| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
(৭) ২. সুখৰগ্গৰণ্ণনা
(7) 2. Sukhavaggavaṇṇanā
৬৫. দুতিযস্স পঠমে গিহিসুখন্তি গিহীনং সব্বকামনিপ্ফত্তিমূলকং সুখং। পব্বজিতসুখন্তি পব্বজিতানং পব্বজ্জামূলকং সুখং।
65. Dutiyassa paṭhame gihisukhanti gihīnaṃ sabbakāmanipphattimūlakaṃ sukhaṃ. Pabbajitasukhanti pabbajitānaṃ pabbajjāmūlakaṃ sukhaṃ.
৬৬. দুতিযে কামসুখন্তি কামে আরব্ভ উপ্পজ্জনকসুখং। নেক্খম্মসুখন্তি নেক্খম্মং ৰুচ্চতি পব্বজ্জা, তং আরব্ভ উপ্পজ্জনকসুখং।
66. Dutiye kāmasukhanti kāme ārabbha uppajjanakasukhaṃ. Nekkhammasukhanti nekkhammaṃ vuccati pabbajjā, taṃ ārabbha uppajjanakasukhaṃ.
৬৭. ততিযে উপধিসুখন্তি তেভূমকসুখং। নিরুপধিসুখন্তি লোকুত্তরসুখং।
67. Tatiye upadhisukhanti tebhūmakasukhaṃ. Nirupadhisukhanti lokuttarasukhaṃ.
৬৮. চতুত্থে সাসৰসুখন্তি আসৰানং পচ্চযভূতং ৰট্টসুখং। অনাসৰসুখন্তি তেসং অপচ্চযভূতং ৰিৰট্টসুখং।
68. Catutthe sāsavasukhanti āsavānaṃ paccayabhūtaṃ vaṭṭasukhaṃ. Anāsavasukhanti tesaṃ apaccayabhūtaṃ vivaṭṭasukhaṃ.
৬৯. পঞ্চমে সামিসন্তি সংকিলেসং ৰট্টগামিসুখং। নিরামিসন্তি নিক্কিলেসং ৰিৰট্টগামিসুখং।
69. Pañcame sāmisanti saṃkilesaṃ vaṭṭagāmisukhaṃ. Nirāmisanti nikkilesaṃ vivaṭṭagāmisukhaṃ.
৭০. ছট্ঠে অরিযসুখন্তি অপুথুজ্জনসুখং। অনরিযসুখন্তি পুথুজ্জনসুখং।
70. Chaṭṭhe ariyasukhanti aputhujjanasukhaṃ. Anariyasukhanti puthujjanasukhaṃ.
৭১. সত্তমে কাযিকন্তি কাযৰিঞ্ঞাণসহজাতং। চেতসিকন্তি মনোদ্ৰারিকসুখং। তং লোকিযলোকুত্তরমিস্সকং কথিতং।
71. Sattame kāyikanti kāyaviññāṇasahajātaṃ. Cetasikanti manodvārikasukhaṃ. Taṃ lokiyalokuttaramissakaṃ kathitaṃ.
৭২. অট্ঠমে সপ্পীতিকন্তি পঠমদুতিযজ্ঝানসুখং। নিপ্পীতিকন্তি ততিযচতুত্থজ্ঝানসুখং। তত্থ লোকিযসপ্পীতিকতো লোকিযনিপ্পীতিকং, লোকুত্তরসপ্পীতিকতো চ লোকুত্তরনিপ্পীতিকং অগ্গন্তি এৰং ভুম্মন্তরং অভিন্দিত্ৰা অগ্গভাৰো ৰেদিতব্বো।
72. Aṭṭhame sappītikanti paṭhamadutiyajjhānasukhaṃ. Nippītikanti tatiyacatutthajjhānasukhaṃ. Tattha lokiyasappītikato lokiyanippītikaṃ, lokuttarasappītikato ca lokuttaranippītikaṃ agganti evaṃ bhummantaraṃ abhinditvā aggabhāvo veditabbo.
৭৩. নৰমে সাতসুখন্তি তীসু ঝানেসু সুখং। উপেক্খাসুখন্তি চতুত্থজ্ঝানসুখং।
73. Navame sātasukhanti tīsu jhānesu sukhaṃ. Upekkhāsukhanti catutthajjhānasukhaṃ.
৭৪. দসমে সমাধিসুখন্তি অপ্পনং ৰা উপচারং ৰা পত্তসুখং। অসমাধিসুখন্তি তদুভযং অপ্পত্তসুখং।
74. Dasame samādhisukhanti appanaṃ vā upacāraṃ vā pattasukhaṃ. Asamādhisukhanti tadubhayaṃ appattasukhaṃ.
৭৫. একাদসমে সপ্পীতিকারম্মণন্তি সপ্পীতিকং ঝানদ্ৰযং পচ্চৰেক্খন্তস্স উপ্পন্নসুখং। নিপ্পীতিকারম্মণেপি এসেৰ নযো। দ্ৰাদসমেপি ইমিনাৰ উপাযেন অত্থো ৰেদিতব্বো।
75. Ekādasame sappītikārammaṇanti sappītikaṃ jhānadvayaṃ paccavekkhantassa uppannasukhaṃ. Nippītikārammaṇepi eseva nayo. Dvādasamepi imināva upāyena attho veditabbo.
৭৭. তেরসমে রূপারম্মণন্তি রূপাৰচরচতুত্থজ্ঝানারম্মণং, যংকিঞ্চি রূপং আরব্ভ উপ্পজ্জনকং ৰা। অরূপারম্মণন্তি অরূপাৰচরজ্ঝানারম্মণং, যংকিঞ্চি অরূপং আরব্ভ উপ্পজ্জনকং ৰাতি।
77. Terasame rūpārammaṇanti rūpāvacaracatutthajjhānārammaṇaṃ, yaṃkiñci rūpaṃ ārabbha uppajjanakaṃ vā. Arūpārammaṇanti arūpāvacarajjhānārammaṇaṃ, yaṃkiñci arūpaṃ ārabbha uppajjanakaṃ vāti.
সুখৰগ্গো দুতিযো।
Sukhavaggo dutiyo.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / (৭) ২. সুখৰগ্গো • (7) 2. Sukhavaggo
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / (৭) ২. সুখৰগ্গৰণ্ণনা • (7) 2. Sukhavaggavaṇṇanā
