| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৮. সুদত্তসুত্তৰণ্ণনা
8. Sudattasuttavaṇṇanā
২৪২. করণীযেনাতি এত্থ করণীযন্তি ৰাণিজ্জকম্মং অধিপ্পেতন্তি তং ৰিৰরন্তো ‘‘অনাথপিণ্ডিকো চা’’তিআদিমাহ। ৰিক্কীযতীতি ৰিক্কযং গচ্ছতি। তথেৰ করোতীতি যথা রাজগহসেট্ঠিনা সাৰত্থিং গন্ত্ৰা কতং, তথেৰ রাজগহং গন্ত্ৰা করোতি। স্ৰাযন্তি অনাথপিণ্ডিকো।
242.Karaṇīyenāti ettha karaṇīyanti vāṇijjakammaṃ adhippetanti taṃ vivaranto ‘‘anāthapiṇḍiko cā’’tiādimāha. Vikkīyatīti vikkayaṃ gacchati. Tatheva karotīti yathā rājagahaseṭṭhinā sāvatthiṃ gantvā kataṃ, tatheva rājagahaṃ gantvā karoti. Svāyanti anāthapiṇḍiko.
তং দিৰসন্তি যং দিৰসং অনাথপিণ্ডিকো, গহপতি, রাজগহসমীপং উপগতো, তং দিৰসং। পণ্ণন্তি সাসনং। ন সুণীতি অসুণন্তো ‘‘পণ্ণং ন সুণী’’তি ৰুত্তো। ধম্মগারৰেন হি সো সেট্ঠি অঞ্ঞং কিচ্চং তিণাযপি ন মঞ্ঞি। তেনাহ ‘‘ধম্মস্সৰনত্থাযা’’তিআদি। দারকরূপানন্তি দারকানং। অনত্থন্তরকরো হি রূপ-সদ্দো যথা ‘‘গোরূপান’’ন্তি। পঞ্চৰণ্ণন্তি খুদ্দিকাদিভেদং পঞ্চপ্পকারং পীতিং পটিলভি। অনুক্কমেন হি তা এতস্স সম্ভৰন্তি। ‘‘সীসেন উট্ঠায…পে॰… গচ্ছতী’’তি পদং পীতিসমুট্ঠানরূপৰসেন লক্খেত্ৰা ৰুত্তং।
Taṃ divasanti yaṃ divasaṃ anāthapiṇḍiko, gahapati, rājagahasamīpaṃ upagato, taṃ divasaṃ. Paṇṇanti sāsanaṃ. Na suṇīti asuṇanto ‘‘paṇṇaṃ na suṇī’’ti vutto. Dhammagāravena hi so seṭṭhi aññaṃ kiccaṃ tiṇāyapi na maññi. Tenāha ‘‘dhammassavanatthāyā’’tiādi. Dārakarūpānanti dārakānaṃ. Anatthantarakaro hi rūpa-saddo yathā ‘‘gorūpāna’’nti. Pañcavaṇṇanti khuddikādibhedaṃ pañcappakāraṃ pītiṃ paṭilabhi. Anukkamena hi tā etassa sambhavanti. ‘‘Sīsena uṭṭhāya…pe… gacchatī’’ti padaṃ pītisamuṭṭhānarūpavasena lakkhetvā vuttaṃ.
সিৰথিকায ৰসতীতি সিৰথিকায সমীপে ৰসতি। সুসানস্সাসন্নট্ঠানে হি সো ৰিহারো। অথস্সাতি অথস্স অনাথপিণ্ডিকস্স ‘‘অকালো…পে॰… উপসঙ্কমিস্সামী’’তি এতং অহোসি। বুদ্ধগতায সতিযাতি অঞ্ঞং কিঞ্চি অচিন্তেত্ৰা বুদ্ধগতায এৰ সতিযা সযনৰরগতো নিপজ্জি। তেন ৰুত্তং ‘‘তং দিৰস’’ন্তিআদি।
Sivathikāya vasatīti sivathikāya samīpe vasati. Susānassāsannaṭṭhāne hi so vihāro. Athassāti athassa anāthapiṇḍikassa ‘‘akālo…pe… upasaṅkamissāmī’’ti etaṃ ahosi. Buddhagatāya satiyāti aññaṃ kiñci acintetvā buddhagatāya eva satiyā sayanavaragato nipajji. Tena vuttaṃ ‘‘taṃ divasa’’ntiādi.
