Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā

[535] 3. суд̇хаабхож̇анаж̇аад̇агаван̣н̣анаа

[535] 3. Sudhābhojanajātakavaṇṇanā

нзва гин̣аами наби виггин̣аамийд̇и ид̣̇ам̣ сад̇т̇аа ж̇зд̇аванз вихаранд̇о згам̣ д̣̇аанаж̇жхаасаяам̣ бхигкум̣ аараб̣бха гат̇зси. со гира саавад̇т̇ияам̣ зго гулабуд̇д̇о худ̇ваа сад̇т̇у д̇хаммагат̇ам̣ суд̇ваа басаннажид̇д̇о баб̣б̣аж̇ид̇ваа сийлзсу барибуурагаарий д̇худ̇ан̇г̇аг̇ун̣асаманнааг̇ад̇о саб̣рахмажаарийсу бавад̇д̇амзд̇д̇ажид̇д̇о д̣̇ивасасса д̇игкад̇д̇ум̣ б̣уд̣̇д̇хад̇хаммасан̇гхубадтаанз аббамад̇д̇о аажаарасамбанно д̣̇аанаж̇жхаасаяо ахоси. сааран̣ийяад̇хаммабуураго ад̇д̇анаа лад̣̇д̇хам̣ бадиг̇г̇аахагзсу виж̇ж̇амаанзсу чиннабхад̇д̇о худ̇вааби д̣̇зд̇иязва, д̇асмаа д̇асса д̣̇аанаж̇жхаасаяад̣̇аанаабхирад̇абхааво бхигкусан̇гхз баагадо ахоси. ат̇згад̣̇ивасам̣ бхигкуу д̇хаммасабхааяам̣ гат̇ам̣ самудтаабзсум̣, ‘‘аавусо, асуго наама бхигку д̣̇аанаж̇жхаасаяо д̣̇аанаабхирад̇о ад̇д̇анаа лад̣̇д̇хам̣ басад̇амад̇д̇абаанийяамби лобхам̣ чинд̣̇ид̇ваа саб̣рахмажаарийнам̣ д̣̇зд̇и, б̣од̇хисад̇д̇ассзвасса аж̇жхаасаяо’’д̇и. сад̇т̇аа д̇ам̣ гат̇ам̣ д̣̇иб̣б̣ааяа сод̇ад̇хаад̇уяаа суд̇ваа г̇анд̇хагудид̇о нигкамид̇ваа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘аяам̣, бхигкавз, бхигку буб̣б̣з ад̣̇аанасийло мажчарий д̇ин̣аг̇г̇зна д̇злаб̣инд̣̇умби ад̣̇аад̇аа ахоси, ат̇а нам̣ ахам̣ д̣̇амзд̇ваа ниб̣б̣исзванам̣ гад̇ваа д̣̇аанапалам̣ ван̣н̣зд̇ваа д̣̇аанз бад̇идтаабзсим̣, со ‘басад̇амад̇д̇ам̣ уд̣̇агамби лабхид̇ваа ад̣̇ад̇ваа на бивиссаамий’д̇и мама санд̇игз варам̣ аг̇г̇ахзси, д̇асса палзна д̣̇аанаж̇жхаасаяо д̣̇аанаабхирад̇о ж̇аад̇о’’д̇и вад̇ваа д̇зхи яаажид̇о ад̇ийд̇ам̣ аахари.

Neva kiṇāmi napi vikkiṇāmīti idaṃ satthā jetavane viharanto ekaṃ dānajjhāsayaṃ bhikkhuṃ ārabbha kathesi. So kira sāvatthiyaṃ eko kulaputto hutvā satthu dhammakathaṃ sutvā pasannacitto pabbajitvā sīlesu paripūrakārī dhutaṅgaguṇasamannāgato sabrahmacārīsu pavattamettacitto divasassa tikkhattuṃ buddhadhammasaṅghupaṭṭhāne appamatto ācārasampanno dānajjhāsayo ahosi. Sāraṇīyadhammapūrako attanā laddhaṃ paṭiggāhakesu vijjamānesu chinnabhatto hutvāpi detiyeva, tasmā tassa dānajjhāsayadānābhiratabhāvo bhikkhusaṅghe pākaṭo ahosi. Athekadivasaṃ bhikkhū dhammasabhāyaṃ kathaṃ samuṭṭhāpesuṃ, ‘‘āvuso, asuko nāma bhikkhu dānajjhāsayo dānābhirato attanā laddhaṃ pasatamattapānīyampi lobhaṃ chinditvā sabrahmacārīnaṃ deti, bodhisattassevassa ajjhāsayo’’ti. Satthā taṃ kathaṃ dibbāya sotadhātuyā sutvā gandhakuṭito nikkhamitvā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘ayaṃ, bhikkhave, bhikkhu pubbe adānasīlo maccharī tiṇaggena telabindumpi adātā ahosi, atha naṃ ahaṃ dametvā nibbisevanaṃ katvā dānaphalaṃ vaṇṇetvā dāne patiṭṭhāpesiṃ, so ‘pasatamattaṃ udakampi labhitvā adatvā na pivissāmī’ti mama santike varaṃ aggahesi, tassa phalena dānajjhāsayo dānābhirato jāto’’ti vatvā tehi yācito atītaṃ āhari.

ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з зго г̇ахабад̇и ад̣дхо ахоси асийд̇игодивибхаво. ат̇асса рааж̇аа сздтидтаанам̣ ад̣̇ааси . со рааж̇абууж̇ид̇о нааг̇араж̇аанабад̣̇абууж̇ид̇о худ̇ваа згад̣̇ивасам̣ ад̇д̇ано самбад̇д̇им̣ ологзд̇ваа жинд̇зси – ‘‘аяам̣ яасо маяаа ад̇ийд̇абхавз нзва нид̣̇д̣̇ааяанд̇зна, на гааяад̣̇ужжарид̇аад̣̇ийни гаронд̇зна лад̣̇д̇хо, сужарид̇аани бана буурзд̇ваа лад̣̇д̇хо, анааг̇ад̇зби маяаа мама бад̇идтам̣ гаад̇ум̣ ваддад̇ий’’д̇и. со ран̃н̃о санд̇игам̣ г̇анд̇ваа ‘‘д̣̇зва, мама гхарз асийд̇игодид̇ханам̣ ад̇т̇и, д̇ам̣ г̇ан̣хаахий’’д̇и вад̇ваа ‘‘на маяхам̣ д̇ава д̇ханзнад̇т̇о, б̣ахум̣ мз д̇ханам̣, ид̇оби яад̣̇ижчаси, д̇ам̣ г̇ан̣хаахий’’д̇и вуд̇д̇з ‘‘гим̣ ну, д̣̇зва, мама д̇ханам̣ д̣̇аад̇ум̣ лабхаамий’’д̇и ааха. ат̇а ран̃н̃аа ‘‘яат̇ааружи гарохий’’д̇и вуд̇д̇з жад̇уусу наг̇арад̣̇ваарзсу наг̇арамаж̇жхз нивзсанад̣̇ваарз жаад̇и ча д̣̇аанасаалааяо гаарзд̇ваа д̣̇звасигам̣ часад̇асахассабарижжааг̇ам̣ гаронд̇о махаад̣̇аанам̣ бавад̇д̇зси. со яааваж̇ийвам̣ д̣̇аанам̣ д̣̇ад̇ваа ‘‘имам̣ мама д̣̇аанавам̣сам̣ маа убажчинд̣̇ат̇аа’’д̇и буд̇д̇з анусаасид̇ваа ж̇ийвид̇абарияосаанз сагго худ̇ваа ниб̣б̣ад̇д̇и. буд̇д̇обисса д̇ат̇зва д̣̇аанам̣ д̣̇ад̇ваа жанд̣̇о худ̇ваа ниб̣б̣ад̇д̇и, д̇асса буд̇д̇о суурияо худ̇ваа ниб̣б̣ад̇д̇и, д̇асса буд̇д̇о маад̇али худ̇ваа ниб̣б̣ад̇д̇и, д̇асса буд̇д̇о бан̃жасико худ̇ваа ниб̣б̣ад̇д̇и, д̇асса бана буд̇д̇о чадто сздтидтаанам̣ лад̣̇д̇хаа мажчарияагосияо наама ахоси асийд̇игодивибхавоязва. со ‘‘мама бид̇убид̇аамахаа б̣аалаа ахзсум̣, д̣̇угкзна самбхад̇ам̣ д̇ханам̣ чад̣д̣зсум̣, ахам̣ бана д̇ханам̣ рагкиссаами, гассажи гин̃жи на д̣̇ассаамий’’д̇и жинд̇зд̇ваа д̣̇аанасаалаа вид̣̇д̇хам̣сзд̇ваа аг̇г̇инаа жхаабзд̇ваа т̇ад̣̇д̇хамажчарий ахоси.

Atīte bārāṇasiyaṃ brahmadatte rajjaṃ kārente eko gahapati aḍḍho ahosi asītikoṭivibhavo. Athassa rājā seṭṭhiṭṭhānaṃ adāsi . So rājapūjito nāgarajānapadapūjito hutvā ekadivasaṃ attano sampattiṃ oloketvā cintesi – ‘‘ayaṃ yaso mayā atītabhave neva niddāyantena, na kāyaduccaritādīni karontena laddho, sucaritāni pana pūretvā laddho, anāgatepi mayā mama patiṭṭhaṃ kātuṃ vaṭṭatī’’ti. So rañño santikaṃ gantvā ‘‘deva, mama ghare asītikoṭidhanaṃ atthi, taṃ gaṇhāhī’’ti vatvā ‘‘na mayhaṃ tava dhanenattho, bahuṃ me dhanaṃ, itopi yadicchasi, taṃ gaṇhāhī’’ti vutte ‘‘kiṃ nu, deva, mama dhanaṃ dātuṃ labhāmī’’ti āha. Atha raññā ‘‘yathāruci karohī’’ti vutte catūsu nagaradvāresu nagaramajjhe nivesanadvāre cāti cha dānasālāyo kāretvā devasikaṃ chasatasahassapariccāgaṃ karonto mahādānaṃ pavattesi. So yāvajīvaṃ dānaṃ datvā ‘‘imaṃ mama dānavaṃsaṃ mā upacchindathā’’ti putte anusāsitvā jīvitapariyosāne sakko hutvā nibbatti. Puttopissa tatheva dānaṃ datvā cando hutvā nibbatti, tassa putto sūriyo hutvā nibbatti, tassa putto mātali hutvā nibbatti, tassa putto pañcasikho hutvā nibbatti, tassa pana putto chaṭṭho seṭṭhiṭṭhānaṃ laddhā macchariyakosiyo nāma ahosi asītikoṭivibhavoyeva. So ‘‘mama pitupitāmahā bālā ahesuṃ, dukkhena sambhataṃ dhanaṃ chaḍḍesuṃ, ahaṃ pana dhanaṃ rakkhissāmi, kassaci kiñci na dassāmī’’ti cintetvā dānasālā viddhaṃsetvā agginā jhāpetvā thaddhamaccharī ahosi.

ат̇асса г̇зхад̣̇ваарз яаажагаа саннибад̇ид̇ваа б̣аахаа баг̇г̇аяха, ‘‘махаасздти, маа ад̇д̇ано бид̇убид̇аамахаанам̣ д̣̇аанавам̣сам̣ наасаяи, д̣̇аанам̣ д̣̇зхий’’д̇и махаасад̣̇д̣̇зна барид̣̇звим̣су. д̇ам̣ суд̇ваа махааж̇ано ‘‘мажчарияагосиязна ад̇д̇ано д̣̇аанавам̣со убажчинно’’д̇и д̇ам̣ г̇арахи. со лаж̇ж̇ид̇о нивзсанад̣̇ваарз яаажагаанам̣ ааг̇ад̇ааг̇ад̇адтаанам̣ ниваарзд̇ум̣ аарагкам̣ табзси. д̇з ниббажжаяаа худ̇ваа буна д̇асса г̇зхад̣̇ваарам̣ на ологзсум̣. со д̇ад̇о бадтааяа д̇ханамзва сам̣харад̇и, нзва ад̇д̇анаа барибхун̃ж̇ад̇и, на буд̇д̇ад̣̇аараад̣̇ийнам̣ д̣̇зд̇и, ган̃ж̇игаб̣илан̇г̇ад̣̇уд̇ияам̣ сагун̣д̣агабхад̇д̇ам̣ бхун̃ж̇ад̇и, муулапаламад̇д̇ад̇анд̇аани т̇уулавад̇т̇аани ниваасзд̇и, бан̣н̣ачад̇д̇ам̣ мад̇т̇агз д̇хаарзд̇ваа ж̇араг̇г̇он̣аяуд̇д̇зна ж̇аж̇ж̇арарат̇агзна яаад̇и. ид̇и д̇асса асаббурисасса д̇ад̇д̇агам̣ д̇ханам̣ сунакзна лад̣̇д̇хам̣ наал̣игзрам̣ вияа ахоси.

Athassa gehadvāre yācakā sannipatitvā bāhā paggayha, ‘‘mahāseṭṭhi, mā attano pitupitāmahānaṃ dānavaṃsaṃ nāsayi, dānaṃ dehī’’ti mahāsaddena parideviṃsu. Taṃ sutvā mahājano ‘‘macchariyakosiyena attano dānavaṃso upacchinno’’ti taṃ garahi. So lajjito nivesanadvāre yācakānaṃ āgatāgataṭṭhānaṃ nivāretuṃ ārakkhaṃ ṭhapesi. Te nippaccayā hutvā puna tassa gehadvāraṃ na olokesuṃ. So tato paṭṭhāya dhanameva saṃharati, neva attanā paribhuñjati, na puttadārādīnaṃ deti, kañjikabilaṅgadutiyaṃ sakuṇḍakabhattaṃ bhuñjati, mūlaphalamattatantāni thūlavatthāni nivāseti, paṇṇachattaṃ matthake dhāretvā jaraggoṇayuttena jajjararathakena yāti. Iti tassa asappurisassa tattakaṃ dhanaṃ sunakhena laddhaṃ nāḷikeraṃ viya ahosi.

со згад̣̇ивасам̣ рааж̇уубадтаанам̣ г̇ажчанд̇о ‘‘анусздтим̣ аад̣̇ааяа г̇амиссаамий’’д̇и д̇асса г̇зхам̣ аг̇амааси. д̇асмим̣ кан̣з анусздти буд̇д̇ад̇хийд̇аад̣̇ийхи баривуд̇о навасаббибаггамад̇хусагкаражун̣н̣зхи сан̇кад̇ам̣ бааяаасам̣ бхун̃ж̇амаано нисинно ход̇и. со мажчарияагосияам̣ д̣̇исваа аасанаа вудтааяа ‘‘зхи, махаасздти, имасмим̣ баллан̇гз нисийд̣̇а, бааяаасам̣ бхун̃ж̇иссаамаа’’д̇и ааха. д̇асса бааяаасам̣ д̣̇исваава мукз кзл̣аа уббаж̇ж̇и, бхун̃ж̇ид̇угаамо ахоси, звам̣ бана жинд̇зси – ‘‘сажаахам̣ бхун̃ж̇иссаами, анусздтино мама г̇зхам̣ ааг̇ад̇агаалз бадисаггааро гаад̇аб̣б̣о бхависсад̇и, звам̣ мз д̇ханам̣ нассиссад̇и, на бхун̃ж̇иссаамий’’д̇и. ат̇а бунаббунам̣ яаажияамааноби ‘‘ид̣̇аани мз бхуд̇д̇ам̣, сухид̇осмий’’д̇и на ижчи. анусздтимхи бхун̃ж̇анд̇з бана ологзнд̇о мукз сан̃ж̇ааяамаанзна кзл̣зна нисийд̣̇ид̇ваа д̇асса бхад̇д̇агижжаавасаанз д̇зна сад̣̇д̇хим̣ рааж̇анивзсанам̣ г̇анд̇ваа рааж̇аанам̣ бассид̇ваа рааж̇анивзсанад̇о од̇арид̇ваа ад̇д̇ано г̇зхам̣ ануббад̇д̇о бааяаасад̇ан̣хааяа бийл̣ияамаано жинд̇зси – ‘‘сажаахам̣ ‘бааяаасам̣ бхун̃ж̇ид̇угаамомхий’д̇и вагкаами, махааж̇ано бхун̃ж̇ид̇угаамо бхависсад̇и, б̣ахуу д̇ан̣д̣улаад̣̇аяо нассиссанд̇и, на гассажи гат̇зссаамий’’д̇и. со рад̇д̇инд̣̇ивам̣ бааяаасамзва жинд̇знд̇о вийд̇инаамзд̇вааби д̇хананаасанабхаязна гассажи агат̇зд̇ваава бибаасам̣ ад̇хиваасзси, ануггамзна ад̇хиваасзд̇ум̣ асаггонд̇о уббан̣д̣уббан̣д̣угаж̇аад̇о ахоси. звам̣ санд̇зби д̇хананаасанабхаязна агат̇знд̇о абарабхааг̇з д̣̇уб̣б̣ало худ̇ваа саяанам̣ убаг̇уухид̇ваа нибаж̇ж̇и.

So ekadivasaṃ rājūpaṭṭhānaṃ gacchanto ‘‘anuseṭṭhiṃ ādāya gamissāmī’’ti tassa gehaṃ agamāsi. Tasmiṃ khaṇe anuseṭṭhi puttadhītādīhi parivuto navasappipakkamadhusakkharacuṇṇehi saṅkhataṃ pāyāsaṃ bhuñjamāno nisinno hoti. So macchariyakosiyaṃ disvā āsanā vuṭṭhāya ‘‘ehi, mahāseṭṭhi, imasmiṃ pallaṅke nisīda, pāyāsaṃ bhuñjissāmā’’ti āha. Tassa pāyāsaṃ disvāva mukhe kheḷā uppajji, bhuñjitukāmo ahosi, evaṃ pana cintesi – ‘‘sacāhaṃ bhuñjissāmi, anuseṭṭhino mama gehaṃ āgatakāle paṭisakkāro kātabbo bhavissati, evaṃ me dhanaṃ nassissati, na bhuñjissāmī’’ti. Atha punappunaṃ yāciyamānopi ‘‘idāni me bhuttaṃ, suhitosmī’’ti na icchi. Anuseṭṭhimhi bhuñjante pana olokento mukhe sañjāyamānena kheḷena nisīditvā tassa bhattakiccāvasāne tena saddhiṃ rājanivesanaṃ gantvā rājānaṃ passitvā rājanivesanato otaritvā attano gehaṃ anuppatto pāyāsataṇhāya pīḷiyamāno cintesi – ‘‘sacāhaṃ ‘pāyāsaṃ bhuñjitukāmomhī’ti vakkhāmi, mahājano bhuñjitukāmo bhavissati, bahū taṇḍulādayo nassissanti, na kassaci kathessāmī’’ti. So rattindivaṃ pāyāsameva cintento vītināmetvāpi dhananāsanabhayena kassaci akathetvāva pipāsaṃ adhivāsesi, anukkamena adhivāsetuṃ asakkonto uppaṇḍuppaṇḍukajāto ahosi. Evaṃ santepi dhananāsanabhayena akathento aparabhāge dubbalo hutvā sayanaṃ upagūhitvā nipajji.

ат̇а нам̣ бхарияаа убаг̇анд̇ваа хад̇т̇зна бидтим̣ баримаж̇ж̇амаанаа ‘‘гим̣ д̇з, саами, апаасуга’’нд̇и бужчи. ‘‘д̇авзва сарийрз апаасугам̣ гарохи, мама апаасугам̣ над̇т̇ий’’д̇и. ‘‘саами, уббан̣д̣уббан̣д̣угаж̇аад̇оси, гим̣ ну д̇з гаажи жинд̇аа ад̇т̇и, уд̣̇ааху рааж̇аа д̇з губид̇о, ад̣̇у буд̇д̇зхи авамаано гад̇о, ат̇а ваа бана гаажи д̇ан̣хаа уббаннаа’’д̇и? ‘‘аама, д̇ан̣хаа мз уббаннаа’’д̇и. ‘‘гат̇зхи, саамий’’д̇и? ‘‘гат̇зссаами, сагкиссаси нам̣ рагкид̇у’’нд̇и. ‘‘рагкид̇аб̣б̣аяуд̇д̇агаа жз, рагкиссаамий’’д̇и. звамби д̇хананаасанабхаязна гат̇зд̇ум̣ на уссахи. д̇ааяа бунаббунам̣ бийл̣ияамаано гат̇зси – ‘‘бхад̣̇д̣̇з, ахам̣ згад̣̇ивасам̣ анусздтим̣ навасаббимад̇хусагкаражун̣н̣зхи сан̇кад̇ам̣ бааяаасам̣ бхун̃ж̇анд̇ам̣ д̣̇исваа д̇ад̇о бадтааяа д̇аад̣̇исам̣ бааяаасам̣ бхун̃ж̇ид̇угаамо ж̇аад̇о’’д̇и. ‘‘асаббуриса, гим̣ д̇вам̣ д̣̇уг̇г̇ад̇о, сагаламаараан̣асиваасийнам̣ бахонагам̣ бааяаасам̣ бажиссаамий’’д̇и. ат̇асса сийсз д̣̇ан̣д̣зна бахаран̣агаало вияа ахоси. со д̇ассаа гуж̇жхид̇ваа ‘‘ж̇аанаамахам̣ д̇ава махад̣̇д̇ханабхаавам̣, сажз д̇з гулагхараа аабхад̇ам̣ ад̇т̇и, бааяаасам̣ бажид̇ваа нааг̇араанам̣ д̣̇зхий’’д̇и ааха. ‘‘д̇зна хи згавийт̇иваасийнам̣ бахонагам̣ гад̇ваа бажаамий’’д̇и. ‘‘гим̣ д̇з зд̇зхи, ад̇д̇ано бана санд̇агам̣ каад̣̇анд̇уу’’д̇и? ‘‘д̇зна хи ид̇о жид̇о жа сад̇д̇асад̇д̇агхараваасийнам̣ бахонагам̣ гад̇ваа бажаамий’’д̇и. ‘‘гим̣ д̇з зд̇зхий’’д̇и. ‘‘д̇зна хи имасмим̣ г̇зхз бариж̇анассаа’’д̇и. ‘‘гим̣ д̇з зд̇знаа’’д̇и? ‘‘д̇зна хи б̣анд̇хуж̇анассзва бахонагам̣ гад̇ваа бажаамий’’д̇и. ‘‘гим̣ д̇з зд̇знаа’’д̇и? ‘‘д̇зна хи д̇уяхан̃жа маяхан̃жа бажаами саамий’’д̇и. ‘‘гааси д̇вам̣, на д̇уяхам̣ ваддад̇ий’’д̇и? ‘‘д̇зна хи згассзва д̇з бахонагам̣ гад̇ваа бажаамий’’д̇и. ‘‘маяхан̃жа д̇вам̣ маа бажи, г̇зхз бана бажанд̇з б̣ахуу бажжаасийсанд̇и, маяхам̣ бана бад̇т̇ам̣ д̇ан̣д̣улаанам̣ жад̇убхааг̇ам̣ кийрасса ажчарам̣ сагкарааяа гаран̣д̣агам̣ саббисса гаран̣д̣агам̣ мад̇хусса зган̃жа бажанабхааж̇анам̣ д̣̇зхи, ахам̣ аран̃н̃ам̣ бависид̇ваа д̇ад̇т̇а бажид̇ваа бхун̃ж̇аамий’’д̇и. саа д̇ат̇аа агааси. со д̇ам̣ саб̣б̣ам̣ жздагзна г̇аахаабзд̇ваа ‘‘г̇ажча асугадтаанз д̇идтаахий’’д̇и д̇ам̣ бурад̇о бзсзд̇ваа згагова ог̇ун̣тигам̣ гад̇ваа ан̃н̃аад̇агавзсзна д̇ад̇т̇а г̇анд̇ваа над̣̇ийд̇ийрз згасмим̣ г̇ажчамуулз уд̣̇д̇ханам̣ гаарзд̇ваа д̣̇ааруд̣̇агам̣ аахараабзд̇ваа ‘‘д̇вам̣ г̇анд̇ваа згасмим̣ маг̇г̇з тад̇ваа ган̃жид̣̇зва д̣̇исваа мама сан̃н̃ам̣ д̣̇ад̣̇зяяааси, маяаа баггосид̇агаалзва ааг̇ажчзяяаасий’’д̇и д̇ам̣ бзсзд̇ваа аг̇г̇им̣ гад̇ваа бааяаасам̣ бажи.

