| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༩. སུཁུམཱལསུཏྟཝཎྞནཱ
9. Sukhumālasuttavaṇṇanā
༣༩. ནཝམེ ནིདྡུཀྑོཏི ཀཱཡིཀཙེཏསིཀདུཀྑཝིརཧིཏོ། སདུཀྑེ ཧི སཝིགྷཱཏེ སུཁུམཱལཏྟཱ ཨནཝསརཱ, ཏསྨཱ སུཁིཏོ ནིདྡུཀྑཏཱཡ སུཁུམཱལོ ནཱམ། ཡཱཝསྶ སུཁུམཱལཏྟཱ པརམུཀྐཾསགཏཱཏི ཨཱཧ ‘‘པརམསུཁུམཱལོ’’ཏི། ཨཏིཝིཡ སུཁུམཱལོཏི ཨཏྠོ། ཨནྟམཏཱིཏཾ ཨཙྩནྟཾ། སབྦདཱ སུཁུམཱལོཏི ཨཱཧ ‘‘སཏཏནིདྡུཀྑོ’’ཏི། ཙརིཡཀཱལེཏི བོདྷིཙརིཡཱཡ ཙརཎཀཱལེ། ཏེནཱཏི བོདྷིསཏྟེན། ཨཉྙཏྠ པན པདུམནྟི རཏྟཾ ཀམལཾ། པུཎྜརཱིཀནྟི སེཏཾ ཝུཙྩཏི། ཨིཏརཱཏི ཨིཏརཔོཀྑརཎིཡོ། ‘‘བོདྷིསཏྟསྶ ཀིརཱ’’ཏིཨཱདིཀཾ པོཀྑརཎཱིནཾ ཨུཔྤཏྟིདསྶནཾ། ཀུདྡཱལཀམྨཀཱརེཏི ཁཎཀེ། པོཀྑརཎིཊྛཱནཱནཱིཏི པོཀྑརཎིཁཎནཡོགྒཊྛཱནཱནི། གཎྷཱཔེསཱིཏི ཁཎཱཔེསི། པོཀྑརཎིསདྡོ ཙེཏྠ ཏཱདིསེ ཛལཱསཡེ ནིརུལ༹ྷོ དཊྛབྦོ པངྐཛཱདིསདྡཱ ཝིཡ། སོཔཱནབཱཧུཀཱནཾ མཏྠཀཊྛཱནཾ ཨུཎྷཱིསནྟི ཨདྷིཔྤེཏཾ། ཨུདཀསེཙནནཱལི༹ཀཱཏི ཨུདཀཙྪཊཱཝིསྶཛྫནནཱལི༹ཡནྟཱནི། པཉྩཝིདྷཱཏི ཝཎྞཝསེན ཛཱཏིཝསེན ཙ།
39. Navame niddukkhoti kāyikacetasikadukkhavirahito. Sadukkhe hi savighāte sukhumālattā anavasarā, tasmā sukhito niddukkhatāya sukhumālo nāma. Yāvassa sukhumālattā paramukkaṃsagatāti āha ‘‘paramasukhumālo’’ti. Ativiya sukhumāloti attho. Antamatītaṃ accantaṃ. Sabbadā sukhumāloti āha ‘‘satataniddukkho’’ti. Cariyakāleti bodhicariyāya caraṇakāle. Tenāti bodhisattena. Aññattha pana padumanti rattaṃ kamalaṃ. Puṇḍarīkanti setaṃ vuccati. Itarāti itarapokkharaṇiyo. ‘‘Bodhisattassa kirā’’tiādikaṃ pokkharaṇīnaṃ uppattidassanaṃ. Kuddālakammakāreti khaṇake. Pokkharaṇiṭṭhānānīti pokkharaṇikhaṇanayoggaṭṭhānāni. Gaṇhāpesīti khaṇāpesi. Pokkharaṇisaddo cettha tādise jalāsaye niruḷho daṭṭhabbo paṅkajādisaddā viya. Sopānabāhukānaṃ matthakaṭṭhānaṃ uṇhīsanti adhippetaṃ. Udakasecananāḷikāti udakacchaṭāvissajjananāḷiyantāni. Pañcavidhāti vaṇṇavasena jātivasena ca.
ཁོ པནསྶཱཏི ནིཔཱཏམཏྟཾ། ཀཱསིཀ-སདྡོ ཨཏིཝིཡ སཎྷེ སུཁུམེ མཧགྒྷཝཏྠེ ནིརུལ༹ྷོ, ཨཉྙསྨིམྤི ཏཐཱཛཱཏིཀེ རུལ༹ྷིཝསེན པཝཏྟཏཱིཏི དཊྛབྦཾ། ཏེནཱཧ ‘‘ཨཀཱསིཀཾ ཙནྡན’’ནྟི། ཧེམནྟེ ཝཱསོ ཧེམནྟཾ, ཧེམནྟཾ ཨརཧཏཱིཏི ཧེམནྟིཀོ, པཱསཱདོ། ‘‘ཨིཏརེསུཔི ཨེསེཝ ནཡོ’’ཏི ཝཏྭཱ ཏདེཝ ནེསཾ ཨརཧཏཾ དསྶེཏུཾ ‘‘ཏཏྠ ཧེམནྟིཀོ’’ཏིཨཱདི ཝུཏྟཾ། སཛཱལཱནཱིཏི སཛཱལཝཱཏཔཱནཱནི, ཨུདཀཡནྟཱནཱིཏི ཨུདཀདྷཱརཱཝིསྶནྡནཀཡནྟཱནི། པཱསཱདམཏྠཀེཏི པཱསཱདསྶ ཨུཔརིཨཱཀཱསཏལེ། བནྡྷིཏྭཱཏི པཡོཛིཏཡནྟེ སུཀྑམཧིཾསཙམྨཾ བནྡྷིཏྭཱ། ཡནྟཾ པརིཝཏྟེཏྭཱཏི ཡཐཱཔཡོཛིཏཾ ཡནྟཾ པཱསཱཎཱརོཔནཏྠཉྩེཝ པུན ཏེསཾ ཝིསྶཛྫནཏྠཉྩ པརིཝཏྟེཏྭཱ། ཏསྨིཾ ཝིསྶཛྫེནྟཱིཏི ཚདནཔིཊྛེ བདྡྷསུཀྑམཧིཾསཙམྨེ ཝིསྶཛྫེནྟི།
Kho panassāti nipātamattaṃ. Kāsika-saddo ativiya saṇhe sukhume mahagghavatthe niruḷho, aññasmimpi tathājātike ruḷhivasena pavattatīti daṭṭhabbaṃ. Tenāha ‘‘akāsikaṃ candana’’nti. Hemante vāso hemantaṃ, hemantaṃ arahatīti hemantiko, pāsādo. ‘‘Itaresupi eseva nayo’’ti vatvā tadeva nesaṃ arahataṃ dassetuṃ ‘‘tattha hemantiko’’tiādi vuttaṃ. Sajālānīti sajālavātapānāni, udakayantānīti udakadhārāvissandanakayantāni. Pāsādamatthaketi pāsādassa upariākāsatale. Bandhitvāti payojitayante sukkhamahiṃsacammaṃ bandhitvā. Yantaṃ parivattetvāti yathāpayojitaṃ yantaṃ pāsāṇāropanatthañceva puna tesaṃ vissajjanatthañca parivattetvā. Tasmiṃ vissajjentīti chadanapiṭṭhe baddhasukkhamahiṃsacamme vissajjenti.
སཧསྶཐཱམནྟི པུརིསསཧསྶབལཾ, པུརིསསཧསྶེན ཝཧིཏབྦབྷཱརཝཧཾ། པལླངྐེ ནིསིནྣོཝཱཏི རཏནམཡཔལླངྐེ ཡཐཱནིསིནྣོ ཨེཝ། ཨུཔྤཏནཱཀཱརཔཏྟནྟི ཨུཔྤཏིཏྭཱ ཋིཏཾ ཝིཡ། ཛིཡཾ པོཐེནྟསྶཱཏི ཛིཡཱགྷཱཏཾ ཀརོནྟསྶ། ཛིཡཔྤཧཱརསདྡོཏི ཛིཡཱགྷཱཏསདྡོ། ཡནྟེ བདྡྷནྟི ཡནྟབདྡྷཾ ཀཏྭཱ ཋཔིཏཾ། སདྡནྟརེཏི ཐཱམམཛ྄ཛྷིམསྶ པུརིསསྶ སདྡསཝནཊྛཱནེ། གཱཝུཏསྶ ཙཏུཏྠོ བྷཱགོ ཀོསོཏིཔི ཝུཙྩཏི དྭིསཧསྶདཎྜཔྤམཱཎཊྛཱནཾ།
Sahassathāmanti purisasahassabalaṃ, purisasahassena vahitabbabhāravahaṃ. Pallaṅke nisinnovāti ratanamayapallaṅke yathānisinno eva. Uppatanākārapattanti uppatitvā ṭhitaṃ viya. Jiyaṃ pothentassāti jiyāghātaṃ karontassa. Jiyappahārasaddoti jiyāghātasaddo. Yante baddhanti yantabaddhaṃ katvā ṭhapitaṃ. Saddantareti thāmamajjhimassa purisassa saddasavanaṭṭhāne. Gāvutassa catuttho bhāgo kosotipi vuccati dvisahassadaṇḍappamāṇaṭṭhānaṃ.
སབྦཊྛཱནཱནཱིཏི མཧཱཔུརིསསྶ ཏཱནི ཏཱནི སབྦཱནི ཝསནཊྛཱནཱནི། སིཁཱབདྡྷོཏི པུརིསསབྷཱཝསྶེཝ ཝིསེསཏོ དསྶནམེཏཾ། ན ཨུཔྤིལཱཝིཏབྷཱཝཏྠནྟི ཨུཔྤིལཱཝིཏབྷཱཝསངྑཱཏཾ ཨཏྠཾ ན ཀཐེསཱིཏི ཨཏྠོ། ཏསྶ ཧི བོདྷིམཱུལེཡེཝ སེཏུགྷཱཏོ། ཏེནེཝཱཏི ཨཔྤམཱདལཀྑཎསྶ དཱིཔནཏོ ཨེཝ། ཨཏྟཱནཾ ཨཏིཀྐམིཏྭཱཏི ཨཏྟནོ ཛརཱཔཏྟིཾ ཨཙིནྟེཏྭཱ ཨཊྚཱིཡཏི། ན པནེས མགྒེན པཧཱིནོ ཏདཱ མགྒསྶ ཨནདྷིགཏཏྟཱ། སིཀྑཾ པཊིཀྑིཔིཏྭཱཏི ཡཐཱསམཱདིནྣསིཀྑཾ པཧཱཡ།
Sabbaṭṭhānānīti mahāpurisassa tāni tāni sabbāni vasanaṭṭhānāni. Sikhābaddhoti purisasabhāvasseva visesato dassanametaṃ. Na uppilāvitabhāvatthanti uppilāvitabhāvasaṅkhātaṃ atthaṃ na kathesīti attho. Tassa hi bodhimūleyeva setughāto. Tenevāti appamādalakkhaṇassa dīpanato eva. Attānaṃ atikkamitvāti attano jarāpattiṃ acintetvā aṭṭīyati. Na panesa maggena pahīno tadā maggassa anadhigatattā. Sikkhaṃ paṭikkhipitvāti yathāsamādinnasikkhaṃ pahāya.
ཨཝིཔརཱིཏབྱཱདྷིཨཱདིསབྷཱཝཱཝཱཏི ཨེཀནྟེན བྱཱདྷིཨཱདིསབྷཱཝཱ ཨེཝ། ཨེཝཾ ཛིགུཙྪཱཝིཧཱརེནཱཏི ཨེཝཾ སཀལསྶེཝ ཝཊྚདུཀྑསྶ ཛིགུཙྪནཝིཧཱརེན ཝིཧརནྟསྶ། ཨེཝཾ ཛིགུཙྪནནྟི ཨེཝཾ པརསྶ ཛིགུཙྪནཾ། པརཾ ཨཛིགུཙྪམཱནོཏི ཀརུཎཱཡནེན ཨེཝཾ པརཾ ཨཛིགུཙྪནྟོ། ཨབྷིབྷོསྨཱིཏི ཨབྷིབྷཝིཏཱ ཨསྨི། ཨུསྶཱཧོ ཨཧཱུཏི ཙཏུརངྒསམནྣཱགཏཾ ཝཱིརིཡམེཝ ཙཏུབྦིདྷསམྨཔྤདྷཱནཝཱིརིཡཉྩ ཨཧོསི, ཡེན མགྒབྲཧྨཙརིཡཔརཱཡཎོ ཛཱཏོ།
Aviparītabyādhiādisabhāvāvāti ekantena byādhiādisabhāvā eva. Evaṃ jigucchāvihārenāti evaṃ sakalasseva vaṭṭadukkhassa jigucchanavihārena viharantassa. Evaṃ jigucchananti evaṃ parassa jigucchanaṃ. Paraṃ ajigucchamānoti karuṇāyanena evaṃ paraṃ ajigucchanto. Abhibhosmīti abhibhavitā asmi. Ussāho ahūti caturaṅgasamannāgataṃ vīriyameva catubbidhasammappadhānavīriyañca ahosi, yena maggabrahmacariyaparāyaṇo jāto.
སུཁུམཱལསུཏྟཝཎྞནཱ ནིཊྛིཏཱ།
Sukhumālasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༩. སུཁུམཱལསུཏྟཾ • 9. Sukhumālasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༩. སུཁུམཱལསུཏྟཝཎྞནཱ • 9. Sukhumālasuttavaṇṇanā
