| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೮. ಸೂಕರಖತಸುತ್ತಂ
8. Sūkarakhatasuttaṃ
೫೨೮. ಏಕಂ ಸಮಯಂ ಭಗವಾ ರಾಜಗಹೇ ವಿಹರತಿ ಗಿಜ್ಝಕೂಟೇ ಪಬ್ಬತೇ ಸೂಕರಖತಾಯಂ। ತತ್ರ ಖೋ ಭಗವಾ ಆಯಸ್ಮನ್ತಂ ಸಾರಿಪುತ್ತಂ ಆಮನ್ತೇಸಿ – ‘‘ಕಿಂ ನು ಖೋ, ಸಾರಿಪುತ್ತ, ಅತ್ಥವಸಂ ಸಮ್ಪಸ್ಸಮಾನೋ ಖೀಣಾಸವೋ ಭಿಕ್ಖು ತಥಾಗತೇ ವಾ ತಥಾಗತಸಾಸನೇ ವಾ ಪರಮನಿಪಚ್ಚಕಾರಂ ಪವತ್ತಮಾನೋ ಪವತ್ತತೀ’’ತಿ 1? ‘‘ಅನುತ್ತರಞ್ಹಿ , ಭನ್ತೇ, ಯೋಗಕ್ಖೇಮಂ ಸಮ್ಪಸ್ಸಮಾನೋ ಖೀಣಾಸವೋ ಭಿಕ್ಖು ತಥಾಗತೇ ವಾ ತಥಾಗತಸಾಸನೇ ವಾ ಪರಮನಿಪಚ್ಚಕಾರಂ ಪವತ್ತಮಾನೋ ಪವತ್ತತೀ’’ತಿ। ‘‘ಸಾಧು ಸಾಧು, ಸಾರಿಪುತ್ತ! ಅನುತ್ತರಞ್ಹಿ, ಸಾರಿಪುತ್ತ, ಯೋಗಕ್ಖೇಮಂ ಸಮ್ಪಸ್ಸಮಾನೋ ಖೀಣಾಸವೋ ಭಿಕ್ಖು ತಥಾಗತೇ ವಾ ತಥಾಗತಸಾಸನೇ ವಾ ಪರಮನಿಪಚ್ಚಕಾರಂ ಪವತ್ತಮಾನೋ ಪವತ್ತತೀ’’ತಿ।
528. Ekaṃ samayaṃ bhagavā rājagahe viharati gijjhakūṭe pabbate sūkarakhatāyaṃ. Tatra kho bhagavā āyasmantaṃ sāriputtaṃ āmantesi – ‘‘kiṃ nu kho, sāriputta, atthavasaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti 2? ‘‘Anuttarañhi , bhante, yogakkhemaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti. ‘‘Sādhu sādhu, sāriputta! Anuttarañhi, sāriputta, yogakkhemaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti.
‘‘ಕತಮೋ ಚ, ಸಾರಿಪುತ್ತ, ಅನುತ್ತರೋ ಯೋಗಕ್ಖೇಮೋ ಯಂ ಸಮ್ಪಸ್ಸಮಾನೋ ಖೀಣಾಸವೋ ಭಿಕ್ಖು ತಥಾಗತೇ ವಾ ತಥಾಗತಸಾಸನೇ ವಾ ಪರಮನಿಪಚ್ಚಕಾರಂ ಪವತ್ತಮಾನೋ ಪವತ್ತತೀ’’ತಿ? ‘‘ಇಧ, ಭನ್ತೇ, ಖೀಣಾಸವೋ ಭಿಕ್ಖು ಸದ್ಧಿನ್ದ್ರಿಯಂ ಭಾವೇತಿ ಉಪಸಮಗಾಮಿಂ ಸಮ್ಬೋಧಗಾಮಿಂ, ವೀರಿಯಿನ್ದ್ರಿಯಂ ಭಾವೇತಿ…ಪೇ॰… ಸತಿನ್ದ್ರಿಯಂ ಭಾವೇತಿ…ಪೇ॰… ಸಮಾಧಿನ್ದ್ರಿಯಂ ಭಾವೇತಿ…ಪೇ॰… ಪಞ್ಞಿನ್ದ್ರಿಯಂ ಭಾವೇತಿ ಉಪಸಮಗಾಮಿಂ ಸಮ್ಬೋಧಗಾಮಿಂ। ಅಯಂ ಖೋ, ಭನ್ತೇ, ಅನುತ್ತರೋ ಯೋಗಕ್ಖೇಮೋ ಯಂ ಸಮ್ಪಸ್ಸಮಾನೋ ಖೀಣಾಸವೋ ಭಿಕ್ಖು ತಥಾಗತೇ ವಾ ತಥಾಗತಸಾಸನೇ ವಾ ಪರಮನಿಪಚ್ಚಕಾರಂ ಪವತ್ತಮಾನೋ ಪವತ್ತತೀ’’ತಿ। ‘‘ಸಾಧು ಸಾಧು, ಸಾರಿಪುತ್ತ! ಏಸೋ ಹಿ, ಸಾರಿಪುತ್ತ, ಅನುತ್ತರೋ ಯೋಗಕ್ಖೇಮೋ ಯಂ ಸಮ್ಪಸ್ಸಮಾನೋ ಖೀಣಾಸವೋ ಭಿಕ್ಖು ತಥಾಗತೇ ವಾ ತಥಾಗತಸಾಸನೇ ವಾ ಪರಮನಿಪಚ್ಚಕಾರಂ ಪವತ್ತಮಾನೋ ಪವತ್ತತೀ’’ತಿ।
‘‘Katamo ca, sāriputta, anuttaro yogakkhemo yaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti? ‘‘Idha, bhante, khīṇāsavo bhikkhu saddhindriyaṃ bhāveti upasamagāmiṃ sambodhagāmiṃ, vīriyindriyaṃ bhāveti…pe… satindriyaṃ bhāveti…pe… samādhindriyaṃ bhāveti…pe… paññindriyaṃ bhāveti upasamagāmiṃ sambodhagāmiṃ. Ayaṃ kho, bhante, anuttaro yogakkhemo yaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti. ‘‘Sādhu sādhu, sāriputta! Eso hi, sāriputta, anuttaro yogakkhemo yaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti.