Atha naṃ bhariyā upagantvā hatthena piṭṭhiṃ parimajjamānā ‘‘kiṃ te, sāmi, aphāsuka’’nti pucchi. ‘‘Taveva sarīre aphāsukaṃ karohi, mama aphāsukaṃ natthī’’ti. ‘‘Sāmi, uppaṇḍuppaṇḍukajātosi, kiṃ nu te kāci cintā atthi, udāhu rājā te kupito, adu puttehi avamāno kato, atha vā pana kāci taṇhā uppannā’’ti? ‘‘Āma, taṇhā me uppannā’’ti. ‘‘Kathehi, sāmī’’ti? ‘‘Kathessāmi, sakkhissasi naṃ rakkhitu’’nti. ‘‘Rakkhitabbayuttakā ce, rakkhissāmī’’ti. Evampi dhananāsanabhayena kathetuṃ na ussahi. Tāya punappunaṃ pīḷiyamāno kathesi – ‘‘bhadde, ahaṃ ekadivasaṃ anuseṭṭhiṃ navasappimadhusakkharacuṇṇehi saṅkhataṃ pāyāsaṃ bhuñjantaṃ disvā tato paṭṭhāya tādisaṃ pāyāsaṃ bhuñjitukāmo jāto’’ti. ‘‘Asappurisa, kiṃ tvaṃ duggato, sakalamārāṇasivāsīnaṃ pahonakaṃ pāyāsaṃ pacissāmī’’ti. Athassa sīse daṇḍena paharaṇakālo viya ahosi. So tassā kujjhitvā ‘‘jānāmahaṃ tava mahaddhanabhāvaṃ, sace te kulagharā ābhataṃ atthi, pāyāsaṃ pacitvā nāgarānaṃ dehī’’ti āha. ‘‘Tena hi ekavīthivāsīnaṃ pahonakaṃ katvā pacāmī’’ti. ‘‘Kiṃ te etehi, attano pana santakaṃ khādantū’’ti? ‘‘Tena hi ito cito ca sattasattagharavāsīnaṃ pahonakaṃ katvā pacāmī’’ti. ‘‘Kiṃ te etehī’’ti. ‘‘Tena hi imasmiṃ gehe parijanassā’’ti. ‘‘Kiṃ te etenā’’ti? ‘‘Tena hi bandhujanasseva pahonakaṃ katvā pacāmī’’ti. ‘‘Kiṃ te etenā’’ti? ‘‘Tena hi tuyhañca mayhañca pacāmi sāmī’’ti. ‘‘Kāsi tvaṃ, na tuyhaṃ vaṭṭatī’’ti? ‘‘Tena hi ekasseva te pahonakaṃ katvā pacāmī’’ti. ‘‘Mayhañca tvaṃ mā paci, gehe pana pacante bahū paccāsīsanti, mayhaṃ pana patthaṃ taṇḍulānaṃ catubhāgaṃ khīrassa accharaṃ sakkharāya karaṇḍakaṃ sappissa karaṇḍakaṃ madhussa ekañca pacanabhājanaṃ dehi, ahaṃ araññaṃ pavisitvā tattha pacitvā bhuñjāmī’’ti. Sā tathā akāsi. So taṃ sabbaṃ ceṭakena gāhāpetvā ‘‘gaccha asukaṭṭhāne tiṭṭhāhī’’ti taṃ purato pesetvā ekakova oguṇṭhikaṃ katvā aññātakavesena tattha gantvā nadītīre ekasmiṃ gacchamūle uddhanaṃ kāretvā dārudakaṃ āharāpetvā ‘‘tvaṃ gantvā ekasmiṃ magge ṭhatvā kañcideva disvā mama saññaṃ dadeyyāsi, mayā pakkositakāleva āgaccheyyāsī’’ti taṃ pesetvā aggiṃ katvā pāyāsaṃ paci.

д̇асмим̣ кан̣з сагго д̣̇зварааж̇аа д̣̇асасахассаяож̇анам̣ алан̇гад̇ад̣̇званаг̇арам̣, садтияож̇анам̣ суван̣н̣авийт̇им̣, яож̇анасахассуб̣б̣зд̇хам̣ взж̇аяанд̇ам̣, бан̃жаяож̇анасад̇игам̣ суд̇хаммасабхам̣, садтияож̇анам̣ бан̣д̣угамб̣аласилаасанам̣, бан̃жаяож̇анааваддам̣ ган̃жанамааласзд̇ажчад̇д̇ам̣, ад̣дхад̇зяяагодисан̇каа д̣̇зважчараа, алан̇гад̇абадияад̇д̇ам̣ ад̇д̇абхааванд̇и имам̣ ад̇д̇ано сирим̣ ологзд̇ваа ‘‘гим̣ ну ко гад̇ваа маяаа аяам̣ яасо лад̣̇д̇хо’’д̇и жинд̇зд̇ваа б̣аараан̣асияам̣ сздтибхууд̇зна бавад̇д̇ид̇ам̣ д̣̇аанам̣ ад̣̇д̣̇аса. д̇ад̇о ‘‘мама буд̇д̇аад̣̇аяо гухим̣ ниб̣б̣ад̇д̇аа’’д̇и ологзнд̇о ‘‘буд̇д̇о мз жанд̣̇о д̣̇звабуд̇д̇о худ̇ваа ниб̣б̣ад̇д̇и, д̇асса буд̇д̇о суурияо, д̇асса буд̇д̇о, маад̇али, д̇асса буд̇д̇о, бан̃жасико’’д̇и саб̣б̣зсам̣ ниб̣б̣ад̇д̇им̣ д̣̇исваа ‘‘бан̃жасикасса буд̇д̇о гийд̣̇исо’’д̇и ологзнд̇о ад̇д̇ано вам̣сасса убажчиннабхаавам̣ басси. ат̇асса зд̇ад̣̇ахоси – ‘‘аяам̣ асаббурисо мажчарий худ̇ваа нзва ад̇д̇анаа барибхун̃ж̇ад̇и , на барзсам̣ д̣̇зд̇и, мама вам̣со д̇зна убажчинно, гаалам̣ гад̇ваа нираяз ниб̣б̣ад̇д̇иссад̇и, оваад̣̇амасса д̣̇ад̇ваа мама вам̣сам̣ бад̇идтаабзд̇ваа зд̇асса имасмим̣ д̣̇званаг̇арз ниб̣б̣ад̇д̇анаагаарам̣ гариссаамий’’д̇и. со жанд̣̇аад̣̇аяо баггосаабзд̇ваа ‘‘зт̇а мануссабат̇ам̣ г̇амиссаама, мажчарияагосиязна амхаагам̣ вам̣со убажчинно , д̣̇аанасаалаа жхаабид̇аа, нзва ад̇д̇анаа барибхун̃ж̇ад̇и, на барзсам̣ д̣̇зд̇и, ид̣̇аани бана бааяаасам̣ бхун̃ж̇ид̇угаамо худ̇ваа ‘гхарз бажжанд̇з ан̃н̃ассаби бааяаасо д̣̇аад̇аб̣б̣о бхависсад̇ий’д̇и аран̃н̃ам̣ бависид̇ваа згагова бажад̇и, зд̇ам̣ д̣̇амзд̇ваа д̣̇аанапалам̣ ж̇аанаабзд̇ваа ааг̇амиссаама, абижа ко бана амхзхи саб̣б̣зхи згад̇о яаажияамаано д̇ад̇т̇зва марзяяа. мама батамам̣ г̇анд̇ваа бааяаасам̣ яаажид̇ваа нисиннагаалз д̇умхз б̣раахман̣аван̣н̣зна бадибаадияаа ааг̇анд̇ваа яаажзяяаат̇аа’’д̇и вад̇ваа саяам̣ д̇аава б̣раахман̣аван̣н̣зна д̇ам̣ убасан̇гамид̇ваа ‘‘бхо, гад̇аро б̣аараан̣асиг̇аманамаг̇г̇о’’д̇и бужчи. ат̇а нам̣ мажчарияагосияо ‘‘гим̣ уммад̇д̇агоси, б̣аараан̣асимаг̇г̇амби на ж̇аанааси, гим̣ ид̇о зси, зд̇д̇о яаахий’’д̇и ааха.

Tasmiṃ khaṇe sakko devarājā dasasahassayojanaṃ alaṅkatadevanagaraṃ, saṭṭhiyojanaṃ suvaṇṇavīthiṃ, yojanasahassubbedhaṃ vejayantaṃ, pañcayojanasatikaṃ sudhammasabhaṃ, saṭṭhiyojanaṃ paṇḍukambalasilāsanaṃ, pañcayojanāvaṭṭaṃ kañcanamālasetacchattaṃ, aḍḍhateyyakoṭisaṅkhā devaccharā, alaṅkatapaṭiyattaṃ attabhāvanti imaṃ attano siriṃ oloketvā ‘‘kiṃ nu kho katvā mayā ayaṃ yaso laddho’’ti cintetvā bārāṇasiyaṃ seṭṭhibhūtena pavattitaṃ dānaṃ addasa. Tato ‘‘mama puttādayo kuhiṃ nibbattā’’ti olokento ‘‘putto me cando devaputto hutvā nibbatti, tassa putto sūriyo, tassa putto, mātali, tassa putto, pañcasikho’’ti sabbesaṃ nibbattiṃ disvā ‘‘pañcasikhassa putto kīdiso’’ti olokento attano vaṃsassa upacchinnabhāvaṃ passi. Athassa etadahosi – ‘‘ayaṃ asappuriso maccharī hutvā neva attanā paribhuñjati , na paresaṃ deti, mama vaṃso tena upacchinno, kālaṃ katvā niraye nibbattissati, ovādamassa datvā mama vaṃsaṃ patiṭṭhāpetvā etassa imasmiṃ devanagare nibbattanākāraṃ karissāmī’’ti. So candādayo pakkosāpetvā ‘‘etha manussapathaṃ gamissāma, macchariyakosiyena amhākaṃ vaṃso upacchinno , dānasālā jhāpitā, neva attanā paribhuñjati, na paresaṃ deti, idāni pana pāyāsaṃ bhuñjitukāmo hutvā ‘ghare paccante aññassapi pāyāso dātabbo bhavissatī’ti araññaṃ pavisitvā ekakova pacati, etaṃ dametvā dānaphalaṃ jānāpetvā āgamissāma, apica kho pana amhehi sabbehi ekato yāciyamāno tattheva mareyya. Mama paṭhamaṃ gantvā pāyāsaṃ yācitvā nisinnakāle tumhe brāhmaṇavaṇṇena paṭipāṭiyā āgantvā yāceyyāthā’’ti vatvā sayaṃ tāva brāhmaṇavaṇṇena taṃ upasaṅkamitvā ‘‘bho, kataro bārāṇasigamanamaggo’’ti pucchi. Atha naṃ macchariyakosiyo ‘‘kiṃ ummattakosi, bārāṇasimaggampi na jānāsi, kiṃ ito esi, etto yāhī’’ti āha.

сагго д̇асса важанам̣ суд̇ваа асун̣анд̇о вияа ‘‘гим̣ гат̇зсий’’д̇и д̇ам̣ убаг̇ажчад̇зва. соби, ‘‘арз , б̣ад̇хира б̣раахман̣а, гим̣ ид̇о зси, бурад̇о яаахий’’д̇и вирави. ат̇а нам̣ сагго, ‘‘бхо, гасмаа вираваси, д̇хуумо бан̃н̃ааяад̇и, аг̇г̇и бан̃н̃ааяад̇и, бааяаасо бажжад̇и, б̣раахман̣аанам̣ ниманд̇анадтаанзна бхавид̇аб̣б̣ам̣, ахамби б̣раахман̣аанам̣ бхож̇анагаалз т̇огам̣ лабхиссаами, гим̣ мам̣ нижчубхасий’’д̇и вад̇ваа ‘‘над̇т̇зд̇т̇а б̣раахман̣аанам̣ ниманд̇анам̣, бурад̇о яаахий’’д̇и вуд̇д̇з ‘‘д̇зна хи гасмаа гуж̇жхаси, д̇ава бхож̇анагаалз т̇огам̣ лабхиссаамий’’д̇и ааха. ат̇а нам̣ со ‘‘ахам̣ д̇з згасид̇т̇амби на д̣̇ассаами, т̇огам̣ ид̣̇ам̣ мама яаабанамад̇д̇амзва, маяааби жзд̇ам̣ яаажид̇ваава лад̣̇д̇хам̣, д̇вам̣ ан̃н̃ад̇о аахаарам̣ бариязсаахий’’д̇и вад̇ваа бхарияам̣ яаажид̇ваа лад̣̇д̇хабхаавам̣ санд̇хааязва вад̇ваа г̇аат̇амааха –

Sakko tassa vacanaṃ sutvā asuṇanto viya ‘‘kiṃ kathesī’’ti taṃ upagacchateva. Sopi, ‘‘are , badhira brāhmaṇa, kiṃ ito esi, purato yāhī’’ti viravi. Atha naṃ sakko, ‘‘bho, kasmā viravasi, dhūmo paññāyati, aggi paññāyati, pāyāso paccati, brāhmaṇānaṃ nimantanaṭṭhānena bhavitabbaṃ, ahampi brāhmaṇānaṃ bhojanakāle thokaṃ labhissāmi, kiṃ maṃ nicchubhasī’’ti vatvā ‘‘natthettha brāhmaṇānaṃ nimantanaṃ, purato yāhī’’ti vutte ‘‘tena hi kasmā kujjhasi, tava bhojanakāle thokaṃ labhissāmī’’ti āha. Atha naṃ so ‘‘ahaṃ te ekasitthampi na dassāmi, thokaṃ idaṃ mama yāpanamattameva, mayāpi cetaṃ yācitvāva laddhaṃ, tvaṃ aññato āhāraṃ pariyesāhī’’ti vatvā bhariyaṃ yācitvā laddhabhāvaṃ sandhāyeva vatvā gāthamāha –

192.

‘‘нзва гин̣аами наби виггин̣аами, на жааби мз саннижаяо жа ад̇т̇и;

‘‘Neva kiṇāmi napi vikkiṇāmi, na cāpi me sannicayo ca atthi;

сугижчаруубам̣ вад̇ид̣̇ам̣ барид̇д̇ам̣, бад̇т̇од̣̇ано нааламаяам̣ д̣̇увинна’’нд̇и.

Sukiccharūpaṃ vatidaṃ parittaṃ, patthodano nālamayaṃ duvinna’’nti.

д̇ам̣ суд̇ваа сагго ‘‘ахамби д̇з мад̇хурасад̣̇д̣̇зна згам̣ силогам̣ гат̇зссаами, д̇ам̣ сун̣аахий’’д̇и вад̇ваа ‘‘на мз д̇ава силогзна ад̇т̇о’’д̇и д̇асса ваарзнд̇ассзва г̇аат̇аад̣̇ваяамааха –

Taṃ sutvā sakko ‘‘ahampi te madhurasaddena ekaṃ silokaṃ kathessāmi, taṃ suṇāhī’’ti vatvā ‘‘na me tava silokena attho’’ti tassa vārentasseva gāthādvayamāha –

193.

‘‘аббамхаа аббагам̣ д̣̇аж̇ж̇аа, анумаж̇жхад̇о маж̇жхагам̣;

‘‘Appamhā appakaṃ dajjā, anumajjhato majjhakaṃ;

б̣ахумхаа б̣ахугам̣ д̣̇аж̇ж̇аа, ад̣̇аанам̣ нуубабаж̇ж̇ад̇и.

Bahumhā bahukaṃ dajjā, adānaṃ nūpapajjati.

194.

‘‘д̇ам̣ д̇ам̣ вад̣̇аами госияа, д̣̇зхи д̣̇аанаани бхун̃ж̇а жа;

‘‘Taṃ taṃ vadāmi kosiya, dehi dānāni bhuñja ca;

арияамаг̇г̇ам̣ самааруха, нзгаасий лабхад̇з сука’’нд̇и.

Ariyamaggaṃ samāruha, nekāsī labhate sukha’’nti.

д̇ад̇т̇а анумаж̇жхад̇о маж̇жхаганд̇и аббамад̇д̇агамби маж̇жхз чзд̇ваа д̣̇вз годтаасз гарид̇ваа згам̣ годтаасам̣ д̣̇ад̇ваа д̇ад̇о авасзсад̇о анумаж̇жхад̇оби буна маж̇жхз чзд̇ваа зго годтаасо д̣̇аад̇аб̣б̣оязва. ад̣̇аанам̣ нуубабаж̇ж̇ад̇ийд̇и аббам̣ ваа б̣ахум̣ ваа д̣̇иннам̣ ход̇у, ад̣̇аанам̣ наама на ход̇и, д̇амби д̣̇аанамзва махабпаламзва.

Tattha anumajjhato majjhakanti appamattakampi majjhe chetvā dve koṭṭhāse karitvā ekaṃ koṭṭhāsaṃ datvā tato avasesato anumajjhatopi puna majjhe chetvā eko koṭṭhāso dātabboyeva. Adānaṃ nūpapajjatīti appaṃ vā bahuṃ vā dinnaṃ hotu, adānaṃ nāma na hoti, tampi dānameva mahapphalameva.

со д̇асса важанам̣ суд̇ваа ‘‘манаабам̣ д̇з, б̣раахман̣а, гат̇ид̇ам̣, бааяаасз баггз т̇огам̣ лабхиссаси, нисийд̣̇аахий’’д̇и ааха. сагго згаманд̇з нисийд̣̇и. д̇асмим̣ нисиннз жанд̣̇о д̇знзва нияаамзна убасан̇гамид̇ваа д̇ат̇зва гат̇ам̣ бавад̇д̇зд̇ваа д̇асса ваарзнд̇ассзва г̇аат̇аад̣̇ваяамааха –

So tassa vacanaṃ sutvā ‘‘manāpaṃ te, brāhmaṇa, kathitaṃ, pāyāse pakke thokaṃ labhissasi, nisīdāhī’’ti āha. Sakko ekamante nisīdi. Tasmiṃ nisinne cando teneva niyāmena upasaṅkamitvā tatheva kathaṃ pavattetvā tassa vārentasseva gāthādvayamāha –

195.

‘‘могхан̃жасса худ̇ам̣ ход̇и, могхан̃жааби самийхид̇ам̣;

‘‘Moghañcassa hutaṃ hoti, moghañcāpi samīhitaṃ;

ад̇ит̇исмим̣ яо нисиннасмим̣, зго бхун̃ж̇ад̇и бхож̇анам̣.

Atithismiṃ yo nisinnasmiṃ, eko bhuñjati bhojanaṃ.

196.

д̇ам̣ д̇ам̣ вад̣̇аами госияа, д̣̇зхи д̣̇аанаани бхун̃ж̇а жа;

Taṃ taṃ vadāmi kosiya, dehi dānāni bhuñja ca;

арияамаг̇г̇ам̣ самааруха, нзгаасий лабхад̇з сука’’нд̇и.

Ariyamaggaṃ samāruha, nekāsī labhate sukha’’nti.

д̇ад̇т̇а самийхид̇анд̇и д̇хануббаад̣̇анавийрияам̣.

Tattha samīhitanti dhanuppādanavīriyaṃ.

со д̇асса важанам̣ суд̇ваа гижчзна гасирзна ‘‘д̇зна хи нисийд̣̇а, т̇огам̣ лабхиссасий’’д̇и ааха. со г̇анд̇ваа саггасса санд̇игз нисийд̣̇и. д̇ад̇о суурияо д̇знзва наязна убасан̇гамид̇ваа д̇ат̇зва гат̇ам̣ бавад̇д̇зд̇ваа д̇асса ваарзнд̇ассзва г̇аат̇аад̣̇ваяамааха –

So tassa vacanaṃ sutvā kicchena kasirena ‘‘tena hi nisīda, thokaṃ labhissasī’’ti āha. So gantvā sakkassa santike nisīdi. Tato sūriyo teneva nayena upasaṅkamitvā tatheva kathaṃ pavattetvā tassa vārentasseva gāthādvayamāha –

197.

‘‘сажжан̃жасса худ̇ам̣ ход̇и, сажжан̃жааби самийхид̇ам̣;

‘‘Saccañcassa hutaṃ hoti, saccañcāpi samīhitaṃ;

ад̇ит̇исмим̣ яо нисиннасмим̣, нзго бхун̃ж̇ад̇и бхож̇анам̣.

Atithismiṃ yo nisinnasmiṃ, neko bhuñjati bhojanaṃ.

198.

‘‘д̇ам̣ д̇ам̣ вад̣̇аами госияа, д̣̇зхи д̣̇аанаани бхун̃ж̇а жа;

‘‘Taṃ taṃ vadāmi kosiya, dehi dānāni bhuñja ca;

арияамаг̇г̇ам̣ самааруха, нзгаасий лабхад̇з сука’’нд̇и.

Ariyamaggaṃ samāruha, nekāsī labhate sukha’’nti.

д̇ассаби важанам̣ суд̇ваа гижчзна гасирзна ‘‘д̇зна хи нисийд̣̇а, т̇огам̣ лабхиссасий’’д̇и ааха. со г̇анд̇ваа жанд̣̇асса санд̇игз нисийд̣̇и. ат̇а нам̣ маад̇али д̇знзва наязна убасан̇гамид̇ваа д̇ат̇зва гат̇ам̣ бавад̇д̇зд̇ваа д̇асса ваарзнд̇ассзва имаа г̇аат̇аа абхааси –

Tassapi vacanaṃ sutvā kicchena kasirena ‘‘tena hi nisīda, thokaṃ labhissasī’’ti āha. So gantvā candassa santike nisīdi. Atha naṃ mātali teneva nayena upasaṅkamitvā tatheva kathaṃ pavattetvā tassa vārentasseva imā gāthā abhāsi –

199.

‘‘саран̃жа ж̇ухад̇и босо, б̣ахугааяа г̇аяааяа жа;

‘‘Sarañca juhati poso, bahukāya gayāya ca;

д̣̇он̣з д̇имб̣аруд̇ид̇т̇асмим̣, сийгхасод̇з махаавахз.

Doṇe timbarutitthasmiṃ, sīghasote mahāvahe.

200.

‘‘ад̇ра жасса худ̇ам̣ ход̇и, ад̇ра жасса самийхид̇ам̣;

‘‘Atra cassa hutaṃ hoti, atra cassa samīhitaṃ;

ад̇ит̇исмим̣ яо нисиннасмим̣, нзго бхун̃ж̇ад̇и бхож̇анам̣.

Atithismiṃ yo nisinnasmiṃ, neko bhuñjati bhojanaṃ.

201.

‘‘д̇ам̣ д̇ам̣ вад̣̇аами госияа, д̣̇зхи д̣̇аанаани бхун̃ж̇а жа;

‘‘Taṃ taṃ vadāmi kosiya, dehi dānāni bhuñja ca;

арияамаг̇г̇ам̣ самааруха, нзгаасий лабхад̇з сука’’нд̇и.

Ariyamaggaṃ samāruha, nekāsī labhate sukha’’nti.

д̇аасам̣ ад̇т̇о – яо бурисо ‘‘нааг̇аяагкаад̣̇ийнам̣ б̣алигаммам̣ гаромий’’д̇и самуд̣̇д̣̇асон̣д̣ибогкаран̣ийаад̣̇ийсу яам̣ гин̃жи саран̃жа убаг̇анд̇ваа ж̇ухад̇и, д̇ад̇т̇а б̣алигаммам̣ гарод̇и , д̇ат̇аа б̣ахугааяа над̣̇ияаа г̇аяааяа богкаран̣ияаа д̣̇он̣анаамагз жа д̇имб̣арунаамагз жа д̇ид̇т̇з сийгхасод̇з маханд̇з вааривахз. ад̇ра жассаад̇и яад̣̇и ад̇рааби зд̇зсу сараад̣̇ийсу асса бурисасса худ̇ан̃жзва самийхид̇ан̃жа ход̇и, сапалам̣ сукуд̣̇раяам̣ самбаж̇ж̇ад̇и. ад̇ит̇исмим̣ яо нисиннасмим̣ нзго бхун̃ж̇ад̇и бхож̇анам̣, зд̇т̇а вад̇д̇аб̣б̣амзва над̇т̇и, д̇зна д̇ам̣ вад̣̇аами – госияа, д̣̇аанаани жа д̣̇зхи, саяан̃жа бхун̃ж̇а, арияаанам̣ д̣̇аанаабхирад̇аанам̣ б̣уд̣̇д̇хаад̣̇ийнам̣ маг̇г̇ам̣ абхируха. на хи згаасий згова бхун̃ж̇амаано сукам̣ наама лабхад̇ийд̇и.

Tāsaṃ attho – yo puriso ‘‘nāgayakkhādīnaṃ balikammaṃ karomī’’ti samuddasoṇḍipokkharaṇīādīsu yaṃ kiñci sarañca upagantvā juhati, tattha balikammaṃ karoti , tathā bahukāya nadiyā gayāya pokkharaṇiyā doṇanāmake ca timbarunāmake ca titthe sīghasote mahante vārivahe. Atra cassāti yadi atrāpi etesu sarādīsu assa purisassa hutañceva samīhitañca hoti, saphalaṃ sukhudrayaṃ sampajjati. Atithismiṃ yo nisinnasmiṃ neko bhuñjati bhojanaṃ, ettha vattabbameva natthi, tena taṃ vadāmi – kosiya, dānāni ca dehi, sayañca bhuñja, ariyānaṃ dānābhiratānaṃ buddhādīnaṃ maggaṃ abhiruha. Na hi ekāsī ekova bhuñjamāno sukhaṃ nāma labhatīti.

