| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
8. суд̣̇ад̇д̇асуд̇д̇аван̣н̣анаа
8. Sudattasuttavaṇṇanā
242. адтамз гзнажид̣̇зва гаран̣ийязнаад̇и ваан̣иж̇ж̇агаммам̣ ад̇хиббзд̇ам̣. анаат̇абин̣д̣иго жа рааж̇аг̇ахасздти жа ан̃н̃аман̃н̃ам̣ бхаг̇инибад̇игаа хонд̇и. яад̣̇аа рааж̇аг̇ахз удтаанагабхан̣д̣агам̣ махаг̇гхам̣ ход̇и, д̇ад̣̇аа рааж̇аг̇ахасздти д̇ам̣ г̇ахзд̇ваа бан̃жасагадасад̇зхи саавад̇т̇им̣ г̇анд̇ваа яож̇анамад̇д̇з тид̇о ад̇д̇ано ааг̇ад̇абхаавам̣ ж̇аанаабзд̇и. анаат̇абин̣д̣иго бажжуг̇г̇анд̇ваа д̇асса махаасаггаарам̣ гад̇ваа згаяаанам̣ ааробзд̇ваа саавад̇т̇им̣ бависад̇и. со сажз бхан̣д̣ам̣ лахугам̣ виггийяад̇и, виггин̣аад̇и. но жз, бхаг̇инигхарз табзд̇ваа баггамад̇и. анаат̇абин̣д̣игоби д̇ат̇зва гарод̇и. свааяам̣ д̇ад̣̇ааби д̇знзва гаран̣ийязна аг̇амааси. д̇ам̣ санд̇хааязд̇ам̣ вуд̇д̇ам̣.
242. Aṭṭhame kenacideva karaṇīyenāti vāṇijjakammaṃ adhippetaṃ. Anāthapiṇḍiko ca rājagahaseṭṭhi ca aññamaññaṃ bhaginipatikā honti. Yadā rājagahe uṭṭhānakabhaṇḍakaṃ mahagghaṃ hoti, tadā rājagahaseṭṭhi taṃ gahetvā pañcasakaṭasatehi sāvatthiṃ gantvā yojanamatte ṭhito attano āgatabhāvaṃ jānāpeti. Anāthapiṇḍiko paccuggantvā tassa mahāsakkāraṃ katvā ekayānaṃ āropetvā sāvatthiṃ pavisati. So sace bhaṇḍaṃ lahukaṃ vikkīyati, vikkiṇāti. No ce, bhaginighare ṭhapetvā pakkamati. Anāthapiṇḍikopi tatheva karoti. Svāyaṃ tadāpi teneva karaṇīyena agamāsi. Taṃ sandhāyetaṃ vuttaṃ.
д̇ам̣ д̣̇ивасам̣ бана рааж̇аг̇ахасздти яож̇анамад̇д̇з тид̇зна анаат̇абин̣д̣игзна ааг̇ад̇абхааваж̇аананад̇т̇ам̣ бзсид̇ам̣ бан̣н̣ам̣ на сун̣и, д̇хаммассаванад̇т̇ааяа вихаарам̣ аг̇амааси. со д̇хаммагат̇ам̣ суд̇ваа сваад̇анааяа б̣уд̣̇д̇хаббамукам̣ бхигкусан̇гхам̣ ниманд̇зд̇ваа ад̇д̇ано гхарз уд̣̇д̇ханакан̣аабанад̣̇аарупааланаад̣̇ийни гаарзси. анаат̇абин̣д̣игоби ‘‘ид̣̇аани маяхам̣ бажжуг̇г̇аманам̣ гариссад̇и, ид̣̇аани гариссад̇ий’’д̇и гхарад̣̇ваарзби бажжуг̇г̇аманам̣ алабхид̇ваа анд̇огхарам̣ бавидто бадисант̇аарамби на б̣ахум̣ алад̇т̇а. ‘‘гим̣, махаасздти, гусалам̣ д̣̇аарагаруубаанам̣? наси