‘‘ಕತಮೋ ಚ, ಸಾರಿಪುತ್ತ, ಪರಮನಿಪಚ್ಚಕಾರೋ ಯಂ ಖೀಣಾಸವೋ ಭಿಕ್ಖು ತಥಾಗತೇ ವಾ ತಥಾಗತಸಾಸನೇ ವಾ ಪರಮನಿಪಚ್ಚಕಾರಂ ಪವತ್ತಮಾನೋ ಪವತ್ತತೀ’’ತಿ? ‘‘ಇಧ, ಭನ್ತೇ, ಖೀಣಾಸವೋ ಭಿಕ್ಖು ಸತ್ಥರಿ ಸಗಾರವೋ ವಿಹರತಿ ಸಪ್ಪತಿಸ್ಸೋ 3, ಧಮ್ಮೇ ಸಗಾರವೋ ವಿಹರತಿ ಸಪ್ಪತಿಸ್ಸೋ, ಸಙ್ಘೇ ಸಗಾರವೋ ವಿಹರತಿ ಸಪ್ಪತಿಸ್ಸೋ, ಸಿಕ್ಖಾಯ ಸಗಾರವೋ ವಿಹರತಿ ಸಪ್ಪತಿಸ್ಸೋ, ಸಮಾಧಿಸ್ಮಿಂ ಸಗಾರವೋ ವಿಹರತಿ ಸಪ್ಪತಿಸ್ಸೋ। ಅಯಂ ಖೋ, ಭನ್ತೇ, ಪರಮನಿಪಚ್ಚಕಾರೋ ಯಂ ಖೀಣಾಸವೋ ಭಿಕ್ಖು ತಥಾಗತೇ ವಾ ತಥಾಗತಸಾಸನೇ ವಾ ಪರಮನಿಪಚ್ಚಕಾರಂ ಪವತ್ತಮಾನೋ ಪವತ್ತತೀ’’ತಿ। ‘‘ಸಾಧು ಸಾಧು, ಸಾರಿಪುತ್ತ! ಏಸೋ ಹಿ , ಸಾರಿಪುತ್ತ, ಪರಮನಿಪಚ್ಚಕಾರೋ ಯಂ ಖೀಣಾಸವೋ ಭಿಕ್ಖು ತಥಾಗತೇ ವಾ ತಥಾಗತಸಾಸನೇ ವಾ ಪರಮನಿಪಚ್ಚಕಾರಂ ಪವತ್ತಮಾನೋ ಪವತ್ತತೀ’’ತಿ। ಅಟ್ಠಮಂ।
‘‘Katamo ca, sāriputta, paramanipaccakāro yaṃ khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti? ‘‘Idha, bhante, khīṇāsavo bhikkhu satthari sagāravo viharati sappatisso 4, dhamme sagāravo viharati sappatisso, saṅghe sagāravo viharati sappatisso, sikkhāya sagāravo viharati sappatisso, samādhismiṃ sagāravo viharati sappatisso. Ayaṃ kho, bhante, paramanipaccakāro yaṃ khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti. ‘‘Sādhu sādhu, sāriputta! Eso hi , sāriputta, paramanipaccakāro yaṃ khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti. Aṭṭhamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೮. ಸೂಕರಖತಸುತ್ತವಣ್ಣನಾ • 8. Sūkarakhatasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೮. ಸೂಕರಖತಸುತ್ತವಣ್ಣನಾ • 8. Sūkarakhatasuttavaṇṇanā
