| Library / Tipiṭaka / திபிடக • Tipiṭaka / மஹானித்³தே³ஸ-அட்ட²கதா² • Mahāniddesa-aṭṭhakathā |
4. ஸுத்³த⁴ட்ட²கஸுத்தனித்³தே³ஸவண்ணனா
4. Suddhaṭṭhakasuttaniddesavaṇṇanā
23. சதுத்தே² ஸுத்³த⁴ட்ட²கே பட²மகா³தா²ய தாவத்தோ² – ந, பி⁴க்க²வே, ஏவரூபேன த³ஸ்ஸனேன ஸுத்³தி⁴ ஹோதி, அபி ச கோ² கிலேஸமலீனத்தா அஸுத்³த⁴ங், கிலேஸரோகா³னங் அதி⁴க³மா ஸரோக³மேவ சந்தா³ப⁴ங் ப்³ராஹ்மணங், அஞ்ஞங் வா ஏவரூபங் தி³ஸ்வா தி³ட்டி²க³திகோ பா³லோ அபி⁴ஜானாதி ‘‘பஸ்ஸாமி ஸுத்³த⁴ங் பரமங் அரோக³ங், தேன ச தி³ட்டி²ஸங்கா²தேன த³ஸ்ஸனேன ஸங்ஸுத்³தி⁴ நரஸ்ஸ ஹோதீ’’தி, ஸோ ஏவங் அபி⁴ஜானந்தோ தங் த³ஸ்ஸனங் ‘‘பரம’’ந்தி ஞத்வா தஸ்மிங் த³ஸ்ஸனே ஸுத்³தா⁴னுபஸ்ஸீ ஸமானோ தங் த³ஸ்ஸனங் ‘‘மக்³க³ஞாண’’ந்தி பச்சேதி. தங் பன மக்³க³ஞாணங் ந ஹோதி.
23. Catutthe suddhaṭṭhake paṭhamagāthāya tāvattho – na, bhikkhave, evarūpena dassanena suddhi hoti, api ca kho kilesamalīnattā asuddhaṃ, kilesarogānaṃ adhigamā sarogameva candābhaṃ brāhmaṇaṃ, aññaṃ vā evarūpaṃ disvā diṭṭhigatiko bālo abhijānāti ‘‘passāmi suddhaṃ paramaṃ arogaṃ, tena ca diṭṭhisaṅkhātena dassanena saṃsuddhi narassa hotī’’ti, so evaṃ abhijānanto taṃ dassanaṃ ‘‘parama’’nti ñatvā tasmiṃ dassane suddhānupassī samāno taṃ dassanaṃ ‘‘maggañāṇa’’nti pacceti. Taṃ pana maggañāṇaṃ na hoti.
பரமங் ஆரொக்³யப்பத்தந்தி உத்தமங் நிப்³யாதி⁴ங் பாபுணித்வா டி²தங். தாணப்பத்தந்தி ததா² பாலனப்பத்தங். லேணப்பத்தந்தி நிலீயனப்பத்தங்.ஸரணப்பத்தந்தி பதிட்டா²பத்தங், து³க்க²னாஸனங் வா பத்தங். அப⁴யப்பத்தந்தி நிப்³ப⁴யபா⁴வப்பத்தங். அச்சுதப்பத்தந்தி நிச்சலபா⁴வங் பத்தங். அமதப்பத்தந்தி அமதங் மஹானிப்³பா³னங் பத்தங். நிப்³பா³னப்பத்தந்தி வானவிரஹிதங் பத்தங்.
Paramaṃ ārogyappattanti uttamaṃ nibyādhiṃ pāpuṇitvā ṭhitaṃ. Tāṇappattanti tathā pālanappattaṃ. Leṇappattanti nilīyanappattaṃ.Saraṇappattanti patiṭṭhāpattaṃ, dukkhanāsanaṃ vā pattaṃ. Abhayappattanti nibbhayabhāvappattaṃ. Accutappattanti niccalabhāvaṃ pattaṃ. Amatappattanti amataṃ mahānibbānaṃ pattaṃ. Nibbānappattanti vānavirahitaṃ pattaṃ.
அபி⁴ஜானந்தோதி விஸேஸேன ஜானந்தோ. ஆஜானந்தோதி ஆஜானமானோ. விஜானந்தோதி அனேகவிதே⁴ன ஜானமானோ. படிவிஜானந்தோதி தங் தங் படிச்ச விஜானமானோ. படிவிஜ்ஜ²ந்தோதி ஹத³யே குருமானோ.
Abhijānantoti visesena jānanto. Ājānantoti ājānamāno. Vijānantoti anekavidhena jānamāno. Paṭivijānantoti taṃ taṃ paṭicca vijānamāno. Paṭivijjhantoti hadaye kurumāno.
சக்கு²விஞ்ஞாணங் ரூபத³ஸ்ஸனேனாதி சக்கு²விஞ்ஞாணேன ரூபத³ஸ்ஸனங். ஞாணந்தி பச்சேதீதி பஞ்ஞா இதி ஸத்³த³ஹதி. மக்³கோ³தி பச்சேதீதி ‘‘உபாயோ’’தி ஸத்³த³ஹதி. பதோ²தி ஸஞ்சாரோ. நீயானந்தி க³ஹெத்வா யாதீதி நீயானங். ‘‘நிய்யான’’ந்தி வா பாடோ².
Cakkhuviññāṇaṃ rūpadassanenāti cakkhuviññāṇena rūpadassanaṃ. Ñāṇanti paccetīti paññā iti saddahati. Maggoti paccetīti ‘‘upāyo’’ti saddahati. Pathoti sañcāro. Nīyānanti gahetvā yātīti nīyānaṃ. ‘‘Niyyāna’’nti vā pāṭho.
24. ‘‘தி³ட்டே²ன சே ஸுத்³தீ⁴’’தி து³தியகா³தா². தஸ்ஸத்தோ² – தேன ரூபத³ஸ்ஸனஸங்கா²தேன தி³ட்டே²ன யதி³ கிலேஸஸுத்³தி⁴ நரஸ்ஸ ஹோதி, தேன வா ஞாணேன ஸோ யதி³ ஜாதிஆதி³து³க்க²ங் பஜஹாதி, ஏவங் ஸந்தே அரியமக்³க³தோ அஞ்ஞேன அஸுத்³தி⁴மக்³கே³னேவ ஸோ ஸுஜ்ஜ²தி, ராகா³தீ³ஹி உபதீ⁴ஹி ஸஉபதி⁴கோ ஏவ ஸமானோ ஸுஜ்ஜ²தீதி வத்தப்³ப³தங் ஆபன்னோ ஹோதி, ந ச ஏவங்விதோ⁴ ஸுஜ்ஜ²தி. தஸ்மா தி³ட்டீ² ஹி நங் பாவ ததா² வதா³னங், ஸா நங் தி³ட்டி²யேவ ‘‘மிச்சா²தி³ட்டி²கோ அய’’ந்தி கதே²தி, தி³ட்டி²அனுரூபங் ‘‘ஸஸ்ஸதோ லோகோ’’திஆதி³னா நயேன ததா² ததா² வத³தீதி.
24.‘‘Diṭṭhenace suddhī’’ti dutiyagāthā. Tassattho – tena rūpadassanasaṅkhātena diṭṭhena yadi kilesasuddhi narassa hoti, tena vā ñāṇena so yadi jātiādidukkhaṃ pajahāti, evaṃ sante ariyamaggato aññena asuddhimaggeneva so sujjhati, rāgādīhi upadhīhi saupadhiko eva samāno sujjhatīti vattabbataṃ āpanno hoti, na ca evaṃvidho sujjhati. Tasmā diṭṭhī hi naṃ pāva tathā vadānaṃ, sā naṃ diṭṭhiyeva ‘‘micchādiṭṭhiko aya’’nti katheti, diṭṭhianurūpaṃ ‘‘sassato loko’’tiādinā nayena tathā tathā vadatīti.
ராகே³ன ஸஹ வத்ததீதி ஸராகோ³, ராக³வாதி அத்தோ². ஸதோ³ஸோதிஆதீ³ஸுபி ஏஸேவ நயோ.
Rāgena saha vattatīti sarāgo, rāgavāti attho. Sadosotiādīsupi eseva nayo.
25. ந ப்³ராஹ்மணோதி ததியகா³தா². தஸ்ஸத்தோ² – யோ பன பா³ஹிதபாபத்தா ப்³ராஹ்மணோ ஹோதி, ஸோ மக்³கே³ன அதி⁴க³தாஸவக்க²யோ கீ²ணாஸவப்³ராஹ்மணோ அரியமக்³க³ஞாணதோ அஞ்ஞேன அபி⁴மங்க³லஸம்மதரூபஸங்கா²தே தி³ட்டே², ததா²வித⁴ஸத்³த³ஸங்கா²தே ஸுதே, அவீதிக்கமஸங்கா²தே ஸீலே, ஹத்தி²வதாதி³பே⁴தே³ வதே, பத²விஆதி³பே⁴தே³ முதே ச உப்பன்னேன மிச்சா²ஞாணேன ஸுத்³தி⁴ங் ந ஆஹாதி. ஸேஸமஸ்ஸ ப்³ராஹ்மணஸ்ஸ வண்ணப⁴ணனாய வுத்தங். ஸோ ஹி தேதா⁴துகபுஞ்ஞே ஸப்³ப³ஸ்மிஞ்ச பாபே அனூபலித்தோ, கஸ்மா? தஸ்ஸ பஹீனத்தா தஸ்ஸ அத்ததி³ட்டி²யா, யஸ்ஸ கஸ்ஸசி வா க³ஹணஸ்ஸ பஹீனத்தா அத்தஞ்ஜஹோ, புஞ்ஞாபி⁴ஸங்கா²ராதீ³னங் அகரணதோ ‘‘நயித⁴ பகுப்³ப³மானோ’’தி வுச்சதி. தஸ்மா நங் ஏவங் பஸங்ஸந்தோ ஆஹ. ஸப்³ப³ஸ்ஸேவ சஸ்ஸ புரிமபாதே³ன ஸம்ப³ந்தோ⁴ வேதி³தப்³போ³ – புஞ்ஞே ச பாபே ச அனூபலித்தோ அத்தஞ்ஜஹோ நயித⁴ பகுப்³ப³மானோ ந ப்³ராஹ்மணோ அஞ்ஞதோ ஸுத்³தி⁴மாஹாதி. நாதி படிக்கே²போதி ந இதி படிஸேதோ⁴.
25.Na brāhmaṇoti tatiyagāthā. Tassattho – yo pana bāhitapāpattā brāhmaṇo hoti, so maggena adhigatāsavakkhayo khīṇāsavabrāhmaṇo ariyamaggañāṇato aññena abhimaṅgalasammatarūpasaṅkhāte diṭṭhe, tathāvidhasaddasaṅkhāte sute, avītikkamasaṅkhāte sīle, hatthivatādibhede vate, pathaviādibhede mute ca uppannena micchāñāṇena suddhiṃ na āhāti. Sesamassa brāhmaṇassa vaṇṇabhaṇanāya vuttaṃ. So hi tedhātukapuññe sabbasmiñca pāpe anūpalitto, kasmā? Tassa pahīnattā tassa attadiṭṭhiyā, yassa kassaci vā gahaṇassa pahīnattā attañjaho, puññābhisaṅkhārādīnaṃ akaraṇato ‘‘nayidha pakubbamāno’’ti vuccati. Tasmā naṃ evaṃ pasaṃsanto āha. Sabbasseva cassa purimapādena sambandho veditabbo – puññe ca pāpe ca anūpalitto attañjaho nayidha pakubbamāno na brāhmaṇo aññato suddhimāhāti. Nāti paṭikkhepoti na iti paṭisedho.
பா³ஹித்வா ஸப்³ப³பாபகானீதி கா³தா²யத்தோ² – யோ சதுத்த²மக்³கே³ன பா³ஹித்வா ஸப்³ப³பாபகானி டி²தத்தோ டி²தோஇச்சேவ வுத்தங் ஹோதி. பா³ஹிதபாபத்தா ஏவ ச விமலோ விமலபா⁴வங் ப்³ரஹ்மபா⁴வங் ஸெட்ட²பா⁴வங் பத்தோ, படினிஸ்ஸட்ட²ஸமாதி⁴விக்கே²பகரகிலேஸமலேன அக்³க³மக்³க³ப²லஸமாதி⁴னா ஸாது⁴ஸமாஹிதோ, ஸங்ஸாரஹேதுஸமதிக்கமேன ஸங்ஸாரமதிச்ச பரினிட்டி²தகிச்சதாய கேவலீதி ச, தண்ஹாதி³ட்டீ²ஹி அனிஸ்ஸிதத்தா அனிஸ்ஸிதோதி ச, லோகத⁴ம்மேஹி நிப்³பி³காரத்தா தாதீ³தி ச பவுச்சதி. ஏவங் து²திரஹோ ஸ ப்³ரஹ்மா ஸோ ப்³ராஹ்மணோதி.
Bāhitvā sabbapāpakānīti gāthāyattho – yo catutthamaggena bāhitvā sabbapāpakāni ṭhitatto ṭhitoicceva vuttaṃ hoti. Bāhitapāpattā eva ca vimalo vimalabhāvaṃ brahmabhāvaṃ seṭṭhabhāvaṃ patto, paṭinissaṭṭhasamādhivikkhepakarakilesamalena aggamaggaphalasamādhinā sādhusamāhito, saṃsārahetusamatikkamena saṃsāramaticca pariniṭṭhitakiccatāya kevalīti ca, taṇhādiṭṭhīhi anissitattā anissitoti ca, lokadhammehi nibbikārattā tādīti ca pavuccati. Evaṃ thutiraho sa brahmā so brāhmaṇoti.
அஞ்ஞத்ர ஸதிபட்டா²னேஹீதி சத்தாரோ ஸதிபட்டா²னே முஞ்சித்வா. ஸம்மப்பதா⁴னாதீ³ஸுபி ஏஸேவ நயோ.
Aññatra satipaṭṭhānehīti cattāro satipaṭṭhāne muñcitvā. Sammappadhānādīsupi eseva nayo.
ஸந்தேகே ஸமணப்³ராஹ்மணாதி ஏகச்சே லோகஸங்கேதேன ‘‘ஸமணப்³ராஹ்மணா’’தி லத்³த⁴வோஹாரா ஸங்விஜ்ஜந்தி. தி³ட்ட²ஸுத்³தி⁴காதி தி³ட்டே²ன ஸுத்³தி⁴ங் இச்ச²மானா. தே ஏகச்சானங் ரூபானங் த³ஸ்ஸனந்தி ஏதே தி³ட்ட²ஸுத்³தி⁴கா ஏதேஸங் ரூபாரம்மணானங் ஓலோகனங். மங்க³லங் பச்செந்தீதி இத்³தி⁴காரணங் பு³த்³தி⁴காரணங் ஸப்³ப³ஸம்பத்திகாரணங் பதிட்டா²பெந்தி. அமங்க³லங் பச்செந்தீதி அனித்³தி⁴காரணங் ந பு³த்³தி⁴காரணங் ந ஸம்பத்திகாரணங் பதிட்டா²பெந்தி. தே காலதோ வுட்ட²ஹித்வாதி ஏதே தி³ட்டா²தி³மங்க³லிகா புரேதரமேவ உட்ட²ஹித்வா. அபி⁴மங்க³லக³தானீதி விஸேஸேன வுட்³டி⁴காரணக³தானி. ரூபானி பஸ்ஸந்தீதி நானாவிதா⁴னி ரூபாரம்மணானி த³க்க²ந்தி. சாடகஸகுணந்தி ஏவங்னாமகங். பு²ஸ்ஸவேளுவலட்டி²ந்தி பு²ஸ்ஸனக்க²த்தேன உப்பன்னங் தருணபே³ளுவலட்டி²ங். க³ப்³பி⁴னித்தி²ந்தி ஸக³ப்³ப⁴ங் இத்தி²ங். குமாரகங் க²ந்தே⁴ ஆரோபெத்வா க³ச்ச²ந்தந்தி தருணதா³ரகங் அங்ஸே உஸ்ஸாபெத்வா க³ச்ச²மானங். புண்ணக⁴டந்தி உத³கபுண்ணக⁴டங். ரோஹிதமச்ச²ந்தி ரத்தரோஹிதமச்ச²ங். ஆஜஞ்ஞரத²ந்தி ஸிந்த⁴வயுத்தரத²ங். உஸப⁴ந்தி மங்க³லஉஸப⁴ங். கோ³கபிலந்தி கபிலகா³விங்.
Santeke samaṇabrāhmaṇāti ekacce lokasaṅketena ‘‘samaṇabrāhmaṇā’’ti laddhavohārā saṃvijjanti. Diṭṭhasuddhikāti diṭṭhena suddhiṃ icchamānā. Te ekaccānaṃ rūpānaṃ dassananti ete diṭṭhasuddhikā etesaṃ rūpārammaṇānaṃ olokanaṃ. Maṅgalaṃ paccentīti iddhikāraṇaṃ buddhikāraṇaṃ sabbasampattikāraṇaṃ patiṭṭhāpenti. Amaṅgalaṃ paccentīti aniddhikāraṇaṃ na buddhikāraṇaṃ na sampattikāraṇaṃ patiṭṭhāpenti. Te kālato vuṭṭhahitvāti ete diṭṭhādimaṅgalikā puretarameva uṭṭhahitvā. Abhimaṅgalagatānīti visesena vuḍḍhikāraṇagatāni. Rūpāni passantīti nānāvidhāni rūpārammaṇāni dakkhanti. Cāṭakasakuṇanti evaṃnāmakaṃ. Phussaveḷuvalaṭṭhinti phussanakkhattena uppannaṃ taruṇabeḷuvalaṭṭhiṃ. Gabbhinitthinti sagabbhaṃ itthiṃ. Kumārakaṃ khandhe āropetvā gacchantanti taruṇadārakaṃ aṃse ussāpetvā gacchamānaṃ. Puṇṇaghaṭanti udakapuṇṇaghaṭaṃ. Rohitamacchanti rattarohitamacchaṃ. Ājaññarathanti sindhavayuttarathaṃ. Usabhanti maṅgalausabhaṃ. Gokapilanti kapilagāviṃ.
பலாலபுஞ்ஜந்தி து²ஸராஸிங். தக்கக⁴டந்தி கோ³தக்காதி³பூரிதசாடிங். ரித்தக⁴டந்தி துச்ச²க⁴டங். நடந்தி நடகாதி³ங். ‘‘து⁴த்தகிரிய’’ந்தி ஏகே. நக்³க³ஸமணகந்தி நிச்சோளஸமணங் . க²ரந்தி க³த்³ரப⁴ங். க²ரயானந்தி க³த்³ரப⁴யுத்தங் வய்ஹாதி³கங். ஏகயுத்தயானந்தி ஏகேன வாஹனேன ஸங்யுத்தங் யானங். காணந்தி ஏகக்கி²உப⁴யக்கி²காணங். குணிந்தி ஹத்த²குணிங். க²ஞ்ஜந்தி க²ஞ்ஜபாத³ங் திரியக³தபாத³ங். பக்க²ஹதந்தி பீட²ஸப்பிங். ஜிண்ணகந்தி ஜராஜிண்ணங். ப்³யாதி⁴கந்தி ப்³யாதி⁴பீளிதங். மதந்தி காலங்கதங்.
Palālapuñjanti thusarāsiṃ. Takkaghaṭanti gotakkādipūritacāṭiṃ. Rittaghaṭanti tucchaghaṭaṃ. Naṭanti naṭakādiṃ. ‘‘Dhuttakiriya’’nti eke. Naggasamaṇakanti niccoḷasamaṇaṃ . Kharanti gadrabhaṃ. Kharayānanti gadrabhayuttaṃ vayhādikaṃ. Ekayuttayānanti ekena vāhanena saṃyuttaṃ yānaṃ. Kāṇanti ekakkhiubhayakkhikāṇaṃ. Kuṇinti hatthakuṇiṃ. Khañjanti khañjapādaṃ tiriyagatapādaṃ. Pakkhahatanti pīṭhasappiṃ. Jiṇṇakanti jarājiṇṇaṃ. Byādhikanti byādhipīḷitaṃ. Matanti kālaṅkataṃ.
ஸுதஸுத்³தி⁴காதி ஸோதவிஞ்ஞாணேன ஸுதேன ஸுத்³தி⁴ங் இச்ச²மானா. ஸத்³தா³னங் ஸவனந்தி ஸத்³தா³ரம்மணானங் ஸவனங். வட்³டா⁴தி வாதிஆத³யோ லோகே பவத்தஸத்³த³மத்தானி க³ஹெத்வா வுத்தா. அமங்க³லங் பன ‘‘காணோ’’திஆதி³னா தேன தேன நாமேன வுத்தஸத்³தா³யேவ. ‘‘சி²ந்த³’’ந்தி வாதி ஹத்த²பாதா³தி³ச்சி²ன்னந்தி வா. ‘‘பி⁴ந்த³’’ந்தி வாதி ஸீஸாதி³பி⁴ன்னந்தி வா. ‘‘த³ட்³ட⁴’’ந்தி வாதி அக்³கி³னா ஜா²பிதந்தி வா. ‘‘நட்ட²’’ந்தி வாதி சோராதீ³ஹி வினாஸிதந்தி வா. ‘‘நத்தீ²’’தி வாதி ந விஜ்ஜதீதி வா.
