| Library / Tipiṭaka / д̇ибидага • Tipiṭaka / абад̣̇аана-адтагат̇аа • Apadāna-aṭṭhakathā |
10. суд̇хааваг̇г̇о
10. Sudhāvaggo
1. суд̇хаабин̣д̣ияад̇т̇зраабад̣̇аанаван̣н̣анаа
1. Sudhāpiṇḍiyattheraapadānavaṇṇanā
бууж̇аарахз бууж̇аяад̇од̇иаад̣̇игам̣ ааяасмад̇о суд̇хаабин̣д̣ияад̇т̇зрасса абад̣̇аанам̣. аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяаани бун̃н̃аани убажинанд̇о сид̣̇д̇хад̇т̇асса бхаг̇авад̇о гаалз бхаг̇авад̇и д̇харамаанз бун̃н̃ам̣ гаад̇умасаггонд̇о бариниб̣б̣уд̇з бхаг̇авад̇и д̇асса д̇хаад̇ум̣ нид̣̇ахид̇ваа жзд̇ияз гарийяамаанз суд̇хаабин̣д̣амад̣̇ааси. со д̇зна бун̃н̃зна жад̇уннавуд̇игаббад̇о бадтааяа зд̇т̇анд̇арз жад̇ураабааяамад̣̇исваа д̣̇звамануссасамбад̇д̇ияо анубхавид̇ваа имасмим̣ б̣уд̣̇д̇хуббаад̣̇з згасмим̣ гулаг̇зхз ниб̣б̣ад̇д̇о вин̃н̃уд̇ам̣ бад̇ваа сад̇т̇ари басийд̣̇ид̇ваа баб̣б̣аж̇ид̇о нажирассзва арахаа ахоси.
Pūjārahepūjayatotiādikaṃ āyasmato sudhāpiṇḍiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle bhagavati dharamāne puññaṃ kātumasakkonto parinibbute bhagavati tassa dhātuṃ nidahitvā cetiye karīyamāne sudhāpiṇḍamadāsi. So tena puññena catunnavutikappato paṭṭhāya etthantare caturāpāyamadisvā devamanussasampattiyo anubhavitvā imasmiṃ buddhuppāde ekasmiṃ kulagehe nibbatto viññutaṃ patvā satthari pasīditvā pabbajito nacirasseva arahā ahosi.
1-2. со абарабхааг̇з ад̇д̇ано буб̣б̣агаммам̣ сарид̇ваа соманассаж̇аад̇о ад̇д̇ано буб̣б̣ажарид̇аабад̣̇аанам̣ багаасзнд̇о бууж̇аарахзд̇иаад̣̇имааха. д̇ад̇т̇а бууж̇аарахаа наама б̣уд̣̇д̇хабажжзгаб̣уд̣̇д̇хаарияасаавагаажарияубаж̇жхааяамаад̇аабид̇уг̇аруаад̣̇аяо, д̇зсу бууж̇аарахзсу маалаад̣̇ибад̣̇умавад̇т̇аабхаран̣ажад̇убажжаяаад̣̇ийхи бууж̇аяад̇о бууж̇аяанд̇асса буг̇г̇аласса бун̃н̃агодтаасам̣ сахассасад̇асахассаад̣̇ивасзна сан̇кяам̣ гаад̇ум̣ гзнажи махаанубхаавзнааби на саггаад̇и ад̇т̇о. на гзваламзва д̇харамаанз б̣уд̣̇д̇хаад̣̇аяо бууж̇аяад̇о, бариниб̣б̣уд̇ассааби бхаг̇авад̇о жзд̇ияабадимааб̣од̇хиаад̣̇ийсуби зсзва наяо.
1-2. So aparabhāge attano pubbakammaṃ saritvā somanassajāto attano pubbacaritāpadānaṃ pakāsento pūjārahetiādimāha. Tattha pūjārahā nāma buddhapaccekabuddhaariyasāvakācariyupajjhāyamātāpitugaruādayo, tesu pūjārahesu mālādipadumavatthābharaṇacatupaccayādīhi pūjayato pūjayantassa puggalassa puññakoṭṭhāsaṃ sahassasatasahassādivasena saṅkhyaṃ kātuṃ kenaci mahānubhāvenāpi na sakkāti attho. Na kevalameva dharamāne buddhādayo pūjayato, parinibbutassāpi bhagavato cetiyapaṭimābodhiādīsupi eseva nayo.
