| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
2. ஸங்கா⁴தி³ஸேஸகண்ட³ங்
2. Saṅghādisesakaṇḍaṃ
1. ஸுக்கவிஸ்ஸட்டி²ஸிக்கா²பத³வண்ணனா
1. Sukkavissaṭṭhisikkhāpadavaṇṇanā
இதா³னி பாராஜிகஸங்வண்ணனாஸமனந்தரா யா தேரஸகாதி³ஸங்வண்ணனா ஸமாரத்³தா⁴, தஸ்ஸாபி –
Idāni pārājikasaṃvaṇṇanāsamanantarā yā terasakādisaṃvaṇṇanā samāraddhā, tassāpi –
அனாகுலா அஸந்தே³ஹா, பரிபுண்ணவினிச்ச²யா;
Anākulā asandehā, paripuṇṇavinicchayā;
அத்த²ப்³யஞ்ஜனஸம்பன்னா, ஹோதி ஸாரத்த²தீ³பனீ.
Atthabyañjanasampannā, hoti sāratthadīpanī.
தேரஸகஸ்ஸாதி தேரஸ ஸிக்கா²பதா³னி பரிமாணானி அஸ்ஸ கண்ட³ஸ்ஸாதி தேரஸகங், தஸ்ஸ தேரஸகஸ்ஸ கண்ட³ஸ்ஸாதி அத்தோ².
Terasakassāti terasa sikkhāpadāni parimāṇāni assa kaṇḍassāti terasakaṃ, tassa terasakassa kaṇḍassāti attho.
234. அனபி⁴ரதோதி அஞ்ஞத்த² கி³ஹிபா⁴வங் பத்த²யமானோ வுச்சதி, இத⁴ பன காமராக³வஸேன உக்கண்டி²ததாய விக்கி²த்தசித்ததாய ஸமன்னாக³தோ அதி⁴ப்பேதோதி ஆஹ விக்கி²த்தசித்தோதிஆதி³.
234.Anabhiratoti aññattha gihibhāvaṃ patthayamāno vuccati, idha pana kāmarāgavasena ukkaṇṭhitatāya vikkhittacittatāya samannāgato adhippetoti āha vikkhittacittotiādi.
236-237. ஸஞ்சேதனிகாதி எத்த² ஸங்-ஸத்³தோ³ விஜ்ஜமானத்த²தாய ஸாத்த²கோதி த³ஸ்ஸெந்தோ ஆஹ ஸங்விஜ்ஜதி சேதனா அஸ்ஸாதி. தத்த² சேதனாதி வீதிக்கமவஸப்பவத்தா புப்³ப³பா⁴க³சேதனா. அஸ்ஸாதி ஸுக்கவிஸ்ஸட்டி²யா. இமஸ்மிங் விகப்பே இக-ஸத்³த³ஸ்ஸ விஸுங் அத்தோ² நத்தீ²தி ஆஹ ஸஞ்சேதனாவ ஸஞ்சேதனிகாதி. இதா³னி ஸங்-ஸத்³த³ஸ்ஸ அத்த²ங் அனபெக்கி²த்வா இக-ஸத்³தோ³வ அஸ்ஸத்தி²அத்த²ங் பகாஸேதீதி த³ஸ்ஸெந்தோ ஸஞ்சேதனா வா அஸ்ஸா அத்தீ²தி ஸஞ்சேதனிகாதி து³தியவிகப்பமாஹ. ஸங்விஜ்ஜதி சேதனா அஸ்ஸாதி பத³பா⁴ஜனே வத்தப்³பே³ ப்³யஞ்ஜனே ஆத³ரங் அகத்வா ஜானந்தோதிஆதி³ வுத்தங். உபக்கமாமீதி ஜானந்தோதி மோசனத்த²ங் உபக்கமாமீதி ஜானந்தோ.
