| Library / Tipiṭaka / ติปิฎก • Tipiṭaka / กงฺขาวิตรณี-อภินว-ฎีกา • Kaṅkhāvitaraṇī-abhinava-ṭīkā |
๒. สุทฺธกาฬกสิกฺขาปทวณฺณนา
2. Suddhakāḷakasikkhāpadavaṇṇanā
กาฬกานนฺติ สภาเวน วา รชเนน วา กาฬกานํฯ ยถาห ‘‘กาฬกํ นาม เทฺว กาฬกานิ ชาติยา กาฬกํ วา รชนกาฬกํ วา’’ติฯ อเญฺญหิ อมิสฺสิตานนฺติ อเญฺญหิ อมิสฺสิตกาฬกานนฺติ อโตฺถฯ ‘‘ยถา ปฐเม ‘เอเกนาปิ โกสิยํสุนา’ติ (กงฺขา. อฎฺฐ. โกสิยสิกฺขาปทวณฺณนา) วุตฺตํ, ตถา อิธาปิ ‘เอเกนาปิ อเญฺญน อมิเสฺสตฺวา’ติ อวุตฺตตฺตา อเญฺญน ปน มิสฺสกโภเคปิ อปญฺญายมานรูปกํ เจ ‘สุทฺธกาฬก’มิเจฺจว วุจฺจตี’’ติ (วชิร. ฎี. ปาราชิก ๕๔๗) วทนฺติฯ
Kāḷakānanti sabhāvena vā rajanena vā kāḷakānaṃ. Yathāha ‘‘kāḷakaṃ nāma dve kāḷakāni jātiyā kāḷakaṃ vā rajanakāḷakaṃ vā’’ti. Aññehi amissitānanti aññehi amissitakāḷakānanti attho. ‘‘Yathā paṭhame ‘ekenāpi kosiyaṃsunā’ti (kaṅkhā. aṭṭha. kosiyasikkhāpadavaṇṇanā) vuttaṃ, tathā idhāpi ‘ekenāpi aññena amissetvā’ti avuttattā aññena pana missakabhogepi apaññāyamānarūpakaṃ ce ‘suddhakāḷaka’micceva vuccatī’’ti (vajira. ṭī. pārājika 547) vadanti.
เอตฺถ จ ‘‘อิทํ เม, ภเนฺต, สุทฺธกาฬกานํ เอฬกโลมานํ สนฺถต’’นฺติอาทินา (ปารา. ๕๔๙) นิสฺสชฺชนวิธานํ เวทิตพฺพํฯ เสสนฺติ ปุพฺพปโยคทุกฺกฎจตุกฺกปาจิตฺติยาทิกํฯ อเงฺคสุ ปน ‘‘สุทฺธกาฬกภาโว’’ติ อยํ วิเสโสฯ
Ettha ca ‘‘idaṃ me, bhante, suddhakāḷakānaṃ eḷakalomānaṃ santhata’’ntiādinā (pārā. 549) nissajjanavidhānaṃ veditabbaṃ. Sesanti pubbapayogadukkaṭacatukkapācittiyādikaṃ. Aṅgesu pana ‘‘suddhakāḷakabhāvo’’ti ayaṃ viseso.
สุทฺธกาฬกสิกฺขาปทวณฺณนา นิฎฺฐิตาฯ
Suddhakāḷakasikkhāpadavaṇṇanā niṭṭhitā.
