| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
(๗) ๒. สุขวคฺควณฺณนา
(7) 2. Sukhavaggavaṇṇanā
๖๕. ทุติยสฺส ปฐเม คิหิสุขนฺติ คิหีนํ สพฺพกามนิปฺผตฺติมูลกํ สุขํฯ ปพฺพชิตสุขนฺติ ปพฺพชิตานํ ปพฺพชฺชามูลกํ สุขํฯ
65. Dutiyassa paṭhame gihisukhanti gihīnaṃ sabbakāmanipphattimūlakaṃ sukhaṃ. Pabbajitasukhanti pabbajitānaṃ pabbajjāmūlakaṃ sukhaṃ.
๖๖. ทุติเย กามสุขนฺติ กาเม อารพฺภ อุปฺปชฺชนกสุขํฯ เนกฺขมฺมสุขนฺติ เนกฺขมฺมํ วุจฺจติ ปพฺพชฺชา, ตํ อารพฺภ อุปฺปชฺชนกสุขํฯ
66. Dutiye kāmasukhanti kāme ārabbha uppajjanakasukhaṃ. Nekkhammasukhanti nekkhammaṃ vuccati pabbajjā, taṃ ārabbha uppajjanakasukhaṃ.
๖๗. ตติเย อุปธิสุขนฺติ เตภูมกสุขํฯ นิรุปธิสุขนฺติ โลกุตฺตรสุขํฯ
67. Tatiye upadhisukhanti tebhūmakasukhaṃ. Nirupadhisukhanti lokuttarasukhaṃ.
๖๘. จตุเตฺถ สาสวสุขนฺติ อาสวานํ ปจฺจยภูตํ วฎฺฎสุขํฯ อนาสวสุขนฺติ เตสํ อปจฺจยภูตํ วิวฎฺฎสุขํฯ
68. Catutthe sāsavasukhanti āsavānaṃ paccayabhūtaṃ vaṭṭasukhaṃ. Anāsavasukhanti tesaṃ apaccayabhūtaṃ vivaṭṭasukhaṃ.
๖๙. ปญฺจเม สามิสนฺติ สํกิเลสํ วฎฺฎคามิสุขํฯ นิรามิสนฺติ นิกฺกิเลสํ วิวฎฺฎคามิสุขํฯ
69. Pañcame sāmisanti saṃkilesaṃ vaṭṭagāmisukhaṃ. Nirāmisanti nikkilesaṃ vivaṭṭagāmisukhaṃ.
๗๐. ฉเฎฺฐ อริยสุขนฺติ อปุถุชฺชนสุขํฯ อนริยสุขนฺติ ปุถุชฺชนสุขํฯ
70. Chaṭṭhe ariyasukhanti aputhujjanasukhaṃ. Anariyasukhanti puthujjanasukhaṃ.
๗๑. สตฺตเม กายิกนฺติ กายวิญฺญาณสหชาตํฯ เจตสิกนฺติ มโนทฺวาริกสุขํฯ ตํ โลกิยโลกุตฺตรมิสฺสกํ กถิตํฯ
71. Sattame kāyikanti kāyaviññāṇasahajātaṃ. Cetasikanti manodvārikasukhaṃ. Taṃ lokiyalokuttaramissakaṃ kathitaṃ.
๗๒. อฎฺฐเม สปฺปีติกนฺติ ปฐมทุติยชฺฌานสุขํฯ นิปฺปีติกนฺติ ตติยจตุตฺถชฺฌานสุขํฯ ตตฺถ โลกิยสปฺปีติกโต โลกิยนิปฺปีติกํ, โลกุตฺตรสปฺปีติกโต จ โลกุตฺตรนิปฺปีติกํ อคฺคนฺติ เอวํ ภุมฺมนฺตรํ อภินฺทิตฺวา อคฺคภาโว เวทิตโพฺพฯ
72. Aṭṭhame sappītikanti paṭhamadutiyajjhānasukhaṃ. Nippītikanti tatiyacatutthajjhānasukhaṃ. Tattha lokiyasappītikato lokiyanippītikaṃ, lokuttarasappītikato ca lokuttaranippītikaṃ agganti evaṃ bhummantaraṃ abhinditvā aggabhāvo veditabbo.
๗๓. นวเม สาตสุขนฺติ ตีสุ ฌาเนสุ สุขํฯ อุเปกฺขาสุขนฺติ จตุตฺถชฺฌานสุขํฯ
73. Navame sātasukhanti tīsu jhānesu sukhaṃ. Upekkhāsukhanti catutthajjhānasukhaṃ.
๗๔. ทสเม สมาธิสุขนฺติ อปฺปนํ วา อุปจารํ วา ปตฺตสุขํฯ อสมาธิสุขนฺติ ตทุภยํ อปฺปตฺตสุขํฯ
74. Dasame samādhisukhanti appanaṃ vā upacāraṃ vā pattasukhaṃ. Asamādhisukhanti tadubhayaṃ appattasukhaṃ.
๗๕. เอกาทสเม สปฺปีติการมฺมณนฺติ สปฺปีติกํ ฌานทฺวยํ ปจฺจเวกฺขนฺตสฺส อุปฺปนฺนสุขํฯ นิปฺปีติการมฺมเณปิ เอเสว นโยฯ ทฺวาทสเมปิ อิมินาว อุปาเยน อโตฺถ เวทิตโพฺพฯ
75. Ekādasame sappītikārammaṇanti sappītikaṃ jhānadvayaṃ paccavekkhantassa uppannasukhaṃ. Nippītikārammaṇepi eseva nayo. Dvādasamepi imināva upāyena attho veditabbo.
๗๗. เตรสเม รูปารมฺมณนฺติ รูปาวจรจตุตฺถชฺฌานารมฺมณํ, ยํกิญฺจิ รูปํ อารพฺภ อุปฺปชฺชนกํ วาฯ อรูปารมฺมณนฺติ อรูปาวจรชฺฌานารมฺมณํ, ยํกิญฺจิ อรูปํ อารพฺภ อุปฺปชฺชนกํ วาติฯ
77. Terasame rūpārammaṇanti rūpāvacaracatutthajjhānārammaṇaṃ, yaṃkiñci rūpaṃ ārabbha uppajjanakaṃ vā. Arūpārammaṇanti arūpāvacarajjhānārammaṇaṃ, yaṃkiñci arūpaṃ ārabbha uppajjanakaṃ vāti.
สุขวโคฺค ทุติโยฯ
Sukhavaggo dutiyo.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / (๗) ๒. สุขวโคฺค • (7) 2. Sukhavaggo
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / (๗) ๒. สุขวคฺควณฺณนา • (7) 2. Sukhavaggavaṇṇanā