Sutasuddhikāti sotaviññāṇena sutena suddhiṃ icchamānā. Saddānaṃ savananti saddārammaṇānaṃ savanaṃ. Vaḍḍhāti vātiādayo loke pavattasaddamattāni gahetvā vuttā. Amaṅgalaṃ pana ‘‘kāṇo’’tiādinā tena tena nāmena vuttasaddāyeva. ‘‘Chinda’’nti vāti hatthapādādicchinnanti vā. ‘‘Bhinda’’nti vāti sīsādibhinnanti vā. ‘‘Daḍḍha’’nti vāti agginā jhāpitanti vā. ‘‘Naṭṭha’’nti vāti corādīhi vināsitanti vā. ‘‘Natthī’’ti vāti na vijjatīti vā.
ஸீலஸுத்³தி⁴காதி ஸீலேன விஸுத்³தி⁴ங் இச்ச²னகா. ஸீலமத்தேனாதி ஸங்வரணமத்தேன. ஸங்யமமத்தேனாதி உபரமமத்தேன. ஸங்வரமத்தேனாதி த்³வாரத²கனமத்தேன. அவீதிக்கமமத்தேனாதி ந அதிக்கமிதமத்தேன. ஸமணோ முண்டி³காபுத்தோதி மாதிதோ லத்³த⁴னாமங். ஸம்பன்னகுஸலந்தி பரிபுண்ணகுஸலங். பரமகுஸலந்தி உத்தமகுஸலங். உத்தமபத்திப்பத்தந்தி உத்தமங் அரஹத்தங் பாபுணிதப்³ப³தங் பத்வா டி²தங். அயோஜ்ஜந்தி பராஜேதுங் அஸக்குணெய்யங் ஸமணங்.
Sīlasuddhikāti sīlena visuddhiṃ icchanakā. Sīlamattenāti saṃvaraṇamattena. Saṃyamamattenāti uparamamattena. Saṃvaramattenāti dvārathakanamattena. Avītikkamamattenāti na atikkamitamattena. Samaṇo muṇḍikāputtoti mātito laddhanāmaṃ. Sampannakusalanti paripuṇṇakusalaṃ. Paramakusalanti uttamakusalaṃ. Uttamapattippattanti uttamaṃ arahattaṃ pāpuṇitabbataṃ patvā ṭhitaṃ. Ayojjanti parājetuṃ asakkuṇeyyaṃ samaṇaṃ.
வதஸுத்³தி⁴காதி ஸமாதா³னேன வதேன ஸுத்³தி⁴ங் இச்ச²னகா. ஹத்தி²வதிகா வாதி ஸமாதி³ன்னங் ஹத்தி²வதங் ஏதேஸங் அத்தீ²தி ஹத்தி²வதிகா, ஸப்³ப³ஹத்தி²கிரியங் கரொந்தீதி அத்தோ². கத²ங்? ‘‘அஜ்ஜ பட்டா²ய ஹத்தீ²ஹி காதப்³ப³ங் கரிஸ்ஸாமீ’’தி ஏவங் உப்பன்னசித்தா ஹத்தீ²னங் க³மனாகாரங் திட்ட²னாகாரங் நிஸீத³னாகாரங் ஸயனாகாரங் உச்சாரபஸ்ஸாவகரணாகாரங், அஞ்ஞே ஹத்தீ² தி³ஸ்வா ஸொண்ட³ங் உஸ்ஸாபெத்வா க³மனாகாரஞ்ச ஸப்³ப³ங் கரொந்தீதி ஹத்தி²வதிகா. அஸ்ஸவதிகாதீ³ஸுபி லப்³ப⁴மானவஸேன யதா²யோக³ங் யோஜேதப்³ப³ங். தேஸு அவஸானே தி³ஸாவதிகா வாதி புரத்தி²மாதி³தி³ஸானங் நமஸ்ஸனவஸேன ஸமாதி³ன்னதி³ஸாவதிகா, ஏதேஸங் வுத்தப்பகாரானங் ஸமணப்³ராஹ்மணானங் வதஸமாதா³னங் ஸம்பஜ்ஜமானங் ஹத்தி²ஆதீ³னங் ஸஹப்³யதங் உபனேதி. ஸசே கோ² பனஸ்ஸ மிச்சா²தி³ட்டி² ஹோதி ‘‘இமினாஹங் ஸீலவதஸமாதா³னப்³ரஹ்மசரியேன தே³வோ வா தே³வஞ்ஞதரோ வா ஹோமீ’’தி சிந்தயந்தஸ்ஸ நிரயதிரச்சா²னயோனீனங் அஞ்ஞதரோ ஹோதீதி ஞாதப்³ப³ங். வுத்தஞ்ஹேதங் ப⁴க³வதா (ம॰ நி॰ 2.79) –
Vatasuddhikāti samādānena vatena suddhiṃ icchanakā. Hatthivatikā vāti samādinnaṃ hatthivataṃ etesaṃ atthīti hatthivatikā, sabbahatthikiriyaṃ karontīti attho. Kathaṃ? ‘‘Ajja paṭṭhāya hatthīhi kātabbaṃ karissāmī’’ti evaṃ uppannacittā hatthīnaṃ gamanākāraṃ tiṭṭhanākāraṃ nisīdanākāraṃ sayanākāraṃ uccārapassāvakaraṇākāraṃ, aññe hatthī disvā soṇḍaṃ ussāpetvā gamanākārañca sabbaṃ karontīti hatthivatikā. Assavatikādīsupi labbhamānavasena yathāyogaṃ yojetabbaṃ. Tesu avasāne disāvatikā vāti puratthimādidisānaṃ namassanavasena samādinnadisāvatikā, etesaṃ vuttappakārānaṃ samaṇabrāhmaṇānaṃ vatasamādānaṃ sampajjamānaṃ hatthiādīnaṃ sahabyataṃ upaneti. Sace kho panassa micchādiṭṭhi hoti ‘‘imināhaṃ sīlavatasamādānabrahmacariyena devo vā devaññataro vā homī’’ti cintayantassa nirayatiracchānayonīnaṃ aññataro hotīti ñātabbaṃ. Vuttañhetaṃ bhagavatā (ma. ni. 2.79) –
‘‘இத⁴ , புண்ண, ஏகச்சோ குக்குரவதங் பா⁴வேதி பரிபுண்ணங் அப்³போ³கிண்ணங், குக்குரஸீலங் பா⁴வேதி பரிபுண்ணங் அப்³போ³கிண்ணங், குக்குரசித்தங் பா⁴வேதி பரிபுண்ணங் அப்³போ³கிண்ணங், குக்குராகப்பங் பா⁴வேதி பரிபுண்ணங் அப்³போ³கிண்ணங். ஸோ குக்குரவதங் பா⁴வெத்வா பரிபுண்ணங் அப்³போ³கிண்ணங், குக்குரஸீலங் பா⁴வெத்வா பரிபுண்ணங் அப்³போ³கிண்ணங், குக்குரசித்தங் பா⁴வெத்வா பரிபுண்ணங் அப்³போ³கிண்ணங், குக்குராகப்பங் பா⁴வெத்வா பரிபுண்ணங் அப்³போ³கிண்ணங் காயஸ்ஸ பே⁴தா³ பரங் மரணா குக்குரானங் ஸஹப்³யதங் உபபஜ்ஜதி. ஸசே கோ² பனஸ்ஸ ஏவங்தி³ட்டி² ஹோதி ‘இமினாஹங் ஸீலேன வா வதேன வா தபேன வா ப்³ரஹ்மசரியேன வா தே³வோ வா ப⁴விஸ்ஸாமி தே³வஞ்ஞதரோ வா’தி, ஸாஸ்ஸ ஹோதி மிச்சா²தி³ட்டி². மிச்சா²தி³ட்டி²ஸ்ஸ கோ² அஹங், புண்ண, த்³வின்னங் க³தீனங் அஞ்ஞதரங் க³திங் வதா³மி நிரயங் வா திரச்சா²னயோனிங் வா. இதி கோ², புண்ண, ஸம்பஜ்ஜமானங் குக்குரவதங் குக்குரானங் ஸஹப்³யதங் உபனேதி, விபஜ்ஜமானங் நிரய’’ந்தி.
‘‘Idha , puṇṇa, ekacco kukkuravataṃ bhāveti paripuṇṇaṃ abbokiṇṇaṃ, kukkurasīlaṃ bhāveti paripuṇṇaṃ abbokiṇṇaṃ, kukkuracittaṃ bhāveti paripuṇṇaṃ abbokiṇṇaṃ, kukkurākappaṃ bhāveti paripuṇṇaṃ abbokiṇṇaṃ. So kukkuravataṃ bhāvetvā paripuṇṇaṃ abbokiṇṇaṃ, kukkurasīlaṃ bhāvetvā paripuṇṇaṃ abbokiṇṇaṃ, kukkuracittaṃ bhāvetvā paripuṇṇaṃ abbokiṇṇaṃ, kukkurākappaṃ bhāvetvā paripuṇṇaṃ abbokiṇṇaṃ kāyassa bhedā paraṃ maraṇā kukkurānaṃ sahabyataṃ upapajjati. Sace kho panassa evaṃdiṭṭhi hoti ‘imināhaṃ sīlena vā vatena vā tapena vā brahmacariyena vā devo vā bhavissāmi devaññataro vā’ti, sāssa hoti micchādiṭṭhi. Micchādiṭṭhissa kho ahaṃ, puṇṇa, dvinnaṃ gatīnaṃ aññataraṃ gatiṃ vadāmi nirayaṃ vā tiracchānayoniṃ vā. Iti kho, puṇṇa, sampajjamānaṃ kukkuravataṃ kukkurānaṃ sahabyataṃ upaneti, vipajjamānaṃ niraya’’nti.
க³ந்த⁴ப்³ப³வதிகாத³யோ க³ந்த⁴ப்³பா³தீ³னங் ஸஹப்³யதங் உபக³ச்ச²ந்தீதி அத்தோ² ந க³ஹேதப்³போ³, மிச்சா²தி³ட்டி²யா க³ஹிதத்தா நிரயதிரச்சா²னயோனிமேவ உபக³ச்ச²ந்தீதி க³ஹேதப்³போ³.
Gandhabbavatikādayo gandhabbādīnaṃ sahabyataṃ upagacchantīti attho na gahetabbo, micchādiṭṭhiyā gahitattā nirayatiracchānayonimeva upagacchantīti gahetabbo.
முதஸுத்³தி⁴காதி பு²ஸிதேன ஸுத்³தி⁴கா. பத²விங் ஆமஸந்தீதி ஸஸம்பா⁴ரிகங் மஹாபத²விங் காயேன பு²ஸந்தி. ஹரிதந்தி அல்லனீலஸத்³த³லங். கோ³மயந்தி க³வாதி³கோ³மயங். கச்ச²பந்தி அட்டி²கச்ச²பாதி³அனேகவித⁴ங். பா²லங் அக்கமந்தீதி அயபா²லங் மத்³த³ந்தி. திலவாஹந்தி திலஸகடங் திலராஸிங் வா. பு²ஸ்ஸதிலங் கா²த³ந்தீதி மங்க³லபடிஸங்யுத்தங் திலங் கா²த³ந்தி. பு²ஸ்ஸதேலங் மக்கெ²ந்தீதி ததா²ரூபங் திலதேலங் ஸரீரப்³ப⁴ஞ்ஜனங் கரொந்தி. த³ந்தகட்ட²ந்தி த³ந்தபோணங். மத்திகாய ந்ஹாயந்தீதி குங்குட்டா²தி³காய ஸண்ஹமத்திகாய ஸரீரங் உப்³ப³ட்டெத்வா ந்ஹாயந்தி. ஸாடகங் நிவாஸெந்தீதி மங்க³லபடிஸங்யுத்தங் வத்த²ங் பரித³ஹந்தி. வேட²னங் வேடெ²ந்தீதி ஸீஸவேட²னங் பத்துண்ணாதி³படங் ஸீஸே ட²பெந்தி படிமுச்சந்தி.
Mutasuddhikāti phusitena suddhikā. Pathaviṃ āmasantīti sasambhārikaṃ mahāpathaviṃ kāyena phusanti. Haritanti allanīlasaddalaṃ. Gomayanti gavādigomayaṃ. Kacchapanti aṭṭhikacchapādianekavidhaṃ. Phālaṃ akkamantīti ayaphālaṃ maddanti. Tilavāhanti tilasakaṭaṃ tilarāsiṃ vā. Phussatilaṃ khādantīti maṅgalapaṭisaṃyuttaṃ tilaṃ khādanti. Phussatelaṃ makkhentīti tathārūpaṃ tilatelaṃ sarīrabbhañjanaṃ karonti. Dantakaṭṭhanti dantapoṇaṃ. Mattikāya nhāyantīti kuṅkuṭṭhādikāya saṇhamattikāya sarīraṃ ubbaṭṭetvā nhāyanti. Sāṭakaṃ nivāsentīti maṅgalapaṭisaṃyuttaṃ vatthaṃ paridahanti. Veṭhanaṃ veṭhentīti sīsaveṭhanaṃ pattuṇṇādipaṭaṃ sīse ṭhapenti paṭimuccanti.
தேதா⁴துகங் குஸலாபி⁴ஸங்கா²ரந்தி காமதா⁴துரூபதா⁴துஅரூபதா⁴தூஸு படிஸந்தி⁴தா³யகங் கோஸல்லஸம்பூ⁴தங் பச்சயாபி⁴ஸங்கா²ரங். ஸப்³ப³ங் அகுஸலந்தி த்³வாத³ஸவித⁴ங் அகோஸல்லஸம்பூ⁴தங் அகுஸலங். யதோதி யதா³. தே த³ஸவிதோ⁴ புஞ்ஞாபி⁴ஸங்கா²ரோ ச, த்³வாத³ஸவிதோ⁴ அபுஞ்ஞாபி⁴ஸங்கா²ரோ ச, சதுப்³பி³தோ⁴ ஆனேஞ்ஜாபி⁴ஸங்கா²ரோ ச யதா²னுரூபங் ஸமுச்சே²த³ப்பஹானேன பஹீனா ஹொந்தி. அத்ததி³ட்டி²ஜஹோதி ‘‘ஏஸோ மே அத்தா’’தி க³ஹிததி³ட்டி²ங் ஜஹோ. கா³ஹங் ஜஹோதி ‘‘ஏஸோஹமஸ்மீ’’தி மானஸம்பயுத்தக³ஹணங் ஜஹோ. புன அத்தஞ்ஜஹோதி ‘‘ஏதங் மமா’’தி தண்ஹாக³ஹணவஸேன ச தி³ட்டி²க³ஹணவஸேன ச பராமஸித்வா க³ஹிதங், பரதோ ஆமட்ட²ஞ்ச, தஸ்மிங் அபி⁴னிவிட்ட²ஞ்ச, ப³லவதண்ஹாவஸேன கி³லித்வா அஜ்ஜோ²ஸிதஞ்ச, ப³லவமுச்சி²தஞ்ச. ஸப்³ப³ங் தங் சத்தங் ஹோதீதிஆத³யோ வுத்தனயாயேவ.
Tedhātukaṃ kusalābhisaṅkhāranti kāmadhāturūpadhātuarūpadhātūsu paṭisandhidāyakaṃ kosallasambhūtaṃ paccayābhisaṅkhāraṃ. Sabbaṃ akusalanti dvādasavidhaṃ akosallasambhūtaṃ akusalaṃ. Yatoti yadā. Te dasavidho puññābhisaṅkhāro ca, dvādasavidho apuññābhisaṅkhāro ca, catubbidho āneñjābhisaṅkhāro ca yathānurūpaṃ samucchedappahānena pahīnā honti. Attadiṭṭhijahoti ‘‘eso me attā’’ti gahitadiṭṭhiṃ jaho. Gāhaṃ jahoti ‘‘esohamasmī’’ti mānasampayuttagahaṇaṃ jaho. Puna attañjahoti ‘‘etaṃ mamā’’ti taṇhāgahaṇavasena ca diṭṭhigahaṇavasena ca parāmasitvā gahitaṃ, parato āmaṭṭhañca, tasmiṃ abhiniviṭṭhañca, balavataṇhāvasena gilitvā ajjhositañca, balavamucchitañca. Sabbaṃ taṃ cattaṃ hotītiādayo vuttanayāyeva.
26. ஏவங் ‘‘ந ப்³ராஹ்மணோ அஞ்ஞதோ ஸுத்³தி⁴மாஹா’’தி வத்வா இதா³னி யே தி³ட்டி²க³திகா அஞ்ஞதோ ஸுத்³தி⁴ங் ப்³ருவந்தி, தேஸங் தஸ்ஸா தி³ட்டி²யா அனிப்³பா³ஹகபா⁴வங் த³ஸ்ஸெந்தோ ‘‘புரிமங் பஹாயா’’தி கா³த²மாஹ. தஸ்ஸத்தோ² – தேஹி அஞ்ஞதோ ஸுத்³தி⁴வாதா³ ஸமானாபி யஸ்ஸா தி³ட்டி²யா அப்பஹீனத்தா க³ஹணமுஞ்சனங் ஹோதி, தாய புரிமங் ஸத்தா²ராதி³ங் பஹாய அபரங் நிஸ்ஸிதா, ஏஜாஸங்கா²தாய தண்ஹாய அனுக³தா அபி⁴பூ⁴தா ராகா³தி³பே⁴த³ங் ந தரந்தி ஸங்க³ங், தஞ்ச அதரந்தா தங் தங் த⁴ம்மங் உக்³க³ண்ஹந்தி ச நிரஸ்ஸஜந்தி ச மக்கடோவ ஸாக²ந்தி.
26. Evaṃ ‘‘na brāhmaṇo aññato suddhimāhā’’ti vatvā idāni ye diṭṭhigatikā aññato suddhiṃ bruvanti, tesaṃ tassā diṭṭhiyā anibbāhakabhāvaṃ dassento ‘‘purimaṃ pahāyā’’ti gāthamāha. Tassattho – tehi aññato suddhivādā samānāpi yassā diṭṭhiyā appahīnattā gahaṇamuñcanaṃ hoti, tāya purimaṃ satthārādiṃ pahāya aparaṃ nissitā, ejāsaṅkhātāya taṇhāya anugatā abhibhūtā rāgādibhedaṃ na taranti saṅgaṃ, tañca atarantā taṃ taṃ dhammaṃ uggaṇhanti ca nirassajanti ca makkaṭova sākhanti.
புரிமங் ஸத்தா²ரங் பஹாயாதி புரிமக³ஹிதங் ஸத்து²படிஞ்ஞங் வஜ்ஜெத்வா. பரங் ஸத்தா²ரங் நிஸ்ஸிதாதி அஞ்ஞங் ஸத்து²படிஞ்ஞங் நிஸ்ஸிதா அல்லீனா. புரிமங் த⁴ம்மக்கா²னங் பஹாயாதிஆதீ³ஸுபி ஏஸேவ நயோ.
Purimaṃ satthāraṃ pahāyāti purimagahitaṃ satthupaṭiññaṃ vajjetvā. Paraṃ satthāraṃ nissitāti aññaṃ satthupaṭiññaṃ nissitā allīnā. Purimaṃ dhammakkhānaṃ pahāyātiādīsupi eseva nayo.
ஏஜானுகா³தி தண்ஹாய அனுகா³. ஏஜானுக³தாதி தண்ஹாய அனுக³தா. ஏஜானுஸடாதி தண்ஹாய அனுஸடா பக்க²ந்தா³ வா. ஏஜாய பன்னா பதிதாதி தண்ஹாய நிமுக்³கா³ ச நிக்கி²பிதா ச.
Ejānugāti taṇhāya anugā. Ejānugatāti taṇhāya anugatā. Ejānusaṭāti taṇhāya anusaṭā pakkhandā vā. Ejāya pannā patitāti taṇhāya nimuggā ca nikkhipitā ca.
மக்கடோதி வானரோ. அரஞ்ஞேதி விபினே. பவனேதி மஹாவனே. சரமானோதி க³ச்ச²மானோ. ஏவமேவாதி ஓபம்மஸங்ஸந்த³னங். புதூ²தி நானா. புது²தி³ட்டி²க³தானீதி நானாவிதா⁴னி தி³ட்டி²க³தானி. க³ண்ஹந்தி ச முஞ்சந்தி சாதி க³ஹணவஸேன க³ண்ஹந்தி ச சஜனவஸேன முஞ்சந்தி ச. ஆதி³யந்தி ச நிரஸ்ஸஜந்தி சாதி பலிபோ³த⁴ங் கரொந்தி ச விஸ்ஸஜ்ஜெந்தி ச கி²பந்தி ச.
Makkaṭoti vānaro. Araññeti vipine. Pavaneti mahāvane. Caramānoti gacchamāno. Evamevāti opammasaṃsandanaṃ. Puthūti nānā. Puthudiṭṭhigatānīti nānāvidhāni diṭṭhigatāni. Gaṇhanti ca muñcanti cāti gahaṇavasena gaṇhanti ca cajanavasena muñcanti ca. Ādiyanti ca nirassajanti cāti palibodhaṃ karonti ca vissajjenti ca khipanti ca.
