| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৪. সুগন্ধত্থেরগাথাৰণ্ণনা
4. Sugandhattheragāthāvaṇṇanā
অনুৰস্সিকো পব্বজিতোতি আযস্মতো সুগন্ধত্থেরস্স গাথা। কা উপ্পত্তি? সো কির ইতো দ্ৰানৰুতে কপ্পে তিস্সস্স নাম সম্মাসম্বুদ্ধস্স কালে মনুস্সযোনিযং নিব্বত্তিত্ৰা ৰিঞ্ঞুতং পত্তো মিগব্যধনেন অরঞ্ঞে ৰিচরতি। সত্থা তস্স অনুকম্পায পদৰল়ঞ্জং দস্সেত্ৰা গতো। সো সত্থু পদচেতিযানি দিস্ৰা পুরিমবুদ্ধেসু কতাধিকারতায ‘‘সদেৰকে লোকে অগ্গপুগ্গলস্স ইমানি পদানী’’তি পীতিসোমনস্সজাতো কোরণ্ডকপুপ্ফানি গহেত্ৰা পূজং কত্ৰা চিত্তং পসাদেসি। সো তেন পুঞ্ঞকম্মেন দেৰলোকে নিব্বত্তিত্ৰা ততো চুতো অপরাপরং পুঞ্ঞানি কত্ৰা দেৰমনুস্সেসু সংসরন্তো কস্সপস্স ভগৰতো কালে কুটুম্বিকো হুত্ৰা সত্থু ভিক্খুসঙ্ঘস্স চ মহাদানং পৰত্তেত্ৰা গন্ধকুটিং মহগ্ঘগোসিতচন্দনং পিসিত্ৰা তেন পরিভণ্ডং কত্ৰা পত্থনং পট্ঠপেসি – ‘‘নিব্বত্তনিব্বত্তট্ঠানে ময্হং সরীরং এৰংসুগন্ধং হোতূ’’তি। এৰং অঞ্ঞানিপি তত্থ তত্থ ভৰে বহূনি পুঞ্ঞকম্মানি কত্ৰা সুগতীসু এৰ পরিৰত্তমানো ইমস্মিং বুদ্ধুপ্পাদে সাৰত্থিযং ৰিভৰসম্পন্নস্স ব্রাহ্মণস্স গেহে নিব্বত্তি। নিব্বত্তস্স চ তস্স মাতুকুচ্ছিগতকালতো পট্ঠায মাতু সরীরং সকলম্পি গেহং সুরভিগন্ধং ৰাযতি। জাতদিৰসে পন ৰিসেসতো পরমসুগন্ধং সামন্তগেহেসুপি ৰাযতেৰ। তস্স মাতাপিতরো ‘‘অম্হাকং পুত্তো অত্তনাৰ অত্তনো নামং গহেত্ৰা আগতো’’তি সুগন্ধোত্ৰেৰ নামং অকংসু। সো অনুপুব্বেন ৰযপ্পত্তো মহাসেলত্থেরং দিস্ৰা তস্স সন্তিকে ধম্মং সুত্ৰা পব্বজিত্ৰা ৰিপস্সনায কম্মং করোন্তো সত্তাহব্ভন্তরে এৰ অরহত্তং পাপুণি। তেন ৰুত্তং অপদানে (অপ॰ থের ২.৫০.১৫-২৪) –
Anuvassiko pabbajitoti āyasmato sugandhattherassa gāthā. Kā uppatti? So kira ito dvānavute kappe tissassa nāma sammāsambuddhassa kāle manussayoniyaṃ nibbattitvā viññutaṃ patto migabyadhanena araññe vicarati. Satthā tassa anukampāya padavaḷañjaṃ dassetvā gato. So satthu padacetiyāni disvā purimabuddhesu katādhikāratāya ‘‘sadevake loke aggapuggalassa imāni padānī’’ti pītisomanassajāto koraṇḍakapupphāni gahetvā pūjaṃ katvā cittaṃ pasādesi. So tena puññakammena devaloke nibbattitvā tato cuto aparāparaṃ puññāni katvā devamanussesu saṃsaranto kassapassa bhagavato kāle kuṭumbiko hutvā satthu bhikkhusaṅghassa ca mahādānaṃ pavattetvā gandhakuṭiṃ mahagghagositacandanaṃ pisitvā tena paribhaṇḍaṃ katvā patthanaṃ paṭṭhapesi – ‘‘nibbattanibbattaṭṭhāne mayhaṃ sarīraṃ evaṃsugandhaṃ hotū’’ti. Evaṃ aññānipi tattha tattha bhave bahūni puññakammāni katvā sugatīsu eva parivattamāno imasmiṃ buddhuppāde sāvatthiyaṃ vibhavasampannassa brāhmaṇassa gehe nibbatti. Nibbattassa ca tassa mātukucchigatakālato paṭṭhāya mātu sarīraṃ sakalampi gehaṃ surabhigandhaṃ vāyati. Jātadivase pana visesato paramasugandhaṃ sāmantagehesupi vāyateva. Tassa mātāpitaro ‘‘amhākaṃ putto attanāva attano nāmaṃ gahetvā āgato’’ti sugandhotveva nāmaṃ akaṃsu. So anupubbena vayappatto mahāselattheraṃ disvā tassa santike dhammaṃ sutvā pabbajitvā vipassanāya kammaṃ karonto sattāhabbhantare eva arahattaṃ pāpuṇi. Tena vuttaṃ apadāne (apa. thera 2.50.15-24) –
‘‘ৰনকম্মিকো পুরে আসিং, পিতুমাতুমতেনহং।
‘‘Vanakammiko pure āsiṃ, pitumātumatenahaṃ;
পসুমারেন জীৰামি, কুসলং মে ন ৰিজ্জতি॥
Pasumārena jīvāmi, kusalaṃ me na vijjati.
