| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
8. ஸுக்கஸுத்தவண்ணனா
8. Sukkasuttavaṇṇanā
8. அட்ட²மே ‘‘ஸுக்கங் வத்த²’’ந்திஆதீ³ஸு விய ந வண்ணஸுக்கதாய த⁴ம்மானங் ஸுக்கதா, அத² கோ² ஸுக்காபி⁴ஜாதிஹேதுதோ பப⁴ஸ்ஸரபா⁴வகரணதோ சாதி த³ஸ்ஸெந்தோ ‘‘ந வண்ணஸுக்கதாயா’’திஆதி³மாஹ. ஸுக்கதாயாதி ஸுக்காபி⁴ஜாதிதாய. ஹிரீ பாபத⁴ம்மே கூ³த²ங் விய பஸ்ஸந்தீ ஜிகு³ச்ச²தீதி ஆஹ ‘‘பாபதோ ஜிகு³ச்ச²னலக்க²ணா ஹிரீ’’தி. ஒத்தப்பங் தே உண்ஹங் விய பஸ்ஸந்தங் ததோ பா⁴யதீதி வுத்தங் ‘‘பா⁴யனலக்க²ணங் ஓதப்ப’’ந்தி. இத³ஞ்ச ஹிரொத்தப்பங் அஞ்ஞமஞ்ஞவிப்பயோகீ³ பாபதோ விமுக²பூ⁴தஞ்ச, தஸ்மா நேஸங் இத³ங் நானாகரணங் – அஜ்ஜ²த்தஸமுட்டா²னா ஹிரீ, ப³ஹித்³தா⁴ஸமுட்டா²னங் ஒத்தப்பங். அத்தாதி⁴பதி ஹிரீ, லோகாதி⁴பதி ஓதப்பங். லஜ்ஜாஸபா⁴வஸண்டி²தா ஹிரீ, ப⁴யஸபா⁴வஸண்டி²தங் ஒத்தப்பங். ஸப்பதிஸ்ஸவலக்க²ணா ஹிரீ, வஜ்ஜபீ⁴ருகப⁴யத³ஸ்ஸாவிலக்க²ணங் ஒத்தப்பந்தி.
8. Aṭṭhame ‘‘sukkaṃ vattha’’ntiādīsu viya na vaṇṇasukkatāya dhammānaṃ sukkatā, atha kho sukkābhijātihetuto pabhassarabhāvakaraṇato cāti dassento ‘‘na vaṇṇasukkatāyā’’tiādimāha. Sukkatāyāti sukkābhijātitāya. Hirī pāpadhamme gūthaṃ viya passantī jigucchatīti āha ‘‘pāpato jigucchanalakkhaṇā hirī’’ti. Ottappaṃ te uṇhaṃ viya passantaṃ tato bhāyatīti vuttaṃ ‘‘bhāyanalakkhaṇaṃ otappa’’nti. Idañca hirottappaṃ aññamaññavippayogī pāpato vimukhabhūtañca, tasmā nesaṃ idaṃ nānākaraṇaṃ – ajjhattasamuṭṭhānā hirī, bahiddhāsamuṭṭhānaṃ ottappaṃ. Attādhipati hirī, lokādhipati otappaṃ. Lajjāsabhāvasaṇṭhitā hirī, bhayasabhāvasaṇṭhitaṃ ottappaṃ. Sappatissavalakkhaṇā hirī, vajjabhīrukabhayadassāvilakkhaṇaṃ ottappanti.
