| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
9. ஸூகஸுத்தங்
9. Sūkasuttaṃ
9. ஸாவத்தி²னிதா³னங் . ‘‘ஸெய்யதா²பி, பி⁴க்க²வே, ஸாலிஸூகங் வா யவஸூகங் வா மிச்சா²பணிஹிதங் ஹத்தே²ன வா பாதே³ன வா அக்கந்தங் ஹத்த²ங் வா பாத³ங் வா பி⁴ந்தி³ஸ்ஸதி 1, லோஹிதங் வா உப்பாதெ³ஸ்ஸதீதி – நேதங் டா²னங் விஜ்ஜதி. தங் கிஸ்ஸ ஹேது? மிச்சா²பணிஹிதத்தா, பி⁴க்க²வே, ஸூகஸ்ஸ. ஏவமேவ கோ², பி⁴க்க²வே, ஸோ வத பி⁴க்கு² மிச்சா²பணிஹிதாய தி³ட்டி²யா மிச்சா²பணிஹிதாய மக்³க³பா⁴வனாய அவிஜ்ஜங் பி⁴ந்தி³ஸ்ஸதி, விஜ்ஜங் உப்பாதெ³ஸ்ஸதி, நிப்³பா³னங் ஸச்சி²கரிஸ்ஸதீதி – நேதங் டா²னங் விஜ்ஜதி. தங் கிஸ்ஸ ஹேது? மிச்சா²பணிஹிதத்தா, பி⁴க்க²வே, தி³ட்டி²யா.
9. Sāvatthinidānaṃ . ‘‘Seyyathāpi, bhikkhave, sālisūkaṃ vā yavasūkaṃ vā micchāpaṇihitaṃ hatthena vā pādena vā akkantaṃ hatthaṃ vā pādaṃ vā bhindissati 2, lohitaṃ vā uppādessatīti – netaṃ ṭhānaṃ vijjati. Taṃ kissa hetu? Micchāpaṇihitattā, bhikkhave, sūkassa. Evameva kho, bhikkhave, so vata bhikkhu micchāpaṇihitāya diṭṭhiyā micchāpaṇihitāya maggabhāvanāya avijjaṃ bhindissati, vijjaṃ uppādessati, nibbānaṃ sacchikarissatīti – netaṃ ṭhānaṃ vijjati. Taṃ kissa hetu? Micchāpaṇihitattā, bhikkhave, diṭṭhiyā.
‘‘ஸெய்யதா²பி, பி⁴க்க²வே, ஸாலிஸூகங் வா யவஸூகங் வா ஸம்மாபணிஹிதங் ஹத்தே²ன வா பாதே³ன வா அக்கந்தங் ஹத்த²ங் வா பாத³ங் வா பி⁴ந்தி³ஸ்ஸதி, லோஹிதங் வா உப்பாதெ³ஸ்ஸதீதி – டா²னமேதங் விஜ்ஜதி. தங் கிஸ்ஸ ஹேது? ஸம்மாபணிஹிதத்தா, பி⁴க்க²வே , ஸூகஸ்ஸ. ஏவமேவ கோ², பி⁴க்க²வே, ஸோ வத பி⁴க்கு² ஸம்மாபணிஹிதாய தி³ட்டி²யா ஸம்மாபணிஹிதாய மக்³க³பா⁴வனாய அவிஜ்ஜங் பி⁴ந்தி³ஸ்ஸதி, விஜ்ஜங் உப்பாதெ³ஸ்ஸதி, நிப்³பா³னங் ஸச்சி²கரிஸ்ஸதீதி – டா²னமேதங் விஜ்ஜதி. தங் கிஸ்ஸ ஹேது? ஸம்மாபணிஹிதத்தா, பி⁴க்க²வே, தி³ட்டி²யா.
‘‘Seyyathāpi, bhikkhave, sālisūkaṃ vā yavasūkaṃ vā sammāpaṇihitaṃ hatthena vā pādena vā akkantaṃ hatthaṃ vā pādaṃ vā bhindissati, lohitaṃ vā uppādessatīti – ṭhānametaṃ vijjati. Taṃ kissa hetu? Sammāpaṇihitattā, bhikkhave , sūkassa. Evameva kho, bhikkhave, so vata bhikkhu sammāpaṇihitāya diṭṭhiyā sammāpaṇihitāya maggabhāvanāya avijjaṃ bhindissati, vijjaṃ uppādessati, nibbānaṃ sacchikarissatīti – ṭhānametaṃ vijjati. Taṃ kissa hetu? Sammāpaṇihitattā, bhikkhave, diṭṭhiyā.
‘‘கத²ஞ்ச, பி⁴க்க²வே, பி⁴க்கு² ஸம்மாபணிஹிதாய தி³ட்டி²யா ஸம்மாபணிஹிதாய மக்³க³பா⁴வனாய அவிஜ்ஜங் பி⁴ந்த³தி, விஜ்ஜங் உப்பாதே³தி, நிப்³பா³னங் ஸச்சி²கரோதீதி? இத⁴, பி⁴க்க²வே, பி⁴க்கு² ஸம்மாதி³ட்டி²ங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங்…பே॰… ஸம்மாஸமாதி⁴ங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங். ஏவங் கோ², பி⁴க்க²வே, பி⁴க்கு² ஸம்மாபணிஹிதாய தி³ட்டி²யா ஸம்மாபணிஹிதாய மக்³க³பா⁴வனாய அவிஜ்ஜங் பி⁴ந்த³தி, விஜ்ஜங் உப்பாதே³தி, நிப்³பா³னங் ஸச்சி²கரோதீ’’தி. நவமங்.
‘‘Kathañca, bhikkhave, bhikkhu sammāpaṇihitāya diṭṭhiyā sammāpaṇihitāya maggabhāvanāya avijjaṃ bhindati, vijjaṃ uppādeti, nibbānaṃ sacchikarotīti? Idha, bhikkhave, bhikkhu sammādiṭṭhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ kho, bhikkhave, bhikkhu sammāpaṇihitāya diṭṭhiyā sammāpaṇihitāya maggabhāvanāya avijjaṃ bhindati, vijjaṃ uppādeti, nibbānaṃ sacchikarotī’’ti. Navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. ஸூகஸுத்தவண்ணனா • 9. Sūkasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. ஸூகஸுத்தவண்ணனா • 9. Sūkasuttavaṇṇanā
