| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
(೭) ೨. ಸುಖವಗ್ಗವಣ್ಣನಾ
(7) 2. Sukhavaggavaṇṇanā
೬೫. ದುತಿಯಸ್ಸ ಪಠಮೇ ಗಿಹಿಸುಖನ್ತಿ ಗಿಹೀನಂ ಸಬ್ಬಕಾಮನಿಪ್ಫತ್ತಿಮೂಲಕಂ ಸುಖಂ। ಪಬ್ಬಜಿತಸುಖನ್ತಿ ಪಬ್ಬಜಿತಾನಂ ಪಬ್ಬಜ್ಜಾಮೂಲಕಂ ಸುಖಂ।
65. Dutiyassa paṭhame gihisukhanti gihīnaṃ sabbakāmanipphattimūlakaṃ sukhaṃ. Pabbajitasukhanti pabbajitānaṃ pabbajjāmūlakaṃ sukhaṃ.
೬೬. ದುತಿಯೇ ಕಾಮಸುಖನ್ತಿ ಕಾಮೇ ಆರಬ್ಭ ಉಪ್ಪಜ್ಜನಕಸುಖಂ। ನೇಕ್ಖಮ್ಮಸುಖನ್ತಿ ನೇಕ್ಖಮ್ಮಂ ವುಚ್ಚತಿ ಪಬ್ಬಜ್ಜಾ, ತಂ ಆರಬ್ಭ ಉಪ್ಪಜ್ಜನಕಸುಖಂ।
66. Dutiye kāmasukhanti kāme ārabbha uppajjanakasukhaṃ. Nekkhammasukhanti nekkhammaṃ vuccati pabbajjā, taṃ ārabbha uppajjanakasukhaṃ.
೬೭. ತತಿಯೇ ಉಪಧಿಸುಖನ್ತಿ ತೇಭೂಮಕಸುಖಂ। ನಿರುಪಧಿಸುಖನ್ತಿ ಲೋಕುತ್ತರಸುಖಂ।
67. Tatiye upadhisukhanti tebhūmakasukhaṃ. Nirupadhisukhanti lokuttarasukhaṃ.
೬೮. ಚತುತ್ಥೇ ಸಾಸವಸುಖನ್ತಿ ಆಸವಾನಂ ಪಚ್ಚಯಭೂತಂ ವಟ್ಟಸುಖಂ। ಅನಾಸವಸುಖನ್ತಿ ತೇಸಂ ಅಪಚ್ಚಯಭೂತಂ ವಿವಟ್ಟಸುಖಂ।
68. Catutthe sāsavasukhanti āsavānaṃ paccayabhūtaṃ vaṭṭasukhaṃ. Anāsavasukhanti tesaṃ apaccayabhūtaṃ vivaṭṭasukhaṃ.
೬೯. ಪಞ್ಚಮೇ ಸಾಮಿಸನ್ತಿ ಸಂಕಿಲೇಸಂ ವಟ್ಟಗಾಮಿಸುಖಂ। ನಿರಾಮಿಸನ್ತಿ ನಿಕ್ಕಿಲೇಸಂ ವಿವಟ್ಟಗಾಮಿಸುಖಂ।
69. Pañcame sāmisanti saṃkilesaṃ vaṭṭagāmisukhaṃ. Nirāmisanti nikkilesaṃ vivaṭṭagāmisukhaṃ.
೭೦. ಛಟ್ಠೇ ಅರಿಯಸುಖನ್ತಿ ಅಪುಥುಜ್ಜನಸುಖಂ। ಅನರಿಯಸುಖನ್ತಿ ಪುಥುಜ್ಜನಸುಖಂ।
70. Chaṭṭhe ariyasukhanti aputhujjanasukhaṃ. Anariyasukhanti puthujjanasukhaṃ.
೭೧. ಸತ್ತಮೇ ಕಾಯಿಕನ್ತಿ ಕಾಯವಿಞ್ಞಾಣಸಹಜಾತಂ। ಚೇತಸಿಕನ್ತಿ ಮನೋದ್ವಾರಿಕಸುಖಂ। ತಂ ಲೋಕಿಯಲೋಕುತ್ತರಮಿಸ್ಸಕಂ ಕಥಿತಂ।