தத்த² அஜ்ஜ²த்தஸமுட்டா²னங் ஹிரிங் சதூஹி காரணேஹி ஸமுட்டா²பேதி ஜாதிங் பச்சவெக்கி²த்வா, வயங், ஸூரபா⁴வங், பா³ஹுஸச்சங் பச்சவெக்கி²த்வா. கத²ங்? ‘‘பாபகரணங் நாமேதங் ந ஜாதிஸம்பன்னானங் கம்மங், ஹீனஜச்சானங் கேவட்டாதீ³னங் கம்மங், மாதி³ஸஸ்ஸ ஜாதிஸம்பன்னஸ்ஸ இத³ங் காதுங் ந யுத்த’’ந்தி ஏவங் தாவ ஜாதிங் பச்சவெக்கி²த்வா பாபங் அகரொந்தோ ஹிரிங் ஸமுட்டா²பேதி. ததா² ‘‘பாபகரணங் நாமேதங் த³ஹரேஹி கத்தப்³ப³ங் கம்மங், மாதி³ஸஸ்ஸ வயே டி²தஸ்ஸ இத³ங் காதுங் ந யுத்த’’ந்தி ஏவங் வயங் பச்சவெக்கி²த்வா பாபங் அகரொந்தோ ஹிரிங் ஸமுட்டா²பேதி. ததா² ‘‘பாபகரணங் நாமேதங் து³ப்³ப³லஜாதிகானங் கம்மங், மாதி³ஸஸ்ஸ ஸூரபா⁴வஸம்பன்னஸ்ஸ இத³ங் காதுங் ந யுத்த’’ந்தி ஏவங் ஸூரபா⁴வங் பச்சவெக்கி²த்வா பாபங் அகரொந்தோ ஹிரிங் ஸமுட்டா²பேதி. ததா² ‘‘பாபகம்மங் நாமேதங் அந்த⁴பா³லானங் கம்மங், ந பண்டி³தானங், மாதி³ஸஸ்ஸ பண்டி³தஸ்ஸ ப³ஹுஸ்ஸுதஸ்ஸ இத³ங் காதுங் ந யுத்த’’ந்தி ஏவங் பா³ஹுஸச்சங் பச்சவெக்கி²த்வா பாபங் அகரொந்தோ ஹிரிங் ஸமுட்டா²பேதி. ஏவங் அஜ்ஜ²த்தஸமுட்டா²னங் ஹிரிங் சதூஹி காரணேஹி ஸமுட்டா²பேதி, ஸமுட்டா²பெந்தோ ச ஹிரிங் நிஸ்ஸாய பாபகம்மங் ந கரோதி.
Tattha ajjhattasamuṭṭhānaṃ hiriṃ catūhi kāraṇehi samuṭṭhāpeti jātiṃ paccavekkhitvā, vayaṃ, sūrabhāvaṃ, bāhusaccaṃ paccavekkhitvā. Kathaṃ? ‘‘Pāpakaraṇaṃ nāmetaṃ na jātisampannānaṃ kammaṃ, hīnajaccānaṃ kevaṭṭādīnaṃ kammaṃ, mādisassa jātisampannassa idaṃ kātuṃ na yutta’’nti evaṃ tāva jātiṃ paccavekkhitvā pāpaṃ akaronto hiriṃ samuṭṭhāpeti. Tathā ‘‘pāpakaraṇaṃ nāmetaṃ daharehi kattabbaṃ kammaṃ, mādisassa vaye ṭhitassa idaṃ kātuṃ na yutta’’nti evaṃ vayaṃ paccavekkhitvā pāpaṃ akaronto hiriṃ samuṭṭhāpeti. Tathā ‘‘pāpakaraṇaṃ nāmetaṃ dubbalajātikānaṃ kammaṃ, mādisassa sūrabhāvasampannassa idaṃ kātuṃ na yutta’’nti evaṃ sūrabhāvaṃ paccavekkhitvā pāpaṃ akaronto hiriṃ samuṭṭhāpeti. Tathā ‘‘pāpakammaṃ nāmetaṃ andhabālānaṃ kammaṃ, na paṇḍitānaṃ, mādisassa paṇḍitassa bahussutassa idaṃ kātuṃ na yutta’’nti evaṃ bāhusaccaṃ paccavekkhitvā pāpaṃ akaronto hiriṃ samuṭṭhāpeti. Evaṃ ajjhattasamuṭṭhānaṃ hiriṃ catūhi kāraṇehi samuṭṭhāpeti, samuṭṭhāpento ca hiriṃ nissāya pāpakammaṃ na karoti.
கத²ங் ப³ஹித்³தா⁴ஸமுட்டா²னங் ஒத்தப்பங்? ‘‘ஸசே த்வங் பாபகம்மங் கரிஸ்ஸஸி, சதூஸு பரிஸாஸு க³ரஹப்பத்தோ ப⁴விஸ்ஸஸி, ததோ தங் ஸீலவந்தோ ஸப்³ரஹ்மசாரீ விவஜ்ஜிஸ்ஸந்தீ’’தி பச்சவெக்கி²த்வா ப³ஹித்³தா⁴ஸமுட்டா²னங் ஒத்தப்பங் நிஸ்ஸாய பாபகம்மங் ந கரோதி. ஏவங் ப³ஹித்³தா⁴ஸமுட்டா²னங் ஒத்தப்பங்.
