| Library / Tipiṭaka / திபிடக • Tipiṭaka / மஹானித்³தே³ஸபாளி • Mahāniddesapāḷi |
4. ஸுத்³த⁴ட்ட²கஸுத்தனித்³தே³ஸோ
4. Suddhaṭṭhakasuttaniddeso
அத² ஸுத்³த⁴ட்ட²கஸுத்தனித்³தே³ஸங் வக்க²தி –
Atha suddhaṭṭhakasuttaniddesaṃ vakkhati –
23.
23.
பஸ்ஸாமி ஸுத்³த⁴ங் பரமங் அரோக³ங், தி³ட்டே²ன ஸங்ஸுத்³தி⁴ நரஸ்ஸ ஹோதி;
Passāmisuddhaṃ paramaṃ arogaṃ,diṭṭhena saṃsuddhi narassa hoti;
ஏவாபி⁴ஜானங் பரமந்தி ஞத்வா, ஸுத்³தா⁴னுபஸ்ஸீதி பச்சேதி ஞாணங்.
Evābhijānaṃ paramanti ñatvā, suddhānupassīti pacceti ñāṇaṃ.
பஸ்ஸாமி ஸுத்³த⁴ங் பரமங் அரோக³ந்தி. பஸ்ஸாமி ஸுத்³த⁴ந்தி பஸ்ஸாமி ஸுத்³த⁴ங், த³க்கா²மி ஸுத்³த⁴ங், ஓலோகேமி ஸுத்³த⁴ங், நிஜ்ஜா²யாமி ஸுத்³த⁴ங், உபபரிக்கா²மி ஸுத்³த⁴ங். பரமங் அரோக³ந்தி பரமங் ஆரொக்³யப்பத்தங் தாணப்பத்தங் லேணப்பத்தங் ஸரணப்பத்தங் அப⁴யப்பத்தங் அச்சுதப்பத்தங் அமதப்பத்தங் நிப்³பா³னப்பத்தந்தி – பஸ்ஸாமி ஸுத்³த⁴ங் பரமங் அரோக³ங்.
Passāmi suddhaṃ paramaṃ aroganti. Passāmi suddhanti passāmi suddhaṃ, dakkhāmi suddhaṃ, olokemi suddhaṃ, nijjhāyāmi suddhaṃ, upaparikkhāmi suddhaṃ. Paramaṃ aroganti paramaṃ ārogyappattaṃ tāṇappattaṃ leṇappattaṃ saraṇappattaṃ abhayappattaṃ accutappattaṃ amatappattaṃ nibbānappattanti – passāmi suddhaṃ paramaṃ arogaṃ.
தி³ட்டே²ன ஸங்ஸுத்³தி⁴ நரஸ்ஸ ஹோதீதி. சக்கு²விஞ்ஞாணங் 1 ரூபத³ஸ்ஸனேன நரஸ்ஸ ஸுத்³தி⁴ விஸுத்³தி⁴ பரிஸுத்³தி⁴, முத்தி விமுத்தி பரிமுத்தி ஹோதி, நரோ ஸுஜ்ஜ²தி விஸுஜ்ஜ²தி பரிஸுஜ்ஜ²தி, முச்சதி விமுச்சதி பரிமுச்சதீதி – தி³ட்டே²ன ஸங்ஸுத்³தி⁴ நரஸ்ஸ ஹோதி.
Diṭṭhena saṃsuddhi narassa hotīti. Cakkhuviññāṇaṃ 2 rūpadassanena narassa suddhi visuddhi parisuddhi, mutti vimutti parimutti hoti, naro sujjhati visujjhati parisujjhati, muccati vimuccati parimuccatīti – diṭṭhena saṃsuddhi narassa hoti.
ஏவாபி⁴ஜானங் பரமந்தி ஞத்வாதி. ஏவங் அபி⁴ஜானந்தோ ஆஜானந்தோ விஜானந்தோ படிவிஜானந்தோ படிவிஜ்ஜ²ந்தோ. ‘‘இத³ங் பரமங் அக்³க³ங் ஸெட்ட²ங் விஸிட்ட²ங் பாமொக்க²ங் உத்தமங் பவர’’ந்தி ஞத்வா ஜானித்வா துலயித்வா தீரயித்வா விபா⁴வயித்வா விபூ⁴தங் கத்வாதி – ஏவாபி⁴ஜானங் பரமந்தி ஞத்வா.
Evābhijānaṃ paramanti ñatvāti. Evaṃ abhijānanto ājānanto vijānanto paṭivijānanto paṭivijjhanto. ‘‘Idaṃ paramaṃ aggaṃ seṭṭhaṃ visiṭṭhaṃ pāmokkhaṃ uttamaṃ pavara’’nti ñatvā jānitvā tulayitvā tīrayitvā vibhāvayitvā vibhūtaṃ katvāti – evābhijānaṃ paramanti ñatvā.
ஸுத்³தா⁴னுபஸ்ஸீதி பச்சேதி ஞாணந்தி. யோ ஸுத்³த⁴ங் பஸ்ஸதி, ஸோ ஸுத்³தா⁴னுபஸ்ஸீ, பச்சேதி ஞாணந்தி சக்கு²விஞ்ஞாணங் ரூபத³ஸ்ஸனேன ஞாணந்தி பச்சேதி, மக்³கோ³தி பச்சேதி, பதோ²தி பச்சேதி, நிய்யானந்தி பச்சேதீதி – ஸுத்³தா⁴னுபஸ்ஸீ பச்சேதி ஞாணங்.
Suddhānupassītipacceti ñāṇanti. Yo suddhaṃ passati, so suddhānupassī, paccetiñāṇanti cakkhuviññāṇaṃ rūpadassanena ñāṇanti pacceti, maggoti pacceti, pathoti pacceti, niyyānanti paccetīti – suddhānupassī pacceti ñāṇaṃ.
தேனாஹ ப⁴க³வா –
Tenāha bhagavā –
‘‘பஸ்ஸாமி ஸுத்³த⁴ங் பரமங் அரோக³ங், தி³ட்டே²ன ஸங்ஸுத்³தி⁴ நரஸ்ஸ ஹோதி;
‘‘Passāmi suddhaṃ paramaṃ arogaṃ, diṭṭhena saṃsuddhi narassa hoti;
ஏவாபி⁴ஜானங் பரமந்தி ஞத்வா, ஸுத்³தா⁴னுபஸ்ஸீதி பச்சேதி ஞாண’’ந்தி.
Evābhijānaṃ paramanti ñatvā, suddhānupassīti pacceti ñāṇa’’nti.
24.
24.
தி³ட்டே²ன சே ஸுத்³தி⁴ நரஸ்ஸ ஹோதி, ஞாணேன வா ஸோ பஜஹாதி து³க்க²ங்;
Diṭṭhena ce suddhi narassa hoti,ñāṇena vā so pajahāti dukkhaṃ;
அஞ்ஞேன ஸோ ஸுஜ்ஜ²தி ஸோபதீ⁴கோ, தி³ட்டீ² ஹி நங் பாவ ததா² வதா³னங்.
Aññena so sujjhati sopadhīko, diṭṭhī hi naṃ pāva tathā vadānaṃ.
தி³ட்டே²ன சே ஸுத்³தி⁴ நரஸ்ஸ ஹோதீதி. சக்கு²விஞ்ஞாணங் ரூபத³ஸ்ஸனேன சே நரஸ்ஸ ஸுத்³தி⁴ விஸுத்³தி⁴ பரிஸுத்³தி⁴, முத்தி விமுத்தி பரிமுத்தி ஹோதி, நரோ ஸுஜ்ஜ²தி விஸுஜ்ஜ²தி பரிஸுஜ்ஜ²தி, முச்சதி விமுச்சதி பரிமுச்சதீதி – தி³ட்டே²ன சே ஸுத்³தி⁴ நரஸ்ஸ ஹோதி.
Diṭṭhena ce suddhi narassa hotīti. Cakkhuviññāṇaṃ rūpadassanena ce narassa suddhi visuddhi parisuddhi, mutti vimutti parimutti hoti, naro sujjhati visujjhati parisujjhati, muccati vimuccati parimuccatīti – diṭṭhena ce suddhi narassa hoti.
ஞாணேன வா ஸோ பஜஹாதி து³க்க²ந்தி சக்கு²விஞ்ஞாணங் ரூபத³ஸ்ஸனேன சே நரோ ஜாதிது³க்க²ங் பஜஹதி, ஜராது³க்க²ங் பஜஹதி, ப்³யாதி⁴து³க்க²ங் பஜஹதி, மரணது³க்க²ங் பஜஹதி, ஸோகபரிதே³வது³க்க²தோ³மனஸ்ஸுபாயாஸது³க்க²ங் பஜஹதீதி – ஞாணேன வா ஸோ பஜஹாதி து³க்க²ங்.
Ñāṇena vā so pajahāti dukkhanti cakkhuviññāṇaṃ rūpadassanena ce naro jātidukkhaṃ pajahati, jarādukkhaṃ pajahati, byādhidukkhaṃ pajahati, maraṇadukkhaṃ pajahati, sokaparidevadukkhadomanassupāyāsadukkhaṃ pajahatīti – ñāṇena vā so pajahāti dukkhaṃ.
அஞ்ஞேன ஸோ ஸுஜ்ஜ²தி ஸோபதீ⁴கோதி. அஞ்ஞேன அஸுத்³தி⁴மக்³கே³ன மிச்சா²படிபதா³ய அனிய்யானிகபதே²ன அஞ்ஞத்ர ஸதிபட்டா²னேஹி அஞ்ஞத்ர ஸம்மப்பதா⁴னேஹி அஞ்ஞத்ர இத்³தி⁴பாதே³ஹி அஞ்ஞத்ர இந்த்³ரியேஹி அஞ்ஞத்ர ப³லேஹி அஞ்ஞத்ர பொ³ஜ்ஜ²ங்கே³ஹி அஞ்ஞத்ர அரியா அட்ட²ங்கி³கா மக்³கா³ நரோ ஸுஜ்ஜ²தி விஸுஜ்ஜ²தி பரிஸுஜ்ஜ²தி , முச்சதி விமுச்சதி பரிமுச்சதி. ஸோபதீ⁴கோதி ஸராகோ³ ஸதோ³ஸோ ஸமோஹோ ஸமானோ ஸதண்ஹோ ஸதி³ட்டி² ஸகிலேஸோ ஸஉபாதா³னோதி – அஞ்ஞேன ஸோ ஸுஜ்ஜ²தி ஸோபதீ⁴கோ.
Aññena so sujjhati sopadhīkoti. Aññena asuddhimaggena micchāpaṭipadāya aniyyānikapathena aññatra satipaṭṭhānehi aññatra sammappadhānehi aññatra iddhipādehi aññatra indriyehi aññatra balehi aññatra bojjhaṅgehi aññatra ariyā aṭṭhaṅgikā maggā naro sujjhati visujjhati parisujjhati , muccati vimuccati parimuccati. Sopadhīkoti sarāgo sadoso samoho samāno sataṇho sadiṭṭhi sakileso saupādānoti – aññena so sujjhati sopadhīko.
தி³ட்டீ² ஹி நங் பாவ ததா² வதா³னந்தி. ஸாவ தி³ட்டி² தங் புக்³க³லங் பாவத³தி – இதி வாயங் புக்³க³லோ மிச்சா²தி³ட்டி²கோ விபரீதத³ஸ்ஸனோ. ததா² வதா³னந்தி ததா² வத³ந்தங் கதெ²ந்தங் ப⁴ணந்தங் தீ³பயந்தங் வோஹரந்தங். ‘‘ஸஸ்ஸதோ லோகோ , இத³மேவ ஸச்சங் மோக⁴மஞ்ஞ’’ந்தி ததா² வத³ந்தங் கதெ²ந்தங் ப⁴ணந்தங் தீ³பயந்தங் வோஹரந்தங். ‘‘அஸஸ்ஸதோ லோகோ…பே॰… அந்தவா லோகோ… அனந்தவா லோகோ… தங் ஜீவங் தங் ஸரீரங்… அஞ்ஞங் ஜீவங் அஞ்ஞங் ஸரீரங்… ஹோதி ததா²க³தோ பரங் மரணா… ந ஹோதி ததா²க³தோ பரங் மரணா… ஹோதி ச ந ச ஹோதி ததா²க³தோ பரங் மரணா… நேவ ஹோதி ந ந ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’’ந்தி ததா² வத³ந்தங் கதெ²ந்தங் ப⁴ணந்தங் தீ³பயந்தங் வோஹரந்தந்தி – தி³ட்டீ² ஹி நங் பாவ ததா² வதா³னங் .