маг̇г̇з гиланд̇о’’д̇и? зд̇д̇агова бадисант̇ааро ахоси. со д̇асса махааб̣яаабаарам̣ д̣̇исваа, ‘‘гим̣ ну д̇з, г̇ахабад̇и, ааваахо ваа бхависсад̇ий’’д̇и? канд̇хагз (жуул̣ава. 304) ааг̇ад̇анаязнзва гат̇ам̣ бавад̇д̇зд̇ваа д̇асса мукад̇о б̣уд̣̇д̇хасад̣̇д̣̇ам̣ суд̇ваа бан̃жаван̣н̣ам̣ бийд̇им̣ бадилабхи. саа д̇асса сийсзна удтааяа яаава баад̣̇абидтияаа, баад̣̇абидтияаа удтааяа яаава сийсаа г̇ажчад̇и, убхад̇о удтааяа маж̇жхз осарад̇и, маж̇жхз удтааяа убхад̇о г̇ажчад̇и. со бийд̇ияаа ниранд̇арам̣ пудто, ‘‘б̣уд̣̇д̇ход̇и д̇вам̣, г̇ахабад̇и, вад̣̇зси? б̣уд̣̇д̇хо д̇аахам̣, г̇ахабад̇и, вад̣̇аамий’’д̇и звам̣ д̇игкад̇д̇ум̣ бужчид̇ваа, ‘‘гхособи ко зсо д̣̇уллабхо логасмим̣ яад̣̇ид̣̇ам̣ б̣уд̣̇д̇хо’’д̇и ааха. ид̣̇ам̣ санд̇хааяа вуд̇д̇ам̣ ‘‘ассоси ко анаат̇абин̣д̣иго, г̇ахабад̇и, б̣уд̣̇д̇хо гира логз уббанно’’д̇и.
Taṃ divasaṃ pana rājagahaseṭṭhi yojanamatte ṭhitena anāthapiṇḍikena āgatabhāvajānanatthaṃ pesitaṃ paṇṇaṃ na suṇi, dhammassavanatthāya vihāraṃ agamāsi. So dhammakathaṃ sutvā svātanāya buddhappamukhaṃ bhikkhusaṅghaṃ nimantetvā attano ghare uddhanakhaṇāpanadāruphālanādīni kāresi. Anāthapiṇḍikopi ‘‘idāni mayhaṃ paccuggamanaṃ karissati, idāni karissatī’’ti gharadvārepi paccuggamanaṃ alabhitvā antogharaṃ paviṭṭho paṭisanthārampi na bahuṃ alattha. ‘‘Kiṃ, mahāseṭṭhi, kusalaṃ dārakarūpānaṃ? Nasi magge kilanto’’ti? Ettakova paṭisanthāro ahosi. So tassa mahābyāpāraṃ disvā, ‘‘kiṃ nu te, gahapati, āvāho vā bhavissatī’’ti? Khandhake (cūḷava. 304) āgatanayeneva kathaṃ pavattetvā tassa mukhato buddhasaddaṃ sutvā pañcavaṇṇaṃ pītiṃ paṭilabhi. Sā tassa sīsena uṭṭhāya yāva pādapiṭṭhiyā, pādapiṭṭhiyā uṭṭhāya yāva sīsā gacchati, ubhato uṭṭhāya majjhe osarati, majjhe uṭṭhāya ubhato gacchati. So pītiyā nirantaraṃ phuṭṭho, ‘‘buddhoti tvaṃ, gahapati, vadesi? Buddho tāhaṃ, gahapati, vadāmī’’ti evaṃ tikkhattuṃ pucchitvā, ‘‘ghosopi kho eso dullabho lokasmiṃ yadidaṃ buddho’’ti āha. Idaṃ sandhāya vuttaṃ ‘‘assosi kho anāthapiṇḍiko, gahapati, buddho kira loke uppanno’’ti.
