| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
১০. সুধাৰগ্গো
10. Sudhāvaggo
১. সুধাপিণ্ডিযত্থেরঅপদানৰণ্ণনা
1. Sudhāpiṇḍiyattheraapadānavaṇṇanā
পূজারহে পূজযতোতিআদিকং আযস্মতো সুধাপিণ্ডিযত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে ভগৰতি ধরমানে পুঞ্ঞং কাতুমসক্কোন্তো পরিনিব্বুতে ভগৰতি তস্স ধাতুং নিদহিত্ৰা চেতিযে করীযমানে সুধাপিণ্ডমদাসি। সো তেন পুঞ্ঞেন চতুন্নৰুতিকপ্পতো পট্ঠায এত্থন্তরে চতুরাপাযমদিস্ৰা দেৰমনুস্সসম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰিঞ্ঞুতং পত্ৰা সত্থরি পসীদিত্ৰা পব্বজিতো নচিরস্সেৰ অরহা অহোসি।
Pūjārahepūjayatotiādikaṃ āyasmato sudhāpiṇḍiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle bhagavati dharamāne puññaṃ kātumasakkonto parinibbute bhagavati tassa dhātuṃ nidahitvā cetiye karīyamāne sudhāpiṇḍamadāsi. So tena puññena catunnavutikappato paṭṭhāya etthantare caturāpāyamadisvā devamanussasampattiyo anubhavitvā imasmiṃ buddhuppāde ekasmiṃ kulagehe nibbatto viññutaṃ patvā satthari pasīditvā pabbajito nacirasseva arahā ahosi.
১-২. সো অপরভাগে অত্তনো পুব্বকম্মং সরিত্ৰা সোমনস্সজাতো অত্তনো পুব্বচরিতাপদানং পকাসেন্তো পূজারহেতিআদিমাহ। তত্থ পূজারহা নাম বুদ্ধপচ্চেকবুদ্ধঅরিযসাৰকাচরিযুপজ্ঝাযমাতাপিতুগরুআদযো, তেসু পূজারহেসু মালাদিপদুমৰত্থাভরণচতুপচ্চযাদীহি পূজযতো পূজযন্তস্স পুগ্গলস্স পুঞ্ঞকোট্ঠাসং সহস্সসতসহস্সাদিৰসেন সঙ্খ্যং কাতুং কেনচি মহানুভাৰেনাপি ন সক্কাতি অত্থো। ন কেৰলমেৰ ধরমানে বুদ্ধাদযো পূজযতো, পরিনিব্বুতস্সাপি ভগৰতো চেতিযপটিমাবোধিআদীসুপি এসেৰ নযো।
1-2. So aparabhāge attano pubbakammaṃ saritvā somanassajāto attano pubbacaritāpadānaṃ pakāsento pūjārahetiādimāha. Tattha pūjārahā nāma buddhapaccekabuddhaariyasāvakācariyupajjhāyamātāpitugaruādayo, tesu pūjārahesu mālādipadumavatthābharaṇacatupaccayādīhi pūjayato pūjayantassa puggalassa puññakoṭṭhāsaṃ sahassasatasahassādivasena saṅkhyaṃ kātuṃ kenaci mahānubhāvenāpi na sakkāti attho. Na kevalameva dharamāne buddhādayo pūjayato, parinibbutassāpi bhagavato cetiyapaṭimābodhiādīsupi eseva nayo.
৩. তং দীপেতুং চতুন্নমপি দীপানন্তিআদিমাহ। তত্থ চতুন্নমপি দীপানন্তি জম্বুদীপঅপরগোযানউত্তরকুরুপুব্বৰিদেহসঙ্খাতানং চতুন্নং দীপানং তদনুগতানং দ্ৰিসহস্সপরিত্তদীপানঞ্চ একতো কত্ৰা সকলচক্কৰাল়গব্ভে ইস্সরং চক্কৰত্তিরজ্জং করেয্যাতি অত্থো। একিস্সা পূজনাযেতন্তি ধাতুগব্ভে চেতিযে কতায একিস্সা পূজায এতং সকলজম্বুদীপে সত্তরতনাদিকং সকলং ধনং। কলং নাগ্ঘতি সোল়সিন্তি চেতিযে কতপূজায সোল়সক্খত্তুং ৰিভত্তস্স সোল়সমকোট্ঠাসস্স ন অগ্ঘতীতি অত্থো।
3. Taṃ dīpetuṃ catunnamapi dīpānantiādimāha. Tattha catunnamapi dīpānanti jambudīpaaparagoyānauttarakurupubbavidehasaṅkhātānaṃ catunnaṃ dīpānaṃ tadanugatānaṃ dvisahassaparittadīpānañca ekato katvā sakalacakkavāḷagabbhe issaraṃ cakkavattirajjaṃ kareyyāti attho. Ekissā pūjanāyetanti dhātugabbhe cetiye katāya ekissā pūjāya etaṃ sakalajambudīpe sattaratanādikaṃ sakalaṃ dhanaṃ. Kalaṃ nāgghati soḷasinti cetiye katapūjāya soḷasakkhattuṃ vibhattassa soḷasamakoṭṭhāsassa na agghatīti attho.
৪. সিদ্ধত্থস্স…পে॰… ফলিতন্তরেতি নরানং অগ্গস্স সেট্ঠস্স সিদ্ধত্থস্স ভগৰতো চেতিযে ধাতুগব্ভম্হি সুধাকম্মে করীযমানে পরিচ্ছেদানং উভিন্নমন্তরে ৰেমজ্ঝে, অথ ৰা পুপ্ফদানট্ঠানানং অন্তরে ফলন্তিযা মযা সুধাপিণ্ডো দিন্নো মক্খিতোতি সম্বন্ধো। সেসং সব্বত্থ উত্তানমেৰাতি।
4.Siddhatthassa…pe…phalitantareti narānaṃ aggassa seṭṭhassa siddhatthassa bhagavato cetiye dhātugabbhamhi sudhākamme karīyamāne paricchedānaṃ ubhinnamantare vemajjhe, atha vā pupphadānaṭṭhānānaṃ antare phalantiyā mayā sudhāpiṇḍo dinno makkhitoti sambandho. Sesaṃ sabbattha uttānamevāti.
সুধাপিণ্ডিযত্থেরঅপদানৰণ্ণনা সমত্তা।
Sudhāpiṇḍiyattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ১. সুধাপিণ্ডিযত্থেরঅপদানং • 1. Sudhāpiṇḍiyattheraapadānaṃ