Diṭṭhī hi naṃ pāva tathā vadānanti. Sāva diṭṭhi taṃ puggalaṃ pāvadati – iti vāyaṃ puggalo micchādiṭṭhiko viparītadassano. Tathā vadānanti tathā vadantaṃ kathentaṃ bhaṇantaṃ dīpayantaṃ voharantaṃ. ‘‘Sassato loko , idameva saccaṃ moghamañña’’nti tathā vadantaṃ kathentaṃ bhaṇantaṃ dīpayantaṃ voharantaṃ. ‘‘Asassato loko…pe… antavā loko… anantavā loko… taṃ jīvaṃ taṃ sarīraṃ… aññaṃ jīvaṃ aññaṃ sarīraṃ… hoti tathāgato paraṃ maraṇā… na hoti tathāgato paraṃ maraṇā… hoti ca na ca hoti tathāgato paraṃ maraṇā… neva hoti na na hoti tathāgato paraṃ maraṇā, idameva saccaṃ moghamañña’’nti tathā vadantaṃ kathentaṃ bhaṇantaṃ dīpayantaṃ voharantanti – diṭṭhī hi naṃ pāva tathā vadānaṃ .
தேனாஹ ப⁴க³வா –
Tenāha bhagavā –
‘‘தி³ட்டே²ன சே ஸுத்³தி⁴ நரஸ்ஸ ஹோதி, ஞாணேன வா ஸோ பஜஹாதி து³க்க²ங்;
‘‘Diṭṭhena ce suddhi narassa hoti, ñāṇena vā so pajahāti dukkhaṃ;
அஞ்ஞேன ஸோ ஸுஜ்ஜ²தி ஸோபதீ⁴கோ, தி³ட்டீ² ஹி நங் பாவ ததா² வதா³ன’’ந்தி.
Aññena so sujjhati sopadhīko, diṭṭhī hi naṃ pāva tathā vadāna’’nti.
25.
25.
ந ப்³ராஹ்மணோ அஞ்ஞதோ ஸுத்³தி⁴மாஹ, தி³ட்டே² ஸுதே ஸீலவதே முதே வா;
Na brāhmaṇo aññato suddhimāha,diṭṭhe sute sīlavate mute vā;
புஞ்ஞே ச பாபே ச அனூபலித்தோ, அத்தஞ்ஜஹோ நயித⁴ பகுப்³ப³மானோ.
Puññe ca pāpe ca anūpalitto, attañjaho nayidha pakubbamāno.
ந ப்³ராஹ்மணோ அஞ்ஞதோ ஸுத்³தி⁴மாஹ தி³ட்டே² ஸுதே ஸீலவதே முதே வாதி. நாதி படிக்கே²போ. ப்³ராஹ்மணோதி ஸத்தன்னங் த⁴ம்மானங் பா³ஹிதத்தா ப்³ராஹ்மணோ – ஸக்காயதி³ட்டி² பா³ஹிதா ஹோதி, விசிகிச்சா² பா³ஹிதா ஹோதி, ஸீலப்³ப³தபராமாஸோ பா³ஹிதோ ஹோதி , ராகோ³ பா³ஹிதோ ஹோதி, தோ³ஸோ பா³ஹிதோ ஹோதி, மோஹோ பா³ஹிதோ ஹோதி, மானோ பா³ஹிதோ ஹோதி. பா³ஹிதாஸ்ஸ ஹொந்தி பாபகா அகுஸலா த⁴ம்மா ஸங்கிலேஸிகா போனோப⁴விகா ஸத³ரா து³க்க²விபாகா ஆயதிங் ஜாதிஜராமரணியா.
Na brāhmaṇo aññato suddhimāha diṭṭhe sute sīlavate mute vāti. Nāti paṭikkhepo. Brāhmaṇoti sattannaṃ dhammānaṃ bāhitattā brāhmaṇo – sakkāyadiṭṭhi bāhitā hoti, vicikicchā bāhitā hoti, sīlabbataparāmāso bāhito hoti , rāgo bāhito hoti, doso bāhito hoti, moho bāhito hoti, māno bāhito hoti. Bāhitāssa honti pāpakā akusalā dhammā saṃkilesikā ponobhavikā sadarā dukkhavipākā āyatiṃ jātijarāmaraṇiyā.
பா³ஹித்வா ஸப்³ப³பாபகானி, [ஸபி⁴யாதி ப⁴க³வா]
Bāhitvā sabbapāpakāni, [sabhiyāti bhagavā]
விமலோ ஸாது⁴ஸமாஹிதோ டி²தத்தோ;
Vimalo sādhusamāhito ṭhitatto;
ஸங்ஸாரமதிச்ச கேவலீ ஸோ, அஸிதோ 3 தாதி³ பவுச்சதே ஸ ப்³ரஹ்மா.
Saṃsāramaticca kevalī so, asito 4 tādi pavuccate sa brahmā.
ந ப்³ராஹ்மணோ அஞ்ஞதோ ஸுத்³தி⁴மாஹாதி. ப்³ராஹ்மணோ அஞ்ஞேன அஸுத்³தி⁴மக்³கே³ன மிச்சா²படிபதா³ய அனிய்யானிகபதே²ன அஞ்ஞத்ர ஸதிபட்டா²னேஹி அஞ்ஞத்ர ஸம்மப்பதா⁴னேஹி அஞ்ஞத்ர இத்³தி⁴பாதே³ஹி அஞ்ஞத்ர இந்த்³ரியேஹி அஞ்ஞத்ர ப³லேஹி அஞ்ஞத்ர பொ³ஜ்ஜ²ங்கே³ஹி அஞ்ஞத்ர அரியேன அட்ட²ங்கி³கேன மக்³கே³ன ஸுத்³தி⁴ங் விஸுத்³தி⁴ங் பரிஸுத்³தி⁴ங், முத்திங் விமுத்திங் பரிமுத்திங், நாஹ ந கதே²தி ந ப⁴ணதி ந தீ³பயதி ந வோஹரதீதி – ந ப்³ராஹ்மணோ அஞ்ஞதோ ஸுத்³தி⁴மாஹ.
Nabrāhmaṇo aññato suddhimāhāti. Brāhmaṇo aññena asuddhimaggena micchāpaṭipadāya aniyyānikapathena aññatra satipaṭṭhānehi aññatra sammappadhānehi aññatra iddhipādehi aññatra indriyehi aññatra balehi aññatra bojjhaṅgehi aññatra ariyena aṭṭhaṅgikena maggena suddhiṃ visuddhiṃ parisuddhiṃ, muttiṃ vimuttiṃ parimuttiṃ, nāha na katheti na bhaṇati na dīpayati na voharatīti – na brāhmaṇo aññato suddhimāha.
தி³ட்டே² ஸுதே ஸீலவதே முதே வாதி. ஸந்தேகே ஸமணப்³ராஹ்மணா தி³ட்டி²ஸுத்³தி⁴கா. தே ஏகச்சானங் ரூபானங் த³ஸ்ஸனங் மங்க³லங் பச்செந்தி, ஏகச்சானங் ரூபானங் த³ஸ்ஸனங் அமங்க³லங் பச்செந்தி. கதமேஸங் ரூபானங் த³ஸ்ஸனங் மங்க³லங் பச்செந்தி? தே காலதோ வுட்ட²ஹித்வா அபி⁴மங்க³லக³தானி ரூபானி பஸ்ஸந்தி – சாடகஸகுணங் 5 பஸ்ஸந்தி, பு²ஸ்ஸவேளுவலட்டி²ங் பஸ்ஸந்தி, க³ப்³பி⁴னித்தி²ங் பஸ்ஸந்தி, குமாரகங் க²ந்தே⁴ ஆரோபெத்வா க³ச்ச²ந்தங் பஸ்ஸந்தி, புண்ணக⁴டங் பஸ்ஸந்தி, ரோஹிதமச்ச²ங் பஸ்ஸந்தி, ஆஜஞ்ஞங் பஸ்ஸந்தி, ஆஜஞ்ஞரத²ங் பஸ்ஸந்தி, உஸப⁴ங் பஸ்ஸந்தி, கோ³கபிலங் பஸ்ஸந்தி. ஏவரூபானங் ரூபானங் த³ஸ்ஸனங் மங்க³லங் பச்செந்தி. கதமேஸங் ரூபானங் த³ஸ்ஸனங் அமங்க³லங் பச்செந்தி? பலாலபுஞ்ஜங் பஸ்ஸந்தி, தக்கக⁴டங் பஸ்ஸந்தி, ரித்தக⁴டங் பஸ்ஸந்தி, நடங் பஸ்ஸந்தி, நக்³க³ஸமணகங் பஸ்ஸந்தி, க²ரங் பஸ்ஸந்தி, க²ரயானங் பஸ்ஸந்தி, ஏகயுத்தயானங் பஸ்ஸந்தி , காணங் பஸ்ஸந்தி, குணிங் பஸ்ஸந்தி, க²ஞ்ஜங் பஸ்ஸந்தி, பக்க²ஹதங் 6 பஸ்ஸந்தி, ஜிண்ணகங் பஸ்ஸந்தி, ப்³யாதி⁴கங் 7 பஸ்ஸந்தி. ஏவரூபானங் ரூபானங் த³ஸ்ஸனங் அமங்க³லங் பச்செந்தி. இமே தே ஸமணப்³ராஹ்மணா தி³ட்டி²ஸுத்³தி⁴கா. தே தி³ட்டே²ன ஸுத்³தி⁴ங் விஸுத்³தி⁴ங் பரிஸுத்³தி⁴ங் முத்திங் விமுத்திங் பரிமுத்திங் பச்செந்தி.
Diṭṭhe sute sīlavate mute vāti. Santeke samaṇabrāhmaṇā diṭṭhisuddhikā. Te ekaccānaṃ rūpānaṃ dassanaṃ maṅgalaṃ paccenti, ekaccānaṃ rūpānaṃ dassanaṃ amaṅgalaṃ paccenti. Katamesaṃ rūpānaṃ dassanaṃ maṅgalaṃ paccenti? Te kālato vuṭṭhahitvā abhimaṅgalagatāni rūpāni passanti – cāṭakasakuṇaṃ 8 passanti, phussaveḷuvalaṭṭhiṃ passanti, gabbhinitthiṃ passanti, kumārakaṃ khandhe āropetvā gacchantaṃ passanti, puṇṇaghaṭaṃ passanti, rohitamacchaṃ passanti, ājaññaṃ passanti, ājaññarathaṃ passanti, usabhaṃ passanti, gokapilaṃ passanti. Evarūpānaṃ rūpānaṃ dassanaṃ maṅgalaṃ paccenti. Katamesaṃ rūpānaṃ dassanaṃ amaṅgalaṃ paccenti? Palālapuñjaṃ passanti, takkaghaṭaṃ passanti, rittaghaṭaṃ passanti, naṭaṃ passanti, naggasamaṇakaṃ passanti, kharaṃ passanti, kharayānaṃ passanti, ekayuttayānaṃ passanti , kāṇaṃ passanti, kuṇiṃ passanti, khañjaṃ passanti, pakkhahataṃ 9 passanti, jiṇṇakaṃ passanti, byādhikaṃ 10 passanti. Evarūpānaṃ rūpānaṃ dassanaṃ amaṅgalaṃ paccenti. Ime te samaṇabrāhmaṇā diṭṭhisuddhikā. Te diṭṭhena suddhiṃ visuddhiṃ parisuddhiṃ muttiṃ vimuttiṃ parimuttiṃ paccenti.
ஸந்தேகே ஸமணப்³ராஹ்மணா ஸுதஸுத்³தி⁴கா. தே ஏகச்சானங் ஸத்³தா³னங் ஸவனங் மங்க³லங் பச்செந்தி, ஏகச்சானங் ஸத்³தா³னங் ஸவனங் அமங்க³லங் பச்செந்தி. கதமேஸங் ஸத்³தா³னங் ஸவனங் மங்க³லங் பச்செந்தி? தே காலதோ வுட்ட²ஹித்வா அபி⁴மங்க³லக³தானி ஸத்³தா³னி ஸுணந்தி – வட்³டா⁴தி வா வட்³ட⁴மானாதி வா புண்ணாதி வா பு²ஸ்ஸாதி வா அஸோகாதி வா ஸுமனாதி வா ஸுனக்க²த்தாதி வா ஸுமங்க³லாதி வா ஸிரீதி வா ஸிரீவட்³டா⁴தி வா. ஏவரூபானங் ஸத்³தா³னங் ஸவனங் மங்க³லங் பச்செந்தி. கதமேஸங் ஸத்³தா³னங் ஸவனங் அமங்க³லங் பச்செந்தி? காணோதி வா குணீதி வா க²ஞ்ஜோதி வா பக்க²ஹதோதி வா ஜிண்ணகோதி வா ப்³யாதி⁴கோதி வா மதோதி வா சி²ந்த³ந்தி வா பி⁴ந்த³ந்தி வா த³ட்³ட⁴ந்தி வா நட்ட²ந்தி வா நத்தீ²தி வா. ஏவரூபானங் ஸத்³தா³னங் ஸவனங் அமங்க³லங் பச்செந்தி. இமே தே ஸமணப்³ராஹ்மணா ஸுதஸுத்³தி⁴கா. தே ஸுதேன ஸுத்³தி⁴ங் விஸுத்³தி⁴ங் பரிஸுத்³தி⁴ங் முத்திங் விமுத்திங் பரிமுத்திங் பச்செந்தி.
