| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) |
(೭) ೨. ಸುಖವಗ್ಗವಣ್ಣನಾ
(7) 2. Sukhavaggavaṇṇanā
೬೫. ದುತಿಯಸ್ಸ ಪಠಮೇ ಸಬ್ಬಕಾಮನಿಪ್ಫತ್ತಿಮೂಲಕಂ ಸುಖನ್ತಿ ಅನವಸೇಸಉಪಭೋಗಪರಿಭೋಗವತ್ಥುನಿಪ್ಫತ್ತಿಹೇತುಕಂ ಕಾಮಸುಖಂ। ಪಬ್ಬಜ್ಜಾಮೂಲಕಂ ಸುಖನ್ತಿ ಪಬ್ಬಜ್ಜಾಹೇತುಕಂ ಪವಿವೇಕಸುಖಂ।
65. Dutiyassa paṭhame sabbakāmanipphattimūlakaṃ sukhanti anavasesaupabhogaparibhogavatthunipphattihetukaṃ kāmasukhaṃ. Pabbajjāmūlakaṃ sukhanti pabbajjāhetukaṃ pavivekasukhaṃ.
೬೬. ದುತಿಯೇ ಕಾಮೇತಿ ಪಞ್ಚ ಕಾಮಗುಣೇ, ಸಬ್ಬೇಪಿ ವಾ ತೇಭೂಮಕೇ ಧಮ್ಮೇ। ವುತ್ತಞ್ಹೇತಂ ‘‘ಸಬ್ಬೇಪಿ ತೇಭೂಮಕಾ ಧಮ್ಮಾ ಕಮನೀಯಟ್ಠೇನ ಕಾಮಾ’’ತಿ (ಮಹಾನಿ॰ ೧)। ನೇಕ್ಖಮ್ಮಂ ವುಚ್ಚತಿ ಪಬ್ಬಜ್ಜಾ ಘರಬನ್ಧನತೋ ನಿಕ್ಖನ್ತತ್ತಾ। ನಿಬ್ಬಾನಮೇವ ವಾ –
66. Dutiye kāmeti pañca kāmaguṇe, sabbepi vā tebhūmake dhamme. Vuttañhetaṃ ‘‘sabbepi tebhūmakā dhammā kamanīyaṭṭhena kāmā’’ti (mahāni. 1). Nekkhammaṃ vuccati pabbajjā gharabandhanato nikkhantattā. Nibbānameva vā –
‘‘ಪಬ್ಬಜ್ಜಾ ಪಠಮಂ ಝಾನಂ, ನಿಬ್ಬಾನಞ್ಚ ವಿಪಸ್ಸನಾ।
‘‘Pabbajjā paṭhamaṃ jhānaṃ, nibbānañca vipassanā;
ಸಬ್ಬೇಪಿ ಕುಸಲಾ ಧಮ್ಮಾ, ನೇಕ್ಖಮ್ಮನ್ತಿ ಪವುಚ್ಚರೇ’’ತಿ॥ (ಇತಿವು॰ ಅಟ್ಠ॰ ೧೦೯) –
Sabbepi kusalā dhammā, nekkhammanti pavuccare’’ti. (itivu. aṭṭha. 109) –
ಹಿ ವುತ್ತಂ।
Hi vuttaṃ.
೬೭. ತತಿಯೇ ಉಪಧೀ ವುಚ್ಚನ್ತಿ ಪಞ್ಚುಪಾದಾನಕ್ಖನ್ಧಾ, ತನ್ನಿಸ್ಸಿತಂ ಸುಖಂ ಉಪಧಿಸುಖಂ। ತಪ್ಪಟಿಪಕ್ಖತೋ ನಿರುಪಧಿಸುಖಂ ಲೋಕುತ್ತರಸುಖಂ।
67. Tatiye upadhī vuccanti pañcupādānakkhandhā, tannissitaṃ sukhaṃ upadhisukhaṃ. Tappaṭipakkhato nirupadhisukhaṃ lokuttarasukhaṃ.