236-237.Sañcetanikāti ettha saṃ-saddo vijjamānatthatāya sātthakoti dassento āha saṃvijjati cetanā assāti. Tattha cetanāti vītikkamavasappavattā pubbabhāgacetanā. Assāti sukkavissaṭṭhiyā. Imasmiṃ vikappe ika-saddassa visuṃ attho natthīti āha sañcetanāva sañcetanikāti. Idāni saṃ-saddassa atthaṃ anapekkhitvā ika-saddova assatthiatthaṃ pakāsetīti dassento sañcetanā vā assā atthīti sañcetanikāti dutiyavikappamāha. Saṃvijjati cetanā assāti padabhājane vattabbe byañjane ādaraṃ akatvā jānantotiādi vuttaṃ. Upakkamāmīti jānantoti mocanatthaṃ upakkamāmīti jānanto.
ஆஸயபே⁴த³தோதி பித்தாதி³ஆஸயபே⁴த³தோ. பு³த்³த⁴பச்சேகபு³த்³தா⁴னம்பி ஹி ரஞ்ஞோபி சக்கவத்திஸ்ஸ பித்தஸெம்ஹபுப்³ப³லோஹிதாஸயேஸு சதூஸு அஞ்ஞதரோ ஆஸயோ ஹோதியேவ, மந்த³பஞ்ஞானங் பன சத்தாரோபி ஆஸயா ஹொந்தி. தா⁴துனானத்ததோதி பத²வீதா⁴துஆதீ³னங் சதுன்னங் தா⁴தூனங், சக்கா²தீ³னங் வா அட்டா²ரஸன்னங் தா⁴தூனங், ரஸஸோணிதாதீ³னங் வா தா⁴தூனங் நானத்ததோ.
Āsayabhedatoti pittādiāsayabhedato. Buddhapaccekabuddhānampi hi raññopi cakkavattissa pittasemhapubbalohitāsayesu catūsu aññataro āsayo hotiyeva, mandapaññānaṃ pana cattāropi āsayā honti. Dhātunānattatoti pathavīdhātuādīnaṃ catunnaṃ dhātūnaṃ, cakkhādīnaṃ vā aṭṭhārasannaṃ dhātūnaṃ, rasasoṇitādīnaṃ vā dhātūnaṃ nānattato.
வத்தி²ஸீஸந்தி வத்தி²புடஸ்ஸ அப்³ப⁴ந்தரே மத்த²கபஸ்ஸங். ‘‘ராக³…பே॰… அஸக்கொந்தோ’’தி ராக³பரியுட்டா²னங் ஸந்தா⁴ய வுத்தங். ராஜா பன ‘‘ஸம்ப⁴வஸ்ஸ ஸகலகாயோ டா²ன’’ந்தி ஸுதபுப்³ப³த்தா வீமங்ஸனத்த²ங் ஏவமகாஸீதி வத³ந்தி. த³கஸோதந்தி முத்தமக்³க³ங், அங்க³ஜாதப்பதே³ஸந்தி வுத்தங் ஹோதி. த³கஸோதோரோஹணதோ பட்டா²ய பன உபாதி³ன்னதோ வினிமுத்ததாய ஸம்ப⁴வே உதுஸமுட்டா²னமேவ ரூபங் அவஸிஸ்ஸதி, ஸேஸங் திஸமுட்டா²னங் நத்தீ²தி வேதி³தப்³ப³ங். ஆபோதா⁴துயா ஸந்தானவஸேன பவத்தமானாய அவத்தா²விஸேஸோ ஸம்ப⁴வோ, ஸோ சதுஸமுட்டா²னிகோ அட்ட²கதா²யங் சதுஸமுட்டா²னிகேஸு ஸம்ப⁴வஸ்ஸ வுத்தத்தா. ஸோ பன ஸோளஸவஸ்ஸகாலே உப்பஜ்ஜதி, தஸ்ஸ ராக³வஸேன டா²னாசாவனங் ஹோதீதி வத³ந்தி, தஸ்மா யங் வுத்தங் கதா²வத்து²அட்ட²கதா²யங் ‘‘ஸுக்கவிஸ்ஸட்டி² நாம ராக³ஸமுட்டா²னா ஹோதீ’’தி, தங் ஸம்ப⁴வஸ்ஸ டா²னாசாவனங் ஸந்தா⁴ய வுத்தந்தி வேதி³தப்³ப³ங், ந பன ஸம்ப⁴வோ சித்தஸமுட்டா²னோயேவாதி தீ³பேதுங், தேனேவ தத்த² விஸ்ஸட்டி²க்³க³ஹணங் கதங். ‘‘கீ²ணாஸவானங் பன ப்³ரஹ்மானஞ்ச ஸம்ப⁴வோ நத்தீ²’’தி ஆசரியத⁴ம்மபாலத்தே²ரேன வுத்தங், தஸ்மா யங் வுத்தங் கதா²வத்து²அட்ட²கதா²யங் (கதா²॰ அட்ட²॰ 307) ‘‘தாஸங் தே³வதானங் ஸுக்கவிஸ்ஸட்டி² நாம நத்தீ²’’தி, தம்பி டா²னாசாவனங் ஸந்தா⁴ய வுத்தந்தி க³ஹேதப்³ப³ங், ந பன தே³வதானங் ஸப்³ப³ஸோ ஸம்ப⁴வஸ்ஸ அபா⁴வங் ஸந்தா⁴ய. ச²ன்னம்பி பன காமாவசரதே³வதானங் காமா பாகதிகாயேவ. மனுஸ்ஸா விய ஹி தே த்³வயங்த்³வயஸமாபத்திவஸேனேவ மேது²னங் படிஸேவந்தி, கேவலங் பன நிஸ்ஸந்தா³பா⁴வோ தேஸங் வத்தப்³போ³. தங்க²ணிகபரிளாஹவூபஸமாவஹங் ஸம்ப²ஸ்ஸஸுக²மேவ ஹி தேஸங் காமகிச்சங். கேசி பன ‘‘சாதுமஹாராஜிகதாவதிங்ஸானங்யேவ த்³வயங்த்³வயஸமாபத்தியா காமகிச்சங் இஜ்ஜ²தி, யாமானங் அஞ்ஞமஞ்ஞங் ஆலிங்க³னமத்தேன, துஸிதானங் ஹத்தா²மஸனமத்தேன, நிம்மானரதீனங் ஹஸிதமத்தேன, பரனிம்மிதவஸவத்தீனங் ஓலோகிதமத்தேன காமகிச்சங் இஜ்ஜ²தீ’’தி வத³ந்தி, தங் அட்ட²கதா²யங் படிக்கி²த்தங் தாதி³ஸஸ்ஸ காமேஸு விரஜ்ஜனஸ்ஸ தேஸு அபா⁴வதோ காமானஞ்ச உத்தருத்தரி பணீததரபணீததமபா⁴வதோ.
Vatthisīsanti vatthipuṭassa abbhantare matthakapassaṃ. ‘‘Rāga…pe… asakkonto’’ti rāgapariyuṭṭhānaṃ sandhāya vuttaṃ. Rājā pana ‘‘sambhavassa sakalakāyo ṭhāna’’nti sutapubbattā vīmaṃsanatthaṃ evamakāsīti vadanti. Dakasotanti muttamaggaṃ, aṅgajātappadesanti vuttaṃ hoti. Dakasotorohaṇato paṭṭhāya pana upādinnato vinimuttatāya sambhave utusamuṭṭhānameva rūpaṃ avasissati, sesaṃ tisamuṭṭhānaṃ natthīti veditabbaṃ. Āpodhātuyā santānavasena pavattamānāya avatthāviseso sambhavo, so catusamuṭṭhāniko aṭṭhakathāyaṃ catusamuṭṭhānikesu sambhavassa vuttattā. So pana soḷasavassakāle uppajjati, tassa rāgavasena ṭhānācāvanaṃ hotīti vadanti, tasmā yaṃ vuttaṃ kathāvatthuaṭṭhakathāyaṃ ‘‘sukkavissaṭṭhi nāma rāgasamuṭṭhānā hotī’’ti, taṃ sambhavassa ṭhānācāvanaṃ sandhāya vuttanti veditabbaṃ, na pana sambhavo cittasamuṭṭhānoyevāti dīpetuṃ, teneva tattha vissaṭṭhiggahaṇaṃ kataṃ. ‘‘Khīṇāsavānaṃ pana brahmānañca sambhavo natthī’’ti ācariyadhammapālattherena vuttaṃ, tasmā yaṃ vuttaṃ kathāvatthuaṭṭhakathāyaṃ (kathā. aṭṭha. 