Santeke samaṇabrāhmaṇā sutasuddhikā. Te ekaccānaṃ saddānaṃ savanaṃ maṅgalaṃ paccenti, ekaccānaṃ saddānaṃ savanaṃ amaṅgalaṃ paccenti. Katamesaṃ saddānaṃ savanaṃ maṅgalaṃ paccenti? Te kālato vuṭṭhahitvā abhimaṅgalagatāni saddāni suṇanti – vaḍḍhāti vā vaḍḍhamānāti vā puṇṇāti vā phussāti vā asokāti vā sumanāti vā sunakkhattāti vā sumaṅgalāti vā sirīti vā sirīvaḍḍhāti vā. Evarūpānaṃ saddānaṃ savanaṃ maṅgalaṃ paccenti. Katamesaṃ saddānaṃ savanaṃ amaṅgalaṃ paccenti? Kāṇoti vā kuṇīti vā khañjoti vā pakkhahatoti vā jiṇṇakoti vā byādhikoti vā matoti vā chindanti vā bhindanti vā daḍḍhanti vā naṭṭhanti vā natthīti vā. Evarūpānaṃ saddānaṃ savanaṃ amaṅgalaṃ paccenti. Ime te samaṇabrāhmaṇā sutasuddhikā. Te sutena suddhiṃ visuddhiṃ parisuddhiṃ muttiṃ vimuttiṃ parimuttiṃ paccenti.
ஸந்தேகே ஸமணப்³ராஹ்மணா ஸீலஸுத்³தி⁴கா. தே ஸீலமத்தேன ஸங்யமமத்தேன ஸங்வரமத்தேன அவீதிக்கமமத்தேன ஸுத்³தி⁴ங் விஸுத்³தி⁴ங் பரிஸுத்³தி⁴ங் முத்திங் விமுத்திங் பரிமுத்திங் பச்செந்தி. ஸமணோமுண்டி³காபுத்தோ 11 ஏவமாஹ – ‘‘சதூஹி கோ² அஹங், க³ஹபதி 12, த⁴ம்மேஹி ஸமன்னாக³தங் புரிஸபுக்³க³லங் பஞ்ஞாபேமி ஸம்பன்னகுஸலங் பரமகுஸலங் உத்தமபத்திப்பத்தங் ஸமணங் அயோஜ்ஜங். கதமேஹி சதூஹி? இத⁴, க³ஹபதி, ந காயேன பாபகங் கம்மங் கரோதி, ந பாபகங் வாசங் பா⁴ஸதி, ந பாபகங் ஸங்கப்பங் ஸங்கப்பதி, ந பாபகங் ஆஜீவங் ஆஜீவதி. இமேஹி கோ² அஹங், க³ஹபதி, சதூஹி த⁴ம்மேஹி ஸமன்னாக³தங் புரிஸபுக்³க³லங் பஞ்ஞாபேமி ஸம்பன்னகுஸலங் பரமகுஸலங் உத்தமபத்திப்பத்தங் ஸமணங் அயோஜ்ஜங்’’. ஏவமேவ ஸந்தேகே ஸமணப்³ராஹ்மணா ஸீலஸுத்³தி⁴கா, தே ஸீலமத்தேன ஸங்யமமத்தேன ஸங்வரமத்தேன அவீதிக்கமமத்தேன ஸுத்³தி⁴ங் விஸுத்³தி⁴ங் பரிஸுத்³தி⁴ங் முத்திங் விமுத்திங் பரிமுத்திங் பச்செந்தி.
Santeke samaṇabrāhmaṇā sīlasuddhikā. Te sīlamattena saṃyamamattena saṃvaramattena avītikkamamattena suddhiṃ visuddhiṃ parisuddhiṃ muttiṃ vimuttiṃ parimuttiṃ paccenti. Samaṇomuṇḍikāputto 13 evamāha – ‘‘catūhi kho ahaṃ, gahapati 14, dhammehi samannāgataṃ purisapuggalaṃ paññāpemi sampannakusalaṃ paramakusalaṃ uttamapattippattaṃ samaṇaṃ ayojjaṃ. Katamehi catūhi? Idha, gahapati, na kāyena pāpakaṃ kammaṃ karoti, na pāpakaṃ vācaṃ bhāsati, na pāpakaṃ saṅkappaṃ saṅkappati, na pāpakaṃ ājīvaṃ ājīvati. Imehi kho ahaṃ, gahapati, catūhi dhammehi samannāgataṃ purisapuggalaṃ paññāpemi sampannakusalaṃ paramakusalaṃ uttamapattippattaṃ samaṇaṃ ayojjaṃ’’. Evameva santeke samaṇabrāhmaṇā sīlasuddhikā, te sīlamattena saṃyamamattena saṃvaramattena avītikkamamattena suddhiṃ visuddhiṃ parisuddhiṃ muttiṃ vimuttiṃ parimuttiṃ paccenti.
ஸந்தேகே ஸமணப்³ராஹ்மணா வதஸுத்³தி⁴கா. தே ஹத்தி²வதிகா வா ஹொந்தி, அஸ்ஸவதிகா வா ஹொந்தி, கோ³வதிகா வா ஹொந்தி, குக்குரவதிகா வா ஹொந்தி, காகவதிகா வா ஹொந்தி, வாஸுதே³வவதிகா வா ஹொந்தி, ப³லதே³வவதிகா வா ஹொந்தி, புண்ணப⁴த்³த³வதிகா வா ஹொந்தி, மணிப⁴த்³த³வதிகா வா ஹொந்தி, அக்³கி³வதிகா வா ஹொந்தி, நாக³வதிகா வா ஹொந்தி, ஸுபண்ணவதிகா வா ஹொந்தி, யக்க²வதிகா வா ஹொந்தி, அஸுரவதிகா வா ஹொந்தி, க³ந்த⁴ப்³ப³வதிகா வா ஹொந்தி, மஹாராஜவதிகா வா ஹொந்தி, சந்த³வதிகா வா ஹொந்தி, ஸூரியவதிகா வா ஹொந்தி, இந்த³வதிகா வா ஹொந்தி, ப்³ரஹ்மவதிகா வா ஹொந்தி, தே³வவதிகா வா ஹொந்தி, தி³ஸாவதிகா வா ஹொந்தி. இமே தே ஸமணப்³ராஹ்மணா வதஸுத்³தி⁴கா. தே வதேன ஸுத்³தி⁴ங் விஸுத்³தி⁴ங் பரிஸுத்³தி⁴ங் முத்திங் விமுத்திங் பரிமுத்திங் பச்செந்தி.
Santeke samaṇabrāhmaṇā vatasuddhikā. Te hatthivatikā vā honti, assavatikā vā honti, govatikā vā honti, kukkuravatikā vā honti, kākavatikā vā honti, vāsudevavatikā vā honti, baladevavatikā vā honti, puṇṇabhaddavatikā vā honti, maṇibhaddavatikā vā honti, aggivatikā vā honti, nāgavatikā vā honti, supaṇṇavatikā vā honti, yakkhavatikā vā honti, asuravatikā vā honti, gandhabbavatikā vā honti, mahārājavatikā vā honti, candavatikā vā honti, sūriyavatikā vā honti, indavatikā vā honti, brahmavatikā vā honti, devavatikā vā honti, disāvatikā vā honti. Ime te samaṇabrāhmaṇā vatasuddhikā. Te vatena suddhiṃ visuddhiṃ parisuddhiṃ muttiṃ vimuttiṃ parimuttiṃ paccenti.
ஸந்தேகே ஸமணப்³ராஹ்மணா முதஸுத்³தி⁴கா. தே காலதோ உட்ட²ஹித்வா பத²விங் ஆமஸந்தி, ஹரிதங் ஆமஸந்தி, கோ³மயங் ஆமஸந்தி, கச்ச²பங் ஆமஸந்தி, பா²லங் அக்கமந்தி, திலவாஹங் ஆமஸந்தி, பு²ஸ்ஸதிலங் கா²த³ந்தி, பு²ஸ்ஸதேலங் மக்கெ²ந்தி, பு²ஸ்ஸத³ந்தகட்ட²ங் கா²த³ந்தி, பு²ஸ்ஸமத்திகாய ந்ஹாயந்தி, பு²ஸ்ஸஸாடகங் நிவாஸெந்தி, பு²ஸ்ஸவேட²னங் வேடெ²ந்தி. இமே தே ஸமணப்³ராஹ்மணா முதஸுத்³தி⁴கா. தே முதேன ஸுத்³தி⁴ங் விஸுத்³தி⁴ங் பரிஸுத்³தி⁴ங் முத்திங் விமுத்திங் பரிமுத்திங் பச்செந்தி. ந ப்³ராஹ்மணோ அஞ்ஞதோ ஸுத்³தி⁴மாஹ.
Santeke samaṇabrāhmaṇā mutasuddhikā. Te kālato uṭṭhahitvā pathaviṃ āmasanti, haritaṃ āmasanti, gomayaṃ āmasanti, kacchapaṃ āmasanti, phālaṃ akkamanti, tilavāhaṃ āmasanti, phussatilaṃ khādanti, phussatelaṃ makkhenti, phussadantakaṭṭhaṃ khādanti, phussamattikāya nhāyanti, phussasāṭakaṃ nivāsenti, phussaveṭhanaṃ veṭhenti. Ime te samaṇabrāhmaṇā mutasuddhikā. Te mutena suddhiṃ visuddhiṃ parisuddhiṃ muttiṃ vimuttiṃ parimuttiṃ paccenti. Na brāhmaṇo aññato suddhimāha.
தி³ட்டே² ஸுதே ஸீலவதே முதே வாதி. ப்³ராஹ்மணோ தி³ட்ட²ஸுத்³தி⁴யாபி ஸுத்³தி⁴ங் நாஹ, ஸுதஸுத்³தி⁴யாபி ஸுத்³தி⁴ங் நாஹ, ஸீலஸுத்³தி⁴யாபி ஸுத்³தி⁴ங் நாஹ, வதஸுத்³தி⁴யாபி ஸுத்³தி⁴ங் நாஹ, முதஸுத்³தி⁴யாபி ஸுத்³தி⁴ங் நாஹ ந கதே²தி ந ப⁴ணதி ந தீ³பயதி ந வோஹரதீதி – ந ப்³ராஹ்மணோ அஞ்ஞதோ ஸுத்³தி⁴மாஹ தி³ட்டே² ஸுதே ஸீலவதே முதே வா.
Diṭṭhe sute sīlavate mute vāti. Brāhmaṇo diṭṭhasuddhiyāpi suddhiṃ nāha, sutasuddhiyāpi suddhiṃ nāha, sīlasuddhiyāpi suddhiṃ nāha, vatasuddhiyāpi suddhiṃ nāha, mutasuddhiyāpi suddhiṃ nāha na katheti na bhaṇati na dīpayati na voharatīti – na brāhmaṇo aññato suddhimāha diṭṭhe sute sīlavate mute vā.
புஞ்ஞே ச பாபே ச அனூபலித்தோதி. புஞ்ஞங் வுச்சதி யங் கிஞ்சி தேதா⁴துகங் குஸலாபி⁴ஸங்கா²ரங், அபுஞ்ஞங் வுச்சதி ஸப்³ப³ங் அகுஸலங். யதோ புஞ்ஞாபி⁴ஸங்கா²ரோ ச அபுஞ்ஞாபி⁴ஸங்கா²ரோ ச ஆனேஞ்ஜாபி⁴ஸங்கா²ரோ ச பஹீனா ஹொந்தி உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா; எத்தாவதா புஞ்ஞே ச பாபே ச ந லிம்பதி ந பலிம்பதி ந உபலிம்பதி அலித்தோ அபலித்தோ அனூபலித்தோ நிக்க²ந்தோ நிஸ்ஸடோ விப்பமுத்தோ விஸஞ்ஞுத்தோ விமரியாதி³கதேன சேதஸா விஹரதீதி – புஞ்ஞே ச பாபே ச அனூபலித்தோ.
Puññe ca pāpe ca anūpalittoti. Puññaṃ vuccati yaṃ kiñci tedhātukaṃ kusalābhisaṅkhāraṃ, apuññaṃ vuccati sabbaṃ akusalaṃ. Yato puññābhisaṅkhāro ca apuññābhisaṅkhāro ca āneñjābhisaṅkhāro ca pahīnā honti ucchinnamūlā tālāvatthukatā anabhāvaṃkatā āyatiṃ anuppādadhammā; ettāvatā puññe ca pāpe ca na limpati na palimpati na upalimpati alitto apalitto anūpalitto nikkhanto nissaṭo vippamutto visaññutto vimariyādikatena cetasā viharatīti – puññe ca pāpe ca anūpalitto.