೬೮. ಚತುತ್ಥೇ ವಟ್ಟಪರಿಯಾಪನ್ನಂ ಸುಖಂ ವಟ್ಟಸುಖಂ। ನಿಬ್ಬಾನಾರಮ್ಮಣಂ ಸುಖಂ ವಿವಟ್ಟಸುಖಂ।
68. Catutthe vaṭṭapariyāpannaṃ sukhaṃ vaṭṭasukhaṃ. Nibbānārammaṇaṃ sukhaṃ vivaṭṭasukhaṃ.
೬೯. ಪಞ್ಚಮೇ ಸಂಕಿಲೇಸನ್ತಿ ಸಂಕಿಲಿಟ್ಠಂ। ತೇನಾಹ ‘‘ವಟ್ಟಗಾಮಿಸುಖ’’ನ್ತಿ। ವಿವಟ್ಟಸುಖನ್ತಿ ಮಗ್ಗಫಲಸಹಗತಂ ಸುಖಂ।
69. Pañcame saṃkilesanti saṃkiliṭṭhaṃ. Tenāha ‘‘vaṭṭagāmisukha’’nti. Vivaṭṭasukhanti maggaphalasahagataṃ sukhaṃ.
೭೦. ಛಟ್ಠೇ ಅರಿಯಾನಮೇವ ಸುಖಂ ಅರಿಯಸುಖಂ, ಅರಿಯಞ್ಚ ತಂ ಸುಖಞ್ಚಾತಿಪಿ ಅರಿಯಸುಖಂ। ಅನರಿಯಾನಮೇವ ಸುಖಂ ಅನರಿಯಸುಖಂ। ಅನರಿಯಞ್ಚ ತಂ ಸುಖಞ್ಚಾತಿಪಿ ಅನರಿಯಸುಖಂ।
70. Chaṭṭhe ariyānameva sukhaṃ ariyasukhaṃ, ariyañca taṃ sukhañcātipi ariyasukhaṃ. Anariyānameva sukhaṃ anariyasukhaṃ. Anariyañca taṃ sukhañcātipi anariyasukhaṃ.
೭೧. ಸತ್ತಮೇ ತನ್ತಿ ಚೇತಸಿಕಸುಖಂ।
71. Sattame tanti cetasikasukhaṃ.
೭೨. ಅಟ್ಠಮೇ ಸಹ ಪೀತಿಯಾ ವತ್ತತೀತಿ ಸಪ್ಪೀತಿಕಂ, ಪೀತಿಸಹಗತಂ ಸುಖಂ। ಸಭಾವತೋ ವಿರಾಗತೋ ಚ ನತ್ಥಿ ಏತಸ್ಸ ಪೀತೀತಿ ನಿಪ್ಪೀತಿಕಂ ಸುಖಂ। ಅಟ್ಠಕಥಾಯಂ ಪನೇತ್ಥ ಝಾನಸುಖಮೇವ ಉದ್ಧಟಂ, ತಥಾ ಚ ‘‘ಲೋಕಿಯಸಪ್ಪೀತಿಕಸುಖತೋ ಲೋಕಿಯನಿಪ್ಪೀತಿಕಸುಖಂ ಅಗ್ಗ’’ನ್ತಿ ವುತ್ತಂ। ಲೋಕಿಯನಿಪ್ಪೀತಿಕಮ್ಪಿ ಹಿ ಅಗ್ಗಂ ಲಬ್ಭತೇವಾತಿ ಭೂಮನ್ತರಂ ಭಿನ್ದಿತ್ವಾ ಅಗ್ಗಭಾವೋ ವೇದಿತಬ್ಬೋ।
72. Aṭṭhame saha pītiyā vattatīti sappītikaṃ, pītisahagataṃ sukhaṃ. Sabhāvato virāgato ca natthi etassa pītīti nippītikaṃ sukhaṃ. Aṭṭhakathāyaṃ panettha jhānasukhameva uddhaṭaṃ, tathā ca ‘‘lokiyasappītikasukhato lokiyanippītikasukhaṃ agga’’nti vuttaṃ. Lokiyanippītikampi hi aggaṃ labbhatevāti bhūmantaraṃ bhinditvā aggabhāvo veditabbo.
