| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
ஸங்கா⁴தி³ஸேஸகண்ட³ங்
Saṅghādisesakaṇḍaṃ
1. ஸுக்கவிஸ்ஸட்டி²ஸிக்கா²பத³வண்ணனா
1. Sukkavissaṭṭhisikkhāpadavaṇṇanā
அஞ்ஞத்ர ஸுபினந்தாதி ஸ்வாயங் து³ப்³ப³லவத்து²கத்தா சேதனாய படிஸந்தி⁴ங் ஆகட்³டி⁴துங் அஸமத்தா², ஸுபினே உபட்டி²தங் நிமித்தஞ்ஹி து³ப்³ப³லங். பவத்தே பன அஞ்ஞேஹி குஸலாகுஸலேஹி உபத்த²ம்பி⁴தா விபாகங் தே³தி. கிஞ்சாபி விபாகங் தே³தி, அத² கோ² அவிஸயே உப்பன்னத்தா அப்³போ³ஹாரிகாவ ஸுபினந்தசேதனாதி லிகி²தங். யங் பனெத்த² ‘‘ஸுபினே உபட்டி²தங் நிமித்தஞ்ஹி து³ப்³ப³ல’’ந்தி வுத்தங், தங் அனேகந்தங், ந ச ஆரம்மணது³ப்³ப³லதாய சித்தப்பவத்தி து³ப்³ப³லா அதீதானாக³தாரம்மணாய, பஞ்ஞத்தாரம்மணாய வா அது³ப்³ப³லத்தா. தஸ்மா து³ப்³ப³லவத்து²கத்தாதி து³ப்³ப³லஹத³யவத்து²கத்தாதி நோ தக்கோதி (வஜிர॰ டீ॰ பாராஜிக 236-237) ஆசரியோ. அவத்து²கதாய து³ப்³ப³லபா⁴வோ யுஜ்ஜதீதி சே? ந, அவத்து²காய பா⁴வனாபப⁴வாய அதிரேகப³லவஸம்ப⁴வதோ. பா⁴வனாப³லஸமப்பிதஞ்ஹி சித்தங் அரூபம்பி ஸமானங் அதிபா⁴ரம்பி கரஜகாயங் க³ஹெத்வா ஏகசித்தக்க²ணேனேவ ப்³ரஹ்மலோகம்பி பாபெத்வா ட²பேதி, தப்படிபா⁴க³ங் அனப்பிதம்பி காமாவசரசித்தங் கரஜகாயங் ஆகாஸே லங்க⁴னஸமத்த²ங் கரோதி. கிங் பனெத்த² தங் அனுமானகரணங்? யேன சித்தஸ்ஸேவ ஆனுபா⁴வோதி பஞ்ஞாயெய்ய சித்தானுபா⁴வேன ட²பனலங்க⁴னாதி³கிரியாவிஸேஸனிப்³ப³த்தித³ஸ்ஸனதோ. பகதிசித்தஸமுட்டா²னரூபங் விய அஸங்ஸட்ட²த்தா, நிக்க²மனத்தா ச வத்தி²ஸீஸங், கடி, காயோதி திதா⁴ ஸுக்கஸ்ஸ டா²னங் பகப்பெந்தி ஆசரியா. ஸப்பவிஸங் விய தங் த³ட்ட²ப்³ப³ங், ந ச விஸே டா²னநியமோ, கோத⁴வஸேன பஸ்ஸந்தஸ்ஸ ஹோதி. ஏவமஸ்ஸ ந டா²னநியமோ, ராக³வஸேன உபக்கமந்தஸ்ஸ ஹோதீதி நோ தக்கோதி ஆசரியோ.