அத்தஞ்ஜஹோ நயித⁴ பகுப்³ப³மானோதி. அத்தஞ்ஜஹோதி அத்ததி³ட்டி²ஜஹோ. அத்தஞ்ஜஹோதி கா³ஹங் ஜஹோ 15. அத்தஞ்ஜஹோதி தண்ஹாவஸேன தி³ட்டி²வஸேன க³ஹிதங் பராமட்ட²ங் அபி⁴னிவிட்ட²ங் அஜ்ஜோ²ஸிதங் அதி⁴முத்தங், ஸப்³ப³ங் தங் சத்தங் ஹோதி வந்தங் முத்தங் பஹீனங் படினிஸ்ஸட்ட²ங். நயித⁴ பகுப்³ப³மானோதி புஞ்ஞாபி⁴ஸங்கா²ரங் வா அபுஞ்ஞாபி⁴ஸங்கா²ரங் வா ஆனேஞ்ஜாபி⁴ஸங்கா²ரங் வா அபகுப்³ப³மானோ அஜனயமானோ அஸஞ்ஜனயமானோ அனிப்³ப³த்தயமானோ அனபி⁴னிப்³ப³த்தயமானோதி – அத்தஞ்ஜஹோ நயித⁴ பகுப்³ப³மானோ.
Attañjaho nayidha pakubbamānoti. Attañjahoti attadiṭṭhijaho. Attañjahoti gāhaṃ jaho 16. Attañjahoti taṇhāvasena diṭṭhivasena gahitaṃ parāmaṭṭhaṃ abhiniviṭṭhaṃ ajjhositaṃ adhimuttaṃ, sabbaṃ taṃ cattaṃ hoti vantaṃ muttaṃ pahīnaṃ paṭinissaṭṭhaṃ. Nayidha pakubbamānoti puññābhisaṅkhāraṃ vā apuññābhisaṅkhāraṃ vā āneñjābhisaṅkhāraṃ vā apakubbamāno ajanayamāno asañjanayamāno anibbattayamāno anabhinibbattayamānoti – attañjaho nayidha pakubbamāno.
தேனாஹ ப⁴க³வா –
Tenāha bhagavā –
‘‘ந ப்³ராஹ்மணோ அஞ்ஞதோ ஸுத்³தி⁴மாஹ, தி³ட்டே² ஸுதே ஸீலவதே முதே வா;
‘‘Na brāhmaṇo aññato suddhimāha, diṭṭhe sute sīlavate mute vā;
புஞ்ஞே ச பாபே ச அனூபலித்தோ, அத்தஞ்ஜஹோ நயித⁴ பகுப்³ப³மானோ’’தி.
Puññe ca pāpe ca anūpalitto, attañjaho nayidha pakubbamāno’’ti.
26.
26.
புரிமங் பஹாய அபரங் ஸிதாஸே, ஏஜானுகா³ தே ந தரந்தி ஸங்க³ங்;
Purimaṃpahāya aparaṃ sitāse,ejānugā te na taranti saṅgaṃ;
தே உக்³க³ஹாயந்தி நிரஸ்ஸஜந்தி, கபீவ ஸாக²ங் பமுஞ்சங் 17 க³ஹாய.
Teuggahāyanti nirassajanti, kapīva sākhaṃ pamuñcaṃ18gahāya.
புரிமங் பஹாய அபரங் ஸிதாஸேதி. புரிமங் ஸத்தா²ரங் பஹாய பரங் ஸத்தா²ரங் நிஸ்ஸிதா; புரிமங் த⁴ம்மக்கா²னங் பஹாய அபரங் த⁴ம்மக்கா²னங் நிஸ்ஸிதா; புரிமங் க³ணங் பஹாய அபரங் க³ணங் நிஸ்ஸிதா; புரிமங் தி³ட்டி²ங் பஹாய அபரங் தி³ட்டி²ங் நிஸ்ஸிதா; புரிமங் படிபத³ங் பஹாய அபரங் படிபத³ங் நிஸ்ஸிதா; புரிமங் மக்³க³ங் பஹாய அபரங் மக்³க³ங் நிஸ்ஸிதா ஸன்னிஸ்ஸிதா அல்லீனா உபக³தா அஜ்ஜோ²ஸிதா அதி⁴முத்தாதி – புரிமங் பஹாய அபரங் ஸிதாஸே.
Purimaṃ pahāya aparaṃ sitāseti. Purimaṃ satthāraṃ pahāya paraṃ satthāraṃ nissitā; purimaṃ dhammakkhānaṃ pahāya aparaṃ dhammakkhānaṃ nissitā; purimaṃ gaṇaṃ pahāya aparaṃ gaṇaṃ nissitā; purimaṃ diṭṭhiṃ pahāya aparaṃ diṭṭhiṃ nissitā; purimaṃ paṭipadaṃ pahāya aparaṃ paṭipadaṃ nissitā; purimaṃ maggaṃ pahāya aparaṃ maggaṃ nissitā sannissitā allīnā upagatā ajjhositā adhimuttāti – purimaṃ pahāya aparaṃ sitāse.
ஏஜானுகா³ தே ந தரந்தி ஸங்க³ந்தி. ஏஜா வுச்சதி தண்ஹா. யோ ராகோ³ ஸாராகோ³…பே॰… அபி⁴ஜ்ஜா² லோபோ⁴ அகுஸலமூலங். ஏஜானுகா³தி ஏஜானுகா³ ஏஜானுக³தா ஏஜானுஸடா ஏஜாய பன்னா பதிதா அபி⁴பூ⁴தா பரியாதி³ன்னசித்தா. தே ந தரந்தி ஸங்க³ந்தி ராக³ஸங்க³ங் தோ³ஸஸங்க³ங் மோஹஸங்க³ங் மானஸங்க³ங் தி³ட்டி²ஸங்க³ங் கிலேஸஸங்க³ங் து³ச்சரிதஸங்க³ங் ந தரந்தி ந உத்தரந்தி ந பதரந்தி ந ஸமதிக்கமந்தி ந வீதிவத்தந்தீதி – ஏஜானுகா³ தே ந தரந்தி ஸங்க³ங்.
Ejānugā te na taranti saṅganti. Ejā vuccati taṇhā. Yo rāgo sārāgo…pe… abhijjhā lobho akusalamūlaṃ. Ejānugāti ejānugā ejānugatā ejānusaṭā ejāya pannā patitā abhibhūtā pariyādinnacittā. Te na taranti saṅganti rāgasaṅgaṃ dosasaṅgaṃ mohasaṅgaṃ mānasaṅgaṃ diṭṭhisaṅgaṃ kilesasaṅgaṃ duccaritasaṅgaṃ na taranti na uttaranti na pataranti na samatikkamanti na vītivattantīti – ejānugā te na taranti saṅgaṃ.
தே உக்³க³ஹாயந்தி நிரஸ்ஸஜந்தீதி ஸத்தா²ரங் க³ண்ஹந்தி, தங் முஞ்சித்வா அஞ்ஞங் ஸத்தா²ரங் க³ண்ஹந்தி; த⁴ம்மக்கா²னங் க³ண்ஹந்தி , தங் முஞ்சித்வா அஞ்ஞங் த⁴ம்மக்கா²னங் க³ண்ஹந்தி; க³ணங் க³ண்ஹந்தி, தங் முஞ்சித்வா அஞ்ஞங் க³ணங் க³ண்ஹந்தி; தி³ட்டி²ங் க³ண்ஹந்தி, தங் முஞ்சித்வா அஞ்ஞங் தி³ட்டி²ங் க³ண்ஹந்தி; படிபத³ங் க³ண்ஹந்தி, தங் முஞ்சித்வா அஞ்ஞங் படிபத³ங் க³ண்ஹந்தி; மக்³க³ங் க³ண்ஹந்தி, தங் முஞ்சித்வா அஞ்ஞங் மக்³க³ங் க³ண்ஹந்தி; க³ண்ஹந்தி ச முஞ்சந்தி ச ஆதி³யந்தி ச நிரஸ்ஸஜந்தி சாதி – தே உக்³க³ஹாயந்தி நிரஸ்ஸஜந்தி.
Te uggahāyanti nirassajantīti satthāraṃ gaṇhanti, taṃ muñcitvā aññaṃ satthāraṃ gaṇhanti; dhammakkhānaṃ gaṇhanti , taṃ muñcitvā aññaṃ dhammakkhānaṃ gaṇhanti; gaṇaṃ gaṇhanti, taṃ muñcitvā aññaṃ gaṇaṃ gaṇhanti; diṭṭhiṃ gaṇhanti, taṃ muñcitvā aññaṃ diṭṭhiṃ gaṇhanti; paṭipadaṃ gaṇhanti, taṃ muñcitvā aññaṃ paṭipadaṃ gaṇhanti; maggaṃ gaṇhanti, taṃ muñcitvā aññaṃ maggaṃ gaṇhanti; gaṇhanti ca muñcanti ca ādiyanti ca nirassajanti cāti – te uggahāyanti nirassajanti.
கபீவ ஸாக²ங் பமுஞ்சங் க³ஹாயாதி. யதா² மக்கடோ அரஞ்ஞே பவனே சரமானோ ஸாக²ங் க³ண்ஹாதி, தங் முஞ்சித்வா அஞ்ஞங் ஸாக²ங் க³ண்ஹாதி. ஏவமேவ புது²ஸமணப்³ராஹ்மணா புது²தி³ட்டி²க³தானி க³ண்ஹந்தி ச முஞ்சந்தி ச ஆதி³யந்தி ச நிரஸ்ஸஜந்தி சாதி – கபீவ ஸாக²ங் பமுஞ்சங் க³ஹாய.
Kapīva sākhaṃ pamuñcaṃ gahāyāti. Yathā makkaṭo araññe pavane caramāno sākhaṃ gaṇhāti, taṃ muñcitvā aññaṃ sākhaṃ gaṇhāti. Evameva puthusamaṇabrāhmaṇā puthudiṭṭhigatāni gaṇhanti ca muñcanti ca ādiyanti ca nirassajanti cāti – kapīva sākhaṃ pamuñcaṃ gahāya.
தேனாஹ ப⁴க³வா –
Tenāha bhagavā –
‘‘புரிமங் பஹாய அபரங் ஸிதாஸே, ஏஜானுகா³ தே ந தரந்தி ஸங்க³ங்;
‘‘Purimaṃ pahāya aparaṃ sitāse, ejānugā te na taranti saṅgaṃ;
தே உக்³க³ஹாயந்தி நிரஸ்ஸஜந்தி, கபீவ ஸாக²ங் பமுஞ்சங் க³ஹாயா’’தி.
Te uggahāyanti nirassajanti, kapīva sākhaṃ pamuñcaṃ gahāyā’’ti.
27.
27.
ஸயங் ஸமாதா³ய வதானி ஜந்து, உச்சாவசங் க³ச்ச²தி ஸஞ்ஞஸத்தோ;
Sayaṃsamādāya vatāni jantu, uccāvacaṃ gacchati saññasatto;
வித்³வா ச வேதே³ஹி ஸமேச்ச த⁴ம்மங், ந உச்சாவசங் க³ச்ச²தி பூ⁴ரிபஞ்ஞோ.
Vidvā ca vedehi samecca dhammaṃ, na uccāvacaṃ gacchati bhūripañño.
ஸயங் ஸமாதா³ய வதானி ஜந்தூதி. ஸயங் ஸமாதா³யாதி ஸாமங் ஸமாதா³ய . வதானீதி ஹத்தி²வதங் வா அஸ்ஸவதங் வா கோ³வதங் வா குக்கூரவதங் வா காகவதங் வா வாஸுதே³வவதங் வா ப³லதே³வவதங் வா புண்ணப⁴த்³த³வதங் வா மணிப⁴த்³த³வதங் வா அக்³கி³வதங் வா நாக³வதங் வா ஸுபண்ணவதங் வா யக்க²வதங் வா அஸுரவதங் வா…பே॰… தி³ஸாவதங் வா ஆதா³ய ஸமாதா³ய ஆதி³யித்வா ஸமாதி³யித்வா க³ண்ஹித்வா பராமஸித்வா அபி⁴னிவிஸித்வா. ஜந்தூதி ஸத்தோ நரோ …பே॰… மனுஜோதி – ஸயங் ஸமாதா³ய வதானி ஜந்து.
Sayaṃ samādāya vatāni jantūti. Sayaṃ samādāyāti sāmaṃ samādāya . Vatānīti hatthivataṃ vā assavataṃ vā govataṃ vā kukkūravataṃ vā kākavataṃ vā vāsudevavataṃ vā baladevavataṃ vā puṇṇabhaddavataṃ vā maṇibhaddavataṃ vā aggivataṃ vā nāgavataṃ vā supaṇṇavataṃ vā yakkhavataṃ vā asuravataṃ vā…pe… disāvataṃ vā ādāya samādāya ādiyitvā samādiyitvā gaṇhitvā parāmasitvā abhinivisitvā. Jantūti satto naro …pe… manujoti – sayaṃ samādāya vatāni jantu.
