| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
3. ஸமுச்சயக்க²ந்த⁴கோ
3. Samuccayakkhandhako
ஸுக்கவிஸ்ஸட்டி²கதா²வண்ணனா
Sukkavissaṭṭhikathāvaṇṇanā
97. ஸமுச்சயக்க²ந்த⁴கே வேத³யாமஹந்தி ஜானாபேமி அஹங், ஆரோசேமீதிஅத்தோ². அனுப⁴வாமீதிபிஸ்ஸ அத்த²ங் வத³ந்தி. புரிமங் பன பஸங்ஸந்தி ஆரோபனவசனத்தா. ஆரோசெத்வா நிக்கி²பிதப்³ப³ந்தி து³க்கடபரிமோசனத்த²ங் வுத்தங். கேசி பன ‘‘தத³ஹேவ புன வத்தங் ஸமாதி³யித்வா அருணங் உட்டா²பேதுகாமஸ்ஸ ரத்திச்சே²த³பரிஹாரத்த²ம்பீ’’தி வத³ந்தி.
97. Samuccayakkhandhake vedayāmahanti jānāpemi ahaṃ, ārocemītiattho. Anubhavāmītipissa atthaṃ vadanti. Purimaṃ pana pasaṃsanti āropanavacanattā. Ārocetvā nikkhipitabbanti dukkaṭaparimocanatthaṃ vuttaṃ. Keci pana ‘‘tadaheva puna vattaṃ samādiyitvā aruṇaṃ uṭṭhāpetukāmassa ratticchedaparihāratthampī’’ti vadanti.
‘‘ஸபா⁴கா³ பி⁴க்கூ² வஸந்தீ’’தி வுத்தத்தா விஸபா⁴கா³னங் வஸனட்டா²னே வத்தங் அஸமாதி³யித்வா ப³ஹி ஏவ காதும்பி வட்டதீதி த³ட்ட²ப்³ப³ங். ‘‘த்³வே லெட்³டு³பாதே அதிக்கமித்வா’’தி இத³ங் விஹாரே பி⁴க்கூ²னங் ஸஜ்ஜா²யாதி³ஸத்³த³ஸவனூபசாரவிஜஹனத்த²ங் வுத்தங். ‘‘மஹாமக்³க³தோ ஓக்கம்மா’’தி இத³ங் மக்³க³படிபன்னானங் பி⁴க்கூ²னங் உபசாராதிக்கமனத்த²ங் வுத்தங். கு³ம்பே³ன வாதிஆதி³ த³ஸ்ஸனூபசாரவிஜஹனத்த²ங்.
‘‘Sabhāgā bhikkhū vasantī’’ti vuttattā visabhāgānaṃ vasanaṭṭhāne vattaṃ asamādiyitvā bahi eva kātumpi vaṭṭatīti daṭṭhabbaṃ. ‘‘Dve leḍḍupāte atikkamitvā’’ti idaṃ vihāre bhikkhūnaṃ sajjhāyādisaddasavanūpacāravijahanatthaṃ vuttaṃ. ‘‘Mahāmaggato okkammā’’ti idaṃ maggapaṭipannānaṃ bhikkhūnaṃ upacārātikkamanatthaṃ vuttaṃ. Gumbena vātiādi dassanūpacāravijahanatthaṃ.
‘‘ஸோபி கேனசி கம்மேன புரே அருணே ஏவ க³ச்ச²தீ’’தி இமினா ஆரோசனாய கதாய ஸப்³பே³ஸுபி பி⁴க்கூ²ஸு விஹாரக³தேஸு ஊனே க³ணே சரணதோ³ஸோ வா விப்பவாஸதோ³ஸோ வா ந ஹோதி ஆரோசிதத்தா ஸஹவாஸஸ்ஸாதி த³ஸ்ஸேதி. தேனாஹ ‘‘அயஞ்சா’’ திஆதி³. அப்³பா⁴னங் காதுங் ந வட்டதீதி கதம்பி அகதமேவ ஹோதீதி அத்தோ².
‘‘Sopi kenaci kammena pure aruṇe eva gacchatī’’ti iminā ārocanāya katāya sabbesupi bhikkhūsu vihāragatesu ūne gaṇe caraṇadoso vā vippavāsadoso vā na hoti ārocitattā sahavāsassāti dasseti. Tenāha ‘‘ayañcā’’ tiādi. Abbhānaṃ kātuṃ na vaṭṭatīti katampi akatameva hotīti attho.
ஸுக்கவிஸ்ஸட்டி²கதா²வண்ணனா நிட்டி²தா.
Sukkavissaṭṭhikathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / 1. ஸுக்கவிஸ்ஸட்டி² • 1. Sukkavissaṭṭhi
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / ஸுக்கவிஸ்ஸட்டி²கதா² • Sukkavissaṭṭhikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸுக்கவிஸ்ஸட்டி²கதா²வண்ணனா • Sukkavissaṭṭhikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸுக்கவிஸ்ஸட்டி²கதா²வண்ணனா • Sukkavissaṭṭhikathāvaṇṇanā