307) ‘‘tāsaṃ devatānaṃ sukkavissaṭṭhi nāma natthī’’ti, tampi ṭhānācāvanaṃ sandhāya vuttanti gahetabbaṃ, na pana devatānaṃ sabbaso sambhavassa abhāvaṃ sandhāya. Channampi pana kāmāvacaradevatānaṃ kāmā pākatikāyeva. Manussā viya hi te dvayaṃdvayasamāpattivaseneva methunaṃ paṭisevanti, kevalaṃ pana nissandābhāvo tesaṃ vattabbo. Taṅkhaṇikapariḷāhavūpasamāvahaṃ samphassasukhameva hi tesaṃ kāmakiccaṃ. Keci pana ‘‘cātumahārājikatāvatiṃsānaṃyeva dvayaṃdvayasamāpattiyā kāmakiccaṃ ijjhati, yāmānaṃ aññamaññaṃ āliṅganamattena, tusitānaṃ hatthāmasanamattena, nimmānaratīnaṃ hasitamattena, paranimmitavasavattīnaṃ olokitamattena kāmakiccaṃ ijjhatī’’ti vadanti, taṃ aṭṭhakathāyaṃ paṭikkhittaṃ tādisassa kāmesu virajjanassa tesu abhāvato kāmānañca uttaruttari paṇītatarapaṇītatamabhāvato.
ததே²வாதி ‘‘மோசனஸ்ஸாதே³ன நிமித்தே உபக்கமதோ’’திஆதி³ங் அதிதி³ஸதி. ‘‘விஸ்ஸட்டீ²தி டா²னதோ சாவனா வுச்சதீ’’தி வுத்தத்தா த³கஸோதங் ஓதிண்ணமத்தேதி கஸ்மா வுத்தந்தி ஆஹ த³கஸோதோரோஹணஞ்செத்தா²திஆதி³. எத்தா²தி தீஸுபி வாதே³ஸு. அதி⁴வாஸெத்வாதி நிமித்தே உபக்கமித்வா புன விப்படிஸாரே உப்பன்னே அதி⁴வாஸெத்வா. அந்தரா நிவாரேதுந்தி டா²னதோ சுதங் த³கஸோதங் ஓதரிதுங் அத³த்வா அந்தரா நிவாரேதுங். தேனாஹ – டா²னா சுதஞ்ஹி அவஸ்ஸங் த³கஸோதங் ஓதரதீதி . டா²னாசாவனமத்தேனேவாதி த³கஸோதங் அனோதிண்ணேபீதி அதி⁴ப்பாயோ. எத்த² ச ‘‘ஸகலோ காயோ டா²ன’’ந்தி வாதே³ டா²னாசாவனங் வத³ந்தேன ஸகலஸரீரதோ சுதஸ்ஸபி த³கஸோதோரோஹணதோ புப்³பே³ அப்பமத்தகஸ்ஸ அந்தராளஸ்ஸ ஸம்ப⁴வதோ வுத்தங். ஸகலஸரீரே வா தஸ்மிங் தஸ்மிங் பதே³ஸே டி²தஸ்ஸ டா²னா சுதங் ஸந்தா⁴ய ‘‘டா²னாசாவனமத்தேனேவா’’தி வுத்தங். நிமித்தே உபக்கமந்தஸ்ஸேவாதி மோசனஸ்ஸாதே³ன உபக்கமந்தஸ்ஸ. ஹத்த²பரிகம்மாதீ³ஸு ஸதிபி மோசனஸ்ஸாதே³ நிமித்தே உபக்கமாபா⁴வதோ நத்தி² ஆபத்தீதி ஆஹ ‘‘ஹத்தபரிகம்ம…பே॰… அனாபத்தீ’’தி. அயங் ஸப்³பா³சரியஸாதா⁴ரணவினிச்ச²யோதி ‘‘த³கஸோதோரோஹணஞ்செத்தா²’’திஆதி³னா வுத்தோ திண்ணம்பி ஆசரியானங் ஸாதா⁴ரணோ வினிச்ச²யோ.
