| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၂. သုဒ္ဓကာဠကသိက္ခာပဒဝဏ္ဏနာ
2. Suddhakāḷakasikkhāpadavaṇṇanā
ကာဠကာနန္တိ သဘာဝေန ဝာ ရဇနေန ဝာ ကာဠကာနံ။ ယထာဟ ‘‘ကာဠကံ နာမ ဒ္ဝေ ကာဠကာနိ ဇာတိယာ ကာဠကံ ဝာ ရဇနကာဠကံ ဝာ’’တိ။ အညေဟိ အမိသ္သိတာနန္တိ အညေဟိ အမိသ္သိတကာဠကာနန္တိ အတ္ထော။ ‘‘ယထာ ပဌမေ ‘ဧကေနာပိ ကောသိယံသုနာ’တိ (ကင္ခာ. အဋ္ဌ. ကောသိယသိက္ခာပဒဝဏ္ဏနာ) ဝုတ္တံ, တထာ ဣဓာပိ ‘ဧကေနာပိ အညေန အမိသ္သေတ္ဝာ’တိ အဝုတ္တတ္တာ အညေန ပန မိသ္သကဘောဂေပိ အပညာယမာနရူပကံ စေ ‘သုဒ္ဓကာဠက’မိစ္စေဝ ဝုစ္စတီ’’တိ (ဝဇိရ. ဋီ. ပာရာဇိက ၅၄၇) ဝဒန္တိ။
Kāḷakānanti sabhāvena vā rajanena vā kāḷakānaṃ. Yathāha ‘‘kāḷakaṃ nāma dve kāḷakāni jātiyā kāḷakaṃ vā rajanakāḷakaṃ vā’’ti. Aññehi amissitānanti aññehi amissitakāḷakānanti attho. ‘‘Yathā paṭhame ‘ekenāpi kosiyaṃsunā’ti (kaṅkhā. aṭṭha. kosiyasikkhāpadavaṇṇanā) vuttaṃ, tathā idhāpi ‘ekenāpi aññena amissetvā’ti avuttattā aññena pana missakabhogepi apaññāyamānarūpakaṃ ce ‘suddhakāḷaka’micceva vuccatī’’ti (vajira. ṭī. pārājika 547) vadanti.
ဧတ္ထ စ ‘‘ဣဒံ မေ, ဘန္တေ, သုဒ္ဓကာဠကာနံ ဧဠကလောမာနံ သန္ထတ’’န္တိအာဒိနာ (ပာရာ. ၅၄၉) နိသ္သဇ္ဇနဝိဓာနံ ဝေဒိတဗ္ဗံ။ သေသန္တိ ပုဗ္ဗပယောဂဒုက္ကဋစတုက္ကပာစိတ္တိယာဒိကံ။ အင္ဂေသု ပန ‘‘သုဒ္ဓကာဠကဘာဝော’’တိ အယံ ဝိသေသော။
Ettha ca ‘‘idaṃ me, bhante, suddhakāḷakānaṃ eḷakalomānaṃ santhata’’ntiādinā (pārā. 549) nissajjanavidhānaṃ veditabbaṃ. Sesanti pubbapayogadukkaṭacatukkapācittiyādikaṃ. Aṅgesu pana ‘‘suddhakāḷakabhāvo’’ti ayaṃ viseso.
သုဒ္ဓကာဠကသိက္ခာပဒဝဏ္ဏနာ နိဋ္ဌိတာ။
Suddhakāḷakasikkhāpadavaṇṇanā niṭṭhitā.