27. பஞ்சமகா³தா²ய ச ஸம்ப³ந்தோ⁴ – யோ ச ஸோ ‘‘தி³ட்டீ² ஹி நங் பாவ ததா² வதா³ன’’ந்தி வுத்தோ, ஸோ ஸயங் ஸமாதா³யாதி. தத்த² ஸயந்தி ஸாமங் . ஸமாதா³யாதி க³ஹெத்வா. வதானீதி ஹத்தி²வதாதீ³னி. உச்சாவசந்தி அபராபரங், ஹீனபணீதங் வா ஸத்தா²ரதோ ஸத்தா²ராதி³ங். ஸஞ்ஞஸத்தோதி காமஸஞ்ஞாதீ³ஸு லக்³கோ³. வித்³வா ச வேதே³ஹி ஸமேச்ச த⁴ம்மந்தி பரமத்த²வித்³வா ச அரஹா சதூஹி மக்³க³ஞாணவேதே³ஹி சதுஸச்சத⁴ம்மங் அபி⁴ஸமேச்சாதி. ஸேஸங் பாகடமேவ.
27. Pañcamagāthāya ca sambandho – yo ca so ‘‘diṭṭhī hi naṃ pāva tathā vadāna’’nti vutto, so sayaṃ samādāyāti. Tattha sayanti sāmaṃ . Samādāyāti gahetvā. Vatānīti hatthivatādīni. Uccāvacanti aparāparaṃ, hīnapaṇītaṃ vā satthārato satthārādiṃ. Saññasattoti kāmasaññādīsu laggo. Vidvā ca vedehi samecca dhammanti paramatthavidvā ca arahā catūhi maggañāṇavedehi catusaccadhammaṃ abhisameccāti. Sesaṃ pākaṭameva.
ஸாமங் ஸமாதா³யாதி ஸயமேவ க³ஹெத்வா. ஆதா³யாதி ஆதி³யித்வா க³ண்ஹித்வா. ஸமாதா³யாதி ஸம்மா ஆதா³ய. ஆதி³யித்வாதி பலிபோ³த⁴ங் கத்வா. ஸமாதி³யித்வாதி ஸம்மா பலிபோ³த⁴ங் கத்வா. க³ண்ஹித்வாதி அவிஸ்ஸஜ்ஜெத்வா. பராமஸித்வாதி த³ஸ்ஸித்வா. அபி⁴னிவிஸித்வாதி பதிட்ட²ஹித்வா. காமஸஞ்ஞாத³யோ வுத்தனயா ஏவ.
Sāmaṃ samādāyāti sayameva gahetvā. Ādāyāti ādiyitvā gaṇhitvā. Samādāyāti sammā ādāya. Ādiyitvāti palibodhaṃ katvā. Samādiyitvāti sammā palibodhaṃ katvā. Gaṇhitvāti avissajjetvā. Parāmasitvāti dassitvā. Abhinivisitvāti patiṭṭhahitvā. Kāmasaññādayo vuttanayā eva.
வித்³வாதி மேதா⁴வீ. விஜ்ஜாக³தோதி விஜானநபா⁴வங் க³தோ. ஞாணீதி பஞ்ஞாஸம்பன்னோ. விபா⁴வீதி ஞாணேன வீமங்ஸகோ. மேதா⁴வீதி அனிச்சாதீ³ஹி துலிதஞாணோ. பஞ்ஞாதிஆத³யோ ஹெட்டா² வுத்தனயாயேவ. சதுஸச்சத⁴ம்மங் விசினாதீதி த⁴ம்மவிசயஸம்பொ³ஜ்ஜ²ங்கோ³. பொ³ஜ்ஜ²ங்க³த்தோ² ஹெட்டா² வுத்தோவ. வீமங்ஸாதி சதுஸச்சத⁴ம்மவிசினநா பஞ்ஞாவ. ‘‘வீமங்ஸா த⁴ம்மசிந்தனா’’தி ஹி வுத்தா. விபஸ்ஸனாதி மக்³க³ஸம்பயுத்தா விவிதா⁴காரேன பஸ்ஸனா பஞ்ஞாவ. ஸம்மாதி³ட்டீ²தி ஸோப⁴னா பஸட்டா² ஸுந்த³ரா மக்³க³ஸம்பயுத்தா ஸம்மாதி³ட்டி². தேஹி வேதே³ஹீதி ஏதேஹேவ சதூஹி மக்³க³ஞாணேஹி. அந்தக³தோதி ஜாதிஜராமரணஸ்ஸ பரியோஸானங் க³தோ. கோடிக³தோதிஆத³யோ ஹெட்டா² வுத்தனயாவ. வேதா³னங் வா அந்தக³தோதி ஜானிதப்³பா³னங் அவஸானப்பத்தோ. வேதே³ஹி வா அந்தக³தோதி சதூஹி மக்³க³ஞாணவேதே³ஹி வட்டது³க்க²ஸ்ஸ பரியந்தபா⁴வேன அந்தஸங்கா²தங் நிப்³பா³னங் க³தோ. விதி³தத்தாதி விதி³தபா⁴வேன ஜானிதபா⁴வேன.
Vidvāti medhāvī. Vijjāgatoti vijānanabhāvaṃ gato. Ñāṇīti paññāsampanno. Vibhāvīti ñāṇena vīmaṃsako. Medhāvīti aniccādīhi tulitañāṇo. Paññātiādayo heṭṭhā vuttanayāyeva. Catusaccadhammaṃ vicinātīti dhammavicayasambojjhaṅgo. Bojjhaṅgattho heṭṭhā vuttova. Vīmaṃsāti catusaccadhammavicinanā paññāva. ‘‘Vīmaṃsā dhammacintanā’’ti hi vuttā. Vipassanāti maggasampayuttā vividhākārena passanā paññāva. Sammādiṭṭhīti sobhanā pasaṭṭhā sundarā maggasampayuttā sammādiṭṭhi. Tehi vedehīti eteheva catūhi maggañāṇehi. Antagatoti jātijarāmaraṇassa pariyosānaṃ gato. Koṭigatotiādayo heṭṭhā vuttanayāva. Vedānaṃ vā antagatoti jānitabbānaṃ avasānappatto. Vedehi vā antagatoti catūhi maggañāṇavedehi vaṭṭadukkhassa pariyantabhāvena antasaṅkhātaṃ nibbānaṃ gato. Viditattāti viditabhāvena jānitabhāvena.
வேதா³னி விசெய்ய கேவலானீதி கா³தா²ய அயமத்தோ² – யோ சதூஹி மக்³க³ஞாணவேதே³ஹி கிலேஸக்க²யங் கரொந்தோ க³தோ, ஸோ பரமத்த²தோ வேத³கூ³ நாம ஹோதி. ஸோவ ஸப்³ப³ஸமணப்³ராஹ்மணானங் ஸத்த²ஸஞ்ஞிதானி வேதா³னி தாயேவ மக்³க³பா⁴வனாய கிச்சதோ அனிச்சாதி³வஸேன விசெய்ய. தத்த² ச²ந்த³ராக³ப்பஹானேன தமேவ ஸப்³ப³ங் வேத³மதிச்ச யாபி வேத³பச்சயா, அஞ்ஞதா² வா உப்பஜ்ஜந்தி வேத³னா, தாஸு ஸப்³ப³வேத³னாஸு வீதராகோ³ ஹோதி. தஸ்மா தமத்த²ங் த³ஸ்ஸெந்தோ ‘‘கிங் பத்தினமாஹு வேத³கு³’’ந்தி (ஸு॰ நி॰ 533) புட்டோ² ‘‘இத³ங் பத்தின’’ந்தி அவத்வா ‘‘வேதா³னி விசெய்ய…பே॰… வேத³கூ³ ஸோ’’தி ஆஹ. யஸ்மா வா யோ பவிசயபஞ்ஞாய வேதா³னி விசெய்ய, தத்த² ச²ந்த³ராக³ப்பஹானேன ஸப்³ப³ங் வேத³மதிச்ச வத்ததி. ஸோ ஸத்த²ஸஞ்ஞிதானி வேதா³னி க³தோ ஞாதோ அதிக்கந்தோவ ஹோதி. யோ வேத³னாஸு வீதராகோ³, ஸோபி வேத³னாஸஞ்ஞிதானி வேதா³னி க³தோ அதிக்கந்தோ , அதிவேத³னங் க³தோதிபி வேத³கூ³. தஸ்மா தம்பி அத்த²ங் த³ஸ்ஸெந்தோ ‘‘இத³ங் பத்தின’’ந்தி அவத்வா ‘‘வேதா³னி விசெய்ய…பே॰… வேத³கூ³ ஸோ’’தி ஆஹ.
Vedāni viceyya kevalānīti gāthāya ayamattho – yo catūhi maggañāṇavedehi kilesakkhayaṃ karonto gato, so paramatthato vedagū nāma hoti. Sova sabbasamaṇabrāhmaṇānaṃ satthasaññitāni vedāni tāyeva maggabhāvanāya kiccato aniccādivasena viceyya. Tattha chandarāgappahānena tameva sabbaṃ vedamaticca yāpi vedapaccayā, aññathā vā uppajjanti vedanā, tāsu sabbavedanāsu vītarāgo hoti. Tasmā tamatthaṃ dassento ‘‘kiṃ pattinamāhu vedagu’’nti (su. ni. 533) puṭṭho ‘‘idaṃ pattina’’nti avatvā ‘‘vedāni viceyya…pe… vedagū so’’ti āha. Yasmā vā yo pavicayapaññāya vedāni viceyya, tattha chandarāgappahānena sabbaṃ vedamaticca vattati. So satthasaññitāni vedāni gato ñāto atikkantova hoti. Yo vedanāsuvītarāgo, sopi vedanāsaññitāni vedāni gato atikkanto , ativedanaṃ gatotipi vedagū. Tasmā tampi atthaṃ dassento ‘‘idaṃ pattina’’nti avatvā ‘‘vedāni viceyya…pe… vedagū so’’ti āha.
ஸமேச்சாதி ஞாணேன ஸமாக³ந்த்வா. அபி⁴ஸமேச்சாதி ஞாணேன படிவிஜ்ஜி²த்வா. த⁴ம்மந்தி சதுஸச்சத⁴ம்மங். ஸப்³பே³ ஸங்கா²ராதி ஸப்³பே³ ஸப்பச்சயா த⁴ம்மா. தே ஹி ஸங்க²தஸங்கா²ரா நாம. பச்சயேஹி ஸங்க³ம்ம கரீயந்தீதி ஸங்கா²ரா, தே ஏவங் பச்சயேஹி ஸங்க³ம்ம கதத்தா ‘‘ஸங்க²தா’’தி விஸேஸெத்வா வுத்தா. ‘‘கம்மனிப்³ப³த்தா தேபூ⁴மகரூபாரூபத⁴ம்மா அபி⁴ஸங்க²தஸங்கா²ரா’’தி (விஸுத்³தி⁴॰ 2.587) அட்ட²கதா²ஸு வுத்தா. தேபி ‘‘அனிச்சா வத ஸங்கா²ரா’’திஆதீ³ஸு (தீ³॰ நி॰ 2.221, 272; ஸங்॰ நி॰ 1.186) ஸங்க²தஸங்கா²ரேஸு ஸங்க³ஹங் க³ச்ச²ந்தி. ‘‘அவிஜ்ஜாக³தோயங், பி⁴க்க²வே, புரிஸபுக்³க³லோ புஞ்ஞஞ்சே ஸங்கா²ரங் அபி⁴ஸங்க²ரோதீ’’திஆதீ³ஸு (ஸங்॰ நி॰ 2.51) அவிஜ்ஜாபச்சயா ஸங்கா²ராவ ஆக³தா. தேபூ⁴மிககுஸலாகுஸலசேதனா அபி⁴ஸங்க²ரணகஸங்கா²ரா நாம. ‘‘யாவதிகா அபி⁴ஸங்கா²ரஸ்ஸ க³தி, தாவதிகங் க³ந்த்வா அக்கா²ஹதங் மஞ்ஞே அட்டா²ஸீ’’திஆதீ³ஸு (அ॰ நி॰ 3.15) ஆக³தங் காயிகசேதஸிகவீரியங் பயோகா³பி⁴ஸங்கா²ரோ நாம. ‘‘ஸஞ்ஞாவேத³யிதனிரோத⁴ங் ஸமாபன்னஸ்ஸ கோ², ஆவுஸோ விஸாக², பி⁴க்கு²னோ பட²மங் நிருஜ்ஜ²தி வசீஸங்கா²ரோ, ததோ காயஸங்கா²ரோ, ததோ சித்தஸங்கா²ரோ’’திஆதீ³ஸு (ம॰ நி॰ 1.464) ஆக³தா விதக்கவிசாரா வாசங் ஸங்க²ரொந்தீதி வசீஸங்கா²ரா, அஸ்ஸாஸபஸ்ஸாஸா காயேன ஸங்க²ரீயந்தீதி காயஸங்கா²ரா, ஸஞ்ஞா ச வேத³னா ச சித்தேன ஸங்க²ரீயந்தீதி சித்தஸங்கா²ரா. இத⁴ பன ஸங்க²தஸங்கா²ரா அதி⁴ப்பேதா. அனிச்சா ஹுத்வா அபா⁴வட்டே²ன. து³க்கா² படிபீளனட்டே²ன. ஸப்³பே³ த⁴ம்மாதி நிப்³பா³னம்பி அந்தோகத்வா வுத்தா. அனத்தா அவஸவத்தனட்டே²ன. அவிஜ்ஜாபச்சயா ஸங்கா²ராதி எத்த² யங் படிச்ச ப²லமேதி, ஸோ பச்சயோ. படிச்சாதி ந வினா, அபச்சக்கி²த்வாதி அத்தோ². ஏதீதி உப்பஜ்ஜதி சேவ பவத்ததி சாதி அத்தோ². அபிச உபகாரகட்டோ² பச்சயட்டோ². அவிஜ்ஜா ச ஸா பச்சயோ சாதி அவிஜ்ஜாபச்சயோ, தஸ்மா அவிஜ்ஜாபச்சயா. ஸங்கா²ரா ஸம்ப⁴வந்தீதி நிப்³ப³த்தந்தி, ஏவங் ஸம்ப⁴வந்திஸத்³த³ஸ்ஸ ஸேஸபதே³ஹிபி யோஜனா காதப்³பா³.
Sameccāti ñāṇena samāgantvā. Abhisameccāti ñāṇena paṭivijjhitvā. Dhammanti catusaccadhammaṃ. Sabbe saṅkhārāti sabbe sappaccayā dhammā. Te hi saṅkhatasaṅkhārā nāma. Paccayehi saṅgamma karīyantīti saṅkhārā, te evaṃ paccayehi saṅgamma katattā ‘‘saṅkhatā’’ti visesetvā vuttā. ‘‘Kammanibbattā tebhūmakarūpārūpadhammā abhisaṅkhatasaṅkhārā’’ti (visuddhi. 2.587) aṭṭhakathāsu vuttā. Tepi ‘‘aniccā vata saṅkhārā’’tiādīsu (dī. ni. 2.221, 272; saṃ. ni. 1.186) saṅkhatasaṅkhāresu saṅgahaṃ gacchanti. ‘‘Avijjāgatoyaṃ, bhikkhave, purisapuggalo puññañce saṅkhāraṃ abhisaṅkharotī’’tiādīsu (saṃ. ni. 2.51) avijjāpaccayā saṅkhārāva āgatā. Tebhūmikakusalākusalacetanā abhisaṅkharaṇakasaṅkhārā nāma. ‘‘Yāvatikā abhisaṅkhārassa gati, tāvatikaṃ gantvā akkhāhataṃ maññe aṭṭhāsī’’tiādīsu (a. ni. 3.15) āgataṃ kāyikacetasikavīriyaṃ payogābhisaṅkhāro nāma. ‘‘Saññāvedayitanirodhaṃ samāpannassa kho, āvuso visākha, bhikkhuno paṭhamaṃ nirujjhati vacīsaṅkhāro, tato kāyasaṅkhāro, tato cittasaṅkhāro’’tiādīsu (ma. ni. 1.464) āgatā vitakkavicārā vācaṃ saṅkharontīti vacīsaṅkhārā, assāsapassāsā kāyena saṅkharīyantīti kāyasaṅkhārā, saññā ca vedanā ca cittena saṅkharīyantīti cittasaṅkhārā. Idha pana saṅkhatasaṅkhārā adhippetā. Aniccā hutvā abhāvaṭṭhena. Dukkhā paṭipīḷanaṭṭhena. Sabbe dhammāti nibbānampi antokatvā vuttā. Anattā avasavattanaṭṭhena. Avijjāpaccayā saṅkhārāti ettha yaṃ paṭicca phalameti, so paccayo. Paṭiccāti na vinā, apaccakkhitvāti attho. Etīti uppajjati ceva pavattati cāti attho. Apica upakārakaṭṭho paccayaṭṭho. Avijjā ca sā paccayo cāti avijjāpaccayo, tasmā avijjāpaccayā. Saṅkhārā sambhavantīti nibbattanti, evaṃ sambhavantisaddassa sesapadehipi yojanā kātabbā.
தத்த² கதமா அவிஜ்ஜா? து³க்கே² அஞ்ஞாணங், து³க்க²ஸமுத³யே அஞ்ஞாணங், து³க்க²னிரோதே⁴ அஞ்ஞாணங், து³க்க²னிரோத⁴கா³மினியா படிபதா³ய அஞ்ஞாணங், புப்³ப³ந்தே அஞ்ஞாணங், அபரந்தே அஞ்ஞாணங், புப்³ப³ந்தாபரந்தே அஞ்ஞாணங், இத³ப்பச்சயதாபடிச்சஸமுப்பன்னேஸு த⁴ம்மேஸு அஞ்ஞாணங். கதமே ஸங்கா²ரா? புஞ்ஞாபி⁴ஸங்கா²ரோ அபுஞ்ஞாபி⁴ஸங்கா²ரோ ஆனேஞ்ஜாபி⁴ஸங்கா²ரோ, காயஸங்கா²ரோ வசீஸங்கா²ரோ சித்தஸங்கா²ரோ, அட்ட² காமாவசரகுஸலசேதனா, பஞ்ச ரூபாவசரகுஸலசேதனா புஞ்ஞாபி⁴ஸங்கா²ரோ, த்³வாத³ஸ அகுஸலசேதனா அபுஞ்ஞாபி⁴ஸங்கா²ரோ, சதஸ்ஸோ அரூபாவசரகுஸலசேதனா ஆனேஞ்ஜாபி⁴ஸங்கா²ரோ, காயஸஞ்சேதனா காயஸங்கா²ரோ, வசீஸஞ்சேதனா வசீஸங்கா²ரோ, மனோஸஞ்சேதனா சித்தஸங்கா²ரோ.
Tattha katamā avijjā? Dukkhe aññāṇaṃ, dukkhasamudaye aññāṇaṃ, dukkhanirodhe aññāṇaṃ, dukkhanirodhagāminiyā paṭipadāya aññāṇaṃ, pubbante aññāṇaṃ, aparante aññāṇaṃ, pubbantāparante aññāṇaṃ, idappaccayatāpaṭiccasamuppannesu dhammesu aññāṇaṃ. Katame saṅkhārā? Puññābhisaṅkhāro apuññābhisaṅkhāro āneñjābhisaṅkhāro, kāyasaṅkhāro vacīsaṅkhāro cittasaṅkhāro, aṭṭha kāmāvacarakusalacetanā, pañca rūpāvacarakusalacetanā puññābhisaṅkhāro, dvādasa akusalacetanā apuññābhisaṅkhāro, catasso arūpāvacarakusalacetanā āneñjābhisaṅkhāro, kāyasañcetanā kāyasaṅkhāro, vacīsañcetanā vacīsaṅkhāro, manosañcetanā cittasaṅkhāro.
தத்த² ஸியா – கத²ங் பனேதங் ஜானிதப்³ப³ங் ‘‘இமே ஸங்கா²ரா அவிஜ்ஜாபச்சயா ஹொந்தீ’’தி? அவிஜ்ஜாபா⁴வே பா⁴வதோ. யஸ்ஸ ஹி து³க்கா²தீ³ஸு அவிஜ்ஜாஸங்கா²தங் அஞ்ஞாணங் அப்பஹீனங் ஹோதி, ஸோ து³க்கே² தாவ புப்³ப³ந்தாதீ³ஸு ச அஞ்ஞாணேன ஸங்ஸாரது³க்க²ங் ஸுக²ஸஞ்ஞாய க³ஹெத்வா தஸ்ஸேவ ஹேதுபூ⁴தே திவிதே⁴பி ஸங்கா²ரே ஆரப⁴தி. ஸமுத³யே அஞ்ஞாணேன து³க்க²ஹேதுபூ⁴தேபி தண்ஹாபரிக்கா²ரே ஸங்கா²ரே ஸுக²ஹேதுதோ மஞ்ஞமானோ ஆரப⁴தி. நிரோதே⁴ பன மக்³கே³ ச அஞ்ஞாணேன து³க்க²ஸ்ஸ அனிரோத⁴பூ⁴தேபி க³திவிஸேஸே து³க்க²னிரோத⁴ஸஞ்ஞீ ஹுத்வா நிரோத⁴ஸ்ஸ ச அமக்³க³பூ⁴தேஸுபி யஞ்ஞாமரதபாதீ³ஸு நிரோத⁴மக்³க³ஸஞ்ஞீ ஹுத்வா து³க்க²னிரோத⁴ங் பத்த²யமானோ யஞ்ஞாமரதபாதி³முகே²ன திவிதே⁴பி ஸங்கா²ரே ஆரப⁴தி.