Kathaṃ bahiddhāsamuṭṭhānaṃ ottappaṃ? ‘‘Sace tvaṃ pāpakammaṃ karissasi, catūsu parisāsu garahappatto bhavissasi, tato taṃ sīlavanto sabrahmacārī vivajjissantī’’ti paccavekkhitvā bahiddhāsamuṭṭhānaṃ ottappaṃ nissāya pāpakammaṃ na karoti. Evaṃ bahiddhāsamuṭṭhānaṃ ottappaṃ.
கத²ங் அத்தாதி⁴பதி ஹிரீ? இதே⁴கச்சோ குலபுத்தோ அத்தானங் அதி⁴பதிங் ஜெட்ட²கங் கத்வா ‘‘மாதி³ஸஸ்ஸ ஸத்³தா⁴பப்³ப³ஜிதஸ்ஸ ப³ஹுஸ்ஸுதஸ்ஸ து⁴தத⁴ரஸ்ஸ ந யுத்தங் பாபகம்மங் காது’’ந்தி பாபங் ந கரோதி. ஏவங் அத்தாதி⁴பதி ஹிரீ. தேனாஹ ப⁴க³வா ‘‘ஸோ அத்தானங்யேவ அதி⁴பதிங் கரித்வா அகுஸலங் பஜஹதி, குஸலங் பா⁴வேதி, ஸாவஜ்ஜங் பஜஹதி, அனவஜ்ஜங் பா⁴வேதி, ஸுத்³த⁴ங் அத்தானங் பரிஹரதீ’’தி (அ॰ நி॰ 3.40).
Kathaṃ attādhipati hirī? Idhekacco kulaputto attānaṃ adhipatiṃ jeṭṭhakaṃ katvā ‘‘mādisassa saddhāpabbajitassa bahussutassa dhutadharassa na yuttaṃ pāpakammaṃ kātu’’nti pāpaṃ na karoti. Evaṃ attādhipati hirī. Tenāha bhagavā ‘‘so attānaṃyeva adhipatiṃ karitvā akusalaṃ pajahati, kusalaṃ bhāveti, sāvajjaṃ pajahati, anavajjaṃ bhāveti, suddhaṃ attānaṃ pariharatī’’ti (a. ni. 3.40).
கத²ங் லோகாதி⁴பதி ஒத்தப்பங்? இதே⁴கச்சோ குலபுத்தோ லோகங் அதி⁴பதிங் ஜெட்ட²கங் கத்வா ‘‘ஸசே கோ² த்வங் பாபகம்மங் கரெய்யாஸி, ஸப்³ரஹ்மசாரினோ தாவ தங் ஜானிஸ்ஸந்தி, மஹித்³தி⁴கா மஹானுபா⁴வா லோகே ச ஸமணப்³ராஹ்மணா தே³வதா ச, தஸ்மா தே ந யுத்தங் பாபங் காது’’ந்தி பாபகம்மங் ந கரோதி. யதா²ஹ – ‘‘மஹா கோ² பனாயங் லோகஸன்னிவாஸோ, மஹந்தஸ்மிங் கோ² பன லோகஸன்னிவாஸே ஸந்தி ஸமணப்³ராஹ்மணா இத்³தி⁴மந்தோ தி³ப்³ப³சக்கு²கா பரசித்தவிது³னோ. தே தூ³ரதோபி பஸ்ஸந்தி, ஆஸன்னாபி ந தி³ஸ்ஸந்தி, சேதஸாபி சித்தங் ஜானந்தி, தேபி மங் ஏவங் ஜானிஸ்ஸந்தி ‘பஸ்ஸத², போ⁴, இமங் குலபுத்தங், ஸத்³தா⁴ அகா³ரஸ்மா அனகா³ரியங் பப்³ப³ஜிதோ ஸமானோ வோகிண்ணோ விஹரதி பாபகேஹி அகுஸலேஹி த⁴ம்மேஹீ’தி. ஸந்தி தே³வதா இத்³தி⁴மந்தினியோ தி³ப்³ப³சக்கு²கா பரசித்தவிது³னியோ, தா தூ³ரதோபி பஸ்ஸந்தி, ஆஸன்னாபி ந தி³ஸ்ஸந்தி, சேதஸாபி சித்தங் ஜானந்தி, தாபி மங் ஜானிஸ்ஸந்தி ‘பஸ்ஸத², போ⁴, இமங் குலபுத்தங், ஸத்³தா⁴ அகா³ரஸ்மா அனகா³ரியங் பப்³ப³ஜிதோ ஸமானோ வோகிண்ணோ விஹரதி பாபகேஹி அகுஸலேஹி த⁴ம்மேஹீ’தி…பே॰… ஸோ லோகங்யேவ அதி⁴பதிங் கரித்வா அகுஸலங்…பே॰… பரிஹரதீ’’தி. ஏவங் லோகாதி⁴பதி ஒத்தப்பங்.