বলৰপ্পসাদোতি বুদ্ধারম্মণা বলৰতী সদ্ধা। পীতিআলোকোতি পুরিমবুদ্ধেসু চিরকালং পরিচযং গতস্স বলৰতো পসাদস্স ৰসেন ‘‘বুদ্ধো’’তি নামং সৰনমত্তেন উপ্পন্নায উল়ারায পীতিযা সমুট্ঠাপিতো ৰিপস্সনোভাসসদিসো সাতিসযো আলোকো হোতি চিত্তপচ্চযউতুসমুট্ঠানো। তেনাহ ‘‘সব্বতমং ৰিগচ্ছী’’তিআদি। ‘‘দেৰতা হি কতা’’তিপি ৰদন্তি, পুরিমো এৰেত্থ যুত্তো।
Balavappasādoti buddhārammaṇā balavatī saddhā. Pītiālokoti purimabuddhesu cirakālaṃ paricayaṃ gatassa balavato pasādassa vasena ‘‘buddho’’ti nāmaṃ savanamattena uppannāya uḷārāya pītiyā samuṭṭhāpito vipassanobhāsasadiso sātisayo āloko hoti cittapaccayautusamuṭṭhāno. Tenāha ‘‘sabbatamaṃ vigacchī’’tiādi. ‘‘Devatā hi katā’’tipi vadanti, purimo evettha yutto.
অমনুস্সাতি অধিগতৰিসেসা দেৰতা। তা হি সেট্ঠিস্স সম্পত্তিং পচ্চক্খতো পস্সিংসু। তেনাহ ‘‘অযং মহাসেট্ঠী’’তিআদি। অল্লসরীরন্তি তাৰদেৰ ছড্ডিতং অচ্ছিন্নং ৰা কল়েৰরং। অপরম্পীতি মতং কুথিতকুণপং। পরিকিরিংসূতি সমন্ততো ওসরিতা অহেসুং। আলোকো অন্তরধাযিপীতিৰেগস্স মন্দভাৰেন তংসমুট্ঠানরূপানং দুব্বলভাৰতো।
Amanussāti adhigatavisesā devatā. Tā hi seṭṭhissa sampattiṃ paccakkhato passiṃsu. Tenāha ‘‘ayaṃ mahāseṭṭhī’’tiādi. Allasarīranti tāvadeva chaḍḍitaṃ acchinnaṃ vā kaḷevaraṃ. Aparampīti mataṃ kuthitakuṇapaṃ. Parikiriṃsūti samantato osaritā ahesuṃ. Āloko antaradhāyipītivegassa mandabhāvena taṃsamuṭṭhānarūpānaṃ dubbalabhāvato.
ইমিনাৰাতি অধিকারেন সহস্সপদেন এৰ সম্বন্ধিতব্বানি। পদং ৰীতিহরতি এত্থাতি পদৰীতিহারো, পদৰীতিহারট্ঠানং। সমগমনেতি দুতৰিলম্বিতং অকত্ৰা সমগমনে। ততোতি তেসু সোল়সভাগেসু। একো কোট্ঠাসোতি যথাৰুত্তং পদৰীতিহারপদেসং সোল়সধা ভিন্নস্স একো ভাগো। পৰত্তচেতনাতি যথাৰুত্তকলাসঙ্খাতস্স পদেসস্স লঙ্ঘনধাৰনপৰত্তচেতনা। পদং ৰা ৰীতিহরতি এতেনাতি পদৰীতিহারো, তথাপৰত্তা কুসলচেতনা। ‘‘তস্সা ফলং সোল়সধা কত্ৰা’’তি ৰদন্তি। পতিট্ঠহন্তস্স ৰসেন গহিতন্তি যোজনা। ৰিৰট্টনিস্সিতায এৰ রতনত্তযপূজায ধম্মস্সৰনস্স সিক্খাপদসমাদানস্স সরণগমনস্স চ অত্থায গচ্ছতোপি ৰসেন ৰট্টতি। পঠমং ৰুত্তগমনং লোকুত্তরৰিসেসাধিগমস্স একন্তিকং, দুতিযং অনেকন্তিকন্তি ‘‘ৰট্টতিযেৰা’’তি সাসঙ্কৰচনং।
Imināvāti adhikārena sahassapadena eva sambandhitabbāni. Padaṃ vītiharati etthāti padavītihāro, padavītihāraṭṭhānaṃ. Samagamaneti dutavilambitaṃ akatvā samagamane. Tatoti tesu soḷasabhāgesu. Eko koṭṭhāsoti yathāvuttaṃ padavītihārapadesaṃ soḷasadhā bhinnassa eko bhāgo. Pavattacetanāti yathāvuttakalāsaṅkhātassa padesassa laṅghanadhāvanapavattacetanā. Padaṃ vā vītiharati etenāti padavītihāro, tathāpavattā kusalacetanā. ‘‘Tassā phalaṃ soḷasadhā katvā’’ti vadanti. Patiṭṭhahantassa vasena gahitanti yojanā. Vivaṭṭanissitāya eva ratanattayapūjāya dhammassavanassa sikkhāpadasamādānassa saraṇagamanassa ca atthāya gacchatopi vasena vaṭṭati. Paṭhamaṃ vuttagamanaṃ lokuttaravisesādhigamassa ekantikaṃ, dutiyaṃ anekantikanti ‘‘vaṭṭatiyevā’’ti sāsaṅkavacanaṃ.
