| Library / Tipiṭaka / তিপিটক • Tipiṭaka / পেতৰত্থু-অট্ঠকথা • Petavatthu-aṭṭhakathā |
২. সূকরমুখপেতৰত্থুৰণ্ণনা
2. Sūkaramukhapetavatthuvaṇṇanā
কাযো তে সব্বসোৰণ্ণোতি ইদং সত্থরি রাজগহং উপনিস্সায ৰেল়ুৰনে কলন্দকনিৰাপে ৰিহরন্তে অঞ্ঞ্ঞাতরং সূকরমুখপেতং আরব্ভ ৰুত্তং। অতীতে কির কস্সপস্স ভগৰতো সাসনে একো ভিক্খু কাযেন সঞ্ঞতো অহোসি, ৰাচায অসঞ্ঞতো, ভিক্খূ অক্কোসতি পরিভাসতি। সো কালং কত্ৰা নিরযে নিব্বত্তো, একং বুদ্ধন্তরং তত্থ পচ্চিত্ৰা ততো চৰিত্ৰা ইমস্মিং বুদ্ধুপ্পাদে রাজগহসমীপে গিজ্ঝকূটপব্বতপাদে তস্সেৰ কম্মস্স ৰিপাকাৰসেসেন খুপ্পিপাসাভিভূতো পেতো হুত্ৰা নিব্বত্তি। তস্স কাযো সুৰণ্ণৰণ্ণো অহোসি, মুখং সূকরমুখসদিসং। অথাযস্মা নারদো গিজ্ঝকূটে পব্বতে ৰসন্তো পাতোৰ সরীরপটিজগ্গনং কত্ৰা পত্তচীৰরমাদায রাজগহং পিণ্ডায গচ্ছন্তো অন্তরামগ্গে তং পেতং দিস্ৰা তেন কতকম্মং পুচ্ছন্তো –
Kāyo te sabbasovaṇṇoti idaṃ satthari rājagahaṃ upanissāya veḷuvane kalandakanivāpe viharante añññātaraṃ sūkaramukhapetaṃ ārabbha vuttaṃ. Atīte kira kassapassa bhagavato sāsane eko bhikkhu kāyena saññato ahosi, vācāya asaññato, bhikkhū akkosati paribhāsati. So kālaṃ katvā niraye nibbatto, ekaṃ buddhantaraṃ tattha paccitvā tato cavitvā imasmiṃ buddhuppāde rājagahasamīpe gijjhakūṭapabbatapāde tasseva kammassa vipākāvasesena khuppipāsābhibhūto peto hutvā nibbatti. Tassa kāyo suvaṇṇavaṇṇo ahosi, mukhaṃ sūkaramukhasadisaṃ. Athāyasmā nārado gijjhakūṭe pabbate vasanto pātova sarīrapaṭijagganaṃ katvā pattacīvaramādāya rājagahaṃ piṇḍāya gacchanto antarāmagge taṃ petaṃ disvā tena katakammaṃ pucchanto –
৪.
4.
‘‘কাযো তে সব্বসোৰণ্ণো, সব্বা ওভাসতে দিসা।
‘‘Kāyo te sabbasovaṇṇo, sabbā obhāsate disā;
মুখং তে সূকরস্সেৰ, কিং কম্মমকরী পুরে’’তি॥ –
Mukhaṃ te sūkarasseva, kiṃ kammamakarī pure’’ti. –
গাথমাহ। তত্থ কাযো তে সব্বসোৰণ্ণোতি তৰ কাযো দেহো সব্বো সুৰণ্ণৰণ্ণো উত্তত্তকনকসন্নিভো। সব্বা ওভাসতে দিসাতি তস্স পভায সব্বাপি দিসা সমন্তন্তো ওভাসতি ৰিজ্জোততি। ওভাসতেতি ৰা অন্তোগধহোতুঅত্থমিদং পদন্তি ‘‘তে কাযো সব্বসোৰণ্ণো সব্বা দিসা ওভাসেতি ৰিজ্জোতেতী’’তি অত্থো দট্ঠব্বো। মুখং তে সূকরস্সেৰাতি মুখং পন তে সূকরস্স ৰিয, সূকরমুখসদিসং তৰ মুখন্তি অত্থো। কিং কম্মমকরী পুরেতি ‘‘ত্ৰং পুব্বে অতীতজাতিযং কীদিসং কম্মং অকাসী’’তি পুচ্ছতি।
Gāthamāha. Tattha kāyo te sabbasovaṇṇoti tava kāyo deho sabbo suvaṇṇavaṇṇo uttattakanakasannibho. Sabbā obhāsate disāti tassa pabhāya sabbāpi disā samantanto obhāsati vijjotati. Obhāsateti vā antogadhahotuatthamidaṃ padanti ‘‘te kāyo sabbasovaṇṇo sabbā disā obhāseti vijjotetī’’ti attho daṭṭhabbo. Mukhaṃte sūkarassevāti mukhaṃ pana te sūkarassa viya, sūkaramukhasadisaṃ tava mukhanti attho. Kiṃ kammamakarī pureti ‘‘tvaṃ pubbe atītajātiyaṃ kīdisaṃ kammaṃ akāsī’’ti pucchati.