со д̇ассаби важанам̣ суд̇ваа баб̣б̣ад̇агуудзна од̇т̇адо вияа гижчзна гасирзна ‘‘д̇зна хи нисийд̣̇а, т̇огам̣ лабхиссасий’’д̇и ааха. маад̇али г̇анд̇ваа суурияасса санд̇игз нисийд̣̇и. д̇ад̇о бан̃жасико д̇знзва наязна убасан̇гамид̇ваа д̇ат̇зва гат̇ам̣ бавад̇д̇зд̇ваа д̇асса ваарзнд̇ассзва г̇аат̇аад̣̇ваяамааха –

So tassapi vacanaṃ sutvā pabbatakūṭena otthaṭo viya kicchena kasirena ‘‘tena hi nisīda, thokaṃ labhissasī’’ti āha. Mātali gantvā sūriyassa santike nisīdi. Tato pañcasikho teneva nayena upasaṅkamitvā tatheva kathaṃ pavattetvā tassa vārentasseva gāthādvayamāha –

202.

‘‘б̣ал̣исан̃хи со ниг̇илад̇и, д̣̇ийгхасуд̇д̇ам̣ саб̣анд̇ханам̣;

‘‘Baḷisañhi so nigilati, dīghasuttaṃ sabandhanaṃ;

ад̇ит̇исмим̣ яо нисиннасмим̣, зго бхун̃ж̇ад̇и бхож̇анам̣.

Atithismiṃ yo nisinnasmiṃ, eko bhuñjati bhojanaṃ.

203.

‘‘д̇ам̣ д̇ам̣ вад̣̇аами госияа, д̣̇зхи д̣̇аанаани бхун̃ж̇а жа;

‘‘Taṃ taṃ vadāmi kosiya, dehi dānāni bhuñja ca;

арияамаг̇г̇ам̣ самааруха, нзгаасий лабхад̇з сука’’нд̇и.

Ariyamaggaṃ samāruha, nekāsī labhate sukha’’nti.

мажчарияагосияо д̇ам̣ суд̇ваа д̣̇угкавзд̣̇ано нид̇т̇унанд̇о ‘‘д̇зна хи нисийд̣̇а, т̇огам̣ лабхиссасий’’д̇и ааха. бан̃жасико г̇анд̇ваа маад̇алисса санд̇игз нисийд̣̇и. ид̇и д̇зсу бан̃жасу б̣раахман̣зсу нисиннамад̇д̇зсвзва бааяаасо бажжи. ат̇а нам̣ госияо уд̣̇д̇ханаа од̇аарзд̇ваа ‘‘д̇умхаагам̣ бад̇д̇аани аахарат̇аа’’д̇и ааха. д̇з анудтааяа яат̇аанисиннаава хад̇т̇з басаарзд̇ваа химаванд̇ад̇о маалувабад̇д̇аани аахарим̣су. госияо д̇аани д̣̇исваа ‘‘д̇умхаагам̣ зд̇зсу бад̇д̇зсу д̣̇аад̇аб̣б̣абааяаасо над̇т̇и, кад̣̇ираад̣̇ийнам̣ бад̇д̇аани аахарат̇аа’’д̇и ааха. д̇з д̇ааниби аахарим̣су. згзгам̣ бад̇д̇ам̣ яод̇хапалагаббамаан̣ам̣ ахоси. со саб̣б̣зсам̣ д̣̇аб̣б̣ияаа бааяаасам̣ ад̣̇ааси, саб̣б̣анд̇имасса д̣̇аанагаалзби угкалияаа уунам̣ на бан̃н̃ааяи, бан̃жаннамби д̣̇ад̇ваа саяам̣ угкалим̣ г̇ахзд̇ваа нисийд̣̇и. д̇асмим̣ кан̣з бан̃жасико удтааяа ад̇д̇абхаавам̣ виж̇ахид̇ваа сунако худ̇ваа д̇зсам̣ бурад̇о бассаавам̣ гаронд̇о аг̇амааси. б̣раахман̣аа ад̇д̇ано бааяаасам̣ бад̇д̇зна бид̣̇ахим̣су. госияасса хад̇т̇абидтз бассааваб̣инд̣̇у бад̇и. б̣раахман̣аа гун̣д̣игаахи уд̣̇агам̣ г̇ахзд̇ваа бааяаасам̣ аб̣бхугирид̇ваа бхун̃ж̇амаанаа вияа ахзсум̣. госияо ‘‘маяхамби уд̣̇агам̣ д̣̇зт̇а, хад̇т̇ам̣ д̇ховид̇ваа бхун̃ж̇иссаамий’’д̇и ааха. ‘‘д̇ава уд̣̇агам̣ аахарид̇ваа хад̇т̇ам̣ д̇ховаа’’д̇и. ‘‘маяаа д̇умхаагам̣ бааяаасо д̣̇инно, маяхам̣ т̇огам̣ уд̣̇агам̣ д̣̇зт̇аа’’д̇и. ‘‘маяам̣ бин̣д̣абадибин̣д̣агаммам̣ наама на гаромаа’’д̇и. ‘‘д̇зна хи имам̣ угкалим̣ ологзт̇а, хад̇т̇ам̣ д̇ховид̇ваа ааг̇амиссаамий’’д̇и над̣̇им̣ од̇ари. д̇асмим̣ кан̣з сунако угкалим̣ бассаавасса буурзси. со д̇ам̣ бассаавам̣ гаронд̇ам̣ д̣̇исваа маханд̇ам̣ д̣̇ан̣д̣амаад̣̇ааяа д̇ам̣ д̇аж̇ж̇знд̇о ааг̇ажчи. со ассааж̇аанийяамад̇д̇о худ̇ваа д̇ам̣ ануб̣анд̇ханд̇о наанааван̣н̣о ахоси, гаал̣оби ход̇и сзд̇оби суван̣н̣аван̣н̣оби габ̣ароби ужжоби нийжоби, звам̣ наанааван̣н̣о худ̇ваа мажчарияагосияам̣ ануб̣анд̇хи. со маран̣абхаяабхийд̇о б̣раахман̣з убасан̇гами. д̇зби уббад̇ид̇ваа аагаасз тид̇аа. со д̇зсам̣ д̇ам̣ ид̣̇д̇хим̣ д̣̇исваа г̇аат̇амааха –

Macchariyakosiyo taṃ sutvā dukkhavedano nitthunanto ‘‘tena hi nisīda, thokaṃ labhissasī’’ti āha. Pañcasikho gantvā mātalissa santike nisīdi. Iti tesu pañcasu brāhmaṇesu nisinnamattesveva pāyāso pacci. Atha naṃ kosiyo uddhanā otāretvā ‘‘tumhākaṃ pattāni āharathā’’ti āha. Te anuṭṭhāya yathānisinnāva hatthe pasāretvā himavantato māluvapattāni āhariṃsu. Kosiyo tāni disvā ‘‘tumhākaṃ etesu pattesu dātabbapāyāso natthi, khadirādīnaṃ pattāni āharathā’’ti āha. Te tānipi āhariṃsu. Ekekaṃ pattaṃ yodhaphalakappamāṇaṃ ahosi. So sabbesaṃ dabbiyā pāyāsaṃ adāsi, sabbantimassa dānakālepi ukkhaliyā ūnaṃ na paññāyi, pañcannampi datvā sayaṃ ukkhaliṃ gahetvā nisīdi. Tasmiṃ khaṇe pañcasikho uṭṭhāya attabhāvaṃ vijahitvā sunakho hutvā tesaṃ purato passāvaṃ karonto agamāsi. Brāhmaṇā attano pāyāsaṃ pattena pidahiṃsu. Kosiyassa hatthapiṭṭhe passāvabindu pati. Brāhmaṇā kuṇḍikāhi udakaṃ gahetvā pāyāsaṃ abbhukiritvā bhuñjamānā viya ahesuṃ. Kosiyo ‘‘mayhampi udakaṃ detha, hatthaṃ dhovitvā bhuñjissāmī’’ti āha. ‘‘Tava udakaṃ āharitvā hatthaṃ dhovā’’ti. ‘‘Mayā tumhākaṃ pāyāso dinno, mayhaṃ thokaṃ udakaṃ dethā’’ti. ‘‘Mayaṃ piṇḍapaṭipiṇḍakammaṃ nāma na karomā’’ti. ‘‘Tena hi imaṃ ukkhaliṃ oloketha, hatthaṃ dhovitvā āgamissāmī’’ti nadiṃ otari. Tasmiṃ khaṇe sunakho ukkhaliṃ passāvassa pūresi. So taṃ passāvaṃ karontaṃ disvā mahantaṃ daṇḍamādāya taṃ tajjento āgacchi. So assājānīyamatto hutvā taṃ anubandhanto nānāvaṇṇo ahosi, kāḷopi hoti setopi suvaṇṇavaṇṇopi kabaropi uccopi nīcopi, evaṃ nānāvaṇṇo hutvā macchariyakosiyaṃ anubandhi. So maraṇabhayabhīto brāhmaṇe upasaṅkami. Tepi uppatitvā ākāse ṭhitā. So tesaṃ taṃ iddhiṃ disvā gāthamāha –

204.

‘‘ул̣аараван̣н̣аа вад̇а б̣раахман̣аа имз, аяан̃жа во сунако гисса хзд̇у;

‘‘Uḷāravaṇṇā vata brāhmaṇā ime, ayañca vo sunakho kissa hetu;

ужжааважам̣ ван̣н̣анибхам̣ вигуб̣б̣ад̇и, агкаат̇а но б̣раахман̣аа гз ну д̇умхз’’д̇и.

Uccāvacaṃ vaṇṇanibhaṃ vikubbati, akkhātha no brāhmaṇā ke nu tumhe’’ti.

д̇ам̣ суд̇ваа сагго д̣̇зварааж̇аа –

Taṃ sutvā sakko devarājā –

205.

‘‘жанд̣̇о жа суурияо жа убхо ид̇хааг̇ад̇аа, аяам̣ бана маад̇али д̣̇звасаарат̇и;

‘‘Cando ca sūriyo ca ubho idhāgatā, ayaṃ pana mātali devasārathi;

саггохамасми д̇ид̣̇асаанаминд̣̇о; зсо жа ко бан̃жасикод̇и вужжад̇ий’’д̇и.

Sakkohamasmi tidasānamindo; Eso ca kho pañcasikhoti vuccatī’’ti.

г̇аат̇ам̣ вад̇ваа д̇асса яасам̣ ван̣н̣знд̇о г̇аат̇амааха –

Gāthaṃ vatvā tassa yasaṃ vaṇṇento gāthamāha –

206.

‘‘баан̣иссараа муд̣̇ин̇г̇аа жа, мураж̇ааламб̣араани жа;

‘‘Pāṇissarā mudiṅgā ca, murajālambarāni ca;

суд̇д̇амзнам̣ баб̣од̇хзнд̇и, бадиб̣уд̣̇д̇хо жа нанд̣̇ад̇ий’’д̇и.

Suttamenaṃ pabodhenti, paṭibuddho ca nandatī’’ti.

со д̇асса важанам̣ суд̇ваа ‘‘сагга, зваруубам̣ д̣̇иб̣б̣асамбад̇д̇им̣ гинд̇и гад̇ваа лабхасий’’д̇и бужчи. сагго ‘‘ад̣̇аанасийлаа д̇аава баабад̇хаммаа мажчарино д̣̇звалогам̣ на г̇ажчанд̇и, нираяз ниб̣б̣ад̇д̇анд̇ий’’д̇и д̣̇ассзнд̇о –

So tassa vacanaṃ sutvā ‘‘sakka, evarūpaṃ dibbasampattiṃ kinti katvā labhasī’’ti pucchi. Sakko ‘‘adānasīlā tāva pāpadhammā maccharino devalokaṃ na gacchanti, niraye nibbattantī’’ti dassento –

207.

‘‘яз гзжимз мажчарино гад̣̇арияаа, барибхаасагаа саман̣аб̣раахман̣аанам̣;

‘‘Ye kecime maccharino kadariyā, paribhāsakā samaṇabrāhmaṇānaṃ;

ид̇хзва нигкибба сарийрад̣̇зхам̣, гааяасса бхзд̣̇аа нираяам̣ важ̇анд̇ий’’д̇и. –

Idheva nikkhippa sarīradehaṃ, kāyassa bhedā nirayaṃ vajantī’’ti. –

имам̣ г̇аат̇ам̣ вад̇ваа д̇хаммз тид̇аанам̣ д̣̇звалогабадилаабхам̣ д̣̇ассзд̇ум̣ г̇аат̇амааха –

Imaṃ gāthaṃ vatvā dhamme ṭhitānaṃ devalokapaṭilābhaṃ dassetuṃ gāthamāha –

208.

‘‘яз гзжимз суг̇г̇ад̇имаасамаанаа, д̇хаммз тид̇аа сам̣яамз сам̣вибхааг̇з;

‘‘Ye kecime suggatimāsamānā, dhamme ṭhitā saṃyame saṃvibhāge;

ид̇хзва нигкибба сарийрад̣̇зхам̣, гааяасса бхзд̣̇аа суг̇ад̇им̣ важ̇анд̇ий’’д̇и.

Idheva nikkhippa sarīradehaṃ, kāyassa bhedā sugatiṃ vajantī’’ti.

д̇ад̇т̇а аасамаанаад̇и аасийсанд̇аа. яз гзжи суг̇ад̇им̣ аасийсанд̇и, саб̣б̣з д̇з сам̣яамасан̇каад̇з д̣̇асасийлад̇хаммз сам̣вибхааг̇асан̇каад̇з д̣̇аанад̇хаммз жа тид̇аа худ̇ваа ид̇ха сарийрасан̇каад̇ам̣ д̣̇зхам̣ нигкибид̇ваа д̇асса гааяасса бхзд̣̇аа суг̇ад̇им̣ важ̇анд̇ийд̇и ад̇т̇о.

Tattha āsamānāti āsīsantā. Ye keci sugatiṃ āsīsanti, sabbe te saṃyamasaṅkhāte dasasīladhamme saṃvibhāgasaṅkhāte dānadhamme ca ṭhitā hutvā idha sarīrasaṅkhātaṃ dehaṃ nikkhipitvā tassa kāyassa bhedā sugatiṃ vajantīti attho.

звам̣ вад̇ваа жа бана, ‘‘госияа, на маяам̣ д̇ава санд̇игз бааяаасад̇т̇ааяа ааг̇ад̇аа, гаарун̃н̃зна бана д̇ам̣ анугамбамаанаа ааг̇ад̇аамхаа’’д̇и д̇асса багаасзд̇ум̣ ааха –

Evaṃ vatvā ca pana, ‘‘kosiya, na mayaṃ tava santike pāyāsatthāya āgatā, kāruññena pana taṃ anukampamānā āgatāmhā’’ti tassa pakāsetuṃ āha –

209.

‘‘д̇вам̣ носи н̃аад̇и буримаасу ж̇аад̇ису, со мажчарий росаго баабад̇хаммо;

‘‘Tvaṃ nosi ñāti purimāsu jātisu, so maccharī rosako pāpadhammo;

д̇авзва ад̇т̇ааяа ид̇хааг̇ад̇амхаа, маа баабад̇хаммо нираяам̣ г̇амид̇т̇аа’’д̇и.

Taveva atthāya idhāgatamhā, mā pāpadhammo nirayaṃ gamitthā’’ti.

д̇ад̇т̇а сод̇и со д̇вам̣. маа баабад̇хаммод̇и аяам̣ амхаагам̣ н̃аад̇и баабад̇хаммо маа нираяам̣ аг̇амаад̇и зд̇ад̣̇ад̇т̇ам̣ ааг̇ад̇амхаад̇и ад̇т̇о.

Tattha soti so tvaṃ. Mā pāpadhammoti ayaṃ amhākaṃ ñāti pāpadhammo mā nirayaṃ agamāti etadatthaṃ āgatamhāti attho.

д̇ам̣ суд̇ваа госияо ‘‘ад̇т̇агаамаа гира мз, зд̇з мам̣ нираяаа уд̣̇д̇харид̇ваа саг̇г̇з бад̇идтаабзд̇угаамаа’’д̇и д̇удтажид̇д̇о ааха –

Taṃ sutvā kosiyo ‘‘atthakāmā kira me, ete maṃ nirayā uddharitvā sagge patiṭṭhāpetukāmā’’ti tuṭṭhacitto āha –

210.

‘‘ад̣̇д̇хаа мам̣ во хид̇агаамаа, яам̣ мам̣ саманусаасат̇а;

‘‘Addhā maṃ vo hitakāmā, yaṃ maṃ samanusāsatha;

сохам̣ д̇ат̇аа гариссаами, саб̣б̣ам̣ вуд̇д̇ам̣ хид̇зсибхи.

Sohaṃ tathā karissāmi, sabbaṃ vuttaṃ hitesibhi.

211.

‘‘зсаахамаж̇ж̇зва убарамаами, на жаахам̣ гин̃жи гарзяяа баабам̣;

‘‘Esāhamajjeva uparamāmi, na cāhaṃ kiñci kareyya pāpaṃ;

на жааби мз гин̃жи ад̣̇зяяамад̇т̇и, на жаабид̣̇ад̇ваа уд̣̇агам̣ биваами.

Na cāpi me kiñci adeyyamatthi, na cāpidatvā udakaṃ pivāmi.

212.

‘‘зван̃жа мз д̣̇ад̣̇ад̇о саб̣б̣агаалам̣, бхог̇аа имз ваасава кийяиссанд̇и;

‘‘Evañca me dadato sabbakālaṃ, bhogā ime vāsava khīyissanti;

д̇ад̇о ахам̣ баб̣б̣аж̇иссаами сагга, хид̇ваана гаамаани яат̇од̇хигааний’’д̇и.

Tato ahaṃ pabbajissāmi sakka, hitvāna kāmāni yathodhikānī’’ti.

д̇ад̇т̇а манд̇и мама. вод̇и д̇умхз. яам̣ манд̇и язна мам̣ саманусаасат̇а, д̇зна мз д̇умхз хид̇агаамаа. д̇ат̇аад̇и яат̇аа вад̣̇ат̇а, д̇ат̇зва гариссаами. убарамаамийд̇и мажчарибхаавад̇о убарамаами. ад̣̇зяяамад̇т̇ийд̇и ид̇о бадтааяа жа мама аалобад̇о убад̣дхамби ад̣̇зяяам̣ наама над̇т̇и, на жаабид̣̇ад̇ваад̇и уд̣̇агабасад̇амби жаахам̣ лабхид̇ваа ад̣̇ад̇ваа на бивиссаами. кийяиссанд̇ийд̇и вигкийяиссанд̇и. яат̇од̇хигаанийд̇и вад̇т̇угаамагилзсагаамавасзна яат̇аатид̇агодтаасааниязва.

Tattha manti mama. Voti tumhe. Yaṃ manti yena maṃ samanusāsatha, tena me tumhe hitakāmā. Tathāti yathā vadatha, tatheva karissāmi. Uparamāmīti maccharibhāvato uparamāmi. Adeyyamatthīti ito paṭṭhāya ca mama ālopato upaḍḍhampi adeyyaṃ nāma natthi, na cāpidatvāti udakapasatampi cāhaṃ labhitvā adatvā na pivissāmi. Khīyissantīti vikkhīyissanti. Yathodhikānīti vatthukāmakilesakāmavasena yathāṭhitakoṭṭhāsāniyeva.

сагго мажчарияагосияам̣ д̣̇амзд̇ваа ниб̣б̣исзванам̣ гад̇ваа д̣̇аанапалам̣ ж̇аанаабзд̇ваа д̇хаммад̣̇зсанааяа бан̃жасу сийлзсу бад̇идтаабзд̇ваа сад̣̇д̇хим̣ д̇зхи д̣̇званаг̇арамзва г̇ад̇о. мажчарияагосияоби наг̇арам̣ бависид̇ваа рааж̇аанам̣ ануж̇аанаабзд̇ваа ‘‘г̇ахид̇аг̇ахид̇абхааж̇анаани буурзд̇ваа г̇ан̣ханд̇уу’’д̇и яаажагаанам̣ д̇ханам̣ д̣̇ад̇ваа д̇асмим̣ кийн̣з нигкамма химаванд̇ад̇о д̣̇агкин̣абассз г̇ан̇г̇ааяа жзва згасса жа ж̇аад̇ассарасса анд̇арз бан̣н̣асаалам̣ гад̇ваа баб̣б̣аж̇ид̇ваа ванамуулапалаахааро д̇ад̇т̇а жирам̣ вихааси, ж̇арам̣ баабун̣и. д̇ад̣̇аа саггасса аасаа сад̣̇д̇хаа сирий хирийд̇и жад̇ассо д̇хийд̇аро хонд̇и. д̇аа б̣ахум̣ д̣̇иб̣б̣аг̇анд̇хамаалам̣ аад̣̇ааяа уд̣̇агагийл̣анад̇т̇ааяа анод̇ад̇д̇ад̣̇ахам̣ г̇анд̇ваа д̇ад̇т̇а гийл̣ид̇ваа маносилаад̇алз нисийд̣̇им̣су. д̇асмим̣ кан̣з наарад̣̇о наама б̣раахман̣ад̇аабасо д̇аавад̇им̣сабхаванам̣ д̣̇иваавихаарад̇т̇ааяа г̇анд̇ваа нанд̣̇анаванажид̇д̇алад̇ааванзсу д̣̇иваавихаарам̣ гад̇ваа баарижчад̇д̇агабубпам̣ чад̇д̇ам̣ вияа чааяад̇т̇ааяа д̇хаараяамаано маносилаад̇аламад̇т̇агзна ад̇д̇ано васанадтаанам̣ ган̃жанаг̇ухам̣ г̇ажчад̇и. ат̇а д̇аа д̇асса хад̇т̇з д̇ам̣ бубпам̣ д̣̇исваа яаажим̣су. д̇амад̇т̇ам̣ багаасзнд̇о сад̇т̇аа ааха –

Sakko macchariyakosiyaṃ dametvā nibbisevanaṃ katvā dānaphalaṃ jānāpetvā dhammadesanāya pañcasu sīlesu patiṭṭhāpetvā saddhiṃ tehi devanagarameva gato. Macchariyakosiyopi nagaraṃ pavisitvā rājānaṃ anujānāpetvā ‘‘gahitagahitabhājanāni pūretvā gaṇhantū’’ti yācakānaṃ dhanaṃ datvā tasmiṃ khīṇe nikkhamma himavantato dakkhiṇapasse gaṅgāya ceva ekassa ca jātassarassa antare paṇṇasālaṃ katvā pabbajitvā vanamūlaphalāhāro tattha ciraṃ vihāsi, jaraṃ pāpuṇi. Tadā sakkassa āsā saddhā sirī hirīti catasso dhītaro honti. Tā bahuṃ dibbagandhamālaṃ ādāya udakakīḷanatthāya anotattadahaṃ gantvā tattha kīḷitvā manosilātale nisīdiṃsu. Tasmiṃ khaṇe nārado nāma brāhmaṇatāpaso tāvatiṃsabhavanaṃ divāvihāratthāya gantvā nandanavanacittalatāvanesu divāvihāraṃ katvā pāricchattakapupphaṃ chattaṃ viya chāyatthāya dhārayamāno manosilātalamatthakena attano vasanaṭṭhānaṃ kañcanaguhaṃ gacchati. Atha tā tassa hatthe taṃ pupphaṃ disvā yāciṃsu. Tamatthaṃ pakāsento satthā āha –

213.

‘‘наг̇уд̇д̇амз г̇ириварз г̇анд̇хамаад̣̇анз, мод̣̇анд̇и д̇аа д̣̇звавараабхибаалид̇аа;

‘‘Naguttame girivare gandhamādane, modanti tā devavarābhipālitā;

ат̇ааг̇амаа исиваро саб̣б̣алогаг̇уу, субубпид̇ам̣ д̣̇умаварасаакамаад̣̇ияа.

Athāgamā isivaro sabbalokagū, supupphitaṃ dumavarasākhamādiya.

214.

‘‘сужим̣ суг̇анд̇хам̣ д̇ид̣̇асзхи саггад̇ам̣, бубпуд̇д̇амам̣ амараварзхи сзвид̇ам̣;

‘‘Suciṃ sugandhaṃ tidasehi sakkataṃ, pupphuttamaṃ amaravarehi sevitaṃ;

алад̣̇д̇ха мажжзхива д̣̇аанавзхи ваа, ан̃н̃ад̇ра д̣̇звзхи д̇ад̣̇аарахам̣ хид̣̇ам̣.

Aladdha maccehiva dānavehi vā, aññatra devehi tadārahaṃ hidaṃ.

215.

‘‘д̇ад̇о жад̇ассо ганагад̇д̇ажуубамаа, удтааяа наарияо бамад̣̇аад̇хибаа муним̣;

‘‘Tato catasso kanakattacūpamā, uṭṭhāya nāriyo pamadādhipā muniṃ;

аасаа жа сад̣̇д̇хаа жа сирий д̇ад̇о хирий, ижжаб̣равум̣ наарад̣̇ад̣̇зва б̣раахман̣ам̣.

