| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༨. སཱུཀརཁཏསུཏྟཾ
8. Sūkarakhatasuttaṃ
༥༢༨. ཨེཀཾ སམཡཾ བྷགཝཱ རཱཛགཧེ ཝིཧརཏི གིཛ྄ཛྷཀཱུཊེ པབྦཏེ སཱུཀརཁཏཱཡཾ། ཏཏྲ ཁོ བྷགཝཱ ཨཱཡསྨནྟཾ སཱརིཔུཏྟཾ ཨཱམནྟེསི – ‘‘ཀིཾ ནུ ཁོ, སཱརིཔུཏྟ, ཨཏྠཝསཾ སམྤསྶམཱནོ ཁཱིཎཱསཝོ བྷིཀྑུ ཏཐཱགཏེ ཝཱ ཏཐཱགཏསཱསནེ ཝཱ པརམནིཔཙྩཀཱརཾ པཝཏྟམཱནོ པཝཏྟཏཱི’’ཏི 1? ‘‘ཨནུཏྟརཉྷི , བྷནྟེ, ཡོགཀྑེམཾ སམྤསྶམཱནོ ཁཱིཎཱསཝོ བྷིཀྑུ ཏཐཱགཏེ ཝཱ ཏཐཱགཏསཱསནེ ཝཱ པརམནིཔཙྩཀཱརཾ པཝཏྟམཱནོ པཝཏྟཏཱི’’ཏི། ‘‘སཱདྷུ སཱདྷུ, སཱརིཔུཏྟ! ཨནུཏྟརཉྷི, སཱརིཔུཏྟ, ཡོགཀྑེམཾ སམྤསྶམཱནོ ཁཱིཎཱསཝོ བྷིཀྑུ ཏཐཱགཏེ ཝཱ ཏཐཱགཏསཱསནེ ཝཱ པརམནིཔཙྩཀཱརཾ པཝཏྟམཱནོ པཝཏྟཏཱི’’ཏི།
528. Ekaṃ samayaṃ bhagavā rājagahe viharati gijjhakūṭe pabbate sūkarakhatāyaṃ. Tatra kho bhagavā āyasmantaṃ sāriputtaṃ āmantesi – ‘‘kiṃ nu kho, sāriputta, atthavasaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti 2? ‘‘Anuttarañhi , bhante, yogakkhemaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti. ‘‘Sādhu sādhu, sāriputta! Anuttarañhi, sāriputta, yogakkhemaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti.
‘‘ཀཏམོ ཙ, སཱརིཔུཏྟ, ཨནུཏྟརོ ཡོགཀྑེམོ ཡཾ སམྤསྶམཱནོ ཁཱིཎཱསཝོ བྷིཀྑུ ཏཐཱགཏེ ཝཱ ཏཐཱགཏསཱསནེ ཝཱ པརམནིཔཙྩཀཱརཾ པཝཏྟམཱནོ པཝཏྟཏཱི’’ཏི? ‘‘ཨིདྷ, བྷནྟེ, ཁཱིཎཱསཝོ བྷིཀྑུ སདྡྷིནྡྲིཡཾ བྷཱཝེཏི ཨུཔསམགཱམིཾ སམྦོདྷགཱམིཾ, ཝཱིརིཡིནྡྲིཡཾ བྷཱཝེཏི…པེ॰… སཏིནྡྲིཡཾ བྷཱཝེཏི…པེ॰… སམཱདྷིནྡྲིཡཾ བྷཱཝེཏི…པེ॰… པཉྙིནྡྲིཡཾ བྷཱཝེཏི ཨུཔསམགཱམིཾ སམྦོདྷགཱམིཾ། ཨཡཾ ཁོ, བྷནྟེ, ཨནུཏྟརོ ཡོགཀྑེམོ ཡཾ སམྤསྶམཱནོ ཁཱིཎཱསཝོ བྷིཀྑུ ཏཐཱགཏེ ཝཱ ཏཐཱགཏསཱསནེ ཝཱ པརམནིཔཙྩཀཱརཾ པཝཏྟམཱནོ པཝཏྟཏཱི’’ཏི། ‘‘སཱདྷུ སཱདྷུ, སཱརིཔུཏྟ! ཨེསོ ཧི, སཱརིཔུཏྟ, ཨནུཏྟརོ ཡོགཀྑེམོ ཡཾ སམྤསྶམཱནོ ཁཱིཎཱསཝོ བྷིཀྑུ ཏཐཱགཏེ ཝཱ ཏཐཱགཏསཱསནེ ཝཱ པརམནིཔཙྩཀཱརཾ པཝཏྟམཱནོ པཝཏྟཏཱི’’ཏི།
‘‘Katamo ca, sāriputta, anuttaro yogakkhemo yaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti? ‘‘Idha, bhante, khīṇāsavo bhikkhu saddhindriyaṃ bhāveti upasamagāmiṃ sambodhagāmiṃ, vīriyindriyaṃ bhāveti…pe… satindriyaṃ bhāveti…pe… samādhindriyaṃ bhāveti…pe… paññindriyaṃ bhāveti upasamagāmiṃ sambodhagāmiṃ. Ayaṃ kho, bhante, anuttaro yogakkhemo yaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti. ‘‘Sādhu sādhu, sāriputta! Eso hi, sāriputta, anuttaro yogakkhemo yaṃ sampassamāno khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti.