Kathaṃ lokādhipati ottappaṃ? Idhekacco kulaputto lokaṃ adhipatiṃ jeṭṭhakaṃ katvā ‘‘sace kho tvaṃ pāpakammaṃ kareyyāsi, sabrahmacārino tāva taṃ jānissanti, mahiddhikā mahānubhāvā loke ca samaṇabrāhmaṇā devatā ca, tasmā te na yuttaṃ pāpaṃ kātu’’nti pāpakammaṃ na karoti. Yathāha – ‘‘mahā kho panāyaṃ lokasannivāso, mahantasmiṃ kho pana lokasannivāse santi samaṇabrāhmaṇā iddhimanto dibbacakkhukā paracittaviduno. Te dūratopi passanti, āsannāpi na dissanti, cetasāpi cittaṃ jānanti, tepi maṃ evaṃ jānissanti ‘passatha, bho, imaṃ kulaputtaṃ, saddhā agārasmā anagāriyaṃ pabbajito samāno vokiṇṇo viharati pāpakehi akusalehi dhammehī’ti. Santi devatā iddhimantiniyo dibbacakkhukā paracittaviduniyo, tā dūratopi passanti, āsannāpi na dissanti, cetasāpi cittaṃ jānanti, tāpi maṃ jānissanti ‘passatha, bho, imaṃ kulaputtaṃ, saddhā agārasmā anagāriyaṃ pabbajito samāno vokiṇṇo viharati pāpakehi akusalehi dhammehī’ti…pe… so lokaṃyeva adhipatiṃ karitvā akusalaṃ…pe… pariharatī’’ti. Evaṃ lokādhipati ottappaṃ.
லஜ்ஜாஸபா⁴வஸண்டி²தாதி எத்த² லஜ்ஜாதி லஜ்ஜனாகாரோ, தேன ஸபா⁴வேன ஸண்டி²தா ஹிரீ. ப⁴யந்தி அபாயப⁴யங், தேன ஸபா⁴வேன ஸண்டி²தங் ஒத்தப்பங். தது³ப⁴யங் பாபபரிவஜ்ஜனே பாகடங் ஹோதி. தத்த² யதா² த்³வீஸு அயோகு³ளேஸு ஏகோ ஸீதலோ ப⁴வெய்ய கூ³த²மக்கி²தோ, ஏகோ உண்ஹோ ஆதி³த்தோ. தேஸு யதா² ஸீதலங் கூ³த²மக்கி²தத்தா ஜிகு³ச்ச²ந்தோ விஞ்ஞுஜாதிகோ ந க³ண்ஹாதி, இதரங் டா³ஹப⁴யேன. ஏவங் பண்டி³தோ லஜ்ஜாய ஜிகு³ச்ச²ந்தோ பாபங் ந கரோதி, ஒத்தப்பேன அபாயப⁴யபீ⁴தோ பாபங் ந கரோதி, ஏவங் லஜ்ஜாஸபா⁴வஸண்டி²தா ஹிரீ, ப⁴யஸபா⁴வஸண்டி²தங் ஒத்தப்பங்.