Āsā ca saddhā ca sirī tato hirī, iccabravuṃ nāradadeva brāhmaṇaṃ.

216.

‘‘сажз ануд̣̇д̣̇идтам̣ д̇аяаа махаамуни, бубпам̣ имам̣ бааричад̇д̇асса б̣рамхз;

‘‘Sace anuddiṭṭhaṃ tayā mahāmuni, pupphaṃ imaṃ pārichattassa bramhe;

д̣̇ад̣̇аахи но саб̣б̣аа г̇ад̇и д̇з иж̇жхад̇у, д̇увамби но хохи яат̇зва ваасаво.

Dadāhi no sabbā gati te ijjhatu, tuvampi no hohi yatheva vāsavo.

217.

‘‘д̇ам̣ яаажамаанаабхисамзгка наарад̣̇о, ижжаб̣равий сам̣галахам̣ уд̣̇ийраяи;

‘‘Taṃ yācamānābhisamekkha nārado, iccabravī saṃkalahaṃ udīrayi;

на маяхамад̇т̇ад̇т̇и имзхи гожи нам̣, яааязва во сзяяаси саа бил̣анд̇хат̇аа’’д̇и.

Na mayhamatthatthi imehi koci naṃ, yāyeva vo seyyasi sā piḷandhathā’’ti.

д̇ад̇т̇а г̇ириварзд̇и буримасса взважанам̣. д̣̇звавараабхибаалид̇аад̇и саггзна рагкид̇аа. саб̣б̣алогаг̇ууд̇и д̣̇звалогз жа мануссалогз жа саб̣б̣ад̇т̇а г̇аманасамад̇т̇о. д̣̇умаварасаакамаад̣̇ияаад̇и саакааяа ж̇аад̇ад̇д̇аа д̣̇умаварасааканд̇и лад̣̇д̇ханаамам̣ бубпам̣ г̇ахзд̇ваа. саггад̇анд̇и гад̇асаггаарам̣. амараварзхийд̇и саггам̣ санд̇хааяа вуд̇д̇ам̣. ан̃н̃ад̇ра д̣̇звзхийд̇и табзд̇ваа д̣̇звз жа ид̣̇д̇химанд̇з жа ан̃н̃зхи мануссзхи ваа яагкаад̣̇ийхи ваа алад̣̇д̇хам̣. д̇ад̣̇аарахам̣ хид̣̇анд̇и д̇зсам̣язва хи д̇ам̣ арахам̣ анужчавигам̣. ганагад̇д̇ажуубамаад̇и ганагуубамаа д̇ажаа. удтааяаад̇и аяяо маалааг̇анд̇хавилзбанаад̣̇ибадивирад̇о бубпам̣ на бил̣анд̇хиссад̇и, згасмим̣ бад̣̇зсз чад̣д̣зссад̇и, зт̇а д̇ам̣ яаажид̇ваа бубпам̣ бил̣анд̇хиссаамаад̇и хад̇т̇з басаарзд̇ваа яаажамаанаа згаббахаарзнзва удтахид̇ваа. бамад̣̇аад̇хибаад̇и бамад̣̇аанам̣ уд̇д̇амаа. мунинд̇и исим̣.

Tattha girivareti purimassa vevacanaṃ. Devavarābhipālitāti sakkena rakkhitā. Sabbalokagūti devaloke ca manussaloke ca sabbattha gamanasamattho. Dumavarasākhamādiyāti sākhāya jātattā dumavarasākhanti laddhanāmaṃ pupphaṃ gahetvā. Sakkatanti katasakkāraṃ. Amaravarehīti sakkaṃ sandhāya vuttaṃ. Aññatra devehīti ṭhapetvā deve ca iddhimante ca aññehi manussehi vā yakkhādīhi vā aladdhaṃ. Tadārahaṃ hidanti tesaṃyeva hi taṃ arahaṃ anucchavikaṃ. Kanakattacūpamāti kanakūpamā tacā. Uṭṭhāyāti ayyo mālāgandhavilepanādipaṭivirato pupphaṃ na piḷandhissati, ekasmiṃ padese chaḍḍessati, etha taṃ yācitvā pupphaṃ piḷandhissāmāti hatthe pasāretvā yācamānā ekappahāreneva uṭṭhahitvā. Pamadādhipāti pamadānaṃ uttamā. Muninti isiṃ.

ануд̣̇д̣̇идтанд̇и ‘‘асугасса наама д̣̇ассаамий’’д̇и на уд̣̇д̣̇идтам̣. саб̣б̣аа г̇ад̇и д̇з иж̇жхад̇ууд̇и саб̣б̣аа д̇з жид̇д̇аг̇ад̇и иж̇жхад̇у, бад̇т̇ид̇абад̇т̇ид̇асса лаабхий хохийд̇и д̇асса т̇улиман̇г̇алам̣ вад̣̇анд̇и. яат̇зва ваасавод̇и яат̇аа амхаагам̣ бид̇аа ваасаво ижчид̇ижчид̇ам̣ д̣̇зд̇и, д̇ат̇зва но д̇вамби хохийд̇и. д̇анд̇и д̇ам̣ бубпам̣. абхисамзгкаад̇и д̣̇исваа. сам̣галаханд̇и наанааг̇аахам̣ галахавад̣дханам̣ гат̇ам̣ уд̣̇ийраяи. имзхийд̇и имзхи бубпзхи наама маяхам̣ ад̇т̇о над̇т̇и, бадивирад̇о ахам̣ маалаад̇хааран̣ад̇од̇и д̣̇ийбзд̇и. яааязва во сзяяасийд̇и яаа д̇умхаагам̣ анд̇арз ж̇здтигаа. саа бил̣анд̇хат̇аад̇и саа зд̇ам̣ бил̣анд̇хад̇ууд̇и ад̇т̇о.

Anuddiṭṭhanti ‘‘asukassa nāma dassāmī’’ti na uddiṭṭhaṃ. Sabbā gati te ijjhatūti sabbā te cittagati ijjhatu, patthitapatthitassa lābhī hohīti tassa thulimaṅgalaṃ vadanti. Yatheva vāsavoti yathā amhākaṃ pitā vāsavo icchiticchitaṃ deti, tatheva no tvampi hohīti. Tanti taṃ pupphaṃ. Abhisamekkhāti disvā. Saṃkalahanti nānāgāhaṃ kalahavaḍḍhanaṃ kathaṃ udīrayi. Imehīti imehi pupphehi nāma mayhaṃ attho natthi, paṭivirato ahaṃ mālādhāraṇatoti dīpeti. Yāyeva vo seyyasīti yā tumhākaṃ antare jeṭṭhikā. Sā piḷandhathāti sā etaṃ piḷandhatūti attho.

д̇аа жад̇ассоби д̇асса важанам̣ суд̇ваа г̇аат̇амаахам̣су –

Tā catassopi tassa vacanaṃ sutvā gāthamāhaṃsu –

218.

‘‘д̇вам̣ нод̇д̇амзваабхисамзгка наарад̣̇а, яассижчаси д̇ассаа ануббавзжчасу;

‘‘Tvaṃ nottamevābhisamekkha nārada, yassicchasi tassā anuppavecchasu;

яассаа хи но наарад̣̇а д̇вам̣ бад̣̇ассаси, сааязва но хзхид̇и сздтасаммад̇аа’’д̇и.

Yassā hi no nārada tvaṃ padassasi, sāyeva no hehiti seṭṭhasammatā’’ti.

д̇ад̇т̇а д̇вам̣ нод̇д̇амзваад̇и уд̇д̇амамахаамуни д̇вамзва но убад̇хаарзхи. д̇аасам̣ важанам̣ суд̇ваа наарад̣̇о д̇аа аалабанд̇о г̇аат̇амааха –

Tattha tvaṃ nottamevāti uttamamahāmuni tvameva no upadhārehi. Tāsaṃ vacanaṃ sutvā nārado tā ālapanto gāthamāha –

219.

‘‘агалламзд̇ам̣ важанам̣ суг̇ад̇д̇з, го б̣раахман̣о сам̣галахам̣ уд̣̇ийраяз;

‘‘Akallametaṃ vacanaṃ sugatte, ko brāhmaṇo saṃkalahaṃ udīraye;

г̇анд̇ваана бхууд̇аад̇хибамзва бужчат̇а, сажз на ж̇аанаат̇а ид̇худ̇д̇амаад̇хамз’’нд̇и.

Gantvāna bhūtādhipameva pucchatha, sace na jānātha idhuttamādhame’’nti.

д̇ассад̇т̇о – бхад̣̇д̣̇з суг̇ад̇д̇з, ид̣̇ам̣ д̇умхзхи вуд̇д̇ам̣ важанам̣ мама аяуд̇д̇ам̣, зван̃хи сад̇и маяаа д̇умхзсу згам̣ сздтам̣, сзсаа хийнаа гаронд̇зна галахо вад̣дхид̇о бхависсад̇и, го б̣аахид̇абаабо б̣раахман̣о галахам̣ уд̣̇ийраяз вад̣дхзяяа. зваруубасса хи галахавад̣дханам̣ наама аяуд̇д̇ам̣, д̇асмаа ид̇о г̇ад̇ваа ад̇д̇ано бид̇арам̣ бхууд̇аад̇хибам̣ саггамзва бужчат̇а, сажз ад̇д̇ано уд̇д̇амам̣ ад̇хаман̃жа на ж̇аанаат̇аад̇и.

Tassattho – bhadde sugatte, idaṃ tumhehi vuttaṃ vacanaṃ mama ayuttaṃ, evañhi sati mayā tumhesu ekaṃ seṭṭhaṃ, sesā hīnā karontena kalaho vaḍḍhito bhavissati, ko bāhitapāpo brāhmaṇo kalahaṃ udīraye vaḍḍheyya. Evarūpassa hi kalahavaḍḍhanaṃ nāma ayuttaṃ, tasmā ito gatvā attano pitaraṃ bhūtādhipaṃ sakkameva pucchatha, sace attano uttamaṃ adhamañca na jānāthāti.

д̇ад̇о сад̇т̇аа г̇аат̇амааха –

Tato satthā gāthamāha –

220.

‘‘д̇аа наарад̣̇зна барамаббагобид̇аа, уд̣̇ийрид̇аа ван̣н̣амад̣̇зна мад̇д̇аа;

‘‘Tā nāradena paramappakopitā, udīritā vaṇṇamadena mattā;

сагаасз г̇анд̇ваана сахассажагкуно, бужчим̣су бхууд̇аад̇хибам̣ гаа ну сзяяасий’’д̇и.

Sakāse gantvāna sahassacakkhuno, pucchiṃsu bhūtādhipaṃ kā nu seyyasī’’ti.

д̇ад̇т̇а барамаббагобид̇аад̇и бубпам̣ ад̣̇ад̣̇анд̇зна ад̇ивияа гобид̇аа д̇асса губид̇аа худ̇ваа. уд̣̇ийрид̇аад̇и ‘‘бхууд̇аад̇хибамзва бужчат̇аа’’д̇и вуд̇д̇аа. сахассажагкунод̇и саггасса санд̇игам̣ г̇анд̇ваа. гаа нууд̇и амхаагам̣ анд̇арз гад̇амаа уд̇д̇амаад̇и бужчим̣су.

Tattha paramappakopitāti pupphaṃ adadantena ativiya kopitā tassa kupitā hutvā. Udīritāti ‘‘bhūtādhipameva pucchathā’’ti vuttā. Sahassacakkhunoti sakkassa santikaṃ gantvā. Kā nūti amhākaṃ antare katamā uttamāti pucchiṃsu.

звам̣ бужчид̇ваа тид̇аа –

Evaṃ pucchitvā ṭhitā –

221.

‘‘д̇аа д̣̇исваа ааяад̇д̇аманаа буринд̣̇ад̣̇о, ижжаб̣равий д̣̇зваваро гад̇ан̃ж̇алий;

‘‘Tā disvā āyattamanā purindado, iccabravī devavaro katañjalī;

саб̣б̣аава во хот̇а суг̇ад̇д̇з саад̣̇исий, гонзва бхад̣̇д̣̇з галахам̣ уд̣̇ийраяий’’д̇и.

Sabbāva vo hotha sugatte sādisī, koneva bhadde kalahaṃ udīrayī’’ti.

д̇ад̇т̇а д̇аа д̣̇исваад̇и, бхигкавз, жад̇ассоби ад̇д̇ано санд̇игам̣ ааг̇ад̇аа д̣̇исваа. ааяад̇д̇аманаад̇и уссуггаманаа б̣яаавадажид̇д̇аа. гад̇ан̃ж̇алийд̇и намассамаанаахи д̣̇звад̇аахи баг̇г̇ахид̇ан̃ж̇алий. саад̣̇исийд̇и саб̣б̣аава д̇умхз саад̣̇исияо. го нзваад̇и го ну звам̣. галахам̣ уд̣̇ийраяийд̇и ид̣̇ам̣ наанааг̇аахам̣ виг̇г̇ахам̣ гат̇зси вад̣дхзси.

Tattha tā disvāti, bhikkhave, catassopi attano santikaṃ āgatā disvā. Āyattamanāti ussukkamanā byāvaṭacittā. Katañjalīti namassamānāhi devatāhi paggahitañjalī. Sādisīti sabbāva tumhe sādisiyo. Ko nevāti ko nu evaṃ. Kalahaṃ udīrayīti idaṃ nānāgāhaṃ viggahaṃ kathesi vaḍḍhesi.

ат̇асса д̇аа гат̇аяамаанаа г̇аат̇амаахам̣су –

Athassa tā kathayamānā gāthamāhaṃsu –

222.

‘‘яо саб̣б̣алогажжарид̇о махаамуни, д̇хаммз тид̇о наарад̣̇о сажжаниггамо;

‘‘Yo sabbalokaccarito mahāmuni, dhamme ṭhito nārado saccanikkamo;

со ноб̣рави г̇ириварз г̇анд̇хамаад̣̇анз, г̇анд̇ваана бхууд̇аад̇хибамзва бужчат̇а;

So nobravi girivare gandhamādane, gantvāna bhūtādhipameva pucchatha;

сажз на ж̇аанаат̇а ид̇худ̇д̇амаад̇хама’’нд̇и.

Sace na jānātha idhuttamādhama’’nti.

д̇ад̇т̇а сажжаниггамод̇и д̇ат̇абараггамо.

Tattha saccanikkamoti tathaparakkamo.

д̇ам̣ суд̇ваа сагго ‘‘имаа жад̇ассоби маяхам̣ д̇хийд̇арова, сажаахам̣ ‘зд̇аасу згаа г̇ун̣асамбаннаа уд̇д̇амаа’д̇и вагкаами, сзсаа гуж̇жхиссанд̇и, на саггаа аяам̣ ад̣д̣о винижчинид̇ум̣, имаа химаванд̇з госияад̇аабасасса санд̇игам̣ бзсзсаами, со зд̇аасам̣ ад̣д̣ам̣ винижчиниссад̇ий’’д̇и жинд̇зд̇ваа ‘‘ахам̣ д̇умхаагам̣ ад̣д̣ам̣ на винижчиниссаами, химаванд̇з госияо наама д̇аабасо ад̇т̇и, д̇ассаахам̣ ад̇д̇ано суд̇хаабхож̇анам̣ бзсзссаами, со барасса ад̣̇ад̇ваа на бхун̃ж̇ад̇и, д̣̇ад̣̇анд̇о жа вижинид̇ваа г̇ун̣аванд̇аанам̣ д̣̇зд̇и, яаа д̇умхзсу д̇асса хад̇т̇ад̇о бхад̇д̇ам̣ лабхиссад̇и, саа уд̇д̇амаа бхависсад̇ий’’д̇и аажигканд̇о г̇аат̇амааха –

Taṃ sutvā sakko ‘‘imā catassopi mayhaṃ dhītarova, sacāhaṃ ‘etāsu ekā guṇasampannā uttamā’ti vakkhāmi, sesā kujjhissanti, na sakkā ayaṃ aḍḍo vinicchinituṃ, imā himavante kosiyatāpasassa santikaṃ pesesāmi, so etāsaṃ aḍḍaṃ vinicchinissatī’’ti cintetvā ‘‘ahaṃ tumhākaṃ aḍḍaṃ na vinicchinissāmi, himavante kosiyo nāma tāpaso atthi, tassāhaṃ attano sudhābhojanaṃ pesessāmi, so parassa adatvā na bhuñjati, dadanto ca vicinitvā guṇavantānaṃ deti, yā tumhesu tassa hatthato bhattaṃ labhissati, sā uttamā bhavissatī’’ti ācikkhanto gāthamāha –

223.

‘‘асу б̣рахааран̃н̃ажаро махаамуни, наад̣̇ад̇ваа бхад̇д̇ам̣ вараг̇ад̇д̇з бхун̃ж̇ад̇и;

‘‘Asu brahāraññacaro mahāmuni, nādatvā bhattaṃ varagatte bhuñjati;

вижзяяа д̣̇аанаани д̣̇ад̣̇аад̇и госияо,

Viceyya dānāni dadāti kosiyo,

яассаа хи со д̣̇ассад̇и саава сзяяасий’’д̇и.

Yassā hi so dassati sāva seyyasī’’ti.

д̇ад̇т̇а б̣рахааран̃н̃ад̇харод̇и махаааран̃н̃аваасий.

Tattha brahāraññadharoti mahāaraññavāsī.

ид̇и со д̇аабасасса санд̇игам̣ бзсзд̇ваа маад̇алим̣ баггосаабзд̇ваа д̇асса санд̇игам̣ бзсзнд̇о ананд̇арам̣ г̇аат̇амааха –

Iti so tāpasassa santikaṃ pesetvā mātaliṃ pakkosāpetvā tassa santikaṃ pesento anantaraṃ gāthamāha –

224.

‘‘асуу хи яо саммад̇и д̣̇агкин̣ам̣ д̣̇исам̣, г̇ан̇г̇ааяа д̇ийрз химаванд̇абассани;

‘‘Asū hi yo sammati dakkhiṇaṃ disaṃ, gaṅgāya tīre himavantapassani;

са госияо д̣̇уллабхабаанабхож̇ано, д̇асса суд̇хам̣ баабаяа д̣̇звасаарат̇ий’’д̇и.

Sa kosiyo dullabhapānabhojano, tassa sudhaṃ pāpaya devasārathī’’ti.

д̇ад̇т̇а саммад̇ийд̇и васад̇и. д̣̇агкин̣анд̇и химаванд̇асса д̣̇агкин̣ааяа д̣̇исааяа. бассанийд̇и бассз.

Tattha sammatīti vasati. Dakkhiṇanti himavantassa dakkhiṇāya disāya. Passanīti passe.

д̇ад̇о сад̇т̇аа ааха –

Tato satthā āha –

225.

‘‘са маад̇алий д̣̇зваварзна бзсид̇о, сахассаяуд̇д̇ам̣ абхируяха санд̣̇анам̣;

‘‘Sa mātalī devavarena pesito, sahassayuttaṃ abhiruyha sandanaṃ;

сукиббамзва убаг̇амма ассамам̣, ад̣̇иссамаано мунино суд̇хам̣ ад̣̇аа’’д̇и.

Sukhippameva upagamma assamaṃ, adissamāno munino sudhaṃ adā’’ti.

д̇ад̇т̇а ад̣̇иссамаанод̇и, бхигкавз, со маад̇али д̣̇зварааж̇асса важанам̣ самбадижчид̇ваа д̇ам̣ ассамам̣ г̇анд̇ваа ад̣̇иссамаанагааяо худ̇ваа д̇асса суд̇хам̣ ад̣̇ааси, д̣̇ад̣̇амаано жа рад̇д̇им̣ бад̇хаанамануяун̃ж̇ид̇ваа бажжуусасамаяз аг̇г̇им̣ барижарид̇ваа вибхаад̇ааяа рад̇д̇ияаа уд̣̇знд̇ам̣ суурияам̣ намассамаанасса тид̇асса д̇асса хад̇т̇з суд̇хаабхож̇анабаад̇им̣ табзси.

Tattha adissamānoti, bhikkhave, so mātali devarājassa vacanaṃ sampaṭicchitvā taṃ assamaṃ gantvā adissamānakāyo hutvā tassa sudhaṃ adāsi, dadamāno ca rattiṃ padhānamanuyuñjitvā paccūsasamaye aggiṃ paricaritvā vibhātāya rattiyā udentaṃ sūriyaṃ namassamānassa ṭhitassa tassa hatthe sudhābhojanapātiṃ ṭhapesi.

госияо д̇ам̣ г̇ахзд̇ваа тид̇агова г̇аат̇аад̣̇ваяамааха –

Kosiyo taṃ gahetvā ṭhitakova gāthādvayamāha –

226.

‘‘уд̣̇аг̇г̇ихуд̇д̇ам̣ убад̇идтад̇о хи мз, бабхан̇гарам̣ логад̇амонуд̣̇уд̇д̇амам̣;

‘‘Udaggihuttaṃ upatiṭṭhato hi me, pabhaṅkaraṃ lokatamonuduttamaṃ;

саб̣б̣аани бхууд̇аани ад̇хижжа ваасаво;

Sabbāni bhūtāni adhicca vāsavo;

го нзва мз баан̣ису гим̣ суд̇ход̣̇ахи.

Ko neva me pāṇisu kiṃ sudhodahi.

227.

‘‘сан̇куубамам̣ сзд̇амад̇уляад̣̇ассанам̣, сужим̣ суг̇анд̇хам̣ бияаруубамаб̣бхуд̇ам̣;

‘‘Saṅkhūpamaṃ setamatulyadassanaṃ, suciṃ sugandhaṃ piyarūpamabbhutaṃ;

ад̣̇идтабуб̣б̣ам̣ мама ж̇аад̇у жагкубхи, гаа д̣̇звад̇аа баан̣ису гим̣ суд̇ход̣̇ахий’’д̇и.

Adiṭṭhapubbaṃ mama jātu cakkhubhi, kā devatā pāṇisu kiṃ sudhodahī’’ti.

д̇ад̇т̇а уд̣̇аг̇г̇ихуд̇д̇анд̇и уд̣̇агааг̇г̇ихуд̇д̇ам̣ барижарид̇ваа аг̇г̇исаалад̇о нигкамма бан̣н̣асаалад̣̇ваарз тад̇ваа бабхан̇гарам̣ логад̇амонуд̣̇ам̣ уд̇д̇амам̣ аад̣̇ижжам̣ убад̇идтад̇о мама саб̣б̣аани бхууд̇аани ад̇хижжа ад̇иггамид̇ваа вад̇д̇амаано ваасаво ну ко звам̣ мама баан̣ийсу гим̣ суд̇хам̣ гим̣ наамзд̇ам̣ од̣̇ахи. ‘‘сан̇куубама’’нд̇иаад̣̇ийхи тид̇агова суд̇хам̣ ван̣н̣зд̇и.

Tattha udaggihuttanti udakaaggihuttaṃ paricaritvā aggisālato nikkhamma paṇṇasāladvāre ṭhatvā pabhaṅkaraṃ lokatamonudaṃ uttamaṃ ādiccaṃ upatiṭṭhato mama sabbāni bhūtāni adhicca atikkamitvā vattamāno vāsavo nu kho evaṃ mama pāṇīsu kiṃ sudhaṃ kiṃ nāmetaṃ odahi. ‘‘Saṅkhūpama’’ntiādīhi ṭhitakova sudhaṃ vaṇṇeti.

д̇ад̇о маад̇али ааха –

Tato mātali āha –

228.

‘‘ахам̣ махинд̣̇зна махзси бзсид̇о, суд̇хаабхихаасим̣ д̇урид̇о махаамуни;

‘‘Ahaṃ mahindena mahesi pesito, sudhābhihāsiṃ turito mahāmuni;

ж̇аанааси мам̣ маад̇али д̣̇звасаарат̇и, бхун̃ж̇ассу бхад̇д̇уд̇д̇ама маабхиваараяи.

Jānāsi maṃ mātali devasārathi, bhuñjassu bhattuttama mābhivārayi.

229.

‘‘бхуд̇д̇аа жа саа д̣̇ваад̣̇аса ханд̇и баабагз, куд̣̇ам̣ бибаасам̣ арад̇им̣ д̣̇арагламам̣;

‘‘Bhuttā ca sā dvādasa hanti pāpake, khudaṃ pipāsaṃ aratiṃ daraklamaṃ;

год̇хуубанаахан̃жа виваад̣̇абзсун̣ам̣, сийд̇ун̣ха д̇анд̣̇ин̃жа расуд̇д̇амам̣ ид̣̇а’’нд̇и.

Kodhūpanāhañca vivādapesuṇaṃ, sītuṇha tandiñca rasuttamaṃ ida’’nti.

