| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
9. ஸுகு²மாலஸுத்தவண்ணனா
9. Sukhumālasuttavaṇṇanā
39. நவமே நித்³து³க்கோ²தி காயிகசேதஸிகது³க்க²விரஹிதோ. ஸது³க்கே² ஹி ஸவிகா⁴தே ஸுகு²மாலத்தா அனவஸரா, தஸ்மா ஸுகி²தோ நித்³து³க்க²தாய ஸுகு²மாலோ நாம. யாவஸ்ஸ ஸுகு²மாலத்தா பரமுக்கங்ஸக³தாதி ஆஹ ‘‘பரமஸுகு²மாலோ’’தி. அதிவிய ஸுகு²மாலோதி அத்தோ². அந்தமதீதங் அச்சந்தங். ஸப்³ப³தா³ ஸுகு²மாலோதி ஆஹ ‘‘ஸததனித்³து³க்கோ²’’தி. சரியகாலேதி போ³தி⁴சரியாய சரணகாலே. தேனாதி போ³தி⁴ஸத்தேன. அஞ்ஞத்த² பன பது³மந்தி ரத்தங் கமலங். புண்ட³ரீகந்தி ஸேதங் வுச்சதி. இதராதி இதரபொக்க²ரணியோ. ‘‘போ³தி⁴ஸத்தஸ்ஸ கிரா’’திஆதி³கங் பொக்க²ரணீனங் உப்பத்தித³ஸ்ஸனங். குத்³தா³லகம்மகாரேதி க²ணகே. பொக்க²ரணிட்டா²னானீதி பொக்க²ரணிக²ணனயொக்³க³ட்டா²னானி. க³ண்ஹாபேஸீதி க²ணாபேஸி. பொக்க²ரணிஸத்³தோ³ செத்த² தாதி³ஸே ஜலாஸயே நிருள்ஹோ த³ட்ட²ப்³போ³ பங்கஜாதி³ஸத்³தா³ விய. ஸோபானபா³ஹுகானங் மத்த²கட்டா²னங் உண்ஹீஸந்தி அதி⁴ப்பேதங். உத³கஸேசனநாளிகாதி உத³கச்ச²டாவிஸ்ஸஜ்ஜனநாளியந்தானி. பஞ்சவிதா⁴தி வண்ணவஸேன ஜாதிவஸேன ச.
39. Navame niddukkhoti kāyikacetasikadukkhavirahito. Sadukkhe hi savighāte sukhumālattā anavasarā, tasmā sukhito niddukkhatāya sukhumālo nāma. Yāvassa sukhumālattā paramukkaṃsagatāti āha ‘‘paramasukhumālo’’ti. Ativiya sukhumāloti attho. Antamatītaṃ accantaṃ. Sabbadā sukhumāloti āha ‘‘satataniddukkho’’ti. Cariyakāleti bodhicariyāya caraṇakāle. Tenāti bodhisattena. Aññattha pana padumanti rattaṃ kamalaṃ. Puṇḍarīkanti setaṃ vuccati. Itarāti itarapokkharaṇiyo. ‘‘Bodhisattassa kirā’’tiādikaṃ pokkharaṇīnaṃ uppattidassanaṃ. Kuddālakammakāreti khaṇake. Pokkharaṇiṭṭhānānīti pokkharaṇikhaṇanayoggaṭṭhānāni. Gaṇhāpesīti khaṇāpesi. Pokkharaṇisaddo cettha tādise jalāsaye niruḷho daṭṭhabbo paṅkajādisaddā viya. Sopānabāhukānaṃ matthakaṭṭhānaṃ uṇhīsanti adhippetaṃ. Udakasecananāḷikāti udakacchaṭāvissajjananāḷiyantāni. Pañcavidhāti vaṇṇavasena jātivasena ca.