Tattha siyā – kathaṃ panetaṃ jānitabbaṃ ‘‘ime saṅkhārā avijjāpaccayā hontī’’ti? Avijjābhāve bhāvato. Yassa hi dukkhādīsu avijjāsaṅkhātaṃ aññāṇaṃ appahīnaṃ hoti, so dukkhe tāva pubbantādīsu ca aññāṇena saṃsāradukkhaṃ sukhasaññāya gahetvā tasseva hetubhūte tividhepi saṅkhāre ārabhati. Samudaye aññāṇena dukkhahetubhūtepi taṇhāparikkhāre saṅkhāre sukhahetuto maññamāno ārabhati. Nirodhe pana magge ca aññāṇena dukkhassa anirodhabhūtepi gativisese dukkhanirodhasaññī hutvā nirodhassa ca amaggabhūtesupi yaññāmaratapādīsu nirodhamaggasaññī hutvā dukkhanirodhaṃ patthayamāno yaññāmaratapādimukhena tividhepi saṅkhāre ārabhati.
அபி ச ஸோ தாய சதூஸு ஸச்சேஸு அப்பஹீனாவிஜ்ஜதாய விஸேஸதோ ஜாதிஜராரோக³மரணாதி³அனேகாதீ³னவவோகிண்ணம்பி புஞ்ஞப²லஸங்கா²தங் து³க்க²ங் து³க்க²தோ அஜானந்தோ தஸ்ஸ அதி⁴க³மாய காயவசீசித்தஸங்கா²ரபே⁴த³ங் புஞ்ஞாபி⁴ஸங்கா²ரங் ஆரப⁴தி தே³வச்ச²ரகாமகோ விய மருப்பபாதங். ஸுக²ஸம்மதஸ்ஸாபி ச தஸ்ஸ புஞ்ஞப²லஸ்ஸ அந்தே மஹாபரிளாஹஜனிகங் விபரிணாமது³க்க²தங் அப்பஸ்ஸாத³தஞ்ச அபஸ்ஸந்தோபி தப்பச்சயங் வுத்தப்பகாரமேவ புஞ்ஞாபி⁴ஸங்கா²ரங் ஆரப⁴தி ஸலபோ⁴ விய தீ³பஸிகா²பி⁴னிபாதங், மது⁴பி³ந்து³கி³த்³தோ⁴ விய ச மது⁴லித்தஸத்த²தா⁴ராலேஹனங்.
Api ca so tāya catūsu saccesu appahīnāvijjatāya visesato jātijarārogamaraṇādianekādīnavavokiṇṇampi puññaphalasaṅkhātaṃ dukkhaṃ dukkhato ajānanto tassa adhigamāya kāyavacīcittasaṅkhārabhedaṃ puññābhisaṅkhāraṃ ārabhati devaccharakāmako viya maruppapātaṃ. Sukhasammatassāpi ca tassa puññaphalassa ante mahāpariḷāhajanikaṃ vipariṇāmadukkhataṃ appassādatañca apassantopi tappaccayaṃ vuttappakārameva puññābhisaṅkhāraṃ ārabhati salabho viya dīpasikhābhinipātaṃ, madhubindugiddho viya ca madhulittasatthadhārālehanaṃ.
காமுபஸேவனாதீ³ஸு ச ஸவிபாகேஸு ஆதீ³னவங் அபஸ்ஸந்தோ ஸுக²ஸஞ்ஞாய சேவ கிலேஸாபி⁴பூ⁴ததாய ச த்³வாரத்தயப்பவத்தம்பி அபுஞ்ஞாபி⁴ஸங்கா²ரங் ஆரப⁴தி பா³லோ விய கூ³த²கீளனங், மரிதுகாமோ விய ச விஸகா²த³னங். ஆருப்பவிபாகேஸு சாபி ஸங்கா²ரவிபரிணாமது³க்க²தங் அனவபு³ஜ்ஜ²மானோ ஸஸ்ஸதாதி³விபல்லாஸேன சித்தஸங்கா²ரபூ⁴தங் ஆனேஞ்ஜாபி⁴ஸங்கா²ரங் ஆரப⁴தி தி³ஸாமூள்ஹோ விய பிஸாசனக³ராபி⁴முக²மக்³க³க³மனங். ஏவங் யஸ்மா அவிஜ்ஜாபா⁴வதோவ ஸங்கா²ரபா⁴வோ, ந அபா⁴வதோ. தஸ்மா ஜானிதப்³ப³மேதங் ‘‘இமே ஸங்கா²ரா அவிஜ்ஜாபச்சயா ஹொந்தீ’’தி.
Kāmupasevanādīsu ca savipākesu ādīnavaṃ apassanto sukhasaññāya ceva kilesābhibhūtatāya ca dvārattayappavattampi apuññābhisaṅkhāraṃ ārabhati bālo viya gūthakīḷanaṃ, maritukāmo viya ca visakhādanaṃ. Āruppavipākesu cāpi saṅkhāravipariṇāmadukkhataṃ anavabujjhamāno sassatādivipallāsena cittasaṅkhārabhūtaṃ āneñjābhisaṅkhāraṃ ārabhati disāmūḷho viya pisācanagarābhimukhamaggagamanaṃ. Evaṃ yasmā avijjābhāvatova saṅkhārabhāvo, na abhāvato. Tasmā jānitabbametaṃ ‘‘ime saṅkhārā avijjāpaccayā hontī’’ti.
எத்தா²ஹ – க³ண்ஹாம தாவ ஏதங் ‘‘அவிஜ்ஜா ஸங்கா²ரானங் பச்சயோ’’தி, கிங் பனாயமேகாவ அவிஜ்ஜா ஸங்கா²ரானங் பச்சயோ, உதா³ஹு அஞ்ஞேபி பச்சயா ஸந்தீதி? கிங் பனெத்த² யதி³ தாவ ஏகாவ, ஏககாரணவாதோ³ ஆபஜ்ஜதி. அத² அஞ்ஞேபி ஸந்தி, ‘‘அவிஜ்ஜாபச்சயா ஸங்கா²ரா’’தி ஏககாரணனித்³தே³ஸோ நுபபஜ்ஜதீதி? ந நுபபஜ்ஜதி. கஸ்மா? யஸ்மா –
Etthāha – gaṇhāma tāva etaṃ ‘‘avijjā saṅkhārānaṃ paccayo’’ti, kiṃ panāyamekāva avijjā saṅkhārānaṃ paccayo, udāhu aññepi paccayā santīti? Kiṃ panettha yadi tāva ekāva, ekakāraṇavādo āpajjati. Atha aññepi santi, ‘‘avijjāpaccayā saṅkhārā’’ti ekakāraṇaniddeso nupapajjatīti? Na nupapajjati. Kasmā? Yasmā –
‘‘ஏகங் ந ஏகதோ இத⁴, நானேகமனேகதோபி நோ ஏகங்;
‘‘Ekaṃ na ekato idha, nānekamanekatopi no ekaṃ;
ப²லமத்தி² அத்தி² பன ஏக-ஹேதுப²லதீ³பனே அத்தோ²’’. (விப⁴॰ அட்ட²॰ 226, ஸங்கா²ரபத³னித்³தே³ஸ; படி॰ ம॰ அட்ட²॰ 1.1.105; விஸுத்³தி⁴॰ 2.617);
Phalamatthi atthi pana eka-hetuphaladīpane attho’’. (vibha. aṭṭha. 226, saṅkhārapadaniddesa; paṭi. ma. aṭṭha. 1.1.105; visuddhi. 2.617);
ப⁴க³வா ஹி கத்த²சி பதா⁴னத்தா, கத்த²சி பாகடத்தா, கத்த²சி அஸாதா⁴ரணத்தா தே³ஸனாவிலாஸஸ்ஸ ச வேனெய்யானஞ்ச அனுரூபதோ ஏகமேவ ஹேதுங் வா ப²லங் வா தீ³பேதி. தஸ்மா அயமித⁴ அவிஜ்ஜா விஜ்ஜமானேஸுபி அஞ்ஞேஸு வத்தா²ரம்மணஸஹஜாதத⁴ம்மாதீ³ஸு ஸங்கா²ரகாரணேஸு ‘‘அஸ்ஸாதா³னுபஸ்ஸினோ தண்ஹா பவட்³ட⁴தீ’’தி (ஸங்॰ நி॰ 2.52) ச, ‘‘அவிஜ்ஜாஸமுத³யா ஆஸவஸமுத³யோ’’தி (ம॰ நி॰ 1.104) ச வசனதோ அஞ்ஞேஸம்பி தண்ஹாதீ³னங் ஸங்கா²ரஹேதூனங் ஹேதூதி பதா⁴னத்தா, ‘‘அவித்³வா, பி⁴க்க²வே, அவிஜ்ஜாக³தோ புஞ்ஞாபி⁴ஸங்கா²ரம்பி அபி⁴ஸங்க²ரோதீ’’தி பாகடத்தா, அஸாதா⁴ரணத்தா ச ஸங்கா²ரானங் ஹேதுபா⁴வேன தீ³பிதாதி வேதி³தப்³பா³. ஏதேனேவ ச ஏகேகஹேதுப²லதீ³பனபரிஹாரவசனேன ஸப்³ப³த்த² ஏகேகஹேதுப²லதீ³பனே பயோஜனங் வேதி³தப்³ப³ந்தி.
Bhagavā hi katthaci padhānattā, katthaci pākaṭattā, katthaci asādhāraṇattā desanāvilāsassa ca veneyyānañca anurūpato ekameva hetuṃ vā phalaṃ vā dīpeti. Tasmā ayamidha avijjā vijjamānesupi aññesu vatthārammaṇasahajātadhammādīsu saṅkhārakāraṇesu ‘‘assādānupassino taṇhā pavaḍḍhatī’’ti (saṃ. ni. 2.52) ca, ‘‘avijjāsamudayā āsavasamudayo’’ti (ma. ni. 1.104) ca vacanato aññesampi taṇhādīnaṃ saṅkhārahetūnaṃ hetūti padhānattā, ‘‘avidvā, bhikkhave, avijjāgato puññābhisaṅkhārampi abhisaṅkharotī’’ti pākaṭattā, asādhāraṇattā ca saṅkhārānaṃ hetubhāvena dīpitāti veditabbā. Eteneva ca ekekahetuphaladīpanaparihāravacanena sabbattha ekekahetuphaladīpane payojanaṃ veditabbanti.
எத்தா²ஹ – ஏவங் ஸந்தேபி ஏகந்தானிட்ட²ப²லாய ஸாவஜ்ஜாய அவிஜ்ஜாய கத²ங் புஞ்ஞானேஞ்ஜாபி⁴ஸங்கா²ரபச்சயத்தங் யுஜ்ஜதி? ந ஹி நிம்ப³பீ³ஜதோ உச்சு² உப்பஜ்ஜதீதி. கத²ங் ந யுஜ்ஜிஸ்ஸதி? லோகஸ்மிஞ்ஹி –
Etthāha – evaṃ santepi ekantāniṭṭhaphalāya sāvajjāya avijjāya kathaṃ puññāneñjābhisaṅkhārapaccayattaṃ yujjati? Na hi nimbabījato ucchu uppajjatīti. Kathaṃ na yujjissati? Lokasmiñhi –
‘‘விருத்³தோ⁴ சா விருத்³தோ⁴ ச, ஸதி³ஸாஸதி³ஸோ ததா²;
‘‘Viruddho cā viruddho ca, sadisāsadiso tathā;
த⁴ம்மானங் பச்சயோ ஸித்³தோ⁴, விபாகா ஏவ தே ச ந’’.
Dhammānaṃ paccayo siddho, vipākā eva te ca na’’.
இதி அயங் அவிஜ்ஜா விபாகவஸேன ஏகந்தானிட்ட²ப²லா, ஸபா⁴வவஸேன ச ஸாவஜ்ஜாபி ஸமானா ஸப்³பே³ஸம்பி ஏதேஸங் புஞ்ஞாபி⁴ஸங்கா²ராதீ³னங் யதா²னுரூபங் டா²னகிச்சஸபா⁴வவிருத்³தா⁴விருத்³த⁴பச்சயவஸேன, ஸதி³ஸாஸதி³ஸபச்சயவஸேன ச பச்சயோ ஹோதீதி வேதி³தப்³பா³. அபி ச அயங் அஞ்ஞோபி பரியாயோ –
Iti ayaṃ avijjā vipākavasena ekantāniṭṭhaphalā, sabhāvavasena ca sāvajjāpi samānā sabbesampi etesaṃ puññābhisaṅkhārādīnaṃ yathānurūpaṃ ṭhānakiccasabhāvaviruddhāviruddhapaccayavasena, sadisāsadisapaccayavasena ca paccayo hotīti veditabbā. Api ca ayaṃ aññopi pariyāyo –
‘‘சுதூபபாதே ஸங்ஸாரே, ஸங்கா²ரானஞ்ச லக்க²ணே;
‘‘Cutūpapāte saṃsāre, saṅkhārānañca lakkhaṇe;
யோ படிச்சஸமுப்பன்ன-த⁴ம்மேஸு ச விமுய்ஹதி.
Yo paṭiccasamuppanna-dhammesu ca vimuyhati.
‘‘அபி⁴ஸங்க²ரோதி ஸோ ஏதே, ஸங்கா²ரே திவிதே⁴ யதோ;
‘‘Abhisaṅkharoti so ete, saṅkhāre tividhe yato;
அவிஜ்ஜா பச்சயோ தேஸங், திவிதா⁴னம்பயங் ததோ.
Avijjā paccayo tesaṃ, tividhānampayaṃ tato.
‘‘யதா²பி நாம ஜச்சந்தோ⁴, நரோ அபரிணாயகோ;
‘‘Yathāpi nāma jaccandho, naro apariṇāyako;
ஏகதா³ யாதி மக்³கே³ன, உம்மக்³கே³னாபி ஏகதா³.
Ekadā yāti maggena, ummaggenāpi ekadā.
‘‘ஸங்ஸாரே ஸங்ஸரங் பா³லோ, ததா² அபரிணாயகோ;
‘‘Saṃsāre saṃsaraṃ bālo, tathā apariṇāyako;
கரோதி ஏகதா³ புஞ்ஞங், அபுஞ்ஞமபி ஏகதா³.
Karoti ekadā puññaṃ, apuññamapi ekadā.
‘‘யதா³ ச ஞத்வா ஸோ த⁴ம்மங், ஸச்சானி அபி⁴ஸமெஸ்ஸதி;
‘‘Yadā ca ñatvā so dhammaṃ, saccāni abhisamessati;
ததா³ அவிஜ்ஜூபஸமா, உபஸந்தோ சரிஸ்ஸதீ’’தி.
Tadā avijjūpasamā, upasanto carissatī’’ti.
ஸங்கா²ரபச்சயா விஞ்ஞாணந்தி ச²விஞ்ஞாணகாயா சக்கு²விஞ்ஞாணங் ஸோதவிஞ்ஞாணங் கா⁴னவிஞ்ஞாணங் ஜிவ்ஹாவிஞ்ஞாணங் காயவிஞ்ஞாணங் மனோவிஞ்ஞாணங். தத்த² சக்கு²விஞ்ஞாணங் குஸலவிபாகங் அகுஸலவிபாகந்தி து³வித⁴ங். ததா² ஸோதகா⁴னஜிவ்ஹாகாயவிஞ்ஞாணானி. மனோவிஞ்ஞாணங் பன த்³வே விபாகமனோதா⁴துயோ, திஸ்ஸோ அஹேதுகவிபாகமனோவிஞ்ஞாணதா⁴துயோ, அட்ட² ஸஹேதுகவிபாகசித்தானி, பஞ்ச ரூபாவசரவிபாகசித்தானி, சத்தாரி அரூபாவசரவிபாகசித்தானீதி பா³வீஸதிவித⁴ங். இதி ஸப்³பா³னி பா³த்திங்ஸலோகியவிபாகவிஞ்ஞாணானி.
Saṅkhārapaccayā viññāṇanti chaviññāṇakāyā cakkhuviññāṇaṃ sotaviññāṇaṃ ghānaviññāṇaṃ jivhāviññāṇaṃ kāyaviññāṇaṃ manoviññāṇaṃ. Tattha cakkhuviññāṇaṃ kusalavipākaṃ akusalavipākanti duvidhaṃ. Tathā sotaghānajivhākāyaviññāṇāni. Manoviññāṇaṃ pana dve vipākamanodhātuyo, tisso ahetukavipākamanoviññāṇadhātuyo, aṭṭha sahetukavipākacittāni, pañca rūpāvacaravipākacittāni, cattāri arūpāvacaravipākacittānīti bāvīsatividhaṃ. Iti sabbāni bāttiṃsalokiyavipākaviññāṇāni.
தத்த² ஸியா – கத²ங் பனேதங் ஜானிதப்³ப³ங் ‘‘இத³ங் வுத்தப்பகாரங் விஞ்ஞாணங் ஸங்கா²ரபச்சயா ஹோதீ’’தி? உபசிதகம்மாபா⁴வே விபாகாபா⁴வதோ. விபாகஞ்ஹேதங், விபாகஞ்ச ந உபசிதகம்மாபா⁴வே உப்பஜ்ஜதி, யதி³ உப்பஜ்ஜெய்ய, ஸப்³பே³ஸங் ஸப்³ப³விபாகானி உப்பஜ்ஜெய்யுங், ந ச உப்பஜ்ஜந்தீதி ஜானிதப்³ப³மேதங் ‘‘ஸங்கா²ரபச்சயா இத³ங் விஞ்ஞாணங் ஹோதீ’’தி. ஸப்³ப³மேவ ஹி இத³ங் பவத்திபடிஸந்தி⁴வஸேன த்³வேதா⁴ பவத்ததி . தத்த² த்³வே பஞ்சவிஞ்ஞாணானி, த்³வே மனோதா⁴துயோ, ஸோமனஸ்ஸஸஹக³தா அஹேதுகமனோவிஞ்ஞாணதா⁴தூதி இமானி தேரஸ பஞ்சவோகாரப⁴வே பவத்தியங்யேவ பவத்தந்தி. ஸேஸானி ஏகூனவீஸதி தீஸு ப⁴வேஸு யதா²னுரூபங் பவத்தியம்பி படிஸந்தி⁴யம்பி பவத்தந்தி.
Tattha siyā – kathaṃ panetaṃ jānitabbaṃ ‘‘idaṃ vuttappakāraṃ viññāṇaṃ saṅkhārapaccayā hotī’’ti? Upacitakammābhāve vipākābhāvato. Vipākañhetaṃ, vipākañca na upacitakammābhāve uppajjati, yadi uppajjeyya, sabbesaṃ sabbavipākāni uppajjeyyuṃ, na ca uppajjantīti jānitabbametaṃ ‘‘saṅkhārapaccayā idaṃ viññāṇaṃ hotī’’ti. Sabbameva hi idaṃ pavattipaṭisandhivasena dvedhā pavattati . Tattha dve pañcaviññāṇāni, dve manodhātuyo, somanassasahagatā ahetukamanoviññāṇadhātūti imāni terasa pañcavokārabhave pavattiyaṃyeva pavattanti. Sesāni ekūnavīsati tīsu bhavesu yathānurūpaṃ pavattiyampi paṭisandhiyampi pavattanti.
‘‘லத்³த⁴ப்பச்சயமிதி த⁴ம்ம-மத்தமேதங் ப⁴வந்தரமுபேதி;
‘‘Laddhappaccayamiti dhamma-mattametaṃ bhavantaramupeti;
நாஸ்ஸ ததோ ஸங்கந்தி, ந ததோ ஹேதுங் வினா ஹோதி’’.
Nāssa tato saṅkanti, na tato hetuṃ vinā hoti’’.
இதி ஹேதங் லத்³த⁴ப்பச்சயங் ரூபாரூபத⁴ம்மமத்தங் உப்பஜ்ஜமானங் ‘‘ப⁴வந்தரமுபேதீ’’தி வுச்சதி, ந ஸத்தோ ந ஜீவோ. தஸ்ஸ ச நாபி அதீதப⁴வதோ இத⁴ ஸங்கந்தி அத்தி², நாபி ததோ ஹேதுங் வினா இத⁴ பாதுபா⁴வோ. எத்த² ச புரிமங் சவனதோ சுதி, பச்சி²மங் ப⁴வந்தராதி³படிஸந்தா⁴னதோ படிஸந்தீ⁴தி வுச்சதி.
Iti hetaṃ laddhappaccayaṃ rūpārūpadhammamattaṃ uppajjamānaṃ ‘‘bhavantaramupetī’’ti vuccati, na satto na jīvo. Tassa ca nāpi atītabhavato idha saṅkanti atthi, nāpi tato hetuṃ vinā idha pātubhāvo. Ettha ca purimaṃ cavanato cuti, pacchimaṃ bhavantarādipaṭisandhānato paṭisandhīti vuccati.