д̇ад̇т̇а суд̇хаабхихаасинд̇и имам̣ суд̇хаабхож̇анам̣ д̇уяхам̣ абхихарим̣. ж̇аанаасийд̇и ж̇аанаахи мам̣ д̇вам̣, ахам̣ маад̇али наама д̣̇звасаарат̇ийд̇и ад̇т̇о. маабхиваараяийд̇и на бхун̃ж̇аамийд̇и аббадигкибид̇ваа бхун̃ж̇а маа бабан̃жа гари. баабагзд̇и аяан̃хи суд̇хаа бхуд̇д̇аа д̣̇ваад̣̇аса баабад̇хаммз ханад̇и. куд̣̇анд̇и батамам̣ д̇аава чаад̇абхаавам̣ ханад̇и, д̣̇уд̇ияам̣ баанийяабибаасам̣, д̇ад̇ияам̣ угган̣тид̇ам̣, жад̇уд̇т̇ам̣ гааяад̣̇арат̇ам̣, бан̃жамам̣ гиланд̇абхаавам̣, чадтам̣ год̇хам̣, сад̇д̇амам̣ убанаахам̣, адтамам̣ виваад̣̇ам̣, навамам̣ бзсун̣ам̣, д̣̇асамам̣ сийд̇ам̣, згаад̣̇асамам̣ ун̣хам̣, д̣̇ваад̣̇асамам̣ д̇анд̣̇им̣ ааласияабхаавам̣, ид̣̇ам̣ расуд̇д̇амам̣ уд̇д̇амарасам̣ суд̇хаабхож̇анам̣ имз д̣̇ваад̣̇аса баабад̇хаммз ханад̇и.

Tattha sudhābhihāsinti imaṃ sudhābhojanaṃ tuyhaṃ abhihariṃ. Jānāsīti jānāhi maṃ tvaṃ, ahaṃ mātali nāma devasārathīti attho. Mābhivārayīti na bhuñjāmīti appaṭikkhipitvā bhuñja mā papañca kari. Pāpaketi ayañhi sudhā bhuttā dvādasa pāpadhamme hanati. Khudanti paṭhamaṃ tāva chātabhāvaṃ hanati, dutiyaṃ pānīyapipāsaṃ, tatiyaṃ ukkaṇṭhitaṃ, catutthaṃ kāyadarathaṃ, pañcamaṃ kilantabhāvaṃ, chaṭṭhaṃ kodhaṃ, sattamaṃ upanāhaṃ, aṭṭhamaṃ vivādaṃ, navamaṃ pesuṇaṃ, dasamaṃ sītaṃ, ekādasamaṃ uṇhaṃ, dvādasamaṃ tandiṃ ālasiyabhāvaṃ, idaṃ rasuttamaṃ uttamarasaṃ sudhābhojanaṃ ime dvādasa pāpadhamme hanati.

д̇ам̣ суд̇ваа госияо ад̇д̇ано вад̇асамаад̣̇аанам̣ аавигаронд̇о –

Taṃ sutvā kosiyo attano vatasamādānaṃ āvikaronto –

230.

‘‘на габбад̇ий маад̇али маяха бхун̃ж̇ид̇ум̣, буб̣б̣з ад̣̇ад̇ваа ид̇и мз вад̇уд̇д̇амам̣;

‘‘Na kappatī mātali mayha bhuñjituṃ, pubbe adatvā iti me vatuttamaṃ;

на жааби згааснамарияабууж̇ид̇ам̣, асам̣вибхааг̇ий жа сукам̣ на винд̣̇ад̇ий’’д̇и. –

Na cāpi ekāsnamariyapūjitaṃ, asaṃvibhāgī ca sukhaṃ na vindatī’’ti. –

г̇аат̇ам̣ вад̇ваа, ‘‘бханд̇з, д̇умхзхи барасса ад̣̇ад̇ваа бхож̇анз гам̣ д̣̇осам̣ д̣̇исваа ид̣̇ам̣ вад̇ам̣ самаад̣̇инна’’нд̇и маад̇алинаа будто ааха –

Gāthaṃ vatvā, ‘‘bhante, tumhehi parassa adatvā bhojane kaṃ dosaṃ disvā idaṃ vataṃ samādinna’’nti mātalinā puṭṭho āha –

231.

‘‘т̇ийгхаад̇агаа яз жимз баарад̣̇ааригаа, мид̇д̇ад̣̇д̣̇уно яз жа сабанд̇и суб̣б̣ад̇з;

‘‘Thīghātakā ye cime pāradārikā, mittadduno ye ca sapanti subbate;

саб̣б̣з жа д̇з мажчарибан̃жамаад̇хамаа, д̇асмаа ад̣̇ад̇ваа уд̣̇агамби нааснияз.

Sabbe ca te maccharipañcamādhamā, tasmā adatvā udakampi nāsniye.

232.

‘‘сохид̇т̇ияаа ваа бурисасса ваа бана, д̣̇ассаами д̣̇аанам̣ вид̣̇усамбаван̣н̣ид̇ам̣;

‘‘Sohitthiyā vā purisassa vā pana, dassāmi dānaṃ vidusampavaṇṇitaṃ;

сад̣̇д̇хаа вад̣̇ан̃н̃уу ид̇ха вийд̇амажчараа, бхаванд̇и хзд̇з сужисажжасаммад̇аа’’д̇и.

Saddhā vadaññū idha vītamaccharā, bhavanti hete sucisaccasammatā’’ti.

д̇ад̇т̇а буб̣б̣зд̇и батамам̣ ад̣̇ад̇ваа, ат̇а ваа ид̇и мз буб̣б̣з вад̇уд̇д̇амам̣ ид̣̇ам̣ буб̣б̣зва маяаа вад̇ам̣ самаад̣̇иннанд̇и д̣̇ассзд̇и. на жааби згааснамарияабууж̇ид̇анд̇и згагасса асанам̣ на ариязхи б̣уд̣̇д̇хаад̣̇ийхи бууж̇ид̇ам̣. суканд̇и д̣̇иб̣б̣амаанусигам̣ сукам̣ на лабхад̇и. т̇ийгхаад̇агаад̇и ид̇т̇игхаад̇агаа. яз жимзд̇и яз жа имз. сабанд̇ийд̇и аггосанд̇и. суб̣б̣ад̇зд̇и д̇хаммигасаман̣аб̣раахман̣з. мажчарибан̃жамаад̇и мажчарий бан̃жамо зд̇зсанд̇и мажчарибан̃жамаа. ад̇хамаад̇и имз бан̃жа ад̇хамаа наама. д̇асмаад̇и яасмаа ахам̣ бан̃жамаад̇хамабхаавабхаязна ад̣̇ад̇ваа уд̣̇агамби нааснияз на барибхун̃ж̇иссаамийд̇и имам̣ вад̇ам̣ самаад̣̇ияим̣. сохид̇т̇ияаа ваад̇и со ахам̣ ид̇т̇ияаа ваа. вид̣̇усамбаван̣н̣ид̇анд̇и вид̣̇уухи бан̣д̣ид̇зхи б̣уд̣̇д̇хаад̣̇ийхи ван̣н̣ид̇ам̣. сужисажжасаммад̇аад̇и зд̇з огаббанияасад̣̇д̇хааяа саманнааг̇ад̇аа вад̣̇ан̃н̃уу вийд̇амажчараа бурисаа сужий жзва уд̇д̇амасаммад̇аа жа хонд̇ийд̇и ад̇т̇о.

Tattha pubbeti paṭhamaṃ adatvā, atha vā iti me pubbe vatuttamaṃ idaṃ pubbeva mayā vataṃ samādinnanti dasseti. Na cāpi ekāsnamariyapūjitanti ekakassa asanaṃ na ariyehi buddhādīhi pūjitaṃ. Sukhanti dibbamānusikaṃ sukhaṃ na labhati. Thīghātakāti itthighātakā. Ye cimeti ye ca ime. Sapantīti akkosanti. Subbateti dhammikasamaṇabrāhmaṇe. Maccharipañcamāti maccharī pañcamo etesanti maccharipañcamā. Adhamāti ime pañca adhamā nāma. Tasmāti yasmā ahaṃ pañcamaadhamabhāvabhayena adatvā udakampi nāsniye na paribhuñjissāmīti imaṃ vataṃ samādiyiṃ. Sohitthiyā vāti so ahaṃ itthiyā vā. Vidusampavaṇṇitanti vidūhi paṇḍitehi buddhādīhi vaṇṇitaṃ. Sucisaccasammatāti ete okappaniyasaddhāya samannāgatā vadaññū vītamaccharā purisā sucī ceva uttamasammatā ca hontīti attho.

д̇ам̣ суд̇ваа маад̇али д̣̇иссамаанагааязна адтааси. д̇асмим̣ кан̣з д̇аа жад̇ассо д̣̇зваган̃н̃ааяо жад̇уд̣̇д̣̇исам̣ адтам̣су, сирий баажийнад̣̇исааяа адтааси, аасаа д̣̇агкин̣ад̣̇исааяа, сад̣̇д̇хаа бажчимад̣̇исааяа, хирий уд̇д̇арад̣̇исааяа. д̇амад̇т̇ам̣ багаасзнд̇о сад̇т̇аа ааха –

Taṃ sutvā mātali dissamānakāyena aṭṭhāsi. Tasmiṃ khaṇe tā catasso devakaññāyo catuddisaṃ aṭṭhaṃsu, sirī pācīnadisāya aṭṭhāsi, āsā dakkhiṇadisāya, saddhā pacchimadisāya, hirī uttaradisāya. Tamatthaṃ pakāsento satthā āha –

233.

‘‘ад̇о мад̇аа д̣̇зваварзна бзсид̇аа, ган̃н̃аа жад̇ассо ганагад̇д̇ажуубамаа;

‘‘Ato matā devavarena pesitā, kaññā catasso kanakattacūpamā;

аасаа жа сад̣̇д̇хаа жа сирий д̇ад̇о хирий, д̇ам̣ ассамам̣ ааг̇аму яад̇т̇а госияо.

Āsā ca saddhā ca sirī tato hirī, taṃ assamaṃ āgamu yattha kosiyo.

234.

‘‘д̇аа д̣̇исваа саб̣б̣о барамаббамод̣̇ид̇о, субхзна ван̣н̣зна сикаариваг̇г̇ино;

‘‘Tā disvā sabbo paramappamodito, subhena vaṇṇena sikhārivaggino;

ган̃н̃аа жад̇ассо жад̇уро жад̇уд̣̇д̣̇исаа, ижжаб̣равий маад̇алино жа саммукаа.

Kaññā catasso caturo catuddisā, iccabravī mātalino ca sammukhā.

235.

‘‘буримам̣ д̣̇исам̣ гаа д̇вам̣ бабхааси д̣̇звад̇з, алан̇гад̇аа д̇ааравараава осад̇хий;

‘‘Purimaṃ disaṃ kā tvaṃ pabhāsi devate, alaṅkatā tāravarāva osadhī;

бужчаами д̇ам̣ ган̃жанавзлливиг̇г̇ахз, аажигка мз д̇вам̣ гад̇амааси д̣̇звад̇аа.

Pucchāmi taṃ kañcanavelliviggahe, ācikkha me tvaṃ katamāsi devatā.

236.

‘‘сирааха д̣̇звий мануж̇зхи бууж̇ид̇аа, абаабасад̇д̇уубанисзвиний сад̣̇аа;

‘‘Sirāha devī manujehi pūjitā, apāpasattūpanisevinī sadā;

суд̇хаавиваад̣̇зна д̇аванд̇имааг̇ад̇аа, д̇ам̣ мам̣ суд̇хааяа варабан̃н̃а бхааж̇аяа.

Sudhāvivādena tavantimāgatā, taṃ maṃ sudhāya varapañña bhājaya.

237.

‘‘яассаахамижчаами суд̇хам̣ махаамуни, со саб̣б̣агаамзхи наро бамод̣̇ад̇и;

‘‘Yassāhamicchāmi sudhaṃ mahāmuni, so sabbakāmehi naro pamodati;

сирийд̇и мам̣ ж̇аанахи ж̇уухад̇уд̇д̇ама, д̇ам̣ мам̣ суд̇хааяа варабан̃н̃а бхааж̇аяаа’’д̇и.

Sirīti maṃ jānahi jūhatuttama, taṃ maṃ sudhāya varapañña bhājayā’’ti.

д̇ад̇т̇а ад̇од̇и д̇ад̇о. мад̇аад̇и анумад̇аа, ат̇а д̣̇зваварзна анумад̇аа жзва бзсид̇аа жаад̇и ад̇т̇о. саб̣б̣о барамаббамод̣̇ид̇од̇и анавасзсо худ̇ваа ад̇ибамод̣̇ид̇о. ‘‘саама’’нд̇иби баато, д̇аа д̣̇звад̇аа саамам̣ д̣̇исваад̇и ад̇т̇о. жад̇урод̇и жад̇ураа. аяамзва ваа баато, жаад̇уриязна саманнааг̇ад̇аад̇и ад̇т̇о. д̇ааравараад̇и д̇аарагаанам̣ вараа. ган̃жанавзлливиг̇г̇ахзд̇и ган̃жанаруубасад̣̇исасарийрз. сираахаад̇и сирий ахам̣. д̇аванд̇имааг̇ад̇аад̇и д̇ава санд̇игам̣ ааг̇ад̇аа. бхааж̇аяаад̇и яат̇аа мам̣ суд̇хаа бхаж̇ад̇и, д̇ат̇аа гарохи, суд̇хам̣ мз д̣̇зхийд̇и ад̇т̇о. ж̇аанахийд̇и ж̇аана. ж̇уухад̇уд̇д̇амаад̇и аг̇г̇им̣ ж̇уханд̇аанам̣ уд̇д̇ама.

Tattha atoti tato. Matāti anumatā, atha devavarena anumatā ceva pesitā cāti attho. Sabbo paramappamoditoti anavaseso hutvā atipamodito. ‘‘Sāma’’ntipi pāṭho, tā devatā sāmaṃ disvāti attho. Caturoti caturā. Ayameva vā pāṭho, cāturiyena samannāgatāti attho. Tāravarāti tārakānaṃ varā. Kañcanavelliviggaheti kañcanarūpasadisasarīre. Sirāhāti sirī ahaṃ. Tavantimāgatāti tava santikaṃ āgatā. Bhājayāti yathā maṃ sudhā bhajati, tathā karohi, sudhaṃ me dehīti attho. Jānahīti jāna. Jūhatuttamāti aggiṃ juhantānaṃ uttama.

д̇ам̣ суд̇ваа госияо ааха –

Taṃ sutvā kosiyo āha –

238.

‘‘сиббзна виж̇ж̇аажаран̣зна б̣уд̣̇д̇хияаа, нараа убзд̇аа баг̇ун̣аа сагаммунаа;

‘‘Sippena vijjācaraṇena buddhiyā, narā upetā paguṇā sakammunā;

д̇аяаа вихийнаа на лабханд̇и гин̃жанам̣, д̇аяид̣̇ам̣ на саад̇ху яад̣̇ид̣̇ам̣ д̇аяаа гад̇ам̣.

Tayā vihīnā na labhanti kiñcanaṃ, tayidaṃ na sādhu yadidaṃ tayā kataṃ.

239.

‘‘бассаами босам̣ аласам̣ махаг̇гхасам̣, суд̣̇уггулийнамби аруубимам̣ нарам̣;

‘‘Passāmi posaṃ alasaṃ mahagghasaṃ, sudukkulīnampi arūpimaṃ naraṃ;

д̇аяаануг̇уд̇д̇о сири ж̇аад̇имаамаби, бзсзд̇и д̣̇аасам̣ вияа бхог̇аваа сукий.

Tayānugutto siri jātimāmapi, peseti dāsaṃ viya bhogavā sukhī.

240.

‘‘д̇ам̣ д̇ам̣ асажжам̣ авибхаж̇ж̇асзвиним̣, ж̇аанаами муул̣хам̣ вид̣̇ураанубаад̇иним̣;

‘‘Taṃ taṃ asaccaṃ avibhajjaseviniṃ, jānāmi mūḷhaṃ vidurānupātiniṃ;

на д̇аад̣̇исий арахад̇и аасанууд̣̇агам̣, гуд̇о суд̇хаа г̇ажча на маяха ружжасий’’д̇и.

Na tādisī arahati āsanūdakaṃ, kuto sudhā gaccha na mayha ruccasī’’ti.

д̇ад̇т̇а сиббзнаад̇и хад̇т̇иассарат̇ад̇ханусиббаад̣̇инаа. виж̇ж̇аажаран̣знаад̇и взд̣̇ад̇д̇аяасан̇каад̇ааяа виж̇ж̇ааяа жзва сийлзна жа. баг̇ун̣аа сагаммунаад̇и ад̇д̇ано бурисагаарзна бад̇хаанаг̇ун̣асаманнааг̇ад̇аа. гин̃жананд̇и гин̃жи аббамад̇д̇агамби яасам̣ ваа сукам̣ ваа на лабханд̇и. яад̣̇ид̣̇анд̇и яам̣ зд̇ам̣ иссарияад̇т̇ааяа сиббаани уг̇г̇ан̣хид̇ваа жаранд̇аанам̣ д̇аяаа взгаллам̣ гад̇ам̣, д̇ам̣ д̇з на саад̇ху. аруубиманд̇и вируубам̣. д̇аяаануг̇уд̇д̇од̇и д̇аяаа анурагкид̇о. ж̇аад̇имаамабийд̇и ж̇аад̇исамбаннамби сиббавиж̇ж̇аажаран̣аб̣уд̣̇д̇хигаммзхи самбаннамби. бзсзд̇ийд̇и бзсанагаарагам̣ гарод̇и. д̇ам̣ д̇анд̇и д̇асмаа д̇ам̣. асажжанд̇и сабхаавасан̇каад̇з сажжз авад̇д̇анад̇ааяа асажжам̣ уд̇д̇амабхааварахид̇ам̣. авибхаж̇ж̇асзвининд̇и авибхаж̇ид̇ваа яуд̇д̇ааяуд̇д̇ам̣ аж̇аанид̇ваа сиббаад̣̇исамбаннзби ид̇арзби сзвамаанам̣. вид̣̇ураанубаад̇ининд̇и бан̣д̣ид̇аанубаад̇иним̣ бан̣д̣ид̇з баад̇зд̇ваа бот̇зд̇ваа вихзтзд̇ваа жарамаанам̣. гуд̇о суд̇хаад̇и д̇аад̣̇исааяа ниг̇г̇ун̣ааяа гуд̇о суд̇хаабхож̇анам̣, на мз ружжаси, г̇ажча маа ид̇ха д̇идтаад̇и.

Tattha sippenāti hatthiassarathadhanusippādinā. Vijjācaraṇenāti vedattayasaṅkhātāya vijjāya ceva sīlena ca. Paguṇā sakammunāti attano purisakārena padhānaguṇasamannāgatā. Kiñcananti kiñci appamattakampi yasaṃ vā sukhaṃ vā na labhanti. Yadidanti yaṃ etaṃ issariyatthāya sippāni uggaṇhitvā carantānaṃ tayā vekallaṃ kataṃ, taṃ te na sādhu. Arūpimanti virūpaṃ. Tayānuguttoti tayā anurakkhito. Jātimāmapīti jātisampannampi sippavijjācaraṇabuddhikammehi sampannampi. Pesetīti pesanakārakaṃ karoti. Taṃ tanti tasmā taṃ. Asaccanti sabhāvasaṅkhāte sacce avattanatāya asaccaṃ uttamabhāvarahitaṃ. Avibhajjasevininti avibhajitvā yuttāyuttaṃ ajānitvā sippādisampannepi itarepi sevamānaṃ. Vidurānupātininti paṇḍitānupātiniṃ paṇḍite pātetvā pothetvā viheṭhetvā caramānaṃ. Kuto sudhāti tādisāya nigguṇāya kuto sudhābhojanaṃ, na me ruccasi, gaccha mā idha tiṭṭhāti.

саа д̇зна бадигкид̇д̇аа д̇ад̇т̇званд̇арад̇хааяи. д̇ад̇о со аасааяа сад̣̇д̇хим̣ саллабанд̇о ааха –

Sā tena paṭikkhittā tatthevantaradhāyi. Tato so āsāya saddhiṃ sallapanto āha –

241.

‘‘гаа суггад̣̇аатаа бадимуггагун̣д̣алаа, жид̇д̇ан̇г̇ад̣̇аа гамб̣увимадтад̇хаариний;

‘‘Kā sukkadāṭhā paṭimukkakuṇḍalā, cittaṅgadā kambuvimaṭṭhadhārinī;

осид̇д̇аван̣н̣ам̣ барид̣̇аяха собхаси, гусаг̇г̇ирад̇д̇ам̣ абил̣аяха ман̃ж̇арим̣.

Osittavaṇṇaṃ paridayha sobhasi, kusaggirattaṃ apiḷayha mañjariṃ.

242.

‘‘миг̇ийва бханд̇аа саражаабад̇хааринаа, вираад̇хид̇аа манд̣̇амива уд̣̇игкаси;

‘‘Migīva bhantā saracāpadhārinā, virādhitā mandamiva udikkhasi;

го д̇з д̣̇уд̇ийяо ид̣̇а манд̣̇аложанз, на бхааяаси згигаа гаананз ванз’’д̇и.

Ko te dutīyo ida mandalocane, na bhāyasi ekikā kānane vane’’ti.

д̇ад̇т̇а жид̇д̇ан̇г̇ад̣̇аад̇и жид̇рзхи ан̇г̇ад̣̇зхи саманнааг̇ад̇аа. гамб̣увимадтад̇хааринийд̇и гаран̣абаринидтид̇зна вимадтасуван̣н̣аалан̇гаарад̇хаариний. осид̇д̇аван̣н̣анд̇и авасид̇д̇ауд̣̇агад̇хаараван̣н̣ам̣ д̣̇иб̣б̣ад̣̇угуулам̣. барид̣̇аяхаад̇и ниваасзд̇ваа жзва баарубид̇ваа жа. гусаг̇г̇ирад̇д̇анд̇и гусад̇ин̣аг̇г̇исикааван̣н̣ам̣. абил̣аяха ман̃ж̇аринд̇и сабаллавам̣ асогаган̣н̣игам̣ ган̣н̣з бил̣анд̇хид̇ваад̇и вуд̇д̇ам̣ ход̇и. саражаабад̇хааринаад̇и луд̣̇д̣̇зна. вираад̇хид̇аад̇и вирад̣̇д̇хабахаараа. манд̣̇амиваад̇и яат̇аа саа миг̇ий бхийд̇аа вананд̇арз тад̇ваа д̇ам̣ манд̣̇ам̣ манд̣̇ам̣ ологзд̇и, звам̣ ологзси.

Tattha cittaṅgadāti citrehi aṅgadehi samannāgatā. Kambuvimaṭṭhadhārinīti karaṇapariniṭṭhitena vimaṭṭhasuvaṇṇālaṅkāradhārinī. Osittavaṇṇanti avasittaudakadhāravaṇṇaṃ dibbadukūlaṃ. Paridayhāti nivāsetvā ceva pārupitvā ca. Kusaggirattanti kusatiṇaggisikhāvaṇṇaṃ. Apiḷayha mañjarinti sapallavaṃ asokakaṇṇikaṃ kaṇṇe piḷandhitvāti vuttaṃ hoti. Saracāpadhārināti luddena. Virādhitāti viraddhapahārā. Mandamivāti yathā sā migī bhītā vanantare ṭhatvā taṃ mandaṃ mandaṃ oloketi, evaṃ olokesi.

д̇ад̇о аасаа ааха –

Tato āsā āha –

243.

‘‘на мз д̣̇уд̇ийяо ид̇ха мад̇т̇и госияа, масаггасаараббабхавамхи д̣̇звад̇аа;

‘‘Na me dutīyo idha matthi kosiya, masakkasārappabhavamhi devatā;

аасаа суд̇хаасааяа д̇аванд̇имааг̇ад̇аа, д̇ам̣ мам̣ суд̇хааяа варабан̃н̃а бхааж̇аяаа’’д̇и.

Āsā sudhāsāya tavantimāgatā, taṃ maṃ sudhāya varapañña bhājayā’’ti.

д̇ад̇т̇а масаггасаараббабхаваад̇и д̇аавад̇им̣сабхаванз самбхаваа.

Tattha masakkasārappabhavāti tāvatiṃsabhavane sambhavā.

д̇ам̣ суд̇ваа госияо ‘‘д̇вам̣ гира яо д̇з ружжад̇и, д̇асса аасаапаланибпаад̣̇анзна аасам̣ д̣̇зси, яо д̇з на ружжад̇и, д̇асса на д̣̇зси, над̇т̇и д̇аяаа самаа бад̇т̇ид̇ад̇т̇авинаасигаа’’д̇и д̣̇ийбзнд̇о ааха –

Taṃ sutvā kosiyo ‘‘tvaṃ kira yo te ruccati, tassa āsāphalanipphādanena āsaṃ desi, yo te na ruccati, tassa na desi, natthi tayā samā patthitatthavināsikā’’ti dīpento āha –

244.

