Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā

    ॥ নমো তস্স ভগৰতো অরহতো সম্মাসম্বুদ্ধস্স॥

    Namo tassa bhagavato arahato sammāsambuddhassa

    ৰিনযপিটকে

    Vinayapiṭake

    সারত্থদীপনী-টীকা (দুতিযো ভাগো)

    Sāratthadīpanī-ṭīkā (dutiyo bhāgo)

    ১. পারাজিককণ্ডং

    1. Pārājikakaṇḍaṃ

    ১. পঠমপারাজিকং

    1. Paṭhamapārājikaṃ

    সুদিন্নভাণৰারৰণ্ণনা

    Sudinnabhāṇavāravaṇṇanā

    ২৪. অনুপদৰণ্ণনন্তি পদং পদং পটিৰণ্ণনং, পদানুক্কমেন ৰণ্ণনং ৰা। ভণ্ডপ্পযোজনউদ্ধারসারণাদিনা কিচ্চেনাতি এত্থ ৰিক্কাযিকভণ্ডস্স ৰিক্কিণনং ভণ্ডপ্পযোজনং, দাতুং সঙ্কেতিতে দিৰসে গন্ত্ৰা গহণং উদ্ধারো, ‘‘অসুকস্মিং দিৰসে দাতব্ব’’ন্তি সতুপ্পাদনং সারণং। চতুব্বিধাযাতি খত্তিযব্রাহ্মণগহপতিসমণানং ৰসেন চতুব্বিধায, ভিক্খুভিক্খুনীউপাসকউপাসিকানং ৰসেন ৰা। দিস্ৰানস্স এতদহোসীতি হেতুঅত্থো অযং দিস্ৰান-সদ্দো অসমানকত্তুকো যথা ‘‘ঘতং পিৰিত্ৰা বলং হোতি, সীহং দিস্ৰা ভযং হোতী’’তি। দস্সনকারণা হি এৰং পরিৰিতক্কনং অহোসি। কিঞ্চাপি এত্থ ‘‘ভব্বকুলপুত্তস্সা’’তি ৰুত্তং, তথাপি উপনিস্সযসম্পন্নস্সপি অজাতসত্তুনো ৰিয অন্তরাযো ভৰিস্সতীতি ইমস্স থেরস্সপি কতপাপকম্মমূলৰিপ্পটিসারৰসেন অধিগমন্তরাযো অহোসীতি ৰদন্তি।

    24.Anupadavaṇṇananti padaṃ padaṃ paṭivaṇṇanaṃ, padānukkamena vaṇṇanaṃ vā. Bhaṇḍappayojanauddhārasāraṇādinā kiccenāti ettha vikkāyikabhaṇḍassa vikkiṇanaṃ bhaṇḍappayojanaṃ, dātuṃ saṅketite divase gantvā gahaṇaṃ uddhāro, ‘‘asukasmiṃ divase dātabba’’nti satuppādanaṃ sāraṇaṃ. Catubbidhāyāti khattiyabrāhmaṇagahapatisamaṇānaṃ vasena catubbidhāya, bhikkhubhikkhunīupāsakaupāsikānaṃ vasena vā. Disvānassa etadahosīti hetuattho ayaṃ disvāna-saddo asamānakattuko yathā ‘‘ghataṃ pivitvā balaṃ hoti, sīhaṃ disvā bhayaṃ hotī’’ti. Dassanakāraṇā hi evaṃ parivitakkanaṃ ahosi. Kiñcāpi ettha ‘‘bhabbakulaputtassā’’ti vuttaṃ, tathāpi upanissayasampannassapi ajātasattuno viya antarāyo bhavissatīti imassa therassapi katapāpakammamūlavippaṭisāravasena adhigamantarāyo ahosīti vadanti.

    কিং পন যেসং মগ্গফলানং উপনিস্সযো অত্থি, বুদ্ধানং সম্মুখীভাৰেপি তেসং অন্তরাযো হোতীতি? আম হোতি, ন পন বুদ্ধে পটিচ্চ। বুদ্ধা হি পরেসং মগ্গফলাধিগমায উস্সাহজাতা তত্থ নিরন্তরং যুত্তপযুত্তা এৰ হোন্তি, তস্মা তে পটিচ্চ তেসং অন্তরাযো ন হোতি, অথ খো কিরিযাপরিহানিযা ৰা পাপমিত্ততায ৰা হোতি, কিরিযাপরিহানি চ দেসকস্স তস্সেৰ ৰা পুগ্গলস্স তজ্জপযোগাভাৰতো ৰেদিতব্বা, দেসকৰসেন পনেত্থ পরিহানি সাৰকানং ৰসেনেৰ ৰেদিতব্বা, ন বুদ্ধানং ৰসেন। তথা হি সচে ধম্মসেনাপতি ধনঞ্জানিযস্স ব্রাহ্মণস্স আসযং ঞত্ৰা ধম্মং দেসযিস্স, ব্রাহ্মণো সোতাপন্নো অভৰিস্স। এৰং তাৰ দেসকস্স ৰসেন কিরিযাপরিহানিযা অন্তরাযো হোতি। সচে পেস্সো হত্থারোহপুত্তো ভগৰতো সম্মুখা ধম্মং সুণন্তো মুহুত্তং নিসীদেয্য, যাৰ তস্স ভগৰা অত্তন্তপাদিকে চত্তারো পুগ্গলে ৰিত্থারেন ৰিভজিত্ৰা দেসেতি, সোতাপত্তিফলেন সংযুত্তো অভৰিস্স। এৰং পুগ্গলস্স ৰসেন কিরিযাপরিহানিযা অন্তরাযো হোতি নাম। ইমস্স হি উপাসকস্স কিরিযাপরিহানি জাতা অপরিনিট্ঠিতায দেসনায উট্ঠহিত্ৰা পক্কন্তত্তা। সচে অজাতসত্তু দেৰদত্তস্স ৰচনং গহেত্ৰা পিতুঘাতকম্মং নাকরিস্স, সামঞ্ঞফলসুত্তকথিতদিৰসে সোতাপন্নো অভৰিস্স, তস্স ৰচনং গহেত্ৰা পিতুঘাতকম্মস্স কতত্তা পন নাহোসি। এৰং পাপমিত্ততায অন্তরাযো হোতি। সুদিন্নস্সপি পাপমিত্তৰসেন অন্তরাযো অহোসীতি দট্ঠব্বং। যদি হি তেন মাতাপিতূনং ৰচনং গহেত্ৰা পুরাণদুতিযিকায মেথুনধম্মো পটিসেৰিতো নাভৰিস্স, ন তংমূলৰিপ্পটিসারৰসেন অধিগমন্তরাযো অভৰিস্স।

    Kiṃ pana yesaṃ maggaphalānaṃ upanissayo atthi, buddhānaṃ sammukhībhāvepi tesaṃ antarāyo hotīti? Āma hoti, na pana buddhe paṭicca. Buddhā hi paresaṃ maggaphalādhigamāya ussāhajātā tattha nirantaraṃ yuttapayuttā eva honti, tasmā te paṭicca tesaṃ antarāyo na hoti, atha kho kiriyāparihāniyā vā pāpamittatāya vā hoti, kiriyāparihāni ca desakassa tasseva vā puggalassa tajjapayogābhāvato veditabbā, desakavasena panettha parihāni sāvakānaṃ vaseneva veditabbā, na buddhānaṃ vasena. Tathā hi sace dhammasenāpati dhanañjāniyassa brāhmaṇassa āsayaṃ ñatvā dhammaṃ desayissa, brāhmaṇo sotāpanno abhavissa. Evaṃ tāva desakassa vasena kiriyāparihāniyā antarāyo hoti. Sace pesso hatthārohaputto bhagavato sammukhā dhammaṃ suṇanto muhuttaṃ nisīdeyya, yāva tassa bhagavā attantapādike cattāro puggale vitthārena vibhajitvā deseti, sotāpattiphalena saṃyutto abhavissa. Evaṃ puggalassa vasena kiriyāparihāniyā antarāyo hoti nāma. Imassa hi upāsakassa kiriyāparihāni jātā apariniṭṭhitāya desanāya uṭṭhahitvā pakkantattā. Sace ajātasattu devadattassa vacanaṃ gahetvā pitughātakammaṃ nākarissa, sāmaññaphalasuttakathitadivase sotāpanno abhavissa, tassa vacanaṃ gahetvā pitughātakammassa katattā pana nāhosi. Evaṃ pāpamittatāya antarāyo hoti. Sudinnassapi pāpamittavasena antarāyo ahosīti daṭṭhabbaṃ. Yadi hi tena mātāpitūnaṃ vacanaṃ gahetvā purāṇadutiyikāya methunadhammo paṭisevito nābhavissa, na taṃmūlavippaṭisāravasena adhigamantarāyo abhavissa.

    যন্নূনাতি পরিৰিতক্কনত্থে নিপাতোতি আহ ‘‘পরিৰিতক্কদস্সনমেত’’ন্তি। ‘‘ধম্মং সুণেয্য’’ন্তি কিরিযাপদেন ৰুচ্চমানো এৰ হি অত্থো ‘‘যন্নূনা’’তি নিপাতপদেন জোতীযতি। অহং যন্নূন ধম্মং সুণেয্যন্তি যোজনা। যন্নূনাতি চ যদি পনাতি অত্থো। যদি পনাতি ইদম্পি হি তেন সমানত্থমেৰ। যং ধম্মং সুণাতীতি সম্বন্ধো। উল়ারুল়ারজনাতি খত্তিযমহাসালাদিউল়ারুল়ারজনাকিণ্ণা । সচে অযম্পি পঠমং আগচ্ছেয্য, ভগৰন্তং উপসঙ্কমিত্ৰা নিসীদিতুং অরহরূপোতি আহ ‘‘পচ্ছা আগতেনা’’তি। সিক্খত্তযূপসংহিতন্তি অধিসীলঅধিচিত্তঅধিপঞ্ঞাসঙ্খাতসিক্খত্তযযুত্তং। থোকং ধম্মকথং সুত্ৰা অহোসীতি সম্বন্ধো। ইধাপি সুত্ৰা-সদ্দো হেতুঅত্থোতি দট্ঠব্বো, সৰনকারণা এতদহোসীতি ৰুত্তং হোতি। যদি এৰং অথ কস্মা ‘‘একমন্তং নিসিন্নস্স…পে॰… এতদহোসী’’তি ৰুত্তন্তি আহ ‘‘তং পনস্স যস্মা’’তিআদি। তত্থ তন্তি পরিৰিতক্কনং।

    Yannūnāti parivitakkanatthe nipātoti āha ‘‘parivitakkadassanameta’’nti. ‘‘Dhammaṃ suṇeyya’’nti kiriyāpadena vuccamāno eva hi attho ‘‘yannūnā’’ti nipātapadena jotīyati. Ahaṃ yannūna dhammaṃ suṇeyyanti yojanā. Yannūnāti ca yadi panāti attho. Yadi panāti idampi hi tena samānatthameva. Yaṃ dhammaṃ suṇātīti sambandho. Uḷāruḷārajanāti khattiyamahāsālādiuḷāruḷārajanākiṇṇā . Sace ayampi paṭhamaṃ āgaccheyya, bhagavantaṃ upasaṅkamitvā nisīdituṃ araharūpoti āha ‘‘pacchā āgatenā’’ti. Sikkhattayūpasaṃhitanti adhisīlaadhicittaadhipaññāsaṅkhātasikkhattayayuttaṃ. Thokaṃ dhammakathaṃ sutvā ahosīti sambandho. Idhāpi sutvā-saddo hetuatthoti daṭṭhabbo, savanakāraṇā etadahosīti vuttaṃ hoti. Yadi evaṃ atha kasmā ‘‘ekamantaṃ nisinnassa…pe… etadahosī’’ti vuttanti āha ‘‘taṃ panassa yasmā’’tiādi. Tattha tanti parivitakkanaṃ.

    সঙ্খেপকথাতি ৰিসুং ৰিসুং পদুদ্ধারং অকত্ৰা সমাসতো অত্থৰণ্ণনা। যেন যেন আকারেনাতি যেন যেন পকারেন। তেন তেন মে উপপরিক্খতোতি ‘‘কামা নামেতে অনিচ্চা দুক্খা ৰিপরিণামধম্মা অট্ঠিকঙ্কলূপমা’’তি (ম॰ নি॰ ১.২৩৪; ২.৪২; পাচি॰ ৪১৭; মহানি॰ ৩; চূল়নি॰ খগ্গৰিসাণসুত্তনিদ্দেস ১৪৭) চ আদিনা যেন যেন আকারেন কামেসু আদীনৰং ওকারং সংকিলেসং, তব্বিপরিযাযতো নেক্খম্মে আনিসংসং গুণং পকাসেন্তং ভগৰতা ধম্মং দেসিতং আজানামি অৰবুজ্ঝামি, তেন তেন পকারেন উপপরিক্খতো ৰীমংসন্তস্স ময্হং এৰং হোতি এৰং উপট্ঠাতি। সিক্খত্তযব্রহ্মচরিযন্তি অধিসীলসিক্খাদিসিক্খত্তযসঙ্গহং সেট্ঠচরিযং। একম্পি দিৰসন্তি একদিৰসমত্তম্পি। অখণ্ডং কত্ৰাতি দুক্কটমত্তস্সপি অনাপজ্জনেন অখণ্ডিতং কত্ৰা, অখণ্ডঅচ্ছিদ্দাদিভাৰাপাদনেন ৰা। অখণ্ডলক্খণৰচনঞ্হেতং। চরিমকচিত্তন্তি চুতিচিত্তং। কিঞ্চিপি একদেসং অসেসেত্ৰা একন্তেনেৰ পরিপূরেতব্বতায একন্তপরিপুণ্ণং। কিলেসমলেন অমলীনং কত্ৰাতি তণ্হাসংকিলেসাদিনা অসংকিলিট্ঠং কত্ৰা, চিত্তুপ্পাদমত্তম্পি সংকিলেসমলং অনুপ্পাদেত্ৰা। অচ্চন্তমেৰ ৰিসুদ্ধং কত্ৰা পরিহরিতব্বতায একন্তপরিসুদ্ধং। ততো এৰ সঙ্খং ৰিয লিখিতন্তি সঙ্খলিখিতং। তেনাহ ‘‘লিখিতসঙ্খসদিস’’ন্তি। পরিযোদাতট্ঠেন নিম্মলভাৰেন সঙ্খং ৰিয লিখিতং ধোতন্তি সঙ্খলিখিতন্তি আহ ‘‘ধোতসঙ্খসপ্পটিভাগ’’ন্তি। ‘‘অজ্ঝাৰসতা’’তি পদপ্পযোগেন অগারন্তি ভুম্মত্থে উপযোগৰচনন্তি আহ ‘‘অগারমজ্ঝে’’তি। দাঠিকাপি মস্সুগ্গহণেনেৰ গহেত্ৰা ‘‘মস্সু’’ত্ৰেৰ ৰুত্তং, উত্তরাধরমস্সুন্তি অত্থো। কসাযেন রত্তানীতি কাসাযানীতি আহ ‘‘কসাযরসপীততাযা’’তি। পরিদহিত্ৰাতি নিৰাসেত্ৰা চেৰ পারুপিত্ৰা চ। অগারস্স হিতন্তি অগারৰাসো অগারং উত্তরপদলোপেন, তস্স ৰড্ঢিআৰহং অগারস্স হিতং।

    Saṅkhepakathāti visuṃ visuṃ paduddhāraṃ akatvā samāsato atthavaṇṇanā. Yena yena ākārenāti yena yena pakārena. Tena tena me upaparikkhatoti ‘‘kāmā nāmete aniccā dukkhā vipariṇāmadhammā aṭṭhikaṅkalūpamā’’ti (ma. ni. 1.234; 2.42; pāci. 417; mahāni. 3; cūḷani. khaggavisāṇasuttaniddesa 147) ca ādinā yena yena ākārena kāmesu ādīnavaṃ okāraṃ saṃkilesaṃ, tabbipariyāyato nekkhamme ānisaṃsaṃ guṇaṃ pakāsentaṃ bhagavatā dhammaṃ desitaṃ ājānāmi avabujjhāmi, tena tena pakārena upaparikkhato vīmaṃsantassa mayhaṃ evaṃ hoti evaṃ upaṭṭhāti. Sikkhattayabrahmacariyanti adhisīlasikkhādisikkhattayasaṅgahaṃ seṭṭhacariyaṃ. Ekampi divasanti ekadivasamattampi. Akhaṇḍaṃ katvāti dukkaṭamattassapi anāpajjanena akhaṇḍitaṃ katvā, akhaṇḍaacchiddādibhāvāpādanena vā. Akhaṇḍalakkhaṇavacanañhetaṃ. Carimakacittanti cuticittaṃ. Kiñcipi ekadesaṃ asesetvā ekanteneva paripūretabbatāya ekantaparipuṇṇaṃ. Kilesamalena amalīnaṃ katvāti taṇhāsaṃkilesādinā asaṃkiliṭṭhaṃ katvā, cittuppādamattampi saṃkilesamalaṃ anuppādetvā. Accantameva visuddhaṃ katvā pariharitabbatāya ekantaparisuddhaṃ. Tato eva saṅkhaṃ viya likhitanti saṅkhalikhitaṃ. Tenāha ‘‘likhitasaṅkhasadisa’’nti. Pariyodātaṭṭhena nimmalabhāvena saṅkhaṃ viya likhitaṃ dhotanti saṅkhalikhitanti āha ‘‘dhotasaṅkhasappaṭibhāga’’nti. ‘‘Ajjhāvasatā’’ti padappayogena agāranti bhummatthe upayogavacananti āha ‘‘agāramajjhe’’ti. Dāṭhikāpi massuggahaṇeneva gahetvā ‘‘massu’’tveva vuttaṃ, uttarādharamassunti attho. Kasāyena rattānīti kāsāyānīti āha ‘‘kasāyarasapītatāyā’’ti. Paridahitvāti nivāsetvā ceva pārupitvā ca. Agārassa hitanti agāravāso agāraṃ uttarapadalopena, tassa vaḍḍhiāvahaṃ agārassa hitaṃ.

    ২৫. ঞাতিসালোহিতাতিআদীসু ‘‘অযং অজ্ঝত্তিকো’’তি জানন্তি, ঞাযন্তি ৰাতি ঞাতী, লোহিতেন সম্বন্ধাতি সালোহিতা। পিতুপক্খিকা ঞাতী, মাতুপক্খিকা সালোহিতা। মাতুপক্খিকা পিতুপক্খিকা ৰা ঞাতী , সস্সুসসুরপক্খিকা সালোহিতা। মিত্তাযন্তীতি মিত্তা, মিনন্তি ৰা সব্বগুয্হেসু অন্তো পক্খিপন্তীতি মিত্তা। কিচ্চকরণীযেসু সহভাৰট্ঠেন অমা হোন্তীতি অমচ্চা। মমাযতীতি মাতা, পিযাযতীতি পিতা। সরীরকিচ্চলেসেনাতি উচ্চারপস্সাৰাদিসরীরকিচ্চলেসেন। অননুঞ্ঞাতং পুত্তং ন পব্বাজেতীতি ‘‘মাতাপিতূনং লোকিযমহাজনস্স চ চিত্তঞ্ঞথত্তং মা হোতূ’’তি ন পব্বাজেতি। ততোযেৰ চ সুদ্ধোদনমহারাজস্স তথা ৰরো দিন্নো।

    25.Ñātisālohitātiādīsu ‘‘ayaṃ ajjhattiko’’ti jānanti, ñāyanti vāti ñātī, lohitena sambandhāti sālohitā. Pitupakkhikā ñātī, mātupakkhikā sālohitā. Mātupakkhikā pitupakkhikā vā ñātī , sassusasurapakkhikā sālohitā. Mittāyantīti mittā, minanti vā sabbaguyhesu anto pakkhipantīti mittā. Kiccakaraṇīyesu sahabhāvaṭṭhena amā hontīti amaccā. Mamāyatīti mātā, piyāyatīti pitā. Sarīrakiccalesenāti uccārapassāvādisarīrakiccalesena. Ananuññātaṃ puttaṃ na pabbājetīti ‘‘mātāpitūnaṃ lokiyamahājanassa ca cittaññathattaṃ mā hotū’’ti na pabbājeti. Tatoyeva ca suddhodanamahārājassa tathā varo dinno.

    ২৬. ধুরনিক্খেপেনাতি ভণ্ডপ্পযোজনাদীসু ধুরনিক্খেপেন। তেনাহ ‘‘ন হী’’তিআদি। পিযাযিতব্বোতি পিযোতি আহ ‘‘পীতিজননকো’’তি। মনস্স অপ্পাযনতো মনাপোতি আহ ‘‘মনৰড্ঢনকো’’তি। সুখেধিতো তরুণদারককালে, ততো পরঞ্চ সপ্পিখীরাদিসাদুরসমনুঞ্ঞভোজনাদিআহারসম্পত্তিযা সুখপরিহতো। অথ ৰা দল়্হভত্তিকধাতিজনাদিপরিজনসম্পত্তিযা চেৰ পরিচ্ছেদসম্পত্তিযা চ উল়ারপণীতসুখপচ্চযূপহারেহি চ সুখেধিতো, অকিচ্ছেনেৰ দুক্খপচ্চযৰিনোদনেন সুখপরিহতো। অজ্ঝত্তিকঙ্গসম্পত্তিযা ৰা সুখেধিতো, বাহিরঙ্গসম্পত্তিযা সুখপরিহতো।

    26.Dhuranikkhepenāti bhaṇḍappayojanādīsu dhuranikkhepena. Tenāha ‘‘na hī’’tiādi. Piyāyitabboti piyoti āha ‘‘pītijananako’’ti. Manassa appāyanato manāpoti āha ‘‘manavaḍḍhanako’’ti. Sukhedhito taruṇadārakakāle, tato parañca sappikhīrādisādurasamanuññabhojanādiāhārasampattiyā sukhaparihato. Atha vā daḷhabhattikadhātijanādiparijanasampattiyā ceva paricchedasampattiyā ca uḷārapaṇītasukhapaccayūpahārehi ca sukhedhito, akiccheneva dukkhapaccayavinodanena sukhaparihato. Ajjhattikaṅgasampattiyā vā sukhedhito, bāhiraṅgasampattiyā sukhaparihato.

    কিঞ্চীতি এতস্স ৰিৰরণং ‘‘অপ্পমত্তকম্পি কলভাগ’’ন্তি। যদা জানাতি-সদ্দো বোধনত্থো ন হোতি, তদা তস্স পযোগে ‘‘সপ্পিনো জানাতি, মধুনো জানাতী’’তিআদীসু ৰিয করণত্থে সামিৰচনং সদ্দত্থৰিদূ ইচ্ছন্তীতি আহ ‘‘কিঞ্চি দুক্খেন নানুভোসী’’তি। তেনাহ ‘‘করণত্থে সামিৰচনং, অনুভৰনত্থে চ জাননা’’তি। এত্থ চ কিঞ্চি দুক্খেন নানুভোসীতি কেনচি দুক্খেন করণভূতেন ৰিসযং নানুভোসীতি এৰমত্থো ৰেদিতব্বো। ‘‘কিঞ্চী’’তি এত্থাপি হি করণত্থে সামিৰচনস্স লোপো কতো। তেনেৰ চ ৰক্খতি ‘‘ৰিকপ্পদ্ৰযেপি পুরিমপদস্স উত্তরপদেন সমানৰিভত্তিলোপো দট্ঠব্বো’’তি। যদা পন জানাতি-সদ্দো সরণত্থো হোতি, তদা সরণত্থানং ধাতুসদ্দানং পযোগে ‘‘মাতু সরতি, পিতু সরতি, ভাতু জানাতী’’তিআদীসু ৰিয উপযোগত্থে সামিৰচনং সদ্দসত্থৰিদূ ৰদন্তীতি আহ ‘‘অথ ৰা কিঞ্চি দুক্খং নস্সরসীতি অত্থো’’তি, কস্সচি দুক্খস্স অননুভূতত্তা অত্তনা অনুভূতং অপ্পমত্তকম্পি দুক্খং পরিযেসমানোপি অভাৰতোযেৰ নস্সরসীতি অত্থো । ৰিকপ্পদ্ৰযেপীতি অনুভৰনসরণত্থৰসেন ৰুত্তে দুতিযততিযৰিকপ্পদ্ৰযে। পুরিমপদস্সাতি ‘‘কিঞ্চী’’তি পদস্স। উত্তরপদেনাতি ‘‘দুক্খস্সা’’তি পদেন। সমানৰিভত্তিলোপোতি উত্তরপদেন সমানস্স সামিৰচনস্স লোপো। ‘‘কস্সচি দুক্খস্সা’’তি ৰত্তব্বে ৰিকপ্পদ্ৰযেপি পুরিমপদে সামিৰচনস্স লোপং কত্ৰা ‘‘কিঞ্চি দুক্খস্সা’’তি নিদ্দেসো কতো। অনিচ্ছকাতি অনিচ্ছন্তা। এৰং সন্তেতি ননু মযং সুদিন্ন সামাদীসু কেনচিপি উপাযেন অপ্পটিসাধনেন অপ্পটিকারেন মরণেনপি তযা অকামকাপি ৰিনা ভৰিস্সাম, এৰং সতি। যেনাতি যেন কারণেন। কিং পনাতি এত্থ কিন্তি করণত্থে পচ্চত্তৰচনন্তি দস্সেন্তো আহ ‘‘কেন পন কারণেনা’’তি।

    Kiñcīti etassa vivaraṇaṃ ‘‘appamattakampi kalabhāga’’nti. Yadā jānāti-saddo bodhanattho na hoti, tadā tassa payoge ‘‘sappino jānāti, madhuno jānātī’’tiādīsu viya karaṇatthe sāmivacanaṃ saddatthavidū icchantīti āha ‘‘kiñci dukkhena nānubhosī’’ti. Tenāha ‘‘karaṇatthe sāmivacanaṃ, anubhavanatthe ca jānanā’’ti. Ettha ca kiñci dukkhena nānubhosīti kenaci dukkhena karaṇabhūtena visayaṃ nānubhosīti evamattho veditabbo. ‘‘Kiñcī’’ti etthāpi hi karaṇatthe sāmivacanassa lopo kato. Teneva ca vakkhati ‘‘vikappadvayepi purimapadassa uttarapadena samānavibhattilopo daṭṭhabbo’’ti. Yadā pana jānāti-saddo saraṇattho hoti, tadā saraṇatthānaṃ dhātusaddānaṃ payoge ‘‘mātu sarati, pitu sarati, bhātu jānātī’’tiādīsu viya upayogatthe sāmivacanaṃ saddasatthavidū vadantīti āha ‘‘atha vā kiñci dukkhaṃ nassarasīti attho’’ti, kassaci dukkhassa ananubhūtattā attanā anubhūtaṃ appamattakampi dukkhaṃ pariyesamānopi abhāvatoyeva nassarasīti attho . Vikappadvayepīti anubhavanasaraṇatthavasena vutte dutiyatatiyavikappadvaye. Purimapadassāti ‘‘kiñcī’’ti padassa. Uttarapadenāti ‘‘dukkhassā’’ti padena. Samānavibhattilopoti uttarapadena samānassa sāmivacanassa lopo. ‘‘Kassaci dukkhassā’’ti vattabbe vikappadvayepi purimapade sāmivacanassa lopaṃ katvā ‘‘kiñci dukkhassā’’ti niddeso kato. Anicchakāti anicchantā. Evaṃ santeti nanu mayaṃ sudinna sāmādīsu kenacipi upāyena appaṭisādhanena appaṭikārena maraṇenapi tayā akāmakāpi vinā bhavissāma, evaṃ sati. Yenāti yena kāraṇena. Kiṃ panāti ettha kinti karaṇatthe paccattavacananti dassento āha ‘‘kena pana kāraṇenā’’ti.

    ২৮. গন্ধব্বনটনাটকাদীনীতি এত্থ গন্ধব্বা নাম গাযনকা, নটা নাম রঙ্গনটা, নাটকা লঙ্ঘনকাদযো। পরিচারেহীতি এত্থ পরিতো তত্থ তত্থ যথাসকং ৰিসযেসু চারেহীতি অত্থোতি আহ ‘‘ইন্দ্রিযানি চারেহী’’তিআদি। পরিচারেহীতি ৰা সুখূপকরণেহি অত্তানং পরিচারেহি অত্তনো পরিচরণং কারেহি। তথাভূতো চ যস্মা লল়ন্তো কীল়ন্তো নাম হোতি, তস্মা ‘‘লল়া’’তিআদি ৰুত্তং। ভুঞ্জিতব্বতো পরিভুঞ্জিতব্বতো ৰিসেসতো পঞ্চ কামগুণা ভোগা নামাতি আহ ‘‘ভোগে ভুঞ্জন্তো’’তি। দানপ্পদানানীতি এত্থ নিচ্চদানং দানং নাম, উপোসথদিৰসাদীসু দাতব্বং অতিরেকদানং পদানং নাম। পৰেণীরক্খণৰসেন ৰা দীযমানং দানং নাম, অত্তনাৰ পট্ঠপেত্ৰা দীযমানং পদানং নাম। পচুরজনসাধারণং ৰা নাতিউল়ারং দানং নাম, অনঞ্ঞসাধারণং অতিউল়ারং পদানং নাম। আদি-সদ্দেন সীলাদীনি সঙ্গণ্হাতি। নত্থি এতস্স ৰচনপ্পটিৰচনসঙ্খাতো আলাপসল্লাপোতি নিরালাপসল্লাপো।

    28.Gandhabbanaṭanāṭakādīnīti ettha gandhabbā nāma gāyanakā, naṭā nāma raṅganaṭā, nāṭakā laṅghanakādayo. Paricārehīti ettha parito tattha tattha yathāsakaṃ visayesu cārehīti atthoti āha ‘‘indriyāni cārehī’’tiādi. Paricārehīti vā sukhūpakaraṇehi attānaṃ paricārehi attano paricaraṇaṃ kārehi. Tathābhūto ca yasmā laḷanto kīḷanto nāma hoti, tasmā ‘‘laḷā’’tiādi vuttaṃ. Bhuñjitabbato paribhuñjitabbato visesato pañca kāmaguṇā bhogā nāmāti āha ‘‘bhoge bhuñjanto’’ti. Dānappadānānīti ettha niccadānaṃ dānaṃ nāma, uposathadivasādīsu dātabbaṃ atirekadānaṃ padānaṃ nāma. Paveṇīrakkhaṇavasena vā dīyamānaṃ dānaṃ nāma, attanāva paṭṭhapetvā dīyamānaṃ padānaṃ nāma. Pacurajanasādhāraṇaṃ vā nātiuḷāraṃ dānaṃ nāma, anaññasādhāraṇaṃ atiuḷāraṃ padānaṃ nāma. Ādi-saddena sīlādīni saṅgaṇhāti. Natthi etassa vacanappaṭivacanasaṅkhāto ālāpasallāpoti nirālāpasallāpo.

    ৩০. বলং গাহেত্ৰাতি এত্থ বলগ্গহণং নাম কাযবলস্স উপ্পাদনমেৰাতি আহ ‘‘কাযবলং জনেত্ৰা’’তি। অস্সুমুখন্তি অস্সূনি মুখে এতস্সাতি অস্সুমুখো, তং অস্সুমুখং, অস্সুকিলিন্নমুখন্তি অত্থো। গামোযেৰ গামন্তসেনাসনং গামপরিযাপন্নত্তা গামন্তসেনাসনস্স। অতিরেকলাভপটিক্খেপেনাতি ‘‘পিণ্ডিযালোপভোজনং নিস্সাযা’’তি (মহাৰ॰ ১২৮) এৰং ৰুত্তভিক্খাহারলাভতো অধিকলাভো সঙ্ঘভত্তাদিঅতিরেকলাভো, তস্স পটিক্খেপেনাতি অত্থো। তেনাহ ‘‘চুদ্দস ভত্তানি পটিক্খিপিত্ৰা’’তি। সঙ্ঘভত্তং উদ্দেসভত্তং নিমন্তনভত্তং সলাকভত্তং পক্খিকং উপোসথিকং পাটিপদিকং আগন্তুকভত্তং গমিকভত্তং গিলানভত্তং গিলানুপট্ঠাকভত্তং ৰিহারভত্তং ধুরভত্তং ৰারভত্তন্তি ইমানি চুদ্দস ভত্তানি। তত্থ সকলস্স সঙ্ঘস্স দাতব্বং ভত্তং সঙ্ঘভত্তং। কতিপযে ভিক্খূ উদ্দিসিত্ৰা দাতব্বং ভত্তং উদ্দেসভত্তং। একস্মিং পক্খে একদিৰসং দাতব্বং ভত্তং পক্খিকং। উপোসথে দাতব্বং ভত্তং উপোসথিকং। পাটিপদদিৰসে দাতব্বং ভত্তং পাটিপদিকং। ৰিহারং উদ্দিস্স দাতব্বং ভত্তং ৰিহারভত্তং। ধুরগেহেযেৰ ঠপেত্ৰা দাতব্বং ভত্তং ধুরভত্তং। গামৰাসীআদীহি ৰারেন দাতব্বং ভত্তং ৰারভত্তং।

    30.Balaṃ gāhetvāti ettha balaggahaṇaṃ nāma kāyabalassa uppādanamevāti āha ‘‘kāyabalaṃ janetvā’’ti. Assumukhanti assūni mukhe etassāti assumukho, taṃ assumukhaṃ, assukilinnamukhanti attho. Gāmoyeva gāmantasenāsanaṃ gāmapariyāpannattā gāmantasenāsanassa. Atirekalābhapaṭikkhepenāti ‘‘piṇḍiyālopabhojanaṃ nissāyā’’ti (mahāva. 128) evaṃ vuttabhikkhāhāralābhato adhikalābho saṅghabhattādiatirekalābho, tassa paṭikkhepenāti attho. Tenāha ‘‘cuddasabhattāni paṭikkhipitvā’’ti. Saṅghabhattaṃ uddesabhattaṃ nimantanabhattaṃ salākabhattaṃ pakkhikaṃ uposathikaṃ pāṭipadikaṃ āgantukabhattaṃ gamikabhattaṃ gilānabhattaṃ gilānupaṭṭhākabhattaṃ vihārabhattaṃ dhurabhattaṃ vārabhattanti imāni cuddasa bhattāni. Tattha sakalassa saṅghassa dātabbaṃ bhattaṃ saṅghabhattaṃ. Katipaye bhikkhū uddisitvā dātabbaṃ bhattaṃ uddesabhattaṃ. Ekasmiṃ pakkhe ekadivasaṃ dātabbaṃ bhattaṃ pakkhikaṃ. Uposathe dātabbaṃ bhattaṃ uposathikaṃ. Pāṭipadadivase dātabbaṃ bhattaṃ pāṭipadikaṃ. Vihāraṃ uddissa dātabbaṃ bhattaṃ vihārabhattaṃ. Dhurageheyeva ṭhapetvā dātabbaṃ bhattaṃ dhurabhattaṃ. Gāmavāsīādīhi vārena dātabbaṃ bhattaṃ vārabhattaṃ.