Tathevāti ‘‘mocanassādena nimitte upakkamato’’tiādiṃ atidisati. ‘‘Vissaṭṭhīti ṭhānato cāvanā vuccatī’’ti vuttattā dakasotaṃ otiṇṇamatteti kasmā vuttanti āha dakasotorohaṇañcetthātiādi. Etthāti tīsupi vādesu. Adhivāsetvāti nimitte upakkamitvā puna vippaṭisāre uppanne adhivāsetvā. Antarā nivāretunti ṭhānato cutaṃ dakasotaṃ otarituṃ adatvā antarā nivāretuṃ. Tenāha – ṭhānā cutañhi avassaṃ dakasotaṃ otaratīti . Ṭhānācāvanamattenevāti dakasotaṃ anotiṇṇepīti adhippāyo. Ettha ca ‘‘sakalo kāyo ṭhāna’’nti vāde ṭhānācāvanaṃ vadantena sakalasarīrato cutassapi dakasotorohaṇato pubbe appamattakassa antarāḷassa sambhavato vuttaṃ. Sakalasarīre vā tasmiṃ tasmiṃ padese ṭhitassa ṭhānā cutaṃ sandhāya ‘‘ṭhānācāvanamattenevā’’ti vuttaṃ. Nimitte upakkamantassevāti mocanassādena upakkamantassa. Hatthaparikammādīsu satipi mocanassāde nimitte upakkamābhāvato natthi āpattīti āha ‘‘hattaparikamma…pe… anāpattī’’ti. Ayaṃ sabbācariyasādhāraṇavinicchayoti ‘‘dakasotorohaṇañcetthā’’tiādinā vutto tiṇṇampi ācariyānaṃ sādhāraṇo vinicchayo.
கோ²ப⁴கரணபச்சயோ நாம விஸபா⁴க³பே⁴ஸஜ்ஜஸேனாஸனாஹாராதி³பச்சயோ. அத்த²காமதாய வா அனத்த²காமதாய வாதி பஸன்னா அத்த²காமதாய, குத்³தா⁴ அனத்த²காமதாய. அத்தா²ய வா அனத்தா²ய வாதி ஸபா⁴வதோ ப⁴விதப்³பா³ய அத்தா²ய வா அனத்தா²ய வா. உபஸங்ஹரந்தீதி அத்தனோ தே³வானுபா⁴வேன உபனெந்தி. போ³தி⁴ஸத்தமாதா விய புத்தபடிலாப⁴னிமித்தந்தி ததா³ கிர புரே புண்ணமாய ஸத்தமதி³வஸதோ பட்டா²ய விக³தஸுராபானங் மாலாக³ந்தா⁴தி³விபூ⁴திஸம்பன்னங் நக்க²த்தகீளங் அனுப⁴வமானா போ³தி⁴ஸத்தமாதா ஸத்தமே தி³வஸே பாதோவ உட்டா²ய க³ந்தோ⁴த³கேன ந்ஹாயித்வா ஸப்³பா³லங்காரவிபூ⁴ஸிதா வரபோ⁴ஜனங் பு⁴ஞ்ஜித்வா உபோஸத²ங்கா³னி அதி⁴ட்டா²ய ஸிரிக³ப்³ப⁴ங் பவிஸித்வா ஸிரிஸயனே நிபன்னா நித்³த³ங் ஓக்கமமானா இமங் ஸுபினங் அத்³த³ஸ – சத்தாரோ கிர நங் மஹாராஜானோ ஸயனேனேவ ஸத்³தி⁴ங் உக்கி²பித்வா அனோதத்தத³ஹங் நெத்வா