‘‘ཀཏམོ ཙ, སཱརིཔུཏྟ, པརམནིཔཙྩཀཱརོ ཡཾ ཁཱིཎཱསཝོ བྷིཀྑུ ཏཐཱགཏེ ཝཱ ཏཐཱགཏསཱསནེ ཝཱ པརམནིཔཙྩཀཱརཾ པཝཏྟམཱནོ པཝཏྟཏཱི’’ཏི? ‘‘ཨིདྷ, བྷནྟེ, ཁཱིཎཱསཝོ བྷིཀྑུ སཏྠརི སགཱརཝོ ཝིཧརཏི སཔྤཏིསྶོ 3, དྷམྨེ སགཱརཝོ ཝིཧརཏི སཔྤཏིསྶོ, སངྒྷེ སགཱརཝོ ཝིཧརཏི སཔྤཏིསྶོ, སིཀྑཱཡ སགཱརཝོ ཝིཧརཏི སཔྤཏིསྶོ, སམཱདྷིསྨིཾ སགཱརཝོ ཝིཧརཏི སཔྤཏིསྶོ། ཨཡཾ ཁོ, བྷནྟེ, པརམནིཔཙྩཀཱརོ ཡཾ ཁཱིཎཱསཝོ བྷིཀྑུ ཏཐཱགཏེ ཝཱ ཏཐཱགཏསཱསནེ ཝཱ པརམནིཔཙྩཀཱརཾ པཝཏྟམཱནོ པཝཏྟཏཱི’’ཏི། ‘‘སཱདྷུ སཱདྷུ, སཱརིཔུཏྟ! ཨེསོ ཧི , སཱརིཔུཏྟ, པརམནིཔཙྩཀཱརོ ཡཾ ཁཱིཎཱསཝོ བྷིཀྑུ ཏཐཱགཏེ ཝཱ ཏཐཱགཏསཱསནེ ཝཱ པརམནིཔཙྩཀཱརཾ པཝཏྟམཱནོ པཝཏྟཏཱི’’ཏི། ཨཊྛམཾ།
‘‘Katamo ca, sāriputta, paramanipaccakāro yaṃ khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti? ‘‘Idha, bhante, khīṇāsavo bhikkhu satthari sagāravo viharati sappatisso 4, dhamme sagāravo viharati sappatisso, saṅghe sagāravo viharati sappatisso, sikkhāya sagāravo viharati sappatisso, samādhismiṃ sagāravo viharati sappatisso. Ayaṃ kho, bhante, paramanipaccakāro yaṃ khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti. ‘‘Sādhu sādhu, sāriputta! Eso hi , sāriputta, paramanipaccakāro yaṃ khīṇāsavo bhikkhu tathāgate vā tathāgatasāsane vā paramanipaccakāraṃ pavattamāno pavattatī’’ti. Aṭṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༨. སཱུཀརཁཏསུཏྟཝཎྞནཱ • 8. Sūkarakhatasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༨. སཱུཀརཁཏསུཏྟཝཎྞནཱ • 8. Sūkarakhatasuttavaṇṇanā