‘‘аасааяа яанд̇и ваан̣иж̇аа д̇ханзсино, наавам̣ самааруяха барзнд̇и ан̣н̣авз;

‘‘Āsāya yanti vāṇijā dhanesino, nāvaṃ samāruyha parenti aṇṇave;

д̇з д̇ад̇т̇а сийд̣̇анд̇и ат̇оби згад̣̇аа, ж̇ийнаад̇ханаа знд̇и винадтабаабхад̇аа.

Te tattha sīdanti athopi ekadā, jīnādhanā enti vinaṭṭhapābhatā.

245.

‘‘аасааяа кзд̇д̇аани гасанд̇и гассагаа, вабанд̇и б̣ийж̇аани гаронд̇убааяасо;

‘‘Āsāya khettāni kasanti kassakā, vapanti bījāni karontupāyaso;

ийд̇ийнибаад̇зна авудтид̇ааяа ваа, на гин̃жи винд̣̇анд̇и д̇ад̇о палааг̇амам̣.

Ītīnipātena avuṭṭhitāya vā, na kiñci vindanti tato phalāgamaṃ.

246.

‘‘ат̇ад̇д̇агаараани гаронд̇и бхад̇д̇усу, аасам̣ бурагкад̇ваа нараа сукзсино;

‘‘Athattakārāni karonti bhattusu, āsaṃ purakkhatvā narā sukhesino;

д̇з бхад̇д̇урад̇т̇аа ад̇иг̇аал̣хид̇аа буна, д̣̇исаа банассанд̇и алад̣̇д̇ха гин̃жанам̣.

Te bhatturatthā atigāḷhitā puna, disā panassanti aladdha kiñcanaṃ.

247.

‘‘хид̇ваана д̇хан̃н̃ан̃жа д̇ханан̃жа н̃аад̇агз, аасааяа саг̇г̇аад̇химанаа сукзсино;

‘‘Hitvāna dhaññañca dhanañca ñātake, āsāya saggādhimanā sukhesino;

д̇абанд̇и луукамби д̇абам̣ жиранд̇арам̣, гумаг̇г̇амааруяха барзнд̇и д̣̇уг̇г̇ад̇им̣.

Tapanti lūkhampi tapaṃ cirantaraṃ, kumaggamāruyha parenti duggatiṃ.

248.

‘‘аасаа висам̣ваад̣̇игасаммад̇аа имз, аасз суд̇хаасам̣ винаяассу ад̇д̇ани;

‘‘Āsā visaṃvādikasammatā ime, āse sudhāsaṃ vinayassu attani;

на д̇аад̣̇исий арахад̇и аасанууд̣̇агам̣, гуд̇о суд̇хаа г̇ажча на маяха ружжасий’’д̇и.

Na tādisī arahati āsanūdakaṃ, kuto sudhā gaccha na mayha ruccasī’’ti.

д̇ад̇т̇а барзнд̇ийд̇и багканд̣̇анд̇и. ж̇ийнаад̇ханаад̇и ж̇ийнад̇ханаа. ид̇и д̇ава васзна згз самбаж̇ж̇анд̇и згз вибаж̇ж̇анд̇и, над̇т̇и д̇аяаа сад̣̇исаа баабад̇хаммаад̇и вад̣̇ад̇и. гаронд̇убааяасод̇и д̇ам̣ д̇ам̣ гижжам̣ убааязна гаронд̇и. ийд̇ийнибаад̇знаад̇и висамаваад̇амуусигасалабхасугабаан̣агасзд̇адтигарог̇аад̣̇ийнам̣ сассубад̣̇д̣̇аваанам̣ ан̃н̃ад̇аранибаад̇зна ваа. д̇ад̇од̇и д̇ад̇о сассад̇о д̇з гин̃жи палам̣ на винд̣̇анд̇и, д̇зсамби аасажчзд̣̇анагаммам̣ д̇вамзва гаросийд̇и вад̣̇ад̇и. ат̇ад̇д̇агаараанийд̇и яуд̣̇д̇хабхуумийсу бурисагаарз. аасам̣ бурагкад̇ваад̇и иссарияаасам̣ бурад̇о гад̇ваа. бхад̇д̇урад̇т̇аад̇и саамино ад̇т̇ааяа. ад̇иг̇аал̣ид̇аад̇и бажжад̇т̇игзхи ад̇ибийл̣ид̇аа вилуд̇д̇асаабад̇зяяаа д̣̇д̇хасд̇асзнавааханаа худ̇ваа. банассанд̇ийд̇и балааяанд̇и. алад̣̇д̇ха гин̃жананд̇и гин̃жи иссарияам̣ алабхид̇ваа . ид̇и зд̇зсамби иссарияаалаабхам̣ д̇вамзва гаросийд̇и вад̣̇ад̇и. саг̇г̇аад̇химанаад̇и саг̇г̇ам̣ ад̇хиг̇анд̇уманаа. лууканд̇и нирож̇ам̣ бан̃жад̇абаад̣̇игам̣ гааяагиламат̇ам̣. жиранд̇аранд̇и жирагаалам̣. аасаа висам̣ваад̣̇игасаммад̇аа имзд̇и звам̣ имз сад̇д̇аа саг̇г̇аасааяа д̣̇уг̇г̇ад̇им̣ г̇ажчанд̇и, д̇асмаа д̇вам̣ аасаа наама висам̣ваад̣̇игасаммад̇аа висам̣ваад̣̇игаад̇и сан̇кам̣ г̇ад̇аа. аасзд̇и д̇ам̣ аалабад̇и.

Tattha parentīti pakkhandanti. Jīnādhanāti jīnadhanā. Iti tava vasena eke sampajjanti eke vipajjanti, natthi tayā sadisā pāpadhammāti vadati. Karontupāyasoti taṃ taṃ kiccaṃ upāyena karonti. Ītīnipātenāti visamavātamūsikasalabhasukapāṇakasetaṭṭhikarogādīnaṃ sassupaddavānaṃ aññataranipātena vā. Tatoti tato sassato te kiñci phalaṃ na vindanti, tesampi āsacchedanakammaṃ tvameva karosīti vadati. Athattakārānīti yuddhabhūmīsu purisakāre. Āsaṃ purakkhatvāti issariyāsaṃ purato katvā. Bhatturatthāti sāmino atthāya. Atigāḷitāti paccatthikehi atipīḷitā viluttasāpateyyā ddhastasenavāhanā hutvā. Panassantīti palāyanti. Aladdha kiñcananti kiñci issariyaṃ alabhitvā . Iti etesampi issariyālābhaṃ tvameva karosīti vadati. Saggādhimanāti saggaṃ adhigantumanā. Lūkhanti nirojaṃ pañcatapādikaṃ kāyakilamathaṃ. Cirantaranti cirakālaṃ. Āsā visaṃvādikasammatā imeti evaṃ ime sattā saggāsāya duggatiṃ gacchanti, tasmā tvaṃ āsā nāma visaṃvādikasammatā visaṃvādikāti saṅkhaṃ gatā. Āseti taṃ ālapati.

сааби д̇зна бадигкид̇д̇аа анд̇арад̇хааяи. д̇ад̇о сад̣̇д̇хааяа сад̣̇д̇хим̣ саллабанд̇о г̇аат̇амааха –

Sāpi tena paṭikkhittā antaradhāyi. Tato saddhāya saddhiṃ sallapanto gāthamāha –

249.

‘‘д̣̇ад̣̇д̣̇алламаанаа яасасаа яасассиний, ж̇игхан̃н̃анаамавхаяанам̣ д̣̇исам̣ бад̇и;

‘‘Daddallamānā yasasā yasassinī, jighaññanāmavhayanaṃ disaṃ pati;

бужчаами д̇ам̣ ган̃жанавзлливиг̇г̇ахз, аажигка мз д̇вам̣ гад̇амааси д̣̇звад̇з’’д̇и.

Pucchāmi taṃ kañcanavelliviggahe, ācikkha me tvaṃ katamāsi devate’’ti.

д̇ад̇т̇а д̣̇ад̣̇д̣̇алламаанаад̇и ж̇аламаанаа. ж̇игхан̃н̃анаамавхаяананд̇и абараад̇и жа бажчимаад̇и жа звам̣ ж̇игхан̃н̃зна лаамагзна наамзна вужжамаанам̣ д̣̇исам̣ бад̇и д̣̇ад̣̇д̣̇алламаанаа д̇идтаси.

Tattha daddallamānāti jalamānā. Jighaññanāmavhayananti aparāti ca pacchimāti ca evaṃ jighaññena lāmakena nāmena vuccamānaṃ disaṃ pati daddallamānā tiṭṭhasi.

д̇ад̇о саа г̇аат̇амааха –

Tato sā gāthamāha –

250.

‘‘сад̣̇д̇хааха д̣̇звий мануж̇зхи бууж̇ид̇аа, абаабасад̇д̇уубанисзвиний сад̣̇аа;

‘‘Saddhāha devī manujehi pūjitā, apāpasattūpanisevinī sadā;

суд̇хаавиваад̣̇зна д̇аванд̇и мааг̇ад̇аа, д̇ам̣ мам̣ суд̇хааяа варабан̃н̃а бхааж̇аяаа’’д̇и.

Sudhāvivādena tavanti māgatā, taṃ maṃ sudhāya varapañña bhājayā’’ti.

д̇ад̇т̇а сад̣̇д̇хаад̇и яасса гассажи важанабад̇д̇ияааяанаа сааваж̇ж̇ааби ход̇и анаваж̇ж̇ааби. бууж̇ид̇аад̇и анаваж̇ж̇агодтаасавасзна бууж̇ид̇аа. абаабасад̇д̇уубанисзвинийд̇и анаваж̇ж̇асад̣̇д̇хааяа жа зганд̇абад̇д̇ияааяанусабхааваара барзсуби бад̇д̇ияааяанавид̣̇аханасамад̇т̇ааяа д̣̇звад̇ааязд̇ам̣ наамам̣.

Tattha saddhāti yassa kassaci vacanapattiyāyanā sāvajjāpi hoti anavajjāpi. Pūjitāti anavajjakoṭṭhāsavasena pūjitā. Apāpasattūpanisevinīti anavajjasaddhāya ca ekantapattiyāyanusabhāvāra paresupi pattiyāyanavidahanasamatthāya devatāyetaṃ nāmaṃ.

ат̇ам̣ нам̣ госияо ‘‘имз сад̇д̇аа яасса гассажи важанам̣ сад̣̇д̣̇ахид̇ваа д̇ам̣ д̇ам̣ гаронд̇аа гад̇д̇аб̣б̣ад̇о агад̇д̇аб̣б̣амзва б̣ахуд̇арам̣ гаронд̇и, д̇ам̣ саб̣б̣ам̣ д̇аяаа гаарид̇ам̣ наама ход̇ий’’д̇и вад̇ваа звамааха –

Athaṃ naṃ kosiyo ‘‘ime sattā yassa kassaci vacanaṃ saddahitvā taṃ taṃ karontā kattabbato akattabbameva bahutaraṃ karonti, taṃ sabbaṃ tayā kāritaṃ nāma hotī’’ti vatvā evamāha –

251.

‘‘д̣̇аанам̣ д̣̇амам̣ жааг̇амат̇оби сам̣яамам̣, аад̣̇ааяа сад̣̇д̇хааяа гаронд̇и хзгад̣̇аа;

‘‘Dānaṃ damaṃ cāgamathopi saṃyamaṃ, ādāya saddhāya karonti hekadā;

т̇зяяам̣ мусаа гуудамат̇оби бзсун̣ам̣, гаронд̇и хзгз буна вижжуд̇аа д̇аяаа.

Theyyaṃ musā kūṭamathopi pesuṇaṃ, karonti heke puna viccutā tayā.

252.

‘‘бхарияаасу босо сад̣̇исийсу бзгкаваа, сийлуубабаннаасу бад̇иб̣б̣ад̇аасуби;

‘‘Bhariyāsu poso sadisīsu pekkhavā, sīlūpapannāsu patibbatāsupi;

винзд̇ваана чанд̣̇ам̣ гулид̇т̇ираасуби, гарод̇и сад̣̇д̇хам̣ буна гумбхад̣̇аасияаа.

Vinetvāna chandaṃ kulitthirāsupi, karoti saddhaṃ puna kumbhadāsiyā.

253.

‘‘д̇вамзва сад̣̇д̇хз барад̣̇аарасзвиний, баабам̣ гароси гусаламби рин̃жаси;

‘‘Tvameva saddhe paradārasevinī, pāpaṃ karosi kusalampi riñcasi;

на д̇аад̣̇исий арахад̇и аасанууд̣̇агам̣, гуд̇о суд̇хаа г̇ажча на маяха ружжасий’’д̇и.

Na tādisī arahati āsanūdakaṃ, kuto sudhā gaccha na mayha ruccasī’’ti.

д̇ад̇т̇а д̣̇аананд̇и д̣̇асавад̇т̇угам̣ бун̃н̃ажзд̇анам̣. д̣̇аманд̇и инд̣̇рияад̣̇аманам̣. жааг̇анд̇и д̣̇зяяад̇хаммабарижжааг̇ам̣. сам̣яаманд̇и сийлам̣. аад̣̇ааяа сад̣̇д̇хааяаад̇и ‘‘зд̇аани д̣̇аанаад̣̇ийни махаанисам̣саани гад̇д̇аб̣б̣ааний’’д̇и вад̣̇ад̇ам̣ важанам̣ сад̣̇д̇хааяа аад̣̇ияид̇вааби гаронд̇и згад̣̇аа. гууданд̇и д̇улаагуудаад̣̇игам̣ ваа г̇аамагуудаад̣̇игам̣ гаммам̣ ваа. гаронд̇и хзгзд̇и згз мануссаа зваруубзсу наама гаалзсу имзсан̃жа ад̇т̇ааяа т̇зяяаад̣̇ийни гад̇д̇аб̣б̣аанийд̇и гзсан̃жи важанам̣ сад̣̇д̣̇ахид̇ваа зд̇ааниби гаронд̇и. буна вижжуд̇аа д̇аяаад̇и буна д̇аяаа висуд̇д̇аа сааваж̇ж̇ад̣̇угкавибаагаанзд̇аани на гад̇д̇аб̣б̣аанийд̇и вад̣̇ад̇ам̣ важанам̣ абад̇д̇ияааяид̇вааби гаронд̇и. ид̇и д̇ава васзна сааваж̇ж̇амби анаваж̇ж̇амби гарзяяааси вад̣̇ад̇и.

Tattha dānanti dasavatthukaṃ puññacetanaṃ. Damanti indriyadamanaṃ. Cāganti deyyadhammapariccāgaṃ. Saṃyamanti sīlaṃ. Ādāya saddhāyāti ‘‘etāni dānādīni mahānisaṃsāni kattabbānī’’ti vadataṃ vacanaṃ saddhāya ādiyitvāpi karonti ekadā. Kūṭanti tulākūṭādikaṃ vā gāmakūṭādikaṃ kammaṃ vā. Karonti heketi eke manussā evarūpesu nāma kālesu imesañca atthāya theyyādīni kattabbānīti kesañci vacanaṃ saddahitvā etānipi karonti. Puna viccutā tayāti puna tayā visuttā sāvajjadukkhavipākānetāni na kattabbānīti vadataṃ vacanaṃ apattiyāyitvāpi karonti. Iti tava vasena sāvajjampi anavajjampi kareyyāsi vadati.

сад̣̇исийсууд̇и ж̇аад̇иг̇од̇д̇асийлаад̣̇ийхи сад̣̇исийсу. бзгкаваад̇и бзгкаа вужжад̇и д̇ан̣хаа, сад̇ан̣ход̇и ад̇т̇о. чанд̣̇анд̇и чанд̣̇арааг̇ам̣. гарод̇и сад̣̇д̇ханд̇и гумбхад̣̇аасияааби важанз сад̣̇д̇хам̣ гарод̇и, д̇ассаа ‘‘ахам̣ д̇умхаагам̣ ид̣̇ам̣ наама убагаарам̣ гариссаамий’’д̇и вад̣̇анд̇ияаа бад̇д̇ияааяид̇ваа гулид̇т̇ияоби чад̣д̣зд̇ваа д̇амзва бадисзвад̇и, асугаа наама д̇умхзсу бадиб̣ад̣̇д̇хажид̇д̇аад̇и гумбхад̣̇аасияааби важанз сад̣̇д̇хам̣ гад̇ваава барад̣̇аарам̣ сзвад̇и. д̇вамзва сад̣̇д̇хз барад̣̇аарасзвинийд̇и яасмаа д̇ам̣ д̇ам̣ бад̇д̇ияааяид̇ваа д̇ава васзна барад̣̇аарам̣ сзванд̇и баабам̣ гаронд̇и гусалам̣ ж̇аханд̇и, д̇асмаа д̇вамзва барад̣̇аарасзвиний д̇вам̣ баабаани гароси, гусаламби рин̃жаси, над̇т̇и д̇аяаа самаа логавинаасигаа баабад̇хаммаа, г̇ажча на мз ружжасийд̇и.

Sadisīsūti jātigottasīlādīhi sadisīsu. Pekkhavāti pekkhā vuccati taṇhā, sataṇhoti attho. Chandanti chandarāgaṃ. Karoti saddhanti kumbhadāsiyāpi vacane saddhaṃ karoti, tassā ‘‘ahaṃ tumhākaṃ idaṃ nāma upakāraṃ karissāmī’’ti vadantiyā pattiyāyitvā kulitthiyopi chaḍḍetvā tameva paṭisevati, asukā nāma tumhesu paṭibaddhacittāti kumbhadāsiyāpi vacane saddhaṃ katvāva paradāraṃ sevati. Tvameva saddhe paradārasevinīti yasmā taṃ taṃ pattiyāyitvā tava vasena paradāraṃ sevanti pāpaṃ karonti kusalaṃ jahanti, tasmā tvameva paradārasevinī tvaṃ pāpāni karosi, kusalampi riñcasi, natthi tayā samā lokavināsikā pāpadhammā, gaccha na me ruccasīti.

саа д̇ад̇т̇зва анд̇арад̇хааяи. госияоби уд̇д̇арад̇о тид̇ааяа хирияаа сад̣̇д̇хим̣ саллабанд̇о г̇аат̇аад̣̇ваяамааха –

Sā tattheva antaradhāyi. Kosiyopi uttarato ṭhitāya hiriyā saddhiṃ sallapanto gāthādvayamāha –

254.

‘‘ж̇игхан̃н̃арад̇д̇им̣ арун̣асмимуухад̇з, яаа д̣̇иссад̇и уд̇д̇амаруубаван̣н̣иний;

‘‘Jighaññarattiṃ aruṇasmimūhate, yā dissati uttamarūpavaṇṇinī;

д̇ат̇уубамаа мам̣ бадибхааси д̣̇звад̇з, аажигка мз д̇вам̣ гад̇амааси ажчараа.

Tathūpamā maṃ paṭibhāsi devate, ācikkha me tvaṃ katamāsi accharā.

255.

‘‘гаал̣аа нид̣̇аагхзрива аг̇г̇иж̇аарива, анилзрид̇аа лохид̇абад̇д̇амаалиний;

‘‘Kāḷā nidāgheriva aggijāriva, anileritā lohitapattamālinī;

гаа д̇идтаси манд̣̇амиг̇аавалогаяам̣, бхаасзсамаанаава г̇ирам̣ на мун̃жасий’’д̇и.

Kā tiṭṭhasi mandamigāvalokayaṃ, bhāsesamānāva giraṃ na muñcasī’’ti.

д̇ад̇т̇а ж̇игхан̃н̃арад̇д̇инд̇и бажчимарад̇д̇им̣, рад̇д̇ибарияосаанзд̇и ад̇т̇о. уухад̇зд̇и арун̣з уг̇г̇ад̇з. яаад̇и яаа бурад̇т̇имаа д̣̇исаа рад̇д̇асуван̣н̣ад̇ааяа уббамаруубад̇хараа худ̇ваа д̣̇иссад̇и. гаал̣аа нид̣̇аагхзриваад̇и нид̣̇аагхасамаяз гаал̣авалли вияа. аг̇г̇иж̇аариваад̇и аг̇г̇иж̇аалаа ива, сааби ниж̇жхаамакзд̇д̇зсу д̇арун̣аудтид̇агаал̣авалли вияаад̇и ад̇т̇о. лохид̇абад̇д̇амаалинийд̇и лохид̇аван̣н̣зхи бад̇д̇зхи баривуд̇аа. гаа д̇идтасийд̇и яат̇аа саа д̇арун̣агаал̣авалли ваад̇зрид̇аа вилаасамаанаа собхамаанаа д̇идтад̇и, звам̣ гаа наама д̇вам̣ д̇идтаси. бхаасзсамаанааваад̇и маяаа сад̣̇д̇хим̣ бхаасид̇угаамаа вияа хоси, на жа г̇ирам̣ мун̃жаси.

Tattha jighaññarattinti pacchimarattiṃ, rattipariyosāneti attho. Ūhateti aruṇe uggate. Yāti yā puratthimā disā rattasuvaṇṇatāya uppamarūpadharā hutvā dissati. Kāḷā nidāgherivāti nidāghasamaye kāḷavalli viya. Aggijārivāti aggijālā iva, sāpi nijjhāmakhettesu taruṇauṭṭhitakāḷavalli viyāti attho. Lohitapattamālinīti lohitavaṇṇehi pattehi parivutā. Kā tiṭṭhasīti yathā sā taruṇakāḷavalli vāteritā vilāsamānā sobhamānā tiṭṭhati, evaṃ kā nāma tvaṃ tiṭṭhasi. Bhāsesamānāvāti mayā saddhiṃ bhāsitukāmā viya hosi, na ca giraṃ muñcasi.

д̇ад̇о саа г̇аат̇амааха –

Tato sā gāthamāha –

256.

‘‘хирааха д̣̇звий мануж̇зхи бууж̇ид̇аа, абаабасад̇д̇уубанисзвиний сад̣̇аа;

‘‘Hirāha devī manujehi pūjitā, apāpasattūpanisevinī sadā;

суд̇хаавиваад̣̇зна д̇аванд̇имааг̇ад̇аа, саахам̣ на саггоми суд̇хамби яаажид̇ум̣;

Sudhāvivādena tavantimāgatā, sāhaṃ na sakkomi sudhampi yācituṃ;

гобийнаруубаа вияа яаажанид̇т̇ияаа’’д̇и.

Kopīnarūpā viya yācanitthiyā’’ti.

д̇ад̇т̇а хирааханд̇и хирий ахам̣. суд̇хамбийд̇и саа ахам̣ суд̇хаабхож̇анам̣ д̇ам̣ яаажид̇умби на саггоми. гим̣гааран̣аа? гобийнаруубаа вияа яаажанид̇т̇ияаа, яасмаа ид̇т̇ияаа яаажанаа наама гобийнаруубаа вияа рахассан̇г̇авиваран̣асад̣̇исаа ход̇и, ниллаж̇ж̇аа вияа ход̇ийд̇и ад̇т̇о.

Tattha hirāhanti hirī ahaṃ. Sudhampīti sā ahaṃ sudhābhojanaṃ taṃ yācitumpi na sakkomi. Kiṃkāraṇā? Kopīnarūpā viya yācanitthiyā, yasmā itthiyā yācanā nāma kopīnarūpā viya rahassaṅgavivaraṇasadisā hoti, nillajjā viya hotīti attho.

д̇ам̣ суд̇ваа д̇аабасо д̣̇вз г̇аат̇аа абхааси –

Taṃ sutvā tāpaso dve gāthā abhāsi –

257.

‘‘д̇хаммзна н̃ааязна суг̇ад̇д̇з лажчаси, зсо хи д̇хаммо на хи яаажанаа суд̇хаа.

‘‘Dhammena ñāyena sugatte lacchasi, eso hi dhammo na hi yācanā sudhā.

д̇ам̣ д̇ам̣ аяаажанд̇имахам̣ ниманд̇аяз, суд̇хааяа яан̃жижчаси д̇амби д̣̇амми д̇з.

Taṃ taṃ ayācantimahaṃ nimantaye, sudhāya yañcicchasi tampi dammi te.

258.

‘‘саа д̇вам̣ маяаа аж̇ж̇а сагамхи ассамз, ниманд̇ид̇аа ган̃жанавзлливиг̇г̇ахз;

‘‘Sā tvaṃ mayā ajja sakamhi assame, nimantitā kañcanavelliviggahe;

д̇уван̃хи мз саб̣б̣арасзхи бууж̇ияаа, д̇ам̣ бууж̇аяид̇ваана суд̇хамби аснияз’’д̇и.

Tuvañhi me sabbarasehi pūjiyā, taṃ pūjayitvāna sudhampi asniye’’ti.

