| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༩. སཱུཀསུཏྟཾ
9. Sūkasuttaṃ
༩. སཱཝཏྠིནིདཱནཾ ། ‘‘སེཡྻཐཱཔི, བྷིཀྑཝེ, སཱལིསཱུཀཾ ཝཱ ཡཝསཱུཀཾ ཝཱ མིཙྪཱཔཎིཧིཏཾ ཧཏྠེན ཝཱ པཱདེན ཝཱ ཨཀྐནྟཾ ཧཏྠཾ ཝཱ པཱདཾ ཝཱ བྷིནྡིསྶཏི 1, ལོཧིཏཾ ཝཱ ཨུཔྤཱདེསྶཏཱིཏི – ནེཏཾ ཋཱནཾ ཝིཛྫཏི། ཏཾ ཀིསྶ ཧེཏུ? མིཙྪཱཔཎིཧིཏཏྟཱ, བྷིཀྑཝེ, སཱུཀསྶ། ཨེཝམེཝ ཁོ, བྷིཀྑཝེ, སོ ཝཏ བྷིཀྑུ མིཙྪཱཔཎིཧིཏཱཡ དིཊྛིཡཱ མིཙྪཱཔཎིཧིཏཱཡ མགྒབྷཱཝནཱཡ ཨཝིཛྫཾ བྷིནྡིསྶཏི, ཝིཛྫཾ ཨུཔྤཱདེསྶཏི, ནིབྦཱནཾ སཙྪིཀརིསྶཏཱིཏི – ནེཏཾ ཋཱནཾ ཝིཛྫཏི། ཏཾ ཀིསྶ ཧེཏུ? མིཙྪཱཔཎིཧིཏཏྟཱ, བྷིཀྑཝེ, དིཊྛིཡཱ།
9. Sāvatthinidānaṃ . ‘‘Seyyathāpi, bhikkhave, sālisūkaṃ vā yavasūkaṃ vā micchāpaṇihitaṃ hatthena vā pādena vā akkantaṃ hatthaṃ vā pādaṃ vā bhindissati 2, lohitaṃ vā uppādessatīti – netaṃ ṭhānaṃ vijjati. Taṃ kissa hetu? Micchāpaṇihitattā, bhikkhave, sūkassa. Evameva kho, bhikkhave, so vata bhikkhu micchāpaṇihitāya diṭṭhiyā micchāpaṇihitāya maggabhāvanāya avijjaṃ bhindissati, vijjaṃ uppādessati, nibbānaṃ sacchikarissatīti – netaṃ ṭhānaṃ vijjati. Taṃ kissa hetu? Micchāpaṇihitattā, bhikkhave, diṭṭhiyā.
‘‘སེཡྻཐཱཔི, བྷིཀྑཝེ, སཱལིསཱུཀཾ ཝཱ ཡཝསཱུཀཾ ཝཱ སམྨཱཔཎིཧིཏཾ ཧཏྠེན ཝཱ པཱདེན ཝཱ ཨཀྐནྟཾ ཧཏྠཾ ཝཱ པཱདཾ ཝཱ བྷིནྡིསྶཏི, ལོཧིཏཾ ཝཱ ཨུཔྤཱདེསྶཏཱིཏི – ཋཱནམེཏཾ ཝིཛྫཏི། ཏཾ ཀིསྶ ཧེཏུ? སམྨཱཔཎིཧིཏཏྟཱ, བྷིཀྑཝེ , སཱུཀསྶ། ཨེཝམེཝ ཁོ, བྷིཀྑཝེ, སོ ཝཏ བྷིཀྑུ སམྨཱཔཎིཧིཏཱཡ དིཊྛིཡཱ སམྨཱཔཎིཧིཏཱཡ མགྒབྷཱཝནཱཡ ཨཝིཛྫཾ བྷིནྡིསྶཏི, ཝིཛྫཾ ཨུཔྤཱདེསྶཏི, ནིབྦཱནཾ སཙྪིཀརིསྶཏཱིཏི – ཋཱནམེཏཾ ཝིཛྫཏི། ཏཾ ཀིསྶ ཧེཏུ? སམྨཱཔཎིཧིཏཏྟཱ, བྷིཀྑཝེ, དིཊྛིཡཱ།
‘‘Seyyathāpi, bhikkhave, sālisūkaṃ vā yavasūkaṃ vā sammāpaṇihitaṃ hatthena vā pādena vā akkantaṃ hatthaṃ vā pādaṃ vā bhindissati, lohitaṃ vā uppādessatīti – ṭhānametaṃ vijjati. Taṃ kissa hetu? Sammāpaṇihitattā, bhikkhave , sūkassa. Evameva kho, bhikkhave, so vata bhikkhu sammāpaṇihitāya diṭṭhiyā sammāpaṇihitāya maggabhāvanāya avijjaṃ bhindissati, vijjaṃ uppādessati, nibbānaṃ sacchikarissatīti – ṭhānametaṃ vijjati. Taṃ kissa hetu? Sammāpaṇihitattā, bhikkhave, diṭṭhiyā.
‘‘ཀཐཉྩ, བྷིཀྑཝེ, བྷིཀྑུ སམྨཱཔཎིཧིཏཱཡ དིཊྛིཡཱ སམྨཱཔཎིཧིཏཱཡ མགྒབྷཱཝནཱཡ ཨཝིཛྫཾ བྷིནྡཏི, ཝིཛྫཾ ཨུཔྤཱདེཏི, ནིབྦཱནཾ སཙྪིཀརོཏཱིཏི? ཨིདྷ, བྷིཀྑཝེ, བྷིཀྑུ སམྨཱདིཊྛིཾ བྷཱཝེཏི ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ…པེ॰… སམྨཱསམཱདྷིཾ བྷཱཝེཏི ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ། ཨེཝཾ ཁོ, བྷིཀྑཝེ, བྷིཀྑུ སམྨཱཔཎིཧིཏཱཡ དིཊྛིཡཱ སམྨཱཔཎིཧིཏཱཡ མགྒབྷཱཝནཱཡ ཨཝིཛྫཾ བྷིནྡཏི, ཝིཛྫཾ ཨུཔྤཱདེཏི, ནིབྦཱནཾ སཙྪིཀརོཏཱི’’ཏི། ནཝམཾ།
‘‘Kathañca, bhikkhave, bhikkhu sammāpaṇihitāya diṭṭhiyā sammāpaṇihitāya maggabhāvanāya avijjaṃ bhindati, vijjaṃ uppādeti, nibbānaṃ sacchikarotīti? Idha, bhikkhave, bhikkhu sammādiṭṭhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ kho, bhikkhave, bhikkhu sammāpaṇihitāya diṭṭhiyā sammāpaṇihitāya maggabhāvanāya avijjaṃ bhindati, vijjaṃ uppādeti, nibbānaṃ sacchikarotī’’ti. Navamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༩. སཱུཀསུཏྟཝཎྞནཱ • 9. Sūkasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༩. སཱུཀསུཏྟཝཎྞནཱ • 9. Sūkasuttavaṇṇanā