71. Sattame kāyikanti kāyaviññāṇasahajātaṃ. Cetasikanti manodvārikasukhaṃ. Taṃ lokiyalokuttaramissakaṃ kathitaṃ.
೭೨. ಅಟ್ಠಮೇ ಸಪ್ಪೀತಿಕನ್ತಿ ಪಠಮದುತಿಯಜ್ಝಾನಸುಖಂ। ನಿಪ್ಪೀತಿಕನ್ತಿ ತತಿಯಚತುತ್ಥಜ್ಝಾನಸುಖಂ। ತತ್ಥ ಲೋಕಿಯಸಪ್ಪೀತಿಕತೋ ಲೋಕಿಯನಿಪ್ಪೀತಿಕಂ, ಲೋಕುತ್ತರಸಪ್ಪೀತಿಕತೋ ಚ ಲೋಕುತ್ತರನಿಪ್ಪೀತಿಕಂ ಅಗ್ಗನ್ತಿ ಏವಂ ಭುಮ್ಮನ್ತರಂ ಅಭಿನ್ದಿತ್ವಾ ಅಗ್ಗಭಾವೋ ವೇದಿತಬ್ಬೋ।
72. Aṭṭhame sappītikanti paṭhamadutiyajjhānasukhaṃ. Nippītikanti tatiyacatutthajjhānasukhaṃ. Tattha lokiyasappītikato lokiyanippītikaṃ, lokuttarasappītikato ca lokuttaranippītikaṃ agganti evaṃ bhummantaraṃ abhinditvā aggabhāvo veditabbo.
೭೩. ನವಮೇ ಸಾತಸುಖನ್ತಿ ತೀಸು ಝಾನೇಸು ಸುಖಂ। ಉಪೇಕ್ಖಾಸುಖನ್ತಿ ಚತುತ್ಥಜ್ಝಾನಸುಖಂ।
73. Navame sātasukhanti tīsu jhānesu sukhaṃ. Upekkhāsukhanti catutthajjhānasukhaṃ.
೭೪. ದಸಮೇ ಸಮಾಧಿಸುಖನ್ತಿ ಅಪ್ಪನಂ ವಾ ಉಪಚಾರಂ ವಾ ಪತ್ತಸುಖಂ। ಅಸಮಾಧಿಸುಖನ್ತಿ ತದುಭಯಂ ಅಪ್ಪತ್ತಸುಖಂ।
74. Dasame samādhisukhanti appanaṃ vā upacāraṃ vā pattasukhaṃ. Asamādhisukhanti tadubhayaṃ appattasukhaṃ.
೭೫. ಏಕಾದಸಮೇ ಸಪ್ಪೀತಿಕಾರಮ್ಮಣನ್ತಿ ಸಪ್ಪೀತಿಕಂ ಝಾನದ್ವಯಂ ಪಚ್ಚವೇಕ್ಖನ್ತಸ್ಸ ಉಪ್ಪನ್ನಸುಖಂ। ನಿಪ್ಪೀತಿಕಾರಮ್ಮಣೇಪಿ ಏಸೇವ ನಯೋ। ದ್ವಾದಸಮೇಪಿ ಇಮಿನಾವ ಉಪಾಯೇನ ಅತ್ಥೋ ವೇದಿತಬ್ಬೋ।
75. Ekādasame sappītikārammaṇanti sappītikaṃ jhānadvayaṃ paccavekkhantassa uppannasukhaṃ. Nippītikārammaṇepi eseva nayo. Dvādasamepi imināva upāyena attho veditabbo.
೭೭. ತೇರಸಮೇ ರೂಪಾರಮ್ಮಣನ್ತಿ ರೂಪಾವಚರಚತುತ್ಥಜ್ಝಾನಾರಮ್ಮಣಂ, ಯಂಕಿಞ್ಚಿ ರೂಪಂ ಆರಬ್ಭ ಉಪ್ಪಜ್ಜನಕಂ ವಾ। ಅರೂಪಾರಮ್ಮಣನ್ತಿ ಅರೂಪಾವಚರಜ್ಝಾನಾರಮ್ಮಣಂ, ಯಂಕಿಞ್ಚಿ ಅರೂಪಂ ಆರಬ್ಭ ಉಪ್ಪಜ್ಜನಕಂ ವಾತಿ।
77. Terasame rūpārammaṇanti rūpāvacaracatutthajjhānārammaṇaṃ, yaṃkiñci rūpaṃ ārabbha uppajjanakaṃ vā. Arūpārammaṇanti arūpāvacarajjhānārammaṇaṃ, yaṃkiñci arūpaṃ ārabbha uppajjanakaṃ vāti.
ಸುಖವಗ್ಗೋ ದುತಿಯೋ।
Sukhavaggo dutiyo.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / (೭) ೨. ಸುಖವಗ್ಗೋ • (7) 2. Sukhavaggo
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / (೭) ೨. ಸುಖವಗ್ಗವಣ್ಣನಾ • (7) 2. Sukhavaggavaṇṇanā