д̇ад̇т̇а д̇хаммзнаад̇и сабхаавзна. н̃ааязнаад̇и гааран̣зна. на хи яаажанаа суд̇хаад̇и на хи яаажанааяа суд̇хаа лаб̣бхад̇и, д̇знзва гааран̣зна ид̇араа д̇иссо налабхим̣су. д̇ам̣ д̇анд̇и д̇асмаа д̇ам̣. яан̃жижчасийд̇и на гзвалам̣ ниманд̇змиязва, яан̃жа суд̇хам̣ ижчаси, д̇амби д̣̇амми д̇з. ган̃жанавзлливиг̇г̇ахзд̇и ган̃жанараасисассиригасарийрз. бууж̇ияаад̇и на гзвалам̣ суд̇хааяа, ан̃н̃зхиби саб̣б̣арасзхи д̇вам̣ маяаа бууж̇зд̇аб̣б̣аяуд̇д̇агаава. асниязд̇и д̇ам̣ бууж̇зд̇ваа сажз суд̇хааяа авасзсам̣ бхависсад̇и, ахамби бхун̃ж̇иссаами.

Tattha dhammenāti sabhāvena. Ñāyenāti kāraṇena. Na hi yācanā sudhāti na hi yācanāya sudhā labbhati, teneva kāraṇena itarā tisso nalabhiṃsu. Taṃ tanti tasmā taṃ. Yañcicchasīti na kevalaṃ nimantemiyeva, yañca sudhaṃ icchasi, tampi dammi te. Kañcanavelliviggaheti kañcanarāsisassirikasarīre. Pūjiyāti na kevalaṃ sudhāya, aññehipi sabbarasehi tvaṃ mayā pūjetabbayuttakāva. Asniyeti taṃ pūjetvā sace sudhāya avasesaṃ bhavissati, ahampi bhuñjissāmi.

д̇ад̇о абараа абхисамб̣уд̣̇д̇хаг̇аат̇аа –

Tato aparā abhisambuddhagāthā –

259.

‘‘саа госиязнаанумад̇аа ж̇уд̇иймад̇аа, ад̣̇д̇хаа хири раммам̣ баависи яассамам̣;

‘‘Sā kosiyenānumatā jutīmatā, addhā hiri rammaṃ pāvisi yassamaṃ;

уд̣̇агаванд̇ам̣ паламарияабууж̇ид̇ам̣, абаабасад̇д̇уубанисзвид̇ам̣ сад̣̇аа.

Udakavantaṃ phalamariyapūjitaṃ, apāpasattūpanisevitaṃ sadā.

260.

‘‘ругкаг̇г̇ахаанаа б̣ахугзд̇т̇а бубпид̇аа, амб̣аа бияаалаа банасаа жа гим̣сугаа;

‘‘Rukkhaggahānā bahukettha pupphitā, ambā piyālā panasā ca kiṃsukā;

собхан̃ж̇анаа лод̣̇д̣̇амат̇оби бад̣̇д̇хагаа, гзгаа жа бхан̇г̇аа д̇илагаа субубпид̇аа.

Sobhañjanā loddamathopi paddhakā, kekā ca bhaṅgā tilakā supupphitā.

261.

‘‘саалаа гарзрий б̣ахугзд̇т̇а ж̇амб̣уяо, ассад̇т̇аниг̇род̇хамад̇хугавзд̇асаа;

‘‘Sālā karerī bahukettha jambuyo, assatthanigrodhamadhukavetasā;

уд̣̇д̣̇аалагаа баадали синд̣̇уваарагаа, манун̃н̃аг̇анд̇хаа мужалинд̣̇агзд̇агаа.

Uddālakā pāṭali sinduvārakā, manuññagandhā mucalindaketakā.

262.

‘‘харзн̣угаа взл̣угаа гзн̣у д̇инд̣̇угаа, саамааганийваарамат̇оби жийнагаа;

‘‘Hareṇukā veḷukā keṇu tindukā, sāmākanīvāramathopi cīnakā;

можаа гад̣̇алий б̣ахугзд̇т̇а саалияо, бавийхаяо аабхууж̇ино жа д̇ан̣д̣улаа.

Mocā kadalī bahukettha sāliyo, pavīhayo ābhūjino ca taṇḍulā.

263.

‘‘д̇ассзвуд̇д̇арабассзна, ж̇аад̇аа богкаран̣ий сиваа;

‘‘Tassevuttarapassena, jātā pokkharaṇī sivā;

агаггасаа абаб̣бхаараа, саад̇ху аббадиг̇анд̇хигаа.

Akakkasā apabbhārā, sādhu appaṭigandhikā.

264.

‘‘д̇ад̇т̇а мажчаа саннирад̇аа, кзмино б̣ахубхож̇анаа;

‘‘Tattha macchā sanniratā, khemino bahubhojanā;

син̇г̇уу саван̇гаа сам̣гулаа, сад̇аван̇гаа жа рохид̇аа;

Siṅgū savaṅkā saṃkulā, satavaṅkā ca rohitā;

аал̣иг̇аг̇г̇арагаагин̣н̣аа, баатийнаа гаагамажчагаа.

Āḷigaggarakākiṇṇā, pāṭhīnā kākamacchakā.

265.

‘‘д̇ад̇т̇а багкий саннирад̇аа, кзмино б̣ахубхож̇анаа;

‘‘Tattha pakkhī sanniratā, khemino bahubhojanā;

хам̣саа гон̃жаа маяуураа жа, жаггаваагаа жа гуггухаа;

Haṃsā koñcā mayūrā ca, cakkavākā ca kukkuhā;

гун̣аалагаа б̣ахуу жид̇раа, сикан̣д̣ий ж̇ийваж̇ийвагаа.

Kuṇālakā bahū citrā, sikhaṇḍī jīvajīvakā.

266.

‘‘д̇ад̇т̇а баанааяа мааяанд̇и, наанаа миг̇аг̇ан̣аа б̣ахуу;

‘‘Tattha pānāya māyanti, nānā migagaṇā bahū;

сийхаа б̣яаг̇гхаа вараахаа жа, ажчагогад̇аражчаяо.

Sīhā byagghā varāhā ca, acchakokataracchayo.

267.

‘‘балаасаад̣̇аа г̇аваж̇аа жа, махим̣саа рохид̇аа руруу;

‘‘Palāsādā gavajā ca, mahiṃsā rohitā rurū;

зн̣зяяаа жа вараахаа жа, г̇ан̣ино нийгасуугараа;

Eṇeyyā ca varāhā ca, gaṇino nīkasūkarā;

гад̣̇алимиг̇аа б̣ахугзд̇т̇а, б̣ил̣аараа сасаган̣н̣игаа.

Kadalimigā bahukettha, biḷārā sasakaṇṇikā.

268.

‘‘чамааг̇ирий бубпавижид̇расант̇ад̇аа, д̣̇иж̇аабхигхудтаа д̣̇иж̇асан̇гхасзвид̇аа’’д̇и.

‘‘Chamāgirī pupphavicitrasanthatā, dijābhighuṭṭhā dijasaṅghasevitā’’ti.

д̇ад̇т̇а ж̇уд̇иймад̇аад̇и аанубхаавасамбаннзна. баависи яассаманд̇и баависи ассамам̣, яа-гааро б̣яан̃ж̇анасанд̇хигаро. уд̣̇агаванд̇анд̇и д̇зсу д̇зсу таанзсу уд̣̇агасамбаннам̣. паланд̇и анзгапаласамбаннам̣. арияабууж̇ид̇анд̇и нийваран̣ад̣̇осарахид̇зхи жхааналаабхийхи ариязхи бууж̇ид̇ам̣ басад̇т̇ам̣. ругкаг̇г̇ахаанаад̇и бубпуубаг̇апалуубаг̇аругкаг̇аханаа. собхан̃ж̇анаад̇и сиг̇г̇уругкаа. лод̣̇д̣̇амат̇оби бад̣̇д̇хагаад̇и лод̣̇д̣̇аругкаа жа бад̣̇умаругкаа жа. гзгаа жа бхан̇г̇аад̇и звам̣наамагаа ругкаа зва. гарзрийд̇и гарзриругкаа. уд̣̇д̣̇аалагаад̇и ваад̇агхаад̇агаа. мужалинд̣̇агзд̇агаад̇и мужалинд̣̇аа жа бан̃жавид̇хагзд̇агаа жа. харзн̣угаад̇и абаран̣н̣аж̇аад̇и. взл̣угаад̇и вам̣сабхзд̣̇агаа. гзн̣ууд̇и аран̃н̃амаасаа. д̇инд̣̇угаад̇и д̇имб̣аруругкаа. жийнагаад̇и куд̣̇д̣̇агарааж̇амаасаа. можаад̇и адтигагад̣̇алияо. саалияод̇и наанаббагаараа ж̇аад̇ассарам̣ убаниссааяа ж̇аад̇аа саалияо. бавийхаяод̇и наанаббагаараа вийхаяо. аабхууж̇инод̇и бхуж̇абад̇д̇аа. д̇ан̣д̣улаад̇и ниггун̣д̣агат̇усаани саяам̣ж̇аад̇ад̇ан̣д̣уласийсаани.

Tattha jutīmatāti ānubhāvasampannena. Pāvisi yassamanti pāvisi assamaṃ, ya-kāro byañjanasandhikaro. Udakavantanti tesu tesu ṭhānesu udakasampannaṃ. Phalanti anekaphalasampannaṃ. Ariyapūjitanti nīvaraṇadosarahitehi jhānalābhīhi ariyehi pūjitaṃ pasatthaṃ. Rukkhaggahānāti pupphūpagaphalūpagarukkhagahanā. Sobhañjanāti siggurukkhā. Loddamathopi paddhakāti loddarukkhā ca padumarukkhā ca. Kekā ca bhaṅgāti evaṃnāmakā rukkhā eva. Karerīti karerirukkhā. Uddālakāti vātaghātakā. Mucalindaketakāti mucalindā ca pañcavidhaketakā ca. Hareṇukāti aparaṇṇajāti. Veḷukāti vaṃsabhedakā. Keṇūti araññamāsā. Tindukāti timbarurukkhā. Cīnakāti khuddakarājamāsā. Mocāti aṭṭhikakadaliyo. Sāliyoti nānappakārā jātassaraṃ upanissāya jātā sāliyo. Pavīhayoti nānappakārā vīhayo. Ābhūjinoti bhujapattā. Taṇḍulāti nikkuṇḍakathusāni sayaṃjātataṇḍulasīsāni.

д̇ассзваад̇и, бхигкавз, д̇ассзва ассамасса уд̇д̇арад̣̇исаабхааг̇з. богкаран̣ийд̇и бан̃жавид̇хабад̣̇умасан̃чаннаа ж̇аад̇ассарабогкаран̣ий. агаггасаад̇и мажчасиббигасзваалаад̣̇игаггасарахид̇аа. абаб̣бхаараад̇и ажчиннад̇адаа самад̇ид̇т̇аа. аббадиг̇анд̇хигаад̇и абадиггуулаг̇анд̇хзна уд̣̇агзна саманнааг̇ад̇аа. д̇ад̇т̇аад̇и д̇ассаа богкаран̣ияаа. кзминод̇и абхаяаа. ‘‘син̇г̇уу’’д̇иаад̣̇ийни д̇зсам̣ мажчаанам̣ наамаани. гун̣аалагаад̇и гогилаа. жид̇раад̇и жид̇рабад̇д̇аа. сикан̣д̣ийд̇и удтид̇асикаа мораа, ан̃н̃зби ваа мад̇т̇агз ж̇аад̇асикаа багкино. баанааяа мааяанд̇ийд̇и баанааяа ааяанд̇и. балаасаад̣̇аад̇и каг̇г̇аа. г̇аваж̇аад̇и г̇аваяаа. г̇ан̣инод̇и г̇оган̣н̣аа. ган̣н̣игаад̇и ган̣н̣игамиг̇аа. чамааг̇ирийд̇и бхуумисамабад̇т̇адаа бидтибаасаан̣аа. бубпавижид̇расант̇ад̇аад̇и вижид̇рабубпасант̇ад̇аа. д̣̇иж̇аабхигхудтаад̇и мад̇хурассарзхи д̣̇иж̇зхи абхигхудтаа. зваруубаа д̇ад̇т̇а бхуумибаб̣б̣ад̇аад̇и звам̣ бхаг̇аваа госияасса ассамам̣ ван̣н̣зд̇и.

Tassevāti, bhikkhave, tasseva assamassa uttaradisābhāge. Pokkharaṇīti pañcavidhapadumasañchannā jātassarapokkharaṇī. Akakkasāti macchasippikasevālādikakkasarahitā. Apabbhārāti acchinnataṭā samatitthā. Appaṭigandhikāti apaṭikkūlagandhena udakena samannāgatā. Tatthāti tassā pokkharaṇiyā. Kheminoti abhayā. ‘‘Siṅgū’’tiādīni tesaṃ macchānaṃ nāmāni. Kuṇālakāti kokilā. Citrāti citrapattā. Sikhaṇḍīti uṭṭhitasikhā morā, aññepi vā matthake jātasikhā pakkhino. Pānāya māyantīti pānāya āyanti. Palāsādāti khaggā. Gavajāti gavayā. Gaṇinoti gokaṇṇā. Kaṇṇikāti kaṇṇikamigā. Chamāgirīti bhūmisamapatthaṭā piṭṭhipāsāṇā. Pupphavicitrasanthatāti vicitrapupphasanthatā. Dijābhighuṭṭhāti madhurassarehi dijehi abhighuṭṭhā. Evarūpā tattha bhūmipabbatāti evaṃ bhagavā kosiyassa assamaṃ vaṇṇeti.

ид̣̇аани хирид̣̇звияаа д̇ад̇т̇а бависанаад̣̇ийни д̣̇ассзд̇ум̣ ааха –

Idāni hirideviyā tattha pavisanādīni dassetuṃ āha –

269.

‘‘саа суд̇д̇ажаа нийлад̣̇умаабхиламб̣ид̇аа, виж̇ж̇уу махаамзгхариваанубаж̇ж̇ат̇а;

‘‘Sā suttacā nīladumābhilambitā, vijjū mahāmegharivānupajjatha;

д̇ассаа сусамб̣анд̇хасирам̣ гусаамаяам̣, сужим̣ суг̇анд̇хам̣ аж̇инуубасзвид̇ам̣;

Tassā susambandhasiraṃ kusāmayaṃ, suciṃ sugandhaṃ ajinūpasevitaṃ;

ад̇рижжа гожчам̣ хиримзд̇ад̣̇аб̣рави, нисийд̣̇а галяаан̣и сукаяид̣̇амаасанам̣.

Atricca kocchaṃ hirimetadabravi, nisīda kalyāṇi sukhayidamāsanaṃ.

270.

‘‘д̇ассаа д̇ад̣̇аа гожчаг̇ад̇ааяа госияо, яад̣̇ижчамаанааяа ж̇адааж̇инанд̇харо;

‘‘Tassā tadā kocchagatāya kosiyo, yadicchamānāya jaṭājinandharo;

навзхи бад̇д̇зхи саяам̣ сахууд̣̇агам̣, суд̇хаабхихаасий д̇урид̇о махаамуни.

Navehi pattehi sayaṃ sahūdakaṃ, sudhābhihāsī turito mahāmuni.

271.

‘‘саа д̇ам̣ бадиг̇г̇аяха убхохи баан̣ибхи, ижжаб̣рави ад̇д̇аманаа ж̇адаад̇харам̣;

‘‘Sā taṃ paṭiggayha ubhohi pāṇibhi, iccabravi attamanā jaṭādharaṃ;

ханд̣̇аахам̣ зд̇арахи бууж̇ид̇аа д̇аяаа, г̇ажчзяяам̣ б̣рахмз д̇ид̣̇ивам̣ ж̇ид̇аавиний.

Handāhaṃ etarahi pūjitā tayā, gaccheyyaṃ brahme tidivaṃ jitāvinī.

272.

‘‘саа госиязнаанумад̇аа ж̇уд̇иймад̇аа, уд̣̇ийрид̇аа ван̣н̣амад̣̇зна мад̇д̇аа;

‘‘Sā kosiyenānumatā jutīmatā, udīritā vaṇṇamadena mattā;

сагаасз г̇анд̇ваана сахассажагкуно, аяам̣ суд̇хаа ваасава д̣̇зхи мз ж̇аяам̣.

Sakāse gantvāna sahassacakkhuno, ayaṃ sudhā vāsava dehi me jayaṃ.

273.

‘‘д̇амзна саггоби д̇ад̣̇аа абууж̇аяи, сахинд̣̇ад̣̇зваа сураган̃н̃амуд̇д̇амам̣;

‘‘Tamena sakkopi tadā apūjayi, sahindadevā surakaññamuttamaṃ;

саа бан̃ж̇алий д̣̇звамануссабууж̇ид̇аа, навамхи гожчамхи яад̣̇аа убаависий’’д̇и.

Sā pañjalī devamanussapūjitā, navamhi kocchamhi yadā upāvisī’’ti.

д̇ад̇т̇а суд̇д̇ажаад̇и сужчавий. нийлад̣̇умаабхиламб̣ид̇аад̇и нийлзсу д̣̇умзсу абхиламб̣ид̇аа худ̇ваа, д̇ам̣ д̇ам̣ нийлад̣̇умасаакам̣ бараамасанд̇ийд̇и ад̇т̇о. махаамзгхариваад̇и д̇зна ниманд̇ид̇аа махаамзгхавиж̇ж̇у вияа д̇асса д̇ам̣ ассамам̣ баависи. д̇ассаад̇и д̇ассаа хирияаа. сусамб̣анд̇хасиранд̇и судту самб̣анд̇хасийсам̣. гусаамаяанд̇и усийраад̣̇имиссагагусад̇ин̣амаяам̣. суг̇анд̇ханд̇и усийрзна жзва ан̃н̃зна суг̇анд̇хад̇ин̣зна жа миссагад̇д̇аа суг̇анд̇хам̣. аж̇инуубасзвид̇анд̇и убариад̇т̇ад̇зна аж̇инажаммзна убасзвид̇ам̣. ад̇рижжа гожчанд̇и зваруубам̣ гожчаасанам̣ бан̣н̣асаалад̣̇ваарз ад̇т̇арид̇ваа. сукаяид̣̇амаасананд̇и сукам̣ нисийд̣̇а ид̣̇амаасанам̣.

Tattha suttacāti succhavī. Nīladumābhilambitāti nīlesu dumesu abhilambitā hutvā, taṃ taṃ nīladumasākhaṃ parāmasantīti attho. Mahāmegharivāti tena nimantitā mahāmeghavijju viya tassa taṃ assamaṃ pāvisi. Tassāti tassā hiriyā. Susambandhasiranti suṭṭhu sambandhasīsaṃ. Kusāmayanti usīrādimissakakusatiṇamayaṃ. Sugandhanti usīrena ceva aññena sugandhatiṇena ca missakattā sugandhaṃ. Ajinūpasevitanti upariatthatena ajinacammena upasevitaṃ. Atricca kocchanti evarūpaṃ kocchāsanaṃ paṇṇasāladvāre attharitvā. Sukhayidamāsananti sukhaṃ nisīda idamāsanaṃ.

яанд̇и яаавад̣̇ад̇т̇ам̣. ижчамаанааяаад̇и суд̇хам̣ ижчанд̇ияаа. навзхи бад̇д̇зхийд̇и д̇ан̇кан̣ан̃н̃зва богкаран̣ид̇о аабхад̇зхи аллабад̣̇уминибад̇д̇зхи. саяанд̇и сахад̇т̇зна. сахууд̣̇аганд̇и д̣̇агкин̣од̣̇агасахид̇ам̣. суд̇хаабхихаасийд̇и суд̇хам̣ абхихари. д̇урид̇од̇и соманассавзг̇зна д̇урид̇о. ханд̣̇аад̇и вавассаг̇г̇ад̇т̇з нибаад̇о. ж̇ид̇аавинийд̇и виж̇аяаббад̇д̇аа худ̇ваа.

Yanti yāvadatthaṃ. Icchamānāyāti sudhaṃ icchantiyā. Navehi pattehīti taṅkhaṇaññeva pokkharaṇito ābhatehi allapaduminipattehi. Sayanti sahatthena. Sahūdakanti dakkhiṇodakasahitaṃ. Sudhābhihāsīti sudhaṃ abhihari. Turitoti somanassavegena turito. Handāti vavassaggatthe nipāto. Jitāvinīti vijayappattā hutvā.

анумад̇аад̇и ид̣̇аани яат̇ааружим̣ г̇ажчаад̇и анун̃н̃аад̇аа. уд̣̇ийрид̇аад̇и д̇ид̣̇асабурам̣ г̇анд̇ваа саггасса санд̇игз аяам̣ суд̇хаад̇и уд̣̇ийраяи. сураган̃н̃анд̇и д̣̇звад̇хийд̇арам̣. уд̇д̇аманд̇и баварам̣. саа бан̃ж̇алий д̣̇звамануссабууж̇ид̇аад̇и бан̃ж̇алий д̣̇звзхи жа мануссзхи жа бууж̇ид̇аа. яад̣̇аад̇и яад̣̇аа нисийд̣̇анад̇т̇ааяа саггзна д̣̇аабид̇з навз ган̃жанабийтасан̇каад̇з гожчз саа убаависи, д̇ад̣̇аа нам̣ д̇ад̇т̇а нисиннам̣ сагго жа сзсад̣̇звад̇аа жа баарижчад̇д̇агабубпаад̣̇ийхи бууж̇аяим̣су.

Anumatāti idāni yathāruciṃ gacchāti anuññātā. Udīritāti tidasapuraṃ gantvā sakkassa santike ayaṃ sudhāti udīrayi. Surakaññanti devadhītaraṃ. Uttamanti pavaraṃ. Sā pañjalī devamanussapūjitāti pañjalī devehi ca manussehi ca pūjitā. Yadāti yadā nisīdanatthāya sakkena dāpite nave kañcanapīṭhasaṅkhāte kocche sā upāvisi, tadā naṃ tattha nisinnaṃ sakko ca sesadevatā ca pāricchattakapupphādīhi pūjayiṃsu.

звам̣ сагго д̇ам̣ бууж̇зд̇ваа жинд̇зси – ‘‘гзна ну ко гааран̣зна госияо сзсаанам̣ ад̣̇ад̇ваа имиссаава суд̇хам̣ ад̣̇аасий’’д̇и. со д̇асса гааран̣асса ж̇аананад̇т̇ааяа буна маад̇алим̣ бзсзси. д̇амад̇т̇ам̣ аави гаронд̇о сад̇т̇аа ааха –

Evaṃ sakko taṃ pūjetvā cintesi – ‘‘kena nu kho kāraṇena kosiyo sesānaṃ adatvā imissāva sudhaṃ adāsī’’ti. So tassa kāraṇassa jānanatthāya puna mātaliṃ pesesi. Tamatthaṃ āvi karonto satthā āha –

274.

‘‘д̇амзва сам̣сий бунад̣̇зва маад̇алим̣, сахассанзд̇д̇о д̇ид̣̇асаанаминд̣̇о;

‘‘Tameva saṃsī punadeva mātaliṃ, sahassanetto tidasānamindo;

г̇анд̇ваана ваагяам̣ мама б̣руухи госияам̣, аасааяа сад̣̇д̇хаа сирияаа жа госияа;

Gantvāna vākyaṃ mama brūhi kosiyaṃ, āsāya saddhā siriyā ca kosiya;

хирий суд̇хам̣ гзна малад̇т̇а хзд̇унаа’’д̇и.

Hirī sudhaṃ kena malattha hetunā’’ti.

д̇ад̇т̇а сам̣сийд̇и абхааси. ваагяам̣ мамаад̇и мама ваагяам̣ госияам̣ б̣руухи. аасааяа сад̣̇д̇хаа сирияаа жаад̇и аасаад̇о жа сад̣̇д̇хаад̇о жа сирид̇о жа хирийязва гзна хзд̇унаа суд̇хамалад̇т̇аад̇и.

Tattha saṃsīti abhāsi. Vākyaṃ mamāti mama vākyaṃ kosiyaṃ brūhi. Āsāya saddhā siriyā cāti āsāto ca saddhāto ca sirito ca hirīyeva kena hetunā sudhamalatthāti.

со д̇асса важанам̣ самбадижчид̇ваа взж̇аяанд̇арат̇амааруяха аг̇амааси. д̇амад̇т̇ам̣ багаасзнд̇о сад̇т̇аа ааха –

So tassa vacanaṃ sampaṭicchitvā vejayantarathamāruyha agamāsi. Tamatthaṃ pakāsento satthā āha –

275.

‘‘д̇ам̣ сублавад̇т̇ам̣ уд̣̇ад̇аараяий рат̇ам̣, д̣̇ад̣̇д̣̇алламаанам̣ убагаарияасаад̣̇исам̣;

‘‘Taṃ suplavatthaṃ udatārayī rathaṃ, daddallamānaṃ upakāriyasādisaṃ;

ж̇амб̣онад̣̇ийсам̣ д̇абанзяяасаннибхам̣, алан̇гад̇ам̣ ган̃жанажид̇д̇асаннибхам̣.

Jambonadīsaṃ tapaneyyasannibhaṃ, alaṅkataṃ kañcanacittasannibhaṃ.

276.