Aññatrasupinantāti svāyaṃ dubbalavatthukattā cetanāya paṭisandhiṃ ākaḍḍhituṃ asamatthā, supine upaṭṭhitaṃ nimittañhi dubbalaṃ. Pavatte pana aññehi kusalākusalehi upatthambhitā vipākaṃ deti. Kiñcāpi vipākaṃ deti, atha kho avisaye uppannattā abbohārikāva supinantacetanāti likhitaṃ. Yaṃ panettha ‘‘supine upaṭṭhitaṃ nimittañhi dubbala’’nti vuttaṃ, taṃ anekantaṃ, na ca ārammaṇadubbalatāya cittappavatti dubbalā atītānāgatārammaṇāya, paññattārammaṇāya vā adubbalattā. Tasmā dubbalavatthukattāti dubbalahadayavatthukattāti no takkoti (vajira. ṭī. pārājika 236-237) ācariyo. Avatthukatāya dubbalabhāvo yujjatīti ce? Na, avatthukāya bhāvanāpabhavāya atirekabalavasambhavato. Bhāvanābalasamappitañhi cittaṃ arūpampi samānaṃ atibhārampi karajakāyaṃ gahetvā ekacittakkhaṇeneva brahmalokampi pāpetvā ṭhapeti, tappaṭibhāgaṃ anappitampi kāmāvacaracittaṃ karajakāyaṃ ākāse laṅghanasamatthaṃ karoti. Kiṃ panettha taṃ anumānakaraṇaṃ? Yena cittasseva ānubhāvoti paññāyeyya cittānubhāvena ṭhapanalaṅghanādikiriyāvisesanibbattidassanato. Pakaticittasamuṭṭhānarūpaṃ viya asaṃsaṭṭhattā, nikkhamanattā ca vatthisīsaṃ, kaṭi, kāyoti tidhā sukkassa ṭhānaṃ pakappenti ācariyā. Sappavisaṃ viya taṃ daṭṭhabbaṃ, na ca vise ṭhānaniyamo, kodhavasena passantassa hoti. Evamassa na ṭhānaniyamo, rāgavasena upakkamantassa hotīti no takkoti ācariyo.
‘‘த³கஸோதங் அனோதிண்ணேபீ’’தி இத³ங் ‘‘ஓதிண்ணமத்தே’’தி இமினா விருஜ்ஜ²தீதி சே, தங் த³ஸ்ஸேதுங் ‘‘டா²னதோ பன சுத’’ந்திஆதி³மாஹ. தஸ்ஸத்தோ² – நிமித்தே உபக்கமங் கத்வா ஸுக்கங் டா²னா சாவெத்வா புன விப்படிஸாரவஸேன த³கஸோதோரோஹணங் நிவாரேதுங் ந ஸக்கா, ததா²பி அதி⁴வாஸாதி⁴ப்பாயேன அதி⁴வாஸெத்வா அந்தரா த³கஸோததோ உத்³த⁴ங் நிவாரேதுங் அஸக்குணெய்யதாய ‘‘ப³ஹி நிக்க²ந்தே வா’’தி வுத்தங், தஸ்மா டா²னா சுதஞ்ஹி அவஸ்ஸங் த³கஸோதங் ஓதரதீதி அட்ட²கதா²ய அதி⁴ப்பாயோ. தஸ்மா உப⁴யங் ஸமேதீதி க³ஹேதப்³போ³.
‘‘Dakasotaṃ anotiṇṇepī’’ti idaṃ ‘‘otiṇṇamatte’’ti iminā virujjhatīti ce, taṃ dassetuṃ ‘‘ṭhānato pana cuta’’ntiādimāha. Tassattho – nimitte upakkamaṃ katvā sukkaṃ ṭhānā cāvetvā puna vippaṭisāravasena dakasotorohaṇaṃ nivāretuṃ na sakkā, tathāpi adhivāsādhippāyena adhivāsetvā antarā dakasotato uddhaṃ nivāretuṃ asakkuṇeyyatāya ‘‘bahi nikkhante vā’’ti vuttaṃ, tasmā ṭhānā cutañhi avassaṃ dakasotaṃ otaratīti aṭṭhakathāya adhippāyo. Tasmā ubhayaṃ sametīti gahetabbo.