உச்சாவசங் க³ச்ச²தி ஸஞ்ஞஸத்தோதி ஸத்தா²ரதோ ஸத்தா²ரங் க³ச்ச²தி; த⁴ம்மக்கா²னதோ த⁴ம்மக்கா²னங் க³ச்ச²தி; க³ணதோ க³ணங் க³ச்ச²தி; தி³ட்டி²யா தி³ட்டி²ங் க³ச்ச²தி; படிபதா³ய படிபத³ங் க³ச்ச²தி; மக்³க³தோ மக்³க³ங் க³ச்ச²தி. ஸஞ்ஞஸத்தோதி காமஸஞ்ஞாய ப்³யாபாத³ஸஞ்ஞாய விஹிங்ஸாஸஞ்ஞாய தி³ட்டி²ஸஞ்ஞாய ஸத்தோ விஸத்தோ ஆஸத்தோ லக்³கோ³ லக்³கி³தோ பலிபு³த்³தோ⁴. யதா² பி⁴த்திகி²லே வா நாக³த³ந்தே வா ப⁴ண்ட³ங் ஸத்தங் விஸத்தங் ஆஸத்தங் லக்³க³ங் லக்³கி³தங் பலிபு³த்³த⁴ங், ஏவமேவ காமஸஞ்ஞாய ப்³யாபாத³ஸஞ்ஞாய விஹிங்ஸாஸஞ்ஞாய தி³ட்டி²ஸஞ்ஞாய ஸத்தோ விஸத்தோ ஆஸத்தோ லக்³கோ³ லக்³கி³தோ பலிபு³த்³தோ⁴தி – உச்சாவசங் க³ச்ச²தி ஸஞ்ஞஸத்தோ.
Uccāvacaṃ gacchati saññasattoti satthārato satthāraṃ gacchati; dhammakkhānato dhammakkhānaṃ gacchati; gaṇato gaṇaṃ gacchati; diṭṭhiyā diṭṭhiṃ gacchati; paṭipadāya paṭipadaṃ gacchati; maggato maggaṃ gacchati. Saññasattoti kāmasaññāya byāpādasaññāya vihiṃsāsaññāya diṭṭhisaññāya satto visatto āsatto laggo laggito palibuddho. Yathā bhittikhile vā nāgadante vā bhaṇḍaṃ sattaṃ visattaṃ āsattaṃ laggaṃ laggitaṃ palibuddhaṃ, evameva kāmasaññāya byāpādasaññāya vihiṃsāsaññāya diṭṭhisaññāya satto visatto āsatto laggo laggito palibuddhoti – uccāvacaṃ gacchati saññasatto.
வித்³வா ச வேதே³ஹி ஸமேச்ச த⁴ம்மந்தி. வித்³வாதி வித்³வா விஜ்ஜாக³தோ ஞாணீ விபா⁴வீ மேதா⁴வீ. வேதே³ஹீதி வேதா³ வுச்சந்தி சதூஸு மக்³கே³ஸு ஞாணங் பஞ்ஞா பஞ்ஞிந்த்³ரியங் பஞ்ஞாப³லங் த⁴ம்மவிசயஸம்பொ³ஜ்ஜ²ங்கோ³ வீமங்ஸா விபஸ்ஸனா ஸம்மாதி³ட்டி². தேஹி வேதே³ஹி ஜாதிஜராமரணஸ்ஸ அந்தக³தோ அந்தப்பத்தோ, கோடிக³தோ கோடிப்பத்தோ, பரியந்தக³தோ பரியந்தப்பத்தோ, வோஸானக³தோ வோஸானப்பத்தோ, தாணக³தோ தாணப்பத்தோ, லேணக³தோ லேணப்பத்தோ, ஸரணக³தோ ஸரணப்பத்தோ, அப⁴யக³தோ அப⁴யப்பத்தோ, அச்சுதக³தோ அச்சுதப்பத்தோ, அமதக³தோ அமதப்பத்தோ, நிப்³பா³னக³தோ நிப்³பா³னப்பத்தோ. வேதா³னங் வா அந்தக³தோதி வேத³கூ³, வேதே³ஹி வா அந்தக³தோதி வேத³கூ³, ஸத்தன்னங் வா த⁴ம்மானங் விதி³தத்தா வேத³கூ³. ஸக்காயதி³ட்டி² விதி³தா ஹோதி, விசிகிச்சா² விதி³தா ஹோதி, ஸீலப்³ப³தபராமாஸோ விதி³தோ ஹோதி, ராகோ³ விதி³தோ ஹோதி, தோ³ஸோ விதி³தோ ஹோதி, மோஹோ விதி³தோ ஹோதி, மானோ விதி³தோ ஹோதி, விதி³தாஸ்ஸ ஹொந்தி பாபகா அகுஸலா த⁴ம்மா ஸங்கிலேஸிகா போனோப⁴விகா ஸத³ரா து³க்க²விபாகா ஆயதிங் ஜாதிஜராமரணியா.
Vidvā ca vedehi samecca dhammanti. Vidvāti vidvā vijjāgato ñāṇī vibhāvī medhāvī. Vedehīti vedā vuccanti catūsu maggesu ñāṇaṃ paññā paññindriyaṃ paññābalaṃ dhammavicayasambojjhaṅgo vīmaṃsā vipassanā sammādiṭṭhi. Tehi vedehi jātijarāmaraṇassa antagato antappatto, koṭigato koṭippatto, pariyantagato pariyantappatto, vosānagato vosānappatto, tāṇagato tāṇappatto, leṇagato leṇappatto, saraṇagato saraṇappatto, abhayagato abhayappatto, accutagato accutappatto, amatagato amatappatto, nibbānagato nibbānappatto. Vedānaṃ vā antagatoti vedagū, vedehi vā antagatoti vedagū, sattannaṃ vā dhammānaṃ viditattā vedagū. Sakkāyadiṭṭhi viditā hoti, vicikicchā viditā hoti, sīlabbataparāmāso vidito hoti, rāgo vidito hoti, doso vidito hoti, moho vidito hoti, māno vidito hoti, viditāssa honti pāpakā akusalā dhammā saṃkilesikā ponobhavikā sadarā dukkhavipākā āyatiṃ jātijarāmaraṇiyā.
வேதா³னி விசெய்ய கேவலானி, [ஸபி⁴யாதி ப⁴க³வா]
Vedāni viceyya kevalāni, [sabhiyāti bhagavā]
ஸப்³ப³வேத³னாஸு வீதராகோ³, ஸப்³ப³ங் வேத³மதிச்ச வேத³கூ³ ஸோதி.
Sabbavedanāsu vītarāgo, sabbaṃ vedamaticca vedagū soti.
வித்³வா ச வேதே³ஹி ஸமேச்ச த⁴ம்மந்தி. ஸமேச்ச அபி⁴ஸமேச்ச த⁴ம்மங். ஸப்³பே³ ஸங்கா²ரா அனிச்சாதி ஸமேச்ச அபி⁴ஸமேச்ச த⁴ம்மங்; ஸப்³பே³ ஸங்கா²ரா து³க்கா²தி ஸமேச்ச அபி⁴ஸமேச்ச த⁴ம்மங்; ஸப்³பே³ த⁴ம்மா அனத்தாதி ஸமேச்ச அபி⁴ஸமேச்ச த⁴ம்மங்; அவிஜ்ஜாபச்சயா ஸங்கா²ராதி ஸமேச்ச அபி⁴ஸமேச்ச த⁴ம்மங்; ஸங்கா²ரபச்சயா விஞ்ஞாணந்தி ஸமேச்ச அபி⁴ஸமேச்ச த⁴ம்மங்; விஞ்ஞாணபச்சயா நாமரூபந்தி…பே॰… நாமரூபபச்சயா ஸளாயதனந்தி… ஸளாயதனபச்சயா ப²ஸ்ஸோதி… ப²ஸ்ஸபச்சயா வேத³னாதி… வேத³னாபச்சயா தண்ஹாதி… தண்ஹாபச்சயா உபாதா³னந்தி… உபாதா³னபச்சயா ப⁴வோதி… ப⁴வபச்சயா ஜாதீதி… ஜாதிபச்சயா ஜராமரணந்தி ஸமேச்ச அபி⁴ஸமேச்ச த⁴ம்மங்; அவிஜ்ஜானிரோதா⁴ ஸங்கா²ரனிரோதோ⁴தி ஸமேச்ச அபி⁴ஸமேச்ச த⁴ம்மங்; ஸங்கா²ரனிரோதா⁴ விஞ்ஞாணனிரோதோ⁴தி ஸமேச்ச அபி⁴ஸமேச்ச த⁴ம்மங்; விஞ்ஞாணனிரோதா⁴ நாமரூபனிரோதோ⁴தி… நாமரூபனிரோதா⁴ ஸளாயதனநிரோதோ⁴தி… ஸளாயதனநிரோதா⁴ ப²ஸ்ஸனிரோதோ⁴தி… ப²ஸ்ஸனிரோதா⁴ வேத³னானிரோதோ⁴தி… வேத³னானிரோதா⁴ தண்ஹானிரோதோ⁴தி… தண்ஹானிரோதா⁴ உபாதா³னநிரோதோ⁴தி… உபாதா³னநிரோதா⁴ ப⁴வனிரோதோ⁴தி… ப⁴வனிரோதா⁴ ஜாதினிரோதோ⁴தி… ஜாதினிரோதா⁴ ஜராமரணனிரோதோ⁴தி ஸமேச்ச அபி⁴ஸமேச்ச த⁴ம்மங்; இத³ங் து³க்க²ந்தி ஸமேச்ச அபி⁴ஸமேச்ச த⁴ம்மங்; அயங் து³க்க²ஸமுத³யோதி… அயங் து³க்க²னிரோதோ⁴தி… அயங் து³க்க²னிரோத⁴கா³மினீ படிபதா³தி ஸமேச்ச அபி⁴ஸமேச்ச த⁴ம்மங்; இமே ஆஸவாதி ஸமேச்ச அபி⁴ஸமேச்ச த⁴ம்மங்; அயங் ஆஸவஸமுத³யோதி… அயங் ஆஸவனிரோதோ⁴தி… அயங் ஆஸவனிரோத⁴கா³மினீ படிபதா³தி ஸமேச்ச அபி⁴ஸமேச்ச த⁴ம்மங்; இமே த⁴ம்மா அபி⁴ஞ்ஞெய்யாதி ஸமேச்ச அபி⁴ஸமேச்ச த⁴ம்மங்; இமே த⁴ம்மா பரிஞ்ஞெய்யாதி… இமே த⁴ம்மா பஹாதப்³பா³தி… இமே த⁴ம்மா பா⁴வேதப்³பா³தி … இமே த⁴ம்மா ஸச்சி²காதப்³பா³தி ஸமேச்ச அபி⁴ஸமேச்ச த⁴ம்மங். ச²ன்னங் ப²ஸ்ஸாயதனானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச ஸமேச்ச அபி⁴ஸமேச்ச த⁴ம்மங். பஞ்சன்னங் உபாதா³னக்க²ந்தா⁴னங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச ஸமேச்ச அபி⁴ஸமேச்ச த⁴ம்மங். சதுன்னங் மஹாபூ⁴தானங் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச ஸமேச்ச அபி⁴ஸமேச்ச த⁴ம்மங். யங் கிஞ்சி ஸமுத³யத⁴ம்மங் ஸப்³ப³ங் தங் நிரோத⁴த⁴ம்மந்தி ஸமேச்ச அபி⁴ஸமேச்ச த⁴ம்மந்தி – வித்³வா ச வேதே³ஹி ஸமேச்ச த⁴ம்மங்.
Vidvāca vedehi samecca dhammanti. Samecca abhisamecca dhammaṃ. Sabbe saṅkhārā aniccāti samecca abhisamecca dhammaṃ; sabbe saṅkhārā dukkhāti samecca abhisamecca dhammaṃ; sabbe dhammā anattāti samecca abhisamecca dhammaṃ; avijjāpaccayā saṅkhārāti samecca abhisamecca dhammaṃ; saṅkhārapaccayā viññāṇanti samecca abhisamecca dhammaṃ; viññāṇapaccayā nāmarūpanti…pe… nāmarūpapaccayā saḷāyatananti… saḷāyatanapaccayā phassoti… phassapaccayā vedanāti… vedanāpaccayā taṇhāti… taṇhāpaccayā upādānanti… upādānapaccayā bhavoti… bhavapaccayā jātīti… jātipaccayā jarāmaraṇanti samecca abhisamecca dhammaṃ; avijjānirodhā saṅkhāranirodhoti samecca abhisamecca dhammaṃ; saṅkhāranirodhā viññāṇanirodhoti samecca abhisamecca dhammaṃ; viññāṇanirodhā nāmarūpanirodhoti… nāmarūpanirodhā saḷāyatananirodhoti… saḷāyatananirodhā phassanirodhoti… phassanirodhā vedanānirodhoti… vedanānirodhā taṇhānirodhoti… taṇhānirodhā upādānanirodhoti… upādānanirodhā bhavanirodhoti… bhavanirodhā jātinirodhoti… jātinirodhā jarāmaraṇanirodhoti samecca abhisamecca dhammaṃ; idaṃ dukkhanti samecca abhisamecca dhammaṃ; ayaṃ dukkhasamudayoti… ayaṃ dukkhanirodhoti… ayaṃ dukkhanirodhagāminī paṭipadāti samecca abhisamecca dhammaṃ; ime āsavāti samecca abhisamecca dhammaṃ; ayaṃ āsavasamudayoti… ayaṃ āsavanirodhoti… ayaṃ āsavanirodhagāminī paṭipadāti samecca abhisamecca dhammaṃ; ime dhammā abhiññeyyāti samecca abhisamecca dhammaṃ; ime dhammā pariññeyyāti… ime dhammā pahātabbāti… ime dhammā bhāvetabbāti … ime dhammā sacchikātabbāti samecca abhisamecca dhammaṃ. Channaṃ phassāyatanānaṃ samudayañca atthaṅgamañca assādañca ādīnavañca nissaraṇañca samecca abhisamecca dhammaṃ. Pañcannaṃ upādānakkhandhānaṃ samudayañca atthaṅgamañca assādañca ādīnavañca nissaraṇañca samecca abhisamecca dhammaṃ. Catunnaṃ mahābhūtānaṃ samudayañca atthaṅgamañca assādañca ādīnavañca nissaraṇañca samecca abhisamecca dhammaṃ. Yaṃ kiñci samudayadhammaṃ sabbaṃ taṃ nirodhadhammanti samecca abhisamecca dhammanti – vidvā ca vedehi samecca dhammaṃ.
