| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
৩. সমুচ্চযক্খন্ধকং
3. Samuccayakkhandhakaṃ
সুক্কৰিস্সট্ঠিকথাৰণ্ণনা
Sukkavissaṭṭhikathāvaṇṇanā
৯৭. সমুচ্চযক্খন্ধকে ৰুত্তনযেন ৰত্তং সমাদাতব্বন্তি পারিৰাসিকক্খন্ধকৰণ্ণনাযং ৰুত্তনযেন দ্ৰীহি পদেহি একেন ৰা সমাদাতব্বং। ৰেদিযামীতি চিত্তেন সম্পটিচ্ছিত্ৰা সুখং অনুভৰামি, ন তপ্পচ্চযা অহং দুক্খিতোতি অধিপ্পাযো। ৰুত্তনযেনেৰ সঙ্ঘমজ্ঝে নিক্খিপিতব্বন্তি পারিৰাসিকক্খন্ধকে ৰুত্তনযেন ‘‘মানত্তং নিক্খিপামি, ৰত্তং নিক্খিপামী’’তি ইমেহি দ্ৰীহি একেন ৰা নিক্খিপিতব্বং। তস্স আরোচেত্ৰা নিক্খিপিতব্বন্তি অনারোচনেন ৰত্তভেদদুক্কটপরিমোচনত্থং ৰুত্তং। দ্ৰে লেড্ডুপাতে অতিক্কমিত্ৰাতি ভিক্খূনং সজ্ঝাযনসদ্দসৰনূপচারৰিজহনত্থং ৰুত্তং, মহামগ্গতো ওক্কম্মাতি মগ্গপ্পটিপন্নভিক্খূনং উপচারৰিজহনত্থং, গুম্বেন ৰা ৰতিযা ৰা পটিচ্ছন্নট্ঠানেতি দস্সনূপচারৰিজহনত্থং। অনিক্খিত্তৰত্তেন অন্তোউপচারগতানং সব্বেসম্পি আরোচেতব্বত্তা ‘‘অযং নিক্খিত্তৰত্তস্স পরিহারো’’তি ৰুত্তং। তত্থ নিক্খিত্তৰত্তস্সাতি ৰত্তং নিক্খিপিত্ৰা পরিৰসন্তস্সাতি অত্থো। অযং পনেত্থ থেরস্স অধিপ্পাযো – ৰত্তং নিক্খিপিত্ৰা পরিৰসন্তস্স উপচারগতানং সব্বেসং আরোচনকিচ্চং নত্থি, দিট্ঠরূপানং সুতসদ্দানং আরোচেতব্বং, অদিট্ঠঅসুতানম্পি অন্তোদ্ৰাদসহত্থগতানং আরোচেতব্বং। ইদং ৰত্তং নিক্খিপিত্ৰা পরিৰসন্তস্স লক্খণন্তি।
97. Samuccayakkhandhake vuttanayena vattaṃ samādātabbanti pārivāsikakkhandhakavaṇṇanāyaṃ vuttanayena dvīhi padehi ekena vā samādātabbaṃ. Vediyāmīti cittena sampaṭicchitvā sukhaṃ anubhavāmi, na tappaccayā ahaṃ dukkhitoti adhippāyo. Vuttanayeneva saṅghamajjhe nikkhipitabbanti pārivāsikakkhandhake vuttanayena ‘‘mānattaṃ nikkhipāmi, vattaṃ nikkhipāmī’’ti imehi dvīhi ekena vā nikkhipitabbaṃ. Tassa ārocetvā nikkhipitabbanti anārocanena vattabhedadukkaṭaparimocanatthaṃ vuttaṃ. Dve leḍḍupāte atikkamitvāti bhikkhūnaṃ sajjhāyanasaddasavanūpacāravijahanatthaṃ vuttaṃ, mahāmaggato okkammāti maggappaṭipannabhikkhūnaṃ upacāravijahanatthaṃ, gumbena vā vatiyā vā paṭicchannaṭṭhāneti dassanūpacāravijahanatthaṃ. Anikkhittavattena antoupacāragatānaṃ sabbesampi ārocetabbattā ‘‘ayaṃ nikkhittavattassa parihāro’’ti vuttaṃ. Tattha nikkhittavattassāti vattaṃ nikkhipitvā parivasantassāti attho. Ayaṃ panettha therassa adhippāyo – vattaṃ nikkhipitvā parivasantassa upacāragatānaṃ sabbesaṃ ārocanakiccaṃ natthi, diṭṭharūpānaṃ sutasaddānaṃ ārocetabbaṃ, adiṭṭhaasutānampi antodvādasahatthagatānaṃ ārocetabbaṃ. Idaṃ vattaṃ nikkhipitvā parivasantassa lakkhaṇanti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / ১. সুক্কৰিস্সট্ঠি • 1. Sukkavissaṭṭhi
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / সুক্কৰিস্সট্ঠিকথা • Sukkavissaṭṭhikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সুক্কৰিস্সট্ঠিকথাৰণ্ণনা • Sukkavissaṭṭhikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / সুক্কৰিস্সট্ঠিকথাৰণ্ণনা • Sukkavissaṭṭhikathāvaṇṇanā