‘‘মম আসযসামন্তা, তিস্সো লোকগ্গনাযকো।
‘‘Mama āsayasāmantā, tisso lokagganāyako;
পদানি তীণি দস্সেসি, অনুকম্পায চক্খুমা॥
Padāni tīṇi dassesi, anukampāya cakkhumā.
‘‘অক্কন্তে চ পদে দিস্ৰা, তিস্সনামস্স সত্থুনো।
‘‘Akkante ca pade disvā, tissanāmassa satthuno;
হট্ঠো হট্ঠেন চিত্তেন, পদে চিত্তং পসাদযিং॥
Haṭṭho haṭṭhena cittena, pade cittaṃ pasādayiṃ.
‘‘কোরণ্ডং পুপ্ফিতং দিস্ৰা, পাদপং ধরণীরুহং।
‘‘Koraṇḍaṃ pupphitaṃ disvā, pādapaṃ dharaṇīruhaṃ;
সকোসকং গহেত্ৰান, পদসেট্ঠং অপূজযিং॥
Sakosakaṃ gahetvāna, padaseṭṭhaṃ apūjayiṃ.
‘‘তেন কম্মেন সুকতেন, চেতনাপণিধীহি চ।
‘‘Tena kammena sukatena, cetanāpaṇidhīhi ca;
জহিত্ৰা মানুসং দেহং, তাৰতিংসমগচ্ছহং॥
Jahitvā mānusaṃ dehaṃ, tāvatiṃsamagacchahaṃ.
‘‘যং যং যোনুপপজ্জামি, দেৰত্তং অথ মানুসং।
‘‘Yaṃ yaṃ yonupapajjāmi, devattaṃ atha mānusaṃ;
কোরণ্ডকছৰী হোমি, সুপ্পভাসো ভৰামহং॥
Koraṇḍakachavī homi, suppabhāso bhavāmahaṃ.
‘‘দ্ৰেনৰুতে ইতো কপ্পে, যং কম্মমকরিং তদা।
‘‘Dvenavute ito kappe, yaṃ kammamakariṃ tadā;
দুগ্গতিং নাভিজানামি, পদপূজাযিদং ফলং॥
Duggatiṃ nābhijānāmi, padapūjāyidaṃ phalaṃ.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহত্তং পন পত্ৰা অঞ্ঞং ব্যাকরোন্তো ‘‘অনুৰস্সিকো পব্বজিতো’’তি ইমং গাথং অভাসি।
Arahattaṃ pana patvā aññaṃ byākaronto ‘‘anuvassiko pabbajito’’ti imaṃ gāthaṃ abhāsi.
২৪. তত্থ অনুৰস্সিকোতি অনুগতো উপগতো ৰস্সং অনুৰস্সো, অনুৰস্সোৰ অনুৰস্সিকো। পব্বজিতোতি পব্বজ্জং উপগতো, পব্বজিতো হুত্ৰা উপগতৰস্সমত্তো একৰস্সিকোতি অত্থো। অথ ৰা অনুগতং পচ্ছাগতং অপগতং ৰস্সং অনুৰস্সং, তং অস্স অত্থীতি অনুৰস্সিকো। যস্স পব্বজিতস্স ৰস্সং অপরিপুণ্ণতায ন গণনূপগতং, সো এৰং ৰুত্তো, তস্মা অৰস্সিকোতি ৰুত্তং হোতি। পস্স ধম্মসুধম্মতন্তি তৰ সত্থু ধম্মস্স সুধম্মভাৰং স্ৰাক্খাততং একন্তনিয্যানিকতং পস্স, যত্থ অনুৰস্সিকো তুৰং পব্বজিতো। পুব্বেনিৰাসঞাণং দিব্বচক্খুঞাণং আসৰক্খযঞাণন্তি তিস্সো ৰিজ্জা তযা অনুপ্পত্তা সচ্ছিকতা, ততো এৰ কতং বুদ্ধস্স সাসনং সম্মাসম্বুদ্ধস্স সাসনং অনুসিট্ঠি ওৰাদো অনুসিক্খিতোতি কতকিচ্চতং নিস্সায পীতিসোমনস্সজাতো থেরো অত্তানং পরং ৰিয কত্ৰা ৰদতীতি।
24. Tattha anuvassikoti anugato upagato vassaṃ anuvasso, anuvassova anuvassiko. Pabbajitoti pabbajjaṃ upagato, pabbajito hutvā upagatavassamatto ekavassikoti attho. Atha vā anugataṃ pacchāgataṃ apagataṃ vassaṃ anuvassaṃ, taṃ assa atthīti anuvassiko. Yassa pabbajitassa vassaṃ aparipuṇṇatāya na gaṇanūpagataṃ, so evaṃ vutto, tasmā avassikoti vuttaṃ hoti. Passa dhammasudhammatanti tava satthu dhammassa sudhammabhāvaṃ svākkhātataṃ ekantaniyyānikataṃ passa, yattha anuvassiko tuvaṃ pabbajito. Pubbenivāsañāṇaṃ dibbacakkhuñāṇaṃ āsavakkhayañāṇanti tisso vijjā tayā anuppattā sacchikatā, tato eva kataṃ buddhassa sāsanaṃ sammāsambuddhassa sāsanaṃ anusiṭṭhi ovādo anusikkhitoti katakiccataṃ nissāya pītisomanassajāto thero attānaṃ paraṃ viya katvā vadatīti.
সুগন্ধত্থেরগাথাৰণ্ণনা নিট্ঠিতা।
Sugandhattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৪. সুগন্ধত্থেরগাথা • 4. Sugandhattheragāthā