எத்தா²ஹ – கஸ்மா இமஸ்மிங் ஸிக்கா²பதே³ ‘‘யோ பன பி⁴க்கூ²’’திஆதி³னா காரகோ ந நித்³தி³ட்டோ²தி? வுச்சதே – அதி⁴ப்பாயாபெக்கா²ய பா⁴வதோ காரகோ ந நித்³தி³ட்டோ² தஸ்ஸ ஸாபெக்க²பா⁴வத³ஸ்ஸனத்த²ங். கத²ங்? கண்டு³வனாதி³அதி⁴ப்பாயசேதனாவஸேன சேதெந்தஸ்ஸ கண்டு³வனாதி³உபக்கமேன உபக்கமந்தஸ்ஸ மேது²னராக³வஸேன ஊருஆதீ³ஸு து³க்கடவத்தூ²ஸு, வணாதீ³ஸு து²ல்லச்சயவத்தூ²ஸு ச உபக்கமந்தஸ்ஸ ஸுக்கவிஸட்டி²யா ஸதிபி ந ஸங்கா⁴தி³ஸேஸோ ‘‘அனாபத்தி பி⁴க்கு² ந மோசனாதி⁴ப்பாயஸ்ஸா’’தி (பாரா॰ 263) வசனதோ. தஸ்மா தத³த்த²த³ஸ்ஸனத்த²ங் இத⁴ காரகோ ந நித்³தி³ட்டோ². அஞ்ஞதா² ‘‘யோ பன பி⁴க்கு² ஸஞ்சேதனிகங் ஸுக்கவிஸட்டி²ங் ஆபஜ்ஜெய்ய, ஸங்கா⁴தி³ஸேஸோ’’தி நித்³தி³ட்டே² காரகே ‘‘சேதேதி ந உபக்கமதி முச்சதி, அனாபத்தீ’’தி (பாரா॰ 262) வுத்தவசனவிரோதோ⁴. ததா² ‘‘ஸஞ்சேதனிகாய ஸுக்கவிஸட்டி²யா அஞ்ஞத்ர ஸுபினந்தா ஸங்கா⁴தி³ஸேஸோ’’தி பு⁴ம்மே நித்³தி³ட்டே²பி ஸோ ஏவ விரோதோ⁴ ஹெத்வத்த²னியமஸித்³தி⁴தோ. தஸ்மா தது³ப⁴யம்பி வசனக்கமங் அவத்வா ‘‘ஸஞ்சேதனிகா ஸுக்கவிஸட்டி² அஞ்ஞத்ர ஸுபினந்தா ஸங்கா⁴தி³ஸேஸோ’’தி வுத்தங். தத்த² நிமித்தத்தே² பு⁴ம்மவசனாபா⁴வதோ ஹெத்வத்த²னியமோ ந கதோ ஹோதி. தஸ்மிங் அகதே ஸஞ்சேதனிகா ஸுக்கவிஸட்டி² அஞ்ஞத்ர ஸுபினந்தா ஸங்கா⁴தி³ஸேஸோதி, உபக்கமே அஸதி அனாபத்தீதி அயமத்தோ² தீ³பிதோ ஹோதீதி வேதி³தப்³ப³ங்.
