| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
2. සුදස්‌සනත්‌ථෙරඅපදානවණ්‌ණනා
2. Sudassanattheraapadānavaṇṇanā
විත්‌ථතාය නදීතීරෙතිආදිකං ආයස්‌මතො සුදස්‌සනත්‌ථෙරස්‌ස අපදානං. අයම්‌පි පුරිමජිනවරෙසු කතාධිකාරො තත්‌ථ තත්‌ථ භවෙ කතපුඤ්‌ඤූපචයො සිඛිස්‌ස භගවතො කාලෙ කුලගෙහෙ නිබ්‌බත්‌තො වුද්‌ධිප්‌පත්‌තො ඝරාවාසං සණ්‌ඨපෙත්‌වා වසන්‌තො විත්‌ථතාය නාම ගඞ්‌ගාය සමීපෙ පිලක්‌ඛුඵලිතං පරියෙසන්‌තො තස්‌සා තීරෙ නිසින්‌නං ජලමානඅග්‌ගිසිඛං ඉව සිඛිං සම්‌මාසම්‌බුද්‌ධං දිස්‌වා පසන්‌නමානසො කෙතකීපුප්‌ඵං වණ්‌ටෙනෙව ඡින්‌දිත්‌වා පූජෙන්‌තො එවමාහ – ‘‘භන්‌තෙ, යෙන ඤාණෙන ත්‌වං එවං මහානුභාවො සබ්‌බඤ්‌ඤුබුද්‌ධො ජාතො, තං ඤාණං අහං පූජෙමී’’ති. අථ භගවා අනුමොදනමකාසි. සො තෙන පුඤ්‌ඤෙන දෙවමනුස්‌සෙසු ජාතො උභයසම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ එකස්‌මිං කුලගෙහෙ නිබ්‌බත්‌තො සත්‌ථරි පසන්‌නො පබ්‌බජිත්‌වා නචිරස්‌සෙව අරහා අහොසි.
Vitthatāya nadītīretiādikaṃ āyasmato sudassanattherassa apadānaṃ. Ayampi purimajinavaresu katādhikāro tattha tattha bhave katapuññūpacayo sikhissa bhagavato kāle kulagehe nibbatto vuddhippatto gharāvāsaṃ saṇṭhapetvā vasanto vitthatāya nāma gaṅgāya samīpe pilakkhuphalitaṃ pariyesanto tassā tīre nisinnaṃ jalamānaaggisikhaṃ iva sikhiṃ sammāsambuddhaṃ disvā pasannamānaso ketakīpupphaṃ vaṇṭeneva chinditvā pūjento evamāha – ‘‘bhante, yena ñāṇena tvaṃ evaṃ mahānubhāvo sabbaññubuddho jāto, taṃ ñāṇaṃ ahaṃ pūjemī’’ti. Atha bhagavā anumodanamakāsi. So tena puññena devamanussesu jāto ubhayasampattiyo anubhavitvā imasmiṃ buddhuppāde ekasmiṃ kulagehe nibbatto satthari pasanno pabbajitvā nacirasseva arahā ahosi.
10. සො අත්‌තනො කතකුසලං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො විත්‌ථතාය නදීතීරෙතිආදිමාහ. තත්‌ථ විත්‌ථතායාති විත්‌ථරති පත්‌ථරති විත්‌ථිණ්‌ණා හොතීති විත්‌ථතා, නදන්‌ති සද්‌දං කරොන්‌ති ඉතා ගතා පවත්‌තාති නදී, නදිං තරන්‌තා එතං පත්‌වා තිණ්‌ණා නාම හොන්‌තීති තීරං, තස්‌සා විත්‌ථතාය නදියා තීරෙ තීරසමීපෙති අත්‌ථො. කෙතකිං පුප්‌ඵිතං දිස්‌වාති කුච්‌ඡිතාකාරෙන ගණ්‌හන්‌තානං හත්‌ථං කණ්‌ඩකො ඡින්‌දති විජ්‌ඣතීති කෙතං, කෙතස්‌ස එසා කෙතකීපුප්‌ඵං, තං දිස්‌වා වණ්‌ටං ඡින්‌දිත්‌වාති සම්‌බන්‌ධො.
10. So attano katakusalaṃ saritvā somanassajāto pubbacaritāpadānaṃ pakāsento vitthatāya nadītīretiādimāha. Tattha vitthatāyāti vittharati pattharati vitthiṇṇā hotīti vitthatā, nadanti saddaṃ karonti itā gatā pavattāti nadī, nadiṃ tarantā etaṃ patvā tiṇṇā nāma hontīti tīraṃ, tassā vitthatāya nadiyā tīre tīrasamīpeti attho. Ketakiṃ pupphitaṃ disvāti kucchitākārena gaṇhantānaṃ hatthaṃ kaṇḍako chindati vijjhatīti ketaṃ, ketassa esā ketakīpupphaṃ, taṃ disvā vaṇṭaṃ chinditvāti sambandho.
11. සිඛිනො ලොකබන්‌ධුනොති සිඛී වුච්‌චති අග්‌ගි, සිඛීසදිසා නීලපීතාදිභෙදා ජලමානා ඡබ්‌බණ්‌ණඝනරංසියො යස්‌ස සො සිඛී, ලොකස්‌ස සකලලොකත්‌තයස්‌ස බන්‌ධු ඤාතකොති ලොකබන්‌ධු, තස්‌ස සිඛිනො ලොකබන්‌ධුනො කෙතකීපුප්‌ඵං වණ්‌ටෙ ඡින්‌දිත්‌වා පූජෙසින්‌ති සම්‌බන්‌ධො. සෙසං උත්‌තානත්‌ථමෙවාති.
11.Sikhino lokabandhunoti sikhī vuccati aggi, sikhīsadisā nīlapītādibhedā jalamānā chabbaṇṇaghanaraṃsiyo yassa so sikhī, lokassa sakalalokattayassa bandhu ñātakoti lokabandhu, tassa sikhino lokabandhuno ketakīpupphaṃ vaṇṭe chinditvā pūjesinti sambandho. Sesaṃ uttānatthamevāti.
සුදස්‌සනත්‌ථෙරඅපදානවණ්‌ණනා සමත්‌තා.
Sudassanattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 2. සුදස්‌සනත්‌ථෙරඅපදානං • 2. Sudassanattheraapadānaṃ