    অথ ‘‘গহপতিচীৰরং পটিক্খিপিত্ৰা’’তি কস্মা ৰুত্তং। গহণে হি সতি পটিক্খেপো যুজ্জেয্য, ন চ পঠমবোধিযং গহপতিচীৰরস্স পটিগ্গহণং অনুঞ্ঞাতং পরতো জীৰকৰত্থুস্মিং অনুঞ্ঞাতত্তা। তেনেৰ ৰক্খতি জীৰকৰত্থুস্মিং (মহাৰ॰ অট্ঠ॰ ৩৩৭) ‘‘ভগৰতো হি বুদ্ধভাৰপ্পত্তিতো পট্ঠায যাৰ ইদং ৰত্থং, এত্থন্তরে ৰীসতি ৰস্সানি ন কোচি গহপতিচীৰরং সাদিযি, সব্বে পংসুকূলিকাৰ অহেসু’’ন্তি। সুদিন্নো চ পঠমবোধিযংযেৰ পব্বজিতো। তেনেৰ ৰক্খতি ‘‘সুদিন্নো হি ভগৰতো দ্ৰাদসমে ৰস্সে পব্বজিতো, ৰীসতিমে ৰস্সে ঞাতিকুলং পিণ্ডায পৰিট্ঠো, সযং পব্বজ্জায অট্ঠৰস্সিকো হুত্ৰা’’তি। তস্মা ‘‘গহপতিচীৰরং পটিক্খিপিত্ৰা’’তি কস্মা ৰুত্তন্তি? ৰুচ্চতে – অননুঞ্ঞাতেপি গহপতিচীৰরে পংসুকূলিকঙ্গসমাদানৰসেন গহপতিচীৰরং পটিক্খিত্তং নাম হোতীতি কত্ৰা ৰুত্তং ‘‘গহপতিচীৰরং পটিক্খিপিত্ৰা’’তি।

    Atha ‘‘gahapaticīvaraṃ paṭikkhipitvā’’ti kasmā vuttaṃ. Gahaṇe hi sati paṭikkhepo yujjeyya, na ca paṭhamabodhiyaṃ gahapaticīvarassa paṭiggahaṇaṃ anuññātaṃ parato jīvakavatthusmiṃ anuññātattā. Teneva vakkhati jīvakavatthusmiṃ (mahāva. aṭṭha. 337) ‘‘bhagavato hi buddhabhāvappattito paṭṭhāya yāva idaṃ vatthaṃ, etthantare vīsati vassāni na koci gahapaticīvaraṃ sādiyi, sabbe paṃsukūlikāva ahesu’’nti. Sudinno ca paṭhamabodhiyaṃyeva pabbajito. Teneva vakkhati ‘‘sudinno hi bhagavato dvādasame vasse pabbajito, vīsatime vasse ñātikulaṃ piṇḍāya paviṭṭho, sayaṃ pabbajjāya aṭṭhavassiko hutvā’’ti. Tasmā ‘‘gahapaticīvaraṃ paṭikkhipitvā’’ti kasmā vuttanti? Vuccate – ananuññātepi gahapaticīvare paṃsukūlikaṅgasamādānavasena gahapaticīvaraṃ paṭikkhittaṃ nāma hotīti katvā vuttaṃ ‘‘gahapaticīvaraṃ paṭikkhipitvā’’ti.

    লোলুপ্পচারং পটিক্খিপিত্ৰাতি কুসলভণ্ডস্স ভুসং ৰিলুম্পনট্ঠেন লোলুপ্পং ৰুচ্চতি তণ্হা, লোলুপ্পেন চরণং লোলুপ্পচারো, তণ্হাৰসেন ঘরপটিপাটিং অতিক্কমিত্ৰা ভিক্খায চরণং, তং পটিক্খিপিত্ৰাতি অত্থো। তেনাহ ‘‘ঘরপটিপাটিযা ভিক্খায পৰিসতী’’তি। এত্থ চ আরঞ্ঞিকঙ্গাদিপধানঙ্গৰসেন সেসধুতঙ্গানিপি গহিতানেৰ হোন্তীতি ৰেদিতব্বং। ৰজ্জীনন্তি রাজানো অপেক্খিত্ৰা সামিৰচনং কতং, ৰজ্জীরাজূনন্তি অত্থো। জনপদ-সদ্দস্স তংনিৰাসীসুপি পৰত্তনতো ‘‘ৰজ্জীসূ’’তি জনপদাপেক্খং ভুম্মৰচনং, ৰজ্জিনামকে জনপদেতি অত্থো।

    Loluppacāraṃ paṭikkhipitvāti kusalabhaṇḍassa bhusaṃ vilumpanaṭṭhena loluppaṃ vuccati taṇhā, loluppena caraṇaṃ loluppacāro, taṇhāvasena gharapaṭipāṭiṃ atikkamitvā bhikkhāya caraṇaṃ, taṃ paṭikkhipitvāti attho. Tenāha ‘‘gharapaṭipāṭiyā bhikkhāya pavisatī’’ti. Ettha ca āraññikaṅgādipadhānaṅgavasena sesadhutaṅgānipi gahitāneva hontīti veditabbaṃ. Vajjīnanti rājāno apekkhitvā sāmivacanaṃ kataṃ, vajjīrājūnanti attho. Janapada-saddassa taṃnivāsīsupi pavattanato ‘‘vajjīsū’’ti janapadāpekkhaṃ bhummavacanaṃ, vajjināmake janapadeti attho.

    উপভোগপরিভোগূপকরণমহন্ততাযাতি পঞ্চকামগুণসঙ্খাতানং উপভোগানঞ্চেৰ হত্থিঅস্সরথইত্থিযাদিউপভোগূপকরণানঞ্চ মহন্ততায। উপভোগূপকরণানেৰ হি ইধ পরিভোগূপকরণসদ্দেন ৰুত্তানি। তেনেৰাহ ‘‘যে হি তেসং উপভোগা, যানি চ উপভোগূপকরণানি, তানি মহন্তানী’’তি। ‘‘উপভোগা হত্থিঅস্সরথইত্থীআদযো, উপভোগূপকরণানি তেসমেৰ সুৰণ্ণাদিউপকরণানী’’তিপি ৰদন্তি। সারকানীতি সারভূতানি। নিধেত্ৰাতি নিদহিত্ৰা, নিধানং কত্ৰাতি অত্থো। দিৰসপরিব্বযসঙ্খাতভোগমহন্ততাযাতি দিৰসে দিৰসে পরিভুঞ্জিতব্বসঙ্খাতভোগানং মহন্ততায। জাতরূপরজতস্সেৰ পহূততাযাতি পিণ্ডপিণ্ডৰসেন চেৰ সুৰণ্ণমাসকরজতমাসকাদিৰসেন চ জাতরূপরজতস্সেৰ পহূততায। ৰিত্তীতি তুট্ঠি, ৰিত্তিযা উপকরণং ৰিত্তূপকরণং, পহূতং নানাৰিধালঙ্কারভূতং ৰিত্তূপকরণমেতেসন্তি পহূতৰিত্তূপকরণা। তেনাহ ‘‘অলঙ্কারভূতস্সা’’তিআদি। ৰোহারৰসেনাতি ৰণিজ্জাৰসেন ৰড্ঢিকতাদিৰসেন। ধনধঞ্ঞস্স পহূততাযাতি সত্তরতনসঙ্খাতস্স ধনস্স সব্বপুব্বণ্ণাপরণ্ণসঙ্গহিতস্স ধঞ্ঞস্স চ পহূততাযাতি অত্থো। তত্থ ‘‘সুৰণ্ণরজতমণিমুত্তাৰেল়ুরিযৰজিরপৰাল়ানি সত্ত রতনানী’’তি ৰদন্তি। সালিৰীহিআদি পুব্বণ্ণং পুরক্খতং সস্সফলন্তি কত্ৰা, তব্বিপরিযাযতো মুগ্গমাসাদি অপরণ্ণন্তি ৰেদিতব্বং। উক্কট্ঠপিণ্ডপাতিকত্তাতি সেসধুতঙ্গপরিৰারিতেন উক্কট্ঠপিণ্ডপাতধুতঙ্গেন সমন্নাগতত্তা। তেনাহ ‘‘সপদানচারং চরিতুকামো’’তি।

    Upabhogaparibhogūpakaraṇamahantatāyāti pañcakāmaguṇasaṅkhātānaṃ upabhogānañceva hatthiassarathaitthiyādiupabhogūpakaraṇānañca mahantatāya. Upabhogūpakaraṇāneva hi idha paribhogūpakaraṇasaddena vuttāni. Tenevāha ‘‘ye hi tesaṃ upabhogā, yāni ca upabhogūpakaraṇāni, tāni mahantānī’’ti. ‘‘Upabhogā hatthiassarathaitthīādayo, upabhogūpakaraṇāni tesameva suvaṇṇādiupakaraṇānī’’tipi vadanti. Sārakānīti sārabhūtāni. Nidhetvāti nidahitvā, nidhānaṃ katvāti attho. Divasaparibbayasaṅkhātabhogamahantatāyāti divase divase paribhuñjitabbasaṅkhātabhogānaṃ mahantatāya. Jātarūparajatasseva pahūtatāyāti piṇḍapiṇḍavasena ceva suvaṇṇamāsakarajatamāsakādivasena ca jātarūparajatasseva pahūtatāya. Vittīti tuṭṭhi, vittiyā upakaraṇaṃ vittūpakaraṇaṃ, pahūtaṃ nānāvidhālaṅkārabhūtaṃ vittūpakaraṇametesanti pahūtavittūpakaraṇā. Tenāha ‘‘alaṅkārabhūtassā’’tiādi. Vohāravasenāti vaṇijjāvasena vaḍḍhikatādivasena. Dhanadhaññassa pahūtatāyāti sattaratanasaṅkhātassa dhanassa sabbapubbaṇṇāparaṇṇasaṅgahitassa dhaññassa ca pahūtatāyāti attho. Tattha ‘‘suvaṇṇarajatamaṇimuttāveḷuriyavajirapavāḷāni satta ratanānī’’ti vadanti. Sālivīhiādi pubbaṇṇaṃ purakkhataṃ sassaphalanti katvā, tabbipariyāyato muggamāsādi aparaṇṇanti veditabbaṃ. Ukkaṭṭhapiṇḍapātikattāti sesadhutaṅgaparivāritena ukkaṭṭhapiṇḍapātadhutaṅgena samannāgatattā. Tenāha ‘‘sapadānacāraṃ caritukāmo’’ti.

    ৩১. অন্তোজাততায ৰা ঞাতিসদিসী দাসীতি ঞাতিদাসী। পূতিভাৰেনেৰ লক্খিতব্বদোসো ৰা আভিদোসিকো, অভিদোসং ৰা পচ্চূসকালং গতো পত্তো অতিক্কন্তোতি আভিদোসিকো। তেনাহ ‘‘একরত্তাতিক্কন্তস্স ৰা’’তিআদি। পূতিভূতভাৰেন পরিভোগং নারহতীতি অপরিভোগারহো। ছড্ডনীযসভাৰে নিচ্ছিতেপি পুচ্ছাকালে সন্দেহৰোহারৰসেনেৰ পুচ্ছিতুং যুত্তন্তি আহ ‘‘সচে’’তি। অরিযৰোহারেনাতি অরিযসমুদাচারেন। অরিযা হি মাতুগামং ভগিনিৰাদেন সমুদাচরন্তি। নিস্সট্ঠপরিগ্গহন্তি পরিচ্চত্তালযং।

    31. Antojātatāya vā ñātisadisī dāsīti ñātidāsī. Pūtibhāveneva lakkhitabbadoso vā ābhidosiko, abhidosaṃ vā paccūsakālaṃ gato patto atikkantoti ābhidosiko. Tenāha ‘‘ekarattātikkantassa vā’’tiādi. Pūtibhūtabhāvena paribhogaṃ nārahatīti aparibhogāraho. Chaḍḍanīyasabhāve nicchitepi pucchākāle sandehavohāravaseneva pucchituṃ yuttanti āha ‘‘sace’’ti. Ariyavohārenāti ariyasamudācārena. Ariyā hi mātugāmaṃ bhaginivādena samudācaranti. Nissaṭṭhapariggahanti pariccattālayaṃ.

    ‘‘আকিরা’’তি ৰুত্তত্তা ‘‘ৰিঞ্ঞত্তি ৰা’’তি ৰুত্তং, ‘‘সচে তং ছড্ডনীযধম্ম’’ন্তি পরিযাযং অমুঞ্চিত্ৰা ৰুত্তত্তা ‘‘পযুত্তৰাচা ৰা’’তি ৰুত্তং, পচ্চযপটিসংযুত্তা ৰাচা পযুত্তৰাচা। ৰত্তুং ৰট্টতীতি নিরপেক্খভাৰতো ৰুত্তং , ইধ পন ৰিসেসতো অপরিভোগারহত্তাৰ ৰত্থুনো। অগ্গঅরিযৰংসিকোতি অরিযৰংসপটিপত্তিপূরকানং অগ্গো উত্তমো। নিমীযতি সঞ্ঞাযতীতি নিমিত্তং, যথাসল্লক্খিতো আকারোতি আহ ‘‘গিহিকালে সল্লক্খিতপুব্বং আকার’’ন্তি। হত্থপিট্ঠিআদীনি ওলোকযমানা ‘‘সামিপুত্তস্স মে সুদিন্নস্স ৰিয সুৰণ্ণকচ্ছপপিট্ঠিসদিসা ইমা হত্থপাদপিট্ঠিযো, হরিতালৰট্টিযো ৰিয সুৰট্টিতা অঙ্গুলিযো, মধুরো সরো’’তি গিহিকালে সল্লক্খিতপুব্বং আকারং অগ্গহেসি সঞ্জানি সল্লক্খেসি। কস্মা পন সা ঞাতিদাসী দিস্ৰাৰ ন সঞ্জানীতি আহ ‘‘সুদিন্নো হী’’তিআদি। পব্বজ্জুপগতেনাতি পব্বজ্জং উপগতেন, পব্বজিতেনাতি অত্থো। ঘরং পৰিসিত্ৰাতি গেহসামিনিযা নিসীদিতব্বট্ঠানভূতং অন্তোগেহং পৰিসিত্ৰা। যগ্ঘেতি ইমস্স আরোচযামীতি অযমত্থোতি আহ ‘‘আরোচনত্থে নিপাতো’’তি। ‘‘যগ্ঘে জানেয্যাসীতি সুট্ঠু জানেয্যাসী’’তিপি অত্থং ৰদন্তি। আলপনেতি দাসিজনস্স আলপনে। তেনাহ ‘‘এৰঞ্হী’’তিআদি।

    ‘‘Ākirā’’ti vuttattā ‘‘viññatti vā’’ti vuttaṃ, ‘‘sace taṃ chaḍḍanīyadhamma’’nti pariyāyaṃ amuñcitvā vuttattā ‘‘payuttavācā vā’’ti vuttaṃ, paccayapaṭisaṃyuttā vācā payuttavācā. Vattuṃ vaṭṭatīti nirapekkhabhāvato vuttaṃ , idha pana visesato aparibhogārahattāva vatthuno. Aggaariyavaṃsikoti ariyavaṃsapaṭipattipūrakānaṃ aggo uttamo. Nimīyati saññāyatīti nimittaṃ, yathāsallakkhito ākāroti āha ‘‘gihikāle sallakkhitapubbaṃ ākāra’’nti. Hatthapiṭṭhiādīni olokayamānā ‘‘sāmiputtassa me sudinnassa viya suvaṇṇakacchapapiṭṭhisadisā imā hatthapādapiṭṭhiyo, haritālavaṭṭiyo viya suvaṭṭitā aṅguliyo, madhuro saro’’ti gihikāle sallakkhitapubbaṃ ākāraṃ aggahesi sañjāni sallakkhesi. Kasmā pana sā ñātidāsī disvāva na sañjānīti āha ‘‘sudinno hī’’tiādi. Pabbajjupagatenāti pabbajjaṃ upagatena, pabbajitenāti attho. Gharaṃ pavisitvāti gehasāminiyā nisīditabbaṭṭhānabhūtaṃ antogehaṃ pavisitvā. Yaggheti imassa ārocayāmīti ayamatthoti āha ‘‘ārocanatthe nipāto’’ti. ‘‘Yagghe jāneyyāsīti suṭṭhu jāneyyāsī’’tipi atthaṃ vadanti. Ālapaneti dāsijanassa ālapane. Tenāha ‘‘evañhī’’tiādi.

    ৩২. ঘরেসু সালা হোন্তীতি ঘরেসু একমন্তে ভোজনসালা হোন্তি পাকারপরিক্খিত্তা সুসংৰিহিতদ্ৰারবন্ধা সুসম্মট্ঠৰালিকঙ্গণা। উদককঞ্জিযন্তি উদকঞ্চ কঞ্জিযঞ্চ। কস্মা পন ঈদিসাযমেৰ সালায অঞ্ঞতরং কুট্টমূলন্তি অযমত্থো ৰুত্তোতি আহ ‘‘ন হি পব্বজিতা’’তিআদি। অসারুপ্পে ঠানেতি ভিক্খূনং অননুচ্ছৰিকে পদেসে। অত্থি নু খোতি নু-সদ্দো পুচ্ছনত্থে, খো-সদ্দো ৰচনসিলিট্ঠতায ৰুত্তো। নুখোতি ৰা নিপাতসমুদাযো পুচ্ছনত্থো। তেন নাম-সদ্দস্স পুচ্ছনত্থতং দস্সেতি। যেসং নো ত্ৰন্তি যেসং নো পুত্তো ত্ৰং। ঈদিসে ঠানেতি কিঞ্চাপি তং ঠানং ভিক্খূনং অননুরূপং ন হোতি, তথাপি মাদিসানং মহাভোগকুলানং পুত্তস্স পরকুলে আসনসালাযং নিসীদিত্ৰা ভোজনং নাম অযুত্তরূপন্তি মঞ্ঞমানো আহ। তেনেৰাহ ‘‘ননু নাম, তাত সুদিন্ন, সকং গেহং গন্তব্ব’’ন্তি। অঞ্ঞেনপি পকারেন নামসদ্দস্স পুচ্ছনত্থতমেৰ দস্সেন্তো আহ ‘‘তথা অত্থি নু খো তাতা’’তিআদি। তথাতি সমুচ্চযত্থো। ইদানি নামসদ্দস্স মঞ্ঞনত্থতং দস্সেন্তো আহ ‘‘তথা অত্থি মঞ্ঞে’’তিআদি।

    32.Gharesu sālā hontīti gharesu ekamante bhojanasālā honti pākāraparikkhittā susaṃvihitadvārabandhā susammaṭṭhavālikaṅgaṇā. Udakakañjiyanti udakañca kañjiyañca. Kasmā pana īdisāyameva sālāya aññataraṃ kuṭṭamūlanti ayamattho vuttoti āha ‘‘na hi pabbajitā’’tiādi. Asāruppe ṭhāneti bhikkhūnaṃ ananucchavike padese. Atthi nu khoti nu-saddo pucchanatthe, kho-saddo vacanasiliṭṭhatāya vutto. Nukhoti vā nipātasamudāyo pucchanattho. Tena nāma-saddassa pucchanatthataṃ dasseti. Yesaṃ no tvanti yesaṃ no putto tvaṃ. Īdise ṭhāneti kiñcāpi taṃ ṭhānaṃ bhikkhūnaṃ ananurūpaṃ na hoti, tathāpi mādisānaṃ mahābhogakulānaṃ puttassa parakule āsanasālāyaṃ nisīditvā bhojanaṃ nāma ayuttarūpanti maññamāno āha. Tenevāha ‘‘nanu nāma, tāta sudinna, sakaṃ gehaṃ gantabba’’nti. Aññenapi pakārena nāmasaddassa pucchanatthatameva dassento āha ‘‘tathā atthi nu kho tātā’’tiādi. Tathāti samuccayattho. Idāni nāmasaddassa maññanatthataṃ dassento āha ‘‘tathā atthi maññe’’tiādi.

    দুক্খাভিতুন্নতাযাতি মানসিকেন দুক্খেন অভিপীল়িতত্তা। এতমত্থন্তি ‘‘অত্থি নু খো, তাত সুদিন্ন, অম্হাকং ধন’’ন্তিআদিনা যথাৰুত্তমত্থং। অনোকপ্পনামরিসনত্থৰসেনাতি এত্থ অনোকপ্পনং অসদ্দহনং। অমরিসনং অসহনং। অনাগতৰচনং অনাগতসদ্দপ্পযোগো, অত্থো পন ৰত্তমানকালিকোৰ। তেনাহ ‘‘পচ্চক্খম্পী’’তি। ন মরিসযামীতি ন ৰিসহামি। তং ন সুন্দরন্তি ‘‘তদায’’ন্তি পাঠং সন্ধাযাহ। অলং, গহপতি, কতং মে অজ্জ ভত্তকিচ্চন্তি থেরো উক্কট্ঠএকাসনিকতায পটিক্খিপন্তো এৰমাহ। উক্কট্ঠএকাসনিকতাযাতি চ ইদং ভূতকথনৰসেন ৰুত্তং থেরস্স তথাভাৰদীপনত্থং। মুদুকস্সপি হি একাসনিকস্স যায নিসজ্জায কিঞ্চিমত্তম্পি ভোজনং ভুত্তং, ৰত্তসীসেনপি ততো ৰুট্ঠিতস্স পুন ভুঞ্জিতুং ন ৰট্টতি। তেনাহ তিপিটকচূল়াভযত্থেরো ‘‘আসনং ৰা রক্খেয্য ভোজনং ৰা’’তি। উক্কট্ঠপিণ্ডপাতিকোপি সমানোতি নিদস্সনমত্তমিদং, থেরো সপদানচারিকেসুপি উক্কট্ঠোযেৰ। উক্কট্ঠসপদানচারিকোপি হি পুরতো চ পচ্ছতো চ আহটভিক্খম্পি অগ্গহেত্ৰাৰ ঘরদ্ৰারে ঠত্ৰা পত্তৰিস্সজ্জনমেৰ করোতি, তস্মা থেরো উক্কট্ঠসপদানচারিকত্তাপি স্ৰাতনায ভিক্খং নাধিৰাসেতি। অথ কস্মা ‘‘অধিৰাসেসী’’তি আহ ‘‘সচে একভত্তম্পি ন গহেস্সামী’’তিআদি। পণ্ডিতা হি মাতাপিতূনং আচরিযুপজ্ঝাযানং ৰা কাতব্বং অনুগ্গহং অজ্ঝুপেক্খিত্ৰা ধুতঙ্গৰিসুদ্ধিকা ন ভৰন্তি।

    Dukkhābhitunnatāyāti mānasikena dukkhena abhipīḷitattā. Etamatthanti ‘‘atthi nu kho, tāta sudinna, amhākaṃ dhana’’ntiādinā yathāvuttamatthaṃ. Anokappanāmarisanatthavasenāti ettha anokappanaṃ asaddahanaṃ. Amarisanaṃ asahanaṃ. Anāgatavacanaṃ anāgatasaddappayogo, attho pana vattamānakālikova. Tenāha ‘‘paccakkhampī’’ti. Na marisayāmīti na visahāmi. Taṃ na sundaranti ‘‘tadāya’’nti pāṭhaṃ sandhāyāha. Alaṃ, gahapati, kataṃ me ajja bhattakiccanti thero ukkaṭṭhaekāsanikatāya paṭikkhipanto evamāha. Ukkaṭṭhaekāsanikatāyāti ca idaṃ bhūtakathanavasena vuttaṃ therassa tathābhāvadīpanatthaṃ. Mudukassapi hi ekāsanikassa yāya nisajjāya kiñcimattampi bhojanaṃ bhuttaṃ, vattasīsenapi tato vuṭṭhitassa puna bhuñjituṃ na vaṭṭati. Tenāha tipiṭakacūḷābhayatthero ‘‘āsanaṃ vā rakkheyya bhojanaṃ vā’’ti. Ukkaṭṭhapiṇḍapātikopi samānoti nidassanamattamidaṃ, thero sapadānacārikesupi ukkaṭṭhoyeva. Ukkaṭṭhasapadānacārikopi hi purato ca pacchato ca āhaṭabhikkhampi aggahetvāva gharadvāre ṭhatvā pattavissajjanameva karoti, tasmā thero ukkaṭṭhasapadānacārikattāpi svātanāya bhikkhaṃ nādhivāseti. Atha kasmā ‘‘adhivāsesī’’ti āha ‘‘sace ekabhattampi na gahessāmī’’tiādi. Paṇḍitā hi mātāpitūnaṃ ācariyupajjhāyānaṃ vā kātabbaṃ anuggahaṃ ajjhupekkhitvā dhutaṅgavisuddhikā na bhavanti.

    ৩৩. মজ্ঝিমপ্পমাণোতি চতুহত্থো পুরিসো মজ্ঝিমপ্পমাণো। ‘‘ছহত্থো’’তিপি কেচি। তিরো করোন্তি এতাযাতি তিরোকরণীতি সাণিপাকারৰচনো অযং তিরোকরণী-সদ্দোতি আহ ‘‘তিরোকরণিযন্তি করণত্থে ভুম্ম’’ন্তি। ‘‘তিরোকরণিযা’’তি ৰত্তব্বে ‘‘তিরোকরণিয’’ন্তি করণত্থে ভুম্মং ৰুত্তং। তিরোকরণীয-সদ্দো ৰা অযং সাণিপাকারপরিযাযোতি দস্সেন্তো আহ ‘‘অথ ৰা’’তিআদি। তং পরিক্খিপিত্ৰাতি তং সমন্ততো খিপিত্ৰা, পরিতো বন্ধিত্ৰাতি ৰুত্তং হোতি। তেনাহ ‘‘সমন্ততো কত্ৰা’’তি। ৰিভত্তিপতিরূপকোপি নিপাতো হোতীতি আহ ‘‘তেনাতি অযম্পি ৰা’’তিআদি।

    33.Majjhimappamāṇoti catuhattho puriso majjhimappamāṇo. ‘‘Chahattho’’tipi keci. Tiro karonti etāyāti tirokaraṇīti sāṇipākāravacano ayaṃ tirokaraṇī-saddoti āha ‘‘tirokaraṇiyanti karaṇatthe bhumma’’nti. ‘‘Tirokaraṇiyā’’ti vattabbe ‘‘tirokaraṇiya’’nti karaṇatthe bhummaṃ vuttaṃ. Tirokaraṇīya-saddo vā ayaṃ sāṇipākārapariyāyoti dassento āha ‘‘atha vā’’tiādi. Taṃ parikkhipitvāti taṃ samantato khipitvā, parito bandhitvāti vuttaṃ hoti. Tenāha ‘‘samantato katvā’’ti. Vibhattipatirūpakopi nipāto hotīti āha ‘‘tenāti ayampi vā’’tiādi.

    ৩৪. ‘‘অথ খো আযস্মতো সুদিন্নস্স পিতা সকে নিৰেসনে পণীতং খাদনীযং ভোজনীযং পটিযাদাপেত্ৰা আযস্মতো সুদিন্নস্স কালং আরোচেসি – ‘কালো, তাত সুদিন্ন, নিট্ঠিতং ভত্ত’ন্তি’’ এৰং কালারোচনস্স পাল়িযং অনারুল়্হত্তা আহ – ‘‘কিঞ্চাপি পাল়িযং কালারোচনং ন ৰুত্ত’’ন্তি। আরোচিতেযেৰ কালেতি ‘‘কালো, তাত সুদিন্ন, নিট্ঠিতং ভত্ত’’ন্তি কালে আরোচিতেযেৰ। দ্ৰে পুঞ্জেতি কহাপণপুঞ্জঞ্চ সুৰণ্ণপুঞ্জঞ্চ।

    34. ‘‘Atha kho āyasmato sudinnassa pitā sake nivesane paṇītaṃ khādanīyaṃ bhojanīyaṃ paṭiyādāpetvā āyasmato sudinnassa kālaṃ ārocesi – ‘kālo, tāta sudinna, niṭṭhitaṃ bhatta’nti’’ evaṃ kālārocanassa pāḷiyaṃ anāruḷhattā āha – ‘‘kiñcāpi pāḷiyaṃ kālārocanaṃ na vutta’’nti. Ārociteyeva kāleti ‘‘kālo, tāta sudinna, niṭṭhitaṃ bhatta’’nti kāle ārociteyeva. Dve puñjeti kahāpaṇapuñjañca suvaṇṇapuñjañca.

    পেত্তিকন্তি পিতিতো আগতং পেত্তিকং। নিহিতন্তি ভূমিগতং। পযুত্তন্তি ৰড্ঢিৰসেন পযোজিতং। তদ্ধিতলোপং কত্ৰা ৰেদিতব্বন্তি যথা অঞ্ঞত্থাপি ‘‘পিতামহং ধনং লদ্ধা, সুখং জীৰতি সঞ্জযো’’তি ৰুত্তং, এৰং তদ্ধিতলোপং কত্ৰা ৰুত্তন্তি দট্ঠব্বং। পিতামহতো আগতং, পিতামহস্স ৰা ইদং পেতামহং। পব্বজিতলিঙ্গন্তি সমণৰেসং। ন রাজভীতোতি অপরাধকারণা ন রাজকুলা ভীতো। যেসং সন্তকং ধনং গহিতং, তে ইণাযিকা। পলিবুদ্ধো পীল়িতো।

    Pettikanti pitito āgataṃ pettikaṃ. Nihitanti bhūmigataṃ. Payuttanti vaḍḍhivasena payojitaṃ. Taddhitalopaṃ katvā veditabbanti yathā aññatthāpi ‘‘pitāmahaṃ dhanaṃ laddhā, sukhaṃ jīvati sañjayo’’ti vuttaṃ, evaṃ taddhitalopaṃ katvā vuttanti daṭṭhabbaṃ. Pitāmahato āgataṃ, pitāmahassa vā idaṃ petāmahaṃ. Pabbajitaliṅganti samaṇavesaṃ. Na rājabhītoti aparādhakāraṇā na rājakulā bhīto. Yesaṃ santakaṃ dhanaṃ gahitaṃ, te iṇāyikā. Palibuddho pīḷito.

    ৰিভত্তিপতিরূপকোতি ‘‘তেনা’’তি পদং সন্ধাযাহ। তংনিদানন্তি তং ধনং নিদানং কারণমস্সাতি তংনিদানং। অস্সাতি পচ্চত্তৰচনস্স, পদস্স ৰা। ভযন্তি চিত্তস্স উত্রস্তাকারেন পৰত্তভযং অধিপ্পেতং, ন ঞাণভযং, নাপি ‘‘ভাযতি এতস্মা’’তি এৰং ৰুত্তং আরম্মণভযন্তি আহ ‘‘চিত্তুত্রাসোতি অত্থো’’তি। ছম্ভিতত্তন্তি তেনেৰ চিত্তুত্রাসভযেন সকলসরীরস্স ছম্ভিতভাৰো। ৰিসেসতো পন হদযমংসচলনন্তি আহ ‘‘কাযকম্পো হদযমংসচলন’’ন্তি। লোমহংসোতি তেন ভযেন তেন ছম্ভিতত্তেন সকলসরীরলোমানং হট্ঠভাৰো, সো পন নেসং ভিত্তিযং নাগদন্তানং ৰিয উদ্ধংমুখতাতি আহ ‘‘লোমানং হংসনং উদ্ধগ্গভাৰো’’তি।

    Vibhattipatirūpakoti ‘‘tenā’’ti padaṃ sandhāyāha. Taṃnidānanti taṃ dhanaṃ nidānaṃ kāraṇamassāti taṃnidānaṃ. Assāti paccattavacanassa, padassa vā. Bhayanti cittassa utrastākārena pavattabhayaṃ adhippetaṃ, na ñāṇabhayaṃ, nāpi ‘‘bhāyati etasmā’’ti evaṃ vuttaṃ ārammaṇabhayanti āha ‘‘cittutrāsoti attho’’ti. Chambhitattanti teneva cittutrāsabhayena sakalasarīrassa chambhitabhāvo. Visesato pana hadayamaṃsacalananti āha ‘‘kāyakampo hadayamaṃsacalana’’nti. Lomahaṃsoti tena bhayena tena chambhitattena sakalasarīralomānaṃ haṭṭhabhāvo, so pana nesaṃ bhittiyaṃ nāgadantānaṃ viya uddhaṃmukhatāti āha ‘‘lomānaṃ haṃsanaṃ uddhaggabhāvo’’ti.

