| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೧೦. ಸುಧಾವಗ್ಗೋ
10. Sudhāvaggo
೧. ಸುಧಾಪಿಣ್ಡಿಯತ್ಥೇರಅಪದಾನವಣ್ಣನಾ
1. Sudhāpiṇḍiyattheraapadānavaṇṇanā
ಪೂಜಾರಹೇ ಪೂಜಯತೋತಿಆದಿಕಂ ಆಯಸ್ಮತೋ ಸುಧಾಪಿಣ್ಡಿಯತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಸಿದ್ಧತ್ಥಸ್ಸ ಭಗವತೋ ಕಾಲೇ ಭಗವತಿ ಧರಮಾನೇ ಪುಞ್ಞಂ ಕಾತುಮಸಕ್ಕೋನ್ತೋ ಪರಿನಿಬ್ಬುತೇ ಭಗವತಿ ತಸ್ಸ ಧಾತುಂ ನಿದಹಿತ್ವಾ ಚೇತಿಯೇ ಕರೀಯಮಾನೇ ಸುಧಾಪಿಣ್ಡಮದಾಸಿ। ಸೋ ತೇನ ಪುಞ್ಞೇನ ಚತುನ್ನವುತಿಕಪ್ಪತೋ ಪಟ್ಠಾಯ ಏತ್ಥನ್ತರೇ ಚತುರಾಪಾಯಮದಿಸ್ವಾ ದೇವಮನುಸ್ಸಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ವಾ ಸತ್ಥರಿ ಪಸೀದಿತ್ವಾ ಪಬ್ಬಜಿತೋ ನಚಿರಸ್ಸೇವ ಅರಹಾ ಅಹೋಸಿ।
Pūjārahepūjayatotiādikaṃ āyasmato sudhāpiṇḍiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle bhagavati dharamāne puññaṃ kātumasakkonto parinibbute bhagavati tassa dhātuṃ nidahitvā cetiye karīyamāne sudhāpiṇḍamadāsi. So tena puññena catunnavutikappato paṭṭhāya etthantare caturāpāyamadisvā devamanussasampattiyo anubhavitvā imasmiṃ buddhuppāde ekasmiṃ kulagehe nibbatto viññutaṃ patvā satthari pasīditvā pabbajito nacirasseva arahā ahosi.
೧-೨. ಸೋ ಅಪರಭಾಗೇ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಅತ್ತನೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಪೂಜಾರಹೇತಿಆದಿಮಾಹ। ತತ್ಥ ಪೂಜಾರಹಾ ನಾಮ ಬುದ್ಧಪಚ್ಚೇಕಬುದ್ಧಅರಿಯಸಾವಕಾಚರಿಯುಪಜ್ಝಾಯಮಾತಾಪಿತುಗರುಆದಯೋ, ತೇಸು ಪೂಜಾರಹೇಸು ಮಾಲಾದಿಪದುಮವತ್ಥಾಭರಣಚತುಪಚ್ಚಯಾದೀಹಿ ಪೂಜಯತೋ ಪೂಜಯನ್ತಸ್ಸ ಪುಗ್ಗಲಸ್ಸ ಪುಞ್ಞಕೋಟ್ಠಾಸಂ ಸಹಸ್ಸಸತಸಹಸ್ಸಾದಿವಸೇನ ಸಙ್ಖ್ಯಂ ಕಾತುಂ ಕೇನಚಿ ಮಹಾನುಭಾವೇನಾಪಿ ನ ಸಕ್ಕಾತಿ ಅತ್ಥೋ। ನ ಕೇವಲಮೇವ ಧರಮಾನೇ ಬುದ್ಧಾದಯೋ ಪೂಜಯತೋ, ಪರಿನಿಬ್ಬುತಸ್ಸಾಪಿ ಭಗವತೋ ಚೇತಿಯಪಟಿಮಾಬೋಧಿಆದೀಸುಪಿ ಏಸೇವ ನಯೋ।
1-2. So aparabhāge attano pubbakammaṃ saritvā somanassajāto attano pubbacaritāpadānaṃ pakāsento pūjārahetiādimāha. Tattha pūjārahā nāma buddhapaccekabuddhaariyasāvakācariyupajjhāyamātāpitugaruādayo, tesu pūjārahesu mālādipadumavatthābharaṇacatupaccayādīhi pūjayato pūjayantassa puggalassa puññakoṭṭhāsaṃ sahassasatasahassādivasena saṅkhyaṃ kātuṃ kenaci mahānubhāvenāpi na sakkāti attho. Na kevalameva dharamāne buddhādayo pūjayato, parinibbutassāpi bhagavato cetiyapaṭimābodhiādīsupi eseva nayo.