এৰং থেরেন সো পেতো কতকম্মং পুট্ঠো গাথায ৰিস্সজ্জেন্তো –
Evaṃ therena so peto katakammaṃ puṭṭho gāthāya vissajjento –
৫.
5.
‘‘কাযেন সঞ্ঞতো আসিং, ৰাচাযাসিমসঞ্ঞতো।
‘‘Kāyena saññato āsiṃ, vācāyāsimasaññato;
তেন মেতাদিসো ৰণ্ণো, যথা পস্সসি নারদা’’তি॥ –
Tena metādiso vaṇṇo, yathā passasi nāradā’’ti. –
আহ । তত্থ কাযেন সঞ্ঞতো আসিন্তি কাযিকেন সংযমেন সংযতো কাযদ্ৰারিকেন সংৰরেন সংৰুতো অহোসিং। ৰাচাযাসিমসঞ্ঞতোতি ৰাচায অসঞ্ঞতো ৰাচসিকেন অসংৰরেন সমন্নাগতো অহোসিং। তেনাতি তেন উভযেন সংযমেন অসংযমেন চ। মেতি ময্হং। এতাদিসো ৰণ্ণোতি এদিসো। যথা ত্ৰং, নারদ, পচ্চক্খতো পস্সসি, এৰরূপো, কাযেন মনুস্সসণ্ঠানো সুৰণ্ণৰণ্ণো, মুখেন সূকরসদিসো আসিন্তি যোজনা। ৰণ্ণসদ্দো হি ইধ ছৰিযং সণ্ঠানে চ দট্ঠব্বো।
Āha . Tattha kāyena saññato āsinti kāyikena saṃyamena saṃyato kāyadvārikena saṃvarena saṃvuto ahosiṃ. Vācāyāsimasaññatoti vācāya asaññato vācasikena asaṃvarena samannāgato ahosiṃ. Tenāti tena ubhayena saṃyamena asaṃyamena ca. Meti mayhaṃ. Etādiso vaṇṇoti ediso. Yathā tvaṃ, nārada, paccakkhato passasi, evarūpo, kāyena manussasaṇṭhāno suvaṇṇavaṇṇo, mukhena sūkarasadiso āsinti yojanā. Vaṇṇasaddo hi idha chaviyaṃ saṇṭhāne ca daṭṭhabbo.
এৰং পেতো থেরেন পুচ্ছিতো তমত্থং ৰিস্সজ্জেত্ৰা তমেৰ কারণং কত্ৰা থেরস্স ওৰাদং দেন্তো –
Evaṃ peto therena pucchito tamatthaṃ vissajjetvā tameva kāraṇaṃ katvā therassa ovādaṃ dento –
৬.
6.