зд̇ад̣̇ахоси агаало ко аж̇ж̇аад̇и со гира д̇ам̣ сздтим̣ бужчи, ‘‘гухим̣ г̇ахабад̇и сад̇т̇аа вихарад̇ий’’д̇и? ат̇асса со – ‘‘б̣уд̣̇д̇хаа наама д̣̇ураасад̣̇аа аасийвисасад̣̇исаа хонд̇и, сад̇т̇аа сиват̇игааяа васад̇и, на саггаа д̇ад̇т̇а д̇умхаад̣̇исзхи имааяа взлааяа г̇анд̇у’’нд̇и аажигки. ат̇асса зд̇ад̣̇ахоси. б̣уд̣̇д̇хаг̇ад̇ааяа сад̇ияаа нибаж̇ж̇ийд̇и д̇ам̣д̣̇ивасам̣ гирасса бхан̣д̣асагадзсу ваа убадтаагзсу ваа жид̇д̇амби на уббаж̇ж̇и, сааяамаасамби на агааси, сад̇д̇абхуумигам̣ бана баасаад̣̇ам̣ ааруяха субан̃н̃ад̇д̇аалан̇гад̇аварасаяанз ‘‘б̣уд̣̇д̇хо б̣уд̣̇д̇хо’’д̇и саж̇жхааяам̣ гаронд̇ова нибаж̇ж̇ид̇ваа нид̣̇д̣̇ам̣ оггами. д̇зна вуд̇д̇ам̣ ‘‘б̣уд̣̇д̇хаг̇ад̇ааяа сад̇ияаа нибаж̇ж̇ий’’д̇и.
Etadahosi akālo kho ajjāti so kira taṃ seṭṭhiṃ pucchi, ‘‘kuhiṃ gahapati satthā viharatī’’ti? Athassa so – ‘‘buddhā nāma durāsadā āsīvisasadisā honti, satthā sivathikāya vasati, na sakkā tattha tumhādisehi imāya velāya gantu’’nti ācikkhi. Athassa etadahosi. Buddhagatāya satiyā nipajjīti taṃdivasaṃ kirassa bhaṇḍasakaṭesu vā upaṭṭhākesu vā cittampi na uppajji, sāyamāsampi na akāsi, sattabhūmikaṃ pana pāsādaṃ āruyha supaññattālaṅkatavarasayane ‘‘buddho buddho’’ti sajjhāyaṃ karontova nipajjitvā niddaṃ okkami. Tena vuttaṃ ‘‘buddhagatāya satiyā nipajjī’’ti.
рад̇д̇ияаа суд̣̇ам̣ д̇игкад̇д̇ум̣ удтааси бабхаад̇анд̇и ман̃н̃амаанод̇и батамаяаамз д̇аава вийд̇ивад̇д̇з удтааяа б̣уд̣̇д̇хам̣ ануссари, ат̇асса б̣алаваббасаад̣̇о уд̣̇абаад̣̇и, бийд̇иаалого ахоси, саб̣б̣ад̇амам̣ виг̇ажчи, д̣̇ийбасахассуж̇ж̇алам̣ вияа жанд̣̇удтаанам̣ суурияудтаанам̣ вияа жа ж̇аад̇ам̣. со ‘‘бабаад̣̇ам̣ аабанно вад̇амхи, суурияо уг̇г̇ад̇о’’д̇и удтааяа аагаасад̇алз тид̇ам̣ жанд̣̇ам̣ уллогзд̇ваа ‘‘згова яаамо г̇ад̇о, ан̃н̃з д̣̇вз ад̇т̇ий’’д̇и буна бависид̇ваа нибаж̇ж̇и. зд̇знубааязна маж̇жхимаяаамаавасаанзби бажчимаяаамаавасаанзбийд̇и д̇игкад̇д̇ум̣ удтааси. бажчимаяаамаавасаанз бана б̣алавабажжуусзязва удтааяа аагаасад̇алам̣ ааг̇анд̇ваа махаад̣̇ваараабхимукова ахоси, сад̇д̇абхуумигад̣̇ваарам̣ саяамзва вивадам̣ ахоси. со баасаад̣̇аа оруяха анд̇аравийт̇им̣ бадибаж̇ж̇и.
