| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
২. সুদস্সনত্থেরঅপদানৰণ্ণনা
2. Sudassanattheraapadānavaṇṇanā
ৰিত্থতায নদীতীরেতিআদিকং আযস্মতো সুদস্সনত্থেরস্স অপদানং। অযম্পি পুরিমজিনৰরেসু কতাধিকারো তত্থ তত্থ ভৰে কতপুঞ্ঞূপচযো সিখিস্স ভগৰতো কালে কুলগেহে নিব্বত্তো ৰুদ্ধিপ্পত্তো ঘরাৰাসং সণ্ঠপেত্ৰা ৰসন্তো ৰিত্থতায নাম গঙ্গায সমীপে পিলক্খুফলিতং পরিযেসন্তো তস্সা তীরে নিসিন্নং জলমানঅগ্গিসিখং ইৰ সিখিং সম্মাসম্বুদ্ধং দিস্ৰা পসন্নমানসো কেতকীপুপ্ফং ৰণ্টেনেৰ ছিন্দিত্ৰা পূজেন্তো এৰমাহ – ‘‘ভন্তে, যেন ঞাণেন ত্ৰং এৰং মহানুভাৰো সব্বঞ্ঞুবুদ্ধো জাতো, তং ঞাণং অহং পূজেমী’’তি। অথ ভগৰা অনুমোদনমকাসি। সো তেন পুঞ্ঞেন দেৰমনুস্সেসু জাতো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো সত্থরি পসন্নো পব্বজিত্ৰা নচিরস্সেৰ অরহা অহোসি।
Vitthatāya nadītīretiādikaṃ āyasmato sudassanattherassa apadānaṃ. Ayampi purimajinavaresu katādhikāro tattha tattha bhave katapuññūpacayo sikhissa bhagavato kāle kulagehe nibbatto vuddhippatto gharāvāsaṃ saṇṭhapetvā vasanto vitthatāya nāma gaṅgāya samīpe pilakkhuphalitaṃ pariyesanto tassā tīre nisinnaṃ jalamānaaggisikhaṃ iva sikhiṃ sammāsambuddhaṃ disvā pasannamānaso ketakīpupphaṃ vaṇṭeneva chinditvā pūjento evamāha – ‘‘bhante, yena ñāṇena tvaṃ evaṃ mahānubhāvo sabbaññubuddho jāto, taṃ ñāṇaṃ ahaṃ pūjemī’’ti. Atha bhagavā anumodanamakāsi. So tena puññena devamanussesu jāto ubhayasampattiyo anubhavitvā imasmiṃ buddhuppāde ekasmiṃ kulagehe nibbatto satthari pasanno pabbajitvā nacirasseva arahā ahosi.
১০. সো অত্তনো কতকুসলং সরিত্ৰা সোমনস্সজাতো পুব্বচরিতাপদানং পকাসেন্তো ৰিত্থতায নদীতীরেতিআদিমাহ। তত্থ ৰিত্থতাযাতি ৰিত্থরতি পত্থরতি ৰিত্থিণ্ণা হোতীতি ৰিত্থতা, নদন্তি সদ্দং করোন্তি ইতা গতা পৰত্তাতি নদী, নদিং তরন্তা এতং পত্ৰা তিণ্ণা নাম হোন্তীতি তীরং, তস্সা ৰিত্থতায নদিযা তীরে তীরসমীপেতি অত্থো। কেতকিং পুপ্ফিতং দিস্ৰাতি কুচ্ছিতাকারেন গণ্হন্তানং হত্থং কণ্ডকো ছিন্দতি ৰিজ্ঝতীতি কেতং, কেতস্স এসা কেতকীপুপ্ফং, তং দিস্ৰা ৰণ্টং ছিন্দিত্ৰাতি সম্বন্ধো।
10. So attano katakusalaṃ saritvā somanassajāto pubbacaritāpadānaṃ pakāsento vitthatāya nadītīretiādimāha. Tattha vitthatāyāti vittharati pattharati vitthiṇṇā hotīti vitthatā, nadanti saddaṃ karonti itā gatā pavattāti nadī, nadiṃ tarantā etaṃ patvā tiṇṇā nāma hontīti tīraṃ, tassā vitthatāya nadiyā tīre tīrasamīpeti attho. Ketakiṃ pupphitaṃ disvāti kucchitākārena gaṇhantānaṃ hatthaṃ kaṇḍako chindati vijjhatīti ketaṃ, ketassa esā ketakīpupphaṃ, taṃ disvā vaṇṭaṃ chinditvāti sambandho.
১১. সিখিনো লোকবন্ধুনোতি সিখী ৰুচ্চতি অগ্গি, সিখীসদিসা নীলপীতাদিভেদা জলমানা ছব্বণ্ণঘনরংসিযো যস্স সো সিখী, লোকস্স সকললোকত্তযস্স বন্ধু ঞাতকোতি লোকবন্ধু, তস্স সিখিনো লোকবন্ধুনো কেতকীপুপ্ফং ৰণ্টে ছিন্দিত্ৰা পূজেসিন্তি সম্বন্ধো। সেসং উত্তানত্থমেৰাতি।
11.Sikhino lokabandhunoti sikhī vuccati aggi, sikhīsadisā nīlapītādibhedā jalamānā chabbaṇṇaghanaraṃsiyo yassa so sikhī, lokassa sakalalokattayassa bandhu ñātakoti lokabandhu, tassa sikhino lokabandhuno ketakīpupphaṃ vaṇṭe chinditvā pūjesinti sambandho. Sesaṃ uttānatthamevāti.
সুদস্সনত্থেরঅপদানৰণ্ণনা সমত্তা।
Sudassanattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ২. সুদস্সনত্থেরঅপদানং • 2. Sudassanattheraapadānaṃ