எத்தா²ஹ – நனு ஏவங் அஸங்கந்திபாதுபா⁴வே ஸதி யே இமஸ்மிங் மனுஸ்ஸத்தபா⁴வே க²ந்தா⁴, தேஸங் நிருத்³த⁴த்தா, ப²லபச்சயஸ்ஸ ச கம்மஸ்ஸ தத்த² அக³மனதோ, அஞ்ஞஸ்ஸ அஞ்ஞதோ ச தங் ப²லங் ஸியா, உபபு⁴ஞ்ஜகே ச அஸதி கஸ்ஸ தங் ப²லங் ஸியா, தஸ்மா ந ஸுந்த³ரமித³ங் விதா⁴னந்தி? தத்ரித³ங் வுச்சதி –
Etthāha – nanu evaṃ asaṅkantipātubhāve sati ye imasmiṃ manussattabhāve khandhā, tesaṃ niruddhattā, phalapaccayassa ca kammassa tattha agamanato, aññassa aññato ca taṃ phalaṃ siyā, upabhuñjake ca asati kassa taṃ phalaṃ siyā, tasmā na sundaramidaṃ vidhānanti? Tatridaṃ vuccati –
‘‘ஸந்தானே யங் ப²லங் ஏதங், நாஞ்ஞஸ்ஸ ந ச அஞ்ஞதோ;
‘‘Santāne yaṃ phalaṃ etaṃ, nāññassa na ca aññato;
பீ³ஜானங் அபி⁴ஸங்கா²ரோ, ஏதஸ்ஸத்த²ஸ்ஸ ஸாத⁴கோ.
Bījānaṃ abhisaṅkhāro, etassatthassa sādhako.
‘‘ப²லஸ்ஸுப்பத்தியா ஏவ, ஸித்³தா⁴ பு⁴ஞ்ஜகஸம்முதி;
‘‘Phalassuppattiyā eva, siddhā bhuñjakasammuti;
ப²லுப்பாதே³ன ருக்க²ஸ்ஸ, யதா² ப²லதி ஸம்முதீ’’தி.
Phaluppādena rukkhassa, yathā phalati sammutī’’ti.
யோபி வதெ³ய்ய ‘‘ஏவங் ஸந்தேபி ஏதே ஸங்கா²ரா விஜ்ஜமானா வா ப²லஸ்ஸ பச்சயா ஸியுங், அவிஜ்ஜமானா வா. யதி³ ச விஜ்ஜமானா, பவத்திக்க²ணேயேவ நேஸங் விபாகேன ப⁴விதப்³ப³ங். அத² அவிஜ்ஜமானா, பவத்திதோ புப்³பே³ பச்சா² ச நிச்சங் ப²லாவஹா ஸியு’’ந்தி. ஸோ ஏவங் வத்தப்³போ³ –
Yopi vadeyya ‘‘evaṃ santepi ete saṅkhārā vijjamānā vā phalassa paccayā siyuṃ, avijjamānā vā. Yadi ca vijjamānā, pavattikkhaṇeyeva nesaṃ vipākena bhavitabbaṃ. Atha avijjamānā, pavattito pubbe pacchā ca niccaṃ phalāvahā siyu’’nti. So evaṃ vattabbo –
‘‘கதத்தா பச்சயா ஏதே, ந ச நிச்சங் ப²லாவஹா;
‘‘Katattā paccayā ete, na ca niccaṃ phalāvahā;
பாடிபோ⁴கா³தி³கங் தத்த², வேதி³தப்³ப³ங் நித³ஸ்ஸன’’ந்தி.
Pāṭibhogādikaṃ tattha, veditabbaṃ nidassana’’nti.
விஞ்ஞாணபச்சயா நாமரூபந்தி இத⁴ வேத³னாஸஞ்ஞாஸங்கா²ரக்க²ந்தா⁴ நாமங், சத்தாரி மஹாபூ⁴தானி சதுன்னஞ்ச மஹாபூ⁴தானங் உபாதா³யரூபங் ரூபங். அபா⁴வகக³ப்³ப⁴ஸெய்யகானங் அண்ட³ஜானஞ்ச படிஸந்தி⁴க்க²ணே வத்து²த³ஸகங் காயத³ஸகந்தி வீஸதி ரூபரூபானி, தயோ ச அரூபினோ க²ந்தா⁴தி ஏதே தேவீஸதி த⁴ம்மா ‘‘விஞ்ஞாணபச்சயா நாமரூப’’ந்தி வேதி³தப்³பா³. ஸபா⁴வகானங் பா⁴வத³ஸகங் பக்கி²பித்வா தெத்திங்ஸ, ஓபபாதிகஸத்தேஸு ப்³ரஹ்மகாயிகாதீ³னங் படிஸந்தி⁴க்க²ணே சக்கு²ஸோதவத்து²த³ஸகானி ஜீவிதிந்த்³ரியனவகஞ்சாதி ஏகூனசத்தாலீஸ ரூபரூபானி, தயோ ச அரூபினோ க²ந்தா⁴தி ஏதே பா³சத்தாலீஸ த⁴ம்மா ‘‘விஞ்ஞாணபச்சயா நாமரூப’’ந்தி வேதி³தப்³பா³. காமப⁴வே பன ஸேஸஓபபாதிகானங், ஸங்ஸேத³ஜானங் வா ஸபா⁴வகபரிபுண்ணாயதனானங் படிஸந்தி⁴க்க²ணே சக்கு²ஸோதகா⁴னஜிவ்ஹாகாயவத்து²பா⁴வத³ஸகானீதி ஸத்ததி ரூபரூபானி, தயோ ச அரூபினோ க²ந்தா⁴தி ஏதே தேஸத்ததி த⁴ம்மா ‘‘விஞ்ஞாணபச்சயா நாமரூப’’ந்தி வேதி³தப்³பா³. ஏஸ உக்கங்ஸோ, அவகங்ஸேன பன தங்தங்த³ஸகவிகலானங் தஸ்ஸ தஸ்ஸ வஸேன ஹாபெத்வா ஹாபெத்வா படிஸந்தி⁴யங் விஞ்ஞாணபச்சயா நாமரூபஸங்கா² வேதி³தப்³பா³. அரூபீனங் பன தயோவ அரூபினோ க²ந்தா⁴. அஸஞ்ஞீனங் ரூபதோ ஜீவிதிந்த்³ரியனவகமேவாதி. ஏஸ தாவ படிஸந்தி⁴யங் நயோ.
Viññāṇapaccayānāmarūpanti idha vedanāsaññāsaṅkhārakkhandhā nāmaṃ, cattāri mahābhūtāni catunnañca mahābhūtānaṃ upādāyarūpaṃ rūpaṃ. Abhāvakagabbhaseyyakānaṃ aṇḍajānañca paṭisandhikkhaṇe vatthudasakaṃ kāyadasakanti vīsati rūparūpāni, tayo ca arūpino khandhāti ete tevīsati dhammā ‘‘viññāṇapaccayā nāmarūpa’’nti veditabbā. Sabhāvakānaṃ bhāvadasakaṃ pakkhipitvā tettiṃsa, opapātikasattesu brahmakāyikādīnaṃ paṭisandhikkhaṇe cakkhusotavatthudasakāni jīvitindriyanavakañcāti ekūnacattālīsa rūparūpāni, tayo ca arūpino khandhāti ete bācattālīsa dhammā ‘‘viññāṇapaccayā nāmarūpa’’nti veditabbā. Kāmabhave pana sesaopapātikānaṃ, saṃsedajānaṃ vā sabhāvakaparipuṇṇāyatanānaṃ paṭisandhikkhaṇe cakkhusotaghānajivhākāyavatthubhāvadasakānīti sattati rūparūpāni, tayo ca arūpino khandhāti ete tesattati dhammā ‘‘viññāṇapaccayā nāmarūpa’’nti veditabbā. Esa ukkaṃso, avakaṃsena pana taṃtaṃdasakavikalānaṃ tassa tassa vasena hāpetvā hāpetvā paṭisandhiyaṃ viññāṇapaccayā nāmarūpasaṅkhā veditabbā. Arūpīnaṃ pana tayova arūpino khandhā. Asaññīnaṃ rūpato jīvitindriyanavakamevāti. Esa tāva paṭisandhiyaṃ nayo.
பவத்தே பன ஸப்³ப³த்த² ரூபபவத்திதே³ஸே படிஸந்தி⁴சித்தஸ்ஸ டி²திக்க²ணே படிஸந்தி⁴சித்தேன ஸஹ பவத்தஉதுதோ உதுஸமுட்டா²னங் ஸுத்³த⁴ட்ட²கங் பாதுப⁴வதி. பட²மப⁴வங்க³தோ பபு⁴தி சித்தஸமுட்டா²னங் ஸுத்³த⁴ட்ட²கங், ஸத்³த³பாதுபா⁴வகாலே உதுதோ சேவ சித்ததோ ச ஸத்³த³னவகங், கப³ளீகாராஹாரூபஜீவீனங் ஆஹாரஸமுட்டா²னங் ஸுத்³த⁴ட்ட²கந்தி ஏவங் ஆஹாரஸமுட்டா²னஸ்ஸ, ஸுத்³த⁴ட்ட²கஸ்ஸ, உதுசித்தஸமுட்டா²னானஞ்ச த்³வின்னங் நவகானங் வஸேன ச²ப்³பீ³ஸதிவித⁴ங், ஏகேகசித்தே திக்க²த்துங் உப்பஜ்ஜமானங் வுத்தகம்மஸமுட்டா²னஞ்ச ஸத்ததிவித⁴ந்தி ச²ன்னவுதிவித⁴ங் ரூபங், தயோ ச அரூபினோ க²ந்தா⁴தி நவனவுதித⁴ம்மா யதா²ஸம்ப⁴வங் ‘‘விஞ்ஞாணபச்சயா நாமரூப’’ந்தி வேதி³தப்³பா³.
Pavatte pana sabbattha rūpapavattidese paṭisandhicittassa ṭhitikkhaṇe paṭisandhicittena saha pavattaututo utusamuṭṭhānaṃ suddhaṭṭhakaṃ pātubhavati. Paṭhamabhavaṅgato pabhuti cittasamuṭṭhānaṃ suddhaṭṭhakaṃ, saddapātubhāvakāle ututo ceva cittato ca saddanavakaṃ, kabaḷīkārāhārūpajīvīnaṃ āhārasamuṭṭhānaṃ suddhaṭṭhakanti evaṃ āhārasamuṭṭhānassa, suddhaṭṭhakassa, utucittasamuṭṭhānānañca dvinnaṃ navakānaṃ vasena chabbīsatividhaṃ, ekekacitte tikkhattuṃ uppajjamānaṃ vuttakammasamuṭṭhānañca sattatividhanti channavutividhaṃ rūpaṃ, tayo ca arūpino khandhāti navanavutidhammā yathāsambhavaṃ ‘‘viññāṇapaccayā nāmarūpa’’nti veditabbā.
தத்த² ஸியா – கத²ங் பனேதங் ஜானிதப்³ப³ங் ‘‘படிஸந்தி⁴னாமரூபங் விஞ்ஞாணபச்சயா ஹோதீ’’தி? ஸுத்ததோ யுத்திதோ ச. ஸுத்தே ஹி ‘‘சித்தானுபரிவத்தினோ த⁴ம்மா’’திஆதி³னா (த⁴॰ ஸ॰ து³கமாதிகா 62) நயேன ப³ஹுதா⁴ வேத³னாதீ³னங் விஞ்ஞாணபச்சயதா ஸித்³தா⁴. யுத்திதோ பன –
Tattha siyā – kathaṃ panetaṃ jānitabbaṃ ‘‘paṭisandhināmarūpaṃ viññāṇapaccayā hotī’’ti? Suttato yuttito ca. Sutte hi ‘‘cittānuparivattino dhammā’’tiādinā (dha. sa. dukamātikā 62) nayena bahudhā vedanādīnaṃ viññāṇapaccayatā siddhā. Yuttito pana –
‘‘சித்தஜேன ஹி ரூபேன, இத⁴ தி³ட்டே²ன ஸிஜ்ஜ²தி;
‘‘Cittajena hi rūpena, idha diṭṭhena sijjhati;
அதி³ட்ட²ஸ்ஸாபி ரூபஸ்ஸ, விஞ்ஞாணங் பச்சயோ இதீ’’தி.
Adiṭṭhassāpi rūpassa, viññāṇaṃ paccayo itī’’ti.
நாமரூபபச்சயா ஸளாயதனந்தி நாமங் வுத்தமேவ. இத⁴ பன ரூபங் நியமதோ சத்தாரி மஹாபூ⁴தானி, ச² வத்தூ²னி, ஜீவிதிந்த்³ரியந்தி ஏகாத³ஸவித⁴ங். ஸளாயதனங் பன சக்கா²யதனங் ஸோதகா⁴னஜிவ்ஹாகாயமனாயதனங்.
Nāmarūpapaccayā saḷāyatananti nāmaṃ vuttameva. Idha pana rūpaṃ niyamato cattāri mahābhūtāni, cha vatthūni, jīvitindriyanti ekādasavidhaṃ. Saḷāyatanaṃ pana cakkhāyatanaṃ sotaghānajivhākāyamanāyatanaṃ.
தத்த² ஸியா – கத²ங் பனேதங் ஜானிதப்³ப³ங் ‘‘நாமரூபங் ஸளாயதனஸ்ஸ பச்சயோ’’தி? நாமரூபபா⁴வே பா⁴வதோ. தஸ்ஸ தஸ்ஸ ஹி நாமஸ்ஸ ரூபஸ்ஸ ச பா⁴வே தங் தங் ஆயதனங் ஹோதி, ந அஞ்ஞதா²தி.
Tattha siyā – kathaṃ panetaṃ jānitabbaṃ ‘‘nāmarūpaṃ saḷāyatanassa paccayo’’ti? Nāmarūpabhāve bhāvato. Tassa tassa hi nāmassa rūpassa ca bhāve taṃ taṃ āyatanaṃ hoti, na aññathāti.
ஸளாயதனபச்சயா ப²ஸ்ஸோதி –
Saḷāyatanapaccayā phassoti –
‘‘ச²ளேவ ப²ஸ்ஸா ஸங்கே²பா, சக்கு²ஸம்ப²ஸ்ஸஆத³யோ;
‘‘Chaḷeva phassā saṅkhepā, cakkhusamphassaādayo;
விஞ்ஞாணமிவ பா³த்திங்ஸ, வித்தா²ரேன ப⁴வந்தி தே’’.
Viññāṇamiva bāttiṃsa, vitthārena bhavanti te’’.
ப²ஸ்ஸபச்சயா வேத³னாதி –
Phassapaccayā vedanāti –
‘‘த்³வாரதோ வேத³னா வுத்தா, சக்கு²ஸம்ப²ஸ்ஸஜாதி³கா;
‘‘Dvārato vedanā vuttā, cakkhusamphassajādikā;
ச²ளேவ தா பபே⁴தே³ன, இத⁴ பா³த்திங்ஸ வேத³னா’’.
Chaḷeva tā pabhedena, idha bāttiṃsa vedanā’’.
வேத³னாபச்சயா தண்ஹாதி –
Vedanāpaccayā taṇhāti –
‘‘ரூபதண்ஹாதி³பே⁴தே³ன, ச² தண்ஹா இத⁴ தீ³பிதா;
‘‘Rūpataṇhādibhedena, cha taṇhā idha dīpitā;
ஏகேகா திவிதா⁴ தத்த², பவத்தாகாரதோ மதா.
Ekekā tividhā tattha, pavattākārato matā.
‘‘து³க்கீ² ஸுக²ங் பத்த²யதி, ஸுகீ² பி⁴ய்யோபி இச்ச²தி;
‘‘Dukkhī sukhaṃ patthayati, sukhī bhiyyopi icchati;
உபெக்கா² பன ஸந்தத்தா, ஸுக²மிச்சேவ பா⁴ஸிதா.
Upekkhā pana santattā, sukhamicceva bhāsitā.
‘‘தண்ஹாய பச்சயா தஸ்மா, ஹொந்தி திஸ்ஸோபி வேத³னா;
‘‘Taṇhāya paccayā tasmā, honti tissopi vedanā;
வேத³னாபச்சயா தண்ஹா, இதி வுத்தா மஹேஸினா’’தி.
Vedanāpaccayā taṇhā, iti vuttā mahesinā’’ti.
தண்ஹாபச்சயா உபாதா³னந்தி சத்தாரி உபாதா³னானி காமுபாதா³னங் தி³ட்டு²பாதா³னங் ஸீலப்³ப³துபாதா³னங் அத்தவாது³பாதா³னங். உபாதா³னபச்சயா ப⁴வோதி இத⁴ கம்மப⁴வோ அதி⁴ப்பேதோ, உபபத்திப⁴வோ பன பது³த்³தா⁴ரவஸேன வுத்தோ. ப⁴வபச்சயா ஜாதீதி கம்மப⁴வபச்சயா ஜாதி படிஸந்தி⁴க²ந்தா⁴னங் பாதுப⁴வோ.
Taṇhāpaccayā upādānanti cattāri upādānāni kāmupādānaṃ diṭṭhupādānaṃ sīlabbatupādānaṃ attavādupādānaṃ. Upādānapaccayā bhavoti idha kammabhavo adhippeto, upapattibhavo pana paduddhāravasena vutto. Bhavapaccayā jātīti kammabhavapaccayā jāti paṭisandhikhandhānaṃ pātubhavo.
தத்த² ஸியா – கத²ங் பனேதங் ஜானிதப்³ப³ங் ‘‘ப⁴வோ ஜாதியா பச்சயோ’’தி சே? பா³ஹிரபச்சயஸமத்தேபி ஹீனபணீததாதி³விஸேஸத³ஸ்ஸனதோ. பா³ஹிரானஞ்ஹி ஜனகஜனநிஸுக்கஸோணிதாஹாராதீ³னங் பச்சயானங் ஸமத்தேபி ஸத்தானங் யமகானம்பி ஸதங் ஹீனபணீததாதி³விஸேஸோ தி³ஸ்ஸதி. ஸோ ச ந அஹேதுகோ ஸப்³ப³தா³ ச ஸப்³பே³ஸஞ்ச அபா⁴வதோ, ந கம்மப⁴வதோ அஞ்ஞஹேதுகோ தத³பி⁴னிப்³ப³த்தகஸத்தானங் அஜ்ஜ²த்தஸந்தானே அஞ்ஞஸ்ஸ காரணஸ்ஸ அபா⁴வதோதி கம்மப⁴வஹேதுகோவ. கம்மஞ்ஹி ஸத்தானங் ஹீனபணீததாதி³விஸேஸஸ்ஸ ஹேது. தேனாஹ ப⁴க³வா – ‘‘கம்மங் ஸத்தே விப⁴ஜதி யதி³த³ங் ஹீனபணீததாயா’’தி (ம॰ நி॰ 3.289). தஸ்மா ஜானிதப்³ப³மேதங் ‘‘ப⁴வோ ஜாதியா பச்சயோ’’தி.
Tattha siyā – kathaṃ panetaṃ jānitabbaṃ ‘‘bhavo jātiyā paccayo’’ti ce? Bāhirapaccayasamattepi hīnapaṇītatādivisesadassanato. Bāhirānañhi janakajananisukkasoṇitāhārādīnaṃ paccayānaṃ samattepi sattānaṃ yamakānampi sataṃ hīnapaṇītatādiviseso dissati. So ca na ahetuko sabbadā ca sabbesañca abhāvato, na kammabhavato aññahetuko tadabhinibbattakasattānaṃ ajjhattasantāne aññassa kāraṇassa abhāvatoti kammabhavahetukova. Kammañhi sattānaṃ hīnapaṇītatādivisesassa hetu. Tenāha bhagavā – ‘‘kammaṃ satte vibhajati yadidaṃ hīnapaṇītatāyā’’ti (ma. ni. 3.289). Tasmā jānitabbametaṃ ‘‘bhavo jātiyā paccayo’’ti.
ஜாதிபச்சயா ஜராமரணந்திஆதீ³ஸு யஸ்மா அஸதி ஜாதியா ஜராமரணஞ்சேவ ஸோகாத³யோ ச த⁴ம்மா ந ஹொந்தி, ஜாதியா பன ஸதி ஜராமரணஞ்சேவ ஜராமரணஸங்கா²தது³க்க²த⁴ம்மபு²ட்ட²ஸ்ஸ பா³லஸ்ஸ ஜராமரணாதி³ஸம்ப³ந்தா⁴ வா தேன தேன து³க்க²த⁴ம்மேன பு²ட்ட²ஸ்ஸ அனபி⁴ஸம்ப³ந்தா⁴ வா ஸோகாத³யோ ச த⁴ம்மா ஹொந்தி. தஸ்மா ஜாதிபச்சயா ஜராமரணந்தி. ஸமேச்ச அபி⁴ஸமேச்ச த⁴ம்மந்தி ஞாணேன ஸமாக³ந்த்வா சதுஸச்சத⁴ம்மங் படிவிஜ்ஜி²த்வா.
Jātipaccayā jarāmaraṇantiādīsu yasmā asati jātiyā jarāmaraṇañceva sokādayo ca dhammā na honti, jātiyā pana sati jarāmaraṇañceva jarāmaraṇasaṅkhātadukkhadhammaphuṭṭhassa bālassa jarāmaraṇādisambandhā vā tena tena dukkhadhammena phuṭṭhassa anabhisambandhā vā sokādayo ca dhammā honti. Tasmā jātipaccayā jarāmaraṇanti. Samecca abhisamecca dhammanti ñāṇena samāgantvā catusaccadhammaṃ paṭivijjhitvā.