Rattiyā sudaṃ tikkhattuṃ uṭṭhāsi pabhātanti maññamānoti paṭhamayāme tāva vītivatte uṭṭhāya buddhaṃ anussari, athassa balavappasādo udapādi, pītiāloko ahosi, sabbatamaṃ vigacchi, dīpasahassujjalaṃ viya canduṭṭhānaṃ sūriyuṭṭhānaṃ viya ca jātaṃ. So ‘‘papādaṃ āpanno vatamhi, sūriyo uggato’’ti uṭṭhāya ākāsatale ṭhitaṃ candaṃ ulloketvā ‘‘ekova yāmo gato, aññe dve atthī’’ti puna pavisitvā nipajji. Etenupāyena majjhimayāmāvasānepi pacchimayāmāvasānepīti tikkhattuṃ uṭṭhāsi. Pacchimayāmāvasāne pana balavapaccūseyeva uṭṭhāya ākāsatalaṃ āgantvā mahādvārābhimukhova ahosi, sattabhūmikadvāraṃ sayameva vivaṭaṃ ahosi. So pāsādā oruyha antaravīthiṃ paṭipajji.
виварим̣сууд̇и ‘‘аяам̣ махаасздти ‘б̣уд̣̇д̇хубадтаанам̣ г̇амиссаамий’д̇и нигканд̇о, батамад̣̇ассанзнзва сод̇аабад̇д̇ипалз бад̇идтааяа д̇ин̣н̣ам̣ рад̇анаанам̣ аг̇г̇убадтааго худ̇ваа асад̣̇исам̣ сан̇гхаараамам̣ гад̇ваа жаад̇уд̣̇д̣̇исасса арияаг̇ан̣асса анаавадад̣̇вааро бхависсад̇и, на яуд̇д̇амасса д̣̇ваарам̣ бид̣̇ахид̇у’’нд̇и жинд̇зд̇ваа виварим̣су. анд̇арад̇хааяийд̇и рааж̇аг̇ахам̣ гира аагин̣н̣амануссам̣ анд̇онаг̇арз нава годияо, б̣ахинаг̇арз наваад̇и д̇ам̣ убаниссааяа адтаараса мануссагодияо васанд̇и. авзлааяа мад̇амануссз б̣ахи нийхарид̇ум̣ асаггонд̇аа аддаалагз тад̇ваа б̣ахид̣̇ваарз кибанд̇и. махаасздти наг̇арад̇о б̣ахинигканд̇амад̇д̇ова алласарийрам̣ баад̣̇зна аггами, абарамби бидтибаад̣̇зна бахари. магкигаа уббад̇ид̇ваа баригирим̣су. д̣̇уг̇г̇анд̇хо наасабудам̣ абхихани. б̣уд̣̇д̇хаббасаад̣̇о д̇ануд̇д̇ам̣ г̇ад̇о. д̇знасса аалого анд̇арад̇хааяи, анд̇хагааро баад̇урахоси. сад̣̇д̣̇амануссаавзсийд̇и ‘‘сздтисса уссаахам̣ ж̇анзссаамий’’д̇и суван̣н̣агин̇гин̣игам̣ гхаддзнд̇о вияа мад̇хурассарзна сад̣̇д̣̇ам̣ ануссаавзси.
Vivariṃsūti ‘‘ayaṃ mahāseṭṭhi ‘buddhupaṭṭhānaṃ gamissāmī’ti nikkhanto, paṭhamadassaneneva sotāpattiphale patiṭṭhāya tiṇṇaṃ ratanānaṃ aggupaṭṭhāko hutvā asadisaṃ saṅghārāmaṃ katvā cātuddisassa ariyagaṇassa anāvaṭadvāro bhavissati, na yuttamassa dvāraṃ pidahitu’’nti cintetvā vivariṃsu. Antaradhāyīti rājagahaṃ kira ākiṇṇamanussaṃ antonagare nava koṭiyo, bahinagare navāti taṃ upanissāya aṭṭhārasa manussakoṭiyo vasanti. Avelāya matamanusse bahi nīharituṃ asakkontā aṭṭālake ṭhatvā bahidvāre khipanti. Mahāseṭṭhi nagarato bahinikkhantamattova allasarīraṃ pādena akkami, aparampi piṭṭhipādena pahari. Makkhikā uppatitvā parikiriṃsu. Duggandho nāsapuṭaṃ abhihani. Buddhappasādo tanuttaṃ gato. Tenassa āloko antaradhāyi, andhakāro pāturahosi. Saddamanussāvesīti ‘‘seṭṭhissa ussāhaṃ janessāmī’’ti suvaṇṇakiṅkiṇikaṃ ghaṭṭento viya madhurassarena saddaṃ anussāvesi.