    ৩৫. অত্তনাতি পচ্চত্তে করণৰচনং, সযন্তি অত্থো। দেৰচ্ছরানন্তি অনচ্চন্তিযো সন্ধাযাহ। দেৰনাটকানন্তি নচ্চন্তিযো, পরিযাযৰচনং ৰা এতং দেৰকঞ্ঞানং। সমুপ্পন্নবলৰসোকা হুত্ৰাতি অযং লোকো নাম অত্তানংৰ চিন্তেতি, তস্মা সাপি ‘‘ইদানি অহং অনাথা জাতা’’তি অত্তানংৰ চিন্তযমানা ‘‘অযং অজ্জ আগমিস্সতি, অজ্জ আগমিস্সতী’’তি অট্ঠ ৰস্সানি বহি ন নিক্খন্তা এতং নিস্সায মযা দারকোপি ন লদ্ধো, যস্স আনুভাৰেন জীৰেয্যামি, ইতো চাম্হি পরিহীনা অঞ্ঞতো চাতি সমুপ্পন্নবলৰসোকা হুত্ৰা। কুলরুক্খপতিট্ঠাপনে বীজসদিসত্তা কুলৰংসপ্পতিট্ঠাপকো পুত্তো ইধ বীজকোতি অধিপ্পেতোতি আহ ‘‘কুলৰংসবীজকং একং পুত্ত’’ন্তি। সং নাম ধনং, তস্স পতীতি সংপতি, ধনৰা ৰিভৰসম্পন্নো। দিট্ঠধম্মিকসম্পরাযিকহিতাৰহত্তা তস্স হিতন্তি সাপতেয্যং, তদেৰ ধনং ৰিভৰোতি আহ – ‘‘ইমং সাপতেয্যং এৰং মহন্তং অম্হাকং ৰিভৰ’’ন্তি।

    35.Attanāti paccatte karaṇavacanaṃ, sayanti attho. Devaccharānanti anaccantiyo sandhāyāha. Devanāṭakānanti naccantiyo, pariyāyavacanaṃ vā etaṃ devakaññānaṃ. Samuppannabalavasokā hutvāti ayaṃ loko nāma attānaṃva cinteti, tasmā sāpi ‘‘idāni ahaṃ anāthā jātā’’ti attānaṃva cintayamānā ‘‘ayaṃ ajja āgamissati, ajja āgamissatī’’ti aṭṭha vassāni bahi na nikkhantā etaṃ nissāya mayā dārakopi na laddho, yassa ānubhāvena jīveyyāmi, ito cāmhi parihīnā aññato cāti samuppannabalavasokā hutvā. Kularukkhapatiṭṭhāpane bījasadisattā kulavaṃsappatiṭṭhāpako putto idha bījakoti adhippetoti āha ‘‘kulavaṃsabījakaṃekaṃ putta’’nti. Saṃ nāma dhanaṃ, tassa patīti saṃpati, dhanavā vibhavasampanno. Diṭṭhadhammikasamparāyikahitāvahattā tassa hitanti sāpateyyaṃ, tadeva dhanaṃ vibhavoti āha – ‘‘imaṃ sāpateyyaṃ evaṃ mahantaṃ amhākaṃ vibhava’’nti.

    ৩৬. ইত্থীনং কুমারীভাৰপ্পত্তিতো পট্ঠায পচ্ছিমৰযতো ওরং অসতি ৰিবন্ধে অট্ঠমে অট্ঠমে সত্তাহে গব্ভাসযসঞ্ঞিতে ততিযে আৰত্তে কতিপযা লোহিতপীল়কা সণ্ঠহিত্ৰা অগ্গহিতপুব্বা এৰ ভিজ্জন্তি, ততো লোহিতং পগ্ঘরতি, তত্থ উতুসমঞ্ঞা পুপ্ফসমঞ্ঞা চাতি আহ – ‘‘পুপ্ফন্তি উতুকালে উপ্পন্নলোহিতস্স নাম’’ন্তি। গব্ভপতিট্ঠানট্ঠানেতি যস্মিং ওকাসে দারকো নিব্বত্ততি, তস্মিং পদেসে। সণ্ঠহিত্ৰাতি নিব্বত্তিত্ৰা। ভিজ্জন্তীতি অগ্গহিতপুব্বা এৰ ভিজ্জন্তি। অযঞ্হি তাসং সভাৰো। দোসেনাতি লোহিতমলেন। সুদ্ধে ৰত্থুম্হীতি পগ্ঘরিতলোহিতত্তা অনামযত্তা চ নহানতো পরং চতুত্থদিৰসতো পট্ঠায সুদ্ধে গব্ভাসযে। সুদ্ধে পন ৰত্থুম্হি মাতাপিতূসু একৰারং সন্নিপতিতেসু যাৰ সত্ত দিৰসানি খেত্তমেৰ হোতি গব্ভসণ্ঠহনস্স পরিত্তস্স লোহিতলেপস্স ৰিজ্জমানত্তা। কেচি পন ‘‘অড্ঢমাসমত্তম্পি খেত্তমেৰা’’তি ৰদন্তি। বাহাযন্তি অধিকরণে ভুম্মন্তি আহ ‘‘পুরাণদুতিযিকায যা বাহা, তত্র নং গহেত্ৰা’’তি। উপযোগত্থে ভুম্মৰচনম্পি যুজ্জতিযেৰ যথা ‘‘সুদিন্নস্স পাদেসু গহেত্ৰা’’তি।

    36. Itthīnaṃ kumārībhāvappattito paṭṭhāya pacchimavayato oraṃ asati vibandhe aṭṭhame aṭṭhame sattāhe gabbhāsayasaññite tatiye āvatte katipayā lohitapīḷakā saṇṭhahitvā aggahitapubbā eva bhijjanti, tato lohitaṃ paggharati, tattha utusamaññā pupphasamaññā cāti āha – ‘‘pupphanti utukāle uppannalohitassa nāma’’nti. Gabbhapatiṭṭhānaṭṭhāneti yasmiṃ okāse dārako nibbattati, tasmiṃ padese. Saṇṭhahitvāti nibbattitvā. Bhijjantīti aggahitapubbā eva bhijjanti. Ayañhi tāsaṃ sabhāvo. Dosenāti lohitamalena. Suddhe vatthumhīti paggharitalohitattā anāmayattā ca nahānato paraṃ catutthadivasato paṭṭhāya suddhe gabbhāsaye. Suddhe pana vatthumhi mātāpitūsu ekavāraṃ sannipatitesu yāva satta divasāni khettameva hoti gabbhasaṇṭhahanassa parittassa lohitalepassa vijjamānattā. Keci pana ‘‘aḍḍhamāsamattampi khettamevā’’ti vadanti. Bāhāyanti adhikaraṇe bhummanti āha ‘‘purāṇadutiyikāya yā bāhā, tatra naṃ gahetvā’’ti. Upayogatthe bhummavacanampi yujjatiyeva yathā ‘‘sudinnassa pādesu gahetvā’’ti.

    পুব্বেপি পঞ্ঞত্তসিক্খাপদানং সব্ভাৰতো অপঞ্ঞত্তে সিক্খাপদেতি পারাজিকং সন্ধায ৰুত্তন্তি আহ – ‘‘পঠমপারাজিকসিক্খাপদে অট্ঠপিতে’’তি। ৰুত্তমেৰত্থং ৰিভাৰেন্তো আহ – ‘‘ভগৰতো কির পঠমবোধিয’’ন্তিআদি। এৰরূপন্তি পারাজিকপঞ্ঞত্তিযা অনুরূপং। নিদস্সনমত্তঞ্চেতং, সঙ্ঘাদিসেসপঞ্ঞত্তিযা অনুরূপম্পি অজ্ঝাচারং নাকংসুযেৰ। তেনেৰাহ – ‘‘অৰসেসে পঞ্চ খুদ্দকাপত্তিক্খন্ধে এৰ পঞ্ঞপেসী’’তি। ইদঞ্চ থুল্লচ্চযাদীনং পঞ্চন্নং লহুকাপত্তিক্খন্ধানং সব্ভাৰমত্তং সন্ধায ৰুত্তং, ন পঞ্চাপত্তিক্খন্ধানং অনৰসেসতো পঞ্ঞত্তত্তাৰ। পঠমবোধিযং পঞ্চন্নং লহুকাপত্তীনং সব্ভাৰৰচনেনেৰ ধম্মসেনাপতিস্স সিক্খাপদপঞ্ঞত্তিযাচনা ৰিসেসতো গরুকাপত্তিপঞ্ঞত্তিযা পাতিমোক্খুদ্দেসস্স চ হেতুভূতাতি দট্ঠব্বা। কেচি পন ‘‘তস্মিং তস্মিং পন ৰত্থুস্মিং অৰসেসপঞ্চখুদ্দকাপত্তিক্খন্ধে এৰ পঞ্ঞপেসীতি ইদং দ্ৰাদসমে ৰস্সে ৰেরঞ্জাযং ৰুত্থৰস্সেন ভগৰতা ততো পট্ঠায অট্ঠৰস্সব্ভন্তরে পঞ্ঞত্তসিক্খাপদং সন্ধায ৰুত্ত’’ন্তি ৰদন্তি, তং ন সুন্দরং ততো পুব্বেপি সিক্খাপদপঞ্ঞত্তিযা সব্ভাৰতো। তেনেৰ ৰেরঞ্জকণ্ডে ‘‘একভিক্খুনাপি রত্তিচ্ছেদো ৰা পচ্ছিমিকায তত্থ ৰস্সং উপগচ্ছামাতি ৰস্সচ্ছেদো ৰা ন কতো’’তি চ ‘‘সামম্পি পচনং সমণসারুপ্পং ন হোতি, ন চ ৰট্টতী’’তি চ ৰুত্তং। আরাধযিংসূতি চিত্তং গণ্হিংসু, অজ্ঝাসযং পূরযিংসু, হদযগাহিনিং পটিপত্তিং পটিপজ্জিংসূতি অত্থো। একং সমযন্তি একস্মিং সমযে, পঠমবোধিযন্তি অত্থো।

    Pubbepi paññattasikkhāpadānaṃ sabbhāvato apaññatte sikkhāpadeti pārājikaṃ sandhāya vuttanti āha – ‘‘paṭhamapārājikasikkhāpade aṭṭhapite’’ti. Vuttamevatthaṃ vibhāvento āha – ‘‘bhagavato kira paṭhamabodhiya’’ntiādi. Evarūpanti pārājikapaññattiyā anurūpaṃ. Nidassanamattañcetaṃ, saṅghādisesapaññattiyā anurūpampi ajjhācāraṃ nākaṃsuyeva. Tenevāha – ‘‘avasese pañca khuddakāpattikkhandhe eva paññapesī’’ti. Idañca thullaccayādīnaṃ pañcannaṃ lahukāpattikkhandhānaṃ sabbhāvamattaṃ sandhāya vuttaṃ, na pañcāpattikkhandhānaṃ anavasesato paññattattāva. Paṭhamabodhiyaṃ pañcannaṃ lahukāpattīnaṃ sabbhāvavacaneneva dhammasenāpatissa sikkhāpadapaññattiyācanā visesato garukāpattipaññattiyā pātimokkhuddesassa ca hetubhūtāti daṭṭhabbā. Keci pana ‘‘tasmiṃ tasmiṃ pana vatthusmiṃ avasesapañcakhuddakāpattikkhandhe eva paññapesīti idaṃ dvādasame vasse verañjāyaṃ vutthavassena bhagavatā tato paṭṭhāya aṭṭhavassabbhantare paññattasikkhāpadaṃ sandhāya vutta’’nti vadanti, taṃ na sundaraṃ tato pubbepi sikkhāpadapaññattiyā sabbhāvato. Teneva verañjakaṇḍe ‘‘ekabhikkhunāpi ratticchedo vā pacchimikāya tattha vassaṃ upagacchāmāti vassacchedo vā na kato’’ti ca ‘‘sāmampi pacanaṃ samaṇasāruppaṃ na hoti, na ca vaṭṭatī’’ti ca vuttaṃ. Ārādhayiṃsūti cittaṃ gaṇhiṃsu, ajjhāsayaṃ pūrayiṃsu, hadayagāhiniṃ paṭipattiṃ paṭipajjiṃsūti attho. Ekaṃ samayanti ekasmiṃ samaye, paṭhamabodhiyanti attho.

    যং আদীনৰন্তি সম্বন্ধো। সিক্খাপদং পঞ্ঞপেন্তোতি পঠমপারাজিকসিক্খাপদং পঞ্ঞপেন্তো। আদীনৰং দস্সেস্সতীতি ‘‘ৰরং তে, মোঘপুরিস, আসীৰিসস্স ঘোরৰিসস্স মুখে অঙ্গজাতং পক্খিত্তং, ন ত্ৰেৰ মাতুগামস্স অঙ্গজাতে অঙ্গজাতং পক্খিত্ত’’ন্তিআদিনা যং আদীনৰং দস্সেস্সতি। অভিৰিঞ্ঞাপেসীতি ইমস্স ‘‘পৰত্তেসী’’তি অযমত্থো কথং লদ্ধোতি আহ ‘‘পৰত্তনাপি হী’’তিআদি। কাযৰিঞ্ঞত্তিচোপনতোতি কাযৰিঞ্ঞত্তিৰসেন পৰত্তচলনতো। কস্মা পনেস মেথুনধম্মেন অনত্থিকোপি সমানো তিক্খত্তুং অভিৰিঞ্ঞাপেসীতি আহ – ‘‘তিক্খত্তুং অভিৰিঞ্ঞাপনঞ্চেসা’’তিআদি। তত্থ তিক্খত্তুং অভিৰিঞ্ঞাপনন্তি মুত্তিপাপনৰসেন তীসু ৰারেসু মেথুনধম্মস্স পৰত্তনং।

    Yaṃ ādīnavanti sambandho. Sikkhāpadaṃ paññapentoti paṭhamapārājikasikkhāpadaṃ paññapento. Ādīnavaṃ dassessatīti ‘‘varaṃ te, moghapurisa, āsīvisassa ghoravisassa mukhe aṅgajātaṃ pakkhittaṃ, na tveva mātugāmassa aṅgajāte aṅgajātaṃ pakkhitta’’ntiādinā yaṃ ādīnavaṃ dassessati. Abhiviññāpesīti imassa ‘‘pavattesī’’ti ayamattho kathaṃ laddhoti āha ‘‘pavattanāpi hī’’tiādi. Kāyaviññatticopanatoti kāyaviññattivasena pavattacalanato. Kasmā panesa methunadhammena anatthikopi samāno tikkhattuṃ abhiviññāpesīti āha – ‘‘tikkhattuṃ abhiviññāpanañcesā’’tiādi. Tattha tikkhattuṃ abhiviññāpananti muttipāpanavasena tīsu vāresu methunadhammassa pavattanaṃ.

    সব্বেসম্পি পদানং অৰধারণফলত্তা ৰিনাপি এৰকারং অৰধারণত্থো ৰিঞ্ঞাযতীতি আহ ‘‘তেনেৰ অজ্ঝাচারেনা’’তি। অট্ঠ হি গব্ভকারণানি। ৰুত্তঞ্হেতং –

    Sabbesampi padānaṃ avadhāraṇaphalattā vināpi evakāraṃ avadhāraṇattho viññāyatīti āha ‘‘teneva ajjhācārenā’’ti. Aṭṭha hi gabbhakāraṇāni. Vuttañhetaṃ –

    ‘‘মেথুনচোল়গ্গহণং, তনুসংসগ্গো চ নাভিআমসনং।

    ‘‘Methunacoḷaggahaṇaṃ, tanusaṃsaggo ca nābhiāmasanaṃ;

    পানং দস্সনসৰনং, ঘাযনমিতি গব্ভহেতৰো অট্ঠা’’তি॥

    Pānaṃ dassanasavanaṃ, ghāyanamiti gabbhahetavo aṭṭhā’’ti.

    ইদানি অৰধারণেন নিৰত্তিতমত্থং দস্সেতুকামো আহ – ‘‘কিং পন অঞ্ঞথাপি গব্ভগ্গহণং হোতী’’তিআদি। ননু চ নাভিপরামসনম্পি কাযসংসগ্গোযেৰ, কস্মা নং ৰিসুং ৰুত্তন্তি? উভযেসং ছন্দরাগৰসেন কাযসংসগ্গো ৰুত্তো, ইত্থিযা ছন্দরাগৰসেন নাভিপরামসনং, ৰত্থুৰসেন ৰা তং ৰিসুং ৰুত্তন্তি দট্ঠব্বং। কথং পন কাযসংসগ্গেন গব্ভগ্গহণং হোতি, কথঞ্চ তত্থ সুক্কসোণিতস্স সম্ভৰোতি আহ ‘‘ইত্থিযো হী’’তিআদি । ছন্দরাগুপ্পত্তিৰসেন ইত্থিযা সুক্ককোট্ঠাসো চলিতো হোতি, সোপি গব্ভসণ্ঠানস্স পচ্চযো হোতীতি অধিপ্পাযো। ইত্থিসন্তানেপি হি রসাদিসত্তধাতুযো লব্ভন্তিযেৰ। তেনাহ – ‘‘অঙ্গপচ্চঙ্গপরামসনং সাদিযন্তিযোপি গব্ভং গণ্হন্তী’’তি। গণ্ঠিপদেসু পন ‘‘কাযসংসগ্গাদিনা সত্তপ্পকারেন গব্ভগ্গহণে পিতু সুক্ককোট্ঠাসং ৰিনা ছন্দরাগৰসেন মাতু ৰিকারপ্পত্তং লোহিতমেৰ গব্ভসণ্ঠানস্স পচ্চযো হোতী’’তি ৰুত্তং। ‘‘যস্স অঙ্গপচ্চঙ্গপরামসনং সাদিযিত্ৰা মাতা পুত্তং পটিলভতি, সচে সো অপরেন সমযেন পরিপুণ্ণিন্দ্রিযো হুত্ৰা তাদিসং পিতরং মনুস্সজাতিকং জীৰিতা ৰোরোপেতি, পিতুঘাতকোৰ হোতী’’তি ৰদন্তি।

    Idāni avadhāraṇena nivattitamatthaṃ dassetukāmo āha – ‘‘kiṃ pana aññathāpi gabbhaggahaṇaṃ hotī’’tiādi. Nanu ca nābhiparāmasanampi kāyasaṃsaggoyeva, kasmā naṃ visuṃ vuttanti? Ubhayesaṃ chandarāgavasena kāyasaṃsaggo vutto, itthiyā chandarāgavasena nābhiparāmasanaṃ, vatthuvasena vā taṃ visuṃ vuttanti daṭṭhabbaṃ. Kathaṃ pana kāyasaṃsaggena gabbhaggahaṇaṃ hoti, kathañca tattha sukkasoṇitassa sambhavoti āha ‘‘itthiyo hī’’tiādi . Chandarāguppattivasena itthiyā sukkakoṭṭhāso calito hoti, sopi gabbhasaṇṭhānassa paccayo hotīti adhippāyo. Itthisantānepi hi rasādisattadhātuyo labbhantiyeva. Tenāha – ‘‘aṅgapaccaṅgaparāmasanaṃ sādiyantiyopi gabbhaṃ gaṇhantī’’ti. Gaṇṭhipadesu pana ‘‘kāyasaṃsaggādinā sattappakārena gabbhaggahaṇe pitu sukkakoṭṭhāsaṃ vinā chandarāgavasena mātu vikārappattaṃ lohitameva gabbhasaṇṭhānassa paccayo hotī’’ti vuttaṃ. ‘‘Yassa aṅgapaccaṅgaparāmasanaṃ sādiyitvā mātā puttaṃ paṭilabhati, sace so aparena samayena paripuṇṇindriyo hutvā tādisaṃ pitaraṃ manussajātikaṃ jīvitā voropeti, pitughātakova hotī’’ti vadanti.

    তং অসুচিং একদেসং মুখেন অগ্গহেসীতি পুরাণচীৰরং ধোৰন্তী তত্থ যং অসুচিং অদ্দস, তং অসুচিং একদেসং পিৰি। ‘‘ৰট্টতি তুম্হাকং মেথুনধম্মো’’তি পুট্ঠো ‘‘কপ্পতু ৰা মা ৰা কপ্পতু, মযং তেন অনত্থিকা’’তি দস্সেন্তো আহ ‘‘অনত্থিকা মযং এতেনা’’তি। কিঞ্চাপি নাভিপরামসনে মেথুনরাগো নত্থি, তথাপি নাভিপরামসনকালে ফস্সসাদিযনৰসেন অস্সাদমত্তং তস্সা অহোসীতি গহেতব্বং, অঞ্ঞথা গব্ভসণ্ঠহনং ন সিযা। দিট্ঠমঙ্গলিকায নাভিপরামসনেন মণ্ডব্যস্স নিব্বত্তি অহোসি, চণ্ডপজ্জোতমাতু নাভিযং ৰিচ্ছিকা ফরিত্ৰা গতা, তেন চণ্ডপজ্জোতস্স নিব্বত্তি অহোসীতি আহ ‘‘এতেনেৰ নযেনা’’তিআদি। পুরিসং উপনিজ্ঝাযতীতি ৰাতপানাদিনা দিস্ৰা ৰা দিট্ঠপুব্বং ৰা পুরিসং উপনিজ্ঝাযতি। রাজোরোধা ৰিযাতি সীহল়দীপে কির একিস্সা ইত্থিযা তথা অহোসি, তস্মা এৰং ৰুত্তং।

    Taṃasuciṃ ekadesaṃ mukhena aggahesīti purāṇacīvaraṃ dhovantī tattha yaṃ asuciṃ addasa, taṃ asuciṃ ekadesaṃ pivi. ‘‘Vaṭṭati tumhākaṃ methunadhammo’’ti puṭṭho ‘‘kappatu vā mā vā kappatu, mayaṃ tena anatthikā’’ti dassento āha ‘‘anatthikā mayaṃ etenā’’ti. Kiñcāpi nābhiparāmasane methunarāgo natthi, tathāpi nābhiparāmasanakāle phassasādiyanavasena assādamattaṃ tassā ahosīti gahetabbaṃ, aññathā gabbhasaṇṭhahanaṃ na siyā. Diṭṭhamaṅgalikāya nābhiparāmasanena maṇḍabyassa nibbatti ahosi, caṇḍapajjotamātu nābhiyaṃ vicchikā pharitvā gatā, tena caṇḍapajjotassa nibbatti ahosīti āha ‘‘eteneva nayenā’’tiādi. Purisaṃ upanijjhāyatīti vātapānādinā disvā vā diṭṭhapubbaṃ vā purisaṃ upanijjhāyati. Rājorodhā viyāti sīhaḷadīpe kira ekissā itthiyā tathā ahosi, tasmā evaṃ vuttaṃ.

    ইধাতি ইমস্মিং ৰত্থুস্মিং। অযন্তি সুদিন্নস্স পুরাণদুতিযিকা। যং সন্ধাযাতি যং অজ্ঝাচারং সন্ধায। সুক্কং সন্ধায ‘‘মাতাপিতরো চ সন্নিপতিতা হোন্তী’’তি ৰুত্তং, মাতা চ উতুনী হোতীতি লোহিতং সন্ধায। তত্থ সন্নিপতিতা হোন্তীতি অসদ্ধম্মৰসেন একস্মিং ঠানে সমাগতা সঙ্গতা হোন্তি। মাতা চ উতুনী হোতীতি ইদং উতুসমযং সন্ধায ৰুত্তং, ন লোকসমঞ্ঞাকরজস্স লগ্গনদিৰসমত্তং। গন্ধব্বোতি তত্রূপগসত্তো, গন্তব্বোতি ৰুত্তং হোতি। ত-কারস্স ধ-কারো কতোতি দট্ঠব্বং। অথ ৰা গন্ধনতো উপ্পজ্জনগতিযা নিমিত্তুপট্ঠানেন সূচনতো দীপনতো গন্ধোতি লদ্ধনামেন ভৰগামিকম্মুনা অব্বতি পৰত্ততীতি গন্ধব্বো, তত্থ উপ্পজ্জনকসত্তো। পচ্চুপট্ঠিতো হোতীতি উপগতো হোতি। এত্থ চ ন মাতাপিতূনং সন্নিপাতং ওলোকযমানো সমীপে ঠিতো নাম হোতি, কম্মযন্তযন্তিতো পন একো সত্তো তস্মিং ওকাসে নিব্বত্তনকো পুরিমজাতিযং ঠিতোযেৰ গতিনিমিত্তাদিআরম্মণকরণৰসেন উপপত্তাভিমুখো হোতীতি অধিপ্পাযো।

    Idhāti imasmiṃ vatthusmiṃ. Ayanti sudinnassa purāṇadutiyikā. Yaṃ sandhāyāti yaṃ ajjhācāraṃ sandhāya. Sukkaṃ sandhāya ‘‘mātāpitaro ca sannipatitā hontī’’ti vuttaṃ, mātā ca utunī hotīti lohitaṃ sandhāya. Tattha sannipatitā hontīti asaddhammavasena ekasmiṃ ṭhāne samāgatā saṅgatā honti. Mātā ca utunī hotīti idaṃ utusamayaṃ sandhāya vuttaṃ, na lokasamaññākarajassa lagganadivasamattaṃ. Gandhabboti tatrūpagasatto, gantabboti vuttaṃ hoti. Ta-kārassa dha-kāro katoti daṭṭhabbaṃ. Atha vā gandhanato uppajjanagatiyā nimittupaṭṭhānena sūcanato dīpanato gandhoti laddhanāmena bhavagāmikammunā abbati pavattatīti gandhabbo, tattha uppajjanakasatto. Paccupaṭṭhito hotīti upagato hoti. Ettha ca na mātāpitūnaṃ sannipātaṃ olokayamāno samīpe ṭhito nāma hoti, kammayantayantito pana eko satto tasmiṃ okāse nibbattanako purimajātiyaṃ ṭhitoyeva gatinimittādiārammaṇakaraṇavasena upapattābhimukho hotīti adhippāyo.

    সন্নিপাতাতি সমোধানেন সমাগমেন। গব্ভস্সাতি গব্ভে নিব্বত্তনকসত্তস্স। গব্ভে নিব্বত্তনকসত্তোপি হি গব্ভোতি ৰুচ্চতি। যথাহ – ‘‘যথা খো পনানন্দ, অঞ্ঞা ইত্থিকা নৰ ৰা দস ৰা মাসে গব্ভং কুচ্ছিনা পরিহরিত্ৰা ৰিজাযন্তী’’তি (ম॰ নি॰ ৩.২০৫)। কত্থচি পন গব্ভোতি মাতুকুচ্ছি ৰুত্তো। যথাহ –

    Sannipātāti samodhānena samāgamena. Gabbhassāti gabbhe nibbattanakasattassa. Gabbhe nibbattanakasattopi hi gabbhoti vuccati. Yathāha – ‘‘yathā kho panānanda, aññā itthikā nava vā dasa vā māse gabbhaṃ kucchinā pariharitvā vijāyantī’’ti (ma. ni. 3.205). Katthaci pana gabbhoti mātukucchi vutto. Yathāha –

    ‘‘যমেকরত্তিং পঠমং, গব্ভে ৰসতি মাণৰো।

    ‘‘Yamekarattiṃ paṭhamaṃ, gabbhe vasati māṇavo;

    অব্ভুট্ঠিতোৰ সো যাতি, স গচ্ছং ন নিৰত্ততী’’তি॥ (জা॰ ১.১৫.৩৬৩)। –

    Abbhuṭṭhitova so yāti, sa gacchaṃ na nivattatī’’ti. (jā. 1.15.363); –

    এত্থ চ গব্ভতি অত্তভাৰভাৰেন পৰত্ততীতি গব্ভো, কললাদিঅৰত্থো ধম্মপ্পবন্ধো, তংনিস্সিতত্তা পন সত্তসন্তানো ‘‘গব্ভো’’তি ৰুত্তো যথা ‘‘মঞ্চা উক্কুট্ঠিং করোন্তী’’তি। তংনিস্সযভাৰতো মাতুকুচ্ছি ‘‘গব্ভো’’তি ৰেদিতব্বো। গব্ভো ৰিযাতি ৰা। যথা হি নিৰাসট্ঠানতায সত্তানং ওৰরকো ‘‘গব্ভো’’তি ৰুচ্চতি, এৰং গব্ভসেয্যকানং সত্তানং যাৰ অভিজাতি নিৰাসট্ঠানতায মাতুকুচ্ছি ‘‘গব্ভো’’তি ৰুত্তোতি ৰেদিতব্বো। অৰক্কন্তি হোতীতি নিব্বত্তি হোতি।

    Ettha ca gabbhati attabhāvabhāvena pavattatīti gabbho, kalalādiavattho dhammappabandho, taṃnissitattā pana sattasantāno ‘‘gabbho’’ti vutto yathā ‘‘mañcā ukkuṭṭhiṃ karontī’’ti. Taṃnissayabhāvato mātukucchi ‘‘gabbho’’ti veditabbo. Gabbho viyāti vā. Yathā hi nivāsaṭṭhānatāya sattānaṃ ovarako ‘‘gabbho’’ti vuccati, evaṃ gabbhaseyyakānaṃ sattānaṃ yāva abhijāti nivāsaṭṭhānatāya mātukucchi ‘‘gabbho’’ti vuttoti veditabbo. Avakkanti hotīti nibbatti hoti.

    আরক্খদেৰতাতি তস্স আরক্খত্থায ঠিতা দেৰতা। অস্স তং অজ্ঝাচারন্তি সম্বন্ধো। তথা নিচ্ছারেসুন্তি তথা মহন্তং সদ্দং কত্ৰা নিচ্ছারেসুং। কিঞ্চাপি ইধ পাল়িযং আকাসট্ঠদেৰতা ৰিসুং ন আগতা, তথাপি সদ্দস্স অনুস্সাৰনে অযমনুক্কমোতি দস্সেতুং চাতুমহারাজিকদেৰতাযো দ্ৰিধা কত্ৰা আকাসট্ঠদেৰতা ৰিসুং ৰুত্তা। তেনেত্থ আকাসট্ঠকানং ৰিসুং গহিতত্তা চাতুমহারাজিকাতি পরিভণ্ডপব্বতট্ঠকা ৰেদিতব্বা। ইতিহাতি নিপাতসমুদাযো এৰংসদ্দস্স অত্থে দট্ঠব্বোতি আহ ‘‘এৰ’’ন্তি। খণেন মুহুত্তেনাতি পদদ্ৰযং ৰেৰচনভাৰতো সমানত্থমেৰাতি দট্ঠব্বং। এককোলাহলমহোসীতি দেৰব্রহ্মলোকেসু এককোলাহলমহোসি। কিঞ্চাপি হি সো সদ্দো যাৰ ব্রহ্মলোকা অব্ভুগ্গচ্ছি, তথাপি ন সো মনুস্সানং ৰিসযো তেসং রূপং ৰিয, তেনেৰ ভিক্খূ পুচ্ছিংসু – ‘‘কচ্চি নো ত্ৰং, আৰুসো সুদিন্ন, অনভিরতো’’তি।

    Ārakkhadevatāti tassa ārakkhatthāya ṭhitā devatā. Assa taṃ ajjhācāranti sambandho. Tathā nicchāresunti tathā mahantaṃ saddaṃ katvā nicchāresuṃ. Kiñcāpi idha pāḷiyaṃ ākāsaṭṭhadevatā visuṃ na āgatā, tathāpi saddassa anussāvane ayamanukkamoti dassetuṃ cātumahārājikadevatāyo dvidhā katvā ākāsaṭṭhadevatā visuṃ vuttā. Tenettha ākāsaṭṭhakānaṃ visuṃ gahitattā cātumahārājikāti paribhaṇḍapabbataṭṭhakā veditabbā. Itihāti nipātasamudāyo evaṃsaddassa atthe daṭṭhabboti āha ‘‘eva’’nti. Khaṇena muhuttenāti padadvayaṃ vevacanabhāvato samānatthamevāti daṭṭhabbaṃ. Ekakolāhalamahosīti devabrahmalokesu ekakolāhalamahosi. Kiñcāpi hi so saddo yāva brahmalokā abbhuggacchi, tathāpi na so manussānaṃ visayo tesaṃ rūpaṃ viya, teneva bhikkhū pucchiṃsu – ‘‘kacci no tvaṃ, āvuso sudinna, anabhirato’’ti.

    ৩৭. ‘‘এৰং মাতাপুত্তানং পব্বজ্জা সফলা অহোসি, পিতা পন ৰিপ্পটিসারাভিভূতো ৰিহাসী’’তি ৰচনতো সুদিন্নস্স তস্মিং অত্তভাৰে অরহত্তাধিগমো নাহোসীতি ৰিঞ্ঞাযতি। কেচি পন ‘‘পুব্বেকতপুঞ্ঞতায চোদিযমানস্স ভব্বকুলপুত্তস্সাতি ৰুত্তত্তা সুদিন্নো তং কুক্কুচ্চং ৰিনোদেত্ৰা অরহত্তং সচ্ছাকাসি, তেনেৰ পব্বজ্জা অনুঞ্ঞাতা’’তি ৰদন্তি। তং পাল়িযা অট্ঠকথায চ ন সমেতি। পুব্বেকতপুঞ্ঞতা চ অপ্পমাণং তাদিসস্সপি অন্তরাকতপাপকম্মস্স ৰসেন অজাতসত্তুনো ৰিয অধিগমন্তরাযদস্সনতো। কতাকতানুসোচনলক্খণং কুক্কুচ্চং ইধাধিপ্পেতন্তি আহ ‘‘অজ্ঝাচারহেতুকো পচ্ছানুতাপো’’তি। কতং অজ্ঝাচারং পটিচ্চ অনুসোচনৰসেন ৰিরূপং সরণং চিন্তনং ৰিপ্পটিসারোতি আহ ‘‘ৰিপ্পটিসারোতিপি তস্সেৰ নাম’’ন্তি। কুচ্ছিতং কতং কিরিযাতি কুকতং, কুকতমেৰ কুক্কুচ্চন্তি আহ ‘‘কুচ্ছিতকিরিযাভাৰতো কুক্কুচ্চ’’ন্তি। পরিযাদিন্নমংসলোহিতত্তাতি পরিক্খীণমংসলোহিতত্তা। অৰিপ্ফারিকোতি উদ্দেসাদীসু ব্যাপাররহিতো, অব্যাৰটোতি অত্থো। ৰহচ্ছিন্নোতি ছিন্নৰহো, ভারৰহনেন ছিন্নক্খন্ধোতি ৰুত্তং হোতি। তং তং চিন্তযীতি ‘‘যদি অহং তং পাপং ন করিস্সং, ইমে ভিক্খূ ৰিয পরিপুণ্ণসীলো অস্স’’ন্তিআদিনা তং তং চিন্তযি।

    37.‘‘Evaṃ mātāputtānaṃ pabbajjā saphalā ahosi, pitā pana vippaṭisārābhibhūto vihāsī’’ti vacanato sudinnassa tasmiṃ attabhāve arahattādhigamo nāhosīti viññāyati. Keci pana ‘‘pubbekatapuññatāya codiyamānassa bhabbakulaputtassāti vuttattā sudinno taṃ kukkuccaṃ vinodetvā arahattaṃ sacchākāsi, teneva pabbajjā anuññātā’’ti vadanti. Taṃ pāḷiyā aṭṭhakathāya ca na sameti. Pubbekatapuññatā ca appamāṇaṃ tādisassapi antarākatapāpakammassa vasena ajātasattuno viya adhigamantarāyadassanato. Katākatānusocanalakkhaṇaṃ kukkuccaṃ idhādhippetanti āha ‘‘ajjhācārahetuko pacchānutāpo’’ti. Kataṃ ajjhācāraṃ paṭicca anusocanavasena virūpaṃ saraṇaṃ cintanaṃ vippaṭisāroti āha ‘‘vippaṭisārotipi tasseva nāma’’nti. Kucchitaṃ kataṃ kiriyāti kukataṃ, kukatameva kukkuccanti āha ‘‘kucchitakiriyābhāvato kukkucca’’nti. Pariyādinnamaṃsalohitattāti parikkhīṇamaṃsalohitattā. Avipphārikoti uddesādīsu byāpārarahito, abyāvaṭoti attho. Vahacchinnoti chinnavaho, bhāravahanena chinnakkhandhoti vuttaṃ hoti. Taṃ taṃ cintayīti ‘‘yadi ahaṃ taṃ pāpaṃ na karissaṃ, ime bhikkhū viya paripuṇṇasīlo assa’’ntiādinā taṃ taṃ cintayi.