ந உச்சாவசங் க³ச்ச²தி பூ⁴ரிபஞ்ஞோதி ந ஸத்தா²ரதோ ஸத்தா²ரங் க³ச்ச²தி, ந த⁴ம்மக்கா²னதோ த⁴ம்மக்கா²னங் க³ச்ச²தி, ந க³ணதோ க³ணங் க³ச்ச²தி, ந தி³ட்டி²யா தி³ட்டி²ங் க³ச்ச²தி, ந படிபதா³ய படிபத³ங் க³ச்ச²தி, ந மக்³க³தோ மக்³க³ங் க³ச்ச²தி. பூ⁴ரிபஞ்ஞோதி பூ⁴ரிபஞ்ஞோ மஹாபஞ்ஞோ புது²பஞ்ஞோ ஹாஸபஞ்ஞோ ஜவனபஞ்ஞோ திக்க²பஞ்ஞோ நிப்³பே³தி⁴கபஞ்ஞோ. பூ⁴ரி வுச்சதி பத²வீ. தாய பத²விஸமாய பஞ்ஞாய விபுலாய வித்த²தாய ஸமன்னாக³தோதி – ந உச்சாவசங் க³ச்ச²தி பூ⁴ரிபஞ்ஞோ.
Na uccāvacaṃ gacchati bhūripaññoti na satthārato satthāraṃ gacchati, na dhammakkhānato dhammakkhānaṃ gacchati, na gaṇato gaṇaṃ gacchati, na diṭṭhiyā diṭṭhiṃ gacchati, na paṭipadāya paṭipadaṃ gacchati, na maggato maggaṃ gacchati. Bhūripaññoti bhūripañño mahāpañño puthupañño hāsapañño javanapañño tikkhapañño nibbedhikapañño. Bhūri vuccati pathavī. Tāya pathavisamāya paññāya vipulāya vitthatāya samannāgatoti – na uccāvacaṃ gacchati bhūripañño.
தேனாஹ ப⁴க³வா –
Tenāha bhagavā –
‘‘ஸயங் ஸமாதா³ய வதானி ஜந்து, உச்சாவசங் க³ச்ச²தி ஸஞ்ஞஸத்தோ;
‘‘Sayaṃ samādāya vatāni jantu, uccāvacaṃ gacchati saññasatto;
வித்³வா ச வேதே³ஹி ஸமேச்ச த⁴ம்மங், ந உச்சாவசங் க³ச்ச²தி பூ⁴ரிபஞ்ஞோ’’தி.
Vidvā ca vedehi samecca dhammaṃ, na uccāvacaṃ gacchati bhūripañño’’ti.
28.
28.
ஸ ஸப்³ப³த⁴ம்மேஸு விஸேனிபூ⁴தோ, யங் கிஞ்சி தி³ட்ட²ங் வ ஸுதங் முதங் வா;
Sa sabbadhammesu visenibhūto,yaṃ kiñci diṭṭhaṃ va sutaṃ mutaṃ vā;
தமேவ த³ஸ்ஸிங் விவடங் சரந்தங், கேனீத⁴ லோகஸ்மி விகப்பயெய்ய.
Tamevadassiṃ vivaṭaṃ carantaṃ, kenīdha lokasmi vikappayeyya.
ஸ ஸப்³ப³த⁴ம்மேஸு விஸேனிபூ⁴தோ யங் கிஞ்சி தி³ட்ட²ங் வ ஸுதங் முதங் வாதி. ஸேனா வுச்சதி மாரஸேனா. காயது³ச்சரிதங் மாரஸேனா, வசீது³ச்சரிதங் மாரஸேனா, மனோது³ச்சரிதங் மாரஸேனா, ராகோ³ மாரஸேனா, தோ³ஸோ மாரஸேனா, மோஹோ மாரஸேனா, கோதோ⁴ மாரஸேனா, உபனாஹோ…பே॰… ஸப்³பா³குஸலாபி⁴ஸங்கா²ரா மாரஸேனா.
Sa sabbadhammesu visenibhūto yaṃ kiñci diṭṭhaṃ va sutaṃ mutaṃ vāti. Senā vuccati mārasenā. Kāyaduccaritaṃ mārasenā, vacīduccaritaṃ mārasenā, manoduccaritaṃ mārasenā, rāgo mārasenā, doso mārasenā, moho mārasenā, kodho mārasenā, upanāho…pe… sabbākusalābhisaṅkhārā mārasenā.
வுத்தஞ்ஹேதங் ப⁴க³வதா –
Vuttañhetaṃ bhagavatā –
‘‘காமா தே பட²மா ஸேனா, து³தியா அரதி வுச்சதி;
‘‘Kāmā te paṭhamā senā, dutiyā arati vuccati;
ததியா கு²ப்பிபாஸா தே, சதுத்தீ² தண்ஹா வுச்சதி.
Tatiyā khuppipāsā te, catutthī taṇhā vuccati.
‘‘பஞ்சமீ தி²னமித்³த⁴ங் தே, ச²ட்டா² பீ⁴ரூ பவுச்சதி;
‘‘Pañcamī thinamiddhaṃ te, chaṭṭhā bhīrū pavuccati;
ஸத்தமீ விசிகிச்சா² தே, மக்கோ² த²ம்போ⁴ தே அட்ட²மோ.
Sattamī vicikicchā te, makkho thambho te aṭṭhamo.
‘‘லாபோ⁴ ஸிலோகோ ஸக்காரோ, மிச்சா²லத்³தோ⁴ ச யோ யஸோ;
‘‘Lābho siloko sakkāro, micchāladdho ca yo yaso;
யோ சத்தானங் ஸமுக்கங்ஸே, பரே ச அவஜானதி.
Yo cattānaṃ samukkaṃse, pare ca avajānati.
‘‘ஏஸா நமுசி தே ஸேனா, கண்ஹஸ்ஸாபி⁴ப்பஹாரினீ;
‘‘Esā namuci te senā, kaṇhassābhippahārinī;
ந நங் அஸுரோ ஜினாதி, ஜெத்வாவ லப⁴தே ஸுக²’’ந்தி.
Na naṃ asuro jināti, jetvāva labhate sukha’’nti.
யதோ சதூஹி அரியமக்³கே³ஹி ஸப்³பா³ ச மாரஸேனா ஸப்³பே³ ச படிஸேனிகரா கிலேஸா ஜிதா ச பராஜிதா ச ப⁴க்³கா³ விப்பலுக்³கா³ பரம்முகா², ஸோ வுச்சதி விஸேனிபூ⁴தோ. ஸோ தி³ட்டே² விஸேனிபூ⁴தோ, ஸுதே விஸேனிபூ⁴தோ, முதே விஸேனிபூ⁴தோ, விஞ்ஞாதே விஸேனிபூ⁴தோதி – ஸ ஸப்³ப³த⁴ம்மேஸு விஸேனிபூ⁴தோ யங் கிஞ்சி தி³ட்ட²ங் வ ஸுதங் முதங் வா.
Yato catūhi ariyamaggehi sabbā ca mārasenā sabbe ca paṭisenikarā kilesā jitā ca parājitā ca bhaggā vippaluggā parammukhā, so vuccati visenibhūto. So diṭṭhe visenibhūto, sute visenibhūto, mute visenibhūto, viññāte visenibhūtoti – sa sabbadhammesu visenibhūto yaṃ kiñci diṭṭhaṃ va sutaṃ mutaṃ vā.
தமேவ த³ஸ்ஸிங் விவடங் சரந்தந்தி. தமேவ ஸுத்³த⁴த³ஸ்ஸிங் விஸுத்³த⁴த³ஸ்ஸிங் பரிஸுத்³த⁴த³ஸ்ஸிங் வோதா³தத³ஸ்ஸிங் பரியோதா³தத³ஸ்ஸிங். அத² வா, ஸுத்³த⁴த³ஸ்ஸனங் விஸுத்³த⁴த³ஸ்ஸனங் பரிஸுத்³த⁴த³ஸ்ஸனங் வோதா³தத³ஸ்ஸனங் பரியோதா³தத³ஸ்ஸனங். விவடந்தி தண்ஹாச²த³னங் தி³ட்டி²ச²த³னங் கிலேஸச²த³னங் து³ச்சரிதச²த³னங் அவிஜ்ஜாச²த³னங். தானி ச²த³னானி விவடானி ஹொந்தி வித்³த⁴ங்ஸிதானி உக்³கா⁴டிதானி ஸமுக்³கா⁴டிதானி பஹீனானி ஸமுச்சி²ன்னானி வூபஸந்தானி படிபஸ்ஸத்³தா⁴னி அப⁴ப்³பு³ப்பத்திகானி ஞாணக்³கி³னா த³ட்³டா⁴னி. சரந்தந்தி சரந்தங் விசரந்தங் விஹரந்தங் இரியந்தங் வத்தெந்தங் பாலெந்தங் யபெந்தங் யாபெந்தந்தி – தமேவ த³ஸ்ஸிங் விவடங் சரந்தங்.
Tamevadassiṃ vivaṭaṃ carantanti. Tameva suddhadassiṃ visuddhadassiṃ parisuddhadassiṃ vodātadassiṃ pariyodātadassiṃ. Atha vā, suddhadassanaṃ visuddhadassanaṃ parisuddhadassanaṃ vodātadassanaṃ pariyodātadassanaṃ. Vivaṭanti taṇhāchadanaṃ diṭṭhichadanaṃ kilesachadanaṃ duccaritachadanaṃ avijjāchadanaṃ. Tāni chadanāni vivaṭāni honti viddhaṃsitāni ugghāṭitāni samugghāṭitāni pahīnāni samucchinnāni vūpasantāni paṭipassaddhāni abhabbuppattikāni ñāṇagginā daḍḍhāni. Carantanti carantaṃ vicarantaṃ viharantaṃ iriyantaṃ vattentaṃ pālentaṃ yapentaṃ yāpentanti – tameva dassiṃ vivaṭaṃ carantaṃ.
கேனீத⁴ லோகஸ்மி விகப்பயெய்யாதி. கப்பாதி த்³வே கப்பா – தண்ஹாகப்போ ச தி³ட்டி²கப்போ ச…பே॰… அயங் தண்ஹாகப்போ…பே॰… அயங் தி³ட்டி²கப்போ. தஸ்ஸ தண்ஹாகப்போ பஹீனோ, தி³ட்டி²கப்போ படினிஸ்ஸட்டோ². தண்ஹாகப்பஸ்ஸ பஹீனத்தா தி³ட்டி²கப்பஸ்ஸ படினிஸ்ஸட்ட²த்தா கேன ராகே³ன கப்பெய்ய, கேன தோ³ஸேன கப்பெய்ய, கேன மோஹேன கப்பெய்ய, கேன மானேன கப்பெய்ய, காய தி³ட்டி²யா கப்பெய்ய, கேன உத்³த⁴ச்சேன கப்பெய்ய, காய விசிகிச்சா²ய கப்பெய்ய, கேஹி அனுஸயேஹி கப்பெய்ய – ரத்தோதி வா து³ட்டோ²தி வா மூள்ஹோதி வா வினிப³த்³தோ⁴தி வா பராமட்டோ²தி வா விக்கே²பக³தோதி வா அனிட்ட²ங்க³தோதி வா தா²மக³தோதி வா. தே அபி⁴ஸங்கா²ரா பஹீனா. அபி⁴ஸங்கா²ரானங் பஹீனத்தா க³தியோ கேன கப்பெய்ய – நேரயிகோதி வா திரச்சா²னயோனிகோதி வா பெத்திவிஸயிகோதி வா மனுஸ்ஸோதி வா தே³வோதி வா ரூபீதி வா அரூபீதி வா ஸஞ்ஞீதி வா அஸஞ்ஞீதி வா நேவஸஞ்ஞீனாஸஞ்ஞீதி வா. ஸோ ஹேது நத்தி², பச்சயோ நத்தி², காரணங் நத்தி², யேன கப்பெய்ய விகப்பெய்ய விகப்பங் ஆபஜ்ஜெய்ய. லோகஸ்மிந்தி அபாயலோகே மனுஸ்ஸலோகே தே³வலோகே க²ந்த⁴லோகே தா⁴துலோகே ஆயதனலோகேதி – கேனீத⁴ லோகஸ்மிங் விகப்பயெய்ய.