ந்ஹாபெத்வா தி³ப்³ப³வத்த²ங் நிவாஸெத்வா தி³ப்³ப³க³ந்தே⁴ஹி விலிம்பெத்வா தி³ப்³ப³புப்பா²னி பிளந்தி⁴த்வா ததோ அவிதூ³ரே ரஜதபப்³ப³தோ, தஸ்ஸ அந்தோ கனகவிமானங் அத்தி², தஸ்மிங் பாசீனதோ ஸீஸங் கத்வா நிபஜ்ஜாபேஸுங். அத² போ³தி⁴ஸத்தோ ஸேதவரவாரணோ ஹுத்வா ததோ அவிதூ³ரே ஏகோ ஸுவண்ணபப்³ப³தோ, தத்த² சரித்வா ததோ ஓருய்ஹ ரஜதபப்³ப³தங் அபி⁴ருஹித்வா கனகவிமானங் பவிஸித்வா மாதரங் பத³க்கி²ணங் கத்வா த³க்கி²ணபஸ்ஸங் பா²லெத்வா குச்சி²ங் பவிட்ட²ஸதி³ஸோ அஹோஸி. இமங் ஸுபினங் ஸந்தா⁴ய ஏதங் வுத்தங் ‘‘போ³தி⁴ஸத்தமாதா விய புத்தபடிலாப⁴னிமித்த’’ந்தி.
Khobhakaraṇapaccayo nāma visabhāgabhesajjasenāsanāhārādipaccayo. Atthakāmatāya vā anatthakāmatāya vāti pasannā atthakāmatāya, kuddhā anatthakāmatāya. Atthāya vā anatthāya vāti sabhāvato bhavitabbāya atthāya vā anatthāya vā. Upasaṃharantīti attano devānubhāvena upanenti. Bodhisattamātā viya puttapaṭilābhanimittanti tadā kira pure puṇṇamāya sattamadivasato paṭṭhāya vigatasurāpānaṃ mālāgandhādivibhūtisampannaṃ nakkhattakīḷaṃ anubhavamānā bodhisattamātā sattame divase pātova uṭṭhāya gandhodakena nhāyitvā sabbālaṅkāravibhūsitā varabhojanaṃ bhuñjitvā uposathaṅgāni adhiṭṭhāya sirigabbhaṃ pavisitvā sirisayane nipannā niddaṃ okkamamānā imaṃ supinaṃ addasa – cattāro kira naṃ mahārājāno sayaneneva saddhiṃ ukkhipitvā anotattadahaṃ netvā nhāpetvā dibbavatthaṃ nivāsetvā dibbagandhehi vilimpetvā dibbapupphāni piḷandhitvā tato avidūre rajatapabbato, tassa anto kanakavimānaṃ atthi, tasmiṃ pācīnato sīsaṃ katvā nipajjāpesuṃ. Atha bodhisatto setavaravāraṇo hutvā tato avidūre eko suvaṇṇapabbato, tattha caritvā tato oruyha rajatapabbataṃ abhiruhitvā kanakavimānaṃ pavisitvā mātaraṃ padakkhiṇaṃ katvā dakkhiṇapassaṃ phāletvā kucchiṃ paviṭṭhasadiso ahosi. Imaṃ supinaṃ sandhāya etaṃ vuttaṃ ‘‘bodhisattamātā viya puttapaṭilābhanimitta’’nti.