    ৩৮. এৰংভূতন্তি কিসলূখাদিভাৰপ্পত্তং। গণসঙ্গণিকাপপঞ্চেনাতি গণে জনসমাগমে সন্নিপতনং গণসঙ্গণিকা, গণসঙ্গণিকাযেৰ পপঞ্চো গণসঙ্গণিকাপপঞ্চো, তেন। যস্সাতি যে অস্স। কথাফাসুকাতি ৰিস্সাসিকভাৰেনেৰ কথাকরণে ফাসুকা, সুখেন ৰত্তুং সক্কুণেয্যা, সুখসম্ভাসাতি অত্থো। পসাদস্স পমাণতো ঊনাধিকত্তং সব্বদা সব্বেসং নত্থীতি আহ ‘‘পসাদপতিট্ঠানোকাসস্স সম্পুণ্ণত্তা’’তি। দানীতি ইমস্মিং অত্থে এতরহি-সদ্দো অত্থীতি আহ ‘‘দানীতি নিপাতো’’তি। নো-সদ্দোপি নু-সদ্দো ৰিয পুচ্ছনত্থোতি আহ ‘‘কচ্চি নু ত্ৰ’’ন্তি। তমেৰ অনভিরতিন্তি তেহি ভিক্খূহি পুচ্ছিতং তমেৰ গিহিভাৰপত্থনাকারং অনভিরতিং। ‘‘তমেৰা’’তি অৰধারণেন নিৰত্তিতমত্থং দস্সেন্তো আহ ‘‘অধিকুসলান’’ন্তিআদি। অধিকুসলা ধম্মা সমথৰিপস্সনাদযো। অত্থীতি ৰিসযভাৰেন চিত্তে পরিৰত্তনং সন্ধায ৰুত্তং, ন পাপস্স ৰত্তমানতং সন্ধায, অত্থি ৰিসযভাৰেন চিত্তে পরিৰত্ততীতি ৰুত্তং হোতি। তেনাহ – ‘‘নিচ্চকালং অভিমুখং ৰিয মে তিট্ঠতী’’তি।

    38.Evaṃbhūtanti kisalūkhādibhāvappattaṃ. Gaṇasaṅgaṇikāpapañcenāti gaṇe janasamāgame sannipatanaṃ gaṇasaṅgaṇikā, gaṇasaṅgaṇikāyeva papañco gaṇasaṅgaṇikāpapañco, tena. Yassāti ye assa. Kathāphāsukāti vissāsikabhāveneva kathākaraṇe phāsukā, sukhena vattuṃ sakkuṇeyyā, sukhasambhāsāti attho. Pasādassa pamāṇato ūnādhikattaṃ sabbadā sabbesaṃ natthīti āha ‘‘pasādapatiṭṭhānokāsassa sampuṇṇattā’’ti. Dānīti imasmiṃ atthe etarahi-saddo atthīti āha ‘‘dānīti nipāto’’ti. No-saddopi nu-saddo viya pucchanatthoti āha ‘‘kaccinu tva’’nti. Tameva anabhiratinti tehi bhikkhūhi pucchitaṃ tameva gihibhāvapatthanākāraṃ anabhiratiṃ. ‘‘Tamevā’’ti avadhāraṇena nivattitamatthaṃ dassento āha ‘‘adhikusalāna’’ntiādi. Adhikusalā dhammā samathavipassanādayo. Atthīti visayabhāvena citte parivattanaṃ sandhāya vuttaṃ, na pāpassa vattamānataṃ sandhāya, atthi visayabhāvena citte parivattatīti vuttaṃ hoti. Tenāha – ‘‘niccakālaṃ abhimukhaṃ viya me tiṭṭhatī’’ti.

    যং ত্ৰন্তি এত্থ যন্তি হেতুঅত্থে নিপাতো, করণত্থে ৰা পচ্চত্তৰচনন্তি আহ ‘‘যেন পাপেনা’’তি। অনেকপরিযাযেনাতি এত্থ পরিযায-সদ্দো কারণৰচনোতি আহ ‘‘অনেককারণেনা’’তি। ৰিরাগত্থাযাতি ভৰভোগেসু ৰিরজ্জনত্থায। নো রাগেন রজ্জনত্থাযাতি ভৰভোগেসুযেৰ রাগেন অরঞ্জনত্থায। তেনাহ ‘‘ভগৰতা হী’’তিআদি। এস নযো সব্বপদেসূতি অধিপ্পাযিকমত্তং সব্বপদেসু অতিদিস্সতি। ইদং পনেত্থ পরিযাযৰচনমত্তন্তি ‘‘ৰিসংযোগাযা’’তিআদীসু সব্বপদেসু ‘‘কিলেসেহি ৰিসংযুজ্জনত্থাযা’’তিআদিনা পদত্থৰিভাৰনৰসেন ৰুত্তপরিযাযৰচনং সন্ধায ৰদতি। ন সংযুজ্জনত্থাযাতি কিলেসেহি ন সংযুজ্জনত্থায। অগ্গহণত্থাযাতি কিলেসে অগ্গহণত্থায, ভৰভোগে ৰা তণ্হাদিট্ঠিৰসেন অগ্গহণত্থায। ন সঙ্গহণত্থাযাতি এত্থাপি ইমিনাৰ নযেন অত্থো ৰেদিতব্বো।

    Yaṃ tvanti ettha yanti hetuatthe nipāto, karaṇatthe vā paccattavacananti āha ‘‘yena pāpenā’’ti. Anekapariyāyenāti ettha pariyāya-saddo kāraṇavacanoti āha ‘‘anekakāraṇenā’’ti. Virāgatthāyāti bhavabhogesu virajjanatthāya. No rāgena rajjanatthāyāti bhavabhogesuyeva rāgena arañjanatthāya. Tenāha ‘‘bhagavatā hī’’tiādi. Esa nayo sabbapadesūti adhippāyikamattaṃ sabbapadesu atidissati. Idaṃ panettha pariyāyavacanamattanti ‘‘visaṃyogāyā’’tiādīsu sabbapadesu ‘‘kilesehi visaṃyujjanatthāyā’’tiādinā padatthavibhāvanavasena vuttapariyāyavacanaṃ sandhāya vadati. Na saṃyujjanatthāyāti kilesehi na saṃyujjanatthāya. Aggahaṇatthāyāti kilese aggahaṇatthāya, bhavabhoge vā taṇhādiṭṭhivasena aggahaṇatthāya. Na saṅgahaṇatthāyāti etthāpi imināva nayena attho veditabbo.

    নিব্বত্তিতলোকুত্তরনিব্বানমেৰাতি সঙ্খারেহি নিক্খন্তং ৰিৰিত্তং, ততোযেৰ লোকতো উত্তিণ্ণত্তা লোকুত্তরং নিব্বানং। মদনিম্মদনাযাতি ৰাতি এত্থ অৰুত্তসমুচ্চযত্থেন ৰা-সদ্দেন আদিঅত্থেন ইতি-সদ্দেন ৰা ‘‘পিপাসৰিনযাযা’’তিআদি সব্বং সঙ্গহিতন্তি দট্ঠব্বং। নিব্বানং আরম্মণং কত্ৰা পৰত্তমানেন অরিযমগ্গেন পহীযমানা রাগমানমদাদযো তং পত্ৰা পহীযন্তি নামাতি আহ ‘‘যস্মা পন তং আগম্মা’’তিআদি। তত্থ তং আগম্মাতি নিব্বানং আগম্ম পটিচ্চ অরিযমগ্গস্স আরম্মণপচ্চযভাৰহেতু। মানমদপুরিসমদাদযোতি এত্থ জাতিআদিং নিস্সায সেয্যস্স ‘‘সেয্যোহমস্মী’’তিআদিনা উপ্পজ্জনকমানোযেৰ মদজননট্ঠেন মদোতি মানমদো। পুরিসমদো ৰুচ্চতি পুরিসমানো, ‘‘অহং পুরিসো’’তি উপ্পজ্জনকমানো। ‘‘অসদ্ধম্মসেৰনসমত্থতং নিস্সায পৰত্তো মানো, রাগো এৰ ৰা পুরিসমদো’’তি কেচি। আদি-সদ্দেন বলমদযোব্বনমদাদিং সঙ্গণ্হাতি । মহাগণ্ঠিপদে পন মজ্ঝিমগণ্ঠিপদে চ ‘‘পুরিসমদো নাম সম্ভৰো’’তি ৰুত্তং, তং ইধ যুত্তং ৰিয ন দিস্সতি। ন হি ‘‘ভগৰতা সম্ভৰস্স ৰিনাসায ধম্মো দেসিতো’’তি ৰত্তুং ৰট্টতি। নিম্মদাতি ৰিগতমদভাৰা। ইমমেৰ হি অত্থং দস্সেতুং ‘‘অমদা’’তি ৰুত্তং। মদা নিম্মদীযন্তি এত্থ অমদভাৰং ৰিনাসং গচ্ছন্তীতি মদনিম্মদনো। এস নযো সেসপদেসুপি।

    Nibbattitalokuttaranibbānamevāti saṅkhārehi nikkhantaṃ vivittaṃ, tatoyeva lokato uttiṇṇattā lokuttaraṃ nibbānaṃ. Madanimmadanāyāti vāti ettha avuttasamuccayatthena vā-saddena ādiatthena iti-saddena vā ‘‘pipāsavinayāyā’’tiādi sabbaṃ saṅgahitanti daṭṭhabbaṃ. Nibbānaṃ ārammaṇaṃ katvā pavattamānena ariyamaggena pahīyamānā rāgamānamadādayo taṃ patvā pahīyanti nāmāti āha ‘‘yasmā pana taṃ āgammā’’tiādi. Tattha taṃ āgammāti nibbānaṃ āgamma paṭicca ariyamaggassa ārammaṇapaccayabhāvahetu. Mānamadapurisamadādayoti ettha jātiādiṃ nissāya seyyassa ‘‘seyyohamasmī’’tiādinā uppajjanakamānoyeva madajananaṭṭhena madoti mānamado. Purisamado vuccati purisamāno, ‘‘ahaṃ puriso’’ti uppajjanakamāno. ‘‘Asaddhammasevanasamatthataṃ nissāya pavatto māno, rāgo eva vā purisamado’’ti keci. Ādi-saddena balamadayobbanamadādiṃ saṅgaṇhāti . Mahāgaṇṭhipade pana majjhimagaṇṭhipade ca ‘‘purisamado nāma sambhavo’’ti vuttaṃ, taṃ idha yuttaṃ viya na dissati. Na hi ‘‘bhagavatā sambhavassa vināsāya dhammo desito’’ti vattuṃ vaṭṭati. Nimmadāti vigatamadabhāvā. Imameva hi atthaṃ dassetuṃ ‘‘amadā’’ti vuttaṃ. Madā nimmadīyanti ettha amadabhāvaṃ vināsaṃ gacchantīti madanimmadano. Esa nayo sesapadesupi.

    কামপিপাসাতি কামানং পাতুকম্যতা, কামতণ্হাতি অত্থো। আলীযন্তি অভিরমিতব্বট্ঠেন সেৰীযন্তীতি আলযা, পঞ্চ কামগুণাতি আহ ‘‘পঞ্চ কামগুণালযা’’তি। পঞ্চসু হি কামগুণেসু ছন্দরাগপ্পহানেনেৰ পঞ্চ কামগুণাপি পহীনা নাম হোন্তি, তেনেৰ ‘‘যো, ভিক্খৰে, রূপেসু ছন্দরাগো’’তিআদি (সং॰ নি॰ ৩.৩২৩) ৰুত্তং। পঞ্চকামগুণেসু ৰা আলযা পঞ্চকামগুণালযা। আলীযন্তি অল্লীযন্তি অভিরমনৰসেন সেৰন্তীতি আলযাতি হি তণ্হাৰিচরিতানং অধিৰচনং। তেভূমকৰট্টন্তি তীসু ভূমীসু কম্মকিলেসৰিপাকা ৰট্টনট্ঠেন ৰট্টং। ৰিরজ্জতীতি পলুজ্জতি। ‘‘ৰিরজ্জতীতি কামৰিনাসো ৰুত্তো, নিরুজ্ঝতীতি একপ্পহারেন ৰিনাসো’’তি গণ্ঠিপদেসু ৰুত্তং। ৰিরাগো নিরোধোতি সামঞ্ঞচোদনাযপি ‘‘তণ্হাক্খযো’’তি অধিকতত্তা তণ্হায এৰ ৰিরজ্জনং নিরুজ্ঝনঞ্চ ৰুত্তং।

    Kāmapipāsāti kāmānaṃ pātukamyatā, kāmataṇhāti attho. Ālīyanti abhiramitabbaṭṭhena sevīyantīti ālayā, pañca kāmaguṇāti āha ‘‘pañca kāmaguṇālayā’’ti. Pañcasu hi kāmaguṇesu chandarāgappahāneneva pañca kāmaguṇāpi pahīnā nāma honti, teneva ‘‘yo, bhikkhave, rūpesu chandarāgo’’tiādi (saṃ. ni. 3.323) vuttaṃ. Pañcakāmaguṇesu vā ālayā pañcakāmaguṇālayā. Ālīyanti allīyanti abhiramanavasena sevantīti ālayāti hi taṇhāvicaritānaṃ adhivacanaṃ. Tebhūmakavaṭṭanti tīsu bhūmīsu kammakilesavipākā vaṭṭanaṭṭhena vaṭṭaṃ. Virajjatīti palujjati. ‘‘Virajjatīti kāmavināso vutto, nirujjhatīti ekappahārena vināso’’ti gaṇṭhipadesu vuttaṃ. Virāgo nirodhoti sāmaññacodanāyapi ‘‘taṇhākkhayo’’ti adhikatattā taṇhāya eva virajjanaṃ nirujjhanañca vuttaṃ.

    চতস্সো যোনিযোতি এত্থ যোনীতি খন্ধকোট্ঠাসস্সপি কারণস্সপি পস্সাৰমগ্গস্সপি নামং। ‘‘চতস্সো নাগযোনিযো (সং॰ নি॰ ৩.৩৪২-৩৪৩) চতস্সো সুপণ্ণযোনিযো’’তি এত্থ হি খন্ধকোট্ঠাসো যোনি নাম। ‘‘যোনি হেসা ভূমিজ ফলস্স অধিগমাযা’’তি (ম॰ নি॰ ৩.২২৬) এত্থ কারণং। ‘‘ন চাহং ব্রাহ্মণং ব্রূমি, যোনিজং মত্তিসম্ভৰ’’ন্তি (ম॰ নি॰ ২.৪৫৭; ধ॰ প॰ ৩৯৬) এত্থ পস্সাৰমগ্গো। ইধ পন খন্ধকোট্ঠাসো ‘‘যোনী’’তি অধিপ্পেতো। যৰন্তি তায সত্তা অমিস্সিতাপি সমানজাতিতায মিস্সিতা হোন্তীতি যোনি। সা পন অত্থতো অণ্ডাদিউপ্পত্তিট্ঠানৰিসিট্ঠো খন্ধানং ভাগসো পৰত্তিৰিসেসো, সা চ অণ্ডজজলাবুজসংসেদজওপপাতিকৰসেন চতুব্বিধা। ৰুত্তঞ্হেতং ‘‘চতস্সো খো ইমা, সারিপুত্ত, যোনিযো। কতমা চতস্সো? অণ্ডজা যোনি জলাবুজা যোনি সংসেদজা যোনি ওপপাতিকা যোনী’’তি (ম॰ নি॰ ১.১৫২)।

    Catasso yoniyoti ettha yonīti khandhakoṭṭhāsassapi kāraṇassapi passāvamaggassapi nāmaṃ. ‘‘Catasso nāgayoniyo (saṃ. ni. 3.342-343) catasso supaṇṇayoniyo’’ti ettha hi khandhakoṭṭhāso yoni nāma. ‘‘Yoni hesā bhūmija phalassa adhigamāyā’’ti (ma. ni. 3.226) ettha kāraṇaṃ. ‘‘Na cāhaṃ brāhmaṇaṃ brūmi, yonijaṃ mattisambhava’’nti (ma. ni. 2.457; dha. pa. 396) ettha passāvamaggo. Idha pana khandhakoṭṭhāso ‘‘yonī’’ti adhippeto. Yavanti tāya sattā amissitāpi samānajātitāya missitā hontīti yoni. Sā pana atthato aṇḍādiuppattiṭṭhānavisiṭṭho khandhānaṃ bhāgaso pavattiviseso, sā ca aṇḍajajalābujasaṃsedajaopapātikavasena catubbidhā. Vuttañhetaṃ ‘‘catasso kho imā, sāriputta, yoniyo. Katamā catasso? Aṇḍajā yoni jalābujā yoni saṃsedajā yoni opapātikā yonī’’ti (ma. ni. 1.152).

    তত্থ অণ্ডে জাতা অণ্ডজা। জলাবুম্হি জাতা জলাবুজা। সংসেদে জাতা সংসেদজা। ৰিনা এতেহি কারণেহি উপ্পতিত্ৰা ৰিয নিব্বত্তাতি ওপপাতিকা। এত্থ চ পেতলোকে তিরচ্ছানে মনুস্সেসু চ অণ্ডজাদযো চতস্সোপি যোনিযো সম্ভৰন্তি, মনুস্সেসু পনেত্থ কেচিদেৰ ওপপাতিকা হোন্তি মহাপদুমকুমারাদযো ৰিয। অণ্ডজাপি কোন্তপুত্তা দ্ৰেভাতিযথেরা ৰিয, সংসেদজাপি পদুমগব্ভে নিব্বত্তপোক্খরসাতিব্রাহ্মণপদুমৰতীদেৰীআদযো ৰিয কেচিদেৰ হোন্তি, যেভুয্যেন পন মনুস্সা জলাবুজাৰ। পেতেসুপি নিজ্ঝামতণ্হিকপেতানং নিচ্চদুক্খাতুরতায কামসেৰনা নত্থি, তস্মা তে গব্ভসেয্যকা ন হোন্তি। জালাৰন্ততায ন তাসং কুচ্ছিযং গব্ভো সণ্ঠাতি, তস্মা তে ওপপাতিকাযেৰ সংসেদজতাযপি অসম্ভৰতো, অৰসেসপেতা পন চতুযোনিকাপি হোন্তি। যথা চ তে, এৰং যক্খাপি সব্বচতুপ্পদপক্খিজাতিদীঘজাতিআদযোপি সব্বে চতুযোনিকাযেৰ। সব্বে নেরযিকা চ চতুমহারাজিকতো পট্ঠায উপরিদেৰা চ ওপপাতিকাযেৰ, ভুম্মদেৰা পন চতুযোনিকাৰ হোন্তি। তত্থ দেৰমনুস্সেসু সংসেদজওপপাতিকানং অযং ৰিসেসো – সংসেদজা মন্দা দহরা হুত্ৰা নিব্বত্তন্তি, ওপপাতিকা সোল়সৰস্সুদ্দেসিকা হুত্ৰা।

    Tattha aṇḍe jātā aṇḍajā. Jalābumhi jātā jalābujā. Saṃsede jātā saṃsedajā. Vinā etehi kāraṇehi uppatitvā viya nibbattāti opapātikā. Ettha ca petaloke tiracchāne manussesu ca aṇḍajādayo catassopi yoniyo sambhavanti, manussesu panettha kecideva opapātikā honti mahāpadumakumārādayo viya. Aṇḍajāpi kontaputtā dvebhātiyatherā viya, saṃsedajāpi padumagabbhe nibbattapokkharasātibrāhmaṇapadumavatīdevīādayo viya kecideva honti, yebhuyyena pana manussā jalābujāva. Petesupi nijjhāmataṇhikapetānaṃ niccadukkhāturatāya kāmasevanā natthi, tasmā te gabbhaseyyakā na honti. Jālāvantatāya na tāsaṃ kucchiyaṃ gabbho saṇṭhāti, tasmā te opapātikāyeva saṃsedajatāyapi asambhavato, avasesapetā pana catuyonikāpi honti. Yathā ca te, evaṃ yakkhāpi sabbacatuppadapakkhijātidīghajātiādayopi sabbe catuyonikāyeva. Sabbe nerayikā ca catumahārājikato paṭṭhāya uparidevā ca opapātikāyeva, bhummadevā pana catuyonikāva honti. Tattha devamanussesu saṃsedajaopapātikānaṃ ayaṃ viseso – saṃsedajā mandā daharā hutvā nibbattanti, opapātikā soḷasavassuddesikā hutvā.

    পঞ্চ গতিযোতি এত্থ সুকতদুক্কটকম্মৰসেন গন্তব্বা উপপজ্জিতব্বাতি গতিযো। যথা হি কম্মভৰো পরমত্থতো অসতিপি কারকে পচ্চযসামগ্গিযা সিদ্ধো, তংসমঙ্গিনা সন্তানলক্খণেন সত্তেন কতোতি ৰোহরীযতি, এৰং উপপত্তিভৰলক্খণগতিযো পরমত্থতো অসতিপি গমকে তংতংকম্মৰসেন যেসং তানি কম্মানি তেহি গন্তব্বাতি ৰোহরীযন্তি। অপিচ গতিগতি নিব্বত্তিগতি অজ্ঝাসযগতি ৰিভৰগতি নিপ্ফত্তিগতীতি বহুৰিধা গতি নাম। তত্থ ‘‘তং গতিং পেচ্চ গচ্ছামী’’তি (অ॰ নি॰ ৪.১৮৪) চ ‘‘যস্স গতিং ন জানন্তি, দেৰা গন্ধব্বমানুসা’’তি (ধ॰ প॰ ৪২০; সু॰ নি॰ ৬৪৯) চ অযং গতিগতি নাম। ‘‘ইমেসং খো পনাহং ভিক্খূনং সীলৰন্তানং নেৰ জানামি আগতিং ৰা গতিং ৰা’’তি (ম॰ নি॰ ১.৫০৮) অযং নিব্বত্তিগতি নাম। ‘‘এৰম্পি খো তে অহং ব্রহ্মে গতিঞ্চ পজানামি চুতিঞ্চ পজানামী’’তি (ম॰ নি॰ ১.৫০৩) অযং অজ্ঝাসযগতি নাম। ‘‘ৰিভৰো গতি ধম্মানং, নিব্বানং অরহতো গতী’’তি (পরি॰ ৩৩৯) অযং ৰিভৰগতি নাম। ‘‘দ্ৰেযেৰ গতিযো সম্ভৰন্তি অনঞ্ঞা’’তি (দী॰ নি॰ ১.২৫৮; ২.৩৪; ৩.২০০) অযং নিপ্ফত্তিগতি নাম। তাসু ইধ গতিগতি অধিপ্পেতা, সা পন নিরযতিরচ্ছানযোনিপেত্তিৰিসযমনউস্সদেৰানং ৰসেন পঞ্চৰিধা হোতি। ৰুত্তঞ্হেতং – ‘‘পঞ্চ খো ইমা, সারিপুত্ত, গতিযো। কতমা পঞ্চ? নিরযো তিরচ্ছানযোনি পেত্তিৰিসযো মনুস্সা দেৰা’’তি (ম॰ নি॰ ১.১৫৩)।

    Pañca gatiyoti ettha sukatadukkaṭakammavasena gantabbā upapajjitabbāti gatiyo. Yathā hi kammabhavo paramatthato asatipi kārake paccayasāmaggiyā siddho, taṃsamaṅginā santānalakkhaṇena sattena katoti voharīyati, evaṃ upapattibhavalakkhaṇagatiyo paramatthato asatipi gamake taṃtaṃkammavasena yesaṃ tāni kammāni tehi gantabbāti voharīyanti. Apica gatigati nibbattigati ajjhāsayagati vibhavagati nipphattigatīti bahuvidhā gati nāma. Tattha ‘‘taṃ gatiṃ pecca gacchāmī’’ti (a. ni. 4.184) ca ‘‘yassa gatiṃ na jānanti, devā gandhabbamānusā’’ti (dha. pa. 420; su. ni. 649) ca ayaṃ gatigati nāma. ‘‘Imesaṃ kho panāhaṃ bhikkhūnaṃ sīlavantānaṃ neva jānāmi āgatiṃ vā gatiṃ vā’’ti (ma. ni. 1.508) ayaṃ nibbattigati nāma. ‘‘Evampi kho te ahaṃ brahme gatiñca pajānāmi cutiñca pajānāmī’’ti (ma. ni. 1.503) ayaṃ ajjhāsayagati nāma. ‘‘Vibhavo gati dhammānaṃ, nibbānaṃ arahato gatī’’ti (pari. 339) ayaṃ vibhavagati nāma. ‘‘Dveyeva gatiyo sambhavanti anaññā’’ti (dī. ni. 1.258; 2.34; 3.200) ayaṃ nipphattigati nāma. Tāsu idha gatigati adhippetā, sā pana nirayatiracchānayonipettivisayamanaussadevānaṃ vasena pañcavidhā hoti. Vuttañhetaṃ – ‘‘pañca kho imā, sāriputta, gatiyo. Katamā pañca? Nirayo tiracchānayoni pettivisayo manussā devā’’ti (ma. ni. 1.153).

    তত্থ যস্স উপ্পজ্জতি, তং ব্রূহেন্তোযেৰ উপ্পজ্জতীতি অযো, সুখং। নত্থি এত্থ অযোতি নিরযো, ততো এৰ রমিতব্বং অস্সাদেতব্বং তত্থ নত্থীতি নিরতিঅত্থেন নিরস্সাদট্ঠেন চ নিরযোতি ৰুচ্চতি। তিরিযং অঞ্চিতাতি তিরচ্ছানা, দেৰমনুস্সাদযো ৰিয উদ্ধং দীঘা অহুত্ৰা তিরিযং দীঘাতি অত্থো। পকট্ঠতো সুখতো অযনং অপগমো পেচ্চভাৰো, তং পেচ্চভাৰং পত্তানং ৰিসযোতি পেত্তিৰিসযো, পেতযোনি। মনস্স উস্সন্নতায মনুস্সা, সতিসূরভাৰব্রহ্মচরিযযোগ্যতাদিগুণৰসেন উপচিতমানসতায উক্কট্ঠগুণচিত্ততায মনুস্সাতি ৰুত্তং হোতি, অযং পনত্থো নিপ্পরিযাযতো জম্বুদীপৰাসীৰসেন ৰেদিতব্বো। যথাহ – ‘‘তীহি, ভিক্খৰে, ঠানেহি জম্বুদীপকা মনুস্সা উত্তরকুরুকে চ মনুস্সে অধিগ্গণ্হন্তি দেৰে চ তাৰতিংসে। কতমেহি তীহি? সূরা সতিমন্তো ইধ ব্রহ্মচরিযৰাসো’’তি (অ॰ নি॰ ৯.২১)। তথা হি বুদ্ধা চ ভগৰন্তো পচ্চেকবুদ্ধা অগ্গসাৰকা মহাসাৰকা চক্কৰত্তিনো অঞ্ঞে চ মহানুভাৰা সত্তা তত্থেৰ উপ্পজ্জন্তি, তেহি সমানরূপাদিতায পন সদ্ধিং পরিত্তদীপৰাসীহি ইতরমহাদীপৰাসিনোপি মনুস্সাত্ৰেৰ পঞ্ঞাযিংসু।

    Tattha yassa uppajjati, taṃ brūhentoyeva uppajjatīti ayo, sukhaṃ. Natthi ettha ayoti nirayo, tato eva ramitabbaṃ assādetabbaṃ tattha natthīti niratiatthena nirassādaṭṭhena ca nirayoti vuccati. Tiriyaṃ añcitāti tiracchānā, devamanussādayo viya uddhaṃ dīghā ahutvā tiriyaṃ dīghāti attho. Pakaṭṭhato sukhato ayanaṃ apagamo peccabhāvo, taṃ peccabhāvaṃ pattānaṃ visayoti pettivisayo, petayoni. Manassa ussannatāya manussā, satisūrabhāvabrahmacariyayogyatādiguṇavasena upacitamānasatāya ukkaṭṭhaguṇacittatāya manussāti vuttaṃ hoti, ayaṃ panattho nippariyāyato jambudīpavāsīvasena veditabbo. Yathāha – ‘‘tīhi, bhikkhave, ṭhānehi jambudīpakā manussā uttarakuruke ca manusse adhiggaṇhanti deve ca tāvatiṃse. Katamehi tīhi? Sūrā satimanto idha brahmacariyavāso’’ti (a. ni. 9.21). Tathā hi buddhā ca bhagavanto paccekabuddhā aggasāvakā mahāsāvakā cakkavattino aññe ca mahānubhāvā sattā tattheva uppajjanti, tehi samānarūpāditāya pana saddhiṃ parittadīpavāsīhi itaramahādīpavāsinopi manussātveva paññāyiṃsu.

    অপরে পন ভণন্তি ‘‘লোভাদীহি অলোভাদীহি চ সহিতস্স মনস্স উস্সন্নতায মনুস্সা। যে হি সত্তা মনুস্সজাতিকা, তেসু ৰিসেসতো লোভাদযো অলোভাদযো চ উস্সন্না। তে লোভাদিউস্সন্নতায অপাযমগ্গং, অলোভাদিউস্সন্নতায সুগতিমগ্গং নিব্বানগামিমগ্গঞ্চ পরিপূরেন্তি, তস্মা লোভাদীহি অলোভাদীহি চ সহিতস্স মনস্স উস্সন্নতায পরিত্তদীপৰাসীহি সদ্ধিং চতুমহাদীপৰাসিনো সত্তৰিসেসা মনুস্সাতি ৰুচ্চন্তী’’তি। লোকিযা পন ‘‘মনুনো অপচ্চভাৰেন মনুস্সা’’তি ৰদন্তি। মনু নাম পঠমকপ্পিকো লোকমরিযাদায আদিভূতো সত্তানং হিতাহিতৰিধাযকো কত্তব্বাকত্তব্বতাৰসেন পিতুট্ঠানিযো, যো সাসনে মহাসম্মতোতি ৰুচ্চতি অম্হাকং বোধিসত্তো, পচ্চক্খতো পরম্পরায চ তস্স ওৰাদানুসাসনিযং ঠিতা সত্তা পুত্তসদিসতায ‘‘মনুস্সা, মানুসা’’তি চ ৰুচ্চন্তি। ততো এৰ হি তে ‘‘মানৰা মনুজা’’তি চ ৰোহরীযন্তি।

    Apare pana bhaṇanti ‘‘lobhādīhi alobhādīhi ca sahitassa manassa ussannatāya manussā. Ye hi sattā manussajātikā, tesu visesato lobhādayo alobhādayo ca ussannā. Te lobhādiussannatāya apāyamaggaṃ, alobhādiussannatāya sugatimaggaṃ nibbānagāmimaggañca paripūrenti, tasmā lobhādīhi alobhādīhi ca sahitassa manassa ussannatāya parittadīpavāsīhi saddhiṃ catumahādīpavāsino sattavisesā manussāti vuccantī’’ti. Lokiyā pana ‘‘manuno apaccabhāvena manussā’’ti vadanti. Manu nāma paṭhamakappiko lokamariyādāya ādibhūto sattānaṃ hitāhitavidhāyako kattabbākattabbatāvasena pituṭṭhāniyo, yo sāsane mahāsammatoti vuccati amhākaṃ bodhisatto, paccakkhato paramparāya ca tassa ovādānusāsaniyaṃ ṭhitā sattā puttasadisatāya ‘‘manussā, mānusā’’ti ca vuccanti. Tato eva hi te ‘‘mānavā manujā’’ti ca voharīyanti.

