| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
10. ஸுதா⁴வக்³கோ³
10. Sudhāvaggo
1. ஸுதா⁴பிண்டி³யத்தே²ரஅபதா³னவண்ணனா
1. Sudhāpiṇḍiyattheraapadānavaṇṇanā
பூஜாரஹே பூஜயதோதிஆதி³கங் ஆயஸ்மதோ ஸுதா⁴பிண்டி³யத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே ப⁴க³வதி த⁴ரமானே புஞ்ஞங் காதுமஸக்கொந்தோ பரினிப்³பு³தே ப⁴க³வதி தஸ்ஸ தா⁴துங் நித³ஹித்வா சேதியே கரீயமானே ஸுதா⁴பிண்ட³மதா³ஸி. ஸோ தேன புஞ்ஞேன சதுன்னவுதிகப்பதோ பட்டா²ய எத்த²ந்தரே சதுராபாயமதி³ஸ்வா தே³வமனுஸ்ஸஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ விஞ்ஞுதங் பத்வா ஸத்த²ரி பஸீதி³த்வா பப்³ப³ஜிதோ நசிரஸ்ஸேவ அரஹா அஹோஸி.
Pūjārahepūjayatotiādikaṃ āyasmato sudhāpiṇḍiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle bhagavati dharamāne puññaṃ kātumasakkonto parinibbute bhagavati tassa dhātuṃ nidahitvā cetiye karīyamāne sudhāpiṇḍamadāsi. So tena puññena catunnavutikappato paṭṭhāya etthantare caturāpāyamadisvā devamanussasampattiyo anubhavitvā imasmiṃ buddhuppāde ekasmiṃ kulagehe nibbatto viññutaṃ patvā satthari pasīditvā pabbajito nacirasseva arahā ahosi.
1-2. ஸோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ அத்தனோ புப்³ப³சரிதாபதா³னங் பகாஸெந்தோ பூஜாரஹேதிஆதி³மாஹ. தத்த² பூஜாரஹா நாம பு³த்³த⁴பச்சேகபு³த்³த⁴அரியஸாவகாசரியுபஜ்ஜா²யமாதாபிதுக³ருஆத³யோ, தேஸு பூஜாரஹேஸு மாலாதி³பது³மவத்தா²ப⁴ரணசதுபச்சயாதீ³ஹி பூஜயதோ பூஜயந்தஸ்ஸ புக்³க³லஸ்ஸ புஞ்ஞகொட்டா²ஸங் ஸஹஸ்ஸஸதஸஹஸ்ஸாதி³வஸேன ஸங்க்²யங் காதுங் கேனசி மஹானுபா⁴வேனாபி ந ஸக்காதி அத்தோ². ந கேவலமேவ த⁴ரமானே பு³த்³தா⁴த³யோ பூஜயதோ, பரினிப்³பு³தஸ்ஸாபி ப⁴க³வதோ சேதியபடிமாபோ³தி⁴ஆதீ³ஸுபி ஏஸேவ நயோ.
1-2. So aparabhāge attano pubbakammaṃ saritvā somanassajāto attano pubbacaritāpadānaṃ pakāsento pūjārahetiādimāha. Tattha pūjārahā nāma buddhapaccekabuddhaariyasāvakācariyupajjhāyamātāpitugaruādayo, tesu pūjārahesu mālādipadumavatthābharaṇacatupaccayādīhi pūjayato pūjayantassa puggalassa puññakoṭṭhāsaṃ sahassasatasahassādivasena saṅkhyaṃ kātuṃ kenaci mahānubhāvenāpi na sakkāti attho. Na kevalameva dharamāne buddhādayo pūjayato, parinibbutassāpi bhagavato cetiyapaṭimābodhiādīsupi eseva nayo.
3. தங் தீ³பேதுங் சதுன்னமபி தீ³பானந்திஆதி³மாஹ. தத்த² சதுன்னமபி தீ³பானந்தி ஜம்பு³தீ³பஅபரகோ³யானஉத்தரகுருபுப்³ப³விதே³ஹஸங்கா²தானங் சதுன்னங் தீ³பானங் தத³னுக³தானங் த்³விஸஹஸ்ஸபரித்ததீ³பானஞ்ச ஏகதோ கத்வா ஸகலசக்கவாளக³ப்³பே⁴ இஸ்ஸரங் சக்கவத்திரஜ்ஜங் கரெய்யாதி அத்தோ². ஏகிஸ்ஸா பூஜனாயேதந்தி தா⁴துக³ப்³பே⁴ சேதியே கதாய ஏகிஸ்ஸா பூஜாய ஏதங் ஸகலஜம்பு³தீ³பே ஸத்தரதனாதி³கங் ஸகலங் த⁴னங். கலங் நாக்³க⁴தி ஸோளஸிந்தி சேதியே கதபூஜாய ஸோளஸக்க²த்துங் விப⁴த்தஸ்ஸ ஸோளஸமகொட்டா²ஸஸ்ஸ ந அக்³க⁴தீதி அத்தோ².
3. Taṃ dīpetuṃ catunnamapi dīpānantiādimāha. Tattha catunnamapi dīpānanti jambudīpaaparagoyānauttarakurupubbavidehasaṅkhātānaṃ catunnaṃ dīpānaṃ tadanugatānaṃ dvisahassaparittadīpānañca ekato katvā sakalacakkavāḷagabbhe issaraṃ cakkavattirajjaṃ kareyyāti attho. Ekissā pūjanāyetanti dhātugabbhe cetiye katāya ekissā pūjāya etaṃ sakalajambudīpe sattaratanādikaṃ sakalaṃ dhanaṃ. Kalaṃ nāgghati soḷasinti cetiye katapūjāya soḷasakkhattuṃ vibhattassa soḷasamakoṭṭhāsassa na agghatīti attho.
4. ஸித்³த⁴த்த²ஸ்ஸ…பே॰… ப²லிதந்தரேதி நரானங் அக்³க³ஸ்ஸ ஸெட்ட²ஸ்ஸ ஸித்³த⁴த்த²ஸ்ஸ ப⁴க³வதோ சேதியே தா⁴துக³ப்³ப⁴ம்ஹி ஸுதா⁴கம்மே கரீயமானே பரிச்சே²தா³னங் உபி⁴ன்னமந்தரே வேமஜ்ஜே², அத² வா புப்ப²தா³னட்டா²னானங் அந்தரே ப²லந்தியா மயா ஸுதா⁴பிண்டோ³ தி³ன்னோ மக்கி²தோதி ஸம்ப³ந்தோ⁴. ஸேஸங் ஸப்³ப³த்த² உத்தானமேவாதி.
4.Siddhatthassa…pe…phalitantareti narānaṃ aggassa seṭṭhassa siddhatthassa bhagavato cetiye dhātugabbhamhi sudhākamme karīyamāne paricchedānaṃ ubhinnamantare vemajjhe, atha vā pupphadānaṭṭhānānaṃ antare phalantiyā mayā sudhāpiṇḍo dinno makkhitoti sambandho. Sesaṃ sabbattha uttānamevāti.
ஸுதா⁴பிண்டி³யத்தே²ரஅபதா³னவண்ணனா ஸமத்தா.
Sudhāpiṇḍiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 1. ஸுதா⁴பிண்டி³யத்தே²ரஅபதா³னங் • 1. Sudhāpiṇḍiyattheraapadānaṃ
