| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
(7) 2. සුඛවග්‌ගවණ්‌ණනා
(7) 2. Sukhavaggavaṇṇanā
65. දුතියස්‌ස පඨමෙ ගිහිසුඛන්‌ති ගිහීනං සබ්‌බකාමනිප්‌ඵත්‌තිමූලකං සුඛං. පබ්‌බජිතසුඛන්‌ති පබ්‌බජිතානං පබ්‌බජ්‌ජාමූලකං සුඛං.
65. Dutiyassa paṭhame gihisukhanti gihīnaṃ sabbakāmanipphattimūlakaṃ sukhaṃ. Pabbajitasukhanti pabbajitānaṃ pabbajjāmūlakaṃ sukhaṃ.
66. දුතියෙ කාමසුඛන්‌ති කාමෙ ආරබ්‌භ උප්‌පජ්‌ජනකසුඛං. නෙක්‌ඛම්‌මසුඛන්‌ති නෙක්‌ඛම්‌මං වුච්‌චති පබ්‌බජ්‌ජා, තං ආරබ්‌භ උප්‌පජ්‌ජනකසුඛං.
66. Dutiye kāmasukhanti kāme ārabbha uppajjanakasukhaṃ. Nekkhammasukhanti nekkhammaṃ vuccati pabbajjā, taṃ ārabbha uppajjanakasukhaṃ.
67. තතියෙ උපධිසුඛන්‌ති තෙභූමකසුඛං. නිරුපධිසුඛන්‌ති ලොකුත්‌තරසුඛං.
67. Tatiye upadhisukhanti tebhūmakasukhaṃ. Nirupadhisukhanti lokuttarasukhaṃ.
68. චතුත්‌ථෙ සාසවසුඛන්‌ති ආසවානං පච්‌චයභූතං වට්‌ටසුඛං. අනාසවසුඛන්‌ති තෙසං අපච්‌චයභූතං විවට්‌ටසුඛං.
68. Catutthe sāsavasukhanti āsavānaṃ paccayabhūtaṃ vaṭṭasukhaṃ. Anāsavasukhanti tesaṃ apaccayabhūtaṃ vivaṭṭasukhaṃ.
69. පඤ්‌චමෙ සාමිසන්‌ති සංකිලෙසං වට්‌ටගාමිසුඛං. නිරාමිසන්‌ති නික්‌කිලෙසං විවට්‌ටගාමිසුඛං.
69. Pañcame sāmisanti saṃkilesaṃ vaṭṭagāmisukhaṃ. Nirāmisanti nikkilesaṃ vivaṭṭagāmisukhaṃ.
70. ඡට්‌ඨෙ අරියසුඛන්‌ති අපුථුජ්‌ජනසුඛං. අනරියසුඛන්‌ති පුථුජ්‌ජනසුඛං.
70. Chaṭṭhe ariyasukhanti aputhujjanasukhaṃ. Anariyasukhanti puthujjanasukhaṃ.
71. සත්‌තමෙ කායිකන්‌ති කායවිඤ්‌ඤාණසහජාතං. චෙතසිකන්‌ති මනොද්‌වාරිකසුඛං. තං ලොකියලොකුත්‌තරමිස්‌සකං කථිතං.
71. Sattame kāyikanti kāyaviññāṇasahajātaṃ. Cetasikanti manodvārikasukhaṃ. Taṃ lokiyalokuttaramissakaṃ kathitaṃ.
72. අට්‌ඨමෙ සප්‌පීතිකන්‌ති පඨමදුතියජ්‌ඣානසුඛං. නිප්‌පීතිකන්‌ති තතියචතුත්‌ථජ්‌ඣානසුඛං. තත්‌ථ ලොකියසප්‌පීතිකතො ලොකියනිප්‌පීතිකං, ලොකුත්‌තරසප්‌පීතිකතො ච ලොකුත්‌තරනිප්‌පීතිකං අග්‌ගන්‌ති එවං භුම්‌මන්‌තරං අභින්‌දිත්‌වා අග්‌ගභාවො වෙදිතබ්‌බො.
72. Aṭṭhame sappītikanti paṭhamadutiyajjhānasukhaṃ. Nippītikanti tatiyacatutthajjhānasukhaṃ. Tattha lokiyasappītikato lokiyanippītikaṃ, lokuttarasappītikato ca lokuttaranippītikaṃ agganti evaṃ bhummantaraṃ abhinditvā aggabhāvo veditabbo.
73. නවමෙ සාතසුඛන්‌ති තීසු ඣානෙසු සුඛං. උපෙක්‌ඛාසුඛන්‌ති චතුත්‌ථජ්‌ඣානසුඛං.
73. Navame sātasukhanti tīsu jhānesu sukhaṃ. Upekkhāsukhanti catutthajjhānasukhaṃ.
74. දසමෙ සමාධිසුඛන්‌ති අප්‌පනං වා උපචාරං වා පත්‌තසුඛං. අසමාධිසුඛන්‌ති තදුභයං අප්‌පත්‌තසුඛං.
74. Dasame samādhisukhanti appanaṃ vā upacāraṃ vā pattasukhaṃ. Asamādhisukhanti tadubhayaṃ appattasukhaṃ.
75. එකාදසමෙ සප්‌පීතිකාරම්‌මණන්‌ති සප්‌පීතිකං ඣානද්‌වයං පච්‌චවෙක්‌ඛන්‌තස්‌ස උප්‌පන්‌නසුඛං. නිප්‌පීතිකාරම්‌මණෙපි එසෙව නයො. ද්‌වාදසමෙපි ඉමිනාව උපායෙන අත්‌ථො වෙදිතබ්‌බො.
75. Ekādasame sappītikārammaṇanti sappītikaṃ jhānadvayaṃ paccavekkhantassa uppannasukhaṃ. Nippītikārammaṇepi eseva nayo. Dvādasamepi imināva upāyena attho veditabbo.
77. තෙරසමෙ රූපාරම්‌මණන්‌ති රූපාවචරචතුත්‌ථජ්‌ඣානාරම්‌මණං, යංකිඤ්‌චි රූපං ආරබ්‌භ උප්‌පජ්‌ජනකං වා. අරූපාරම්‌මණන්‌ති අරූපාවචරජ්‌ඣානාරම්‌මණං, යංකිඤ්‌චි අරූපං ආරබ්‌භ උප්‌පජ්‌ජනකං වාති.
77. Terasame rūpārammaṇanti rūpāvacaracatutthajjhānārammaṇaṃ, yaṃkiñci rūpaṃ ārabbha uppajjanakaṃ vā. Arūpārammaṇanti arūpāvacarajjhānārammaṇaṃ, yaṃkiñci arūpaṃ ārabbha uppajjanakaṃ vāti.
සුඛවග්‌ගො දුතියො.
Sukhavaggo dutiyo.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / (7) 2. සුඛවග්‌ගො • (7) 2. Sukhavaggo
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / (7) 2. සුඛවග්‌ගවණ්‌ණනා • (7) 2. Sukhavaggavaṇṇanā