    পঞ্চহি কামগুণেহি অত্তনো অত্তনো দেৰানুভাৰসঙ্খাতেহি ইদ্ধিৰিসেসেহি চ দিব্বন্তি কীল়ন্তি লল়ন্তি জোতন্তীতি দেৰা। তত্থ কামদেৰা কামগুণেহি চেৰ ইদ্ধিৰিসেসেহি চ, ইতরে ইদ্ধিৰিসেসেহেৰ দিব্বন্তীতি ৰেদিতব্বা। সরণন্তি ৰা গমিযন্তি অভিত্থৰীযন্তীতি ৰা দেৰা। এত্থ চ নিরযগতিদেৰগতিমনুস্সগতীহি সদ্ধিং ওকাসেন খন্ধা ৰুত্তা। তিরচ্ছানযোনিপেত্তিৰিসযগ্গহণেন খন্ধানং এৰ গহণং ৰেদিতব্বং তেসং তাদিসস্স পরিচ্ছিন্নস্স ওকাসস্স অভাৰতো। যত্থ যত্থ ৰা তে অরঞ্ঞসমুদ্দপব্বতপাদাদিকে নিবদ্ধৰাসং ৰসন্তি, তাদিসস্স ঠানস্স ৰসেন ওকাসোপি গহেতব্বো। সত্ত ৰিঞ্ঞাণট্ঠিতিযো নৰ সত্তাৰাসা চ হেট্ঠা সংৰণ্ণিতনযা এৰ। অপরাপরভাৰাযাতি অপরাপরং যোনিআদিতো যোনিআদিভাৰায। আবন্ধনং গণ্ঠিকরণং, সংসিব্বনং তুন্নকরণং। তণ্হায নিক্খন্তং তত্থ তস্সা সব্বসো অভাৰতো, নিক্খমনঞ্চস্স তণ্হায ৰিসংযোগো এৰাতি আহ ‘‘ৰিসংযুত্ত’’ন্তি।

    Pañcahi kāmaguṇehi attano attano devānubhāvasaṅkhātehi iddhivisesehi ca dibbanti kīḷanti laḷanti jotantīti devā. Tattha kāmadevā kāmaguṇehi ceva iddhivisesehi ca, itare iddhiviseseheva dibbantīti veditabbā. Saraṇanti vā gamiyanti abhitthavīyantīti vā devā. Ettha ca nirayagatidevagatimanussagatīhi saddhiṃ okāsena khandhā vuttā. Tiracchānayonipettivisayaggahaṇena khandhānaṃ eva gahaṇaṃ veditabbaṃ tesaṃ tādisassa paricchinnassa okāsassa abhāvato. Yattha yattha vā te araññasamuddapabbatapādādike nibaddhavāsaṃ vasanti, tādisassa ṭhānassa vasena okāsopi gahetabbo. Satta viññāṇaṭṭhitiyo nava sattāvāsā ca heṭṭhā saṃvaṇṇitanayā eva. Aparāparabhāvāyāti aparāparaṃ yoniādito yoniādibhāvāya. Ābandhanaṃ gaṇṭhikaraṇaṃ, saṃsibbanaṃ tunnakaraṇaṃ. Taṇhāya nikkhantaṃ tattha tassā sabbaso abhāvato, nikkhamanañcassa taṇhāya visaṃyogo evāti āha ‘‘visaṃyutta’’nti.

    কামানং পহানন্তি এত্থ কামগ্গহণেন কামীযতীতি কামো, কামেতীতি কামোতি দুৰিধস্সপি কামস্স সঙ্গহো কতোতি আহ ‘‘ৰত্থুকামানং কিলেসকামানঞ্চ পহান’’ন্তি। ৰত্থুকামপ্পহানঞ্চেত্থ তেসু ছন্দরাগপ্পহানেনাতি ৰেদিতব্বং। কামসঞ্ঞানন্তি কামেসু, কামসহগতানং ৰা সঞ্ঞানং। পরিঞ্ঞাতি তিৰিধাপি পরিঞ্ঞা ইধাধিপ্পেতাতি আহ ‘‘ঞাততীরণপহানৰসেন তিৰিধা পরিঞ্ঞা’’তি। তত্থ কতমা ঞাতপরিঞ্ঞা? সব্বং তেভূমকং নামরূপং ‘‘ইদং রূপং, এত্তকং রূপং, ন ইতো ভিয্যো, ইদং নামং, এত্তকং নামং, ন ইতো ভিয্যো’’তি ভূতুপাদাযভেদং রূপং ফস্সাদিভেদং নামঞ্চ লক্খণরসপচ্চুপট্ঠানপদট্ঠানতো ৰৰত্থপেতি, কম্মাৰিজ্জাদিকঞ্চস্স পচ্চযং পরিগ্গণ্হাতি, অযং ঞাতপরিঞ্ঞা।

    Kāmānaṃ pahānanti ettha kāmaggahaṇena kāmīyatīti kāmo, kāmetīti kāmoti duvidhassapi kāmassa saṅgaho katoti āha ‘‘vatthukāmānaṃ kilesakāmānañca pahāna’’nti. Vatthukāmappahānañcettha tesu chandarāgappahānenāti veditabbaṃ. Kāmasaññānanti kāmesu, kāmasahagatānaṃ vā saññānaṃ. Pariññāti tividhāpi pariññā idhādhippetāti āha ‘‘ñātatīraṇapahānavasena tividhā pariññā’’ti. Tattha katamā ñātapariññā? Sabbaṃ tebhūmakaṃ nāmarūpaṃ ‘‘idaṃ rūpaṃ, ettakaṃ rūpaṃ, na ito bhiyyo, idaṃ nāmaṃ, ettakaṃ nāmaṃ, na ito bhiyyo’’ti bhūtupādāyabhedaṃ rūpaṃ phassādibhedaṃ nāmañca lakkhaṇarasapaccupaṭṭhānapadaṭṭhānato vavatthapeti, kammāvijjādikañcassa paccayaṃ pariggaṇhāti, ayaṃ ñātapariññā.

    কতমা তীরণপরিঞ্ঞা? এৰং ঞাতং কত্ৰা তং সব্বং তীরেতি অনিচ্চতো দুক্খতো রোগতোতি দ্ৰাচত্তালীসায আকারেহি, অযং তীরণপরিঞ্ঞা নাম। কতমা পহানপরিঞ্ঞা? এৰং তীরযিত্ৰা অগ্গমগ্গেন সব্বস্মিং ছন্দরাগং পজহতি, অযং পহানপরিঞ্ঞা। দিট্ঠিৰিসুদ্ধিকঙ্খাৰিতরণৰিসুদ্ধিযো ৰা ঞাতপরিঞ্ঞা, মগ্গামগ্গপটিপদাঞাণদস্সনৰিসুদ্ধিআদযো, কলাপসম্মসনাদিঅনুলোমপরিযোসানা ৰা পঞ্ঞা তীরণপরিঞ্ঞা, অরিযমগ্গে ঞাণং নিপ্পরিযাযেন পহানপরিঞ্ঞা। ইধ পন কামসঞ্ঞানং সভাৰলক্খণপটিৰেধৰসেন অনিচ্চাদিসামঞ্ঞলক্খণৰসেন চ পৰত্তমানানং ঞাততীরণপরিঞ্ঞানম্পি কিচ্চনিপ্ফত্তিযা মগ্গেনেৰ ইজ্ঝনতো মগ্গক্খণংযেৰ সন্ধায তিৰিধাপি পরিঞ্ঞা ৰুত্তা। তেনেৰ ‘‘ইমেসু পঞ্চসু ঠানেসু কিলেসক্খযকরো লোকুত্তরমগ্গোৰ কথিতো’’তি ৰুত্তং।

    Katamā tīraṇapariññā? Evaṃ ñātaṃ katvā taṃ sabbaṃ tīreti aniccato dukkhato rogatoti dvācattālīsāya ākārehi, ayaṃ tīraṇapariññā nāma. Katamā pahānapariññā? Evaṃ tīrayitvā aggamaggena sabbasmiṃ chandarāgaṃ pajahati, ayaṃ pahānapariññā. Diṭṭhivisuddhikaṅkhāvitaraṇavisuddhiyo vā ñātapariññā, maggāmaggapaṭipadāñāṇadassanavisuddhiādayo, kalāpasammasanādianulomapariyosānā vā paññā tīraṇapariññā, ariyamagge ñāṇaṃ nippariyāyena pahānapariññā. Idha pana kāmasaññānaṃ sabhāvalakkhaṇapaṭivedhavasena aniccādisāmaññalakkhaṇavasena ca pavattamānānaṃ ñātatīraṇapariññānampi kiccanipphattiyā maggeneva ijjhanato maggakkhaṇaṃyeva sandhāya tividhāpi pariññā vuttā. Teneva ‘‘imesu pañcasu ṭhānesu kilesakkhayakaro lokuttaramaggova kathito’’ti vuttaṃ.

    কামেসু, কামে ৰা পাতুমিচ্ছা কামপিপাসাতি আহ – ‘‘কামেসু পাতব্যতানং, কামে ৰা পাতুমিচ্ছান’’ন্তি। ইমেসু পঞ্চসু ঠানেসূতি ‘‘কামানং পহানং অক্খাত’’ন্তিআদিনা ৰুত্তেসু পঞ্চসু ঠানেসু। তীসু ঠানেসূতি ‘‘ৰিরাগায ধম্মো দেসিতো, নো সরাগায, ৰিসংযোগায ধম্মো দেসিতো, নো সংযোগায, অনুপাদানায ধম্মো দেসিতো, নো সউপাদানাযা’’তি এৰং ৰুত্তেসু ঠানেসু। ৰিপ্পটিসারং করোতীতি এৰং তং পাপং ৰিপ্পটিসারং উপ্পাদেতি। কীদিসং ৰিপ্পটিসারং করোতীতি আহ ‘‘ঈদিসেপি নামা’’তিআদি।

    Kāmesu, kāme vā pātumicchā kāmapipāsāti āha – ‘‘kāmesu pātabyatānaṃ, kāme vā pātumicchāna’’nti. Imesu pañcasu ṭhānesūti ‘‘kāmānaṃ pahānaṃ akkhāta’’ntiādinā vuttesu pañcasu ṭhānesu. Tīsu ṭhānesūti ‘‘virāgāya dhammo desito, no sarāgāya, visaṃyogāya dhammo desito, no saṃyogāya, anupādānāya dhammo desito, no saupādānāyā’’ti evaṃ vuttesu ṭhānesu. Vippaṭisāraṃ karotīti evaṃ taṃ pāpaṃ vippaṭisāraṃ uppādeti. Kīdisaṃ vippaṭisāraṃ karotīti āha ‘‘īdisepi nāmā’’tiādi.

    ৩৯. নেৰ পিযকম্যতাযাতি অত্তনি সত্থু নেৰ পিযভাৰকামতায। ন ভেদপুরেক্খারতাযাতি ন সত্থু তেন ভিক্খুনা ভেদনাধিপ্পাযপুরেক্খারতায। ন কলিসাসনারোপনত্থাযাতি ন দোসারোপনত্থায। কলীতি কোধস্সেতং অধিৰচনং, তস্স সাসনং কলিসাসনং, কোধৰসেন ৰুচ্চমানো গরহদোসো। ৰেলন্তি সিক্খাপদৰেলং। মরিযাদন্তি তস্সেৰ ৰেৰচনং। সিক্খাপদঞ্হি অনতিক্কমনীযট্ঠেন ‘‘ৰেলা, মরিযাদা’’তি চ ৰুচ্চতি।

    39.Nevapiyakamyatāyāti attani satthu neva piyabhāvakāmatāya. Na bhedapurekkhāratāyāti na satthu tena bhikkhunā bhedanādhippāyapurekkhāratāya. Na kalisāsanāropanatthāyāti na dosāropanatthāya. Kalīti kodhassetaṃ adhivacanaṃ, tassa sāsanaṃ kalisāsanaṃ, kodhavasena vuccamāno garahadoso. Velanti sikkhāpadavelaṃ. Mariyādanti tasseva vevacanaṃ. Sikkhāpadañhi anatikkamanīyaṭṭhena ‘‘velā, mariyādā’’ti ca vuccati.

    অজ্ঝাচারৰীতিক্কমোতি মেথুনৰসেন পৰত্তঅজ্ঝাচারসঙ্খাতো ৰীতিক্কমো। পকরণেতি এত্থ প-সদ্দো আরম্ভৰচনোতি আহ ‘‘কত্তুং আরভতী’’তি। কত্থচি উপসগ্গো ধাতুঅত্থমেৰ ৰদতি, ন ৰিসেসত্থজোতকোতি আহ ‘‘করোতিযেৰ ৰা’’তি। জাতিযাতি খত্তিযাদিজাতিযা। গোত্তেনাতি গোতমকস্সপাদিগোত্তেন। কোলপুত্তিযেনাতি খত্তিযাদিজাতীসুযেৰ সক্ককুলসোত্থিযকুলাদিৰিসিট্ঠকুলানং পুত্তভাৰেন। যসস্সীতি মহাপরিৰারো। পেসলন্তি পিযসীলং। অৰিকম্পমানেনাতি পটিঘানুনযেহি অকম্পমানেন। যস্স তস্মিং অত্তভাৰে উপ্পজ্জনারহানং মগ্গফলানং উপনিস্সযো নত্থি, তং বুদ্ধা ‘‘মোঘপুরিসা’’তি ৰদন্তি অরিট্ঠলাল়ুদাযীআদিকে ৰিয। উপনিস্সযে সতিপি তস্মিং খণে মগ্গে ৰা ফলে ৰা অসতি ‘‘মোঘপুরিসা’’তি ৰদন্তিযেৰ ধনিযউপসেনত্থেরাদিকে ৰিয। সুদিন্নস্স পন তস্মিং অত্তভাৰে মগ্গফলানং উপনিস্সযো সমুচ্ছিন্নোযেৰ, তেন নং ‘‘মোঘপুরিসা’’তি আহ।

    Ajjhācāravītikkamoti methunavasena pavattaajjhācārasaṅkhāto vītikkamo. Pakaraṇeti ettha pa-saddo ārambhavacanoti āha ‘‘kattuṃ ārabhatī’’ti. Katthaci upasaggo dhātuatthameva vadati, na visesatthajotakoti āha ‘‘karotiyeva vā’’ti. Jātiyāti khattiyādijātiyā. Gottenāti gotamakassapādigottena. Kolaputtiyenāti khattiyādijātīsuyeva sakkakulasotthiyakulādivisiṭṭhakulānaṃ puttabhāvena. Yasassīti mahāparivāro. Pesalanti piyasīlaṃ. Avikampamānenāti paṭighānunayehi akampamānena. Yassa tasmiṃ attabhāve uppajjanārahānaṃ maggaphalānaṃ upanissayo natthi, taṃ buddhā ‘‘moghapurisā’’ti vadanti ariṭṭhalāḷudāyīādike viya. Upanissaye satipi tasmiṃ khaṇe magge vā phale vā asati ‘‘moghapurisā’’ti vadantiyeva dhaniyaupasenattherādike viya. Sudinnassa pana tasmiṃ attabhāve maggaphalānaṃ upanissayo samucchinnoyeva, tena naṃ ‘‘moghapurisā’’ti āha.

    সমণকরণানং ধম্মানন্তি হিরোত্তপ্পাদীনং। মগ্গফলনিব্বানগ্গহণেন পটিৰেধসাসনস্স গহিতত্তা সাসনানন্তি পটিপত্তিপরিযত্তিসাসনানং গহণং ৰেদিতব্বং। ছৰিন্তি তেসং পভস্সরকরণং ছৰিং। কিং তন্তি আহ ‘‘ছায’’ন্তি, তেসং পকাসকং ওভাসন্তি অত্থো। কিং তন্তি আহ ‘‘সুন্দরভাৰ’’ন্তি। ছৰিমনুগতং অনুচ্ছৰিকং। পতিরূপন্তিআদীসুপি ‘‘তেস’’ন্তি আনেত্ৰা সম্বন্ধিতব্বং। সমণানং কম্মং সামণকং, ন সামণকং অস্সামণকং। কথং-সদ্দযোগেন ‘‘ন সক্খিস্সসী’’তি অনাগতৰচনং কতং। ‘‘নাম-সদ্দযোগেনা’’তি চ ৰদন্তি।

    Samaṇakaraṇānaṃ dhammānanti hirottappādīnaṃ. Maggaphalanibbānaggahaṇena paṭivedhasāsanassa gahitattā sāsanānanti paṭipattipariyattisāsanānaṃ gahaṇaṃ veditabbaṃ. Chavinti tesaṃ pabhassarakaraṇaṃ chaviṃ. Kiṃ tanti āha ‘‘chāya’’nti, tesaṃ pakāsakaṃ obhāsanti attho. Kiṃ tanti āha ‘‘sundarabhāva’’nti. Chavimanugataṃ anucchavikaṃ. Patirūpantiādīsupi ‘‘tesa’’nti ānetvā sambandhitabbaṃ. Samaṇānaṃ kammaṃ sāmaṇakaṃ, na sāmaṇakaṃ assāmaṇakaṃ. Kathaṃ-saddayogena ‘‘na sakkhissasī’’ti anāgatavacanaṃ kataṃ. ‘‘Nāma-saddayogenā’’ti ca vadanti.

    দযালুকেনাতি অনুকম্পায সহিতেন। পরিভাসন্তোতি গরহন্তো। নিরুত্তিনযেন আসীৰিস-সদ্দস্স অত্থং দস্সেন্তো আহ ‘‘আসু সীঘ’’ন্তিআদি। এতস্সাতি আসীৰিসস্স। আগচ্ছতীতি যো তেন দট্ঠো, তং পতিআগচ্ছতি। আসিত্তৰিসোতিপি আসীৰিসো, সকলকাযে আসিঞ্চিত্ৰা ৰিয ঠপিতৰিসো পরস্স চ সরীরে আসিঞ্চনৰিসোতি অত্থো। অসিতৰিসোতিপি আসীৰিসো। যং যঞ্হি এতেন অসিতং হোতি পরিভুত্তং, তং ৰিসমেৰ সম্পজ্জতি, তস্মা অসিতং ৰিসং এতস্সাতি অসিতৰিসোতি ৰত্তব্বে ‘‘আসীৰিসো’’তি নিরুত্তিনযেন ৰুত্তং। অসিসদিসৰিসোতিপি আসীৰিসো, অসি ৰিয তিখিণং পরস্স মম্মচ্ছেদনসমত্থং ৰিসং এতস্সাতি আসীৰিসোতি ৰুত্তং হোতি। আসীতি ৰা দাঠা ৰুচ্চতি, তত্থ সন্নিহিতৰিসোতি আসীৰিসো। সেসসপ্পেহি কণ্হসপ্পস্স মহাৰিসত্তা আসীৰিসস্সানন্তরং কণ্হসপ্পো ৰুত্তো। সপ্পমুখম্পি অঙ্গারকাসু ৰিয ভযাৰহত্তা অকুসলুপ্পত্তিযা ঠানং ন হোতীতি অকুসলকম্মতো নিৰারণাধিপ্পাযেন সীলভেদতোপি সুদ্ধসীলে ঠিতস্স মরণমেৰ ৰরতরন্তি দস্সেতুং ‘‘আসীৰিসস্স কণ্হসপ্পস্স মুখে অঙ্গজাতং পক্খিত্তং ৰর’’ন্তি ৰুত্তং। পব্বজিতেন হি কতপাপকম্মং ভগৰতো আণাতিক্কমনতো ৰত্থুমহন্ততায মহাসাৰজ্জং। কাসুন্তি আৰাটোপি ৰুচ্চতি রাসিপি।

    Dayālukenāti anukampāya sahitena. Paribhāsantoti garahanto. Niruttinayena āsīvisa-saddassa atthaṃ dassento āha ‘‘āsu sīgha’’ntiādi. Etassāti āsīvisassa. Āgacchatīti yo tena daṭṭho, taṃ patiāgacchati. Āsittavisotipi āsīviso, sakalakāye āsiñcitvā viya ṭhapitaviso parassa ca sarīre āsiñcanavisoti attho. Asitavisotipi āsīviso. Yaṃ yañhi etena asitaṃ hoti paribhuttaṃ, taṃ visameva sampajjati, tasmā asitaṃ visaṃ etassāti asitavisoti vattabbe ‘‘āsīviso’’ti niruttinayena vuttaṃ. Asisadisavisotipi āsīviso, asi viya tikhiṇaṃ parassa mammacchedanasamatthaṃ visaṃ etassāti āsīvisoti vuttaṃ hoti. Āsīti vā dāṭhā vuccati, tattha sannihitavisoti āsīviso. Sesasappehi kaṇhasappassa mahāvisattā āsīvisassānantaraṃ kaṇhasappo vutto. Sappamukhampi aṅgārakāsu viya bhayāvahattā akusaluppattiyā ṭhānaṃ na hotīti akusalakammato nivāraṇādhippāyena sīlabhedatopi suddhasīle ṭhitassa maraṇameva varataranti dassetuṃ ‘‘āsīvisassa kaṇhasappassa mukhe aṅgajātaṃ pakkhittaṃ vara’’nti vuttaṃ. Pabbajitena hi katapāpakammaṃ bhagavato āṇātikkamanato vatthumahantatāya mahāsāvajjaṃ. Kāsunti āvāṭopi vuccati rāsipi.

    ‘‘কিন্নু সন্তরমানোৰ, কাসুং খণসি সারথি।

    ‘‘Kinnu santaramānova, kāsuṃ khaṇasi sārathi;

    পুট্ঠো মে সম্ম অক্খাহি, কিং কাসুযা করিস্সসী’’তি॥ (জা॰ ২.২২.৩) –

    Puṭṭho me samma akkhāhi, kiṃ kāsuyā karissasī’’ti. (jā. 2.22.3) –

    এত্থ হি আৰাটো কাসু নাম।

    Ettha hi āvāṭo kāsu nāma.

    ‘‘অঙ্গারকাসুং অপরে ফুণন্তি, নরা রুদন্তা পরিদড্ঢগত্তা’’তি (জা॰ ২.২২.৪৬২) –

    ‘‘Aṅgārakāsuṃ apare phuṇanti, narā rudantā paridaḍḍhagattā’’ti (jā. 2.22.462) –

    এত্থ রাসি। ইধ পন উভযম্পি অধিপ্পেতন্তি আহ ‘‘অঙ্গারপুণ্ণকূপে অঙ্গাররাসিম্হি ৰা’’তি। কস্সতি খণীযতীতি কাসু, আৰাটো। কসীযতি চীযতীতি কাসু, রাসি। পদিত্তাযাতি দিপ্পমানায। সং-সদ্দো এত্থ সমন্তপরিযাযোতি আহ ‘‘সমন্ততো পজ্জলিতাযা’’তি।

    Ettha rāsi. Idha pana ubhayampi adhippetanti āha ‘‘aṅgārapuṇṇakūpe aṅgārarāsimhi vā’’ti. Kassati khaṇīyatīti kāsu, āvāṭo. Kasīyati cīyatīti kāsu, rāsi. Padittāyāti dippamānāya. Saṃ-saddo ettha samantapariyāyoti āha ‘‘samantato pajjalitāyā’’ti.

    ইদং মাতুগামস্স অঙ্গজাতে অঙ্গজাতপক্খিপনং নিদানং কারণমস্স নিরযুপপজ্জনস্সাতি ইতোনিদানং, ভাৰনপুংসকঞ্চেতং। পচ্চত্তৰচনস্স তো-আদেসো কতো, তস্স চ সমাসেপি অলোপো। তত্থ নাম ত্ৰন্তি এত্থ ত্ৰং-সদ্দো ‘‘সমাপজ্জিস্সসী’’তি ইমিনা সম্বন্ধমুপগচ্ছমানো অত্থীতি আহ ‘‘ত্ৰন্তি তংসদ্দস্স ৰেৰচন’’ন্তি। ‘‘যং তন্তি পন পাঠো যুত্তরূপো’’তি গণ্ঠিপদেসু ৰুত্তং। যং তন্তি নাযং উদ্দেসনিদ্দেসো, যথা লোকে যং ৰা তং ৰাতি অৰঞ্ঞাতৰচনং, এৰং দট্ঠব্বন্তি আহ – ‘‘যং ৰা তং ৰা হীল়িতং অৰঞ্ঞাতন্তি ৰুত্তং হোতী’’তি। নীচজনানন্তি নিহীনগুণানং সত্তানং। গামধম্মন্তি এত্থ গাম-সদ্দেন গামৰাসিনো ৰুত্তা অভেদূপচারেনাতি আহ ‘‘গামৰাসিকমনুস্সান’’ন্তি। কিলেসপগ্ঘরণকং ধম্মন্তি রাগাদিকিলেসৰিস্সন্দনকধম্মং । মেথুনধম্মো হি রাগং পগ্ঘরতি। মেথুনধম্মস্স মহাসাৰজ্জতায ওল়ারিকত্তা ৰুত্তং ‘‘অসুখুম’’ন্তি। অনিপুণন্তি তস্সেৰ ৰেৰচনং। উদকে ভৰং ওদকং। কিং তং? উদককিচ্চন্তি আহ – ‘‘উদককিচ্চং অন্তিকং অৰসানং অস্সা’’তি। সমাপজ্জিস্সতীতি অনাগতৰচনং নাম-সদ্দযোগেন কতন্তি আহ – ‘‘সমাপজ্জিস্সতীতি…পে॰… নাম-সদ্দেন যোজেতব্ব’’ন্তি। লোকে মেথুনধম্মস্স আদিকত্তা কোচি পঠমকপ্পিকো, ন পনাযন্তি আহ – ‘‘সাসনং সন্ধায ৰদতী’’তি। বহূনন্তি পুগ্গলাপেক্খং, ন পন অকুসলাপেক্খন্তি আহ ‘‘বহূনং পুগ্গলান’’ন্তি।

    Idaṃ mātugāmassa aṅgajāte aṅgajātapakkhipanaṃ nidānaṃ kāraṇamassa nirayupapajjanassāti itonidānaṃ, bhāvanapuṃsakañcetaṃ. Paccattavacanassa to-ādeso kato, tassa ca samāsepi alopo. Tattha nāma tvanti ettha tvaṃ-saddo ‘‘samāpajjissasī’’ti iminā sambandhamupagacchamāno atthīti āha ‘‘tvanti taṃsaddassa vevacana’’nti. ‘‘Yaṃ tanti pana pāṭho yuttarūpo’’ti gaṇṭhipadesu vuttaṃ. Yaṃ tanti nāyaṃ uddesaniddeso, yathā loke yaṃ vā taṃ vāti avaññātavacanaṃ, evaṃ daṭṭhabbanti āha – ‘‘yaṃ vā taṃ vā hīḷitaṃ avaññātanti vuttaṃ hotī’’ti. Nīcajanānanti nihīnaguṇānaṃ sattānaṃ. Gāmadhammanti ettha gāma-saddena gāmavāsino vuttā abhedūpacārenāti āha ‘‘gāmavāsikamanussāna’’nti. Kilesapaggharaṇakaṃ dhammanti rāgādikilesavissandanakadhammaṃ . Methunadhammo hi rāgaṃ paggharati. Methunadhammassa mahāsāvajjatāya oḷārikattā vuttaṃ ‘‘asukhuma’’nti. Anipuṇanti tasseva vevacanaṃ. Udake bhavaṃ odakaṃ. Kiṃ taṃ? Udakakiccanti āha – ‘‘udakakiccaṃ antikaṃ avasānaṃ assā’’ti. Samāpajjissatīti anāgatavacanaṃ nāma-saddayogena katanti āha – ‘‘samāpajjissatīti…pe… nāma-saddenayojetabba’’nti. Loke methunadhammassa ādikattā koci paṭhamakappiko, na panāyanti āha – ‘‘sāsanaṃ sandhāya vadatī’’ti. Bahūnanti puggalāpekkhaṃ, na pana akusalāpekkhanti āha ‘‘bahūnaṃ puggalāna’’nti.

    যং অসংৰরং পটিচ্চ দুব্ভরতাদুপ্পোসতাদি হোতি, সো অসংৰরো দুব্ভরতাদি-সদ্দেন ৰুত্তো কারণে ফলূপচারেনাতি আহ – ‘‘দুব্ভরতাদীনং ৰত্থুভূতস্স অসংৰরস্সা’’তি। ৰত্থুভূতস্সাতি কারণভূতস্স। ৰসতি এত্থ ফলং তদাযত্তৰুত্তিতাযাতি হি কারণং ৰত্থু। অত্তাতি চিত্তং সরীরঞ্চ, চিত্তমেৰ ৰা। দুব্ভরতঞ্চেৰ দুপ্পোসতঞ্চ আপজ্জতীতি অত্তনা পচ্চযদাযকেহি চ দুক্খেন ভরিতব্বতং পোসেতব্বতঞ্চ আপজ্জতি। অসংৰরে ঠিতো হি একচ্চো অত্তনোপি দুব্ভরো হোতি দুপ্পোসো, একচ্চো উপট্ঠাকানম্পি। কথং? যো হি অম্বিলাদীনি লদ্ধা অনম্বিলাদীনি পরিযেসতি, অঞ্ঞস্স ঘরে লদ্ধং অঞ্ঞস্স ঘরে ছড্ডেন্তো সব্বং গামং চরিত্ৰা রিত্তপত্তোৰ ৰিহারং পৰিসিত্ৰা নিপজ্জতি, অযং অত্তনো দুব্ভরো। যো পন সালিমংসোদনাদীনং পত্তে পূরেত্ৰা দিন্নেপি দুম্মুখভাৰং অনত্তমনভাৰমেৰ দস্সেতি, তেসং ৰা সম্মুখাৰ তং পিণ্ডপাতং ‘‘কিং তুম্হেহি দিন্ন’’ন্তি অপসাদেন্তো সামণেরগহট্ঠাদীনং দেতি, অযং উপট্ঠাকানং দুব্ভরো। এতং দিস্ৰা মনুস্সা দূরতোৰ পরিৰজ্জেন্তি ‘‘দুব্ভরো ভিক্খু ন সক্কা পোসেতু’’ন্তি।

    Yaṃ asaṃvaraṃ paṭicca dubbharatādupposatādi hoti, so asaṃvaro dubbharatādi-saddena vutto kāraṇe phalūpacārenāti āha – ‘‘dubbharatādīnaṃ vatthubhūtassa asaṃvarassā’’ti. Vatthubhūtassāti kāraṇabhūtassa. Vasati ettha phalaṃ tadāyattavuttitāyāti hi kāraṇaṃ vatthu. Attāti cittaṃ sarīrañca, cittameva vā. Dubbharatañceva dupposatañca āpajjatīti attanā paccayadāyakehi ca dukkhena bharitabbataṃ posetabbatañca āpajjati. Asaṃvare ṭhito hi ekacco attanopi dubbharo hoti dupposo, ekacco upaṭṭhākānampi. Kathaṃ? Yo hi ambilādīni laddhā anambilādīni pariyesati, aññassa ghare laddhaṃ aññassa ghare chaḍḍento sabbaṃ gāmaṃ caritvā rittapattova vihāraṃ pavisitvā nipajjati, ayaṃ attano dubbharo. Yo pana sālimaṃsodanādīnaṃ patte pūretvā dinnepi dummukhabhāvaṃ anattamanabhāvameva dasseti, tesaṃ vā sammukhāva taṃ piṇḍapātaṃ ‘‘kiṃ tumhehi dinna’’nti apasādento sāmaṇeragahaṭṭhādīnaṃ deti, ayaṃ upaṭṭhākānaṃ dubbharo. Etaṃ disvā manussā dūratova parivajjenti ‘‘dubbharo bhikkhu na sakkā posetu’’nti.