сад̇ам̣ ган̃н̃аасахассаанийд̇и буримабад̣̇ааниби иминаава сахассабад̣̇зна сад̣̇д̇хим̣ самб̣анд̇ханийяаани. яат̇зва хи сад̇ам̣ ган̃н̃аасахассаани, сад̇ам̣ сахассаани хад̇т̇ий, сад̇ам̣ сахассаани ассаа, сад̇ам̣ сахассаани рат̇аад̇и аяамзд̇т̇а ад̇т̇о. ид̇и згзгасад̇асахассамзва д̣̇ийбид̇ам̣. бад̣̇авийд̇ихаарассаад̇и бад̣̇авийд̇ихааро наама самаг̇аманз д̣̇виннам̣ бад̣̇аанам̣ анд̇арз мудтирад̇анамад̇д̇ам̣. галам̣ нааг̇гханд̇и сол̣асинд̇и д̇ам̣ згам̣ бад̣̇авийд̇ихаарам̣ сол̣асабхааг̇з гад̇ваа д̇ад̇о зго годтаасо буна сол̣асад̇хаа, д̇ад̇о зго сол̣асад̇хаад̇и звам̣ сол̣аса ваарз сол̣асад̇хаа бхиннасса зго годтаасо сол̣асигалаа наама, д̇ам̣ сол̣асигалам̣ зд̇аани жад̇д̇аари сад̇асахассаани на аг̇гханд̇и. ид̣̇ам̣ вуд̇д̇ам̣ ход̇и – сад̇ам̣ хад̇т̇исахассаани сад̇ам̣ ассасахассаани сад̇ам̣ рат̇асахассаани сад̇ам̣ ган̃н̃аасахассаани, д̇аа жа ко аамуггаман̣игун̣д̣алаа сагалаж̇амб̣уд̣̇ийбарааж̇ад̇хийд̇аро ваад̇и имасмаа зд̇д̇агаа лаабхаа вихаарам̣ г̇ажчанд̇асса д̇асмим̣ сол̣асигаласан̇каад̇з бад̣̇зсз бавад̇д̇ажзд̇анаава уд̇д̇арид̇араад̇и. ид̣̇ам̣ бана вихаараг̇аманам̣ гасса васзна г̇ахид̇анд̇и? вихаарам̣ г̇анд̇ваа ананд̇арааязна сод̇аабад̇д̇ипалз бад̇идтаханд̇асса. ‘‘г̇анд̇хамаалаад̣̇ийхи бууж̇ам̣ гариссаами , жзд̇ияам̣ ванд̣̇иссаами, д̇хаммам̣ соссаами, д̣̇ийбабууж̇ам̣ гариссаами, сан̇гхам̣ ниманд̇зд̇ваа д̣̇аанам̣ д̣̇ассаами, сигкаабад̣̇зсу ваа саран̣зсу ваа бад̇идтахиссаамий’’д̇и г̇ажчад̇оби васзна ваддад̇иязва.
Sataṃ kaññāsahassānīti purimapadānipi imināva sahassapadena saddhiṃ sambandhanīyāni. Yatheva hi sataṃ kaññāsahassāni, sataṃ sahassāni hatthī, sataṃ sahassāni assā, sataṃ sahassāni rathāti ayamettha attho. Iti ekekasatasahassameva dīpitaṃ. Padavītihārassāti padavītihāro nāma samagamane dvinnaṃ padānaṃ antare muṭṭhiratanamattaṃ. Kalaṃ nāgghanti soḷasinti taṃ ekaṃ padavītihāraṃ soḷasabhāge katvā tato eko koṭṭhāso puna soḷasadhā, tato eko soḷasadhāti evaṃ soḷasa vāre soḷasadhā bhinnassa eko koṭṭhāso soḷasikalā nāma, taṃ soḷasikalaṃ etāni cattāri satasahassāni na agghanti. Idaṃ vuttaṃ hoti – sataṃ hatthisahassāni sataṃ assasahassāni sataṃ rathasahassāni sataṃ kaññāsahassāni, tā ca kho āmukkamaṇikuṇḍalā sakalajambudīparājadhītaro vāti imasmā ettakā lābhā vihāraṃ gacchantassa tasmiṃ soḷasikalasaṅkhāte padese pavattacetanāva uttaritarāti. Idaṃ pana vihāragamanaṃ kassa vasena gahitanti? Vihāraṃ gantvā anantarāyena sotāpattiphale patiṭṭhahantassa. ‘‘Gandhamālādīhi pūjaṃ karissāmi , cetiyaṃ vandissāmi, dhammaṃ sossāmi, dīpapūjaṃ karissāmi, saṅghaṃ nimantetvā dānaṃ dassāmi, sikkhāpadesu vā saraṇesu vā patiṭṭhahissāmī’’ti gacchatopi vasena vaṭṭatiyeva.