கோ² பனஸ்ஸாதி நிபாதமத்தங். காஸிக-ஸத்³தோ³ அதிவிய ஸண்ஹே ஸுகு²மே மஹக்³க⁴வத்தே² நிருள்ஹோ, அஞ்ஞஸ்மிம்பி ததா²ஜாதிகே ருள்ஹிவஸேன பவத்ததீதி த³ட்ட²ப்³ப³ங். தேனாஹ ‘‘அகாஸிகங் சந்த³ன’’ந்தி. ஹேமந்தே வாஸோ ஹேமந்தங், ஹேமந்தங் அரஹதீதி ஹேமந்திகோ, பாஸாதோ³. ‘‘இதரேஸுபி ஏஸேவ நயோ’’தி வத்வா ததே³வ நேஸங் அரஹதங் த³ஸ்ஸேதுங் ‘‘தத்த² ஹேமந்திகோ’’திஆதி³ வுத்தங். ஸஜாலானீதி ஸஜாலவாதபானானி, உத³கயந்தானீதி உத³கதா⁴ராவிஸ்ஸந்த³னகயந்தானி. பாஸாத³மத்த²கேதி பாஸாத³ஸ்ஸ உபரிஆகாஸதலே. ப³ந்தி⁴த்வாதி பயோஜிதயந்தே ஸுக்க²மஹிங்ஸசம்மங் ப³ந்தி⁴த்வா. யந்தங் பரிவத்தெத்வாதி யதா²பயோஜிதங் யந்தங் பாஸாணாரோபனத்த²ஞ்சேவ புன தேஸங் விஸ்ஸஜ்ஜனத்த²ஞ்ச பரிவத்தெத்வா. தஸ்மிங் விஸ்ஸஜ்ஜெந்தீதி ச²த³னபிட்டே² ப³த்³த⁴ஸுக்க²மஹிங்ஸசம்மே விஸ்ஸஜ்ஜெந்தி.
Kho panassāti nipātamattaṃ. Kāsika-saddo ativiya saṇhe sukhume mahagghavatthe niruḷho, aññasmimpi tathājātike ruḷhivasena pavattatīti daṭṭhabbaṃ. Tenāha ‘‘akāsikaṃ candana’’nti. Hemante vāso hemantaṃ, hemantaṃ arahatīti hemantiko, pāsādo. ‘‘Itaresupi eseva nayo’’ti vatvā tadeva nesaṃ arahataṃ dassetuṃ ‘‘tattha hemantiko’’tiādi vuttaṃ. Sajālānīti sajālavātapānāni, udakayantānīti udakadhārāvissandanakayantāni. Pāsādamatthaketi pāsādassa upariākāsatale. Bandhitvāti payojitayante sukkhamahiṃsacammaṃ bandhitvā. Yantaṃ parivattetvāti yathāpayojitaṃ yantaṃ pāsāṇāropanatthañceva puna tesaṃ vissajjanatthañca parivattetvā. Tasmiṃ vissajjentīti chadanapiṭṭhe baddhasukkhamahiṃsacamme vissajjenti.
ஸஹஸ்ஸதா²மந்தி புரிஸஸஹஸ்ஸப³லங், புரிஸஸஹஸ்ஸேன வஹிதப்³ப³பா⁴ரவஹங். பல்லங்கே நிஸின்னோவாதி ரதனமயபல்லங்கே யதா²னிஸின்னோ ஏவ. உப்பதனாகாரபத்தந்தி உப்பதித்வா டி²தங் விய. ஜியங் போதெ²ந்தஸ்ஸாதி ஜியாகா⁴தங் கரொந்தஸ்ஸ. ஜியப்பஹாரஸத்³தோ³தி ஜியாகா⁴தஸத்³தோ³. யந்தே ப³த்³த⁴ந்தி யந்தப³த்³த⁴ங் கத்வா ட²பிதங். ஸத்³த³ந்தரேதி தா²மமஜ்ஜி²மஸ்ஸ புரிஸஸ்ஸ ஸத்³த³ஸவனட்டா²னே. கா³வுதஸ்ஸ சதுத்தோ² பா⁴கோ³ கோஸோதிபி வுச்சதி த்³விஸஹஸ்ஸத³ண்ட³ப்பமாணட்டா²னங்.
Sahassathāmanti purisasahassabalaṃ, purisasahassena vahitabbabhāravahaṃ. Pallaṅke nisinnovāti ratanamayapallaṅke yathānisinno eva. Uppatanākārapattanti uppatitvā ṭhitaṃ viya. Jiyaṃ pothentassāti jiyāghātaṃ karontassa. Jiyappahārasaddoti jiyāghātasaddo. Yante baddhanti yantabaddhaṃ katvā ṭhapitaṃ. Saddantareti thāmamajjhimassa purisassa saddasavanaṭṭhāne. Gāvutassa catuttho bhāgo kosotipi vuccati dvisahassadaṇḍappamāṇaṭṭhānaṃ.
ஸப்³ப³ட்டா²னானீதி மஹாபுரிஸஸ்ஸ தானி தானி ஸப்³பா³னி வஸனட்டா²னானி. ஸிகா²ப³த்³தோ⁴தி புரிஸஸபா⁴வஸ்ஸேவ விஸேஸதோ த³ஸ்ஸனமேதங். ந உப்பிலாவிதபா⁴வத்த²ந்தி உப்பிலாவிதபா⁴வஸங்கா²தங் அத்த²ங் ந கதே²ஸீதி அத்தோ². தஸ்ஸ ஹி போ³தி⁴மூலேயேவ ஸேதுகா⁴தோ. தேனேவாதி அப்பமாத³லக்க²ணஸ்ஸ தீ³பனதோ ஏவ. அத்தானங் அதிக்கமித்வாதி அத்தனோ ஜராபத்திங் அசிந்தெத்வா அட்டீயதி. ந பனேஸ மக்³கே³ன பஹீனோ ததா³ மக்³க³ஸ்ஸ அனதி⁴க³தத்தா. ஸிக்க²ங் படிக்கி²பித்வாதி யதா²ஸமாதி³ன்னஸிக்க²ங் பஹாய.
Sabbaṭṭhānānīti mahāpurisassa tāni tāni sabbāni vasanaṭṭhānāni. Sikhābaddhoti purisasabhāvasseva visesato dassanametaṃ. Na uppilāvitabhāvatthanti uppilāvitabhāvasaṅkhātaṃ atthaṃ na kathesīti attho. Tassa hi bodhimūleyeva setughāto. Tenevāti appamādalakkhaṇassa dīpanato eva. Attānaṃ atikkamitvāti attano jarāpattiṃ acintetvā aṭṭīyati. Na panesa maggena pahīno tadā maggassa anadhigatattā. Sikkhaṃ paṭikkhipitvāti yathāsamādinnasikkhaṃ pahāya.
அவிபரீதப்³யாதி⁴ஆதி³ஸபா⁴வாவாதி ஏகந்தேன ப்³யாதி⁴ஆதி³ஸபா⁴வா ஏவ. ஏவங் ஜிகு³ச்சா²விஹாரேனாதி ஏவங் ஸகலஸ்ஸேவ வட்டது³க்க²ஸ்ஸ ஜிகு³ச்ச²னவிஹாரேன விஹரந்தஸ்ஸ. ஏவங் ஜிகு³ச்ச²னந்தி ஏவங் பரஸ்ஸ ஜிகு³ச்ச²னங். பரங் அஜிகு³ச்ச²மானோதி கருணாயனேன ஏவங் பரங் அஜிகு³ச்ச²ந்தோ. அபி⁴பொ⁴ஸ்மீதி அபி⁴ப⁴விதா அஸ்மி. உஸ்ஸாஹோ அஹூதி சதுரங்க³ஸமன்னாக³தங் வீரியமேவ சதுப்³பி³த⁴ஸம்மப்பதா⁴னவீரியஞ்ச அஹோஸி, யேன மக்³க³ப்³ரஹ்மசரியபராயணோ ஜாதோ.
Aviparītabyādhiādisabhāvāvāti ekantena byādhiādisabhāvā eva. Evaṃ jigucchāvihārenāti evaṃ sakalasseva vaṭṭadukkhassa jigucchanavihārena viharantassa. Evaṃ jigucchananti evaṃ parassa jigucchanaṃ. Paraṃ ajigucchamānoti karuṇāyanena evaṃ paraṃ ajigucchanto. Abhibhosmīti abhibhavitā asmi. Ussāho ahūti caturaṅgasamannāgataṃ vīriyameva catubbidhasammappadhānavīriyañca ahosi, yena maggabrahmacariyaparāyaṇo jāto.
ஸுகு²மாலஸுத்தவண்ணனா நிட்டி²தா.
Sukhumālasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. ஸுகு²மாலஸுத்தங் • 9. Sukhumālasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. ஸுகு²மாலஸுத்தவண்ணனா • 9. Sukhumālasuttavaṇṇanā