ஏவங் த்³வாத³ஸபதி³கங் பச்சயாகாரப்பவத்திங் த³ஸ்ஸெத்வா இதா³னி விவட்டவஸேன அவிஜ்ஜாதீ³னங் நிரோத⁴த³ஸ்ஸனத்த²ங் ‘‘அவிஜ்ஜானிரோதா⁴ ஸங்கா²ரனிரோதோ⁴தி ஸமேச்ச அபி⁴ஸமேச்ச த⁴ம்ம’’ந்திஆதி³மாஹ. தத்த² அவிஜ்ஜானிரோதா⁴தி அவிஜ்ஜாய அனுப்பாத³னிரோதா⁴ புன அப்பவத்தினிரோதே⁴ன. ஸங்கா²ரனிரோதோ⁴தி ஸங்கா²ரானங் அனுப்பாத³னிரோதோ⁴ ஹோதி. ஏவங் ஸேஸபதே³ஸுபி. இத³ங் து³க்க²ந்திஆத³யோ புப்³பே³ வுத்தனயா ஏவ. இமே த⁴ம்மா அபி⁴ஞ்ஞெய்யாதி இமே தேபூ⁴மகா த⁴ம்மா ஸபா⁴வலக்க²ணாவபோ³த⁴வஸேன ஸோப⁴னாகாரேன, அதி⁴கேன ஞாணேன வா ஸபா⁴வதோ ஜானிதப்³பா³. பரிஞ்ஞெய்யாதி ஸாமஞ்ஞலக்க²ணாவபோ³த⁴வஸேன, கிச்சஸமாபனவஸேன ச ப்³யாபித்வா ஜானிதப்³பா³. இமே த⁴ம்மா பஹாதப்³பா³தி இமே ஸமுத³யபக்கி²கா த⁴ம்மா தேன தேன கு³ணங்கே³ன பஹாதப்³பா³. பா⁴வேதப்³பா³தி வட்³டே⁴தப்³பா³. ஸச்சி²காதப்³பா³தி பச்சக்க²ங் காதப்³பா³. து³விதா⁴ ஸச்சி²கிரியா படிலாப⁴ஸச்சி²கிரியா ச ஆரம்மணஸச்சி²கிரியா ச. ச²ன்னங் ப²ஸ்ஸாயதனானந்தி சக்கா²தீ³னங் ச²ன்னங் ஆயதனானங். ஸமுத³யஞ்ச அத்த²ங்க³மஞ்சாதி உப்பாத³ஞ்ச நிரோத⁴ஞ்ச.
Evaṃ dvādasapadikaṃ paccayākārappavattiṃ dassetvā idāni vivaṭṭavasena avijjādīnaṃ nirodhadassanatthaṃ ‘‘avijjānirodhā saṅkhāranirodhoti samecca abhisamecca dhamma’’ntiādimāha. Tattha avijjānirodhāti avijjāya anuppādanirodhā puna appavattinirodhena. Saṅkhāranirodhoti saṅkhārānaṃ anuppādanirodho hoti. Evaṃ sesapadesupi. Idaṃ dukkhantiādayo pubbe vuttanayā eva. Ime dhammā abhiññeyyāti ime tebhūmakā dhammā sabhāvalakkhaṇāvabodhavasena sobhanākārena, adhikena ñāṇena vā sabhāvato jānitabbā. Pariññeyyāti sāmaññalakkhaṇāvabodhavasena, kiccasamāpanavasena ca byāpitvā jānitabbā. Ime dhammā pahātabbāti ime samudayapakkhikā dhammā tena tena guṇaṅgena pahātabbā. Bhāvetabbāti vaḍḍhetabbā. Sacchikātabbāti paccakkhaṃ kātabbā. Duvidhā sacchikiriyā paṭilābhasacchikiriyā ca ārammaṇasacchikiriyā ca. Channaṃ phassāyatanānanti cakkhādīnaṃ channaṃ āyatanānaṃ. Samudayañca atthaṅgamañcāti uppādañca nirodhañca.
பூ⁴ரிபஞ்ஞோதி பூ⁴ரி வியாதி பூ⁴ரி, தாய பூ⁴ரிபஞ்ஞாய ஸமன்னாக³தோ பூ⁴ரிபஞ்ஞோ. மஹாபஞ்ஞோதிஆதீ³ஸு மஹாபஞ்ஞாதீ³ஹி ஸமன்னாக³தோதி அத்தோ².
Bhūripaññoti bhūri viyāti bhūri, tāya bhūripaññāya samannāgato bhūripañño. Mahāpaññotiādīsu mahāpaññādīhi samannāgatoti attho.
தத்ரித³ங் மஹாபஞ்ஞாதீ³னங் நானத்தங் – கதமா மஹாபஞ்ஞா? மஹந்தே அத்தே² பரிக்³க³ண்ஹாதீதி மஹாபஞ்ஞா. மஹந்தே த⁴ம்மே…பே॰… மஹந்தா நிருத்தியோ… மஹந்தானி படிபா⁴னானி பரிக்³க³ண்ஹாதீதி மஹாபஞ்ஞா. மஹந்தே ஸீலக்க²ந்தே⁴ பரிக்³க³ண்ஹாதீதி மஹாபஞ்ஞா. மஹந்தே ஸமாதி⁴க்க²ந்தே⁴…பே॰… பஞ்ஞாக்க²ந்தே⁴… விமுத்திக்க²ந்தே⁴… விமுத்திஞாணத³ஸ்ஸனக்க²ந்தே⁴ பரிக்³க³ண்ஹாதீதி மஹாபஞ்ஞா. மஹந்தானி டா²னாடா²னானி…பே॰… மஹாவிஹாரஸமாபத்தியோ… மஹந்தானி அரியஸச்சானி… மஹந்தே ஸதிபட்டா²னே… ஸம்மப்பதா⁴னே… இத்³தி⁴பாதே³… மஹந்தானி இந்த்³ரியானி … ப³லானி… பொ³ஜ்ஜ²ங்கா³னி… மஹந்தே அரியமக்³கே³… மஹந்தானி ஸாமஞ்ஞப²லானி… மஹாஅபி⁴ஞ்ஞாயோ… மஹந்தங் பரமத்த²ங் நிப்³பா³னங் பரிக்³க³ண்ஹாதீதி மஹாபஞ்ஞா.
Tatridaṃ mahāpaññādīnaṃ nānattaṃ – katamā mahāpaññā? Mahante atthe pariggaṇhātīti mahāpaññā. Mahante dhamme…pe… mahantā niruttiyo… mahantāni paṭibhānāni pariggaṇhātīti mahāpaññā. Mahante sīlakkhandhe pariggaṇhātīti mahāpaññā. Mahante samādhikkhandhe…pe… paññākkhandhe… vimuttikkhandhe… vimuttiñāṇadassanakkhandhe pariggaṇhātīti mahāpaññā. Mahantāni ṭhānāṭhānāni…pe… mahāvihārasamāpattiyo… mahantāni ariyasaccāni… mahante satipaṭṭhāne… sammappadhāne… iddhipāde… mahantāni indriyāni … balāni… bojjhaṅgāni… mahante ariyamagge… mahantāni sāmaññaphalāni… mahāabhiññāyo… mahantaṃ paramatthaṃ nibbānaṃ pariggaṇhātīti mahāpaññā.
கதமா புது²பஞ்ஞா? புது²னானாக²ந்தே⁴ஸு ஞாணங் பவத்ததீதி புது²பஞ்ஞா. புது²னானாதா⁴தூஸு…பே॰… புது²னானாஆயதனேஸு… புது²னானாபடிச்சஸமுப்பாதே³ஸு… புது²னானாஸுஞ்ஞதமனுபலப்³பே⁴ஸு… புது²னானாஅத்தே²ஸு… த⁴ம்மேஸு… நிருத்தீஸு… படிபா⁴னேஸு… புது²னானாஸீலக்க²ந்தே⁴ஸு… புது²னானாஸமாதி⁴பஞ்ஞாவிமுத்திவிமுத்திஞாணத³ஸ்ஸனக்க²ந்தே⁴ஸு… புது²னானாடா²னாடா²னேஸு… புது²னானாவிஹாரஸமாபத்தீஸு… புது²னானாஅரியஸச்சேஸு… புது²னானாஸதிபட்டா²னேஸு… ஸம்மப்பதா⁴னேஸு… இத்³தி⁴பாதே³ஸு… இந்த்³ரியேஸு… ப³லேஸு… பொ³ஜ்ஜ²ங்கே³ஸு… புது²னானாஅரியமக்³கே³ஸு… ஸாமஞ்ஞப²லேஸு… அபி⁴ஞ்ஞாஸு… புது²னானாஜனஸாதா⁴ரணே த⁴ம்மே ஸமதிக்கம்ம பரமத்தே² நிப்³பா³னே ஞாணங் பவத்ததீதி புது²பஞ்ஞா.
Katamā puthupaññā? Puthunānākhandhesu ñāṇaṃ pavattatīti puthupaññā. Puthunānādhātūsu…pe… puthunānāāyatanesu… puthunānāpaṭiccasamuppādesu… puthunānāsuññatamanupalabbhesu… puthunānāatthesu… dhammesu… niruttīsu… paṭibhānesu… puthunānāsīlakkhandhesu… puthunānāsamādhipaññāvimuttivimuttiñāṇadassanakkhandhesu… puthunānāṭhānāṭhānesu… puthunānāvihārasamāpattīsu… puthunānāariyasaccesu… puthunānāsatipaṭṭhānesu… sammappadhānesu… iddhipādesu… indriyesu… balesu… bojjhaṅgesu… puthunānāariyamaggesu… sāmaññaphalesu… abhiññāsu… puthunānājanasādhāraṇe dhamme samatikkamma paramatthe nibbāne ñāṇaṃ pavattatīti puthupaññā.
கதமா ஹாஸபஞ்ஞா? இதே⁴கச்சோ ஹாஸப³ஹுலோ வேத³ப³ஹுலோ துட்டி²ப³ஹுலோ பாமோஜ்ஜப³ஹுலோ ஸீலங் பரிபூரேதி. இந்த்³ரியஸங்வரங் பரிபூரேதி. போ⁴ஜனே மத்தஞ்ஞுதங்…பே॰… ஜாக³ரியானுயோக³ங்… ஸீலக்க²ந்த⁴ங்… ஸமாதி⁴க்க²ந்த⁴ங்… பஞ்ஞாக்க²ந்த⁴ங்… விமுத்திக்க²ந்த⁴ங்… விமுத்திஞாணத³ஸ்ஸனக்க²ந்த⁴ங் பரிபூரேதீதி ஹாஸபஞ்ஞா. ஹாஸப³ஹுலோ…பே॰… பாமோஜ்ஜப³ஹுலோ டா²னாடா²னங் படிவிஜ்ஜ²தீதி ஹாஸபஞ்ஞா. ஹாஸப³ஹுலோ விஹாரஸமாபத்தியோ பரிபூரேதீதி ஹாஸபஞ்ஞா. ஹாஸப³ஹுலோ அரியஸச்சானி படிவிஜ்ஜ²தீதி ஹாஸபஞ்ஞா. ஸதிபட்டா²னே பா⁴வேதி ஸம்மப்பதா⁴னே… இத்³தி⁴பாதே³… இந்த்³ரியானி… ப³லானி… பொ³ஜ்ஜ²ங்கே³… அரியமக்³க³ங் பா⁴வேதீதி ஹாஸபஞ்ஞா, ஹாஸப³ஹுலோ ஸாமஞ்ஞப²லானி ஸச்சி²கரோதீதி ஹாஸபஞ்ஞா, அபி⁴ஞ்ஞாயோ படிவிஜ்ஜ²தீதி ஹாஸபஞ்ஞா, ஹாஸப³ஹுலோ பரமத்த²ங் நிப்³பா³னங் ஸச்சி²கரோதீதி ஹாஸபஞ்ஞா.
Katamā hāsapaññā? Idhekacco hāsabahulo vedabahulo tuṭṭhibahulo pāmojjabahulo sīlaṃ paripūreti. Indriyasaṃvaraṃ paripūreti. Bhojane mattaññutaṃ…pe… jāgariyānuyogaṃ… sīlakkhandhaṃ… samādhikkhandhaṃ… paññākkhandhaṃ… vimuttikkhandhaṃ… vimuttiñāṇadassanakkhandhaṃ paripūretīti hāsapaññā. Hāsabahulo…pe… pāmojjabahulo ṭhānāṭhānaṃ paṭivijjhatīti hāsapaññā. Hāsabahulo vihārasamāpattiyo paripūretīti hāsapaññā. Hāsabahulo ariyasaccāni paṭivijjhatīti hāsapaññā. Satipaṭṭhāne bhāveti sammappadhāne… iddhipāde… indriyāni… balāni… bojjhaṅge… ariyamaggaṃ bhāvetīti hāsapaññā, hāsabahulo sāmaññaphalāni sacchikarotīti hāsapaññā, abhiññāyo paṭivijjhatīti hāsapaññā, hāsabahulo paramatthaṃ nibbānaṃ sacchikarotīti hāsapaññā.
கதமா ஜவனபஞ்ஞா? யங் கிஞ்சி ரூபங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே ஸந்திகே வா, ஸப்³ப³ங் ரூபங் அனிச்சதோ கி²ப்பங் ஜவதீதி ஜவனபஞ்ஞா. து³க்க²தோ, அனத்ததோ கி²ப்பங் ஜவதீதி ஜவனபஞ்ஞா. யா காசி வேத³னா…பே॰… யா காசி ஸஞ்ஞா… யே கேசி ஸங்கா²ரா… யங் கிஞ்சி விஞ்ஞாணங் அதீதானாக³தபச்சுப்பன்னங்…பே॰… யங் தூ³ரே ஸந்திகே வா, ஸப்³ப³ங் விஞ்ஞாணங் அனிச்சதோ… து³க்க²தோ… அனத்ததோ கி²ப்பங் ஜவதீதி ஜவனபஞ்ஞா. சக்கு²ங்…பே॰… ஜராமரணங் அதீதானாக³தபச்சுப்பன்னங் அனிச்சதோ… து³க்க²தோ… அனத்ததோ கி²ப்பங் ஜவதீதி ஜவனபஞ்ஞா.
Katamā javanapaññā? Yaṃ kiñci rūpaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ rūpaṃ aniccato khippaṃ javatīti javanapaññā. Dukkhato, anattato khippaṃ javatīti javanapaññā. Yā kāci vedanā…pe… yā kāci saññā… ye keci saṅkhārā… yaṃ kiñci viññāṇaṃ atītānāgatapaccuppannaṃ…pe… yaṃ dūre santike vā, sabbaṃ viññāṇaṃ aniccato… dukkhato… anattato khippaṃ javatīti javanapaññā. Cakkhuṃ…pe… jarāmaraṇaṃ atītānāgatapaccuppannaṃ aniccato… dukkhato… anattato khippaṃ javatīti javanapaññā.
ரூபங் அதீதானாக³தபச்சுப்பன்னங் அனிச்சங் க²யட்டே²ன, து³க்க²ங் ப⁴யட்டே²ன, அனத்தா அஸாரகட்டே²னாதி துலயித்வா தீரயித்வா விபா⁴வயித்வா விபூ⁴தங் கத்வா ரூபனிரோதே⁴ நிப்³பா³னே கி²ப்பங் ஜவதீதி ஜவனபஞ்ஞா. வேத³னா… ஸஞ்ஞா… ஸங்கா²ரா… விஞ்ஞாணங்… சக்கு²ங்…பே॰… ஜராமரணங் அதீதானாக³தபச்சுப்பன்னங் அனிச்சங் க²யட்டே²ன, து³க்க²ங் ப⁴யட்டே²ன, அனத்தா அஸாரகட்டே²னாதி துலயித்வா…பே॰… விபூ⁴தங் கத்வா ஜராமரணனிரோதே⁴ நிப்³பா³னே கி²ப்பங் ஜவதீதி ஜவனபஞ்ஞா.
Rūpaṃ atītānāgatapaccuppannaṃ aniccaṃ khayaṭṭhena, dukkhaṃ bhayaṭṭhena, anattā asārakaṭṭhenāti tulayitvā tīrayitvā vibhāvayitvā vibhūtaṃ katvā rūpanirodhe nibbāne khippaṃ javatīti javanapaññā. Vedanā… saññā… saṅkhārā… viññāṇaṃ… cakkhuṃ…pe… jarāmaraṇaṃ atītānāgatapaccuppannaṃ aniccaṃ khayaṭṭhena, dukkhaṃ bhayaṭṭhena, anattā asārakaṭṭhenāti tulayitvā…pe… vibhūtaṃ katvā jarāmaraṇanirodhe nibbāne khippaṃ javatīti javanapaññā.
ரூபங் அதீதானாக³தபச்சுப்பன்னங் அனிச்சங் ஸங்க²தங் படிச்சஸமுப்பன்னங் க²யத⁴ம்மங் வயத⁴ம்மங் விராக³த⁴ம்மங் நிரோத⁴த⁴ம்மந்தி துலயித்வா…பே॰… விபூ⁴தங் கத்வா ரூபனிரோதே⁴ நிப்³பா³னே கி²ப்பங் ஜவதீதி ஜவனபஞ்ஞா. வேத³னா…பே॰… ஸஞ்ஞா… ஸங்கா²ரா… விஞ்ஞாணங்… சக்கு²ங்…பே॰… ஜராமரணங் அதீதானாக³தபச்சுப்பன்னங் அனிச்சங்…பே॰… நிரோத⁴த⁴ம்மந்தி துலயித்வா…பே॰… விபூ⁴தங் கத்வா ஜராமரணனிரோதே⁴ நிப்³பா³னே கி²ப்பங் ஜவதீதி ஜவனபஞ்ஞா.
Rūpaṃ atītānāgatapaccuppannaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammanti tulayitvā…pe… vibhūtaṃ katvā rūpanirodhe nibbāne khippaṃ javatīti javanapaññā. Vedanā…pe… saññā… saṅkhārā… viññāṇaṃ… cakkhuṃ…pe… jarāmaraṇaṃ atītānāgatapaccuppannaṃ aniccaṃ…pe… nirodhadhammanti tulayitvā…pe… vibhūtaṃ katvā jarāmaraṇanirodhe nibbāne khippaṃ javatīti javanapaññā.
கதமா திக்க²பஞ்ஞா? கி²ப்பங் கிலேஸே சி²ந்த³தீதி திக்க²பஞ்ஞா. உப்பன்னங் காமவிதக்கங் நாதி⁴வாஸேதி. உப்பன்னங் ப்³யாபாத³விதக்கங்… உப்பன்னங் விஹிங்ஸாவிதக்கங்… உப்பன்னுப்பன்னே பாபகே அகுஸலே த⁴ம்மே… உப்பன்னங் ராக³ங்… உப்பன்னங் தோ³ஸங்… மோஹங்… கோத⁴ங்… உபனாஹங்… மக்க²ங்… பளாஸங்… இஸ்ஸங்… மச்ச²ரியங்… மாயங்… ஸாடெ²ய்யங்… த²ம்ப⁴ங்… ஸாரம்ப⁴ங்… மானங்… அதிமானங்… மத³ங்… பமாத³ங்… ஸப்³பே³ கிலேஸே… ஸப்³பே³ து³ச்சரிதே… ஸப்³பே³ அபி⁴ஸங்கா²ரே… ஸப்³பே³ ப⁴வகா³மிகம்மே நாதி⁴வாஸேதி பஜஹதி வினோதே³தி ப்³யந்தீகரோதி அனபா⁴வங் க³மேதீதி திக்க²பஞ்ஞா. ஏகம்ஹி ஆஸனே சத்தாரோ அரியமக்³கா³, சத்தாரி ச ஸாமஞ்ஞப²லானி, சதஸ்ஸோ ச படிஸம்பி⁴தா³யோ, ச² அபி⁴ஞ்ஞாயோ அதி⁴க³தா ஹொந்தி ஸச்சி²கதா ப²ஸ்ஸிதா பஞ்ஞாயாதி திக்க²பஞ்ஞா.
Katamā tikkhapaññā? Khippaṃ kilese chindatīti tikkhapaññā. Uppannaṃ kāmavitakkaṃ nādhivāseti. Uppannaṃ byāpādavitakkaṃ… uppannaṃ vihiṃsāvitakkaṃ… uppannuppanne pāpake akusale dhamme… uppannaṃ rāgaṃ… uppannaṃ dosaṃ… mohaṃ… kodhaṃ… upanāhaṃ… makkhaṃ… paḷāsaṃ… issaṃ… macchariyaṃ… māyaṃ… sāṭheyyaṃ… thambhaṃ… sārambhaṃ… mānaṃ… atimānaṃ… madaṃ… pamādaṃ… sabbe kilese… sabbe duccarite… sabbe abhisaṅkhāre… sabbe bhavagāmikamme nādhivāseti pajahati vinodeti byantīkaroti anabhāvaṃ gametīti tikkhapaññā. Ekamhi āsane cattāro ariyamaggā, cattāri ca sāmaññaphalāni, catasso ca paṭisambhidāyo, cha abhiññāyo adhigatā honti sacchikatā phassitā paññāyāti tikkhapaññā.
கதமா நிப்³பே³தி⁴கபஞ்ஞா? இதே⁴கச்சோ ஸப்³ப³ஸங்கா²ரேஸு உப்³பே³க³ப³ஹுலோ ஹோதி உத்தாஸப³ஹுலோ உக்கண்ட²னப³ஹுலோ அரதிப³ஹுலோ அனபி⁴ரதிப³ஹுலோ ப³ஹிமுகோ² ந ரமதி ஸப்³ப³ஸங்கா²ரேஸு, அனிப்³பி³த்³த⁴புப்³ப³ங் அபதா³லிதபுப்³ப³ங் லோப⁴க்க²ந்த⁴ங் நிப்³பி³ஜ்ஜ²தி பதா³லேதீதி நிப்³பே³தி⁴கபஞ்ஞா. அனிப்³பி³த்³த⁴புப்³ப³ங் அபதா³லிதபுப்³ப³ங் தோ³ஸக்க²ந்த⁴ங்…பே॰… மோஹக்க²ந்த⁴ங்… கோத⁴ங்… உபனாஹங்…பே॰… ஸப்³பே³ ப⁴வகா³மிகம்மே நிப்³பி³ஜ்ஜ²தி பதா³லேதீதி நிப்³பே³தி⁴கபஞ்ஞா.