анд̇хагааро анд̇арад̇хааяийд̇и со гира жинд̇зси – ‘‘ахам̣ згагод̇и сан̃н̃ам̣ гароми, ануяуд̇д̇ааби мз ад̇т̇и, гасмаа бхааяаамий’’д̇и сууро ахоси. ат̇асса б̣алаваа б̣уд̣̇д̇хаббасаад̣̇о уд̣̇абаад̣̇и. д̇асмаа анд̇хагааро анд̇арад̇хааяийд̇и. сзсаваарзсуби зсзва наяо. абижа бурад̇о бурад̇о г̇ажчанд̇о бхим̣санагз сусаанамаг̇г̇з адтигасан̇калигасамам̣салохид̇анд̇иаад̣̇ийни анзгавид̇хаани гун̣абаани ад̣̇д̣̇аса . сон̣асин̇г̇аалаад̣̇ийнам̣ сад̣̇д̣̇ам̣ ассоси. д̇ам̣ саб̣б̣ам̣ бариссаяам̣ бунаббунам̣ б̣уд̣̇д̇хаг̇ад̇ам̣ басаад̣̇ам̣ вад̣дхзд̇ваа мад̣̇д̣̇анд̇о аг̇амаасиязва.
Andhakāro antaradhāyīti so kira cintesi – ‘‘ahaṃ ekakoti saññaṃ karomi, anuyuttāpi me atthi, kasmā bhāyāmī’’ti sūro ahosi. Athassa balavā buddhappasādo udapādi. Tasmā andhakāro antaradhāyīti. Sesavāresupi eseva nayo. Apica purato purato gacchanto bhiṃsanake susānamagge aṭṭhikasaṅkhalikasamaṃsalohitantiādīni anekavidhāni kuṇapāni addasa . Soṇasiṅgālādīnaṃ saddaṃ assosi. Taṃ sabbaṃ parissayaṃ punappunaṃ buddhagataṃ pasādaṃ vaḍḍhetvā maddanto agamāsiyeva.
зхи суд̣̇ад̇д̇аад̇и со гира сздти г̇ажчамаанова жинд̇зси – ‘‘имасмим̣ логз б̣ахуу бууран̣агассабаад̣̇аяо д̇ид̇т̇ияаа ‘маяам̣ б̣уд̣̇д̇хаа маяам̣ б̣уд̣̇д̇хаа’д̇и вад̣̇анд̇и, гат̇ам̣ ну ко ахам̣ сад̇т̇у б̣уд̣̇д̇хабхаавам̣ ж̇аанзяяа’’нд̇и? ат̇асса зд̇ад̣̇ахоси – ‘‘маяхам̣ г̇ун̣авасзна уббаннам̣ наамам̣ махааж̇ано ж̇аанаад̇и, гулад̣̇ад̇д̇ияам̣ бана мз наамам̣ ан̃н̃ад̇ра маяаа на гожи ж̇аанаад̇и. сажз б̣уд̣̇д̇хо бхависсад̇и, гулад̣̇ад̇д̇иганаамзна мам̣ аалабиссад̇ий’’д̇и. сад̇т̇аа д̇асса жид̇д̇ам̣ н̃ад̇ваа звамааха.
Ehi sudattāti so kira seṭṭhi gacchamānova cintesi – ‘‘imasmiṃ loke bahū pūraṇakassapādayo titthiyā ‘mayaṃ buddhā mayaṃ buddhā’ti vadanti, kathaṃ nu kho ahaṃ satthu buddhabhāvaṃ jāneyya’’nti? Athassa etadahosi – ‘‘mayhaṃ guṇavasena uppannaṃ nāmaṃ mahājano jānāti, kuladattiyaṃ pana me nāmaṃ aññatra mayā na koci jānāti. Sace buddho bhavissati, kuladattikanāmena maṃ ālapissatī’’ti. Satthā tassa cittaṃ ñatvā evamāha.
бариниб̣б̣уд̇од̇и гилзсабариниб̣б̣аанзна бариниб̣б̣уд̇о. аасад̇д̇ияод̇и д̇ан̣хааяо. санд̇инд̇и гилзсавуубасамам̣. баббуяяаад̇и бад̇ваа. ид̣̇ан̃жа бана вад̇ваа сад̇т̇аа д̇асса анубуб̣б̣игат̇ам̣ гат̇зд̇ваа мад̇т̇агз жад̇д̇аари сажжаани багаасзси. сздти д̇хаммад̣̇зсанам̣ суд̇ваа сод̇аабад̇д̇ипалз бад̇идтааяа б̣уд̣̇д̇хаббамукам̣ бхигкусан̇гхам̣ ниманд̇зд̇ваа бунад̣̇ивасад̇о бадтааяа махаад̣̇аанам̣ д̣̇аад̇ум̣ аарабхи. б̣имб̣исаараад̣̇аяо сздтисса саасанам̣ бзсзнд̇и – ‘‘д̇вам̣ ааг̇анд̇уго, яам̣ наббаход̇и, д̇ам̣ ид̇о аахараабзхий’’д̇и. со ‘‘алам̣ д̇умхз б̣ахугижжаа’’д̇и саб̣б̣з бадигкибид̇ваа бан̃жахи сагадасад̇зхи аанийд̇авибхавзна сад̇д̇аахам̣ махаад̣̇аанам̣ ад̣̇ааси. д̣̇аанабарияосаанз жа бхаг̇аванд̇ам̣ саавад̇т̇ияам̣ вассааваасам̣ бадиж̇аанаабзд̇ваа рааж̇аг̇ахасса жа саавад̇т̇ияаа жа анд̇арз яож̇анз яож̇анз сад̇асахассам̣ д̣̇ад̇ваа бан̃жажад̇д̇аалийса вихаарз гаарзнд̇о саавад̇т̇им̣ г̇анд̇ваа ж̇зд̇аванамахаавихаарам̣ гаарзд̇ваа б̣уд̣̇д̇хаббамукасса бхигкусан̇гхасса нияяаад̣̇зсийд̇и. адтамам̣.
Parinibbutoti kilesaparinibbānena parinibbuto. Āsattiyoti taṇhāyo. Santinti kilesavūpasamaṃ. Pappuyyāti patvā. Idañca pana vatvā satthā tassa anupubbikathaṃ kathetvā matthake cattāri saccāni pakāsesi. Seṭṭhi dhammadesanaṃ sutvā sotāpattiphale patiṭṭhāya buddhappamukhaṃ bhikkhusaṅghaṃ nimantetvā punadivasato paṭṭhāya mahādānaṃ dātuṃ ārabhi. Bimbisārādayo seṭṭhissa sāsanaṃ pesenti – ‘‘tvaṃ āgantuko, yaṃ nappahoti, taṃ ito āharāpehī’’ti. So ‘‘alaṃ tumhe bahukiccā’’ti sabbe paṭikkhipitvā pañcahi sakaṭasatehi ānītavibhavena sattāhaṃ mahādānaṃ adāsi. Dānapariyosāne ca bhagavantaṃ sāvatthiyaṃ vassāvāsaṃ paṭijānāpetvā rājagahassa ca sāvatthiyā ca antare yojane yojane satasahassaṃ datvā pañcacattālīsa vihāre kārento sāvatthiṃ gantvā jetavanamahāvihāraṃ kāretvā buddhappamukhassa bhikkhusaṅghassa niyyādesīti. Aṭṭhamaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 8. суд̣̇ад̇д̇асуд̇д̇ам̣ • 8. Sudattasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 8. суд̣̇ад̇д̇асуд̇д̇аван̣н̣анаа • 8. Sudattasuttavaṇṇanā
