā
গিরিদুগ্গচরো আসিন্তিআদিকং আযস্মতো সুচিন্তিতত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অত্থদস্সিস্স ভগৰতো কালে হিমৰন্তপ্পদেসে নেসাদকুলে উপ্পন্নো মিগসূকরাদযো ৰধিত্ৰা খাদন্তো ৰিহরতি। তদা লোকনাথো লোকানুগ্গহং সত্তানুদ্দযতঞ্চ পটিচ্চ হিমৰন্তমগমাসি। তদা সো নেসাদো ভগৰন্তং দিস্ৰা পসন্নমানসো অত্তনো খাদনত্থায আনীতং ৰরমধুরমংসং অদাসি। পটিগ্গহেসি ভগৰা তস্সানুকম্পায, তং ভুঞ্জিত্ৰা অনুমোদনং ৰত্ৰা পক্কামি। সো তেনেৰ পুঞ্ঞেন তেনেৰ সোমনস্সেন ততো চুতো সুগতীসু সংসরন্তো ছ কামাৰচরসম্পত্তিযো অনুভৰিত্ৰা মনুস্সেসু চক্কৰত্তিসম্পত্তিআদযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো সত্থরি পসীদিত্ৰা পব্বজিতো নচিরস্সেৰ অরহা অহোসি।
Giriduggacaro āsintiādikaṃ āyasmato sucintitattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle himavantappadese nesādakule uppanno migasūkarādayo vadhitvā khādanto viharati. Tadā lokanātho lokānuggahaṃ sattānuddayatañca paṭicca himavantamagamāsi. Tadā so nesādo bhagavantaṃ disvā pasannamānaso attano khādanatthāya ānītaṃ varamadhuramaṃsaṃ adāsi. Paṭiggahesi bhagavā tassānukampāya, taṃ bhuñjitvā anumodanaṃ vatvā pakkāmi. So teneva puññena teneva somanassena tato cuto sugatīsu saṃsaranto cha kāmāvacarasampattiyo anubhavitvā manussesu cakkavattisampattiādayo anubhavitvā imasmiṃ buddhuppāde kulagehe nibbatto satthari pasīditvā pabbajito nacirasseva arahā ahosi.
৩৬. চতুপটিসম্ভিদাপঞ্চাভিঞ্ঞাদিভেদং পত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো গিরিদুগ্গচরো আসিন্তিআদিমাহ। গিরতি সদ্দং করোতীতি গিরি, কো সো? সিলাপংসুমযপব্বতো, দুট্ঠু দুক্খেন গমনীযং দুগ্গং, গিরীহি দুগ্গং গিরিদুগ্গং, দুগ্গমোতি অত্থো। তস্মিং গিরিদুগ্গে পব্বতন্তরে চরো চরণসীলো আসিং অহোসিং। অভিজাতোৰ কেসরীতি অভি ৰিসেসেন জাতো নিব্বত্তো কেসরীৰ কেসরসীহো ইৰ গিরিদুগ্গস্মিং চরামীতি অত্থো।
36. Catupaṭisambhidāpañcābhiññādibhedaṃ patvā attano pubbakammaṃ saritvā somanassajāto pubbacaritāpadānaṃ pakāsento giriduggacaro āsintiādimāha. Girati saddaṃ karotīti giri, ko so? Silāpaṃsumayapabbato, duṭṭhu dukkhena gamanīyaṃ duggaṃ, girīhi duggaṃ giriduggaṃ, duggamoti attho. Tasmiṃ giridugge pabbatantare caro caraṇasīlo āsiṃ ahosiṃ. Abhijātova kesarīti abhi visesena jāto nibbatto kesarīva kesarasīho iva giriduggasmiṃ carāmīti attho.
৪০. গিরিদুগ্গং পৰিসিং অহন্তি অহং তদা তেন মংসদানেন পীতিসোমনস্সজাতো পব্বতন্তরং পাৰিসিং। সেসং উত্তানত্থমেৰাতি।
40.Giriduggaṃ pavisiṃ ahanti ahaṃ tadā tena maṃsadānena pītisomanassajāto pabbatantaraṃ pāvisiṃ. Sesaṃ uttānatthamevāti.
সুচিন্তিতত্থেরঅপদানৰণ্ণনা সমত্তা।
Sucintitattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৬. সুচিন্তিতত্থেরঅপদানং • 6. Sucintitattheraapadānaṃ
