| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၂. သုခသုတ္တဝဏ္ဏနာ
2. Sukhasuttavaṇṇanā
၂၅၀. ဒုက္ခံ န ဟောတီတိ အဒုက္ခံ, သုခံ န ဟောတီတိ အသုခံ, မ-ကာရော ပဒသန္ဓိကရော။ အဒုက္ခမသုခန္တိ ဝေဒယိတသဒ္ဒာပေက္ခာယ နပုံသကနိဒ္ဒေသော။ သပရသန္တာနဂတေ သန္ဓာယ အဇ္ဈတ္တဗဟိဒ္ဓာဂဟဏန္တိ အာဟ ‘‘အတ္တနော စ ပရသ္သ စာ’’တိ။ တေန သဗ္ဗမ္ပိ ဝေဒယိတံ ဂဟိတန္တိ ဒဋ္ဌဗ္ဗံ ။ နသ္သနသဘာဝန္တိ ဣတ္တရခဏတာယ ဘင္ဂတော ဥဒ္ဓံ အပသ္သိတဗ္ဗသဘာဝံ။ ပလောကော ဘေဒော ဧတသ္သ အတ္ထီတိ ပလောကိနံ။ တေနာဟ ‘‘ဘိဇ္ဇနသဘာဝ’’န္တိ။ ဉာဏေန ဖုသိတ္ဝာ ဖုသိတ္ဝာတိ ပုဗ္ဗဘာဂေ ဝိပသ္သနာဉာဏေန အနိစ္စာ ပဘင္ဂုနောတိ အာရမ္မဏတော, ဥတ္တရကာလံ အသမ္မောဟတော မဂ္ဂပရမ္ပရာယ ဖုသိတ္ဝာ ဖုသိတ္ဝာ ဝယံ ပသ္သန္တော။ ဝိရဇ္ဇတီတိ မဂ္ဂဝိရာဂေန ဝိရဇ္ဇတိ။ သမ္မသနစာရဝေဒနာ ကထိတာ အာရဒ္ဓဝိပသ္သကာနံ ဝသေန ဒေသနာတိ။ လောကိယလောကုတ္တရေဟိ ဉာဏေဟိ ယာထာဝတော ပရိဇာနနံ ပဋိဝိဇ္ဈနံ ဉာဏဖုသနံ။
250. Dukkhaṃ na hotīti adukkhaṃ, sukhaṃ na hotīti asukhaṃ, ma-kāro padasandhikaro. Adukkhamasukhanti vedayitasaddāpekkhāya napuṃsakaniddeso. Saparasantānagate sandhāya ajjhattabahiddhāgahaṇanti āha ‘‘attano ca parassa cā’’ti. Tena sabbampi vedayitaṃ gahitanti daṭṭhabbaṃ . Nassanasabhāvanti ittarakhaṇatāya bhaṅgato uddhaṃ apassitabbasabhāvaṃ. Paloko bhedo etassa atthīti palokinaṃ. Tenāha ‘‘bhijjanasabhāva’’nti. Ñāṇena phusitvā phusitvāti pubbabhāge vipassanāñāṇena aniccā pabhaṅgunoti ārammaṇato, uttarakālaṃ asammohato maggaparamparāya phusitvā phusitvā vayaṃ passanto. Virajjatīti maggavirāgena virajjati. Sammasanacāravedanā kathitā āraddhavipassakānaṃ vasena desanāti. Lokiyalokuttarehi ñāṇehi yāthāvato parijānanaṃ paṭivijjhanaṃ ñāṇaphusanaṃ.
သုခသုတ္တဝဏ္ဏနာ နိဋ္ဌိတာ။
Sukhasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၂. သုခသုတ္တံ • 2. Sukhasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂. သုခသုတ္တဝဏ္ဏနာ • 2. Sukhasuttavaṇṇanā