Katamā nibbedhikapaññā? Idhekacco sabbasaṅkhāresu ubbegabahulo hoti uttāsabahulo ukkaṇṭhanabahulo aratibahulo anabhiratibahulo bahimukho na ramati sabbasaṅkhāresu, anibbiddhapubbaṃ apadālitapubbaṃ lobhakkhandhaṃ nibbijjhati padāletīti nibbedhikapaññā. Anibbiddhapubbaṃ apadālitapubbaṃ dosakkhandhaṃ…pe… mohakkhandhaṃ… kodhaṃ… upanāhaṃ…pe… sabbe bhavagāmikamme nibbijjhati padāletīti nibbedhikapaññā.
28. ஸ ஸப்³ப³த⁴ம்மேஸு விஸேனிபூ⁴தோ, யங் கிஞ்சி தி³ட்ட²ங் வ ஸுதங் முதங் வாதி ஸோ பூ⁴ரிபஞ்ஞோ கீ²ணாஸவோ யங் கிஞ்சி தி³ட்ட²ங் வா ஸுதங் வா முதங் வா தேஸு ஸப்³ப³த⁴ம்மேஸு மாரஸேனங் வினாஸெத்வா டி²தபா⁴வேன விஸேனிபூ⁴தோ. தமேவ த³ஸ்ஸிந்தி தங் ஏவ விஸுத்³த⁴த³ஸ்ஸிங். விவடங் சரந்தந்தி தண்ஹாச²த³னாதி³விக³மேன விவடங் ஹுத்வா சரந்தங். கேனீத⁴ லோகஸ்மி விகப்பயெய்யாதி கேன இத⁴ லோகே தண்ஹாகப்பேன வா தி³ட்டி²கப்பேன வா கோசி விகப்பெய்ய, தேஸங் வா பஹீனத்தா ராகா³தி³னா புப்³பே³ வுத்தேனாதி.
28.Sa sabbadhammesu visenibhūto, yaṃ kiñci diṭṭhaṃ va sutaṃ mutaṃ vāti so bhūripañño khīṇāsavo yaṃ kiñci diṭṭhaṃ vā sutaṃ vā mutaṃ vā tesu sabbadhammesu mārasenaṃ vināsetvā ṭhitabhāvena visenibhūto. Tameva dassinti taṃ eva visuddhadassiṃ. Vivaṭaṃ carantanti taṇhāchadanādivigamena vivaṭaṃ hutvā carantaṃ. Kenīdha lokasmi vikappayeyyāti kena idha loke taṇhākappena vā diṭṭhikappena vā koci vikappeyya, tesaṃ vā pahīnattā rāgādinā pubbe vuttenāti.
காமா தே பட²மா ஸேனாதிஆதீ³ஸு சதூஸு கா³தா²ஸு அயமத்தோ² – யஸ்மா ஆதி³தோவ அகா³ரியபூ⁴தே ஸத்தே வத்து²காமேஸு கிலேஸகாமா மோஹயந்தி, தே அபி⁴பு⁴ய்ய அனகா³ரியபா⁴வங் உபக³தானங் பந்தேஸு வா ஸேனாஸனேஸு, அஞ்ஞதரஞ்ஞதரேஸு வா அதி⁴குஸலேஸு த⁴ம்மேஸு அரதி உப்பஜ்ஜதி. வுத்தஞ்சேதங் – ‘‘பப்³ப³ஜிதேன கோ², ஆவுஸோ, அபி⁴ரதி து³க்கரா’’தி (ஸங்॰ நி॰ 4.331). ததோ தே பரபடிப³த்³த⁴ஜீவிகத்தா கு²ப்பிபாஸா பா³தே⁴தி, தாய பா³தி⁴தானங் பரியேஸனதண்ஹா சித்தங் கிலமயதி, அத² நேஸங் கிலந்தசித்தானங் தி²னமித்³த⁴ங் ஓக்கமதி ததோ விஸேஸமனதி⁴க³ச்ச²ந்தானங் து³ரபி⁴ஸம்ப⁴வேஸு அரஞ்ஞவனபத்தே²ஸு ஸேனாஸனேஸு விஹரதங் உத்ராஸஸஞ்ஞிதா பீ⁴ரு ஜாயதி, தேஸங் உஸ்ஸங்கிதபரிஸங்கிதானங் தீ³க⁴ரத்தங் விவேகரஸமனஸ்ஸாத³யமானானங் விஹரதங் ‘‘ந ஸியா நு கோ² ஏஸ மக்³கோ³’’தி படிபத்தியங் விசிகிச்சா² உப்பஜ்ஜதி, தங் வினோதெ³த்வா விஹரதங் அப்பமத்தகேன விஸேஸாதி⁴க³மேன மானமக்க²த²ம்பா⁴ ஜாயந்தி, தேபி வினோதெ³த்வா விஹரதங் ததோ அதி⁴கதரங் விஸேஸாதி⁴க³மங் நிஸ்ஸாய லாப⁴ஸக்காரஸிலோகா உப்பஜ்ஜந்தி, லாபா⁴தி³முச்சி²தா த⁴ம்மபடிரூபகானி பகாஸெந்தா மிச்சா²யஸங் அதி⁴க³ந்த்வா தத்த² டி²தா ஜாதிஆதீ³ஹி அத்தானங் உக்கங்ஸெந்தி, பரங் வம்பெ⁴ந்தி. தஸ்மா காமாதீ³னங் பட²மஸேனாதி³பா⁴வோ வேதி³தப்³போ³.
Kāmā te paṭhamā senātiādīsu catūsu gāthāsu ayamattho – yasmā āditova agāriyabhūte satte vatthukāmesu kilesakāmā mohayanti, te abhibhuyya anagāriyabhāvaṃ upagatānaṃ pantesu vā senāsanesu, aññataraññataresu vā adhikusalesu dhammesu arati uppajjati. Vuttañcetaṃ – ‘‘pabbajitena kho, āvuso, abhirati dukkarā’’ti (saṃ. ni. 4.331). Tato te parapaṭibaddhajīvikattā khuppipāsā bādheti, tāya bādhitānaṃ pariyesanataṇhā cittaṃ kilamayati, atha nesaṃ kilantacittānaṃ thinamiddhaṃ okkamati tato visesamanadhigacchantānaṃ durabhisambhavesu araññavanapatthesu senāsanesu viharataṃ utrāsasaññitā bhīru jāyati, tesaṃ ussaṅkitaparisaṅkitānaṃ dīgharattaṃ vivekarasamanassādayamānānaṃ viharataṃ ‘‘na siyā nu kho esa maggo’’ti paṭipattiyaṃ vicikicchā uppajjati, taṃ vinodetvā viharataṃ appamattakena visesādhigamena mānamakkhathambhā jāyanti, tepi vinodetvā viharataṃ tato adhikataraṃ visesādhigamaṃ nissāya lābhasakkārasilokā uppajjanti, lābhādimucchitā dhammapaṭirūpakāni pakāsentā micchāyasaṃ adhigantvā tattha ṭhitā jātiādīhi attānaṃ ukkaṃsenti, paraṃ vambhenti. Tasmā kāmādīnaṃ paṭhamasenādibhāvo veditabbo.
ஏவமேதங் த³ஸவித⁴ங் ஸேனங் உத்³தி³ஸித்வா யஸ்மா ஸா கண்ஹத⁴ம்மஸமன்னாக³தத்தா கண்ஹஸ்ஸ நமுசினோ உபகாராய ஸங்வத்ததி, தஸ்மா நங் ‘‘தவ ஸேனா’’தி நித்³தி³ஸந்தோ ஆஹ – ‘‘ஏஸா நமுசி தே ஸேனா, கண்ஹஸ்ஸாபி⁴ப்பஹாரினீ’’தி. தத்த² அபி⁴ப்பஹாரினீதி ஸமணப்³ராஹ்மணானங் கா⁴தினீ நிப்போதி²னீ, அந்தராயகரீதி அத்தோ². ந நங் அஸூரோ ஜினாதி, ஜெத்வாவ லப⁴தே ஸுக²ந்தி ஏவங் தவ ஸேனங் அஸூரோ காயே ச ஜீவிதே ச ஸாபெக்கோ² புரிஸோ ந ஜினாதி, ஸூரோ பன ஜினாதி, ஜெத்வாவ மக்³க³ஸுக²ங் ப²லஸுக²ஞ்ச அதி⁴க³ச்ச²தி.
Evametaṃ dasavidhaṃ senaṃ uddisitvā yasmā sā kaṇhadhammasamannāgatattā kaṇhassa namucino upakārāya saṃvattati, tasmā naṃ ‘‘tava senā’’ti niddisanto āha – ‘‘esā namuci te senā, kaṇhassābhippahārinī’’ti. Tattha abhippahārinīti samaṇabrāhmaṇānaṃ ghātinī nippothinī, antarāyakarīti attho. Na naṃ asūro jināti, jetvāva labhate sukhanti evaṃ tava senaṃ asūro kāye ca jīvite ca sāpekkho puriso na jināti, sūro pana jināti, jetvāva maggasukhaṃ phalasukhañca adhigacchati.
யதோ சதூஹி அரியமக்³கே³ஹீதி யதா³ சதூஹி நித்³தோ³ஸனிப்³பா³னமக்³க³னஸங்கா²தேஹி மக்³கே³ஹி. மாரஸேனாதி மாரஸ்ஸ ஸேனா வசனகரா கிலேஸா. படிஸேனிகராதி படிபக்க²கரா. ஜிதா சாதி பராஜயமானா ஹனிதா ச. பராஜிதா சாதி நிக்³க³ஹிதா ச. ப⁴க்³கா³தி பி⁴ன்னா. விப்பலுக்³கா³தி சுண்ணவிசுண்ணா. பரம்முகா²தி விமுக²பா⁴வங் பாபிதா. விஸேனிபூ⁴தோதி நிக்கிலேஸோ ஹுத்வா டி²தோ.
Yatocatūhi ariyamaggehīti yadā catūhi niddosanibbānamagganasaṅkhātehi maggehi. Mārasenāti mārassa senā vacanakarā kilesā. Paṭisenikarāti paṭipakkhakarā. Jitā cāti parājayamānā hanitā ca. Parājitā cāti niggahitā ca. Bhaggāti bhinnā. Vippaluggāti cuṇṇavicuṇṇā. Parammukhāti vimukhabhāvaṃ pāpitā. Visenibhūtoti nikkileso hutvā ṭhito.
வோதா³தத³ஸ்ஸிந்தி ப்³யவதா³தத³ஸ்ஸிங். தானி ச²த³னானீதி ஏதானி தண்ஹாதி³கிலேஸச²த³னானி. விவடானீதி பாகடீகதானி. வித்³த⁴ங்ஸிதானீதி டி²தட்டா²னதோ அபஹதானி. உக்³கா⁴டிதானீதி உப்பாடிதானி. ஸமுக்³கா⁴டிதானீதி விஸேஸேன உப்பாடிதானி.
Vodātadassinti byavadātadassiṃ. Tāni chadanānīti etāni taṇhādikilesachadanāni. Vivaṭānīti pākaṭīkatāni. Viddhaṃsitānīti ṭhitaṭṭhānato apahatāni. Ugghāṭitānīti uppāṭitāni. Samugghāṭitānīti visesena uppāṭitāni.
29. ந கப்பயந்தீதி கா³தா²ய ஸம்ப³ந்தோ⁴ அத்தோ² ச – கிஞ்ச பி⁴ய்யோ? தே ஹி தாதி³ஸா ஸந்தோ த்³வின்னங் கப்பானங் புரெக்கா²ரானஞ்ச கேனசி ந கப்பயந்தி, ந புரெக்க²ரொந்தி. பரமத்த²ங் அச்சந்தஸுத்³தி⁴ங் அதி⁴க³தத்தா அனச்சந்தஸுத்³தி⁴ங்யேவ அகிரியஸஸ்ஸததி³ட்டி²ங் ‘‘அச்சந்தஸுத்³தீ⁴’’தி ந தே வத³ந்தி. ஆதா³னக³ந்த²ங் க³திதங் விஸஜ்ஜாதி சதுப்³பி³த⁴ம்பி ரூபாதீ³னங் ஆதா³யகத்தா ஆதா³னக³ந்த²ங் அத்தனோ சித்தஸந்தானே க³தி²தங் ப³த்³த⁴ங் அரியமக்³க³ஸத்தே²ன விஸ்ஸஜ்ஜ சி²ந்தி³த்வா. ஸேஸங் பாகடமேவ.
29.Na kappayantīti gāthāya sambandho attho ca – kiñca bhiyyo? Te hi tādisā santo dvinnaṃ kappānaṃ purekkhārānañca kenaci na kappayanti, na purekkharonti. Paramatthaṃ accantasuddhiṃ adhigatattā anaccantasuddhiṃyeva akiriyasassatadiṭṭhiṃ ‘‘accantasuddhī’’ti na te vadanti. Ādānaganthaṃ gatitaṃ visajjāti catubbidhampi rūpādīnaṃ ādāyakattā ādānaganthaṃ attano cittasantāne gathitaṃ baddhaṃ ariyamaggasatthena vissajja chinditvā. Sesaṃ pākaṭameva.
அச்சந்தஸுத்³தி⁴ந்தி அச்சந்தங் பரமத்த²ங் ஸுத்³தி⁴ங். ஸங்ஸாரஸுத்³தி⁴ந்தி ஸங்ஸாரதோ ஸுத்³தி⁴ங். அகிரியதி³ட்டி²ந்தி கரோதோ ந கரீயதி பாபந்தி அகிரியதி³ட்டி²ங். ஸஸ்ஸதவாத³ந்தி ‘‘நிச்சோ து⁴வோ ஸஸ்ஸதோ’’தி வசனங். ந வத³ந்தி ந கதெ²ந்தி.
Accantasuddhinti accantaṃ paramatthaṃ suddhiṃ. Saṃsārasuddhinti saṃsārato suddhiṃ. Akiriyadiṭṭhinti karoto na karīyati pāpanti akiriyadiṭṭhiṃ. Sassatavādanti ‘‘nicco dhuvo sassato’’ti vacanaṃ. Na vadanti na kathenti.
க³ந்தா²தி நாமகாயங் க³ந்தெ²ந்தி, சுதிபடிஸந்தி⁴வஸேன வட்டஸ்மிங் க⁴டெந்தீதி க³ந்தா². அபி⁴ஜ்ஜா² ச ஸா நாமகாயக⁴டனவஸேன க³ந்தோ² சாதி அபி⁴ஜ்ஜா²காயக³ந்தோ². ஹிதஸுக²ங் ப்³யாபாத³யதீதி ப்³யாபாதோ³. ப்³யாபாதோ³ ச ஸோ வுத்தனயேன க³ந்தோ² சாதி ப்³யாபாதோ³ காயக³ந்தோ². ஸீலப்³ப³தபராமாஸோதி ‘‘இதோ ப³ஹித்³தா⁴ ஸமணப்³ராஹ்மணானங் ஸீலேன ஸுத்³தி⁴ வதேன ஸுத்³தீ⁴’’தி (த⁴॰ ஸ॰ 1143, 1222) பரதோ ஆமாஸோ. இத³ங்ஸச்சாபி⁴னிவேஸோதி ஸப்³ப³ஞ்ஞுபா⁴ஸிதம்பி படிக்கி²பித்வா ‘‘ஸஸ்ஸதோ லோகோ, இத³மேவ ஸச்சங், மோக⁴மஞ்ஞ’’ந்தி (த⁴॰ ஸ॰ 1144) இமினா ஆகாரேன அபி⁴னிவேஸோ இத³ங்ஸச்சாபி⁴னிவேஸோ. அத்தனோ தி³ட்டி²யா ராகோ³தி அத்தனா அபி⁴னிவிஸித்வா க³ஹிதாய தி³ட்டி²யா ச²ந்த³ராகோ³. பரவாதே³ஸு ஆகா⁴தோதி பரஸ்ஸ வசனேஸு கோபோ. அப்பச்சயோதி அதுட்டா²காரோ. அத்தனோ ஸீலங் வாதி அத்தனா ஸமாதி³ன்னங் கோ³ஸீலாதி³ஸீலங் வா. அத்தனோ தி³ட்டீ²தி அத்தனா க³ஹிதா பராமட்டா² தி³ட்டி². தேஹி க³ந்தே²ஹீதி ஏதேஹி வுத்தேஹி நாமகாயக⁴டனேஹி. ரூபங் ஆதி³யந்தீதி சதுஸமுட்டா²னிகங் ரூபாரம்மணங் ஆதி³யந்தி க³ண்ஹந்தி. உபாதி³யந்தீதி உபக³ந்த்வா க³ண்ஹந்தி தண்ஹாக³ஹணேன. பராமஸந்தி தி³ட்டி²க³ஹணேன. அபி⁴னிவிஸந்தி மானக³ஹணேன. வட்டந்தி தேபூ⁴மகவட்டங். க³ந்தே²தி ப³ந்த⁴னே.
Ganthāti nāmakāyaṃ ganthenti, cutipaṭisandhivasena vaṭṭasmiṃ ghaṭentīti ganthā. Abhijjhā ca sā nāmakāyaghaṭanavasena gantho cāti abhijjhākāyagantho. Hitasukhaṃ byāpādayatīti byāpādo. Byāpādo ca so vuttanayena gantho cāti byāpādo kāyagantho. Sīlabbataparāmāsoti ‘‘ito bahiddhā samaṇabrāhmaṇānaṃ sīlena suddhi vatena suddhī’’ti (dha. sa. 1143, 1222) parato āmāso. Idaṃsaccābhinivesoti sabbaññubhāsitampi paṭikkhipitvā ‘‘sassato loko, idameva saccaṃ, moghamañña’’nti (dha. sa. 1144) iminā ākārena abhiniveso idaṃsaccābhiniveso. Attano diṭṭhiyā rāgoti attanā abhinivisitvā gahitāya diṭṭhiyā chandarāgo. Paravādesu āghātoti parassa vacanesu kopo. Appaccayoti atuṭṭhākāro. Attano sīlaṃ vāti attanā samādinnaṃ gosīlādisīlaṃ vā. Attano diṭṭhīti attanā gahitā parāmaṭṭhā diṭṭhi. Tehi ganthehīti etehi vuttehi nāmakāyaghaṭanehi. Rūpaṃ ādiyantīti catusamuṭṭhānikaṃ rūpārammaṇaṃ ādiyanti gaṇhanti. Upādiyantīti upagantvā gaṇhanti taṇhāgahaṇena. Parāmasanti diṭṭhigahaṇena. Abhinivisanti mānagahaṇena. Vaṭṭanti tebhūmakavaṭṭaṃ. Gantheti bandhane.
வோஸஜ்ஜித்வா வாதி ஸம்மா விஸ்ஸஜ்ஜித்வா வா. க³தி²தேதி ப³ந்த⁴னே. க³ந்தி²தேதி க³ந்த²னேன க³ந்தி²தே. விப³ந்தே⁴தி விஸேஸேன ப³ந்தே⁴. ஆப³ந்தே⁴தி அனேகவிதே⁴ன ப³ந்தே⁴. பலிபு³த்³தே⁴தி அமுஞ்சிதே. ப³ந்த⁴னே போடயித்வாதி தண்ஹாமானதி³ட்டி²ப³ந்த⁴னானி பப்போடயித்வா. விஸஜ்ஜாதி சஜித்வா.
Vosajjitvā vāti sammā vissajjitvā vā. Gathiteti bandhane. Ganthiteti ganthanena ganthite. Vibandheti visesena bandhe. Ābandheti anekavidhena bandhe. Palibuddheti amuñcite. Bandhane poṭayitvāti taṇhāmānadiṭṭhibandhanāni pappoṭayitvā. Visajjāti cajitvā.