‘‘তং ত্যাহং নারদ ব্রূমি, সামং দিট্ঠমিদং তযা।
‘‘Taṃ tyāhaṃ nārada brūmi, sāmaṃ diṭṭhamidaṃ tayā;
মাকাসি মুখসা পাপং, মা খো সূকরমুখো অহূ’’তি॥ –
Mākāsi mukhasā pāpaṃ, mā kho sūkaramukho ahū’’ti. –
গাথমাহ। তত্থ তন্তি তস্মা। ত্যাহন্তি তে অহং। নারদাতি থেরং আলপতি। ব্রূমীতি কথেমি। সামন্তি সযমেৰ। ইদন্তি অত্তনো সরীরং সন্ধায ৰদতি। অযঞ্হেত্থ অত্থো – যস্মা, ভন্তে নারদ, ইদং মম সরীরং গলতো পট্ঠায হেট্ঠা মনুস্সসণ্ঠানং, উপরি সূকরসণ্ঠানং, তযা পচ্চক্খতোৰ দিট্ঠং, তস্মা তে অহং ওৰাদৰসেন ৰদামীতি। কিন্তি চেতি আহ ‘‘মাকাসি মুখসা পাপং, মা খো সূকরমুখো অহূ’’তি। তত্থ মাতি পটিসেধে নিপাতো। মুখসাতি মুখেন। খোতি অৰধারণে, ৰাচায পাপকম্মং মাকাসি মা করোহি। মা খো সূকরমুখো অহূতি অহং ৰিয সূকরমুখো মা অহোসিযেৰ। সচে পন ত্ৰং মুখরো হুত্ৰা ৰাচায পাপং করেয্যাসি, একংসেন সূকরমুখো ভৰেয্যাসি, তস্মা মাকাসি মুখসা পাপন্তি ফলপটিসেধনমুখেনপি হেতুমেৰ পটিসেধেতি।
Gāthamāha. Tattha tanti tasmā. Tyāhanti te ahaṃ. Nāradāti theraṃ ālapati. Brūmīti kathemi. Sāmanti sayameva. Idanti attano sarīraṃ sandhāya vadati. Ayañhettha attho – yasmā, bhante nārada, idaṃ mama sarīraṃ galato paṭṭhāya heṭṭhā manussasaṇṭhānaṃ, upari sūkarasaṇṭhānaṃ, tayā paccakkhatova diṭṭhaṃ, tasmā te ahaṃ ovādavasena vadāmīti. Kinti ceti āha ‘‘mākāsi mukhasā pāpaṃ, mā kho sūkaramukho ahū’’ti. Tattha māti paṭisedhe nipāto. Mukhasāti mukhena. Khoti avadhāraṇe, vācāya pāpakammaṃ mākāsi mā karohi. Mākho sūkaramukho ahūti ahaṃ viya sūkaramukho mā ahosiyeva. Sace pana tvaṃ mukharo hutvā vācāya pāpaṃ kareyyāsi, ekaṃsena sūkaramukho bhaveyyāsi, tasmā mākāsi mukhasā pāpanti phalapaṭisedhanamukhenapi hetumeva paṭisedheti.
অথাযস্মা নারদো রাজগহে পিণ্ডায চরিত্ৰা পচ্ছাভত্তং পিণ্ডপাতপটিক্কন্তো চতুপরিসমজ্ঝে নিসিন্নস্স সত্থুনো তমত্থং আরোচেসি। সত্থা, ‘‘নারদ, পুব্বেৰ মযা সো সত্থো দিট্ঠো’’তি ৰত্ৰা অনেকাকারৰোকারং ৰচীদুচ্চরিতসন্নিস্সিতং আদীনৰং, ৰচীসুচরিতপটিসংযুত্তঞ্চ আনিসংসং পকাসেন্তো ধম্মং দেসেসি। সা দেসনা সম্পত্তপরিসায সাত্থিকা অহোসীতি।
Athāyasmā nārado rājagahe piṇḍāya caritvā pacchābhattaṃ piṇḍapātapaṭikkanto catuparisamajjhe nisinnassa satthuno tamatthaṃ ārocesi. Satthā, ‘‘nārada, pubbeva mayā so sattho diṭṭho’’ti vatvā anekākāravokāraṃ vacīduccaritasannissitaṃ ādīnavaṃ, vacīsucaritapaṭisaṃyuttañca ānisaṃsaṃ pakāsento dhammaṃ desesi. Sā desanā sampattaparisāya sātthikā ahosīti.
সূকরমুখপেতৰত্থুৰণ্ণনা নিট্ঠিতা।
Sūkaramukhapetavatthuvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পেতৰত্থুপাল়ি • Petavatthupāḷi / ২. সূকরমুখপেতৰত্থু • 2. Sūkaramukhapetavatthu
