| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
(៧) ២. សុខវគ្គវណ្ណនា
(7) 2. Sukhavaggavaṇṇanā
៦៥. ទុតិយស្ស បឋមេ គិហិសុខន្តិ គិហីនំ សព្ពកាមនិប្ផត្តិមូលកំ សុខំ។ បព្ពជិតសុខន្តិ បព្ពជិតានំ បព្ពជ្ជាមូលកំ សុខំ។
65. Dutiyassa paṭhame gihisukhanti gihīnaṃ sabbakāmanipphattimūlakaṃ sukhaṃ. Pabbajitasukhanti pabbajitānaṃ pabbajjāmūlakaṃ sukhaṃ.
៦៦. ទុតិយេ កាមសុខន្តិ កាមេ អារព្ភ ឧប្បជ្ជនកសុខំ។ នេក្ខម្មសុខន្តិ នេក្ខម្មំ វុច្ចតិ បព្ពជ្ជា, តំ អារព្ភ ឧប្បជ្ជនកសុខំ។
66. Dutiye kāmasukhanti kāme ārabbha uppajjanakasukhaṃ. Nekkhammasukhanti nekkhammaṃ vuccati pabbajjā, taṃ ārabbha uppajjanakasukhaṃ.
៦៧. តតិយេ ឧបធិសុខន្តិ តេភូមកសុខំ។ និរុបធិសុខន្តិ លោកុត្តរសុខំ។
67. Tatiye upadhisukhanti tebhūmakasukhaṃ. Nirupadhisukhanti lokuttarasukhaṃ.
៦៨. ចតុត្ថេ សាសវសុខន្តិ អាសវានំ បច្ចយភូតំ វដ្ដសុខំ។ អនាសវសុខន្តិ តេសំ អបច្ចយភូតំ វិវដ្ដសុខំ។
68. Catutthe sāsavasukhanti āsavānaṃ paccayabhūtaṃ vaṭṭasukhaṃ. Anāsavasukhanti tesaṃ apaccayabhūtaṃ vivaṭṭasukhaṃ.
៦៩. បញ្ចមេ សាមិសន្តិ សំកិលេសំ វដ្ដគាមិសុខំ។ និរាមិសន្តិ និក្កិលេសំ វិវដ្ដគាមិសុខំ។
69. Pañcame sāmisanti saṃkilesaṃ vaṭṭagāmisukhaṃ. Nirāmisanti nikkilesaṃ vivaṭṭagāmisukhaṃ.
៧០. ឆដ្ឋេ អរិយសុខន្តិ អបុថុជ្ជនសុខំ។ អនរិយសុខន្តិ បុថុជ្ជនសុខំ។
70. Chaṭṭhe ariyasukhanti aputhujjanasukhaṃ. Anariyasukhanti puthujjanasukhaṃ.
៧១. សត្តមេ កាយិកន្តិ កាយវិញ្ញាណសហជាតំ។ ចេតសិកន្តិ មនោទ្វារិកសុខំ។ តំ លោកិយលោកុត្តរមិស្សកំ កថិតំ។
71. Sattame kāyikanti kāyaviññāṇasahajātaṃ. Cetasikanti manodvārikasukhaṃ. Taṃ lokiyalokuttaramissakaṃ kathitaṃ.
៧២. អដ្ឋមេ សប្បីតិកន្តិ បឋមទុតិយជ្ឈានសុខំ។ និប្បីតិកន្តិ តតិយចតុត្ថជ្ឈានសុខំ។ តត្ថ លោកិយសប្បីតិកតោ លោកិយនិប្បីតិកំ, លោកុត្តរសប្បីតិកតោ ច លោកុត្តរនិប្បីតិកំ អគ្គន្តិ ឯវំ ភុម្មន្តរំ អភិន្ទិត្វា អគ្គភាវោ វេទិតព្ពោ។
72. Aṭṭhame sappītikanti paṭhamadutiyajjhānasukhaṃ. Nippītikanti tatiyacatutthajjhānasukhaṃ. Tattha lokiyasappītikato lokiyanippītikaṃ, lokuttarasappītikato ca lokuttaranippītikaṃ agganti evaṃ bhummantaraṃ abhinditvā aggabhāvo veditabbo.
៧៣. នវមេ សាតសុខន្តិ តីសុ ឈានេសុ សុខំ។ ឧបេក្ខាសុខន្តិ ចតុត្ថជ្ឈានសុខំ។
73. Navame sātasukhanti tīsu jhānesu sukhaṃ. Upekkhāsukhanti catutthajjhānasukhaṃ.
៧៤. ទសមេ សមាធិសុខន្តិ អប្បនំ វា ឧបចារំ វា បត្តសុខំ។ អសមាធិសុខន្តិ តទុភយំ អប្បត្តសុខំ។
74. Dasame samādhisukhanti appanaṃ vā upacāraṃ vā pattasukhaṃ. Asamādhisukhanti tadubhayaṃ appattasukhaṃ.
៧៥. ឯកាទសមេ សប្បីតិការម្មណន្តិ សប្បីតិកំ ឈានទ្វយំ បច្ចវេក្ខន្តស្ស ឧប្បន្នសុខំ។ និប្បីតិការម្មណេបិ ឯសេវ នយោ។ ទ្វាទសមេបិ ឥមិនាវ ឧបាយេន អត្ថោ វេទិតព្ពោ។
75. Ekādasame sappītikārammaṇanti sappītikaṃ jhānadvayaṃ paccavekkhantassa uppannasukhaṃ. Nippītikārammaṇepi eseva nayo. Dvādasamepi imināva upāyena attho veditabbo.
៧៧. តេរសមេ រូបារម្មណន្តិ រូបាវចរចតុត្ថជ្ឈានារម្មណំ, យំកិញ្ចិ រូបំ អារព្ភ ឧប្បជ្ជនកំ វា។ អរូបារម្មណន្តិ អរូបាវចរជ្ឈានារម្មណំ, យំកិញ្ចិ អរូបំ អារព្ភ ឧប្បជ្ជនកំ វាតិ។
77. Terasame rūpārammaṇanti rūpāvacaracatutthajjhānārammaṇaṃ, yaṃkiñci rūpaṃ ārabbha uppajjanakaṃ vā. Arūpārammaṇanti arūpāvacarajjhānārammaṇaṃ, yaṃkiñci arūpaṃ ārabbha uppajjanakaṃ vāti.
សុខវគ្គោ ទុតិយោ។
Sukhavaggo dutiyo.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / (៧) ២. សុខវគ្គោ • (7) 2. Sukhavaggo
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / (៧) ២. សុខវគ្គវណ្ណនា • (7) 2. Sukhavaggavaṇṇanā