Kenīdhalokasmi vikappayeyyāti. Kappāti dve kappā – taṇhākappo ca diṭṭhikappo ca…pe… ayaṃ taṇhākappo…pe… ayaṃ diṭṭhikappo. Tassa taṇhākappo pahīno, diṭṭhikappo paṭinissaṭṭho. Taṇhākappassa pahīnattā diṭṭhikappassa paṭinissaṭṭhattā kena rāgena kappeyya, kena dosena kappeyya, kena mohena kappeyya, kena mānena kappeyya, kāya diṭṭhiyā kappeyya, kena uddhaccena kappeyya, kāya vicikicchāya kappeyya, kehi anusayehi kappeyya – rattoti vā duṭṭhoti vā mūḷhoti vā vinibaddhoti vā parāmaṭṭhoti vā vikkhepagatoti vā aniṭṭhaṅgatoti vā thāmagatoti vā. Te abhisaṅkhārā pahīnā. Abhisaṅkhārānaṃ pahīnattā gatiyo kena kappeyya – nerayikoti vā tiracchānayonikoti vā pettivisayikoti vā manussoti vā devoti vā rūpīti vā arūpīti vā saññīti vā asaññīti vā nevasaññīnāsaññīti vā. So hetu natthi, paccayo natthi, kāraṇaṃ natthi, yena kappeyya vikappeyya vikappaṃ āpajjeyya. Lokasminti apāyaloke manussaloke devaloke khandhaloke dhātuloke āyatanaloketi – kenīdha lokasmiṃ vikappayeyya.
தேனாஹ ப⁴க³வா –
Tenāha bhagavā –
‘‘ஸ ஸப்³ப³த⁴ம்மேஸு விஸேனிபூ⁴தோ, யங் கிஞ்சி தி³ட்ட²ங் வ ஸுதங் முதங் வா;
‘‘Sa sabbadhammesu visenibhūto, yaṃ kiñci diṭṭhaṃ va sutaṃ mutaṃ vā;
தமேவ த³ஸ்ஸிங் விவடங் சரந்தங், கேனீத⁴ லோகஸ்மி விகப்பயெய்யா’’தி.
Tameva dassiṃ vivaṭaṃ carantaṃ, kenīdha lokasmi vikappayeyyā’’ti.
29.
29.
ந கப்பயந்தி ந புரெக்க²ரொந்தி, அச்சந்தஸுத்³தீ⁴தி ந தே வத³ந்தி;
Na kappayanti na purekkharonti, accantasuddhīti na te vadanti;
ஆதா³னக³ந்த²ங் க³தி²தங் விஸஜ்ஜ, ஆஸங் ந குப்³ப³ந்தி குஹிஞ்சி லோகே.
Ādānaganthaṃ gathitaṃ visajja, āsaṃ na kubbanti kuhiñci loke.
ந கப்பயந்தி ந புரெக்க²ரொந்தீதி. கப்பாதி த்³வே கப்பா – தண்ஹாகப்போ ச தி³ட்டி²கப்போ ச…பே॰… அயங் தண்ஹாகப்போ…பே॰… அயங் தி³ட்டி²கப்போ. தேஸங் தண்ஹாகப்போ பஹீனோ, தி³ட்டி²கப்போ படினிஸ்ஸட்டோ². தண்ஹாகப்பஸ்ஸ பஹீனத்தா, தி³ட்டி²கப்பஸ்ஸ படினிஸ்ஸட்ட²த்தா தண்ஹாகப்பங் வா தி³ட்டி²கப்பங் வா ந கப்பெந்தி ந ஜனெந்தி ந ஸஞ்ஜனெந்தி ந நிப்³ப³த்தெந்தி நாபி⁴னிப்³ப³த்தெந்தீதி – ந கப்பயந்தி . ந புரெக்க²ரொந்தீதி. புரெக்கா²ராதி த்³வே புரெக்கா²ரா – தண்ஹாபுரெக்கா²ரோ ச தி³ட்டி²புரெக்கா²ரோ ச…பே॰… அயங் தண்ஹாபுரெக்கா²ரோ…பே॰… அயங் தி³ட்டி²புரெக்கா²ரோ. தேஸங் தண்ஹாபுரெக்கா²ரோ பஹீனோ, தி³ட்டி²புரெக்கா²ரோ படினிஸ்ஸட்டோ². தண்ஹாபுரெக்கா²ரஸ்ஸ பஹீனத்தா, தி³ட்டி²புரெக்கா²ரஸ்ஸ படினிஸ்ஸட்ட²த்தா ந தண்ஹங் வா ந தி³ட்டி²ங் வா புரதோ கத்வா சரந்தி, ந தண்ஹாத⁴ஜா ந தண்ஹாகேதூ ந தண்ஹாதி⁴பதெய்யா, ந தி³ட்டி²த⁴ஜா ந தி³ட்டி²கேதூ ந தி³ட்டா²தி⁴பதெய்யா, ந தண்ஹாய வா ந தி³ட்டி²யா வா பரிவாரிதா சரந்தீதி – ந கப்பயந்தி ந புரெக்க²ரொந்தி.
Na kappayanti na purekkharontīti. Kappāti dve kappā – taṇhākappo ca diṭṭhikappo ca…pe… ayaṃ taṇhākappo…pe… ayaṃ diṭṭhikappo. Tesaṃ taṇhākappo pahīno, diṭṭhikappo paṭinissaṭṭho. Taṇhākappassa pahīnattā, diṭṭhikappassa paṭinissaṭṭhattā taṇhākappaṃ vā diṭṭhikappaṃ vā na kappenti na janenti na sañjanenti na nibbattenti nābhinibbattentīti – na kappayanti . Na purekkharontīti. Purekkhārāti dve purekkhārā – taṇhāpurekkhāro ca diṭṭhipurekkhāro ca…pe… ayaṃ taṇhāpurekkhāro…pe… ayaṃ diṭṭhipurekkhāro. Tesaṃ taṇhāpurekkhāro pahīno, diṭṭhipurekkhāro paṭinissaṭṭho. Taṇhāpurekkhārassa pahīnattā, diṭṭhipurekkhārassa paṭinissaṭṭhattā na taṇhaṃ vā na diṭṭhiṃ vā purato katvā caranti, na taṇhādhajā na taṇhāketū na taṇhādhipateyyā, na diṭṭhidhajā na diṭṭhiketū na diṭṭhādhipateyyā, na taṇhāya vā na diṭṭhiyā vā parivāritā carantīti – na kappayanti na purekkharonti.
அச்சந்தஸுத்³தீ⁴தி ந தே வத³ந்தீதி அச்சந்தஸுத்³தி⁴ங் ஸங்ஸாரஸுத்³தி⁴ங் அகிரியதி³ட்டி²ங் ஸஸ்ஸதவாத³ங் ந வத³ந்தி ந கதெ²ந்தி ந ப⁴ணந்தி ந தீ³பயந்தி ந வோஹரந்தீதி – அச்சந்தஸுத்³தீ⁴தி ந தே வத³ந்தி.
Accantasuddhīti na te vadantīti accantasuddhiṃ saṃsārasuddhiṃ akiriyadiṭṭhiṃ sassatavādaṃ na vadanti na kathenti na bhaṇanti na dīpayanti na voharantīti – accantasuddhīti na te vadanti.
ஆதா³னக³ந்த²ங் க³தி²தங் விஸஜ்ஜாதி. க³ந்தா²தி சத்தாரோ க³ந்தா² – அபி⁴ஜ்ஜா² காயக³ந்தோ², ப்³யாபாதோ³ காயக³ந்தோ², ஸீலப்³ப³தபராமாஸோ காயக³ந்தோ², இத³ங்ஸச்சாபி⁴னிவேஸோ காயக³ந்தோ². அத்தனோ தி³ட்டி²யா ராகோ³ அபி⁴ஜ்ஜா² காயக³ந்தோ²; பரவாதே³ஸு ஆகா⁴தோ அப்பச்சயோ ப்³யாபாதோ³ காயக³ந்தோ²; அத்தனோ ஸீலங் வா வதங் வா ஸீலவதங் வா பராமஸந்தீதி ஸீலப்³ப³தபராமாஸோ காயக³ந்தோ², அத்தனோ தி³ட்டி² இத³ங்ஸச்சாபி⁴னிவேஸோ காயக³ந்தோ². கிங்காரணா வுச்சதி ஆதா³னக³ந்தோ²? தேஹி க³ந்தே²ஹி ரூபங் ஆதி³யந்தி உபாதி³யந்தி க³ண்ஹந்தி பராமஸந்தி அபி⁴னிவிஸந்தி; வேத³னங்…பே॰… ஸஞ்ஞங்… ஸங்கா²ரே… விஞ்ஞாணங்… க³திங் … உபபத்திங்… படிஸந்தி⁴ங்… ப⁴வங்… ஸங்ஸாரவட்டங் ஆதி³யந்தி உபாதி³யந்தி க³ண்ஹந்தி பராமஸந்தி அபி⁴னிவிஸந்தி. தங்காரணா வுச்சதி ஆதா³னக³ந்தோ². விஸஜ்ஜாதி க³ந்தே² வோஸஜ்ஜித்வா வா – விஸஜ்ஜ. அத² வா க³ந்தே² க³தி⁴தே க³ந்தி²தே ப³ந்தே⁴ விப³ந்தே⁴ ஆப³ந்தே⁴ லக்³கே³ லக்³கி³தே பலிபு³த்³தே⁴ ப³ந்த⁴னே போடயித்வா – 21 விஸஜ்ஜ. யதா² வய்ஹங் வா ரத²ங் வா ஸகடங் வா ஸந்த³மானிகங் வா ஸஜ்ஜங் விஸஜ்ஜங் கரொந்தி விகோபெந்தி; ஏவமேவ க³ந்தே² வோஸஜ்ஜித்வா – விஸஜ்ஜ. அத² வா க³ந்தே² க³தி⁴தே க³ந்தி²தே ப³ந்தே⁴ விப³ந்தே⁴ ஆப³ந்தே⁴ லக்³கே³ லக்³கி³தே பலிபு³த்³தே⁴ ப³ந்த⁴னே போடயித்வா விஸஜ்ஜாதி – ஆதா³னக³ந்த²ங் க³தி²தங் விஸஜ்ஜ.
Ādānaganthaṃgathitaṃ visajjāti. Ganthāti cattāro ganthā – abhijjhā kāyagantho, byāpādo kāyagantho, sīlabbataparāmāso kāyagantho, idaṃsaccābhiniveso kāyagantho. Attano diṭṭhiyā rāgo abhijjhā kāyagantho; paravādesu āghāto appaccayo byāpādo kāyagantho; attano sīlaṃ vā vataṃ vā sīlavataṃ vā parāmasantīti sīlabbataparāmāso kāyagantho, attano diṭṭhi idaṃsaccābhiniveso kāyagantho. Kiṃkāraṇā vuccati ādānagantho? Tehi ganthehi rūpaṃ ādiyanti upādiyanti gaṇhanti parāmasanti abhinivisanti; vedanaṃ…pe… saññaṃ… saṅkhāre… viññāṇaṃ… gatiṃ … upapattiṃ… paṭisandhiṃ… bhavaṃ… saṃsāravaṭṭaṃ ādiyanti upādiyanti gaṇhanti parāmasanti abhinivisanti. Taṃkāraṇā vuccati ādānagantho. Visajjāti ganthe vosajjitvā vā – visajja. Atha vā ganthe gadhite ganthite bandhe vibandhe ābandhe lagge laggite palibuddhe bandhane poṭayitvā – 22 visajja. Yathā vayhaṃ vā rathaṃ vā sakaṭaṃ vā sandamānikaṃ vā sajjaṃ visajjaṃ karonti vikopenti; evameva ganthe vosajjitvā – visajja. Atha vā ganthe gadhite ganthite bandhe vibandhe ābandhe lagge laggite palibuddhe bandhane poṭayitvā visajjāti – ādānaganthaṃ gathitaṃ visajja.
ஆஸங் ந குப்³ப³ந்தி குஹிஞ்சி லோகேதி. ஆஸா வுச்சதி தண்ஹா யோ ராகோ³ ஸாராகோ³…பே॰… அபி⁴ஜ்ஜா² லோபோ⁴ அகுஸலமூலங். ஆஸங் ந குப்³ப³ந்தீதி ஆஸங் ந குப்³ப³ந்தி ந ஜனெந்தி ந ஸஞ்ஜனெந்தி ந நிப்³ப³த்தெந்தி ந அபி⁴னிப்³ப³த்தெந்தி. குஹிஞ்சீதி குஹிஞ்சி கிம்ஹிசி கத்த²சி அஜ்ஜ²த்தங் வா ப³ஹித்³தா⁴ வா அஜ்ஜ²த்தப³ஹித்³தா⁴ வா. லோகேதி அபாயலோகே…பே॰… ஆயதனலோகேதி – ஆஸங் ந குப்³ப³ந்தி குஹிஞ்சி லோகே.
