| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
(7) 2. ஸுக²வக்³க³வண்ணனா
(7) 2. Sukhavaggavaṇṇanā
65. து³தியஸ்ஸ பட²மே ஸப்³ப³காமனிப்ப²த்திமூலகங் ஸுக²ந்தி அனவஸேஸஉபபோ⁴க³பரிபோ⁴க³வத்து²னிப்ப²த்திஹேதுகங் காமஸுக²ங். பப்³ப³ஜ்ஜாமூலகங் ஸுக²ந்தி பப்³ப³ஜ்ஜாஹேதுகங் பவிவேகஸுக²ங்.
65. Dutiyassa paṭhame sabbakāmanipphattimūlakaṃ sukhanti anavasesaupabhogaparibhogavatthunipphattihetukaṃ kāmasukhaṃ. Pabbajjāmūlakaṃ sukhanti pabbajjāhetukaṃ pavivekasukhaṃ.
66. து³தியே காமேதி பஞ்ச காமகு³ணே, ஸப்³பே³பி வா தேபூ⁴மகே த⁴ம்மே. வுத்தஞ்ஹேதங் ‘‘ஸப்³பே³பி தேபூ⁴மகா த⁴ம்மா கமனீயட்டே²ன காமா’’தி (மஹானி॰ 1). நெக்க²ம்மங் வுச்சதி பப்³ப³ஜ்ஜா க⁴ரப³ந்த⁴னதோ நிக்க²ந்தத்தா. நிப்³பா³னமேவ வா –
66. Dutiye kāmeti pañca kāmaguṇe, sabbepi vā tebhūmake dhamme. Vuttañhetaṃ ‘‘sabbepi tebhūmakā dhammā kamanīyaṭṭhena kāmā’’ti (mahāni. 1). Nekkhammaṃ vuccati pabbajjā gharabandhanato nikkhantattā. Nibbānameva vā –
‘‘பப்³ப³ஜ்ஜா பட²மங் ஜா²னங், நிப்³பா³னஞ்ச விபஸ்ஸனா;
‘‘Pabbajjā paṭhamaṃ jhānaṃ, nibbānañca vipassanā;
ஸப்³பே³பி குஸலா த⁴ம்மா, நெக்க²ம்மந்தி பவுச்சரே’’தி. (இதிவு॰ அட்ட²॰ 109) –
Sabbepi kusalā dhammā, nekkhammanti pavuccare’’ti. (itivu. aṭṭha. 109) –
ஹி வுத்தங்.
Hi vuttaṃ.
67. ததியே உபதீ⁴ வுச்சந்தி பஞ்சுபாதா³னக்க²ந்தா⁴, தன்னிஸ்ஸிதங் ஸுக²ங் உபதி⁴ஸுக²ங். தப்படிபக்க²தோ நிருபதி⁴ஸுக²ங் லோகுத்தரஸுக²ங்.
67. Tatiye upadhī vuccanti pañcupādānakkhandhā, tannissitaṃ sukhaṃ upadhisukhaṃ. Tappaṭipakkhato nirupadhisukhaṃ lokuttarasukhaṃ.
68. சதுத்தே² வட்டபரியாபன்னங் ஸுக²ங் வட்டஸுக²ங். நிப்³பா³னாரம்மணங் ஸுக²ங் விவட்டஸுக²ங்.
68. Catutthe vaṭṭapariyāpannaṃ sukhaṃ vaṭṭasukhaṃ. Nibbānārammaṇaṃ sukhaṃ vivaṭṭasukhaṃ.
69. பஞ்சமே ஸங்கிலேஸந்தி ஸங்கிலிட்ட²ங். தேனாஹ ‘‘வட்டகா³மிஸுக²’’ந்தி. விவட்டஸுக²ந்தி மக்³க³ப²லஸஹக³தங் ஸுக²ங்.
69. Pañcame saṃkilesanti saṃkiliṭṭhaṃ. Tenāha ‘‘vaṭṭagāmisukha’’nti. Vivaṭṭasukhanti maggaphalasahagataṃ sukhaṃ.
70. ச²ட்டே² அரியானமேவ ஸுக²ங் அரியஸுக²ங், அரியஞ்ச தங் ஸுக²ஞ்சாதிபி அரியஸுக²ங். அனரியானமேவ ஸுக²ங் அனரியஸுக²ங். அனரியஞ்ச தங் ஸுக²ஞ்சாதிபி அனரியஸுக²ங்.
70. Chaṭṭhe ariyānameva sukhaṃ ariyasukhaṃ, ariyañca taṃ sukhañcātipi ariyasukhaṃ. Anariyānameva sukhaṃ anariyasukhaṃ. Anariyañca taṃ sukhañcātipi anariyasukhaṃ.
