| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៩. សូកសុត្តវណ្ណនា
9. Sūkasuttavaṇṇanā
៩. សូកន្តិ សាលិយវាទីនំ វាលមាហ។ សោ ហិ និកន្តកសទិសោ បដិមុខគតំ ហត្ថំ វា បាទំ វា ភិន្ទតិ, តស្មា ភេទំ ឥច្ឆន្តេន ឧទ្ធគ្គំ កត្វា ឋបិតំ សម្មាបណិហិតំ នាម, តថា អដ្ឋបិតំ មិច្ឆាបណិហិតំ នាមាតិ វុត្តំ។ មិច្ឆាបណិហិតាយាតិ កម្មស្សកតបញ្ញាយ មិច្ឆាឋបនំ នាម – ‘‘ឥមេ សត្តា កម្មវសេន សុខទុក្ខំ បច្ចនុភវន្តិ, តំ បន កម្មំ ឥស្សរស្ស ឥច្ឆាវសេន ព្រហ្មា និម្មិនាតី’’តិអាទិនា មិច្ឆាបកប្បនំ។ កេចិ បន ‘‘នត្ថិ ទិន្នន្តិអាទិនា នយេន បវត្តិ, តស្ស វា ញាណស្ស អប្បវត្តី’’តិ វទន្តិ។ មគ្គភាវនាយាតិ ឯត្ថាបិ មិច្ឆាមគ្គស្ស បវត្តនំ, អរិយមគ្គស្ស វា អប្បវត្តនំ មិច្ឆាឋបនំ។ តេនាហ ‘‘អប្បវត្តិតត្តា’’តិ។ អវិជ្ជំ ភិន្ទិស្សតីតិ អវិជ្ជំ សមុច្ឆិន្ទិស្សតិ។ មគ្គនិស្សិតំ កត្វា មគ្គេ ឯវ បក្ខិបិត្វា។ តញ្ហិ ញាណំ មគ្គស្ស មូលការណំ មគ្គេ សិទ្ធេ តស្ស កិច្ចស្ស មត្ថកប្បត្តិតោ។ ‘‘សម្មាបណិហិតាយ ទិដ្ឋិយា សម្មាបណិហិតាយ មគ្គភាវនាយា’’តិ វុត្តត្តា មិស្សកមគ្គោ កថិតោ។ ឆវិភេទសទិសោ ចេត្ថ អវិជ្ជាភេទោ, លោហិតុប្បាទសទិសោ លោកុត្តរមគ្គភាវោ ទដ្ឋព្ពោ។
9.Sūkanti sāliyavādīnaṃ vālamāha. So hi nikantakasadiso paṭimukhagataṃ hatthaṃ vā pādaṃ vā bhindati, tasmā bhedaṃ icchantena uddhaggaṃ katvā ṭhapitaṃ sammāpaṇihitaṃ nāma, tathā aṭṭhapitaṃ micchāpaṇihitaṃ nāmāti vuttaṃ. Micchāpaṇihitāyāti kammassakatapaññāya micchāṭhapanaṃ nāma – ‘‘ime sattā kammavasena sukhadukkhaṃ paccanubhavanti, taṃ pana kammaṃ issarassa icchāvasena brahmā nimminātī’’tiādinā micchāpakappanaṃ. Keci pana ‘‘natthi dinnantiādinā nayena pavatti, tassa vā ñāṇassa appavattī’’ti vadanti. Maggabhāvanāyāti etthāpi micchāmaggassa pavattanaṃ, ariyamaggassa vā appavattanaṃ micchāṭhapanaṃ. Tenāha ‘‘appavattitattā’’ti. Avijjaṃ bhindissatīti avijjaṃ samucchindissati. Magganissitaṃ katvā magge eva pakkhipitvā. Tañhi ñāṇaṃ maggassa mūlakāraṇaṃ magge siddhe tassa kiccassa matthakappattito. ‘‘Sammāpaṇihitāya diṭṭhiyā sammāpaṇihitāya maggabhāvanāyā’’ti vuttattā missakamaggo kathito. Chavibhedasadiso cettha avijjābhedo, lohituppādasadiso lokuttaramaggabhāvo daṭṭhabbo.
សូកសុត្តវណ្ណនា និដ្ឋិតា។
Sūkasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៩. សូកសុត្តំ • 9. Sūkasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៩. សូកសុត្តវណ្ណនា • 9. Sūkasuttavaṇṇanā