    মহিচ্ছতন্তি এত্থ মহন্তানি ৰত্থূনি ইচ্ছতি, মহতী ৰা পনস্স ইচ্ছাতি মহিচ্ছো, তস্স ভাৰো মহিচ্ছতা, সন্তগুণৰিভাৰনতা পটিগ্গহণে অমত্তঞ্ঞুতা চ। মহিচ্ছো হি ইচ্ছাচারে ঠত্ৰা অত্তনি ৰিজ্জমানসীলধুতধম্মাদিগুণে ৰিভাৰেতি, তাদিসস্স পটিগ্গহণে অমত্তঞ্ঞুতাপি হোতি। যং সন্ধায ৰদন্তি ‘‘সন্তগুণসম্ভাৰনতা পটিগ্গহণে চ অমত্তঞ্ঞুতা, এতং মহিচ্ছতালক্খণ’’ন্তি। সা পনেসা মহিচ্ছতা ‘‘ইধেকচ্চো সদ্ধো সমানো ‘সদ্ধোতি মং জনো জানাতূ’তি ইচ্ছতি, সীলৰা সমানো ‘সীলৰাতি মং জনো জানাতূ’তি’’ ইমিনা নযেন আগতাযেৰ, তায সমন্নাগতো পুগ্গলো দুস্সন্তপ্পিযো হোতি, ৰিজাতমাতাপিস্স চিত্তং গহেতুং ন সক্কোতি। তেনেতং ৰুচ্চতি –

    Mahicchatanti ettha mahantāni vatthūni icchati, mahatī vā panassa icchāti mahiccho, tassa bhāvo mahicchatā, santaguṇavibhāvanatā paṭiggahaṇe amattaññutā ca. Mahiccho hi icchācāre ṭhatvā attani vijjamānasīladhutadhammādiguṇe vibhāveti, tādisassa paṭiggahaṇe amattaññutāpi hoti. Yaṃ sandhāya vadanti ‘‘santaguṇasambhāvanatā paṭiggahaṇe ca amattaññutā, etaṃ mahicchatālakkhaṇa’’nti. Sā panesā mahicchatā ‘‘idhekacco saddho samāno ‘saddhoti maṃ jano jānātū’ti icchati, sīlavā samāno ‘sīlavāti maṃ jano jānātū’ti’’ iminā nayena āgatāyeva, tāya samannāgato puggalo dussantappiyo hoti, vijātamātāpissa cittaṃ gahetuṃ na sakkoti. Tenetaṃ vuccati –

    ‘‘অগ্গিক্খন্ধো সমুদ্দো চ, মহিচ্ছো চাপি পুগ্গলো।

    ‘‘Aggikkhandho samuddo ca, mahiccho cāpi puggalo;

    সকটেন পচ্চযং দেন্তু, তযোপেতে অতপ্পিযা’’তি॥ (ম॰ নি॰ অট্ঠ॰ ১.২৫২; অ॰ নি॰ অট্ঠ॰ ১.১.৬৩; ৰিভ॰ অট্ঠ॰ ৮৫০; উদা॰ অট্ঠ॰ ৩১; মহানি॰ অট্ঠ॰ ৮৫)।

    Sakaṭena paccayaṃ dentu, tayopete atappiyā’’ti. (ma. ni. aṭṭha. 1.252; a. ni. aṭṭha. 1.1.63; vibha. aṭṭha. 850; udā. aṭṭha. 31; mahāni. aṭṭha. 85);

    সত্তেহি কিলেসেহি চ সঙ্গণনং সমোধানং সঙ্গণিকাতি আহ – ‘‘গণসঙ্গণিকায চেৰ কিলেসসঙ্গণিকায চা’’তি। কোসজ্জানুগতো চ হোতীতি কুসীতভাৰেন অনুগতো হোতি, কুসীতস্স ভাৰো কোসজ্জং। অট্ঠকুসীতৰত্থুপারিপূরিযাতি এত্থ কুচ্ছিতং সীদতীতি কুসীতো দ-কারস্স ত-কারং কত্ৰা। যস্স ধম্মস্স ৰসেন পুগ্গলো ‘‘কুসীতো’’তি ৰুচ্চতি, সো কুসীতভাৰো ইধ কুসীত-সদ্দেন ৰুত্তো। ৰিনাপি হি ভাৰজোতনসদ্দং ভাৰত্থো ৰিঞ্ঞাযতি যথা ‘‘পটস্স সুক্ক’’ন্তি, তস্মা কুসীতভাৰৰত্থূনীতি অত্থো, কোসজ্জকারণানীতি ৰুত্তং হোতি। তথা হি –

    Sattehi kilesehi ca saṅgaṇanaṃ samodhānaṃ saṅgaṇikāti āha – ‘‘gaṇasaṅgaṇikāya ceva kilesasaṅgaṇikāya cā’’ti. Kosajjānugato ca hotīti kusītabhāvena anugato hoti, kusītassa bhāvo kosajjaṃ. Aṭṭhakusītavatthupāripūriyāti ettha kucchitaṃ sīdatīti kusīto da-kārassa ta-kāraṃ katvā. Yassa dhammassa vasena puggalo ‘‘kusīto’’ti vuccati, so kusītabhāvo idha kusīta-saddena vutto. Vināpi hi bhāvajotanasaddaṃ bhāvattho viññāyati yathā ‘‘paṭassa sukka’’nti, tasmā kusītabhāvavatthūnīti attho, kosajjakāraṇānīti vuttaṃ hoti. Tathā hi –

    ‘‘কম্মং খো মে কত্তব্বং ভৰিস্সতি, কম্মং খো পন মে করোন্তস্স কাযো কিলমিস্সতি, হন্দাহং নিপজ্জামীতি সো নিপজ্জতি, ন ৰীরিযং আরভতি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায, ইদং পঠমং কুসীতৰত্থু। অহং খো কম্মং অকাসিং, কম্মং খো পন মে করোন্তস্স কাযো কিলন্তো, হন্দাহং নিপজ্জামি…পে॰… মগ্গো খো মে গন্তব্বো ভৰিস্সতি, মগ্গং খো পন মে গচ্ছন্তস্স কাযো কিলমিস্সতি, হন্দাহং নিপজ্জামি…পে॰… অহং খো মগ্গং অগমাসিং, মগ্গং খো পন মে গচ্ছন্তস্স কাযো কিলন্তো, হন্দাহং নিপজ্জামি…পে॰… অহং খো গামং ৰা নিগমং ৰা পিণ্ডায চরন্তো নালত্থং লূখস্স ৰা পণীতস্স ৰা ভোজনস্স যাৰদত্থং পারিপূরিং, তস্স মে কাযো কিলন্তো অকম্মঞ্ঞো, হন্দাহং নিপজ্জামি…পে॰… অহং খো গামং ৰা নিগমং ৰা পিণ্ডায চরন্তো অলত্থং লূখস্স ৰা পণীতস্স ৰা ভোজনস্স যাৰদত্থং পারিপূরিং, তস্স মে কাযো গরুকো অকম্মঞ্ঞো মাসাচিতং মঞ্ঞে, হন্দাহং নিপজ্জামি…পে॰… উপ্পন্নো খো মে অযং অপ্পমত্তকো আবাধো, অত্থি কপ্পো নিপজ্জিতুং, হন্দাহং নিপজ্জামি…পে॰… অহং খো গিলানা ৰুট্ঠিতো অচিরৰুট্ঠিতো গেলঞ্ঞা, তস্স মে কাযো দুব্বলো অকম্মঞ্ঞো, হন্দাহং নিপজ্জামীতি সো নিপজ্জতি, ন ৰীরিযং আরভতি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায। ইদং অট্ঠমং কুসীতৰত্থু’’ন্তি (দী॰ নি॰ ৩.৩৩৪; অ॰ নি॰ ৮.৮০) –

    ‘‘Kammaṃ kho me kattabbaṃ bhavissati, kammaṃ kho pana me karontassa kāyo kilamissati, handāhaṃ nipajjāmīti so nipajjati, na vīriyaṃ ārabhati appattassa pattiyā anadhigatassa adhigamāya asacchikatassa sacchikiriyāya, idaṃ paṭhamaṃ kusītavatthu. Ahaṃ kho kammaṃ akāsiṃ, kammaṃ kho pana me karontassa kāyo kilanto, handāhaṃ nipajjāmi…pe… maggo kho me gantabbo bhavissati, maggaṃ kho pana me gacchantassa kāyo kilamissati, handāhaṃ nipajjāmi…pe… ahaṃ kho maggaṃ agamāsiṃ, maggaṃ kho pana me gacchantassa kāyo kilanto, handāhaṃ nipajjāmi…pe… ahaṃ kho gāmaṃ vā nigamaṃ vā piṇḍāya caranto nālatthaṃ lūkhassa vā paṇītassa vā bhojanassa yāvadatthaṃ pāripūriṃ, tassa me kāyo kilanto akammañño, handāhaṃ nipajjāmi…pe… ahaṃ kho gāmaṃ vā nigamaṃ vā piṇḍāya caranto alatthaṃ lūkhassa vā paṇītassa vā bhojanassa yāvadatthaṃ pāripūriṃ, tassa me kāyo garuko akammañño māsācitaṃ maññe, handāhaṃ nipajjāmi…pe… uppanno kho me ayaṃ appamattako ābādho, atthi kappo nipajjituṃ, handāhaṃ nipajjāmi…pe… ahaṃ kho gilānā vuṭṭhito aciravuṭṭhito gelaññā, tassa me kāyo dubbalo akammañño, handāhaṃ nipajjāmīti so nipajjati, na vīriyaṃ ārabhati appattassa pattiyā anadhigatassa adhigamāya asacchikatassa sacchikiriyāya. Idaṃ aṭṭhamaṃ kusītavatthu’’nti (dī. ni. 3.334; a. ni. 8.80) –

    এৰমাগতানি ‘‘হন্দাহং নিপজ্জামী’’তি এৰং পৰত্তওসীদনানি উপরূপরি কোসজ্জকারণত্তা অট্ঠ কুসীতৰত্থূনি নাম, তেসং পারিপূরিযা সংৰত্ততীতি অত্থো।

    Evamāgatāni ‘‘handāhaṃ nipajjāmī’’ti evaṃ pavattaosīdanāni uparūpari kosajjakāraṇattā aṭṭha kusītavatthūni nāma, tesaṃ pāripūriyā saṃvattatīti attho.

    সুভরো হোতি সুপোসোতি অত্তনো উপট্ঠাকেহি চ সুখেন ভরিতব্বো পোসেতব্বোতি অত্থো। সংৰরে ঠিতো হি একচ্চো অত্তনোপি সুভরো হোতি সুপোসো, একচ্চো উপট্ঠাকানম্পি। কথং? যো হি যং কিঞ্চি লূখং ৰা পণীতং ৰা লদ্ধা তুট্ঠচিত্তোৰ ভুঞ্জিত্ৰা ৰিহারং গন্ত্ৰা অত্তনো কম্মং করোতি, অযং অত্তনো সুভরো। যো পন পরেসম্পি অপ্পং ৰা বহুং ৰা লূখং ৰা পণীতং ৰা দানং অহীল়েত্ৰা অত্তমনো ৰিপ্পসন্নমুখো হুত্ৰা এতেসং সম্মুখাৰ পরিভুঞ্জিত্ৰা যাতি, অযং উপট্ঠাকানং সুভরো। এতং দিস্ৰা মনুস্সা অতিৰিয ৰিস্সত্থা হোন্তি, ‘‘অম্হাকং ভদন্তো সুভরো, থোকথোকেনপি তুস্সতি, মযমেৰ নং পোসেস্সামা’’তি পটিঞ্ঞং কত্ৰা পোসেন্তি। অপ্পিচ্ছতন্তি ইচ্ছাৰিরহিতত্তং। এত্থ হি ব্যঞ্জনং সাৰসেসং ৰিয, অত্থো পন নিরৰসেসো। অপ্প-সদ্দো হেত্থ অভাৰত্থোতি সক্কা ৰিঞ্ঞাতুং ‘‘অপ্পাবাধতঞ্চ সঞ্জানামী’’তিআদীসু (ম॰ নি॰ ১.২২৫) ৰিয। তেনেৰাহ ‘‘নিত্তণ্হভাৰ’’ন্তি।

    Subharo hoti suposoti attano upaṭṭhākehi ca sukhena bharitabbo posetabboti attho. Saṃvare ṭhito hi ekacco attanopi subharo hoti suposo, ekacco upaṭṭhākānampi. Kathaṃ? Yo hi yaṃ kiñci lūkhaṃ vā paṇītaṃ vā laddhā tuṭṭhacittova bhuñjitvā vihāraṃ gantvā attano kammaṃ karoti, ayaṃ attano subharo. Yo pana paresampi appaṃ vā bahuṃ vā lūkhaṃ vā paṇītaṃ vā dānaṃ ahīḷetvā attamano vippasannamukho hutvā etesaṃ sammukhāva paribhuñjitvā yāti, ayaṃ upaṭṭhākānaṃ subharo. Etaṃ disvā manussā ativiya vissatthā honti, ‘‘amhākaṃ bhadanto subharo, thokathokenapi tussati, mayameva naṃ posessāmā’’ti paṭiññaṃ katvā posenti. Appicchatanti icchāvirahitattaṃ. Ettha hi byañjanaṃ sāvasesaṃ viya, attho pana niravaseso. Appa-saddo hettha abhāvatthoti sakkā viññātuṃ ‘‘appābādhatañca sañjānāmī’’tiādīsu (ma. ni. 1.225) viya. Tenevāha ‘‘nittaṇhabhāva’’nti.

    তিপ্পভেদায সন্তুট্ঠিযাতি যথালাভাদিসন্তোসসামঞ্ঞেন ৰুত্তং, চতূসু পন পচ্চযেসু তযো তযো সন্তোসাতি দ্ৰাদসৰিধো হোতি সন্তোসো। কথং? চীৰরে যথালাভসন্তোসো যথাবলসন্তোসো যথাসারুপ্পসন্তোসোতি তিৰিধো হোতি সন্তোসো। এৰং পিণ্ডপাতাদীসু। তস্সাযং পভেদসংৰণ্ণনা (ম॰ নি॰ অট্ঠ॰ ১.২৫২; সং॰ নি॰ অট্ঠ॰ ২.২.১৪৪; অ॰ নি॰ অট্ঠ॰ ১.১.৬৫) – ইধ ভিক্খু চীৰরং লভতি সুন্দরং ৰা অসুন্দরং ৰা, সো তেনেৰ যাপেতি অঞ্ঞং ন পত্থেতি, লভন্তোপি ন গণ্হাতি। অযমস্স চীৰরে যথালাভসন্তোসো। অথ পন পকতিদুব্বলো ৰা হোতি আবাধজরাভিভূতো ৰা, গরুচীৰরং পারুপন্তো কিলমতি, সো সভাগেন ভিক্খুনা সদ্ধিং তং পরিৰত্তেত্ৰা লহুকেন যাপেন্তোপি সন্তুট্ঠোযেৰ হোতি। অযমস্স চীৰরে যথাবলসন্তোসো। পকতিদুব্বলাদীনঞ্হি গরুচীৰরানি ন ফাসুভাৰাৰহানি সরীরখেদাৰহানি চ হোন্তীতি পযোজনৰসেন অনত্রিচ্ছতাদিৰসেন তানি পরিৰত্তেত্ৰা লহুকচীৰরপরিভোগো ন সন্তোসৰিরোধীতি। অপরো পণীতপচ্চযলাভী হোতি, সো পট্টচীৰরাদীনং অঞ্ঞতরং মহগ্ঘচীৰরং বহূনি ৰা পন চীৰরানি লভিত্ৰা ‘‘ইদং থেরানং চিরপব্বজিতানং, ইদং বহুস্সুতানং অনুরূপং, ইদং গিলানানং, ইদং অপ্পলাভানং হোতূ’’তি দত্ৰা তেসং পুরাণচীৰরং ৰা সঙ্কারকূটাদিতো ৰা নন্তকানি উচ্চিনিত্ৰা তেহি সঙ্ঘাটিং কত্ৰা ধারেন্তোপি সন্তুট্ঠোৰ হোতি। অযমস্স চীৰরে যথাসারুপ্পসন্তোসো। মহগ্ঘঞ্হি চীৰরং বহূনি ৰা চীৰরানি লভিত্ৰাপি তানি ৰিস্সজ্জেত্ৰা তদঞ্ঞস্স গহণং যথাসারুপ্পনযে ঠিতত্তা ন সন্তোসৰিরোধীতি।

    Tippabhedāya santuṭṭhiyāti yathālābhādisantosasāmaññena vuttaṃ, catūsu pana paccayesu tayo tayo santosāti dvādasavidho hoti santoso. Kathaṃ? Cīvare yathālābhasantoso yathābalasantoso yathāsāruppasantosoti tividho hoti santoso. Evaṃ piṇḍapātādīsu. Tassāyaṃ pabhedasaṃvaṇṇanā (ma. ni. aṭṭha. 1.252; saṃ. ni. aṭṭha. 2.2.144; a. ni. aṭṭha. 1.1.65) – idha bhikkhu cīvaraṃ labhati sundaraṃ vā asundaraṃ vā, so teneva yāpeti aññaṃ na pattheti, labhantopi na gaṇhāti. Ayamassa cīvare yathālābhasantoso. Atha pana pakatidubbalo vā hoti ābādhajarābhibhūto vā, garucīvaraṃ pārupanto kilamati, so sabhāgena bhikkhunā saddhiṃ taṃ parivattetvā lahukena yāpentopi santuṭṭhoyeva hoti. Ayamassa cīvare yathābalasantoso. Pakatidubbalādīnañhi garucīvarāni na phāsubhāvāvahāni sarīrakhedāvahāni ca hontīti payojanavasena anatricchatādivasena tāni parivattetvā lahukacīvaraparibhogo na santosavirodhīti. Aparo paṇītapaccayalābhī hoti, so paṭṭacīvarādīnaṃ aññataraṃ mahagghacīvaraṃ bahūni vā pana cīvarāni labhitvā ‘‘idaṃ therānaṃ cirapabbajitānaṃ, idaṃ bahussutānaṃ anurūpaṃ, idaṃ gilānānaṃ, idaṃ appalābhānaṃ hotū’’ti datvā tesaṃ purāṇacīvaraṃ vā saṅkārakūṭādito vā nantakāni uccinitvā tehi saṅghāṭiṃ katvā dhārentopi santuṭṭhova hoti. Ayamassa cīvare yathāsāruppasantoso. Mahagghañhi cīvaraṃ bahūni vā cīvarāni labhitvāpi tāni vissajjetvā tadaññassa gahaṇaṃ yathāsāruppanaye ṭhitattā na santosavirodhīti.

    ইধ পন ভিক্খু পিণ্ডপাতং লভতি লূখং ৰা পণীতং ৰা, সো তেনেৰ যাপেতি অঞ্ঞং ন পত্থেতি, লভন্তোপি ন গণ্হাতি। অযমস্স পিণ্ডপাতে যথালাভসন্তোসো। যো পন অত্তনো পকতিৰিরুদ্ধং ৰা ব্যাধিৰিরুদ্ধং ৰা পিণ্ডপাতং লভতি, যেনস্স পরিভুত্তেন অফাসু হোতি, সো সভাগস্স ভিক্খুনো তং দত্ৰা তস্স হত্থতো সপ্পাযভোজনং ভুঞ্জিত্ৰা সমণধম্মং করোন্তোপি সন্তুট্ঠোৰ হোতি। অযমস্স পিণ্ডপাতে যথাবলসন্তোসো। অপরো বহুং পণীতং পিণ্ডপাতং লভতি, সো তং চীৰরং ৰিয চিরপব্বজিতবহুস্সুতঅপ্পলাভগিলানানং দত্ৰা তেসং ৰা সেসকং পিণ্ডায ৰা চরিত্ৰা মিস্সকাহারং ভুঞ্জন্তোপি সন্তুট্ঠোৰ হোতি। অযমস্স পিণ্ডপাতে যথাসারুপ্পসন্তোসো।

    Idha pana bhikkhu piṇḍapātaṃ labhati lūkhaṃ vā paṇītaṃ vā, so teneva yāpeti aññaṃ na pattheti, labhantopi na gaṇhāti. Ayamassa piṇḍapāte yathālābhasantoso. Yo pana attano pakativiruddhaṃ vā byādhiviruddhaṃ vā piṇḍapātaṃ labhati, yenassa paribhuttena aphāsu hoti, so sabhāgassa bhikkhuno taṃ datvā tassa hatthato sappāyabhojanaṃ bhuñjitvā samaṇadhammaṃ karontopi santuṭṭhova hoti. Ayamassa piṇḍapāte yathābalasantoso. Aparo bahuṃ paṇītaṃ piṇḍapātaṃ labhati, so taṃ cīvaraṃ viya cirapabbajitabahussutaappalābhagilānānaṃ datvā tesaṃ vā sesakaṃ piṇḍāya vā caritvā missakāhāraṃ bhuñjantopi santuṭṭhova hoti. Ayamassa piṇḍapāte yathāsāruppasantoso.

    ইধ পন ভিক্খু সেনাসনং লভতি মনাপং ৰা অমনাপং ৰা, সো তেন নেৰ সোমনস্সং, ন পটিঘং উপ্পাদেতি, অন্তমসো তিণসন্থরকেনপি যথালদ্ধেনেৰ তুস্সতি। অযমস্স সেনাসনে যথালাভসন্তোসো। যো পন অত্তনো পকতিৰিরুদ্ধং ৰা ব্যাধিৰিরুদ্ধং ৰা সেনাসনং লভতি, যত্থস্স ৰসতো অফাসু হোতি, সো তং সভাগস্স ভিক্খুনো দত্ৰা তস্স সন্তকে সপ্পাযসেনাসনে ৰসন্তোপি সন্তুট্ঠোৰ হোতি। অযমস্স সেনাসনে যথাবলসন্তোসো। অপরো মহাপুঞ্ঞো লেণমণ্ডপকূটাগারাদীনি বহূনি পণীতসেনাসনানি লভতি, সো তানি চীৰরাদীনি ৰিয চিরপব্বজিতবহুস্সুতঅপ্পলাভগিলানানং দত্ৰা যত্থ কত্থচি ৰসন্তোপি সন্তুট্ঠোৰ হোতি। অযমস্স সেনাসনে যথাসারুপ্পসন্তোসো। যোপি ‘‘উত্তমসেনাসনং নাম পমাদট্ঠানং, তত্থ নিসিন্নস্স থিনমিদ্ধং ওক্কমতি, নিদ্দাভিভূতস্স পুন পটিবুজ্ঝতো পাপৰিতক্কা পাতুভৰন্তী’’তি পটিসঞ্চিক্খিত্ৰা তাদিসং সেনাসনং পত্তম্পি ন সম্পটিচ্ছতি, সো তং পটিক্খিপিত্ৰা অব্ভোকাসরুক্খমূলাদীসু ৰসন্তোপি সন্তুট্ঠোৰ হোতি। অযম্পিস্স সেনাসনে যথাসারুপ্পসন্তোসো।

    Idha pana bhikkhu senāsanaṃ labhati manāpaṃ vā amanāpaṃ vā, so tena neva somanassaṃ, na paṭighaṃ uppādeti, antamaso tiṇasantharakenapi yathāladdheneva tussati. Ayamassa senāsane yathālābhasantoso. Yo pana attano pakativiruddhaṃ vā byādhiviruddhaṃ vā senāsanaṃ labhati, yatthassa vasato aphāsu hoti, so taṃ sabhāgassa bhikkhuno datvā tassa santake sappāyasenāsane vasantopi santuṭṭhova hoti. Ayamassa senāsane yathābalasantoso. Aparo mahāpuñño leṇamaṇḍapakūṭāgārādīni bahūni paṇītasenāsanāni labhati, so tāni cīvarādīni viya cirapabbajitabahussutaappalābhagilānānaṃ datvā yattha katthaci vasantopi santuṭṭhova hoti. Ayamassa senāsane yathāsāruppasantoso. Yopi ‘‘uttamasenāsanaṃ nāma pamādaṭṭhānaṃ, tattha nisinnassa thinamiddhaṃ okkamati, niddābhibhūtassa puna paṭibujjhato pāpavitakkā pātubhavantī’’ti paṭisañcikkhitvā tādisaṃ senāsanaṃ pattampi na sampaṭicchati, so taṃ paṭikkhipitvā abbhokāsarukkhamūlādīsu vasantopi santuṭṭhova hoti. Ayampissa senāsane yathāsāruppasantoso.

    ইধ পন ভিক্খু ভেসজ্জং লভতি লূখং ৰা পণীতং ৰা, সো যং লভতি, তেনেৰ তুস্সতি অঞ্ঞং ন পত্থেতি, লভন্তোপি ন গণ্হাতি। অযমস্স গিলানপচ্চযে যথালাভসন্তোসো। যো পন তেলেন অত্থিকো ফাণিতং লভতি, সো তং সভাগস্স ভিক্খুনো দত্ৰা তস্স হত্থতো তেলং গহেত্ৰা অঞ্ঞদেৰ ৰা পরিযেসিত্ৰা ভেসজ্জং করোন্তোপি সন্তুট্ঠোৰ হোতি। অযমস্স গিলানপচ্চযে যথাবলসন্তোসো। অপরো মহাপুঞ্ঞো বহুং তেলমধুফাণিতাদিপণীতভেসজ্জং লভতি, সো তং চীৰরং ৰিয চিরপব্বজিতবহুস্সুতঅপ্পলাভগিলানানং দত্ৰা তেসং আভতেন যেন কেনচি যাপেন্তোপি সন্তুট্ঠোৰ হোতি। যো পন একস্মিং ভাজনে মুত্তহরীতকং ঠপেত্ৰা একস্মিং চতুমধুরং ‘‘গণ্হ, ভন্তে, যদিচ্ছসী’’তি ৰুচ্চমানো সচস্স তেসু অঞ্ঞতরেনপি রোগো ৰূপসম্মতি, অথ ‘‘মুত্তহরীতকং নাম বুদ্ধাদীহি ৰণ্ণিত’’ন্তি চতুমধুরং পটিক্খিপিত্ৰা মুত্তহরীতকেনেৰ ভেসজ্জং করোন্তো পরমসন্তুট্ঠোৰ হোতি। অযমস্স গিলানপচ্চযে যথাসারুপ্পসন্তোসো। এৰং যথালাভাদিৰসেন তিপ্পভেদো সন্তোসো চতুন্নং পচ্চযানং ৰসেন দ্ৰাদসৰিধো হোতীতি ৰেদিতব্বো।

    Idha pana bhikkhu bhesajjaṃ labhati lūkhaṃ vā paṇītaṃ vā, so yaṃ labhati, teneva tussati aññaṃ na pattheti, labhantopi na gaṇhāti. Ayamassa gilānapaccaye yathālābhasantoso. Yo pana telena atthiko phāṇitaṃ labhati, so taṃ sabhāgassa bhikkhuno datvā tassa hatthato telaṃ gahetvā aññadeva vā pariyesitvā bhesajjaṃ karontopi santuṭṭhova hoti. Ayamassa gilānapaccaye yathābalasantoso. Aparo mahāpuñño bahuṃ telamadhuphāṇitādipaṇītabhesajjaṃ labhati, so taṃ cīvaraṃ viya cirapabbajitabahussutaappalābhagilānānaṃ datvā tesaṃ ābhatena yena kenaci yāpentopi santuṭṭhova hoti. Yo pana ekasmiṃ bhājane muttaharītakaṃ ṭhapetvā ekasmiṃ catumadhuraṃ ‘‘gaṇha, bhante, yadicchasī’’ti vuccamāno sacassa tesu aññatarenapi rogo vūpasammati, atha ‘‘muttaharītakaṃ nāma buddhādīhi vaṇṇita’’nti catumadhuraṃ paṭikkhipitvā muttaharītakeneva bhesajjaṃ karonto paramasantuṭṭhova hoti. Ayamassa gilānapaccaye yathāsāruppasantoso. Evaṃ yathālābhādivasena tippabhedo santoso catunnaṃ paccayānaṃ vasena dvādasavidho hotīti veditabbo.

    কামৰিতক্কব্যাপাদৰিতক্কৰিহিংসাৰিতক্কানং ৰসেন অকুসলৰিতক্কত্তযং। নেক্খম্মৰিতক্কঅব্যাপাদৰিতক্কঅৰিহিং সাৰিতক্কানং ৰসেন কুসলৰিতক্কত্তযং। সব্বকিলেসাপচযভূতায ৰিৰট্টাযাতি রাগাদিসব্বকিলেসানং অপচযহেতুভূতায নিব্বানধাতুযা। অট্ঠৰীরিযারম্ভৰত্থুপারিপূরিযাতি অট্ঠন্নং ৰীরিযারম্ভকারণানং পারিপূরিযা। যথা তথা পঠমং পৰত্তঅব্ভুস্সহনঞ্হি উপরি ৰীরিযারম্ভস্স কারণং হোতি। অনুরূপপচ্চৰেক্খণাসহিতানি হি অব্ভুস্সহনানি তম্মূলকানি ৰা পচ্চৰেক্খণানি অট্ঠ ৰীরিযারম্ভৰত্থূনীতি ৰেদিতব্বানি। তথা হি –

    Kāmavitakkabyāpādavitakkavihiṃsāvitakkānaṃ vasena akusalavitakkattayaṃ. Nekkhammavitakkaabyāpādavitakkaavihiṃ sāvitakkānaṃ vasena kusalavitakkattayaṃ. Sabbakilesāpacayabhūtāya vivaṭṭāyāti rāgādisabbakilesānaṃ apacayahetubhūtāya nibbānadhātuyā. Aṭṭhavīriyārambhavatthupāripūriyāti aṭṭhannaṃ vīriyārambhakāraṇānaṃ pāripūriyā. Yathā tathā paṭhamaṃ pavattaabbhussahanañhi upari vīriyārambhassa kāraṇaṃ hoti. Anurūpapaccavekkhaṇāsahitāni hi abbhussahanāni tammūlakāni vā paccavekkhaṇāni aṭṭha vīriyārambhavatthūnīti veditabbāni. Tathā hi –

    ‘‘কম্মং খো মে কত্তব্বং ভৰিস্সতি, কম্মং খো পন মে করোন্তেন ন সুকরং বুদ্ধানং সাসনং মনসি কাতুং, হন্দাহং ৰীরিযং আরভামি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায। অহং খো কম্মং অকাসিং, কম্মং খো পনাহং করোন্তো নাসক্খিং বুদ্ধানং সাসনং মনসি কাতুং, হন্দাহং ৰীরিযং আরভামি…পে॰… মগ্গো খো মে গন্তব্বো ভৰিস্সতি, মগ্গং খো পন মে গচ্ছন্তেন ন সুকরং বুদ্ধানং সাসনং মনসি কাতুং, হন্দাহং ৰীরিযং আরভামি…পে॰… অহং খো মগ্গং অগমাসিং, মগ্গং খো পনাহং গচ্ছন্তো নাসক্খিং বুদ্ধানং সাসনং মনসি কাতুং, হন্দাহং ৰীরিযং আরভামি…পে॰… অহং খো গামং ৰা নিগমং ৰা পিণ্ডায চরন্তো নালত্থং লূখস্স ৰা পণীতস্স ৰা ভোজনস্স যাৰদত্থং পারিপূরিং, তস্স মে কাযো লহুকো কম্মঞ্ঞো, হন্দাহং ৰীরিযং আরভামি…পে॰… অহং খো গামং ৰা নিগমং ৰা পিণ্ডায চরন্তো অলত্থং লূখস্স ৰা পণীতস্স ৰা ভোজনস্স যাৰদত্থং পারিপূরিং, তস্স মে কাযো বলৰা কম্মঞ্ঞো, হন্দাহং ৰীরিযং আরভামি…পে॰… উপ্পন্নো খো মে অযং অপ্পমত্তকো আবাধো, ঠানং খো পনেতং ৰিজ্জতি, যং মে আবাধো পৰড্ঢেয্য, হন্দাহং ৰীরিযং আরভামি…পে॰… অহং খো গিলানা ৰুট্ঠিতো অচিরৰুট্ঠিতো গেলঞ্ঞা, ঠানং খো পনেতং ৰিজ্জতি, যং মে আবাধো পচ্চুদাৰত্তেয্য, হন্দাহং ৰীরিযং আরভামি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযাযা’’তি (দী॰ নি॰ ৩.৩৩৫; অ॰ নি॰ ৮.৮০) –

    ‘‘Kammaṃ kho me kattabbaṃ bhavissati, kammaṃ kho pana me karontena na sukaraṃ buddhānaṃ sāsanaṃ manasi kātuṃ, handāhaṃ vīriyaṃ ārabhāmi appattassa pattiyā anadhigatassa adhigamāya asacchikatassa sacchikiriyāya. Ahaṃ kho kammaṃ akāsiṃ, kammaṃ kho panāhaṃ karonto nāsakkhiṃ buddhānaṃ sāsanaṃ manasi kātuṃ, handāhaṃ vīriyaṃ ārabhāmi…pe… maggo kho me gantabbo bhavissati, maggaṃ kho pana me gacchantena na sukaraṃ buddhānaṃ sāsanaṃ manasi kātuṃ, handāhaṃ vīriyaṃ ārabhāmi…pe… ahaṃ kho maggaṃ agamāsiṃ, maggaṃ kho panāhaṃ gacchanto nāsakkhiṃ buddhānaṃ sāsanaṃ manasi kātuṃ, handāhaṃ vīriyaṃ ārabhāmi…pe… ahaṃ kho gāmaṃ vā nigamaṃ vā piṇḍāya caranto nālatthaṃ lūkhassa vā paṇītassa vā bhojanassa yāvadatthaṃ pāripūriṃ, tassa me kāyo lahuko kammañño, handāhaṃ vīriyaṃ ārabhāmi…pe… ahaṃ kho gāmaṃ vā nigamaṃ vā piṇḍāya caranto alatthaṃ lūkhassa vā paṇītassa vā bhojanassa yāvadatthaṃ pāripūriṃ, tassa me kāyo balavā kammañño, handāhaṃ vīriyaṃ ārabhāmi…pe… uppanno kho me ayaṃ appamattako ābādho, ṭhānaṃ kho panetaṃ vijjati, yaṃ me ābādho pavaḍḍheyya, handāhaṃ vīriyaṃ ārabhāmi…pe… ahaṃ kho gilānā vuṭṭhito aciravuṭṭhito gelaññā, ṭhānaṃ kho panetaṃ vijjati, yaṃ me ābādho paccudāvatteyya, handāhaṃ vīriyaṃ ārabhāmi appattassa pattiyā anadhigatassa adhigamāya asacchikatassa sacchikiriyāyā’’ti (dī. ni. 3.335; a. ni. 8.80) –

    এৰং পৰত্তঅনুরূপপচ্চৰেক্খণাসহিতানি অব্ভুস্সহনানি তম্মূলকানি ৰা পচ্চৰেক্খণানি অট্ঠ ৰীরিযারম্ভৰত্থূনি নাম।

    Evaṃ pavattaanurūpapaccavekkhaṇāsahitāni abbhussahanāni tammūlakāni vā paccavekkhaṇāni aṭṭha vīriyārambhavatthūni nāma.

    তদনুচ্ছৰিকং তদনুলোমিকন্তি এত্থ ত-সদ্দো ৰক্খমানাপেক্খো চ অতীতাপেক্খো চ হোতীতি আহ ‘‘যং ইদানি সিক্খাপদং পঞ্ঞপেস্সতী’’তিআদি। সব্বনামানি হি ৰক্খমানৰচনানিপি হোন্তি পক্কন্তৰচনানিপি। সংৰরপ্পহানপটিসংযুত্তন্তি পঞ্চসংৰরেহি চেৰ পঞ্চপহানেহি চ পটিসংযুত্তং। পঞ্চৰিধো হি সংৰরো সীলসংৰরো সতিসংৰরো ঞাণসংৰরো খন্তিসংৰরো ৰীরিযসংৰরোতি। পহানম্পি পঞ্চৰিধং তদঙ্গপ্পহানং ৰিক্খম্ভনপ্পহানং সমুচ্ছেদপ্পহানং পটিপ্পস্সদ্ধিপ্পহানং নিস্সরণপ্পহানন্তি।

    Tadanucchavikaṃ tadanulomikanti ettha ta-saddo vakkhamānāpekkho ca atītāpekkho ca hotīti āha ‘‘yaṃ idāni sikkhāpadaṃ paññapessatī’’tiādi. Sabbanāmāni hi vakkhamānavacanānipi honti pakkantavacanānipi. Saṃvarappahānapaṭisaṃyuttanti pañcasaṃvarehi ceva pañcapahānehi ca paṭisaṃyuttaṃ. Pañcavidho hi saṃvaro sīlasaṃvaro satisaṃvaro ñāṇasaṃvaro khantisaṃvaro vīriyasaṃvaroti. Pahānampi pañcavidhaṃ tadaṅgappahānaṃ vikkhambhanappahānaṃ samucchedappahānaṃ paṭippassaddhippahānaṃ nissaraṇappahānanti.