Etthāha – kasmā imasmiṃ sikkhāpade ‘‘yo pana bhikkhū’’tiādinā kārako na niddiṭṭhoti? Vuccate – adhippāyāpekkhāya bhāvato kārako na niddiṭṭho tassa sāpekkhabhāvadassanatthaṃ. Kathaṃ? Kaṇḍuvanādiadhippāyacetanāvasena cetentassa kaṇḍuvanādiupakkamena upakkamantassa methunarāgavasena ūruādīsu dukkaṭavatthūsu, vaṇādīsu thullaccayavatthūsu ca upakkamantassa sukkavisaṭṭhiyā satipi na saṅghādiseso ‘‘anāpatti bhikkhu na mocanādhippāyassā’’ti (pārā. 263) vacanato. Tasmā tadatthadassanatthaṃ idha kārako na niddiṭṭho. Aññathā ‘‘yo pana bhikkhu sañcetanikaṃ sukkavisaṭṭhiṃ āpajjeyya, saṅghādiseso’’ti niddiṭṭhe kārake ‘‘ceteti na upakkamati muccati, anāpattī’’ti (pārā. 262) vuttavacanavirodho. Tathā ‘‘sañcetanikāya sukkavisaṭṭhiyā aññatra supinantā saṅghādiseso’’ti bhumme niddiṭṭhepi so eva virodho hetvatthaniyamasiddhito. Tasmā tadubhayampi vacanakkamaṃ avatvā ‘‘sañcetanikā sukkavisaṭṭhi aññatra supinantā saṅghādiseso’’ti vuttaṃ. Tattha nimittatthe bhummavacanābhāvato hetvatthaniyamo na kato hoti. Tasmiṃ akate sañcetanikā sukkavisaṭṭhi aññatra supinantā saṅghādisesoti, upakkame asati anāpattīti ayamattho dīpito hotīti veditabbaṃ.
இமஸ்மிங் ஸிக்கா²பதே³ த்³வே ஆபத்திஸஹஸ்ஸானி ஹொந்தி. கத²ங்? அத்தனோ ஹத்தா²தி³பே⁴தே³ அஜ்ஜ²த்தரூபே ராகூ³பத்த²ம்ப⁴னவஸேன அங்க³ஜாதே கம்மனியப்பத்தே ஆரொக்³யத்தா²ய நீலங் மோசெந்தஸ்ஸ ஏகா ஆபத்தி, அஜ்ஜ²த்தரூபே ஏவ ராகூ³பத்த²ம்பே⁴ பீதகாதீ³னங் மோசனவஸேன நவாதி த³ஸ. ஏவங் ‘‘ஸுக²த்தா²யா’’திஆதீ³னங் நவன்னங் வஸேனாதி ராகூ³பத்த²ம்பே⁴ அஜ்ஜ²த்தரூபவஸேன ஸதங். ஏவமேவங் வச்சப்பஸ்ஸாவவாதஉச்சாலிங்க³பாணகத³ட்டூ²பத்த²ம்பே⁴ஸு ச ஸதங் ஸதங் கத்வா ஸப்³ப³ங் பஞ்சஸதங். யதா² அஜ்ஜ²த்தரூபே பஞ்சஸதங், ஏவங் ப³ஹித்³தா⁴ரூபே வா அஜ்ஜ²த்தப³ஹித்³தா⁴ரூபே வா ஆகாஸே வா கடிங் கம்பெந்தோதி த்³வே ஸஹஸ்ஸானி ஆபத்தியோ ஹொந்தீதி.
Imasmiṃ sikkhāpade dve āpattisahassāni honti. Kathaṃ? Attano hatthādibhede ajjhattarūpe rāgūpatthambhanavasena aṅgajāte kammaniyappatte ārogyatthāya nīlaṃ mocentassa ekā āpatti, ajjhattarūpe eva rāgūpatthambhe pītakādīnaṃ mocanavasena navāti dasa. Evaṃ ‘‘sukhatthāyā’’tiādīnaṃ navannaṃ vasenāti rāgūpatthambhe ajjhattarūpavasena sataṃ. Evamevaṃ vaccappassāvavātauccāliṅgapāṇakadaṭṭhūpatthambhesu ca sataṃ sataṃ katvā sabbaṃ pañcasataṃ. Yathā ajjhattarūpe pañcasataṃ, evaṃ bahiddhārūpe vā ajjhattabahiddhārūpe vā ākāse vā kaṭiṃ kampentoti dve sahassāni āpattiyo hontīti.
ஸுக்கவிஸ்ஸட்டி²ஸிக்கா²பத³வண்ணனா நிட்டி²தா.
Sukkavissaṭṭhisikkhāpadavaṇṇanā niṭṭhitā.
