| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. ஸூகரக²தஸுத்தங்
8. Sūkarakhatasuttaṃ
528. ஏகங் ஸமயங் ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே ஸூகரக²தாயங். தத்ர கோ² ப⁴க³வா ஆயஸ்மந்தங் ஸாரிபுத்தங் ஆமந்தேஸி – ‘‘கிங் நு கோ², ஸாரிபுத்த, அத்த²வஸங் ஸம்பஸ்ஸமானோ கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி 1? ‘‘அனுத்தரஞ்ஹி , ப⁴ந்தே, யோக³க்கே²மங் ஸம்பஸ்ஸமானோ கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி. ‘‘ஸாது⁴ ஸாது⁴, ஸாரிபுத்த! அனுத்தரஞ்ஹி, ஸாரிபுத்த, யோக³க்கே²மங் ஸம்பஸ்ஸமானோ கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி.
528. Ekaṃ samayaṃ bhagavā rājagahe viharati gijjhakūṭe pabbate sūkarakhatāyaṃ. Tatra kho bhagavā āyasmantaṃ sāriputtaṃ āmantesi – ‘‘kiṃ nu kho, sāriputta, atthavasaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti 2? ‘‘Anuttarañhi , bhante, yogakkhemaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti. ‘‘Sādhu sādhu, sāriputta! Anuttarañhi, sāriputta, yogakkhemaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti.
‘‘கதமோ ச, ஸாரிபுத்த, அனுத்தரோ யோக³க்கே²மோ யங் ஸம்பஸ்ஸமானோ கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி? ‘‘இத⁴, ப⁴ந்தே, கீ²ணாஸவோ பி⁴க்கு² ஸத்³தி⁴ந்த்³ரியங் பா⁴வேதி உபஸமகா³மிங் ஸம்போ³த⁴கா³மிங், வீரியிந்த்³ரியங் பா⁴வேதி…பே॰… ஸதிந்த்³ரியங் பா⁴வேதி…பே॰… ஸமாதி⁴ந்த்³ரியங் பா⁴வேதி…பே॰… பஞ்ஞிந்த்³ரியங் பா⁴வேதி உபஸமகா³மிங் ஸம்போ³த⁴கா³மிங். அயங் கோ², ப⁴ந்தே, அனுத்தரோ யோக³க்கே²மோ யங் ஸம்பஸ்ஸமானோ கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி. ‘‘ஸாது⁴ ஸாது⁴, ஸாரிபுத்த! ஏஸோ ஹி, ஸாரிபுத்த, அனுத்தரோ யோக³க்கே²மோ யங் ஸம்பஸ்ஸமானோ கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி.
‘‘Katamo ca, sāriputta, anuttaro yogakkhemo yaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti? ‘‘Idha, bhante, khīṇāsavo bhikkhu saddhindriyaṃ bhāveti upasamagāmiṃ sambodhagāmiṃ, vīriyindriyaṃ bhāveti…pe… satindriyaṃ bhāveti…pe… samādhindriyaṃ bhāveti…pe… paññindriyaṃ bhāveti upasamagāmiṃ sambodhagāmiṃ. Ayaṃ kho, bhante, anuttaro yogakkhemo yaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti. ‘‘Sādhu sādhu, sāriputta! Eso hi, sāriputta, anuttaro yogakkhemo yaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti.
‘‘கதமோ ச, ஸாரிபுத்த, பரமனிபச்சகாரோ யங் கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி? ‘‘இத⁴, ப⁴ந்தே, கீ²ணாஸவோ பி⁴க்கு² ஸத்த²ரி ஸகா³ரவோ விஹரதி ஸப்பதிஸ்ஸோ 3, த⁴ம்மே ஸகா³ரவோ விஹரதி ஸப்பதிஸ்ஸோ, ஸங்கே⁴ ஸகா³ரவோ விஹரதி ஸப்பதிஸ்ஸோ, ஸிக்கா²ய ஸகா³ரவோ விஹரதி ஸப்பதிஸ்ஸோ, ஸமாதி⁴ஸ்மிங் ஸகா³ரவோ விஹரதி ஸப்பதிஸ்ஸோ. அயங் கோ², ப⁴ந்தே, பரமனிபச்சகாரோ யங் கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி. ‘‘ஸாது⁴ ஸாது⁴, ஸாரிபுத்த! ஏஸோ ஹி , ஸாரிபுத்த, பரமனிபச்சகாரோ யங் கீ²ணாஸவோ பி⁴க்கு² ததா²க³தே வா ததா²க³தஸாஸனே வா பரமனிபச்சகாரங் பவத்தமானோ பவத்ததீ’’தி. அட்ட²மங்.
‘‘Katamo ca, sāriputta, paramanipaccakāro yaṃ khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti? ‘‘Idha, bhante, khīṇāsavo bhikkhu satthari sagāravo viharati sappatisso 4, dhamme sagāravo viharati sappatisso, saṅghe sagāravo viharati sappatisso, sikkhāya sagāravo viharati sappatisso, samādhismiṃ sagāravo viharati sappatisso. Ayaṃ kho, bhante, paramanipaccakāro yaṃ khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti. ‘‘Sādhu sādhu, sāriputta! Eso hi , sāriputta, paramanipaccakāro yaṃ khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. ஸூகரக²தஸுத்தவண்ணனா • 8. Sūkarakhatasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. ஸூகரக²தஸுத்தவண்ணனா • 8. Sūkarakhatasuttavaṇṇanā