೩. ತಂ ದೀಪೇತುಂ ಚತುನ್ನಮಪಿ ದೀಪಾನನ್ತಿಆದಿಮಾಹ। ತತ್ಥ ಚತುನ್ನಮಪಿ ದೀಪಾನನ್ತಿ ಜಮ್ಬುದೀಪಅಪರಗೋಯಾನಉತ್ತರಕುರುಪುಬ್ಬವಿದೇಹಸಙ್ಖಾತಾನಂ ಚತುನ್ನಂ ದೀಪಾನಂ ತದನುಗತಾನಂ ದ್ವಿಸಹಸ್ಸಪರಿತ್ತದೀಪಾನಞ್ಚ ಏಕತೋ ಕತ್ವಾ ಸಕಲಚಕ್ಕವಾಳಗಬ್ಭೇ ಇಸ್ಸರಂ ಚಕ್ಕವತ್ತಿರಜ್ಜಂ ಕರೇಯ್ಯಾತಿ ಅತ್ಥೋ। ಏಕಿಸ್ಸಾ ಪೂಜನಾಯೇತನ್ತಿ ಧಾತುಗಬ್ಭೇ ಚೇತಿಯೇ ಕತಾಯ ಏಕಿಸ್ಸಾ ಪೂಜಾಯ ಏತಂ ಸಕಲಜಮ್ಬುದೀಪೇ ಸತ್ತರತನಾದಿಕಂ ಸಕಲಂ ಧನಂ। ಕಲಂ ನಾಗ್ಘತಿ ಸೋಳಸಿನ್ತಿ ಚೇತಿಯೇ ಕತಪೂಜಾಯ ಸೋಳಸಕ್ಖತ್ತುಂ ವಿಭತ್ತಸ್ಸ ಸೋಳಸಮಕೋಟ್ಠಾಸಸ್ಸ ನ ಅಗ್ಘತೀತಿ ಅತ್ಥೋ।
3. Taṃ dīpetuṃ catunnamapi dīpānantiādimāha. Tattha catunnamapi dīpānanti jambudīpaaparagoyānauttarakurupubbavidehasaṅkhātānaṃ catunnaṃ dīpānaṃ tadanugatānaṃ dvisahassaparittadīpānañca ekato katvā sakalacakkavāḷagabbhe issaraṃ cakkavattirajjaṃ kareyyāti attho. Ekissā pūjanāyetanti dhātugabbhe cetiye katāya ekissā pūjāya etaṃ sakalajambudīpe sattaratanādikaṃ sakalaṃ dhanaṃ. Kalaṃ nāgghati soḷasinti cetiye katapūjāya soḷasakkhattuṃ vibhattassa soḷasamakoṭṭhāsassa na agghatīti attho.
೪. ಸಿದ್ಧತ್ಥಸ್ಸ…ಪೇ॰… ಫಲಿತನ್ತರೇತಿ ನರಾನಂ ಅಗ್ಗಸ್ಸ ಸೇಟ್ಠಸ್ಸ ಸಿದ್ಧತ್ಥಸ್ಸ ಭಗವತೋ ಚೇತಿಯೇ ಧಾತುಗಬ್ಭಮ್ಹಿ ಸುಧಾಕಮ್ಮೇ ಕರೀಯಮಾನೇ ಪರಿಚ್ಛೇದಾನಂ ಉಭಿನ್ನಮನ್ತರೇ ವೇಮಜ್ಝೇ, ಅಥ ವಾ ಪುಪ್ಫದಾನಟ್ಠಾನಾನಂ ಅನ್ತರೇ ಫಲನ್ತಿಯಾ ಮಯಾ ಸುಧಾಪಿಣ್ಡೋ ದಿನ್ನೋ ಮಕ್ಖಿತೋತಿ ಸಮ್ಬನ್ಧೋ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
4.Siddhatthassa…pe…phalitantareti narānaṃ aggassa seṭṭhassa siddhatthassa bhagavato cetiye dhātugabbhamhi sudhākamme karīyamāne paricchedānaṃ ubhinnamantare vemajjhe, atha vā pupphadānaṭṭhānānaṃ antare phalantiyā mayā sudhāpiṇḍo dinno makkhitoti sambandho. Sesaṃ sabbattha uttānamevāti.
ಸುಧಾಪಿಣ್ಡಿಯತ್ಥೇರಅಪದಾನವಣ್ಣನಾ ಸಮತ್ತಾ।
Sudhāpiṇḍiyattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೧. ಸುಧಾಪಿಣ್ಡಿಯತ್ಥೇರಅಪದಾನಂ • 1. Sudhāpiṇḍiyattheraapadānaṃ