பஞ்ச மஹாஸுபினேதி (அ॰ நி॰ அட்ட²॰ 3.5.196) மஹந்தேஹி புரிஸேஹி பஸ்ஸிதப்³ப³தோ மஹந்தானஞ்ச அத்தா²னங் நிமித்தபா⁴வதோ மஹாஸுபினே. தே பன பஞ்ச மஹாஸுபினே நேவ லோகியமஹாஜனோ பஸ்ஸதி, ந மஹாராஜானோ, ந சக்கவத்திராஜானோ, ந அக்³க³ஸாவகா, ந பச்சேகபு³த்³தா⁴, ந ஸம்மாஸம்பு³த்³தா⁴, ஏகோ ஸப்³ப³ஞ்ஞுபோ³தி⁴ஸத்தோயேவ பஸ்ஸதி. தேன வுத்தங் ‘‘போ³தி⁴ஸத்தோ விய பஞ்ச மஹாஸுபினே’’தி. அம்ஹாகஞ்ச பன போ³தி⁴ஸத்தோ கதா³ தே ஸுபினே பஸ்ஸீதி? ‘‘ஸ்வே பு³த்³தோ⁴ ப⁴விஸ்ஸாமீ’’தி சாதுத்³த³ஸியங் பக்க²ஸ்ஸ ரத்திவிபா⁴யனகாலே பஸ்ஸி. காலவஸேன ஹி தி³வா தி³ட்டோ² ஸுபினோ ந ஸமேதி, ததா² பட²மயாமே மஜ்ஜி²மயாமே ச. பச்சி²மயாமே ப³லவபச்சூஸே பன அஸிதபீதஸாயிதே ஸம்மாபரிணாமக³தே காயஸ்மிங் ஓஜாய பதிட்டி²தாய அருணே உக்³க³ச்ச²மானே தி³ட்ட²ஸுபினோ ஸமேதி. இட்ட²னிமித்தங் ஸுபினங் பஸ்ஸந்தோ இட்ட²ங் படிலப⁴தி, அனிட்ட²னிமித்தங் பஸ்ஸந்தோ அனிட்ட²ங், தஸ்மா போ³தி⁴ஸத்தோபி ஸுபினங் பஸ்ஸந்தோ ரத்திவிபா⁴யனகாலே பஸ்ஸி.
Pañcamahāsupineti (a. ni. aṭṭha. 3.5.196) mahantehi purisehi passitabbato mahantānañca atthānaṃ nimittabhāvato mahāsupine. Te pana pañca mahāsupine neva lokiyamahājano passati, na mahārājāno, na cakkavattirājāno, na aggasāvakā, na paccekabuddhā, na sammāsambuddhā, eko sabbaññubodhisattoyeva passati. Tena vuttaṃ ‘‘bodhisatto viya pañca mahāsupine’’ti. Amhākañca pana bodhisatto kadā te supine passīti? ‘‘Sve buddho bhavissāmī’’ti cātuddasiyaṃ pakkhassa rattivibhāyanakāle passi. Kālavasena hi divā diṭṭho supino na sameti, tathā paṭhamayāme majjhimayāme ca. Pacchimayāme balavapaccūse pana asitapītasāyite sammāpariṇāmagate kāyasmiṃ ojāya patiṭṭhitāya aruṇe uggacchamāne diṭṭhasupino sameti. Iṭṭhanimittaṃ supinaṃ passanto iṭṭhaṃ paṭilabhati, aniṭṭhanimittaṃ passanto aniṭṭhaṃ, tasmā bodhisattopi supinaṃ passanto rattivibhāyanakāle passi.
கே பன தே பஞ்ச மஹாஸுபினாதி? ததா²க³தஸ்ஸ அரஹதோ ஸம்மாஸம்பு³த்³த⁴ஸ்ஸ புப்³பே³வ ஸம்போ³தா⁴ அனபி⁴ஸம்பு³த்³த⁴ஸ்ஸ போ³தி⁴ஸத்தஸ்ஸேவ ஸதோ பஞ்ச மஹாஸுபினா பாதுரஹேஸுங் (அ॰ நி॰ 5.196) – அயங் மஹாபத²வீ மஹாஸயனங் அஹோஸி, ஹிமவா பப்³ப³தராஜா பி³ம்போ³ஹனங் அஹோஸி, புரத்தி²மே ஸமுத்³தே³ வாமஹத்தோ² ஓஹிதோ அஹோஸி, பச்சி²மே ஸமுத்³தே³ த³க்கி²ணஹத்தோ² ஓஹிதோ அஹோஸி, த³க்கி²ணஸமுத்³தே³ உபோ⁴ பாதா³ ஓஹிதா அஹேஸுங், அயங் பட²மோ மஹாஸுபினோ பாதுரஹோஸி.