೭೩. ನವಮೇ ಸಾತಸಭಾವಮೇವ ಸುಖಂ ಸಾತಸುಖಂ, ನ ಉಪೇಕ್ಖಾಸುಖಂ ವಿಯ ಅಸಾತಸಭಾವಂ। ಕಾಮಞ್ಚೇತ್ಥ ಕಾಯವಿಞ್ಞಾಣಸಹಗತಮ್ಪಿ ಸಾತಸುಖಮೇವ, ಅಟ್ಠಕಥಾಯಂ ಪನ ‘‘ತೀಸು ಝಾನೇಸು ಸುಖ’’ನ್ತೇವ ವುತ್ತಂ।
73. Navame sātasabhāvameva sukhaṃ sātasukhaṃ, na upekkhāsukhaṃ viya asātasabhāvaṃ. Kāmañcettha kāyaviññāṇasahagatampi sātasukhameva, aṭṭhakathāyaṃ pana ‘‘tīsu jhānesu sukha’’nteva vuttaṃ.
೭೪. ದಸಮೇ ಸಮಾಧಿಸಮ್ಪಯುತ್ತಂ ಸುಖಂ ಸಮಾಧಿಸುಖಂ। ನ ಸಮಾಧಿಸಮ್ಪಯುತ್ತಂ ಸುಖಂ ಅಸಮಾಧಿಸುಖಂ।
74. Dasame samādhisampayuttaṃ sukhaṃ samādhisukhaṃ. Na samādhisampayuttaṃ sukhaṃ asamādhisukhaṃ.
೭೫. ಏಕಾದಸಮೇ ಸುತ್ತನ್ತಕಥಾ ಏಸಾತಿ ‘‘ಸಪ್ಪೀತಿಕಂ ಝಾನದ್ವಯ’’ನ್ತಿ ವುತ್ತಂ।
75. Ekādasame suttantakathā esāti ‘‘sappītikaṃ jhānadvaya’’nti vuttaṃ.
೭೭. ತೇರಸಮೇ ರೂಪಜ್ಝಾನಂ ರೂಪಂ ಉತ್ತರಪದಲೋಪೇನ, ತಂ ಆರಮ್ಮಣಂ ಏತಸ್ಸಾತಿ ರೂಪಾರಮ್ಮಣಂ। ಚತುತ್ಥಜ್ಝಾನಗ್ಗಹಣಂ ಪನ ಯದಸ್ಸ ಪಟಿಯೋಗೀ, ತೇನ ಸಮಾನಯೋಗಕ್ಖಮದಸ್ಸನಪರಂ। ಯಂ ಕಿಞ್ಚಿ ರೂಪನ್ತಿ ಯಂ ಕಿಞ್ಚಿ ರುಪ್ಪನಲಕ್ಖಣಂ ರೂಪಂ। ತಪ್ಪಟಿಕ್ಖೇಪೇನ ಅರೂಪಂ ವೇದಿತಬ್ಬಂ।
77. Terasame rūpajjhānaṃ rūpaṃ uttarapadalopena, taṃ ārammaṇaṃ etassāti rūpārammaṇaṃ. Catutthajjhānaggahaṇaṃ pana yadassa paṭiyogī, tena samānayogakkhamadassanaparaṃ. Yaṃ kiñci rūpanti yaṃ kiñci ruppanalakkhaṇaṃ rūpaṃ. Tappaṭikkhepena arūpaṃ veditabbaṃ.
ಸುಖವಗ್ಗವಣ್ಣನಾ ನಿಟ್ಠಿತಾ।
Sukhavaggavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / (೭) ೨. ಸುಖವಗ್ಗೋ • (7) 2. Sukhavaggo
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / (೭) ೨. ಸುಖವಗ್ಗವಣ್ಣನಾ • (7) 2. Sukhavaggavaṇṇanā
