| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๘. สูทสุตฺตวณฺณนา
8. Sūdasuttavaṇṇanā
๓๗๔. อาหารสมฺปาทเนน ตํตํอาหารวตฺถุคเต สูเทติ ปคฺฆเรตีติ สูโท, ภตฺตการโกฯ ทหเรหิ มนาปตรํ อเจฺจตพฺพโต อติกฺกมิตพฺพโต อจฺจยา, โภชเน รสวิเสสา, ตสฺมา นานจฺจเยหีติ นานปฺปการรสวิเสเสหีติ อโตฺถฯ เตน วุตฺตํ ‘‘นานจฺจเยหี’’ติอาทิฯ อคฺคียติ อสงฺกรโต วิภชียตีติ อโคฺค, อมฺพิลเมว อโคฺค อมฺพิลโคฺคติ อาห – ‘‘อมฺพิลเคฺคหีติ อมฺพิลโกฎฺฐาเสหี’’ติฯ ทาตุํ อภิหริตพฺพตาย อภิหารา, เทยฺยธมฺมาฯ เตนาห – ‘‘อภิหฎานํ ทายาน’’นฺติฯ อิทํ เม กมฺมฎฺฐานํ อนุโลมํวาติ อิทํ มม กมฺมฎฺฐานํ เอวํ ปวตฺตมานํ อนุโลมาวสานเมว หุตฺวา ติฎฺฐติฯ เอวํ ปุน ปวตฺตมานํ อุสฺสกฺกิตฺวา วิเสสนิพฺพตฺตนตฺถเมว โหตีติ เอวํ นิมิตฺตํ คเหตุํ น สโกฺกติ พาโล อพฺยโตฺต, ปณฺฑิโต ปน สโกฺกติฯ อตฺตโน จิตฺตสฺสาติ อตฺตโน ภาวนาจิตฺตสฺสฯ ปุพฺพภาควิปสฺสนา สติปฎฺฐานาว กถิตา ‘‘สกสฺส จิตฺตสฺส นิมิตฺตํ อุคฺคณฺหาตี’’ติ วุตฺตตฺตาฯ
374. Āhārasampādanena taṃtaṃāhāravatthugate sūdeti paggharetīti sūdo, bhattakārako. Daharehi manāpataraṃ accetabbato atikkamitabbato accayā, bhojane rasavisesā, tasmā nānaccayehīti nānappakārarasavisesehīti attho. Tena vuttaṃ ‘‘nānaccayehī’’tiādi. Aggīyati asaṅkarato vibhajīyatīti aggo, ambilameva aggo ambilaggoti āha – ‘‘ambilaggehīti ambilakoṭṭhāsehī’’ti. Dātuṃ abhiharitabbatāya abhihārā, deyyadhammā. Tenāha – ‘‘abhihaṭānaṃ dāyāna’’nti. Idaṃ me kammaṭṭhānaṃ anulomaṃvāti idaṃ mama kammaṭṭhānaṃ evaṃ pavattamānaṃ anulomāvasānameva hutvā tiṭṭhati. Evaṃ puna pavattamānaṃ ussakkitvā visesanibbattanatthameva hotīti evaṃ nimittaṃ gahetuṃ na sakkoti bālo abyatto, paṇḍito pana sakkoti. Attano cittassāti attano bhāvanācittassa. Pubbabhāgavipassanā satipaṭṭhānāva kathitā ‘‘sakassa cittassa nimittaṃ uggaṇhātī’’ti vuttattā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๘. สูทสุตฺตํ • 8. Sūdasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๘. สูทสุตฺตวณฺณนา • 8. Sūdasuttavaṇṇanā