3. д̇ам̣ д̣̇ийбзд̇ум̣ жад̇уннамаби д̣̇ийбаананд̇иаад̣̇имааха. д̇ад̇т̇а жад̇уннамаби д̣̇ийбаананд̇и ж̇амб̣уд̣̇ийбаабараг̇ояаанауд̇д̇арагурубуб̣б̣авид̣̇зхасан̇каад̇аанам̣ жад̇уннам̣ д̣̇ийбаанам̣ д̇ад̣̇ануг̇ад̇аанам̣ д̣̇висахассабарид̇д̇ад̣̇ийбаанан̃жа згад̇о гад̇ваа сагалажаггаваал̣аг̇аб̣бхз иссарам̣ жаггавад̇д̇ираж̇ж̇ам̣ гарзяяаад̇и ад̇т̇о. згиссаа бууж̇анааязд̇анд̇и д̇хаад̇уг̇аб̣бхз жзд̇ияз гад̇ааяа згиссаа бууж̇ааяа зд̇ам̣ сагалаж̇амб̣уд̣̇ийбз сад̇д̇арад̇анаад̣̇игам̣ сагалам̣ д̇ханам̣. галам̣ нааг̇гхад̇и сол̣асинд̇и жзд̇ияз гад̇абууж̇ааяа сол̣асагкад̇д̇ум̣ вибхад̇д̇асса сол̣асамагодтаасасса на аг̇гхад̇ийд̇и ад̇т̇о.
3. Taṃ dīpetuṃ catunnamapi dīpānantiādimāha. Tattha catunnamapi dīpānanti jambudīpaaparagoyānauttarakurupubbavidehasaṅkhātānaṃ catunnaṃ dīpānaṃ tadanugatānaṃ dvisahassaparittadīpānañca ekato katvā sakalacakkavāḷagabbhe issaraṃ cakkavattirajjaṃ kareyyāti attho. Ekissā pūjanāyetanti dhātugabbhe cetiye katāya ekissā pūjāya etaṃ sakalajambudīpe sattaratanādikaṃ sakalaṃ dhanaṃ. Kalaṃ nāgghati soḷasinti cetiye katapūjāya soḷasakkhattuṃ vibhattassa soḷasamakoṭṭhāsassa na agghatīti attho.
4. сид̣̇д̇хад̇т̇асса…бз… палид̇анд̇арзд̇и нараанам̣ аг̇г̇асса сздтасса сид̣̇д̇хад̇т̇асса бхаг̇авад̇о жзд̇ияз д̇хаад̇уг̇аб̣бхамхи суд̇хаагаммз гарийяамаанз барижчзд̣̇аанам̣ убхиннаманд̇арз взмаж̇жхз, ат̇а ваа бубпад̣̇аанадтаанаанам̣ анд̇арз паланд̇ияаа маяаа суд̇хаабин̣д̣о д̣̇инно магкид̇од̇и самб̣анд̇хо. сзсам̣ саб̣б̣ад̇т̇а уд̇д̇аанамзваад̇и.
4.Siddhatthassa…pe…phalitantareti narānaṃ aggassa seṭṭhassa siddhatthassa bhagavato cetiye dhātugabbhamhi sudhākamme karīyamāne paricchedānaṃ ubhinnamantare vemajjhe, atha vā pupphadānaṭṭhānānaṃ antare phalantiyā mayā sudhāpiṇḍo dinno makkhitoti sambandho. Sesaṃ sabbattha uttānamevāti.
суд̇хаабин̣д̣ияад̇т̇зраабад̣̇аанаван̣н̣анаа самад̇д̇аа.
Sudhāpiṇḍiyattheraapadānavaṇṇanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / абад̣̇аанабаал̣и • Apadānapāḷi / 1. суд̇хаабин̣д̣ияад̇т̇зраабад̣̇аанам̣ • 1. Sudhāpiṇḍiyattheraapadānaṃ