‘‘суван̣н̣ажанд̣̇зд̇т̇а б̣ахуу нибаад̇ид̇аа, хад̇т̇ий г̇аваассаа гигиб̣яаг̇гхад̣̇ийбияо;

‘‘Suvaṇṇacandettha bahū nipātitā, hatthī gavāssā kikibyagghadīpiyo;

зн̣зяяагаа лан̇гхамаязд̇т̇а багкино, миг̇зд̇т̇а взл̣урияамаяаа яуд̇хаа яуд̇аа.

Eṇeyyakā laṅghamayettha pakkhino, migettha veḷuriyamayā yudhā yutā.

277.

‘‘д̇ад̇т̇ассарааж̇ахараяо аяож̇аяум̣, д̣̇асасад̇аани сусунааг̇асаад̣̇исз;

‘‘Tatthassarājaharayo ayojayuṃ, dasasatāni susunāgasādise;

алан̇гад̇з ган̃жанаж̇аалуражчад̣̇з, аавзл̣инз сад̣̇д̣̇аг̇амз асан̇г̇ид̇з.

Alaṅkate kañcanajāluracchade, āveḷine saddagame asaṅgite.

278.

‘‘д̇ам̣ яаанасздтам̣ абхируяха маад̇али, д̣̇исаа имааяо абхинаад̣̇аяид̇т̇а;

‘‘Taṃ yānaseṭṭhaṃ abhiruyha mātali, disā imāyo abhinādayittha;

набхан̃жа сзлан̃жа ванаббад̇инин̃жа, сасааг̇арам̣ баб̣яат̇аяид̇т̇а мзд̣̇иним̣.

Nabhañca selañca vanappatiniñca, sasāgaraṃ pabyathayittha mediniṃ.

279.

‘‘са киббамзва убаг̇амма ассамам̣, бааваарамзгам̣сагад̇о гад̇ан̃ж̇алий;

‘‘Sa khippameva upagamma assamaṃ, pāvāramekaṃsakato katañjalī;

б̣ахуссуд̇ам̣ вуд̣̇д̇хам̣ винийд̇аванд̇ам̣, ижжаб̣рави маад̇али д̣̇зваб̣раахман̣ам̣.

Bahussutaṃ vuddhaṃ vinītavantaṃ, iccabravi mātali devabrāhmaṇaṃ.

280.

‘‘инд̣̇асса ваагяам̣ нисаамзхи госияа, д̣̇ууд̇о ахам̣ бужчад̇и д̇ам̣ буринд̣̇ад̣̇о;

‘‘Indassa vākyaṃ nisāmehi kosiya, dūto ahaṃ pucchati taṃ purindado;

аасааяа сад̣̇д̇хаа сирияаа жа госияа, хирий суд̇хам̣ гзна малад̇т̇а хзд̇унаа’’д̇и.

Āsāya saddhā siriyā ca kosiya, hirī sudhaṃ kena malattha hetunā’’ti.

д̇ад̇т̇а д̇ам̣ сублавад̇т̇анд̇и д̇ам̣ взж̇аяанд̇арат̇ам̣ сукзна блаванад̇т̇ам̣. уд̣̇ад̇аараяийд̇и уд̇д̇аарзси угкибид̇ваа г̇аманасаж̇ж̇амагааси. убагаарияасаад̣̇исанд̇и убагаран̣абхан̣д̣зхи сад̣̇исам̣, яат̇аа д̇асса аг̇г̇исикааяа самаанаван̣н̣аани убагаран̣аани ж̇аланд̇и, д̇ат̇зва ж̇алид̇анд̇и ад̇т̇о. ж̇амб̣онад̣̇ийсанд̇и ж̇амб̣унад̣̇асан̇каад̇ам̣ рад̇д̇асуван̣н̣амаяам̣ ийсам̣. ган̃жанажид̇д̇асаннибханд̇и, ган̃жанамаязна сад̇д̇арад̇анавижид̇д̇зна адтаман̇г̇алзна саманнааг̇ад̇ам̣. суван̣н̣ажанд̣̇зд̇т̇аад̇и суван̣н̣амаяаа жанд̣̇агаа зд̇т̇а рат̇з. хад̇т̇ийд̇и суван̣н̣араж̇ад̇аман̣имаяаа хад̇т̇ий. г̇аваад̣̇ийсуби зсзва наяо. лан̇гхамаязд̇т̇а багкинод̇и зд̇т̇а рат̇з лан̇гхамаяаа наанаарад̇анамаяаа багкиг̇ан̣ааби бадибаадияаа тид̇аа. яуд̇хаа яуд̇аад̇и ад̇д̇ано ад̇д̇ано яуд̇хзна сад̣̇д̇хим̣ яуд̇д̇аа худ̇ваа д̣̇ассид̇аа.

Tattha taṃ suplavatthanti taṃ vejayantarathaṃ sukhena plavanatthaṃ. Udatārayīti uttāresi ukkhipitvā gamanasajjamakāsi. Upakāriyasādisanti upakaraṇabhaṇḍehi sadisaṃ, yathā tassa aggisikhāya samānavaṇṇāni upakaraṇāni jalanti, tatheva jalitanti attho. Jambonadīsanti jambunadasaṅkhātaṃ rattasuvaṇṇamayaṃ īsaṃ. Kañcanacittasannibhanti, kañcanamayena sattaratanavicittena aṭṭhamaṅgalena samannāgataṃ. Suvaṇṇacandetthāti suvaṇṇamayā candakā ettha rathe. Hatthīti suvaṇṇarajatamaṇimayā hatthī. Gavādīsupi eseva nayo. Laṅghamayettha pakkhinoti ettha rathe laṅghamayā nānāratanamayā pakkhigaṇāpi paṭipāṭiyā ṭhitā. Yudhā yutāti attano attano yudhena saddhiṃ yuttā hutvā dassitā.

ассарааж̇ахараяод̇и хариван̣н̣аманомаяаассарааж̇аано. сусунааг̇асаад̣̇исзд̇и б̣аласамбад̇д̇ияаа д̇арун̣анааг̇асад̣̇исз. ган̃жанаж̇аалуражчад̣̇зд̇и ган̃жанаж̇ааламаязна уражчад̣̇аалан̇гаарзна саманнааг̇ад̇з. аавзл̣инзд̇и аавзл̣асан̇каад̇зхи ган̣н̣аалан̇гаарзхи яуд̇д̇з. сад̣̇д̣̇аг̇амзд̇и бад̇од̣̇аббахаарам̣ винаа сад̣̇д̣̇амад̇д̇знзва г̇аманасийлз. асан̇г̇ийд̇зд̇и ниссан̇г̇з сийгхаж̇авз зваруубз ассарааж̇з д̇ад̇т̇а яож̇зсунд̇и ад̇т̇о.

Assarājaharayoti harivaṇṇamanomayaassarājāno. Susunāgasādiseti balasampattiyā taruṇanāgasadise. Kañcanajāluracchadeti kañcanajālamayena uracchadālaṅkārena samannāgate. Āveḷineti āveḷasaṅkhātehi kaṇṇālaṅkārehi yutte. Saddagameti patodappahāraṃ vinā saddamatteneva gamanasīle. Asaṅgīteti nissaṅge sīghajave evarūpe assarāje tattha yojesunti attho.

абхинаад̣̇аяид̇т̇аад̇и яаанасад̣̇д̣̇зна зганиннаад̣̇ам̣ агааси. ванаббад̇инин̃жаад̇и ванаббад̇иний жа ванасан̣д̣з жаад̇и ад̇т̇о. баб̣яат̇аяид̇т̇аад̇и гамбаяид̇т̇а. д̇ад̇т̇а аагаасадтагавимаанагамбанзна набхагамбанам̣ взд̣̇ид̇аб̣б̣ам̣. бааваарамзгам̣сагад̇од̇и згам̣сагад̇абааваарад̣̇иб̣б̣авад̇т̇о. вуд̣̇д̇ханд̇и г̇ун̣авуд̣̇д̇хам̣. винийд̇аванд̇анд̇и винийд̇зна аажааравад̇д̇зна саманнааг̇ад̇ам̣. ижжаб̣равийд̇и рат̇ам̣ аагаасз табзд̇ваа од̇арид̇ваа звам̣ аб̣рави. д̣̇зваб̣раахман̣анд̇и д̣̇звасамам̣ б̣раахман̣ам̣.

Abhinādayitthāti yānasaddena ekaninnādaṃ akāsi. Vanappatiniñcāti vanappatinī ca vanasaṇḍe cāti attho. Pabyathayitthāti kampayittha. Tattha ākāsaṭṭhakavimānakampanena nabhakampanaṃ veditabbaṃ. Pāvāramekaṃsakatoti ekaṃsakatapāvāradibbavattho. Vuddhanti guṇavuddhaṃ. Vinītavantanti vinītena ācāravattena samannāgataṃ. Iccabravīti rathaṃ ākāse ṭhapetvā otaritvā evaṃ abravi. Devabrāhmaṇanti devasamaṃ brāhmaṇaṃ.

со д̇асса важанам̣ суд̇ваа г̇аат̇амааха –

So tassa vacanaṃ sutvā gāthamāha –

281.

‘‘анд̇хаа сирий мам̣ бадибхаад̇и маад̇али, сад̣̇д̇хаа анижжаа бана д̣̇звасаарат̇и.

‘‘Andhā sirī maṃ paṭibhāti mātali, saddhā aniccā pana devasārathi.

аасаа висам̣ваад̣̇игасаммад̇аа хи мз, хирий жа арияамхи г̇ун̣з бад̇идтид̇аа’’д̇и.

Āsā visaṃvādikasammatā hi me, hirī ca ariyamhi guṇe patiṭṭhitā’’ti.

д̇ад̇т̇а анд̇хаад̇и сиббаад̣̇исамбаннзби асамбаннзби бхаж̇анад̇о ‘‘анд̇хаа’’д̇и мам̣ бадибхаад̇и. анижжаад̇и сад̣̇д̇хаа бана д̇ам̣ д̇ам̣ вад̇т̇ум̣ бахааяа ан̃н̃асмим̣ ан̃н̃асмим̣ уббаж̇ж̇анад̇о худ̇ваа абхааваагаарзна ‘‘анижжаа’’д̇и мам̣ бадибхаад̇и. висам̣ваад̣̇игасаммад̇аад̇и аасаа бана яасмаа д̇ханад̇т̇игаа наавааяа самуд̣̇д̣̇ам̣ багканд̣̇ид̇ваа винадтабаабхад̇аа знд̇и, д̇асмаа ‘‘висам̣ваад̣̇игаа’’д̇и мам̣ бадибхаад̇и. арияамхи г̇ун̣зд̇и хирий бана хирод̇д̇аббасабхаавасан̇каад̇з барисуд̣̇д̇хз арияаг̇ун̣з бад̇идтид̇аад̇и.

Tattha andhāti sippādisampannepi asampannepi bhajanato ‘‘andhā’’ti maṃ paṭibhāti. Aniccāti saddhā pana taṃ taṃ vatthuṃ pahāya aññasmiṃ aññasmiṃ uppajjanato hutvā abhāvākārena ‘‘aniccā’’ti maṃ paṭibhāti. Visaṃvādikasammatāti āsā pana yasmā dhanatthikā nāvāya samuddaṃ pakkhanditvā vinaṭṭhapābhatā enti, tasmā ‘‘visaṃvādikā’’ti maṃ paṭibhāti. Ariyamhi guṇeti hirī pana hirottappasabhāvasaṅkhāte parisuddhe ariyaguṇe patiṭṭhitāti.

ид̣̇аани д̇ассаа г̇ун̣ам̣ ван̣н̣знд̇о ааха –

Idāni tassā guṇaṃ vaṇṇento āha –

282.

‘‘гумаарияо яаажимаа г̇од̇д̇арагкид̇аа, ж̇ин̣н̣аа жа яаа яаа жа сабхад̇д̇уид̇т̇ияо;

‘‘Kumāriyo yācimā gottarakkhitā, jiṇṇā ca yā yā ca sabhattuitthiyo;

д̇аа чанд̣̇арааг̇ам̣ бурисзсу уг̇г̇ад̇ам̣, хирияаа ниваарзнд̇и сажид̇д̇амад̇д̇ано.

Tā chandarāgaṃ purisesu uggataṃ, hiriyā nivārenti sacittamattano.

283.

‘‘сан̇г̇аамасийсз сарасад̇д̇исам̣яуд̇з, барааж̇ид̇аанам̣ бад̇ад̇ам̣ балааяинам̣;

‘‘Saṅgāmasīse sarasattisaṃyute, parājitānaṃ patataṃ palāyinaṃ;

хирияаа нивад̇д̇анд̇и ж̇ахид̇ва ж̇ийвид̇ам̣, д̇з самбадижчанд̇и бунаа хирийманаа.

Hiriyā nivattanti jahitva jīvitaṃ, te sampaṭicchanti punā hirīmanā.

284.

‘‘взлаа яат̇аа сааг̇аравзг̇аваариний, хирааяа хи баабаж̇анам̣ ниваариний;

‘‘Velā yathā sāgaravegavārinī, hirāya hi pāpajanaṃ nivārinī;

д̇ам̣ саб̣б̣алогз хиримарияабууж̇ид̇ам̣, инд̣̇асса д̇ам̣ взд̣̇аяа д̣̇звасаарат̇ий’’д̇и.

Taṃ sabbaloke hirimariyapūjitaṃ, indassa taṃ vedaya devasārathī’’ti.

д̇ад̇т̇а ж̇ин̣н̣аад̇и вид̇хаваа. сабхад̇д̇ууд̇и сасаамигаа д̇арун̣ид̇т̇ияо. ад̇д̇анод̇и д̇аа саб̣б̣ааби барабурисзсу ад̇д̇ано чанд̣̇арааг̇ам̣ уг̇г̇ад̇ам̣ вид̣̇ид̇ваа ‘‘аяуд̇д̇амзд̇ам̣ амхаага’’нд̇и хирияаа сажид̇д̇ам̣ ниваарзнд̇и, баабагаммам̣ на гаронд̇и. бад̇ад̇ам̣ балааяинанд̇и бад̇анд̇аанан̃жа балааяанд̇аанан̃жа анд̇арз. ж̇ахид̇ва ж̇ийвид̇анд̇и яз хириманд̇о хонд̇и, д̇з ад̇д̇ано ж̇ийвид̇ам̣ жаж̇ид̇ваа хирияаа нивад̇д̇анд̇и, звам̣ нивад̇д̇аа жа бана д̇з хирийманаа буна ад̇д̇ано саамигам̣ самбадижчанд̇и, амид̇д̇ахад̇т̇ад̇о можзд̇ваа г̇ан̣ханд̇и. баабаж̇анам̣ нивааринийд̇и баабад̇о ж̇анам̣ ниваариний, аяамзва ваа баато . д̇анд̇и д̇ам̣ хирим̣. арияабууж̇ид̇анд̇и ариязхи б̣уд̣̇д̇хаад̣̇ийхи бууж̇ид̇ам̣. инд̣̇асса д̇ам̣ взд̣̇аяаад̇и яасмаа звам̣ махааг̇ун̣аа арияабууж̇ид̇аавзсаа, д̇асмаа д̇ам̣ звам̣ уд̇д̇амаа наамзсаад̇и инд̣̇асса гат̇зхийд̇и.

Tattha jiṇṇāti vidhavā. Sabhattūti sasāmikā taruṇitthiyo. Attanoti tā sabbāpi parapurisesu attano chandarāgaṃ uggataṃ viditvā ‘‘ayuttametaṃ amhāka’’nti hiriyā sacittaṃ nivārenti, pāpakammaṃ na karonti. Patataṃ palāyinanti patantānañca palāyantānañca antare. Jahitva jīvitanti ye hirimanto honti, te attano jīvitaṃ cajitvā hiriyā nivattanti, evaṃ nivattā ca pana te hirīmanā puna attano sāmikaṃ sampaṭicchanti, amittahatthato mocetvā gaṇhanti. Pāpajanaṃ nivārinīti pāpato janaṃ nivārinī, ayameva vā pāṭho . Tanti taṃ hiriṃ. Ariyapūjitanti ariyehi buddhādīhi pūjitaṃ. Indassa taṃ vedayāti yasmā evaṃ mahāguṇā ariyapūjitāvesā, tasmā taṃ evaṃ uttamā nāmesāti indassa kathehīti.

д̇ам̣ суд̇ваа маад̇али г̇аат̇амааха –

Taṃ sutvā mātali gāthamāha –

285.

‘‘го д̇з имам̣ госияа д̣̇идтимод̣̇ахи, б̣рахмаа махинд̣̇о ат̇а ваа баж̇аабад̇и;

‘‘Ko te imaṃ kosiya diṭṭhimodahi, brahmā mahindo atha vā pajāpati;

хирааяа д̣̇звзсу хи сздтасаммад̇аа, д̇хийд̇аа махинд̣̇асса махзси ж̇ааяат̇аа’’д̇и.

Hirāya devesu hi seṭṭhasammatā, dhītā mahindassa mahesi jāyathā’’ti.

д̇ад̇т̇а д̣̇идтинд̇и ‘‘хирий наама махааг̇ун̣аа арияабууж̇ид̇аа’’д̇и лад̣̇д̇хим̣. од̣̇ахийд̇и хад̣̇аяз бавзсзси. сздтасаммад̇аад̇и д̇ава санд̇игз суд̇хааяа лад̣̇д̇хагаалад̇о бадтааяа инд̣̇асса санд̇игз ган̃жанаасанам̣ лабхид̇ваа саб̣б̣ад̣̇звад̇аахи бууж̇ияамаанаа уд̇д̇амасаммад̇аа ж̇ааяат̇а.

Tattha diṭṭhinti ‘‘hirī nāma mahāguṇā ariyapūjitā’’ti laddhiṃ. Odahīti hadaye pavesesi. Seṭṭhasammatāti tava santike sudhāya laddhakālato paṭṭhāya indassa santike kañcanāsanaṃ labhitvā sabbadevatāhi pūjiyamānā uttamasammatā jāyatha.

звам̣ д̇асмим̣ гат̇знд̇зязва госияасса д̇ан̇кан̣ан̃н̃зва жаванад̇хаммо ж̇аад̇о. ат̇а нам̣, маад̇али, ‘‘госияа ааяусан̇кааро д̇з оссадто, жаванад̇хаммоби д̇з самбад̇д̇о, гим̣ д̇з мануссалогзна, д̣̇звалогам̣ г̇ажчаамаа’’д̇и д̇ад̇т̇а нзд̇угаамо худ̇ваа г̇аат̇амааха –

Evaṃ tasmiṃ kathenteyeva kosiyassa taṅkhaṇaññeva cavanadhammo jāto. Atha naṃ, mātali, ‘‘kosiya āyusaṅkhāro te ossaṭṭho, cavanadhammopi te sampatto, kiṃ te manussalokena, devalokaṃ gacchāmā’’ti tattha netukāmo hutvā gāthamāha –

286.

‘‘ханд̣̇зхи д̣̇аани д̇ид̣̇ивам̣ абаггама, рат̇ам̣ самааруяха мамааяид̇ам̣ имам̣;

‘‘Handehi dāni tidivaṃ apakkama, rathaṃ samāruyha mamāyitaṃ imaṃ;

инд̣̇о жа д̇ам̣ инд̣̇асаг̇од̇д̇а ган̇кад̇и, аж̇ж̇зва д̇вам̣ инд̣̇асахаб̣яад̇ам̣ важ̇аа’’д̇и.

Indo ca taṃ indasagotta kaṅkhati, ajjeva tvaṃ indasahabyataṃ vajā’’ti.

д̇ад̇т̇а мамааяид̇анд̇и бияам̣ манаабам̣. инд̣̇асаг̇од̇д̇аад̇и буримабхавз инд̣̇зна самаанаг̇од̇д̇а. ган̇кад̇ийд̇и д̇авааг̇аманам̣ ижчанд̇о ган̇кад̇и.

Tattha mamāyitanti piyaṃ manāpaṃ. Indasagottāti purimabhave indena samānagotta. Kaṅkhatīti tavāgamanaṃ icchanto kaṅkhati.

ид̇и д̇асмим̣ госиязна сад̣̇д̇хим̣ гат̇знд̇зязва госияо жавид̇ваа обабаад̇иго д̣̇звабуд̇д̇о худ̇ваа ааруяха д̣̇иб̣б̣арат̇з адтааси. ат̇а нам̣, маад̇али, саггасса санд̇игам̣ нзси. сагго д̇ам̣ д̣̇исваава д̇удтамаанасо ад̇д̇ано д̇хийд̇арам̣ хирид̣̇звим̣ д̇асса аг̇г̇амахзсим̣ гад̇ваа ад̣̇ааси, абаримаан̣амасса иссарияам̣ ахоси. д̇амад̇т̇ам̣ вид̣̇ид̇ваа ‘‘аномасад̇д̇аанам̣ гаммам̣ наама звам̣ висуж̇жхад̇ий’’д̇и сад̇т̇аа осаанаг̇аат̇амааха –

Iti tasmiṃ kosiyena saddhiṃ kathenteyeva kosiyo cavitvā opapātiko devaputto hutvā āruyha dibbarathe aṭṭhāsi. Atha naṃ, mātali, sakkassa santikaṃ nesi. Sakko taṃ disvāva tuṭṭhamānaso attano dhītaraṃ hirideviṃ tassa aggamahesiṃ katvā adāsi, aparimāṇamassa issariyaṃ ahosi. Tamatthaṃ viditvā ‘‘anomasattānaṃ kammaṃ nāma evaṃ visujjhatī’’ti satthā osānagāthamāha –

287.

‘‘звам̣ висуж̇жханд̇и абаабагаммино, ат̇о сужин̣н̣асса палам̣ на нассад̇и;

‘‘Evaṃ visujjhanti apāpakammino, atho suciṇṇassa phalaṃ na nassati;

яз гзжи мад̣̇д̣̇агку суд̇хааяа бхож̇анам̣, саб̣б̣зва д̇з инд̣̇асахаб̣яад̇ам̣ г̇ад̇аа’’д̇и.

Ye keci maddakkhu sudhāya bhojanaṃ, sabbeva te indasahabyataṃ gatā’’ti.

д̇ад̇т̇а абаабагамминод̇и абаабагаммаа сад̇д̇аа звам̣ висуж̇жханд̇и яз гзжи мад̣̇д̣̇агкууд̇и яз гзжи сад̇д̇аа д̇асмим̣ химаванд̇абад̣̇зсз д̇ад̣̇аа госиязна хирияаа д̣̇ийяамаанам̣ суд̇хаабхож̇анам̣ ад̣̇д̣̇асам̣су. саб̣б̣зва д̇зд̇и д̇з саб̣б̣зби д̇ам̣ д̣̇аанам̣ анумод̣̇ид̇ваа жид̇д̇ам̣ басаад̣̇зд̇ваа инд̣̇асахаб̣яад̇ам̣ г̇ад̇аад̇и.

Tattha apāpakamminoti apāpakammā sattā evaṃ visujjhanti ye keci maddakkhūti ye keci sattā tasmiṃ himavantapadese tadā kosiyena hiriyā dīyamānaṃ sudhābhojanaṃ addasaṃsu. Sabbeva teti te sabbepi taṃ dānaṃ anumoditvā cittaṃ pasādetvā indasahabyataṃ gatāti.

сад̇т̇аа имам̣ д̇хаммад̣̇зсанам̣ аахарид̇ваа ‘‘на, бхигкавз, ид̣̇аанзва, буб̣б̣збзд̇ам̣ ад̣̇аанаабхирад̇ам̣ т̇ад̣̇д̇хамажчарияам̣ самаанам̣ ахам̣ д̣̇амзсим̣язваа’’д̇и вад̇ваа ж̇аад̇агам̣ самод̇хаанзси ‘‘д̇ад̣̇аа хирий д̣̇звад̇аа уббалаван̣н̣аа ахоси, госияо д̣̇аанабад̇и бхигку, бан̃жасико ануруд̣̇д̇хо, маад̇али аананд̣̇о, суурияо гассабо, жанд̣̇о мог̇г̇аллаано, наарад̣̇о саарибуд̇д̇о, сагго ахамзва ахоси’’нд̇и.

Satthā imaṃ dhammadesanaṃ āharitvā ‘‘na, bhikkhave, idāneva, pubbepetaṃ adānābhirataṃ thaddhamacchariyaṃ samānaṃ ahaṃ damesiṃyevā’’ti vatvā jātakaṃ samodhānesi ‘‘tadā hirī devatā uppalavaṇṇā ahosi, kosiyo dānapati bhikkhu, pañcasikho anuruddho, mātali ānando, sūriyo kassapo, cando moggallāno, nārado sāriputto, sakko ahameva ahosi’’nti.

суд̇хаабхож̇анаж̇аад̇агаван̣н̣анаа д̇ад̇ияаа.

Sudhābhojanajātakavaṇṇanā tatiyā.

Next: [536] 4. гун̣аалаж̇аад̇агаван̣н̣анаа • [536] 4. Kuṇālajātakavaṇṇanā

Related texts:

д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 535. суд̇хаабхож̇анаж̇аад̇агам̣ • 535. Sudhābhojanajātakaṃ

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact