| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
10. සුධාවග්‌ගො
10. Sudhāvaggo
1. සුධාපිණ්‌ඩියත්‌ථෙරඅපදානවණ්‌ණනා
1. Sudhāpiṇḍiyattheraapadānavaṇṇanā
පූජාරහෙ පූජයතොතිආදිකං ආයස්‌මතො සුධාපිණ්‌ඩියත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො සිද්‌ධත්‌ථස්‌ස භගවතො කාලෙ භගවති ධරමානෙ පුඤ්‌ඤං කාතුමසක්‌කොන්‌තො පරිනිබ්‌බුතෙ භගවති තස්‌ස ධාතුං නිදහිත්‌වා චෙතියෙ කරීයමානෙ සුධාපිණ්‌ඩමදාසි. සො තෙන පුඤ්‌ඤෙන චතුන්‌නවුතිකප්‌පතො පට්‌ඨාය එත්‌ථන්‌තරෙ චතුරාපායමදිස්‌වා දෙවමනුස්‌සසම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ එකස්‌මිං කුලගෙහෙ නිබ්‌බත්‌තො විඤ්‌ඤුතං පත්‌වා සත්‌ථරි පසීදිත්‌වා පබ්‌බජිතො නචිරස්‌සෙව අරහා අහොසි.
Pūjārahepūjayatotiādikaṃ āyasmato sudhāpiṇḍiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle bhagavati dharamāne puññaṃ kātumasakkonto parinibbute bhagavati tassa dhātuṃ nidahitvā cetiye karīyamāne sudhāpiṇḍamadāsi. So tena puññena catunnavutikappato paṭṭhāya etthantare caturāpāyamadisvā devamanussasampattiyo anubhavitvā imasmiṃ buddhuppāde ekasmiṃ kulagehe nibbatto viññutaṃ patvā satthari pasīditvā pabbajito nacirasseva arahā ahosi.
1-2. සො අපරභාගෙ අත්‌තනො පුබ්‌බකම්‌මං සරිත්‌වා සොමනස්‌සජාතො අත්‌තනො පුබ්‌බචරිතාපදානං පකාසෙන්‌තො පූජාරහෙතිආදිමාහ. තත්‌ථ පූජාරහා නාම බුද්‌ධපච්‌චෙකබුද්‌ධඅරියසාවකාචරියුපජ්‌ඣායමාතාපිතුගරුආදයො, තෙසු පූජාරහෙසු මාලාදිපදුමවත්‌ථාභරණචතුපච්‌චයාදීහි පූජයතො පූජයන්‌තස්‌ස පුග්‌ගලස්‌ස පුඤ්‌ඤකොට්‌ඨාසං සහස්‌සසතසහස්‌සාදිවසෙන සඞ්‌ඛ්‍යං කාතුං කෙනචි මහානුභාවෙනාපි න සක්‌කාති අත්‌ථො. න කෙවලමෙව ධරමානෙ බුද්‌ධාදයො පූජයතො, පරිනිබ්‌බුතස්‌සාපි භගවතො චෙතියපටිමාබොධිආදීසුපි එසෙව නයො.
1-2. So aparabhāge attano pubbakammaṃ saritvā somanassajāto attano pubbacaritāpadānaṃ pakāsento pūjārahetiādimāha. Tattha pūjārahā nāma buddhapaccekabuddhaariyasāvakācariyupajjhāyamātāpitugaruādayo, tesu pūjārahesu mālādipadumavatthābharaṇacatupaccayādīhi pūjayato pūjayantassa puggalassa puññakoṭṭhāsaṃ sahassasatasahassādivasena saṅkhyaṃ kātuṃ kenaci mahānubhāvenāpi na sakkāti attho. Na kevalameva dharamāne buddhādayo pūjayato, parinibbutassāpi bhagavato cetiyapaṭimābodhiādīsupi eseva nayo.
3. තං දීපෙතුං චතුන්‌නමපි දීපානන්‌තිආදිමාහ. තත්‌ථ චතුන්‌නමපි දීපානන්‌ති ජම්‌බුදීපඅපරගොයානඋත්‌තරකුරුපුබ්‌බවිදෙහසඞ්‌ඛාතානං චතුන්‌නං දීපානං තදනුගතානං ද්‌විසහස්‌සපරිත්‌තදීපානඤ්‌ච එකතො කත්‌වා සකලචක්‌කවාළගබ්‌භෙ ඉස්‌සරං චක්‌කවත්‌තිරජ්‌ජං කරෙය්‍යාති අත්‌ථො. එකිස්‌සා පූජනායෙතන්‌ති ධාතුගබ්‌භෙ චෙතියෙ කතාය එකිස්‌සා පූජාය එතං සකලජම්‌බුදීපෙ සත්‌තරතනාදිකං සකලං ධනං. කලං නාග්‌ඝති සොළසින්‌ති චෙතියෙ කතපූජාය සොළසක්‌ඛත්‌තුං විභත්‌තස්‌ස සොළසමකොට්‌ඨාසස්‌ස න අග්‌ඝතීති අත්‌ථො.
3. Taṃ dīpetuṃ catunnamapi dīpānantiādimāha. Tattha catunnamapi dīpānanti jambudīpaaparagoyānauttarakurupubbavidehasaṅkhātānaṃ catunnaṃ dīpānaṃ tadanugatānaṃ dvisahassaparittadīpānañca ekato katvā sakalacakkavāḷagabbhe issaraṃ cakkavattirajjaṃ kareyyāti attho. Ekissā pūjanāyetanti dhātugabbhe cetiye katāya ekissā pūjāya etaṃ sakalajambudīpe sattaratanādikaṃ sakalaṃ dhanaṃ. Kalaṃ nāgghati soḷasinti cetiye katapūjāya soḷasakkhattuṃ vibhattassa soḷasamakoṭṭhāsassa na agghatīti attho.
4. සිද්‌ධත්‌ථස්‌ස…පෙ.… ඵලිතන්‌තරෙති නරානං අග්‌ගස්‌ස සෙට්‌ඨස්‌ස සිද්‌ධත්‌ථස්‌ස භගවතො චෙතියෙ ධාතුගබ්‌භම්‌හි සුධාකම්‌මෙ කරීයමානෙ පරිච්‌ඡෙදානං උභින්‌නමන්‌තරෙ වෙමජ්‌ඣෙ, අථ වා පුප්‌ඵදානට්‌ඨානානං අන්‌තරෙ ඵලන්‌තියා මයා සුධාපිණ්‌ඩො දින්‌නො මක්‌ඛිතොති සම්‌බන්‌ධො. සෙසං සබ්‌බත්‌ථ උත්‌තානමෙවාති.
4.Siddhatthassa…pe…phalitantareti narānaṃ aggassa seṭṭhassa siddhatthassa bhagavato cetiye dhātugabbhamhi sudhākamme karīyamāne paricchedānaṃ ubhinnamantare vemajjhe, atha vā pupphadānaṭṭhānānaṃ antare phalantiyā mayā sudhāpiṇḍo dinno makkhitoti sambandho. Sesaṃ sabbattha uttānamevāti.
සුධාපිණ්‌ඩියත්‌ථෙරඅපදානවණ්‌ණනා සමත්‌තා.
Sudhāpiṇḍiyattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 1. සුධාපිණ්‌ඩියත්‌ථෙරඅපදානං • 1. Sudhāpiṇḍiyattheraapadānaṃ
