| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
(៧) ២. សុខវគ្គវណ្ណនា
(7) 2. Sukhavaggavaṇṇanā
៦៥. ទុតិយស្ស បឋមេ សព្ពកាមនិប្ផត្តិមូលកំ សុខន្តិ អនវសេសឧបភោគបរិភោគវត្ថុនិប្ផត្តិហេតុកំ កាមសុខំ។ បព្ពជ្ជាមូលកំ សុខន្តិ បព្ពជ្ជាហេតុកំ បវិវេកសុខំ។
65. Dutiyassa paṭhame sabbakāmanipphattimūlakaṃ sukhanti anavasesaupabhogaparibhogavatthunipphattihetukaṃ kāmasukhaṃ. Pabbajjāmūlakaṃ sukhanti pabbajjāhetukaṃ pavivekasukhaṃ.
៦៦. ទុតិយេ កាមេតិ បញ្ច កាមគុណេ, សព្ពេបិ វា តេភូមកេ ធម្មេ។ វុត្តញ្ហេតំ ‘‘សព្ពេបិ តេភូមកា ធម្មា កមនីយដ្ឋេន កាមា’’តិ (មហានិ. ១)។ នេក្ខម្មំ វុច្ចតិ បព្ពជ្ជា ឃរពន្ធនតោ និក្ខន្តត្តា។ និព្ពានមេវ វា –
66. Dutiye kāmeti pañca kāmaguṇe, sabbepi vā tebhūmake dhamme. Vuttañhetaṃ ‘‘sabbepi tebhūmakā dhammā kamanīyaṭṭhena kāmā’’ti (mahāni. 1). Nekkhammaṃ vuccati pabbajjā gharabandhanato nikkhantattā. Nibbānameva vā –
‘‘បព្ពជ្ជា បឋមំ ឈានំ, និព្ពានញ្ច វិបស្សនា;
‘‘Pabbajjā paṭhamaṃ jhānaṃ, nibbānañca vipassanā;
សព្ពេបិ កុសលា ធម្មា, នេក្ខម្មន្តិ បវុច្ចរេ’’តិ។ (ឥតិវុ. អដ្ឋ. ១០៩) –
Sabbepi kusalā dhammā, nekkhammanti pavuccare’’ti. (itivu. aṭṭha. 109) –
ហិ វុត្តំ។
Hi vuttaṃ.
៦៧. តតិយេ ឧបធី វុច្ចន្តិ បញ្ចុបាទានក្ខន្ធា, តន្និស្សិតំ សុខំ ឧបធិសុខំ។ តប្បដិបក្ខតោ និរុបធិសុខំ លោកុត្តរសុខំ។
67. Tatiye upadhī vuccanti pañcupādānakkhandhā, tannissitaṃ sukhaṃ upadhisukhaṃ. Tappaṭipakkhato nirupadhisukhaṃ lokuttarasukhaṃ.
៦៨. ចតុត្ថេ វដ្ដបរិយាបន្នំ សុខំ វដ្ដសុខំ។ និព្ពានារម្មណំ សុខំ វិវដ្ដសុខំ។
68. Catutthe vaṭṭapariyāpannaṃ sukhaṃ vaṭṭasukhaṃ. Nibbānārammaṇaṃ sukhaṃ vivaṭṭasukhaṃ.
៦៩. បញ្ចមេ សំកិលេសន្តិ សំកិលិដ្ឋំ។ តេនាហ ‘‘វដ្ដគាមិសុខ’’ន្តិ។ វិវដ្ដសុខន្តិ មគ្គផលសហគតំ សុខំ។
69. Pañcame saṃkilesanti saṃkiliṭṭhaṃ. Tenāha ‘‘vaṭṭagāmisukha’’nti. Vivaṭṭasukhanti maggaphalasahagataṃ sukhaṃ.
៧០. ឆដ្ឋេ អរិយានមេវ សុខំ អរិយសុខំ, អរិយញ្ច តំ សុខញ្ចាតិបិ អរិយសុខំ។ អនរិយានមេវ សុខំ អនរិយសុខំ។ អនរិយញ្ច តំ សុខញ្ចាតិបិ អនរិយសុខំ។
70. Chaṭṭhe ariyānameva sukhaṃ ariyasukhaṃ, ariyañca taṃ sukhañcātipi ariyasukhaṃ. Anariyānameva sukhaṃ anariyasukhaṃ. Anariyañca taṃ sukhañcātipi anariyasukhaṃ.