இமே பன சத்தாரோ க³ந்தே² கிலேஸபடிபாடியாபி ஆஹரிதுங் வட்டதி, மக்³க³படிபாடியாபி – கிலேஸபடிபாடியா அபி⁴ஜ்ஜா²காயக³ந்தோ² அரஹத்தமக்³கே³ன பஹீயதி, ப்³யாபாதோ³ காயக³ந்தோ² அனாகா³மிமக்³கே³ன, ஸீலப்³ப³தபராமாஸோ காயக³ந்தோ² இத³ங்ஸச்சாபி⁴னிவேஸோ காயக³ந்தோ² ஸோதாபத்திமக்³கே³ன. மக்³க³படிபாடியா ஸீலப்³ப³தபராமாஸோ காயக³ந்தோ² இத³ங்ஸச்சாபி⁴னிவேஸோ காயக³ந்தோ² ஸோதாபத்திமக்³கே³ன, ப்³யாபாதோ³ காயக³ந்தோ² அனாகா³மிமக்³கே³ன, அபி⁴ஜ்ஜா²காயக³ந்தோ² அரஹத்தமக்³கே³னாதி. ஏதே சத்தாரோ க³ந்தா² யஸ்ஸ ஸங்விஜ்ஜந்தி, தங் சுதிபடிஸந்தி⁴வஸேன வட்டஸ்மிங் க³ந்தெ²ந்தி க⁴டெந்தீதி க³ந்தா². தே சதுப்பபே⁴தா³ அபி⁴ஜ்ஜா²யந்தி ஏதாய, ஸயங் வா அபி⁴ஜ்ஜா²யதி, அபி⁴ஜ்ஜா²யனமத்தமேவ வா ஏஸாதி அபி⁴ஜ்ஜா². லோபோ⁴யேவ நாமகாயங் க³ந்தே²தி சுதிபடிஸந்தி⁴வஸேன வட்டஸ்மிங் க⁴டேதீதி காயக³ந்தோ². ப்³யாபஜ்ஜதி தேன சித்தங் பூதிபா⁴வங் க³ச்ச²தி, ப்³யாபாத³யதி வா வினயாசாரரூபஸம்பத்திஹிதஸுகா²தீ³னீதி ப்³யாபாதோ³. ‘‘இதோ ப³ஹித்³தா⁴ ஸமணப்³ராஹ்மணானங் ஸீலேன ஸுத்³தி⁴ வதேன ஸுத்³தீ⁴’’தி பராமஸனங் ஸீலப்³ப³தபராமாஸோ, ஸப்³ப³ஞ்ஞுபா⁴ஸிதம்பி படிக்கி²பித்வா ‘‘ஸஸ்ஸதோ லோகோ, இத³மேவ ஸச்சங், மோக⁴மஞ்ஞ’’ந்திஆதி³னா ஆகாரேன அபி⁴னிவிஸதீதி இத³ங்ஸச்சாபி⁴னிவேஸோ. யதா² வய்ஹங் வாதிஆதி³ங் வய்ஹாதி³விஸங்க²ரணங் க³ந்தா²னங் வியோக³கரணே உபமங் த³ஸ்ஸெந்தோ ஆஹ.
Ime pana cattāro ganthe kilesapaṭipāṭiyāpi āharituṃ vaṭṭati, maggapaṭipāṭiyāpi – kilesapaṭipāṭiyā abhijjhākāyagantho arahattamaggena pahīyati, byāpādo kāyagantho anāgāmimaggena, sīlabbataparāmāso kāyagantho idaṃsaccābhiniveso kāyagantho sotāpattimaggena. Maggapaṭipāṭiyā sīlabbataparāmāso kāyagantho idaṃsaccābhiniveso kāyagantho sotāpattimaggena, byāpādo kāyagantho anāgāmimaggena, abhijjhākāyagantho arahattamaggenāti. Ete cattāro ganthā yassa saṃvijjanti, taṃ cutipaṭisandhivasena vaṭṭasmiṃ ganthenti ghaṭentīti ganthā. Te catuppabhedā abhijjhāyanti etāya, sayaṃ vā abhijjhāyati, abhijjhāyanamattameva vā esāti abhijjhā. Lobhoyeva nāmakāyaṃ gantheti cutipaṭisandhivasena vaṭṭasmiṃ ghaṭetīti kāyagantho. Byāpajjati tena cittaṃ pūtibhāvaṃ gacchati, byāpādayati vā vinayācārarūpasampattihitasukhādīnīti byāpādo. ‘‘Ito bahiddhā samaṇabrāhmaṇānaṃ sīlena suddhi vatena suddhī’’ti parāmasanaṃ sīlabbataparāmāso, sabbaññubhāsitampi paṭikkhipitvā ‘‘sassato loko, idameva saccaṃ, moghamañña’’ntiādinā ākārena abhinivisatīti idaṃsaccābhiniveso. Yathā vayhaṃ vātiādiṃ vayhādivisaṅkharaṇaṃ ganthānaṃ viyogakaraṇe upamaṃ dassento āha.
ந ஜனெந்தீதி ந உப்பாதெ³ந்தி. ந ஸஞ்ஜனெந்தீதி ந நிப்³ப³த்தெந்தி. நாபி⁴னிப்³ப³த்தெந்தீதி உபஸக்³க³வஸேன பத³ங் வட்³டி⁴தங். ந ஸஞ்ஜனெந்தீதி உப்பாத³க்க²ணங். ந நிப்³ப³த்தெந்தி நாபி⁴னிப்³ப³த்தெந்தீதி பவத்திக்க²ணங் ஸந்தா⁴ய வுத்தங்.
Na janentīti na uppādenti. Na sañjanentīti na nibbattenti. Nābhinibbattentīti upasaggavasena padaṃ vaḍḍhitaṃ. Na sañjanentīti uppādakkhaṇaṃ. Na nibbattenti nābhinibbattentīti pavattikkhaṇaṃ sandhāya vuttaṃ.
30. ஸீமாதிகோ³தி கா³தா² ஏகபுக்³க³லாதி⁴ட்டா²னாய தே³ஸனாய வுத்தா. புப்³ப³ஸதி³ஸோ ஏவ பனஸ்ஸா ஸம்ப³ந்தோ⁴, ஸோ ஏவங் அத்த²வண்ணனாய ஸத்³தி⁴ங் வேதி³தப்³போ³ – கிஞ்ச பி⁴ய்யோ? ஸோ ஈதி³ஸோ பூ⁴ரிபஞ்ஞோ சதுன்னங் கிலேஸஸீமானங் அதீதத்தா ஸீமாதிகோ³, பா³ஹிதபாபத்தா ச ப்³ராஹ்மணோ, இத்த²ம்பூ⁴தஸ்ஸ ச தஸ்ஸ நத்தி², பரசித்தபுப்³பே³னிவாஸஞாணேஹி ஞத்வா வா மங்ஸதி³ப்³ப³சக்கூ²ஹி தி³ஸ்வா வா கிஞ்சி ஸமுக்³க³ஹீதங், அபி⁴னிவிட்ட²ந்தி வுத்தங் ஹோதி. ஸோ ச காமராகா³பா⁴வதோ ந ராக³ராகீ³ ரூபாரூபராகா³பா⁴வதோ ந விராக³ரத்தோ, யதோ ஏவங்வித⁴ஸ்ஸ தஸ்ஸ ‘‘இத³ங் பரம’’ந்தி கிஞ்சி இத⁴ உக்³க³ஹீதங் நத்தீ²தி அரஹத்தனிகூடேன தே³ஸனங் நிட்டா²பேஸி.
30.Sīmātigoti gāthā ekapuggalādhiṭṭhānāya desanāya vuttā. Pubbasadiso eva panassā sambandho, so evaṃ atthavaṇṇanāya saddhiṃ veditabbo – kiñca bhiyyo? So īdiso bhūripañño catunnaṃ kilesasīmānaṃ atītattā sīmātigo, bāhitapāpattā ca brāhmaṇo, itthambhūtassa ca tassa natthi, paracittapubbenivāsañāṇehi ñatvā vā maṃsadibbacakkhūhi disvā vā kiñci samuggahītaṃ, abhiniviṭṭhanti vuttaṃ hoti. So ca kāmarāgābhāvato na rāgarāgī rūpārūparāgābhāvato na virāgaratto, yato evaṃvidhassa tassa ‘‘idaṃ parama’’nti kiñci idha uggahītaṃ natthīti arahattanikūṭena desanaṃ niṭṭhāpesi.
சதஸ்ஸோ ஸீமாயோதி சத்தாரோ பரிச்சே²தா³. தி³ட்டா²னுஸயோதி தி³ட்டி² ச ஸா அப்பஹீனட்டே²ன அனுஸயோ சாதி தி³ட்டா²னுஸயோ. விசிகிச்சா²னுஸயாதீ³ஸுபி ஏஸேவ நயோ. கேனட்டே²ன அனுஸயா? அனுஸயனட்டே²ன. கோ ஏஸ அனுஸயட்டோ² நாமாதி? அப்பஹீனட்டோ². ஏதே ஹி அப்பஹீனட்டே²ன தஸ்ஸ தஸ்ஸ ஸந்தானே அனுஸெந்தி நாம, தஸ்மா ‘‘அனுஸயா’’தி வுச்சந்தி. அனுஸெந்தீதி அனுரூபங் காரணங் லபி⁴த்வா உப்பஜ்ஜந்தீதி அத்தோ². அதா²பி ஸியா – அனுஸயட்டோ² நாம அப்பஹீனாகாரோ, அப்பஹீனாகாரோ ச ‘‘உப்பஜ்ஜதீ’’தி வத்துங் ந யுஜ்ஜதி, தஸ்மா ந அனுஸயா உப்பஜ்ஜந்தீதி. தத்ரித³ங் படிவசனங் – அப்பஹீனாகாரோ அனுஸயோ, அனுஸயோதி பன அப்பஹீனட்டே²ன தா²மக³தா கிலேஸா வுச்சந்தி. ஸோ சித்தஸம்பயுத்தோ ஸாரம்மணோ ஸப்பச்சயட்டே²ன ஸஹேதுகோ ஏகந்தாகுஸலோ அதீதோபி ஹோதி அனாக³தோபி பச்சுப்பன்னோபி, தஸ்மா ‘‘உப்பஜ்ஜதீ’’தி வத்துங் யுஜ்ஜதி.
Catasso sīmāyoti cattāro paricchedā. Diṭṭhānusayoti diṭṭhi ca sā appahīnaṭṭhena anusayo cāti diṭṭhānusayo. Vicikicchānusayādīsupi eseva nayo. Kenaṭṭhena anusayā? Anusayanaṭṭhena. Ko esa anusayaṭṭho nāmāti? Appahīnaṭṭho. Ete hi appahīnaṭṭhena tassa tassa santāne anusenti nāma, tasmā ‘‘anusayā’’ti vuccanti. Anusentīti anurūpaṃ kāraṇaṃ labhitvā uppajjantīti attho. Athāpi siyā – anusayaṭṭho nāma appahīnākāro, appahīnākāro ca ‘‘uppajjatī’’ti vattuṃ na yujjati, tasmā na anusayā uppajjantīti. Tatridaṃ paṭivacanaṃ – appahīnākāro anusayo, anusayoti pana appahīnaṭṭhena thāmagatā kilesā vuccanti. So cittasampayutto sārammaṇo sappaccayaṭṭhena sahetuko ekantākusalo atītopi hoti anāgatopi paccuppannopi, tasmā ‘‘uppajjatī’’ti vattuṃ yujjati.
தத்ரித³ங் பமாணங் – படிஸம்பி⁴தா³யங் தாவ அபி⁴ஸமயகதா²யங் (படி॰ ம॰ 3.21) ‘‘பச்சுப்பன்னே கிலேஸே பஜஹதீ’’தி புச்சி²த்வா அனுஸயானங் பச்சுப்பன்னபா⁴வஸ்ஸ அத்தி²தாய ‘‘தா²மக³தோ அனுஸயங் பஜஹதீ’’தி வுத்தங். த⁴ம்மஸங்க³ணியங் மோஹஸ்ஸ பத³பா⁴ஜனே (த⁴॰ ஸ॰ 390) ‘‘அவிஜ்ஜானுஸயோ அவிஜ்ஜாபரியுட்டா²னங், அவிஜ்ஜாலங்கீ³ மோஹோ அகுஸலமூலங், அயங் தஸ்மிங் ஸமயே மோஹோ ஹோதீ’’தி அகுஸலசித்தேன ஸத்³தி⁴ங் அவிஜ்ஜானுஸயஸ்ஸ உப்பன்னபா⁴வோ வுத்தோ. கதா²வத்து²ஸ்மிங் ‘‘அனுஸயா அப்³யாகதா அனுஸயா அஹேதுகா அனுஸயா சித்தவிப்பயுத்தா’’தி (கதா²॰ 605) ஸப்³பே³ வாதா³ படிஸேதி⁴தா. அனுஸயயமகே ஸத்தன்னங் மஹாவாரானங் அஞ்ஞதரஸ்மிங் உப்பஜ்ஜனவாரே ‘‘யஸ்ஸ காமராகா³னுஸயோ உப்பஜ்ஜதி தஸ்ஸ படிகா⁴னுஸயோ உப்பஜ்ஜதீ’’திஆதி³ வுத்தங். தஸ்மா ‘‘அனுஸெந்தீதி அனுரூபங் காரணங் லபி⁴த்வா உப்பஜ்ஜந்தீ’’தி யங் வுத்தங், தங் இமினா தந்திப்பமாணேன ஸுவுத்தந்தி வேதி³தப்³ப³ங். யம்பி ‘‘சித்தஸம்பயுத்தோ ஸாரம்மணோ’’திஆதி³ வுத்தங், தம்பி ஸுவுத்தமேவ. அனுஸயோ ஹி நாமேஸ பரினிப்ப²ன்னோ சித்தஸம்பயுத்தோ அகுஸலத⁴ம்மோதி நிட்ட²மெத்த² க³ந்தப்³ப³ங்.
Tatridaṃ pamāṇaṃ – paṭisambhidāyaṃ tāva abhisamayakathāyaṃ (paṭi. ma. 3.21) ‘‘paccuppanne kilese pajahatī’’ti pucchitvā anusayānaṃ paccuppannabhāvassa atthitāya ‘‘thāmagato anusayaṃ pajahatī’’ti vuttaṃ. Dhammasaṅgaṇiyaṃ mohassa padabhājane (dha. sa. 390) ‘‘avijjānusayo avijjāpariyuṭṭhānaṃ, avijjālaṅgī moho akusalamūlaṃ, ayaṃ tasmiṃ samaye moho hotī’’ti akusalacittena saddhiṃ avijjānusayassa uppannabhāvo vutto. Kathāvatthusmiṃ ‘‘anusayā abyākatā anusayā ahetukā anusayā cittavippayuttā’’ti (kathā. 605) sabbe vādā paṭisedhitā. Anusayayamake sattannaṃ mahāvārānaṃ aññatarasmiṃ uppajjanavāre ‘‘yassa kāmarāgānusayo uppajjati tassa paṭighānusayo uppajjatī’’tiādi vuttaṃ. Tasmā ‘‘anusentīti anurūpaṃ kāraṇaṃ labhitvā uppajjantī’’ti yaṃ vuttaṃ, taṃ iminā tantippamāṇena suvuttanti veditabbaṃ. Yampi ‘‘cittasampayutto sārammaṇo’’tiādi vuttaṃ, tampi suvuttameva. Anusayo hi nāmesa parinipphanno cittasampayutto akusaladhammoti niṭṭhamettha gantabbaṃ.
தத்த² தி³ட்டா²னுஸயோ சதூஸு தி³ட்டி²ஸம்பயுத்தேஸு, விசிகிச்சா²னுஸயோ விசிகிச்சா²ஸஹக³தே, அவிஜ்ஜானுஸயோ த்³வாத³ஸஸு அகுஸலசித்தேஸு ஸஹஜாதவஸேன ஆரம்மணவஸேன ச; தயோபி அவஸேஸதேபூ⁴மகத⁴ம்மேஸு ஆரம்மணவஸேன தி³ட்டி²விசிகிச்சா²மோஹா. காமராகா³னுஸயோ செத்த² லோப⁴ஸஹக³தசித்தேஸு ஸஹஜாதவஸேன ஆரம்மணவஸேன ச, மனாபேஸு அவஸேஸகாமாவசரத⁴ம்மேஸு ஆரம்மணவஸேன உப்பஜ்ஜமானோ லோபோ⁴. படிகா⁴னுஸயோ தோ³மனஸ்ஸஸஹக³தசித்தேஸு ஸஹஜாதவஸேன ஆரம்மணவஸேன ச, அமனாபேஸு அவஸேஸகாமாவசரத⁴ம்மேஸு ஆரம்மணவஸேனேவ உப்பஜ்ஜமானோ தோ³ஸோ. மானானுஸயோ தி³ட்டி²விப்பயுத்தலோப⁴ஸஹக³தசித்தேஸு ஸஹஜாதவஸேன ஆரம்மணவஸேன ச, து³க்க²வேத³னாவஜ்ஜேஸு அவஸேஸகாமாவசரத⁴ம்மேஸு ரூபாரூபாவசரத⁴ம்மேஸு ச ஆரம்மணவஸேனேவ உப்பஜ்ஜமானோ மானோ. ப⁴வராகா³னுஸயோ சதூஸு தி³ட்டி²விப்பயுத்தேஸு உப்பஜ்ஜமானோபி ஸஹஜாதவஸேன வுத்தோ. ஆரம்மணவஸேனேவ பன ரூபாரூபாவசரத⁴ம்மேஸு உப்பஜ்ஜமானோ லோபோ⁴ வுத்தோ.
Tattha diṭṭhānusayo catūsu diṭṭhisampayuttesu, vicikicchānusayo vicikicchāsahagate, avijjānusayo dvādasasu akusalacittesu sahajātavasena ārammaṇavasena ca; tayopi avasesatebhūmakadhammesu ārammaṇavasena diṭṭhivicikicchāmohā. Kāmarāgānusayo cettha lobhasahagatacittesu sahajātavasena ārammaṇavasena ca, manāpesu avasesakāmāvacaradhammesu ārammaṇavasena uppajjamāno lobho. Paṭighānusayo domanassasahagatacittesu sahajātavasena ārammaṇavasena ca, amanāpesu avasesakāmāvacaradhammesu ārammaṇavaseneva uppajjamāno doso. Mānānusayo diṭṭhivippayuttalobhasahagatacittesu sahajātavasena ārammaṇavasena ca, dukkhavedanāvajjesu avasesakāmāvacaradhammesu rūpārūpāvacaradhammesu ca ārammaṇavaseneva uppajjamāno māno. Bhavarāgānusayo catūsu diṭṭhivippayuttesu uppajjamānopi sahajātavasena vutto. Ārammaṇavaseneva pana rūpārūpāvacaradhammesu uppajjamāno lobho vutto.
தத்த² தி³ட்டா²னுஸயோதி த்³வாஸட்டி²விதா⁴ தி³ட்டி². விசிகிச்சா²னுஸயோதி அட்ட²வத்து²கா விசிகிச்சா². ததே³கட்டா² ச கிலேஸாதி ஸஹஜேகட்ட²வஸேன தி³ட்டி²யா விசிகிச்சா²ய, ஸஹஜேகட்ட²வஸேன ஏகதோ டி²தா. மானானுஸயோதி நவவித⁴மானோ. பரமத்த²ஞாணேன வா ஞத்வாதி பரேஸங் சித்தாசாரஜானநபஞ்ஞாய ஜானித்வா, சேதோபரியஞாணேன ஜானித்வாதி வுத்தங் ஹோதி. புப்³பே³னிவாஸானுஸ்ஸதிஞாணேன வாதி அதீதே நிவுட்ட²க்க²ந்தா⁴னுஸ்ஸரணஞாணேன ஜானித்வா. மங்ஸசக்கு²னா வாதி பகதிசக்கு²னா. தி³ப்³ப³சக்கு²னா வாதி தி³ப்³ப³ஸதி³ஸேன தி³ப்³ப³விஹாரஸன்னிஸ்ஸிதேன வா தி³ப்³ப³சக்கு²னா பஸ்ஸித்வா. ராக³ரத்தாதி ராகே³ன ரஞ்ஜிதா. யே பஞ்சஸு காமகு³ணேஸூதி யே பஞ்சஸு ரூபாதி³வத்து²காமகொட்டா²ஸேஸு. விராக³ரத்தாதி விராக³ஸங்கா²தாஸு ரூபாரூபஸமாபத்தீஸு அதிரத்தா அல்லீனா. யதோ காமராகோ³ சாதி யதா³ காமப⁴வே ராகோ³ ச. ரூபாரூபராகே³ஸுபி ஏஸேவ நயோ.
Tattha diṭṭhānusayoti dvāsaṭṭhividhā diṭṭhi. Vicikicchānusayoti aṭṭhavatthukā vicikicchā. Tadekaṭṭhā ca kilesāti sahajekaṭṭhavasena diṭṭhiyā vicikicchāya, sahajekaṭṭhavasena ekato ṭhitā. Mānānusayoti navavidhamāno. Paramatthañāṇena vā ñatvāti paresaṃ cittācārajānanapaññāya jānitvā, cetopariyañāṇena jānitvāti vuttaṃ hoti. Pubbenivāsānussatiñāṇena vāti atīte nivuṭṭhakkhandhānussaraṇañāṇena jānitvā. Maṃsacakkhunā vāti pakaticakkhunā. Dibbacakkhunā vāti dibbasadisena dibbavihārasannissitena vā dibbacakkhunā passitvā. Rāgarattāti rāgena rañjitā. Ye pañcasu kāmaguṇesūti ye pañcasu rūpādivatthukāmakoṭṭhāsesu. Virāgarattāti virāgasaṅkhātāsu rūpārūpasamāpattīsu atirattā allīnā. Yato kāmarāgo cāti yadā kāmabhave rāgo ca. Rūpārūparāgesupi eseva nayo.
ஸத்³த⁴ம்மப்பஜ்ஜோதிகாய மஹானித்³தே³ஸட்ட²கதா²ய
Saddhammappajjotikāya mahāniddesaṭṭhakathāya
ஸுத்³த⁴ட்ட²கஸுத்தனித்³தே³ஸவண்ணனா நிட்டி²தா.
Suddhaṭṭhakasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / மஹானித்³தே³ஸபாளி • Mahāniddesapāḷi / 4. ஸுத்³த⁴ட்ட²கஸுத்தனித்³தே³ஸோ • 4. Suddhaṭṭhakasuttaniddeso