    তত্থ ‘‘ইমিনা পাতিমোক্খসংৰরেন উপেতো হোতি সমুপেতো’’তি (ৰিভ॰ ৫১১) এৰমাগতো পাতিমোক্খসংৰরো সীলসংৰরো নাম, সো চ অত্থতো কাযিকৰাচসিকো অৰীতিক্কমো। ‘‘রক্খতি চক্খুন্দ্রিযং, চক্খুন্দ্রিযে সংৰরং আপজ্জতী’’তি (দী॰ নি॰ ১.২১৩; ম॰ নি॰ ১.২৯৫; সং॰ নি॰ ৪.২৩৯; অ॰ নি॰ ৩.১৬) এৰমাগতা ইন্দ্রিযারক্খা সতিসংৰরো, সা চ অত্থতো তথাপৰত্তা সতি এৰ। ‘‘সোতানং সংৰরং ব্রূমি, পঞ্ঞাযেতে পিধীযরে’’তি (সু॰ নি॰ ১০৪১; নেত্তি॰ ১১) এৰমাগতো ঞাণসংৰরো। এত্থ হি ‘‘সোতানং সংৰরং ব্রূমী’’তি ৰত্ৰা ‘‘পঞ্ঞাযেতে পিধীযরে’’তি ৰচনতো সোতসঙ্খাতানং তণ্হাদিট্ঠিদুচ্চরিতঅৰিজ্জাদিকিলেসানং সমুচ্ছেদকঞাণং পিদহনট্ঠেন সংৰরোতি ৰুত্তং। ‘‘খমো হোতি সীতস্স উণ্হস্সা’’তিএৰমাগতা (ম॰ নি॰ ১.২৪; ম॰ নি॰ ৩.১৫৯; অ॰ নি॰ ৪.১১৪) অধিৰাসনা খন্তিসংৰরো, সা চ অত্থতো তথাপৰত্তা খন্ধা অদোসো ৰা। পঞ্ঞাতি একে, তং ন গহেতব্বং। ‘‘উপ্পন্নং কামৰিতক্কং নাধিৰাসেতী’’তি (ম॰ নি॰ ১.২৬) এৰমাগতং কামৰিতক্কাদীনং ৰিনোদনৰসেন পৰত্তং ৰীরিযমেৰ ৰীরিযসংৰরো। সব্বো চাযং সংৰরো যথাসকং সংৰরিতব্বানং দুস্সীল্যসঙ্খাতানং কাযৰচীদুচ্চরিতানং মুট্ঠস্সচ্চসঙ্খাতস্স পমাদস্স অভিজ্ঝাদীনং ৰা অক্খন্তি অঞ্ঞাণকোসজ্জানঞ্চ সংৰরণতো পিদহনতো ছাদনতো ‘‘সংৰরো’’তি ৰুচ্চতি। সংৰরতীতি সংৰরো, পিদহতি নিৰারেতি পৰত্তিতুং ন দেতীতি অত্থো। পচ্চযসমৰাযে উপ্পজ্জনারহানং কাযদুচ্চরিতাদীনং তথা তথা অনুপ্পাদনমেৰ হি ইধ সংৰরণং নাম। এৰং তাৰ পঞ্চৰিধো সংৰরো ৰেদিতব্বো।

    Tattha ‘‘iminā pātimokkhasaṃvarena upeto hoti samupeto’’ti (vibha. 511) evamāgato pātimokkhasaṃvaro sīlasaṃvaro nāma, so ca atthato kāyikavācasiko avītikkamo. ‘‘Rakkhati cakkhundriyaṃ, cakkhundriye saṃvaraṃ āpajjatī’’ti (dī. ni. 1.213; ma. ni. 1.295; saṃ. ni. 4.239; a. ni. 3.16) evamāgatā indriyārakkhā satisaṃvaro, sā ca atthato tathāpavattā sati eva. ‘‘Sotānaṃ saṃvaraṃ brūmi, paññāyete pidhīyare’’ti (su. ni. 1041; netti. 11) evamāgato ñāṇasaṃvaro. Ettha hi ‘‘sotānaṃ saṃvaraṃ brūmī’’ti vatvā ‘‘paññāyete pidhīyare’’ti vacanato sotasaṅkhātānaṃ taṇhādiṭṭhiduccaritaavijjādikilesānaṃ samucchedakañāṇaṃ pidahanaṭṭhena saṃvaroti vuttaṃ. ‘‘Khamo hoti sītassa uṇhassā’’tievamāgatā (ma. ni. 1.24; ma. ni. 3.159; a. ni. 4.114) adhivāsanā khantisaṃvaro, sā ca atthato tathāpavattā khandhā adoso vā. Paññāti eke, taṃ na gahetabbaṃ. ‘‘Uppannaṃ kāmavitakkaṃ nādhivāsetī’’ti (ma. ni. 1.26) evamāgataṃ kāmavitakkādīnaṃ vinodanavasena pavattaṃ vīriyameva vīriyasaṃvaro. Sabbo cāyaṃ saṃvaro yathāsakaṃ saṃvaritabbānaṃ dussīlyasaṅkhātānaṃ kāyavacīduccaritānaṃ muṭṭhassaccasaṅkhātassa pamādassa abhijjhādīnaṃ vā akkhanti aññāṇakosajjānañca saṃvaraṇato pidahanato chādanato ‘‘saṃvaro’’ti vuccati. Saṃvaratīti saṃvaro, pidahati nivāreti pavattituṃ na detīti attho. Paccayasamavāye uppajjanārahānaṃ kāyaduccaritādīnaṃ tathā tathā anuppādanameva hi idha saṃvaraṇaṃ nāma. Evaṃ tāva pañcavidho saṃvaro veditabbo.

    তেন তেন গুণঙ্গেন তস্স তস্স অগুণঙ্গস্স পহানং তদঙ্গপ্পহানং। নামরূপপরিচ্ছেদাদীসু হি ৰিপস্সনাঞাণেসু পটিপক্খভাৰতো দীপালোকেনেৰ তমস্স নামরূপৰৰত্থানেন সক্কাযদিট্ঠিযা, পচ্চযপরিগ্গহেন অহেতুৰিসমহেতুদিট্ঠীনং, তস্সেৰ অপরভাগে উপ্পন্নেন কঙ্খাৰিতরণেন কথংকথীভাৰস্স, কলাপসম্মসনেন ‘‘অহং মমা’’তি গাহস্স, মগ্গামগ্গৰৰত্থানেন অমগ্গে মগ্গসঞ্ঞায, উদযদস্সনেন উচ্ছেদদিট্ঠিযা, ৰযদস্সনেন সস্সতদিট্ঠিযা, ভযদস্সনেন সভযে অভযসঞ্ঞাযাতিআদিনা নযেন তেন তেন ৰিপস্সনাঞাণেন তস্স তস্স অগুণঙ্গস্স পহানং তদঙ্গপ্পহানন্তি ৰেদিতব্বং। যং পন উপচারপ্পনাভেদেন সমাধিনা পৰত্তিনিৰারণতো ঘটপ্পহারেনেৰ উদকপিট্ঠে সেৰালস্স তেসং তেসং নীৰরণাদিধম্মানং পহানং, এতং ৰিক্খম্ভনপ্পহানং নাম। ৰিক্খম্ভনমেৰ পহানং ৰিক্খম্ভনপ্পহানং। যং চতুন্নং অরিযমগ্গানং ভাৰিতত্তা তংতংমগ্গৰতো অত্তনো সন্তানে ‘‘দিট্ঠিগতানং পহানাযা’’তিআদিনা (ধ॰ স॰ ২৭৭) নযেন ৰুত্তস্স সমুদযপক্খিযস্স কিলেসগণস্স অচ্চন্তং অপ্পৰত্তিভাৰেন পহানং, ইদং সমুচ্ছেদপ্পহানং নাম। যং পন ফলক্খণে পটিপ্পস্সদ্ধত্তং ৰূপসন্ততা কিলেসানং, এতং পটিপ্পস্সদ্ধিপ্পহানং নাম। যং সব্বসঙ্খতনিস্সটত্তা পহীনসব্বসঙ্খতং নিব্বানং, এতং নিস্সরণপ্পহানং নাম। সব্বম্পি চেতং চাগট্ঠেন পহানন্তি ৰুচ্চতি। এৰমিমেহি যথাৰুত্তসংৰরেহি চেৰ পহানেহি চ পটিসংযুত্তা ধম্মদেসনা ‘‘সংৰরপ্পহানপটিসংযুত্তা’’তি ৰেদিতব্বা।

    Tena tena guṇaṅgena tassa tassa aguṇaṅgassa pahānaṃ tadaṅgappahānaṃ. Nāmarūpaparicchedādīsu hi vipassanāñāṇesu paṭipakkhabhāvato dīpālokeneva tamassa nāmarūpavavatthānena sakkāyadiṭṭhiyā, paccayapariggahena ahetuvisamahetudiṭṭhīnaṃ, tasseva aparabhāge uppannena kaṅkhāvitaraṇena kathaṃkathībhāvassa, kalāpasammasanena ‘‘ahaṃ mamā’’ti gāhassa, maggāmaggavavatthānena amagge maggasaññāya, udayadassanena ucchedadiṭṭhiyā, vayadassanena sassatadiṭṭhiyā, bhayadassanena sabhaye abhayasaññāyātiādinā nayena tena tena vipassanāñāṇena tassa tassa aguṇaṅgassa pahānaṃ tadaṅgappahānanti veditabbaṃ. Yaṃ pana upacārappanābhedena samādhinā pavattinivāraṇato ghaṭappahāreneva udakapiṭṭhe sevālassa tesaṃ tesaṃ nīvaraṇādidhammānaṃ pahānaṃ, etaṃ vikkhambhanappahānaṃ nāma. Vikkhambhanameva pahānaṃ vikkhambhanappahānaṃ. Yaṃ catunnaṃ ariyamaggānaṃ bhāvitattā taṃtaṃmaggavato attano santāne ‘‘diṭṭhigatānaṃ pahānāyā’’tiādinā (dha. sa. 277) nayena vuttassa samudayapakkhiyassa kilesagaṇassa accantaṃ appavattibhāvena pahānaṃ, idaṃ samucchedappahānaṃ nāma. Yaṃ pana phalakkhaṇe paṭippassaddhattaṃ vūpasantatā kilesānaṃ, etaṃ paṭippassaddhippahānaṃ nāma. Yaṃ sabbasaṅkhatanissaṭattā pahīnasabbasaṅkhataṃ nibbānaṃ, etaṃ nissaraṇappahānaṃ nāma. Sabbampi cetaṃ cāgaṭṭhena pahānanti vuccati. Evamimehi yathāvuttasaṃvarehi ceva pahānehi ca paṭisaṃyuttā dhammadesanā ‘‘saṃvarappahānapaṭisaṃyuttā’’ti veditabbā.

    অসুত্তন্তৰিনিবদ্ধন্তি সুত্তন্তেসু অনিবদ্ধং, পাল়িঅনারুল়্হন্তি অত্থো। পকিণ্ণকধম্মদেসনা হি সঙ্গহং ন আরোহতি। ৰুত্তমেৰত্থং পকাসেন্তো আহ ‘‘পাল়িৰিনিমুত্ত’’ন্তি। অথ ৰা অসুত্তন্তৰিনিবদ্ধন্তি সুত্তাভিধম্মপাল়িং অনারুল়্হভাৰং সন্ধায ৰুত্তং, পাল়িৰিনিমুত্তন্তি ৰিনযপাল়িং অনারুল়্হভাৰং সন্ধায। ওক্কন্তিকধম্মদেসনা নাম ঞাণেন অনুপৰিসিত্ৰা অন্তরা কথিযমানা ধম্মদেসনা, পটিক্খিপনাধিপ্পাযা ভদ্দালিত্থেরসদিসা। সম্পরেতব্বতো পেচ্চ গন্তব্বতো সম্পরাযো, পরলোকো। তত্থ ভৰং সম্পরাযিকং। ৰট্টভযেন তজ্জেন্তোতি ‘‘এৰং দুস্সীলা নিরযাদীসু দুক্খং পাপুণন্তী’’তি তজ্জেন্তো। দীঘনিকাযপ্পমাণম্পি মজ্ঝিমনিকাযপ্পমাণম্পি ধম্মদেসনং করোতীতি ‘‘তেন খণেন তেন মুহুত্তেন কথং ভগৰা তাৰমহন্তং ধম্মদেসনং করোতী’’তি ন ৰত্তব্বং। যাৰতা হি লোকিযমহাজনা একং পদং কথেন্তি, তাৰ আনন্দত্থেরো অট্ঠ পদানি কথেতি। আনন্দত্থেরে পন একং পদং কথেন্তেযেৰ ভগৰা সোল়স পদানি কথেতি। ইমিনা নযেন লোকিযজনস্স একপদুচ্চারণক্খণে ভগৰা অট্ঠৰীসসতং পদানি কথেতি। কস্মা? ভগৰতো হি জিৰ্হা মুদু, দন্তাৰরণং সুফুসিতং, ৰচনং অগল়িতং, ভৰঙ্গপরিৰাসো লহুকো, তস্মা সচে একো ভিক্খু কাযানুপস্সনং পুচ্ছতি, অঞ্ঞো ৰেদনানুপস্সনং, অঞ্ঞো চিত্তানুপস্সনং, অঞ্ঞো ধম্মানুপস্সনং, ‘‘ইমিনা পুট্ঠে অহং পুচ্ছিস্সামী’’তি একো একং ন ওলোকেতি, এৰং সন্তেপি তেসং ভিক্খূনং ‘‘অযং পঠমং পুচ্ছি, অযং দুতিয’’ন্তিআদিনা পুচ্ছনৰারো তাদিসস্স পঞ্ঞৰতো পঞ্ঞাযতি সুখুমস্স অন্তরস্স লব্ভনতো। বুদ্ধানং পন দেসনাৰারো অঞ্ঞেসং ন পঞ্ঞাযতেৰ অচ্ছরাসঙ্ঘাতমত্তে খণে অনেককোটিসহস্সচিত্তপ্পৰত্তিসম্ভৰতো। দল়্হধম্মেন ধনুগ্গহেন খিত্তসরস্স ৰিদত্থিচতুরঙ্গুলং তালচ্ছাযং অতিক্কমনতো পুরেতরংযেৰ ভগৰা চুদ্দসৰিধেন কাযানুপস্সনং, নৰৰিধেন ৰেদনানুপস্সনং, সোল়সৰিধেন চিত্তানুপস্সনং, পঞ্চৰিধেন ধম্মানুপস্সনং কথেতি। তিট্ঠন্তু ৰা এতে চত্তারো, সচে হি অঞ্ঞে চত্তারো সম্মপ্পধানেসু, অঞ্ঞে ইদ্ধিপাদেসু, অঞ্ঞে পঞ্চিন্দ্রিযেসু, অঞ্ঞে পঞ্চবলেসু, অঞ্ঞে সত্তবোজ্ঝঙ্গেসু, অঞ্ঞে অট্ঠমগ্গঙ্গেসু পঞ্হে পুচ্ছেয্যুং, তম্পি ভগৰা কথেয্য। তিট্ঠন্তু ৰা এতে অট্ঠ, সচে অঞ্ঞে সত্ততিংস জনা বোধিপক্খিযেসু পঞ্হে পুচ্ছেয্যুং, তম্পি ভগৰা তাৰদেৰ কথেয্য।

    Asuttantavinibaddhanti suttantesu anibaddhaṃ, pāḷianāruḷhanti attho. Pakiṇṇakadhammadesanā hi saṅgahaṃ na ārohati. Vuttamevatthaṃ pakāsento āha ‘‘pāḷivinimutta’’nti. Atha vā asuttantavinibaddhanti suttābhidhammapāḷiṃ anāruḷhabhāvaṃ sandhāya vuttaṃ, pāḷivinimuttanti vinayapāḷiṃ anāruḷhabhāvaṃ sandhāya. Okkantikadhammadesanā nāma ñāṇena anupavisitvā antarā kathiyamānā dhammadesanā, paṭikkhipanādhippāyā bhaddālittherasadisā. Samparetabbato pecca gantabbato samparāyo, paraloko. Tattha bhavaṃ samparāyikaṃ. Vaṭṭabhayena tajjentoti ‘‘evaṃ dussīlā nirayādīsu dukkhaṃ pāpuṇantī’’ti tajjento. Dīghanikāyappamāṇampi majjhimanikāyappamāṇampi dhammadesanaṃ karotīti ‘‘tena khaṇena tena muhuttena kathaṃ bhagavā tāvamahantaṃ dhammadesanaṃ karotī’’ti na vattabbaṃ. Yāvatā hi lokiyamahājanā ekaṃ padaṃ kathenti, tāva ānandatthero aṭṭha padāni katheti. Ānandatthere pana ekaṃ padaṃ kathenteyeva bhagavā soḷasa padāni katheti. Iminā nayena lokiyajanassa ekapaduccāraṇakkhaṇe bhagavā aṭṭhavīsasataṃ padāni katheti. Kasmā? Bhagavato hi jivhā mudu, dantāvaraṇaṃ suphusitaṃ, vacanaṃ agaḷitaṃ, bhavaṅgaparivāso lahuko, tasmā sace eko bhikkhu kāyānupassanaṃ pucchati, añño vedanānupassanaṃ, añño cittānupassanaṃ, añño dhammānupassanaṃ, ‘‘iminā puṭṭhe ahaṃ pucchissāmī’’ti eko ekaṃ na oloketi, evaṃ santepi tesaṃ bhikkhūnaṃ ‘‘ayaṃ paṭhamaṃ pucchi, ayaṃ dutiya’’ntiādinā pucchanavāro tādisassa paññavato paññāyati sukhumassa antarassa labbhanato. Buddhānaṃ pana desanāvāro aññesaṃ na paññāyateva accharāsaṅghātamatte khaṇe anekakoṭisahassacittappavattisambhavato. Daḷhadhammena dhanuggahena khittasarassa vidatthicaturaṅgulaṃ tālacchāyaṃ atikkamanato puretaraṃyeva bhagavā cuddasavidhena kāyānupassanaṃ, navavidhena vedanānupassanaṃ, soḷasavidhena cittānupassanaṃ, pañcavidhena dhammānupassanaṃ katheti. Tiṭṭhantu vā ete cattāro, sace hi aññe cattāro sammappadhānesu, aññe iddhipādesu, aññe pañcindriyesu, aññe pañcabalesu, aññe sattabojjhaṅgesu, aññe aṭṭhamaggaṅgesu pañhe puccheyyuṃ, tampi bhagavā katheyya. Tiṭṭhantu vā ete aṭṭha, sace aññe sattatiṃsa janā bodhipakkhiyesu pañhe puccheyyuṃ, tampi bhagavā tāvadeva katheyya.

    মূলং নিস্সযো পতিট্ঠাতি পচ্ছিমং পচ্ছিমং পঠমস্স পঠমস্স ৰেৰচনন্তি দট্ঠব্বং। তত্থ পতিট্ঠাতি সম্পযোগৰসেন উপনিস্সযৰসেন চ ওকাসভাৰো। সিক্খাসঙ্খাতানঞ্হি অৰসেসকুসলধম্মানং মেথুনৰিরতিসম্পযোগৰসেন ৰা পতিট্ঠা সিযা উপনিস্সযভাৰেন ৰা। তেনেৰাহ ‘‘মেথুনসংৰরো হী’’তিআদি। ৰুত্তত্থৰসেনাতি পতিট্ঠাঅধিগমূপাযৰসেন। সিক্খাপদৰিভঙ্গে নিদ্দিট্ঠৰিরতিচেতনা তংসম্পযুত্তধম্মা চ সিক্খাপদন্তি দস্সেতুকামো আহ – ‘‘অযঞ্চ অত্থো সিক্খাপদৰিভঙ্গে ৰুত্তনযেন ৰেদিতব্বো’’তি। সিক্খাপদৰিভঙ্গে হি ৰিরতিআদযো ধম্মা নিপ্পরিযাযতো পরিযাযতো চ ‘‘সিক্খাপদ’’ন্তি ৰুত্তা। ৰুত্তঞ্হেতং –

    Mūlaṃ nissayo patiṭṭhāti pacchimaṃ pacchimaṃ paṭhamassa paṭhamassa vevacananti daṭṭhabbaṃ. Tattha patiṭṭhāti sampayogavasena upanissayavasena ca okāsabhāvo. Sikkhāsaṅkhātānañhi avasesakusaladhammānaṃ methunaviratisampayogavasena vā patiṭṭhā siyā upanissayabhāvena vā. Tenevāha ‘‘methunasaṃvaro hī’’tiādi. Vuttatthavasenāti patiṭṭhāadhigamūpāyavasena. Sikkhāpadavibhaṅge niddiṭṭhaviraticetanā taṃsampayuttadhammā ca sikkhāpadanti dassetukāmo āha – ‘‘ayañca attho sikkhāpadavibhaṅge vuttanayena veditabbo’’ti. Sikkhāpadavibhaṅge hi viratiādayo dhammā nippariyāyato pariyāyato ca ‘‘sikkhāpada’’nti vuttā. Vuttañhetaṃ –

    ‘‘তত্থ কতমং কামেসুমিচ্ছাচারা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং কামেসুমিচ্ছাচারা ৰিরমন্তস্স, যা তস্মিং সমযে কামেসুমিচ্ছাচারা আরতি ৰিরতি পটিৰিরতি ৰেরমণী অকিরিযা অকরণং অনজ্ঝাপত্তি ৰেলানতিক্কমো সেতুঘাতো, ইদং ৰুচ্চতি কামেসুমিচ্ছাচারা ৰেরমণী সিক্খাপদং। অৰসেসা ধম্মা ৰেরমণিযা সম্পযুত্তা।

    ‘‘Tattha katamaṃ kāmesumicchācārā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ kāmesumicchācārā viramantassa, yā tasmiṃ samaye kāmesumicchācārā ārati virati paṭivirati veramaṇī akiriyā akaraṇaṃ anajjhāpatti velānatikkamo setughāto, idaṃ vuccati kāmesumicchācārā veramaṇī sikkhāpadaṃ. Avasesā dhammā veramaṇiyā sampayuttā.

    ‘‘তত্থ কতমং কামেসুমিচ্ছাচারা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং কামেসুমিচ্ছাচারা ৰিরমন্তস্স, যা তস্মিং সমযে চেতনা সঞ্চেতনা চেতযিতত্তং, ইদং ৰুচ্চতি কামেসুমিচ্ছাচারা ৰেরমণী সিক্খাপদং। অৰসেসা ধম্মা চেতনায সম্পযুত্তা।

    ‘‘Tattha katamaṃ kāmesumicchācārā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ kāmesumicchācārā viramantassa, yā tasmiṃ samaye cetanā sañcetanā cetayitattaṃ, idaṃ vuccati kāmesumicchācārā veramaṇī sikkhāpadaṃ. Avasesā dhammā cetanāya sampayuttā.

    ‘‘তত্থ কতমং কামেসুমিচ্ছাচারা ৰেরমণী সিক্খাপদং? যস্মিং সমযে কামাৰচরং কুসলং চিত্তং উপ্পন্নং হোতি সোমনস্সসহগতং ঞাণসম্পযুত্তং কামেসুমিচ্ছাচারা ৰিরমন্তস্স, যো তস্মিং সমযে ফস্সো…পে॰… পগ্গাহো অৰিক্খেপো, ইদং ৰুচ্চতি কামেসুমিচ্ছাচারা ৰেরমণী সিক্খাপদ’’ন্তি (ৰিভ॰ ৭০৬)।

    ‘‘Tattha katamaṃ kāmesumicchācārā veramaṇī sikkhāpadaṃ? Yasmiṃ samaye kāmāvacaraṃ kusalaṃ cittaṃ uppannaṃ hoti somanassasahagataṃ ñāṇasampayuttaṃ kāmesumicchācārā viramantassa, yo tasmiṃ samaye phasso…pe… paggāho avikkhepo, idaṃ vuccati kāmesumicchācārā veramaṇī sikkhāpada’’nti (vibha. 706).

    এত্থ হি যস্মা ন কেৰলং ৰিরতিযেৰ সিক্খাপদং, চেতনাপি সিক্খাপদমেৰ, তস্মা তং দস্সেতুং দুতিযনযো ৰুত্তো। যস্মা চ ন কেৰলং এতেযেৰ দ্ৰে ধম্মা সিক্খাপদং, চেতনাসম্পযুত্তা পন পরোপণ্ণাস ধম্মাপি সিক্খিতব্বকোট্ঠাসতো সিক্খাপদমেৰ, তস্মা ততিযনযো দস্সিতো। দুৰিধঞ্হি সিক্খাপদং নিপ্পরিযাযসিক্খাপদং পরিযাযসিক্খাপদন্তি। তত্থ ৰিরতি নিপ্পরিযাযসিক্খাপদং। সা হি ‘‘পাণাতিপাতা ৰেরমণী’’তি পাল়িযং আগতা, নো চেতনা। ৰিরমন্তো চ তায এৰ ততো ততো ৰিরমতি, ন চেতনায, চেতনম্পি পন আহরিত্ৰা দস্সেতি, তথা সেসচেতনাসম্পযুত্তধম্মে। তস্মা চেতনা চেৰ অৰসেসসম্পযুত্তধম্মা চ পরিযাযসিক্খাপদন্তি ৰেদিতব্বং।

    Ettha hi yasmā na kevalaṃ viratiyeva sikkhāpadaṃ, cetanāpi sikkhāpadameva, tasmā taṃ dassetuṃ dutiyanayo vutto. Yasmā ca na kevalaṃ eteyeva dve dhammā sikkhāpadaṃ, cetanāsampayuttā pana paropaṇṇāsa dhammāpi sikkhitabbakoṭṭhāsato sikkhāpadameva, tasmā tatiyanayo dassito. Duvidhañhi sikkhāpadaṃ nippariyāyasikkhāpadaṃ pariyāyasikkhāpadanti. Tattha virati nippariyāyasikkhāpadaṃ. Sā hi ‘‘pāṇātipātā veramaṇī’’ti pāḷiyaṃ āgatā, no cetanā. Viramanto ca tāya eva tato tato viramati, na cetanāya, cetanampi pana āharitvā dasseti, tathā sesacetanāsampayuttadhamme. Tasmā cetanā ceva avasesasampayuttadhammā ca pariyāyasikkhāpadanti veditabbaṃ.

    ইদানি ন কেৰলং ইধ ৰিরতিআদযো ধম্মাৰ সিক্খাপদং, অথ খো তদত্থজোতিকা পঞ্ঞত্তিপীতি দস্সেন্তো আহ ‘‘অপিচা’’তিআদি। ‘‘যো তত্থ নামকাযো পদকাযোতি ইদং মহাঅট্ঠকথাযং ৰুত্ত’’ন্তি ৰদন্তি। নামকাযোতি নামসমূহো নামপণ্ণত্তিযেৰ। পদনিরুত্তিব্যঞ্জনানি নামৰেৰচনানেৰ ‘‘নামং নামকম্মং নামনিরুত্তী’’তিআদীসু (ধ॰ স॰ ১৩১৩-১৩১৫) ৰিয। সিক্খাকোট্ঠাসোতি ৰিরতিআদযোৰ ৰুত্তা, তদত্থজোতকং ৰচনম্পি সিক্খাপদন্তি ইদম্পি এত্থ লব্ভতেৰ।

    Idāni na kevalaṃ idha viratiādayo dhammāva sikkhāpadaṃ, atha kho tadatthajotikā paññattipīti dassento āha ‘‘apicā’’tiādi. ‘‘Yo tattha nāmakāyo padakāyoti idaṃ mahāaṭṭhakathāyaṃ vutta’’nti vadanti. Nāmakāyoti nāmasamūho nāmapaṇṇattiyeva. Padaniruttibyañjanāni nāmavevacanāneva ‘‘nāmaṃ nāmakammaṃ nāmaniruttī’’tiādīsu (dha. sa. 1313-1315) viya. Sikkhākoṭṭhāsoti viratiādayova vuttā, tadatthajotakaṃ vacanampi sikkhāpadanti idampi ettha labbhateva.

    অত্থৰসেতি ৰুদ্ধিৰিসেসে আনিসংসৰিসেসে। তেসং পন সিক্খাপদপঞ্ঞত্তিকারণত্তা আহ ‘‘দস কারণৰসে’’তি, দস কারণৰিসেসেতি অত্থো। তেনাহ ‘‘হিতৰিসেসে’’তি। অত্থোযেৰ ৰা অত্থৰসো, দস অত্থে দস কারণানীতি ৰুত্তং হোতি। অথ ৰা অত্থো ফলং তদধীনৰুত্তিতায ৰসো এতস্সাতি অত্থৰসো, হেতূতি এৰম্পেত্থ অত্থো দট্ঠব্বো। সুট্ঠু দেৰাতি ইদং রাজন্তেপুরপ্পৰেসনসিক্খাপদে (পাচি॰ ৪৯৪ আদযো) ৰুত্তং। ‘‘যে মম সোতব্বং সদ্দহাতব্বং মঞ্ঞিস্সন্তি, তেসং তং অস্স দীঘরত্তং হিতায সুখাযা’’তি ৰুত্তত্তা ‘‘যো চ তথাগতস্স ৰচনং সম্পটিচ্ছতি, তস্স তং দীঘরত্তং হিতায সুখায হোতী’’তি ৰুত্তং। অসম্পটিচ্ছনে আদীনৰন্তি ভদ্দালিসুত্তে (ম॰ নি॰ ২.১৩৪ আদযো) ৰিয অসম্পটিচ্ছনে আদীনৰং দস্সেত্ৰা। সুখৰিহারাভাৰে সহজীৰমানস্স অভাৰতো সহজীৰিতাপি সুখৰিহারোৰ ৰুত্তো। সুখৰিহারো নাম চতুন্নং ইরিযাপথৰিহারানং ফাসুতা।

    Atthavaseti vuddhivisese ānisaṃsavisese. Tesaṃ pana sikkhāpadapaññattikāraṇattā āha ‘‘dasa kāraṇavase’’ti, dasa kāraṇaviseseti attho. Tenāha ‘‘hitavisese’’ti. Atthoyeva vā atthavaso, dasa atthe dasa kāraṇānīti vuttaṃ hoti. Atha vā attho phalaṃ tadadhīnavuttitāya vaso etassāti atthavaso, hetūti evampettha attho daṭṭhabbo. Suṭṭhu devāti idaṃ rājantepurappavesanasikkhāpade (pāci. 494 ādayo) vuttaṃ. ‘‘Ye mama sotabbaṃ saddahātabbaṃ maññissanti, tesaṃ taṃ assa dīgharattaṃ hitāya sukhāyā’’ti vuttattā ‘‘yo ca tathāgatassa vacanaṃ sampaṭicchati, tassa taṃ dīgharattaṃ hitāya sukhāya hotī’’ti vuttaṃ. Asampaṭicchane ādīnavanti bhaddālisutte (ma. ni. 2.134 ādayo) viya asampaṭicchane ādīnavaṃ dassetvā. Sukhavihārābhāve sahajīvamānassa abhāvato sahajīvitāpi sukhavihārova vutto. Sukhavihāro nāma catunnaṃ iriyāpathavihārānaṃ phāsutā.

    মঙ্কুতন্তি নিত্তেজভাৰং। ধম্মেনাতিআদীসু ধম্মোতি ভূতং ৰত্থু। ৰিনযোতি চোদনা চেৰ সারণা চ। সত্থুসাসনন্তি ঞত্তিসম্পদা চেৰ অনুস্সাৰনসম্পদা চ। পিযসীলানন্তি সিক্খাকামানং। তেসঞ্হি সীলং পিযং হোতি। তেনেৰাহ ‘‘সিক্খত্তযপারিপূরিযা ঘটমানা’’তি। সন্দিট্ঠমানাতি সংসযং আপজ্জমানা। উব্বাল়্হা হোন্তীতি পীল়িতা হোন্তি। সঙ্ঘকম্মানীতি সতিপি উপোসথপৰারণানং সঙ্ঘকম্মভাৰে গোবলিবদ্দঞাযেন উপোসথং পৰারণঞ্চ ঠপেত্ৰা উপসম্পদাদিসেসসঙ্ঘকম্মানং গহণং ৰেদিতব্বং। সমগ্গানং ভাৰো সামগ্গী।

    Maṅkutanti nittejabhāvaṃ. Dhammenātiādīsu dhammoti bhūtaṃ vatthu. Vinayoti codanā ceva sāraṇā ca. Satthusāsananti ñattisampadā ceva anussāvanasampadā ca. Piyasīlānanti sikkhākāmānaṃ. Tesañhi sīlaṃ piyaṃ hoti. Tenevāha ‘‘sikkhattayapāripūriyā ghaṭamānā’’ti. Sandiṭṭhamānāti saṃsayaṃ āpajjamānā. Ubbāḷhā hontīti pīḷitā honti. Saṅghakammānīti satipi uposathapavāraṇānaṃ saṅghakammabhāve gobalibaddañāyena uposathaṃ pavāraṇañca ṭhapetvā upasampadādisesasaṅghakammānaṃ gahaṇaṃ veditabbaṃ. Samaggānaṃ bhāvo sāmaggī.

    ‘‘ন ৰো অহং, চুন্দ, দিট্ঠধম্মিকানংযেৰ আসৰানং সংৰরায ধম্মং দেসেমী’’তি (দী॰ নি॰ ৩.১৮২) এত্থ ৰিৰাদমূলভূতা কিলেসা আসৰাতি আগতা।

    ‘‘Na vo ahaṃ, cunda, diṭṭhadhammikānaṃyeva āsavānaṃ saṃvarāya dhammaṃ desemī’’ti (dī. ni. 3.182) ettha vivādamūlabhūtā kilesā āsavāti āgatā.

