| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
(७) २. सुखवग्गवण्णना
(7) 2. Sukhavaggavaṇṇanā
६५. दुतियस्स पठमे सब्बकामनिप्फत्तिमूलकं सुखन्ति अनवसेसउपभोगपरिभोगवत्थुनिप्फत्तिहेतुकं कामसुखं। पब्बज्जामूलकं सुखन्ति पब्बज्जाहेतुकं पविवेकसुखं।
65. Dutiyassa paṭhame sabbakāmanipphattimūlakaṃ sukhanti anavasesaupabhogaparibhogavatthunipphattihetukaṃ kāmasukhaṃ. Pabbajjāmūlakaṃ sukhanti pabbajjāhetukaṃ pavivekasukhaṃ.
६६. दुतिये कामेति पञ्च कामगुणे, सब्बेपि वा तेभूमके धम्मे। वुत्तञ्हेतं ‘‘सब्बेपि तेभूमका धम्मा कमनीयट्ठेन कामा’’ति (महानि॰ १)। नेक्खम्मं वुच्चति पब्बज्जा घरबन्धनतो निक्खन्तत्ता। निब्बानमेव वा –
66. Dutiye kāmeti pañca kāmaguṇe, sabbepi vā tebhūmake dhamme. Vuttañhetaṃ ‘‘sabbepi tebhūmakā dhammā kamanīyaṭṭhena kāmā’’ti (mahāni. 1). Nekkhammaṃ vuccati pabbajjā gharabandhanato nikkhantattā. Nibbānameva vā –
‘‘पब्बज्जा पठमं झानं, निब्बानञ्च विपस्सना।
‘‘Pabbajjā paṭhamaṃ jhānaṃ, nibbānañca vipassanā;
सब्बेपि कुसला धम्मा, नेक्खम्मन्ति पवुच्चरे’’ति॥ (इतिवु॰ अट्ठ॰ १०९) –
Sabbepi kusalā dhammā, nekkhammanti pavuccare’’ti. (itivu. aṭṭha. 109) –
हि वुत्तं।
Hi vuttaṃ.
६७. ततिये उपधी वुच्चन्ति पञ्चुपादानक्खन्धा, तन्निस्सितं सुखं उपधिसुखं। तप्पटिपक्खतो निरुपधिसुखं लोकुत्तरसुखं।
67. Tatiye upadhī vuccanti pañcupādānakkhandhā, tannissitaṃ sukhaṃ upadhisukhaṃ. Tappaṭipakkhato nirupadhisukhaṃ lokuttarasukhaṃ.
६८. चतुत्थे वट्टपरियापन्नं सुखं वट्टसुखं। निब्बानारम्मणं सुखं विवट्टसुखं।
68. Catutthe vaṭṭapariyāpannaṃ sukhaṃ vaṭṭasukhaṃ. Nibbānārammaṇaṃ sukhaṃ vivaṭṭasukhaṃ.
६९. पञ्चमे संकिलेसन्ति संकिलिट्ठं। तेनाह ‘‘वट्टगामिसुख’’न्ति। विवट्टसुखन्ति मग्गफलसहगतं सुखं।
69. Pañcame saṃkilesanti saṃkiliṭṭhaṃ. Tenāha ‘‘vaṭṭagāmisukha’’nti. Vivaṭṭasukhanti maggaphalasahagataṃ sukhaṃ.
७०. छट्ठे अरियानमेव सुखं अरियसुखं, अरियञ्च तं सुखञ्चातिपि अरियसुखं। अनरियानमेव सुखं अनरियसुखं। अनरियञ्च तं सुखञ्चातिपि अनरियसुखं।
70. Chaṭṭhe ariyānameva sukhaṃ ariyasukhaṃ, ariyañca taṃ sukhañcātipi ariyasukhaṃ. Anariyānameva sukhaṃ anariyasukhaṃ. Anariyañca taṃ sukhañcātipi anariyasukhaṃ.
७१. सत्तमे तन्ति चेतसिकसुखं।
71. Sattame tanti cetasikasukhaṃ.
७२. अट्ठमे सह पीतिया वत्ततीति सप्पीतिकं, पीतिसहगतं सुखं। सभावतो विरागतो च नत्थि एतस्स पीतीति निप्पीतिकं सुखं। अट्ठकथायं पनेत्थ झानसुखमेव उद्धटं, तथा च ‘‘लोकियसप्पीतिकसुखतो लोकियनिप्पीतिकसुखं अग्ग’’न्ति वुत्तं। लोकियनिप्पीतिकम्पि हि अग्गं लब्भतेवाति भूमन्तरं भिन्दित्वा अग्गभावो वेदितब्बो।
72. Aṭṭhame saha pītiyā vattatīti sappītikaṃ, pītisahagataṃ sukhaṃ. Sabhāvato virāgato ca natthi etassa pītīti nippītikaṃ sukhaṃ. Aṭṭhakathāyaṃ panettha jhānasukhameva uddhaṭaṃ, tathā ca ‘‘lokiyasappītikasukhato lokiyanippītikasukhaṃ agga’’nti vuttaṃ. Lokiyanippītikampi hi aggaṃ labbhatevāti bhūmantaraṃ bhinditvā aggabhāvo veditabbo.
७३. नवमे सातसभावमेव सुखं सातसुखं, न उपेक्खासुखं विय असातसभावं। कामञ्चेत्थ कायविञ्ञाणसहगतम्पि सातसुखमेव, अट्ठकथायं पन ‘‘तीसु झानेसु सुख’’न्तेव वुत्तं।
73. Navame sātasabhāvameva sukhaṃ sātasukhaṃ, na upekkhāsukhaṃ viya asātasabhāvaṃ. Kāmañcettha kāyaviññāṇasahagatampi sātasukhameva, aṭṭhakathāyaṃ pana ‘‘tīsu jhānesu sukha’’nteva vuttaṃ.
७४. दसमे समाधिसम्पयुत्तं सुखं समाधिसुखं। न समाधिसम्पयुत्तं सुखं असमाधिसुखं।
74. Dasame samādhisampayuttaṃ sukhaṃ samādhisukhaṃ. Na samādhisampayuttaṃ sukhaṃ asamādhisukhaṃ.
७५. एकादसमे सुत्तन्तकथा एसाति ‘‘सप्पीतिकं झानद्वय’’न्ति वुत्तं।
75. Ekādasame suttantakathā esāti ‘‘sappītikaṃ jhānadvaya’’nti vuttaṃ.
७७. तेरसमे रूपज्झानं रूपं उत्तरपदलोपेन, तं आरम्मणं एतस्साति रूपारम्मणं। चतुत्थज्झानग्गहणं पन यदस्स पटियोगी, तेन समानयोगक्खमदस्सनपरं। यं किञ्चि रूपन्ति यं किञ्चि रुप्पनलक्खणं रूपं। तप्पटिक्खेपेन अरूपं वेदितब्बं।
77. Terasame rūpajjhānaṃ rūpaṃ uttarapadalopena, taṃ ārammaṇaṃ etassāti rūpārammaṇaṃ. Catutthajjhānaggahaṇaṃ pana yadassa paṭiyogī, tena samānayogakkhamadassanaparaṃ. Yaṃ kiñci rūpanti yaṃ kiñci ruppanalakkhaṇaṃ rūpaṃ. Tappaṭikkhepena arūpaṃ veditabbaṃ.
सुखवग्गवण्णना निट्ठिता।
Sukhavaggavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / (७) २. सुखवग्गो • (7) 2. Sukhavaggo
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / (७) २. सुखवग्गवण्णना • (7) 2. Sukhavaggavaṇṇanā
