| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
2. ஸுத³ஸ்ஸனத்தே²ரஅபதா³னவண்ணனா
2. Sudassanattheraapadānavaṇṇanā
வித்த²தாய நதீ³தீரேதிஆதி³கங் ஆயஸ்மதோ ஸுத³ஸ்ஸனத்தே²ரஸ்ஸ அபதா³னங். அயம்பி புரிமஜினவரேஸு கதாதி⁴காரோ தத்த² தத்த² ப⁴வே கதபுஞ்ஞூபசயோ ஸிகி²ஸ்ஸ ப⁴க³வதோ காலே குலகே³ஹே நிப்³ப³த்தோ வுத்³தி⁴ப்பத்தோ க⁴ராவாஸங் ஸண்ட²பெத்வா வஸந்தோ வித்த²தாய நாம க³ங்கா³ய ஸமீபே பிலக்கு²ப²லிதங் பரியேஸந்தோ தஸ்ஸா தீரே நிஸின்னங் ஜலமானஅக்³கி³ஸிக²ங் இவ ஸிகி²ங் ஸம்மாஸம்பு³த்³த⁴ங் தி³ஸ்வா பஸன்னமானஸோ கேதகீபுப்ப²ங் வண்டேனேவ சி²ந்தி³த்வா பூஜெந்தோ ஏவமாஹ – ‘‘ப⁴ந்தே, யேன ஞாணேன த்வங் ஏவங் மஹானுபா⁴வோ ஸப்³ப³ஞ்ஞுபு³த்³தோ⁴ ஜாதோ, தங் ஞாணங் அஹங் பூஜேமீ’’தி. அத² ப⁴க³வா அனுமோத³னமகாஸி. ஸோ தேன புஞ்ஞேன தே³வமனுஸ்ஸேஸு ஜாதோ உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ ஸத்த²ரி பஸன்னோ பப்³ப³ஜித்வா நசிரஸ்ஸேவ அரஹா அஹோஸி.
Vitthatāya nadītīretiādikaṃ āyasmato sudassanattherassa apadānaṃ. Ayampi purimajinavaresu katādhikāro tattha tattha bhave katapuññūpacayo sikhissa bhagavato kāle kulagehe nibbatto vuddhippatto gharāvāsaṃ saṇṭhapetvā vasanto vitthatāya nāma gaṅgāya samīpe pilakkhuphalitaṃ pariyesanto tassā tīre nisinnaṃ jalamānaaggisikhaṃ iva sikhiṃ sammāsambuddhaṃ disvā pasannamānaso ketakīpupphaṃ vaṇṭeneva chinditvā pūjento evamāha – ‘‘bhante, yena ñāṇena tvaṃ evaṃ mahānubhāvo sabbaññubuddho jāto, taṃ ñāṇaṃ ahaṃ pūjemī’’ti. Atha bhagavā anumodanamakāsi. So tena puññena devamanussesu jāto ubhayasampattiyo anubhavitvā imasmiṃ buddhuppāde ekasmiṃ kulagehe nibbatto satthari pasanno pabbajitvā nacirasseva arahā ahosi.
10. ஸோ அத்தனோ கதகுஸலங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ வித்த²தாய நதீ³தீரேதிஆதி³மாஹ. தத்த² வித்த²தாயாதி வித்த²ரதி பத்த²ரதி வித்தி²ண்ணா ஹோதீதி வித்த²தா, நத³ந்தி ஸத்³த³ங் கரொந்தி இதா க³தா பவத்தாதி நதீ³, நதி³ங் தரந்தா ஏதங் பத்வா திண்ணா நாம ஹொந்தீதி தீரங், தஸ்ஸா வித்த²தாய நதி³யா தீரே தீரஸமீபேதி அத்தோ². கேதகிங் புப்பி²தங் தி³ஸ்வாதி குச்சி²தாகாரேன க³ண்ஹந்தானங் ஹத்த²ங் கண்ட³கோ சி²ந்த³தி விஜ்ஜ²தீதி கேதங், கேதஸ்ஸ ஏஸா கேதகீபுப்ப²ங், தங் தி³ஸ்வா வண்டங் சி²ந்தி³த்வாதி ஸம்ப³ந்தோ⁴.
10. So attano katakusalaṃ saritvā somanassajāto pubbacaritāpadānaṃ pakāsento vitthatāya nadītīretiādimāha. Tattha vitthatāyāti vittharati pattharati vitthiṇṇā hotīti vitthatā, nadanti saddaṃ karonti itā gatā pavattāti nadī, nadiṃ tarantā etaṃ patvā tiṇṇā nāma hontīti tīraṃ, tassā vitthatāya nadiyā tīre tīrasamīpeti attho. Ketakiṃ pupphitaṃ disvāti kucchitākārena gaṇhantānaṃ hatthaṃ kaṇḍako chindati vijjhatīti ketaṃ, ketassa esā ketakīpupphaṃ, taṃ disvā vaṇṭaṃ chinditvāti sambandho.
11. ஸிகி²னோ லோகப³ந்து⁴னோதி ஸிகீ² வுச்சதி அக்³கி³, ஸிகீ²ஸதி³ஸா நீலபீதாதி³பே⁴தா³ ஜலமானா ச²ப்³ப³ண்ணக⁴னரங்ஸியோ யஸ்ஸ ஸோ ஸிகீ², லோகஸ்ஸ ஸகலலோகத்தயஸ்ஸ ப³ந்து⁴ ஞாதகோதி லோகப³ந்து⁴, தஸ்ஸ ஸிகி²னோ லோகப³ந்து⁴னோ கேதகீபுப்ப²ங் வண்டே சி²ந்தி³த்வா பூஜேஸிந்தி ஸம்ப³ந்தோ⁴. ஸேஸங் உத்தானத்த²மேவாதி.
11.Sikhino lokabandhunoti sikhī vuccati aggi, sikhīsadisā nīlapītādibhedā jalamānā chabbaṇṇaghanaraṃsiyo yassa so sikhī, lokassa sakalalokattayassa bandhu ñātakoti lokabandhu, tassa sikhino lokabandhuno ketakīpupphaṃ vaṇṭe chinditvā pūjesinti sambandho. Sesaṃ uttānatthamevāti.
ஸுத³ஸ்ஸனத்தே²ரஅபதா³னவண்ணனா ஸமத்தா.
Sudassanattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 2. ஸுத³ஸ்ஸனத்தே²ரஅபதா³னங் • 2. Sudassanattheraapadānaṃ