    ‘‘যেন দেৰূপপত্যস্স, গন্ধব্বো ৰা ৰিহঙ্গমো।

    ‘‘Yena devūpapatyassa, gandhabbo vā vihaṅgamo;

    যক্খত্তং যেন গচ্ছেয্যং, মনুস্সত্তঞ্চ অব্বজে।

    Yakkhattaṃ yena gaccheyyaṃ, manussattañca abbaje;

    তে ময্হং আসৰা খীণা, ৰিদ্ধস্তা ৰিনল়ীকতা’’তি॥ (অ॰ নি॰ ৪.৩৬) –

    Te mayhaṃ āsavā khīṇā, viddhastā vinaḷīkatā’’ti. (a. ni. 4.36) –

    এত্থ তেভূমকং কম্মং অৰসেসা চ অকুসলা ধম্মা। ইধ পন পরূপৰাদৰিপ্পটিসারৰধবন্ধাদযো চেৰ অপাযদুক্খভূতা চ নানপ্পকারা উপদ্দৰা আসৰাতি আহ – ‘‘অসংৰরে ঠিতেন তস্মিংযেৰ অত্তভাৰে পত্তব্বা’’তিআদি। যদি হি ভগৰা সিক্খাপদং ন পঞ্ঞপেয্য, ততো অসদ্ধম্মপটিসেৰনঅদিন্নাদানপাণাতিপাতাদিহেতু যে উপ্পজ্জেয্যুং পরূপৰাদাদযো দিট্ঠধম্মিকা নানপ্পকারা অনত্থা, যে চ তংনিমিত্তমেৰ নিরযাদীসু নিব্বত্তস্স পঞ্চৰিধবন্ধনকম্মকারণাদিৰসেন মহাদুক্খানুভৰননানপ্পকারা অনত্থা, তে সন্ধায ইদং ৰুত্তং ‘‘দিট্ঠধম্মিকানং আসৰানং সংৰরায সম্পরাযিকানং আসৰানং পটিঘাতাযা’’তি। দিট্ঠধম্মো ৰুচ্চতি পচ্চক্খো অত্তভাৰো , তত্থ ভৰা দিট্ঠধম্মিকা। তেন ৰুত্তং ‘‘তস্মিংযেৰ অত্তভাৰে পত্তব্বা’’তি। সম্মুখা গরহণং অকিত্তি, পরম্মুখা গরহণং অযসো। অথ ৰা সম্মুখা পরম্মুখা চ গরহণং অকিত্তি, পরিৰারহানি অযসোতি ৰেদিতব্বং। আগমনমগ্গথকনাযাতি আগমনদ্ৰারপিদহনত্থায। সম্পরেতব্বতো পেচ্চ গন্তব্বতো সম্পরাযো, পরলোকোতি আহ ‘‘সম্পরাযে নরকাদীসূ’’তি। মেথুনাদীনি রজ্জনট্ঠানানি, পাণাতিপাতাদীনি দুস্সনট্ঠানানি।

    Ettha tebhūmakaṃ kammaṃ avasesā ca akusalā dhammā. Idha pana parūpavādavippaṭisāravadhabandhādayo ceva apāyadukkhabhūtā ca nānappakārā upaddavā āsavāti āha – ‘‘asaṃvare ṭhitena tasmiṃyeva attabhāve pattabbā’’tiādi. Yadi hi bhagavā sikkhāpadaṃ na paññapeyya, tato asaddhammapaṭisevanaadinnādānapāṇātipātādihetu ye uppajjeyyuṃ parūpavādādayo diṭṭhadhammikā nānappakārā anatthā, ye ca taṃnimittameva nirayādīsu nibbattassa pañcavidhabandhanakammakāraṇādivasena mahādukkhānubhavananānappakārā anatthā, te sandhāya idaṃ vuttaṃ ‘‘diṭṭhadhammikānaṃ āsavānaṃ saṃvarāya samparāyikānaṃ āsavānaṃ paṭighātāyā’’ti. Diṭṭhadhammo vuccati paccakkho attabhāvo , tattha bhavā diṭṭhadhammikā. Tena vuttaṃ ‘‘tasmiṃyeva attabhāve pattabbā’’ti. Sammukhā garahaṇaṃ akitti, parammukhā garahaṇaṃ ayaso. Atha vā sammukhā parammukhā ca garahaṇaṃ akitti, parivārahāni ayasoti veditabbaṃ. Āgamanamaggathakanāyāti āgamanadvārapidahanatthāya. Samparetabbato pecca gantabbato samparāyo, paralokoti āha ‘‘samparāye narakādīsū’’ti. Methunādīni rajjanaṭṭhānāni, pāṇātipātādīni dussanaṭṭhānāni.

    চুদ্দস খন্ধকৰত্তানি নাম ৰত্তক্খন্ধকে ৰুত্তানি আগন্তুকৰত্তং আৰাসিকগমিকঅনুমোদনভত্তগ্গপিণ্ডচারিকআরঞ্ঞিকসেনাসনজন্তাঘরৰচ্চকুটিউপজ্ঝাযসদ্ধিৰিহারিকআচরিযঅন্তেৰাসিকৰত্তন্তি ইমানি চুদ্দস ৰত্তানি। ততো অঞ্ঞানি পন কদাচি তজ্জনীযকম্মকতাদিকালেযেৰ চরিতব্বানি দ্ৰেঅসীতি মহাৰত্তানি, ন সব্বাসু অৰত্থাসু চরিতব্বানি, তস্মা চুদ্দসখন্ধকৰত্তেসু অগণিতানি, তানি পন ‘‘পারিৰাসিকানং ভিক্খূনং ৰত্তং পঞ্ঞপেস্সামী’’তি (চূল়ৰ॰ ৭৫ আদযো) আরভিত্ৰা ‘‘ন উপসম্পাদেতব্বং…পে॰… ন ছমাযং চঙ্কমন্তে চঙ্কমে চঙ্কমিতব্ব’’ন্তি (চূল়ৰ॰ ৭৬) ৰুত্তাৰসানানি ছসট্ঠি, ততো পরং ‘‘ন, ভিক্খৰে, পারিৰাসিকেন ভিক্খুনা পারিৰাসিকৰুড্ঢতরেন ভিক্খুনা সদ্ধিং, মূলাযপটিকস্সনারহেন, মানত্তারহেন, মানত্তচারিকেন, অব্ভানারহেন ভিক্খুনা সদ্ধিং একচ্ছন্নে আৰাসে ৰত্থব্ব’’ন্তিআদিনা (চূল়ৰ॰ ৮২) ৰুত্তৰত্তানি পকতত্তচরিতব্বেহি অনঞ্ঞত্তা ৰিসুং অগণেত্ৰা পারিৰাসিকৰুড্ঢতরাদীসু পুগ্গলন্তরেসু চরিতব্বত্তা তেসং ৰসেন সম্পিণ্ডেত্ৰা একেকং কত্ৰা গণিতানি পঞ্চাতি একসত্ততি ৰত্তানি, উক্খেপনীযকম্মকতৰত্তেসু ৰুত্তং ‘‘ন পকতত্তস্স ভিক্খুনো অভিৰাদনং পচ্চুট্ঠানং…পে॰… নহানে পিট্ঠিপরিকম্মং সাদিতব্ব’’ন্তি (চূল়ৰ॰ ৭৫) ইদং অভিৰাদনাদীনং অসাদিযনং একং, ‘‘ন পকতত্তো ভিক্খু সীলৰিপত্তিযা অনুদ্ধংসেতব্বো’’তিআদীনি (চূল়ৰ॰ ৫১) দসাতি এৰমেতানি দ্ৰাসীতি ৰত্তানি। এতেস্ৰেৰ পন কানিচি তজ্জনীযকম্মাদিৰত্তাআনি, কানিচি পারিৰাসিকাদিৰত্তানীতি অগ্গহিতগ্গহণেন দ্ৰাসীতি এৰ, অঞ্ঞত্থ পন অট্ঠকথাপদেসে অপ্পকং ঊনমধিকং ৰা গণনূপগং ন হোতীতি ‘‘অসীতি খন্ধকৰত্তানী’’তি ৰুত্তং।

    Cuddasa khandhakavattāni nāma vattakkhandhake vuttāni āgantukavattaṃ āvāsikagamikaanumodanabhattaggapiṇḍacārikaāraññikasenāsanajantāgharavaccakuṭiupajjhāyasaddhivihārikaācariyaantevāsikavattanti imāni cuddasa vattāni. Tato aññāni pana kadāci tajjanīyakammakatādikāleyeva caritabbāni dveasīti mahāvattāni, na sabbāsu avatthāsu caritabbāni, tasmā cuddasakhandhakavattesu agaṇitāni, tāni pana ‘‘pārivāsikānaṃ bhikkhūnaṃ vattaṃ paññapessāmī’’ti (cūḷava. 75 ādayo) ārabhitvā ‘‘na upasampādetabbaṃ…pe… na chamāyaṃ caṅkamante caṅkame caṅkamitabba’’nti (cūḷava. 76) vuttāvasānāni chasaṭṭhi, tato paraṃ ‘‘na, bhikkhave, pārivāsikena bhikkhunā pārivāsikavuḍḍhatarena bhikkhunā saddhiṃ, mūlāyapaṭikassanārahena, mānattārahena, mānattacārikena, abbhānārahena bhikkhunā saddhiṃ ekacchanne āvāse vatthabba’’ntiādinā (cūḷava. 82) vuttavattāni pakatattacaritabbehi anaññattā visuṃ agaṇetvā pārivāsikavuḍḍhatarādīsu puggalantaresu caritabbattā tesaṃ vasena sampiṇḍetvā ekekaṃ katvā gaṇitāni pañcāti ekasattati vattāni, ukkhepanīyakammakatavattesu vuttaṃ ‘‘na pakatattassa bhikkhuno abhivādanaṃ paccuṭṭhānaṃ…pe… nahāne piṭṭhiparikammaṃ sāditabba’’nti (cūḷava. 75) idaṃ abhivādanādīnaṃ asādiyanaṃ ekaṃ, ‘‘na pakatatto bhikkhu sīlavipattiyā anuddhaṃsetabbo’’tiādīni (cūḷava. 51) dasāti evametāni dvāsīti vattāni. Etesveva pana kānici tajjanīyakammādivattāāni, kānici pārivāsikādivattānīti aggahitaggahaṇena dvāsīti eva, aññattha pana aṭṭhakathāpadese appakaṃ ūnamadhikaṃ vā gaṇanūpagaṃ na hotīti ‘‘asīti khandhakavattānī’’ti vuttaṃ.

    সংৰরৰিনযোতি সীলসংৰরো সতিসংৰরো ঞাণসংৰরো খন্তিসংৰরো ৰীরিযসংৰরোতি পঞ্চৰিধোপি সংৰরো যথাসকং সংৰরিতব্বানং ৰিনেতব্বানঞ্চ কাযদুচ্চরিতাদীনং সংৰরণতো সংৰরো, ৰিনযনতো ৰিনযোতি ৰুচ্চতি। পহানৰিনযোতি তদঙ্গপ্পহানং ৰিক্খম্ভনপ্পহানং সমুচ্ছেদপ্পহানং পটিপ্পস্সদ্ধিপ্পহানং নিস্সরণপ্পহানন্তি পঞ্চৰিধম্পি পহানং যস্মা চাগট্ঠেন পহানং , ৰিনযনট্ঠেন ৰিনযো, তস্মা পহানৰিনযোতি ৰুচ্চতি। সমথৰিনযোতি সত্ত অধিকরণসমথা। পঞ্ঞত্তিৰিনযোতি সিক্খাপদমেৰ। সিক্খাপদপঞ্ঞত্তিযা হি ৰিজ্জমানায এৰ সিক্খাপদসম্ভৰতো পঞ্ঞত্তিৰিনযোপি সিক্খাপদপঞ্ঞত্তিযা অনুগ্গহিতো হোতি।

    Saṃvaravinayoti sīlasaṃvaro satisaṃvaro ñāṇasaṃvaro khantisaṃvaro vīriyasaṃvaroti pañcavidhopi saṃvaro yathāsakaṃ saṃvaritabbānaṃ vinetabbānañca kāyaduccaritādīnaṃ saṃvaraṇato saṃvaro, vinayanato vinayoti vuccati. Pahānavinayoti tadaṅgappahānaṃ vikkhambhanappahānaṃ samucchedappahānaṃ paṭippassaddhippahānaṃ nissaraṇappahānanti pañcavidhampi pahānaṃ yasmā cāgaṭṭhena pahānaṃ , vinayanaṭṭhena vinayo, tasmā pahānavinayoti vuccati. Samathavinayoti satta adhikaraṇasamathā. Paññattivinayoti sikkhāpadameva. Sikkhāpadapaññattiyā hi vijjamānāya eva sikkhāpadasambhavato paññattivinayopi sikkhāpadapaññattiyā anuggahito hoti.

    ইদানি –

    Idāni –

    ‘‘যং সঙ্ঘসুট্ঠু, তং সঙ্ঘফাসু, যং সঙ্ঘফাসু, তং দুম্মঙ্কূনং পুগ্গলানং নিগ্গহায, যং দুম্মঙ্কূনং পুগ্গলানং নিগ্গহায, তং পেসলানং ভিক্খূনং ফাসুৰিহারায, যং পেসলানং ভিক্খূনং ফাসুৰিহারায, তং দিট্ঠধম্মিকানং আসৰানং সংৰরায, যং দিট্ঠধম্মিকানং আসৰানং সংৰরায, তং সম্পরাযিকানং আসৰানং পটিঘাতায, যং সম্পরাযিকানং আসৰানং পটিঘাতায, তং অপ্পসন্নানং পসাদায, যং অপ্পসন্নানং পসাদায, তং পসন্নানং ভিয্যোভাৰায, যং পসন্নানং ভিয্যোভাৰায, তং সদ্ধম্মট্ঠিতিযা, যং সদ্ধম্মট্ঠিতিযা, তং ৰিনযানুগ্গহায।

    ‘‘Yaṃ saṅghasuṭṭhu, taṃ saṅghaphāsu, yaṃ saṅghaphāsu, taṃ dummaṅkūnaṃ puggalānaṃ niggahāya, yaṃ dummaṅkūnaṃ puggalānaṃ niggahāya, taṃ pesalānaṃ bhikkhūnaṃ phāsuvihārāya, yaṃ pesalānaṃ bhikkhūnaṃ phāsuvihārāya, taṃ diṭṭhadhammikānaṃ āsavānaṃ saṃvarāya, yaṃ diṭṭhadhammikānaṃ āsavānaṃ saṃvarāya, taṃ samparāyikānaṃ āsavānaṃ paṭighātāya, yaṃ samparāyikānaṃ āsavānaṃ paṭighātāya, taṃ appasannānaṃ pasādāya, yaṃ appasannānaṃ pasādāya, taṃ pasannānaṃ bhiyyobhāvāya, yaṃ pasannānaṃ bhiyyobhāvāya, taṃ saddhammaṭṭhitiyā, yaṃ saddhammaṭṭhitiyā, taṃ vinayānuggahāya.

    ‘‘যং সঙ্ঘসুট্ঠু, তং সঙ্ঘফাসু, যং সঙ্ঘসুট্ঠু, তং দুম্মঙ্কূনং পুগ্গলানং নিগ্গহায, যং সঙ্ঘসুট্ঠু, তং পেসলানং ভিক্খূনং ফাসুৰিহারায, যং সঙ্ঘসুট্ঠু, তং দিট্ঠধম্মিকানং আসৰানং সংৰরায, যং সঙ্ঘসুট্ঠু, তং সম্পরাযিকানং আসৰানং পটিঘাতায, যং সঙ্ঘসুট্ঠু, তং অপ্পসন্নানং পসাদায, যং সঙ্ঘসুট্ঠু, তং পসন্নানং ভিয্যোভাৰায, যং সঙ্ঘসুট্ঠু, তং সদ্ধম্মট্ঠিতিযা, যং সঙ্ঘসুট্ঠু, তং ৰিনযানুগ্গহায।

    ‘‘Yaṃ saṅghasuṭṭhu, taṃ saṅghaphāsu, yaṃ saṅghasuṭṭhu, taṃ dummaṅkūnaṃ puggalānaṃ niggahāya, yaṃ saṅghasuṭṭhu, taṃ pesalānaṃ bhikkhūnaṃ phāsuvihārāya, yaṃ saṅghasuṭṭhu, taṃ diṭṭhadhammikānaṃ āsavānaṃ saṃvarāya, yaṃ saṅghasuṭṭhu, taṃ samparāyikānaṃ āsavānaṃ paṭighātāya, yaṃ saṅghasuṭṭhu, taṃ appasannānaṃ pasādāya, yaṃ saṅghasuṭṭhu, taṃ pasannānaṃ bhiyyobhāvāya, yaṃ saṅghasuṭṭhu, taṃ saddhammaṭṭhitiyā, yaṃ saṅghasuṭṭhu, taṃ vinayānuggahāya.

    ‘‘যং সঙ্ঘফাসু, তং দুম্মঙ্কূনং পুগ্গলানং নিগ্গহায, যং সঙ্ঘফাসু, তং পেসলানং ভিক্খূনং ফাসুৰিহারায, যং সঙ্ঘফাসু, তং দিট্ঠধম্মিকানং আসৰানং সংৰরায, যং সঙ্ঘফাসু, তং সম্পরাযিকানং আসৰানং পটিঘাতায, যং সঙ্ঘফাসু, তং অপ্পসন্নানং পসাদায, যং সঙ্ঘফাসু, তং পসন্নানং ভিয্যোভাৰায, যং সঙ্ঘফাসু, তং সদ্ধম্মট্ঠিতিযা, যং সঙ্ঘফাসু, তং ৰিনযানুগ্গহায, যং সঙ্ঘফাসু, তং সঙ্ঘসুট্ঠুতায।

    ‘‘Yaṃ saṅghaphāsu, taṃ dummaṅkūnaṃ puggalānaṃ niggahāya, yaṃ saṅghaphāsu, taṃ pesalānaṃ bhikkhūnaṃ phāsuvihārāya, yaṃ saṅghaphāsu, taṃ diṭṭhadhammikānaṃ āsavānaṃ saṃvarāya, yaṃ saṅghaphāsu, taṃ samparāyikānaṃ āsavānaṃ paṭighātāya, yaṃ saṅghaphāsu, taṃ appasannānaṃ pasādāya, yaṃ saṅghaphāsu, taṃ pasannānaṃ bhiyyobhāvāya, yaṃ saṅghaphāsu, taṃ saddhammaṭṭhitiyā, yaṃ saṅghaphāsu, taṃ vinayānuggahāya, yaṃ saṅghaphāsu, taṃ saṅghasuṭṭhutāya.

    ‘‘যং দুম্মঙ্কূনং পুগ্গলানং নিগ্গহায…পে॰… যং পেসলানং ভিক্খূনং ফাসুৰিহারায…পে॰… যং দিট্ঠধম্মিকানং আসৰানং সংৰরায…পে॰… যং সম্পরাযিকানং আসৰানং পটিঘাতায…পে॰… যং অপ্পসন্নানং পসাদায…পে॰… যং পসন্নানং ভিয্যোভাৰায…পে॰… যং সদ্ধম্মট্ঠিতিযা…পে॰… যং ৰিনযানুগ্গহায, তং সঙ্ঘসুট্ঠুতায , যং ৰিনযানুগ্গহায, তং সঙ্ঘফাসুতায, যং ৰিনযানুগ্গহায, তং দুম্মঙ্কূনং পুগ্গলানং নিগ্গহায, যং ৰিনযানুগ্গহায, তং পেসলানং ভিক্খূনং ফাসুৰিহারায, যং ৰিনযানুগ্গহায, তং দিট্ঠধম্মিকানং আসৰানং সংৰরায, যং ৰিনযানুগ্গহায, তং সম্পরাযিকানং আসৰানং পটিঘাতায, যং ৰিনযানুগ্গহায, তং অপ্পসন্নানং পসাদায, যং ৰিনযানুগ্গহায, তং পসন্নানং ভিয্যোভাৰায, যং ৰিনযানুগ্গহায, তং সদ্ধম্মট্ঠিতিযা (পরি॰ ৩৩৪)।

    ‘‘Yaṃ dummaṅkūnaṃ puggalānaṃ niggahāya…pe… yaṃ pesalānaṃ bhikkhūnaṃ phāsuvihārāya…pe… yaṃ diṭṭhadhammikānaṃ āsavānaṃ saṃvarāya…pe… yaṃ samparāyikānaṃ āsavānaṃ paṭighātāya…pe… yaṃ appasannānaṃ pasādāya…pe… yaṃ pasannānaṃ bhiyyobhāvāya…pe… yaṃ saddhammaṭṭhitiyā…pe… yaṃ vinayānuggahāya, taṃ saṅghasuṭṭhutāya , yaṃ vinayānuggahāya, taṃ saṅghaphāsutāya, yaṃ vinayānuggahāya, taṃ dummaṅkūnaṃ puggalānaṃ niggahāya, yaṃ vinayānuggahāya, taṃ pesalānaṃ bhikkhūnaṃ phāsuvihārāya, yaṃ vinayānuggahāya, taṃ diṭṭhadhammikānaṃ āsavānaṃ saṃvarāya, yaṃ vinayānuggahāya, taṃ samparāyikānaṃ āsavānaṃ paṭighātāya, yaṃ vinayānuggahāya, taṃ appasannānaṃ pasādāya, yaṃ vinayānuggahāya, taṃ pasannānaṃ bhiyyobhāvāya, yaṃ vinayānuggahāya, taṃ saddhammaṭṭhitiyā (pari. 334).

    ‘‘অত্থসতং ধম্মসতং, দ্ৰে চ নিরুত্তিসতানি।

    ‘‘Atthasataṃ dhammasataṃ, dve ca niruttisatāni;

    চত্তারি ঞাণসতানি, অত্থৰসে পকরণে’’তি (পরি॰ ৩৩৪) –

    Cattāri ñāṇasatāni, atthavase pakaraṇe’’ti (pari. 334) –

    যং ৰুত্তং পরিৰারে, তং দস্সেন্তো ‘‘অপিচেত্থা’’তিআদিমাহ।

    Yaṃ vuttaṃ parivāre, taṃ dassento ‘‘apicetthā’’tiādimāha.

    তত্থ ‘‘যং সঙ্ঘসুট্ঠু, তং সঙ্ঘফাসু, যং সঙ্ঘফাসু, তং দুম্মঙ্কূনং পুগ্গলানং নিগ্গহাযা’’তি ইমিনা অনুক্কমেন যং ৰুত্তং, তং সন্ধায আসন্নাসন্নপদানং উপরূপরিপদেহি সদ্ধিং যোজিতত্তা সঙ্খলিকবন্ধনসদিসত্তা ‘‘সঙ্খলিকনয’’ন্তি ৰুত্তং। সঙ্খলিকনযং কত্ৰাতি সম্বন্ধো। ‘‘যং সঙ্ঘসুট্ঠু, তং সঙ্ঘফাসু, যং সঙ্ঘসুট্ঠু, তং দুম্মঙ্কূনং পুগ্গলানং নিগ্গহাযা’’তি এৰমাদিনা দসসু পদেসু একমেকং পদং তদৰসেসেহি নৰনৰপদেহি যোজেত্ৰা যং ৰুত্তং, তং সন্ধায ‘‘একেকপদমূলিকং দসক্খত্তুং যোজনং কত্ৰা’’তি ৰুত্তং।

    Tattha ‘‘yaṃ saṅghasuṭṭhu, taṃ saṅghaphāsu, yaṃ saṅghaphāsu, taṃ dummaṅkūnaṃ puggalānaṃ niggahāyā’’ti iminā anukkamena yaṃ vuttaṃ, taṃ sandhāya āsannāsannapadānaṃ uparūparipadehi saddhiṃ yojitattā saṅkhalikabandhanasadisattā ‘‘saṅkhalikanaya’’nti vuttaṃ. Saṅkhalikanayaṃ katvāti sambandho. ‘‘Yaṃ saṅghasuṭṭhu, taṃ saṅghaphāsu, yaṃ saṅghasuṭṭhu, taṃ dummaṅkūnaṃ puggalānaṃ niggahāyā’’ti evamādinā dasasu padesu ekamekaṃ padaṃ tadavasesehi navanavapadehi yojetvā yaṃ vuttaṃ, taṃ sandhāya ‘‘ekekapadamūlikaṃ dasakkhattuṃ yojanaṃ katvā’’ti vuttaṃ.

    অত্থসতন্তিআদীসু সঙ্খলিকনযে তাৰ পুরিমপুরিমপদানং ৰসেন ধম্মসতং ৰেদিতব্বং, পচ্ছিমপচ্ছিমানং ৰসেন অত্থসতং দট্ঠব্বং। কথং? কিঞ্চাপি পরিৰারে ‘‘যং সঙ্ঘসুট্ঠু, তং সঙ্ঘফাসূ’’তিআদিনা সঙ্খলিকনযে খণ্ডচক্কমেৰ ৰুত্তং, তথাপি তেনেৰ নযেন বদ্ধচক্কস্সপি নযো দিন্নো, তস্মা ‘‘যং সঙ্ঘসুট্ঠু, তং সঙ্ঘফাসূ’’তিআদিং ৰত্ৰা ‘‘যং ৰিনযানুগ্গহায, তং সঙ্ঘসুট্ঠূ’’তি যোজেত্ৰা বদ্ধচক্কং কাতব্বং। এৰং ‘‘যং সঙ্ঘফাসু, তং দুম্মঙ্কূনং পুগ্গলানং নিগ্গহাযা’’তিআদিং ৰত্ৰাপি ‘‘যং ৰিনযানুগ্গহায, তং সঙ্ঘসুট্ঠু, যং সঙ্ঘসুট্ঠু, তং সঙ্ঘফাসূ’’তি যোজেত্ৰা বদ্ধচক্কং কাতব্বং। ইমিনা অনুক্কমেন সেসপদেসুপি যোজিতেসু সঙ্খলিকনযেন দস বদ্ধচক্কানি হোন্তি। তেসু একেকস্মিং চক্কে পুরিমপুরিমপদানং ৰসেন দস দস ধম্মা, পচ্ছিমপচ্ছিমপদানং ৰসেন দস দস অত্থাতি সঙ্খলিকনযে অত্থসতং ধম্মসতঞ্চ সম্পজ্জতি। একমূলকনযে পন ‘‘যং সঙ্ঘসুট্ঠু, তং সঙ্ঘফাসু, যং সঙ্ঘসুট্ঠু, তং দুম্মঙ্কূনং পুগ্গলানং নিগ্গহাযা’’তি এৰমাদিনা একমেৰ পদং সেসেহি নৰহি পদেহি যোজিতন্তি পুরিমপদস্স একত্তা একমেৰ ধম্মপদং নৰেৰ অত্থপদানি হোন্তি, তস্মা একমূলকনযে দসসু পদেসু একমেকং মূলং কত্ৰা দসক্খত্তুং যোজনায কতায ধম্মপদানং ৰসেন ধম্মপদানি দস, অত্থপদানি নৰুতীতি অত্থসতং ধম্মসতঞ্চ ন সম্পজ্জতি, তস্মা একমূলকনযে সঙ্খলিকনযে ৰুত্তনযেন অত্থসতং ধম্মসতঞ্চ অগ্গহেত্ৰা যং তত্থ দসধম্মপদানং নৰুতিঅত্থপদানঞ্চ ৰসেন পদসতং ৰুত্তং, তং সব্বং ধম্মসতন্তি গহেত্ৰা তদত্থজোতনৰসেন অট্ঠকথাযং ৰুত্তানি সঙ্ঘসুট্ঠুভাৰাদীনি অত্থপদানি অত্থসতন্তি এৰং গহিতে অত্থসতং ধম্মসতঞ্চ সম্পজ্জতি। এৰং তাৰ অত্থসতং ধম্মসতঞ্চ ৰেদিতব্বং। দ্ৰে চ নিরুত্তিসতানীতি এত্থ পন অত্থজোতিকানং নিরুত্তীনং ৰসেন নিরুত্তিসতং, ধম্মভূতানং নিরুত্তীনং ৰসেন নিরুত্তিসতন্তি দ্ৰে নিরুত্তিসতানি চ ৰেদিতব্বানি। চত্তারি ঞাণসতানীতি অত্থসতে ঞাণসতং, ধম্মসতে ঞাণসতং, দ্ৰীসু নিরুত্তিসতেসু দ্ৰে ঞাণসতানীতি চত্তারি ঞাণসতানি।

    Atthasatantiādīsu saṅkhalikanaye tāva purimapurimapadānaṃ vasena dhammasataṃ veditabbaṃ, pacchimapacchimānaṃ vasena atthasataṃ daṭṭhabbaṃ. Kathaṃ? Kiñcāpi parivāre ‘‘yaṃ saṅghasuṭṭhu, taṃ saṅghaphāsū’’tiādinā saṅkhalikanaye khaṇḍacakkameva vuttaṃ, tathāpi teneva nayena baddhacakkassapi nayo dinno, tasmā ‘‘yaṃ saṅghasuṭṭhu, taṃ saṅghaphāsū’’tiādiṃ vatvā ‘‘yaṃ vinayānuggahāya, taṃ saṅghasuṭṭhū’’ti yojetvā baddhacakkaṃ kātabbaṃ. Evaṃ ‘‘yaṃ saṅghaphāsu, taṃ dummaṅkūnaṃ puggalānaṃ niggahāyā’’tiādiṃ vatvāpi ‘‘yaṃ vinayānuggahāya, taṃ saṅghasuṭṭhu, yaṃ saṅghasuṭṭhu, taṃ saṅghaphāsū’’ti yojetvā baddhacakkaṃ kātabbaṃ. Iminā anukkamena sesapadesupi yojitesu saṅkhalikanayena dasa baddhacakkāni honti. Tesu ekekasmiṃ cakke purimapurimapadānaṃ vasena dasa dasa dhammā, pacchimapacchimapadānaṃ vasena dasa dasa atthāti saṅkhalikanaye atthasataṃ dhammasatañca sampajjati. Ekamūlakanaye pana ‘‘yaṃ saṅghasuṭṭhu, taṃ saṅghaphāsu, yaṃ saṅghasuṭṭhu, taṃ dummaṅkūnaṃ puggalānaṃ niggahāyā’’ti evamādinā ekameva padaṃ sesehi navahi padehi yojitanti purimapadassa ekattā ekameva dhammapadaṃ naveva atthapadāni honti, tasmā ekamūlakanaye dasasu padesu ekamekaṃ mūlaṃ katvā dasakkhattuṃ yojanāya katāya dhammapadānaṃ vasena dhammapadāni dasa, atthapadāni navutīti atthasataṃ dhammasatañca na sampajjati, tasmā ekamūlakanaye saṅkhalikanaye vuttanayena atthasataṃ dhammasatañca aggahetvā yaṃ tattha dasadhammapadānaṃ navutiatthapadānañca vasena padasataṃ vuttaṃ, taṃ sabbaṃ dhammasatanti gahetvā tadatthajotanavasena aṭṭhakathāyaṃ vuttāni saṅghasuṭṭhubhāvādīni atthapadāni atthasatanti evaṃ gahite atthasataṃ dhammasatañca sampajjati. Evaṃ tāva atthasataṃ dhammasatañca veditabbaṃ. Dve ca niruttisatānīti ettha pana atthajotikānaṃ niruttīnaṃ vasena niruttisataṃ, dhammabhūtānaṃ niruttīnaṃ vasena niruttisatanti dve niruttisatāni ca veditabbāni. Cattāri ñāṇasatānīti atthasate ñāṇasataṃ, dhammasate ñāṇasataṃ, dvīsu niruttisatesu dve ñāṇasatānīti cattāri ñāṇasatāni.

    এৰঞ্চ পন, ভিক্খৰেতি এত্থ চ-সদ্দো ভিন্নক্কমেন যোজেতব্বোতি আহ ‘‘উদ্দিসেয্যাথ চা’’তি। কথং পনেত্থ ‘‘উদ্দিসেয্যাথা’’তি ৰুত্তে পরিযাপুণেয্যাথাতিআদি অত্থসম্ভৰোতি আহ ‘‘অতিরেকানযনত্থো হি এত্থ চ-সদ্দো’’তি। ৰুত্তত্থতো অতিরেকস্স অত্থস্স আনযনং অতিরেকানযনং, সো অত্থো এতস্সাতি অতিরেকানযনত্থো, অৰুত্তসমুচ্চযত্থোতি ৰুত্তং হোতি। ‘‘অসংৰাসো’’তি ৰুত্তত্তা ‘‘দল়্হং কত্ৰা’’তি ৰুত্তং।

    Evañca pana, bhikkhaveti ettha ca-saddo bhinnakkamena yojetabboti āha ‘‘uddiseyyātha cā’’ti. Kathaṃ panettha ‘‘uddiseyyāthā’’ti vutte pariyāpuṇeyyāthātiādi atthasambhavoti āha ‘‘atirekānayanattho hi ettha ca-saddo’’ti. Vuttatthato atirekassa atthassa ānayanaṃ atirekānayanaṃ, so attho etassāti atirekānayanattho, avuttasamuccayatthoti vuttaṃ hoti. ‘‘Asaṃvāso’’ti vuttattā ‘‘daḷhaṃ katvā’’ti vuttaṃ.

    ইতি সমন্তপাসাদিকায ৰিনযট্ঠকথায সারত্থদীপনিযং

    Iti samantapāsādikāya vinayaṭṭhakathāya sāratthadīpaniyaṃ

    পঠমপঞ্ঞত্তিকথা নিট্ঠিতা।

    Paṭhamapaññattikathā niṭṭhitā.

    সুদিন্নভাণৰারৰণ্ণনা নিট্ঠিতা।

    Sudinnabhāṇavāravaṇṇanā niṭṭhitā.




    Next: মক্কটিৰত্থুকথাৰণ্ণনা • Makkaṭivatthukathāvaṇṇanā




    Related texts:



    তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১. পঠমপারাজিকং • 1. Paṭhamapārājikaṃ

    অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১. পঠমপারাজিকং • 1. Paṭhamapārājikaṃ

    টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সুদিন্নভাণৰারৰণ্ণনা • Sudinnabhāṇavāravaṇṇanā

    টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / সুদিন্নভাণৰারৰণ্ণনা • Sudinnabhāṇavāravaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact