| Library / Tipiṭaka / ཏིཔིཊཀ • Tipiṭaka / ཨིཏིཝུཏྟཀཔཱལི༹ • Itivuttakapāḷi |
༥. སུཀྐདྷམྨསུཏྟཾ
5. Sukkadhammasuttaṃ
༤༢. ཝུཏྟཉྷེཏཾ བྷགཝཏཱ, ཝུཏྟམརཧཏཱཏི མེ སུཏཾ –
42. Vuttañhetaṃ bhagavatā, vuttamarahatāti me sutaṃ –
‘‘དྭེམེ, བྷིཀྑཝེ, སུཀྐཱ དྷམྨཱ ལོཀཾ པཱལེནྟི། ཀཏམེ དྭེ? ཧིརཱི 1 ཙ, ཨོཏྟཔྤཉྩ། ཨིམེ ཙེ, བྷིཀྑཝེ, དྭེ སུཀྐཱ དྷམྨཱ ལོཀཾ ན པཱལེཡྻུཾ, ནཡིདྷ པཉྙཱཡེཐ མཱཏཱཏི ཝཱ མཱཏུཙྪཱཏི ཝཱ མཱཏུལཱནཱིཏི ཝཱ ཨཱཙརིཡབྷརིཡཱཏི ཝཱ གརཱུནཾ དཱརཱཏི ཝཱ། སམྦྷེདཾ ལོཀོ ཨགམིསྶ ཡཐཱ ཨཛེལ༹ཀཱ ཀུཀྐུཊསཱུཀརཱ སོཎསིངྒཱལཱ 2། ཡསྨཱ ཙ ཁོ, བྷིཀྑཝེ, ཨིམེ དྭེ སུཀྐཱ དྷམྨཱ ལོཀཾ པཱལེནྟི ཏསྨཱ པཉྙཱཡཏི མཱཏཱཏི ཝཱ མཱཏུཙྪཱཏི ཝཱ མཱཏུལཱནཱིཏི ཝཱ ཨཱཙརིཡབྷརིཡཱཏི ཝཱ གརཱུནཾ དཱརཱཏི ཝཱ’’ཏི། ཨེཏམཏྠཾ བྷགཝཱ ཨཝོཙ། ཏཏྠེཏཾ ཨིཏི ཝུཙྩཏི –
‘‘Dveme, bhikkhave, sukkā dhammā lokaṃ pālenti. Katame dve? Hirī 3 ca, ottappañca. Ime ce, bhikkhave, dve sukkā dhammā lokaṃ na pāleyyuṃ, nayidha paññāyetha mātāti vā mātucchāti vā mātulānīti vā ācariyabhariyāti vā garūnaṃ dārāti vā. Sambhedaṃ loko agamissa yathā ajeḷakā kukkuṭasūkarā soṇasiṅgālā 4. Yasmā ca kho, bhikkhave, ime dve sukkā dhammā lokaṃ pālenti tasmā paññāyati mātāti vā mātucchāti vā mātulānīti vā ācariyabhariyāti vā garūnaṃ dārāti vā’’ti. Etamatthaṃ bhagavā avoca. Tatthetaṃ iti vuccati –
‘‘ཡེསཾ ཙེ ཧིརིཨོཏྟཔྤཾ, སབྦདཱ ཙ ན ཝིཛྫཏི།
‘‘Yesaṃ ce hiriottappaṃ, sabbadā ca na vijjati;
ཝོཀྐནྟཱ སུཀྐམཱུལཱ ཏེ, ཛཱཏིམརཎགཱམིནོ༎
Vokkantā sukkamūlā te, jātimaraṇagāmino.
‘‘ཡེསཉྩ ཧིརིཨོཏྟཔྤཾ, སདཱ སམྨཱ ཨུཔཊྛིཏཱ།
‘‘Yesañca hiriottappaṃ, sadā sammā upaṭṭhitā;
ཝིརཱུལ༹ྷབྲཧྨཙརིཡཱ ཏེ, སནྟོ ཁཱིཎཔུནབྦྷཝཱ’’ཏི༎
Virūḷhabrahmacariyā te, santo khīṇapunabbhavā’’ti.
ཨཡམྤི ཨཏྠོ ཝུཏྟོ བྷགཝཏཱ, ཨིཏི མེ སུཏནྟི། པཉྩམཾ།
Ayampi attho vutto bhagavatā, iti me sutanti. Pañcamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / ཨིཏིཝུཏྟཀ-ཨཊྛཀཐཱ • Itivuttaka-aṭṭhakathā / ༥. སུཀྐདྷམྨསུཏྟཝཎྞནཱ • 5. Sukkadhammasuttavaṇṇanā
