3. ஸமுச்சயக்க²ந்த⁴கங்

ஸுக்கவிஸ்ஸட்டி²கதா²வண்ணனா

97. ஸமுச்சயக்க²ந்த⁴கே வுத்தனயேன வத்தங் ஸமாதா³தப்³ப³ந்தி பாரிவாஸிகக்க²ந்த⁴கவண்ணனாயங் வுத்தனயேன த்³வீஹி பதே³ஹி ஏகேன வா ஸமாதா³தப்³ப³ங். வேதி³யாமீதி சித்தேன ஸம்படிச்சி²த்வா ஸுக²ங் அனுப⁴வாமி, ந தப்பச்சயா அஹங் து³க்கி²தோதி அதி⁴ப்பாயோ. வுத்தனயேனேவ ஸங்க⁴மஜ்ஜே² நிக்கி²பிதப்³ப³ந்தி பாரிவாஸிகக்க²ந்த⁴கே வுத்தனயேன ‘‘மானத்தங் நிக்கி²பாமி, வத்தங் நிக்கி²பாமீ’’தி இமேஹி த்³வீஹி ஏகேன வா நிக்கி²பிதப்³ப³ங். தஸ்ஸ ஆரோசெத்வா நிக்கி²பிதப்³ப³ந்தி அனாரோசனேன வத்தபே⁴த³து³க்கடபரிமோசனத்த²ங் வுத்தங். த்³வே லெட்³டு³பாதே அதிக்கமித்வாதி பி⁴க்கூ²னங் ஸஜ்ஜா²யனஸத்³த³ஸவனூபசாரவிஜஹனத்த²ங் வுத்தங், மஹாமக்³க³தோ ஓக்கம்மாதி மக்³க³ப்படிபன்னபி⁴க்கூ²னங் உபசாரவிஜஹனத்த²ங், கு³ம்பே³ன வா வதியா வா படிச்ச²ன்னட்டா²னேதி த³ஸ்ஸனூபசாரவிஜஹனத்த²ங். அனிக்கி²த்தவத்தேன அந்தோஉபசாரக³தானங் ஸப்³பே³ஸம்பி ஆரோசேதப்³ப³த்தா ‘‘அயங் நிக்கி²த்தவத்தஸ்ஸ பரிஹாரோ’’தி வுத்தங். தத்த² நிக்கி²த்தவத்தஸ்ஸாதி வத்தங் நிக்கி²பித்வா பரிவஸந்தஸ்ஸாதி அத்தோ². அயங் பனெத்த² தே²ரஸ்ஸ அதி⁴ப்பாயோ – வத்தங் நிக்கி²பித்வா பரிவஸந்தஸ்ஸ உபசாரக³தானங் ஸப்³பே³ஸங் ஆரோசனகிச்சங் நத்தி², தி³ட்ட²ரூபானங் ஸுதஸத்³தா³னங் ஆரோசேதப்³ப³ங், அதி³ட்ட²அஸுதானம்பி அந்தொத்³வாத³ஸஹத்த²க³தானங் ஆரோசேதப்³ப³ங். இத³ங் வத்தங் நிக்கி²பித்வா பரிவஸந்தஸ்ஸ லக்க²ணந்தி.