Lajjāsabhāvasaṇṭhitāti ettha lajjāti lajjanākāro, tena sabhāvena saṇṭhitā hirī. Bhayanti apāyabhayaṃ, tena sabhāvena saṇṭhitaṃ ottappaṃ. Tadubhayaṃ pāpaparivajjane pākaṭaṃ hoti. Tattha yathā dvīsu ayoguḷesu eko sītalo bhaveyya gūthamakkhito, eko uṇho āditto. Tesu yathā sītalaṃ gūthamakkhitattā jigucchanto viññujātiko na gaṇhāti, itaraṃ ḍāhabhayena. Evaṃ paṇḍito lajjāya jigucchanto pāpaṃ na karoti, ottappena apāyabhayabhīto pāpaṃ na karoti, evaṃ lajjāsabhāvasaṇṭhitā hirī, bhayasabhāvasaṇṭhitaṃ ottappaṃ.
கத²ங் ஸப்பதிஸ்ஸவலக்க²ணா ஹிரீ, வஜ்ஜபீ⁴ருகப⁴யத³ஸ்ஸாவிலக்க²ணங் ஒத்தப்பங்? ஏகச்சோ ஹி ஜாதிமஹத்தபச்சவெக்க²ணா, ஸத்து²மஹத்தபச்சவெக்க²ணா, தா³யஜ்ஜமஹத்தபச்சவெக்க²ணா, ஸப்³ரஹ்மசாரிமஹத்தபச்சவெக்க²ணாதி ஏவங் சதூஹி காரணேஹி தத்த² கா³ரவேன ஸப்பதிஸ்ஸவலக்க²ணங் ஹிரிங் ஸமுட்டா²பெத்வா பாபங் ந கரோதி. ஏகச்சோ அத்தானுவாத³ப⁴யங், பரானுவாத³ப⁴யங், த³ண்ட³ப⁴யங், து³க்³க³திப⁴யந்தி ஏவங் சதூஹி காரணேஹி வஜ்ஜதோ பா⁴யந்தோ வஜ்ஜபீ⁴ருகப⁴யத³ஸ்ஸாவிலக்க²ணங் ஒத்தப்பங் பச்சுபட்டா²பெத்வா பாபகம்மங் ந கரோதி. எத்த² ச அஜ்ஜ²த்தஸமுட்டா²னாதி³தா ஹிரொத்தப்பானங் தத்த² தத்த² பாகடபா⁴வேன வுத்தா, ந பன நேஸங் கதா³சி அஞ்ஞமஞ்ஞவிப்பயோகோ³. ந ஹி லஜ்ஜனங் நிப்³ப⁴யங், பாபப⁴யங் வா அலஜ்ஜனங் அத்தீ²தி. ஏவமெத்த² வித்தா²ரதோ அத்த²வண்ணனா வேதி³தப்³பா³.
Kathaṃ sappatissavalakkhaṇā hirī, vajjabhīrukabhayadassāvilakkhaṇaṃ ottappaṃ? Ekacco hi jātimahattapaccavekkhaṇā, satthumahattapaccavekkhaṇā, dāyajjamahattapaccavekkhaṇā, sabrahmacārimahattapaccavekkhaṇāti evaṃ catūhi kāraṇehi tattha gāravena sappatissavalakkhaṇaṃ hiriṃ samuṭṭhāpetvā pāpaṃ na karoti. Ekacco attānuvādabhayaṃ, parānuvādabhayaṃ, daṇḍabhayaṃ, duggatibhayanti evaṃ catūhi kāraṇehi vajjato bhāyanto vajjabhīrukabhayadassāvilakkhaṇaṃ ottappaṃ paccupaṭṭhāpetvā pāpakammaṃ na karoti. Ettha ca ajjhattasamuṭṭhānāditā hirottappānaṃ tattha tattha pākaṭabhāvena vuttā, na pana nesaṃ kadāci aññamaññavippayogo. Na hi lajjanaṃ nibbhayaṃ, pāpabhayaṃ vā alajjanaṃ atthīti. Evamettha vitthārato atthavaṇṇanā veditabbā.
ஸுக்கஸுத்தவண்ணனா நிட்டி²தா.
Sukkasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. ஸுக்கஸுத்தங் • 8. Sukkasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. ஸுக்கஸுத்தவண்ணனா • 8. Sukkasuttavaṇṇanā
