| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৭. সুখপত্থনাসুত্তং
7. Sukhapatthanāsuttaṃ
৭৬. ৰুত্তঞ্হেতং ভগৰতা, ৰুত্তমরহতাতি মে সুতং –
76. Vuttañhetaṃ bhagavatā, vuttamarahatāti me sutaṃ –
‘‘তীণিমানি, ভিক্খৰে, সুখানি পত্থযমানো সীলং রক্খেয্য পণ্ডিতো। কতমানি তীণি? পসংসা মে আগচ্ছতূতি 1 সীলং রক্খেয্য পণ্ডিতো, ভোগা মে উপ্পজ্জন্তূতি সীলং রক্খেয্য পণ্ডিতো, কাযস্স ভেদা পরং মরণা সুগতিং সগ্গং লোকং উপপজ্জিস্সামীতি সীলং রক্খেয্য পণ্ডিতো। ইমানি খো, ভিক্খৰে, তীণি সুখানি পত্থযমানো সীলং রক্খেয্য পণ্ডিতো’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Tīṇimāni, bhikkhave, sukhāni patthayamāno sīlaṃ rakkheyya paṇḍito. Katamāni tīṇi? Pasaṃsā me āgacchatūti 2 sīlaṃ rakkheyya paṇḍito, bhogā me uppajjantūti sīlaṃ rakkheyya paṇḍito, kāyassa bhedā paraṃ maraṇā sugatiṃ saggaṃ lokaṃ upapajjissāmīti sīlaṃ rakkheyya paṇḍito. Imāni kho, bhikkhave, tīṇi sukhāni patthayamāno sīlaṃ rakkheyya paṇḍito’’ti. Etamatthaṃ bhagavā avoca. Tatthetaṃ iti vuccati –
‘‘সীলং রক্খেয্য মেধাৰী, পত্থযানো তযো সুখে।
‘‘Sīlaṃ rakkheyya medhāvī, patthayāno tayo sukhe;
পসংসং ৰিত্তলাভঞ্চ, পেচ্চ সগ্গে পমোদনং॥
Pasaṃsaṃ vittalābhañca, pecca sagge pamodanaṃ.
‘‘অকরোন্তোপি চে পাপং, করোন্তমুপসেৰতি।
‘‘Akarontopi ce pāpaṃ, karontamupasevati;
সঙ্কিযো হোতি পাপস্মিং, অৰণ্ণো চস্স রূহতি॥
Saṅkiyo hoti pāpasmiṃ, avaṇṇo cassa rūhati.
‘‘যাদিসং কুরুতে মিত্তং, যাদিসং চূপসেৰতি।
‘‘Yādisaṃ kurute mittaṃ, yādisaṃ cūpasevati;
‘‘সেৰমানো সেৰমানং, সম্ফুট্ঠো সম্ফুসং পরং।
‘‘Sevamāno sevamānaṃ, samphuṭṭho samphusaṃ paraṃ;
সরো দিদ্ধো কলাপংৰ, অলিত্তমুপলিম্পতি।
Saro diddho kalāpaṃva, alittamupalimpati;
‘‘পূতিমচ্ছং কুসগ্গেন, যো নরো উপনয্হতি।
‘‘Pūtimacchaṃ kusaggena, yo naro upanayhati;
কুসাপি পূতি ৰাযন্তি, এৰং বালূপসেৰনা॥
Kusāpi pūti vāyanti, evaṃ bālūpasevanā.
‘‘তগরঞ্চ পলাসেন, যো নরো উপনয্হতি।
‘‘Tagarañca palāsena, yo naro upanayhati;
পত্তাপি সুরভি ৰাযন্তি, এৰং ধীরূপসেৰনা॥
Pattāpi surabhi vāyanti, evaṃ dhīrūpasevanā.
অসন্তে নুপসেৰেয্য, সন্তে সেৰেয্য পণ্ডিতো।
Asante nupaseveyya, sante seveyya paṇḍito;
অসন্তো নিরযং নেন্তি, সন্তো পাপেন্তি সুগ্গতি’’ন্তি॥
Asanto nirayaṃ nenti, santo pāpenti suggati’’nti.
অযম্পি অত্থো ৰুত্তো ভগৰতা, ইতি মে সুতন্তি। সত্তমং।
Ayampi attho vutto bhagavatā, iti me sutanti. Sattamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৭. সুখপত্থনাসুত্তৰণ্ণনা • 7. Sukhapatthanāsuttavaṇṇanā