সোতি অনাথপিণ্ডিকো সেট্ঠি। অনুযুত্তাতি অনুগামিনো সহাযা। তেৰ সন্ধায ৰদতি। ‘‘সিৰকো অমনুস্সো’’তি অপরে। ন কেৰলং ‘‘অনুযুত্তাপি মে অত্থি, কস্মা ভাযামী’’তি এৰং সূরো অহোসি? অথ খো বুদ্ধগতায তিক্খৰিসদসভাৰেন সব্বং পরিস্সযং মদ্দিত্ৰাপি অগমাসীতি দস্সেতুং ‘‘অপিচা’’তিআদি ৰুত্তং। পক্খন্দনলক্খণা হি সদ্ধা, তায যুত্তকো সপ্পুরিসোপি সদ্ধম্মগুণৰসেন সব্বং পরিস্সযং মদ্দিত্ৰা পক্খন্দতীতি দট্ঠব্বং।
Soti anāthapiṇḍiko seṭṭhi. Anuyuttāti anugāmino sahāyā. Teva sandhāya vadati. ‘‘Sivako amanusso’’ti apare. Na kevalaṃ ‘‘anuyuttāpi me atthi, kasmā bhāyāmī’’ti evaṃ sūro ahosi? Atha kho buddhagatāya tikkhavisadasabhāvena sabbaṃ parissayaṃ madditvāpi agamāsīti dassetuṃ ‘‘apicā’’tiādi vuttaṃ. Pakkhandanalakkhaṇā hi saddhā, tāya yuttako sappurisopi saddhammaguṇavasena sabbaṃ parissayaṃ madditvā pakkhandatīti daṭṭhabbaṃ.
সব্বকামসমিদ্ধতা পরিচ্চাগসীলতা উল়ারজ্ঝাসযতা পরদুক্খাপনযকামতা পরেসং হিতেসিতা পরসম্পত্তিপমোদনাতি এৰমাদীনং মহাগুণানং ৰসেন নিচ্চকালং অনাথানং পিণ্ডদাযকত্তা ‘‘অনাথপিণ্ডিকো’’তি এৰং উপ্পন্নং নামং। এৰমাহাতি ‘‘এহি সুদত্তা’’তি এৰং আহ।
Sabbakāmasamiddhatā pariccāgasīlatā uḷārajjhāsayatā paradukkhāpanayakāmatā paresaṃ hitesitā parasampattipamodanāti evamādīnaṃ mahāguṇānaṃ vasena niccakālaṃ anāthānaṃ piṇḍadāyakattā ‘‘anāthapiṇḍiko’’ti evaṃ uppannaṃ nāmaṃ. Evamāhāti ‘‘ehi sudattā’’ti evaṃ āha.
কিলেসপরিনিব্বানেনাতি সব্বসো রাগাদিকিলেসৰূপসমেন। কিলেসৰূপসমন্তি সব্বসো সব্বেসং কিলেসানং ৰূপসমং অগ্গমগ্গেন পত্ৰা। অনুপুব্বিকথন্তি দানাদিকথং। সা হি অনুপুব্বেন কথেতব্বত্তা ‘‘অনুপুব্বিকথা’’তি ৰুচ্চতি। তং সন্ধায ৰুত্তং – ‘‘অথ খো ভগৰা অনুপুব্বিং কথং কথেসি। সেয্যথিদং – দানকথং সীলকথং সগ্গকথং কামানং আদীনৰং ওকারং সংকিলেসং নেক্খম্মে আনিসংসং পকাসেসী’’তি (চূল়ৰ॰ ৩০৫)। মত্থকেতি অনুপুব্বিকথায উপরি পরতো। চত্তারি সচ্চানি পকাসেসীতি যথা মহাসেট্ঠি সহস্সনযপটিমণ্ডিতে সোতাপত্তিফলে পতিট্ঠাতি, এৰং পৰত্তিনিৰত্তিযো সহ হেতুনা ৰিভজন্তো চত্তারি অরিযসচ্চানি পকাসেসীতি।
Kilesaparinibbānenāti sabbaso rāgādikilesavūpasamena. Kilesavūpasamanti sabbaso sabbesaṃ kilesānaṃ vūpasamaṃ aggamaggena patvā. Anupubbikathanti dānādikathaṃ. Sā hi anupubbena kathetabbattā ‘‘anupubbikathā’’ti vuccati. Taṃ sandhāya vuttaṃ – ‘‘atha kho bhagavā anupubbiṃ kathaṃ kathesi. Seyyathidaṃ – dānakathaṃ sīlakathaṃ saggakathaṃ kāmānaṃ ādīnavaṃ okāraṃ saṃkilesaṃ nekkhamme ānisaṃsaṃ pakāsesī’’ti (cūḷava. 305). Matthaketi anupubbikathāya upari parato. Cattāri saccāni pakāsesīti yathā mahāseṭṭhi sahassanayapaṭimaṇḍite sotāpattiphale patiṭṭhāti, evaṃ pavattinivattiyo saha hetunā vibhajanto cattāri ariyasaccāni pakāsesīti.
সুদত্তসুত্তৰণ্ণনা নিট্ঠিতা।
Sudattasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৮. সুদত্তসুত্তং • 8. Sudattasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. সুদত্তসুত্তৰণ্ণনা • 8. Sudattasuttavaṇṇanā