៧១. សត្តមេ តន្តិ ចេតសិកសុខំ។
71. Sattame tanti cetasikasukhaṃ.
៧២. អដ្ឋមេ សហ បីតិយា វត្តតីតិ សប្បីតិកំ, បីតិសហគតំ សុខំ។ សភាវតោ វិរាគតោ ច នត្ថិ ឯតស្ស បីតីតិ និប្បីតិកំ សុខំ។ អដ្ឋកថាយំ បនេត្ថ ឈានសុខមេវ ឧទ្ធដំ, តថា ច ‘‘លោកិយសប្បីតិកសុខតោ លោកិយនិប្បីតិកសុខំ អគ្គ’’ន្តិ វុត្តំ។ លោកិយនិប្បីតិកម្បិ ហិ អគ្គំ លព្ភតេវាតិ ភូមន្តរំ ភិន្ទិត្វា អគ្គភាវោ វេទិតព្ពោ។
72. Aṭṭhame saha pītiyā vattatīti sappītikaṃ, pītisahagataṃ sukhaṃ. Sabhāvato virāgato ca natthi etassa pītīti nippītikaṃ sukhaṃ. Aṭṭhakathāyaṃ panettha jhānasukhameva uddhaṭaṃ, tathā ca ‘‘lokiyasappītikasukhato lokiyanippītikasukhaṃ agga’’nti vuttaṃ. Lokiyanippītikampi hi aggaṃ labbhatevāti bhūmantaraṃ bhinditvā aggabhāvo veditabbo.
៧៣. នវមេ សាតសភាវមេវ សុខំ សាតសុខំ, ន ឧបេក្ខាសុខំ វិយ អសាតសភាវំ។ កាមញ្ចេត្ថ កាយវិញ្ញាណសហគតម្បិ សាតសុខមេវ, អដ្ឋកថាយំ បន ‘‘តីសុ ឈានេសុ សុខ’’ន្តេវ វុត្តំ។
73. Navame sātasabhāvameva sukhaṃ sātasukhaṃ, na upekkhāsukhaṃ viya asātasabhāvaṃ. Kāmañcettha kāyaviññāṇasahagatampi sātasukhameva, aṭṭhakathāyaṃ pana ‘‘tīsu jhānesu sukha’’nteva vuttaṃ.
៧៤. ទសមេ សមាធិសម្បយុត្តំ សុខំ សមាធិសុខំ។ ន សមាធិសម្បយុត្តំ សុខំ អសមាធិសុខំ។
74. Dasame samādhisampayuttaṃ sukhaṃ samādhisukhaṃ. Na samādhisampayuttaṃ sukhaṃ asamādhisukhaṃ.
៧៥. ឯកាទសមេ សុត្តន្តកថា ឯសាតិ ‘‘សប្បីតិកំ ឈានទ្វយ’’ន្តិ វុត្តំ។
75. Ekādasame suttantakathā esāti ‘‘sappītikaṃ jhānadvaya’’nti vuttaṃ.
៧៧. តេរសមេ រូបជ្ឈានំ រូបំ ឧត្តរបទលោបេន, តំ អារម្មណំ ឯតស្សាតិ រូបារម្មណំ។ ចតុត្ថជ្ឈានគ្គហណំ បន យទស្ស បដិយោគី, តេន សមានយោគក្ខមទស្សនបរំ។ យំ កិញ្ចិ រូបន្តិ យំ កិញ្ចិ រុប្បនលក្ខណំ រូបំ។ តប្បដិក្ខេបេន អរូបំ វេទិតព្ពំ។
77. Terasame rūpajjhānaṃ rūpaṃ uttarapadalopena, taṃ ārammaṇaṃ etassāti rūpārammaṇaṃ. Catutthajjhānaggahaṇaṃ pana yadassa paṭiyogī, tena samānayogakkhamadassanaparaṃ. Yaṃ kiñci rūpanti yaṃ kiñci ruppanalakkhaṇaṃ rūpaṃ. Tappaṭikkhepena arūpaṃ veditabbaṃ.
សុខវគ្គវណ្ណនា និដ្ឋិតា។
Sukhavaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / (៧) ២. សុខវគ្គោ • (7) 2. Sukhavaggo
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / (៧) ២. សុខវគ្គវណ្ណនា • (7) 2. Sukhavaggavaṇṇanā
