| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๑๐. สุธาวโคฺค
10. Sudhāvaggo
๑. สุธาปิณฺฑิยเตฺถรอปทานํ
1. Sudhāpiṇḍiyattheraapadānaṃ
๑.
1.
‘‘ปูชารเห ปูชยโต, พุเทฺธ ยทิ ว สาวเก;
‘‘Pūjārahe pūjayato, buddhe yadi va sāvake;
ปปญฺจสมติกฺกเนฺต, ติณฺณโสกปริทฺทเวฯ
Papañcasamatikkante, tiṇṇasokapariddave.
๒.
2.
‘‘เต ตาทิเส ปูชยโต, นิพฺพุเต อกุโตภเย;
‘‘Te tādise pūjayato, nibbute akutobhaye;
๓.
3.
‘‘จตุนฺนมปิ ทีปานํ, อิสฺสรํ โยธ การเย;
‘‘Catunnamapi dīpānaṃ, issaraṃ yodha kāraye;
เอกิสฺสา ปูชนาเยตํ, กลํ นาคฺฆติ โสฬสิํฯ
Ekissā pūjanāyetaṃ, kalaṃ nāgghati soḷasiṃ.
๔.
4.
‘‘สิทฺธตฺถสฺส นรคฺคสฺส, เจติเย ผลิตนฺตเร;
‘‘Siddhatthassa naraggassa, cetiye phalitantare;
สุธาปิโณฺฑ มยา ทิโนฺน, วิปฺปสเนฺนน เจตสาฯ
Sudhāpiṇḍo mayā dinno, vippasannena cetasā.
๕.
5.
‘‘จตุนฺนวุติโต กเปฺป, ยํ กมฺมมกริํ ตทา;
‘‘Catunnavutito kappe, yaṃ kammamakariṃ tadā;
ทุคฺคติํ นาภิชานามิ, ปฎิสงฺขารสฺสิทํ ผลํฯ
Duggatiṃ nābhijānāmi, paṭisaṅkhārassidaṃ phalaṃ.
๖.
6.
‘‘อิโต ติํสติกปฺปมฺหิ, ปฎิสงฺขารสวฺหยา;
‘‘Ito tiṃsatikappamhi, paṭisaṅkhārasavhayā;
สตฺตรตนสมฺปนฺนา, เตรส จกฺกวตฺติโนฯ
Sattaratanasampannā, terasa cakkavattino.
๗.
7.
‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;
‘‘Paṭisambhidā catasso, vimokkhāpi ca aṭṭhime;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
Chaḷabhiññā sacchikatā, kataṃ buddhassa sāsanaṃ’’.
อิตฺถํ สุทํ อายสฺมา สุธาปิณฺฑิโย เถโร อิมา คาถาโย อภาสิตฺถาติฯ
Itthaṃ sudaṃ āyasmā sudhāpiṇḍiyo thero imā gāthāyo abhāsitthāti.
สุธาปิณฺฑิยเตฺถรสฺสาปทานํ ปฐมํฯ
Sudhāpiṇḍiyattherassāpadānaṃ paṭhamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๑. สุธาปิณฺฑิยเตฺถรอปทานวณฺณนา • 1. Sudhāpiṇḍiyattheraapadānavaṇṇanā
