| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
2. ஸுத்³த⁴காளகஸிக்கா²பத³வண்ணனா
2. Suddhakāḷakasikkhāpadavaṇṇanā
காளகானந்தி ஸபா⁴வேன வா ரஜனேன வா காளகானங். யதா²ஹ ‘‘காளகங் நாம த்³வே காளகானி ஜாதியா காளகங் வா ரஜனகாளகங் வா’’தி. அஞ்ஞேஹி அமிஸ்ஸிதானந்தி அஞ்ஞேஹி அமிஸ்ஸிதகாளகானந்தி அத்தோ². ‘‘யதா² பட²மே ‘ஏகேனாபி கோஸியங்ஸுனா’தி (கங்கா²॰ அட்ட²॰ கோஸியஸிக்கா²பத³வண்ணனா) வுத்தங், ததா² இதா⁴பி ‘ஏகேனாபி அஞ்ஞேன அமிஸ்ஸெத்வா’தி அவுத்தத்தா அஞ்ஞேன பன மிஸ்ஸகபோ⁴கே³பி அபஞ்ஞாயமானரூபகங் சே ‘ஸுத்³த⁴காளக’மிச்சேவ வுச்சதீ’’தி (வஜிர॰ டீ॰ பாராஜிக 547) வத³ந்தி.
Kāḷakānanti sabhāvena vā rajanena vā kāḷakānaṃ. Yathāha ‘‘kāḷakaṃ nāma dve kāḷakāni jātiyā kāḷakaṃ vā rajanakāḷakaṃ vā’’ti. Aññehi amissitānanti aññehi amissitakāḷakānanti attho. ‘‘Yathā paṭhame ‘ekenāpi kosiyaṃsunā’ti (kaṅkhā. aṭṭha. kosiyasikkhāpadavaṇṇanā) vuttaṃ, tathā idhāpi ‘ekenāpi aññena amissetvā’ti avuttattā aññena pana missakabhogepi apaññāyamānarūpakaṃ ce ‘suddhakāḷaka’micceva vuccatī’’ti (vajira. ṭī. pārājika 547) vadanti.
எத்த² ச ‘‘இத³ங் மே, ப⁴ந்தே, ஸுத்³த⁴காளகானங் ஏளகலோமானங் ஸந்த²த’’ந்திஆதி³னா (பாரா॰ 549) நிஸ்ஸஜ்ஜனவிதா⁴னங் வேதி³தப்³ப³ங். ஸேஸந்தி புப்³ப³பயோக³து³க்கடசதுக்கபாசித்தியாதி³கங். அங்கே³ஸு பன ‘‘ஸுத்³த⁴காளகபா⁴வோ’’தி அயங் விஸேஸோ.
Ettha ca ‘‘idaṃ me, bhante, suddhakāḷakānaṃ eḷakalomānaṃ santhata’’ntiādinā (pārā. 549) nissajjanavidhānaṃ veditabbaṃ. Sesanti pubbapayogadukkaṭacatukkapācittiyādikaṃ. Aṅgesu pana ‘‘suddhakāḷakabhāvo’’ti ayaṃ viseso.
ஸுத்³த⁴காளகஸிக்கா²பத³வண்ணனா நிட்டி²தா.
Suddhakāḷakasikkhāpadavaṇṇanā niṭṭhitā.