71. ஸத்தமே தந்தி சேதஸிகஸுக²ங்.
71. Sattame tanti cetasikasukhaṃ.
72. அட்ட²மே ஸஹ பீதியா வத்ததீதி ஸப்பீதிகங், பீதிஸஹக³தங் ஸுக²ங். ஸபா⁴வதோ விராக³தோ ச நத்தி² ஏதஸ்ஸ பீதீதி நிப்பீதிகங் ஸுக²ங். அட்ட²கதா²யங் பனெத்த² ஜா²னஸுக²மேவ உத்³த⁴டங், ததா² ச ‘‘லோகியஸப்பீதிகஸுக²தோ லோகியனிப்பீதிகஸுக²ங் அக்³க³’’ந்தி வுத்தங். லோகியனிப்பீதிகம்பி ஹி அக்³க³ங் லப்³ப⁴தேவாதி பூ⁴மந்தரங் பி⁴ந்தி³த்வா அக்³க³பா⁴வோ வேதி³தப்³போ³.
72. Aṭṭhame saha pītiyā vattatīti sappītikaṃ, pītisahagataṃ sukhaṃ. Sabhāvato virāgato ca natthi etassa pītīti nippītikaṃ sukhaṃ. Aṭṭhakathāyaṃ panettha jhānasukhameva uddhaṭaṃ, tathā ca ‘‘lokiyasappītikasukhato lokiyanippītikasukhaṃ agga’’nti vuttaṃ. Lokiyanippītikampi hi aggaṃ labbhatevāti bhūmantaraṃ bhinditvā aggabhāvo veditabbo.
73. நவமே ஸாதஸபா⁴வமேவ ஸுக²ங் ஸாதஸுக²ங், ந உபெக்கா²ஸுக²ங் விய அஸாதஸபா⁴வங். காமஞ்செத்த² காயவிஞ்ஞாணஸஹக³தம்பி ஸாதஸுக²மேவ, அட்ட²கதா²யங் பன ‘‘தீஸு ஜா²னேஸு ஸுக²’’ந்தேவ வுத்தங்.
73. Navame sātasabhāvameva sukhaṃ sātasukhaṃ, na upekkhāsukhaṃ viya asātasabhāvaṃ. Kāmañcettha kāyaviññāṇasahagatampi sātasukhameva, aṭṭhakathāyaṃ pana ‘‘tīsu jhānesu sukha’’nteva vuttaṃ.
74. த³ஸமே ஸமாதி⁴ஸம்பயுத்தங் ஸுக²ங் ஸமாதி⁴ஸுக²ங். ந ஸமாதி⁴ஸம்பயுத்தங் ஸுக²ங் அஸமாதி⁴ஸுக²ங்.
74. Dasame samādhisampayuttaṃ sukhaṃ samādhisukhaṃ. Na samādhisampayuttaṃ sukhaṃ asamādhisukhaṃ.
75. ஏகாத³ஸமே ஸுத்தந்தகதா² ஏஸாதி ‘‘ஸப்பீதிகங் ஜா²னத்³வய’’ந்தி வுத்தங்.
75. Ekādasame suttantakathā esāti ‘‘sappītikaṃ jhānadvaya’’nti vuttaṃ.
77. தேரஸமே ரூபஜ்ஜா²னங் ரூபங் உத்தரபத³லோபேன, தங் ஆரம்மணங் ஏதஸ்ஸாதி ரூபாரம்மணங். சதுத்த²ஜ்ஜா²னக்³க³ஹணங் பன யத³ஸ்ஸ படியோகீ³, தேன ஸமானயோக³க்க²மத³ஸ்ஸனபரங். யங் கிஞ்சி ரூபந்தி யங் கிஞ்சி ருப்பனலக்க²ணங் ரூபங். தப்படிக்கே²பேன அரூபங் வேதி³தப்³ப³ங்.
77. Terasame rūpajjhānaṃ rūpaṃ uttarapadalopena, taṃ ārammaṇaṃ etassāti rūpārammaṇaṃ. Catutthajjhānaggahaṇaṃ pana yadassa paṭiyogī, tena samānayogakkhamadassanaparaṃ. Yaṃ kiñci rūpanti yaṃ kiñci ruppanalakkhaṇaṃ rūpaṃ. Tappaṭikkhepena arūpaṃ veditabbaṃ.
ஸுக²வக்³க³வண்ணனா நிட்டி²தா.
Sukhavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / (7) 2. ஸுக²வக்³கோ³ • (7) 2. Sukhavaggo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / (7) 2. ஸுக²வக்³க³வண்ணனா • (7) 2. Sukhavaggavaṇṇanā