Āsaṃ na kubbanti kuhiñci loketi. Āsā vuccati taṇhā yo rāgo sārāgo…pe… abhijjhā lobho akusalamūlaṃ. Āsaṃ na kubbantīti āsaṃ na kubbanti na janenti na sañjanenti na nibbattenti na abhinibbattenti. Kuhiñcīti kuhiñci kimhici katthaci ajjhattaṃ vā bahiddhā vā ajjhattabahiddhā vā. Loketi apāyaloke…pe… āyatanaloketi – āsaṃ na kubbanti kuhiñci loke.
தேனாஹ ப⁴க³வா –
Tenāha bhagavā –
‘‘ந கப்பயந்தி ந புரெக்க²ரொந்தி, அச்சந்தஸுத்³தீ⁴தி ந தே வத³ந்தி;
‘‘Na kappayanti na purekkharonti, accantasuddhīti na te vadanti;
ஆதா³னக³ந்த²ங் க³தி²தங் விஸஜ்ஜ, ஆஸங் ந குப்³ப³ந்தி குஹிஞ்சி லோகே’’தி.
Ādānaganthaṃ gathitaṃ visajja, āsaṃ na kubbanti kuhiñci loke’’ti.
30.
30.
ஸீமாதிகோ³ ப்³ராஹ்மணோ தஸ்ஸ நத்தி², ஞத்வா ச தி³ஸ்வா ச ஸமுக்³க³ஹீதங்;
Sīmātigobrāhmaṇo tassa natthi, ñatvā ca disvā ca samuggahītaṃ;
ந ராக³ராகீ³ ந விராக³ரத்தோ, தஸ்ஸீத⁴ நத்தி² பரமுக்³க³ஹீதங்.
Na rāgarāgī na virāgaratto, tassīdha natthi paramuggahītaṃ.
ஸீமாதிகோ³ ப்³ராஹ்மணோ தஸ்ஸ நத்தி², ஞத்வா ச தி³ஸ்வா ச ஸமுக்³க³ஹீதந்தி. ஸீமாதி சதஸ்ஸோ ஸீமாயோ – ஸக்காயதி³ட்டி², விசிகிச்சா², ஸீலப்³ப³தபராமாஸோ, தி³ட்டா²னுஸயோ, விசிகிச்சா²னுஸயோ, ததே³கட்டா² ச கிலேஸா – அயங் பட²மா ஸீமா. ஓளாரிகங் காமராக³ஸஞ்ஞோஜனங், படிக⁴ஸஞ்ஞோஜனங், ஓளாரிகோ காமராகா³னுஸயோ, படிகா⁴னுஸயோ, ததே³கட்டா² ச கிலேஸா – அயங் து³தியா ஸீமா. அனுஸஹக³தங் காமராக³ஸஞ்ஞோஜனங், படிக⁴ஸஞ்ஞோஜனங், அனுஸஹக³தோ காமராகா³னுஸயோ, படிகா⁴னுஸயோ, ததே³கட்டா² ச கிலேஸா – அயங் ததியா ஸீமா. ரூபராகோ³ அரூபராகோ³ மானோ உத்³த⁴ச்சங் அவிஜ்ஜா, மானானுஸயோ ப⁴வராகா³னுஸயோ அவிஜ்ஜானுஸயோ, ததே³கட்டா² ச கிலேஸா – அயங் சதுத்தா² ஸீமா. யதோ ச சதூஹி அரியமக்³கே³ஹி இமா சதஸ்ஸோ ஸீமாயோ அதிக்கந்தோ ஹோதி ஸமதிக்கந்தோ வீதிவத்தோ, ஸோ வுச்சதி ஸீமாதிகோ³. ப்³ராஹ்மணோதி ஸத்தன்னங் த⁴ம்மானங் பா³ஹிதத்தா ப்³ராஹ்மணோ – ஸக்காயதி³ட்டி² பா³ஹிதா ஹோதி, விசிகிச்சா² பா³ஹிதா ஹோதி , ஸீலப்³ப³தபராமாஸோ பா³ஹிதோ ஹோதி…பே॰… அஸிதோ தாதி³ பவுச்சதே ஸ ப்³ரஹ்மா. தஸ்ஸாதி அரஹதோ கீ²ணாஸவஸ்ஸ.
Sīmātigobrāhmaṇo tassa natthi, ñatvā ca disvā ca samuggahītanti. Sīmāti catasso sīmāyo – sakkāyadiṭṭhi, vicikicchā, sīlabbataparāmāso, diṭṭhānusayo, vicikicchānusayo, tadekaṭṭhā ca kilesā – ayaṃ paṭhamā sīmā. Oḷārikaṃ kāmarāgasaññojanaṃ, paṭighasaññojanaṃ, oḷāriko kāmarāgānusayo, paṭighānusayo, tadekaṭṭhā ca kilesā – ayaṃ dutiyā sīmā. Anusahagataṃ kāmarāgasaññojanaṃ, paṭighasaññojanaṃ, anusahagato kāmarāgānusayo, paṭighānusayo, tadekaṭṭhā ca kilesā – ayaṃ tatiyā sīmā. Rūparāgo arūparāgo māno uddhaccaṃ avijjā, mānānusayo bhavarāgānusayo avijjānusayo, tadekaṭṭhā ca kilesā – ayaṃ catutthā sīmā. Yato ca catūhi ariyamaggehi imā catasso sīmāyo atikkanto hoti samatikkanto vītivatto, so vuccati sīmātigo. Brāhmaṇoti sattannaṃ dhammānaṃ bāhitattā brāhmaṇo – sakkāyadiṭṭhi bāhitā hoti, vicikicchā bāhitā hoti , sīlabbataparāmāso bāhito hoti…pe… asito tādi pavuccate sa brahmā. Tassāti arahato khīṇāsavassa.
ஞத்வாதி பரசித்தஞாணேன வா ஞத்வா புப்³பே³னிவாஸானுஸ்ஸதிஞாணேன வா ஞத்வா. தி³ஸ்வாதி மங்ஸசக்கு²னா வா தி³ஸ்வா தி³ப்³ப³சக்கு²னா வா தி³ஸ்வா. ஸீமாதிகோ³ ப்³ராஹ்மணோ தஸ்ஸ நத்தி², ஞத்வா ச தி³ஸ்வா ச ஸமுக்³க³ஹீதந்தி. தஸ்ஸ இத³ங் பரமங் அக்³க³ங் ஸெட்ட²ங் விஸிட்ட²ங் 23 பாமொக்க²ங் உத்தமங் பவரந்தி க³ஹிதங் பராமட்ட²ங் அபி⁴னிவிட்ட²ங் அஜ்ஜோ²ஸிதங் அதி⁴முத்தங் நத்தி² ந ஸந்தி ந ஸங்விஜ்ஜதி நுபலப்³ப⁴தி, பஹீனங் ஸமுச்சி²ன்னங் வூபஸந்தங் படிபஸ்ஸத்³த⁴ங் அப⁴ப்³பு³ப்பத்திகங் ஞாணக்³கி³னா த³ட்³ட⁴ந்தி – ஸீமாதிகோ³ ப்³ராஹ்மணோ தஸ்ஸ நத்தி² ஞத்வா ச தி³ஸ்வா ச ஸமுக்³க³ஹீதங்.
Ñatvāti paracittañāṇena vā ñatvā pubbenivāsānussatiñāṇena vā ñatvā. Disvāti maṃsacakkhunā vā disvā dibbacakkhunā vā disvā. Sīmātigo brāhmaṇo tassa natthi, ñatvāca disvā ca samuggahītanti. Tassa idaṃ paramaṃ aggaṃ seṭṭhaṃ visiṭṭhaṃ 24 pāmokkhaṃ uttamaṃ pavaranti gahitaṃ parāmaṭṭhaṃ abhiniviṭṭhaṃ ajjhositaṃ adhimuttaṃ natthi na santi na saṃvijjati nupalabbhati, pahīnaṃ samucchinnaṃ vūpasantaṃ paṭipassaddhaṃ abhabbuppattikaṃ ñāṇagginā daḍḍhanti – sīmātigo brāhmaṇo tassa natthi ñatvā ca disvā ca samuggahītaṃ.
ந ராக³ராகீ³ ந விராக³ரத்தோதி. ராக³ரத்தா வுச்சந்தி யே பஞ்சஸு காமகு³ணேஸு ரத்தா கி³த்³தா⁴ க³தி⁴தா முச்சி²தா அஜ்ஜோ²ஸன்னா லக்³கா³ லக்³கி³தா பலிபு³த்³தா⁴. விராக³ரத்தா வுச்சந்தி யே ரூபாவசரஅரூபாவசரஸமாபத்தீஸு ரத்தா கி³த்³தா⁴ க³தி⁴தா முச்சி²தா அஜ்ஜோ²ஸன்னா லக்³கா³ லக்³கி³தா பலிபு³த்³தா⁴. ந ராக³ராகீ³ ந விராக³ரத்தோதி யதோ காமராகோ³ ச ரூபராகோ³ ச அரூபராகோ³ ச பஹீனா ஹொந்தி உச்சி²ன்னமூலா தாலாவத்து²கதா அனபா⁴வங்கதா 25 ஆயதிங் அனுப்பாத³த⁴ம்மா. எத்தாவதா ந ராக³ராகீ³ ந விராக³ரத்தோ.
Na rāgarāgī na virāgarattoti. Rāgarattā vuccanti ye pañcasu kāmaguṇesu rattā giddhā gadhitā mucchitā ajjhosannā laggā laggitā palibuddhā. Virāgarattā vuccanti ye rūpāvacaraarūpāvacarasamāpattīsu rattā giddhā gadhitā mucchitā ajjhosannā laggā laggitā palibuddhā. Na rāgarāgī na virāgarattoti yato kāmarāgo ca rūparāgo ca arūparāgo ca pahīnā honti ucchinnamūlā tālāvatthukatā anabhāvaṃkatā 26 āyatiṃ anuppādadhammā. Ettāvatā na rāgarāgī na virāgaratto.
தஸ்ஸீத⁴ நத்தி² பரமுக்³க³ஹீதந்தி. தஸ்ஸாதி அரஹதோ கீ²ணாஸவஸ்ஸ. தஸ்ஸ இத³ங் பரமங் அக்³க³ங் ஸெட்ட²ங் விஸிட்ட²ங் பாமொக்க²ங் உத்தமங் பவரந்தி க³ஹிதங் பராமட்ட²ங் அபி⁴னிவிட்ட²ங் அஜ்ஜோ²ஸிதங் அதி⁴முத்தங் நத்தி² ந ஸந்தி ந ஸங்விஜ்ஜதி நுபலப்³ப⁴தி, பஹீனங் ஸமுச்சி²ன்னங் வூபஸந்தங் படிபஸ்ஸத்³த⁴ங் அப⁴ப்³பு³ப்பத்திகங் ஞாணக்³கி³னா த³ட்³ட⁴ந்தி – தஸ்ஸீத⁴ நத்தி² பரமுக்³க³ஹீதங்.
Tassīdhanatthi paramuggahītanti. Tassāti arahato khīṇāsavassa. Tassa idaṃ paramaṃ aggaṃ seṭṭhaṃ visiṭṭhaṃ pāmokkhaṃ uttamaṃ pavaranti gahitaṃ parāmaṭṭhaṃ abhiniviṭṭhaṃ ajjhositaṃ adhimuttaṃ natthi na santi na saṃvijjati nupalabbhati, pahīnaṃ samucchinnaṃ vūpasantaṃ paṭipassaddhaṃ abhabbuppattikaṃ ñāṇagginā daḍḍhanti – tassīdha natthi paramuggahītaṃ.
தேனாஹ ப⁴க³வா –
Tenāha bhagavā –
‘‘ஸீமாதிகோ³ ப்³ராஹ்மணோ தஸ்ஸ நத்தி², ஞத்வா ச தி³ஸ்வா ச ஸமுக்³க³ஹீதங்;
‘‘Sīmātigo brāhmaṇo tassa natthi, ñatvā ca disvā ca samuggahītaṃ;
ந ராக³ராகீ³ ந விராக³ரத்தோ, தஸ்ஸீத⁴ நத்தி² பரமுக்³க³ஹீத’’ந்தி.
Na rāgarāgī na virāgaratto, tassīdha natthi paramuggahīta’’nti.
ஸுத்³த⁴ட்ட²கஸுத்தனித்³தே³ஸோ சதுத்தோ².
Suddhaṭṭhakasuttaniddeso catuttho.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / மஹானித்³தே³ஸ-அட்ட²கதா² • Mahāniddesa-aṭṭhakathā / 4. ஸுத்³த⁴ட்ட²கஸுத்தனித்³தே³ஸவண்ணனா • 4. Suddhaṭṭhakasuttaniddesavaṇṇanā