Ke pana te pañca mahāsupināti? Tathāgatassa arahato sammāsambuddhassa pubbeva sambodhā anabhisambuddhassa bodhisattasseva sato pañca mahāsupinā pāturahesuṃ (a. ni. 5.196) – ayaṃ mahāpathavī mahāsayanaṃ ahosi, himavā pabbatarājā bimbohanaṃ ahosi, puratthime samudde vāmahattho ohito ahosi, pacchime samudde dakkhiṇahattho ohito ahosi, dakkhiṇasamudde ubho pādā ohitā ahesuṃ, ayaṃ paṭhamo mahāsupino pāturahosi.
புன சபரங் த³ப்³ப³திணஸங்கா²தா திரியா நாம திணஜாதி நங்க³லமத்தேன ரத்தத³ண்டே³ன நாபி⁴தோ உக்³க³ந்த்வா தஸ்ஸ பஸ்ஸந்தஸ்ஸேவ வித³த்தி²மத்தங் ரதனமத்தங் ப்³யாமமத்தங் யட்டி²மத்தங் கா³வுதமத்தங் அட்³ட⁴யோஜனமத்தங் யோஜனமத்தந்தி ஏவங் உக்³க³ந்த்வா அனேகயோஜனஸஹஸ்ஸங் நப⁴ங் ஆஹச்ச டி²தா அஹோஸி, அயங் து³தியோ மஹாஸுபினோ பாதுரஹோஸி.
Puna caparaṃ dabbatiṇasaṅkhātā tiriyā nāma tiṇajāti naṅgalamattena rattadaṇḍena nābhito uggantvā tassa passantasseva vidatthimattaṃ ratanamattaṃ byāmamattaṃ yaṭṭhimattaṃ gāvutamattaṃ aḍḍhayojanamattaṃ yojanamattanti evaṃ uggantvā anekayojanasahassaṃ nabhaṃ āhacca ṭhitā ahosi, ayaṃ dutiyo mahāsupino pāturahosi.
புன சபரங் ஸேதா கிமீ கண்ஹஸீஸா பாதே³ஹி உஸ்ஸக்கித்வா யாவ ஜாணுமண்ட³லா படிச்சா²தே³ஸுங், அயங் ததியோ மஹாஸுபினோ பாதுரஹோஸி.
Puna caparaṃ setā kimī kaṇhasīsā pādehi ussakkitvā yāva jāṇumaṇḍalā paṭicchādesuṃ, ayaṃ tatiyo mahāsupino pāturahosi.
புன சபரங் சத்தாரோ ஸகுணா நானாவண்ணா சதூஹி தி³ஸாஹி ஆக³ந்த்வா பாத³மூலே நிபதித்வா ஸப்³ப³ஸேதா ஸம்பஜ்ஜிங்ஸு, அயங் சதுத்தோ² மஹாஸுபினோ பாதுரஹோஸி.
Puna caparaṃ cattāro sakuṇā nānāvaṇṇā catūhi disāhi āgantvā pādamūle nipatitvā sabbasetā sampajjiṃsu, ayaṃ catuttho mahāsupino pāturahosi.
புன சபரங் போ³தி⁴ஸத்தோ மஹதோ மீள்ஹபப்³ப³தஸ்ஸ உபரூபரி சங்கமதி அலிப்பமானோ மீள்ஹேன, அயங் பஞ்சமோ மஹாஸுபினோ பாதுரஹோஸி. இமே பஞ்ச மஹாஸுபினா.
Puna caparaṃ bodhisatto mahato mīḷhapabbatassa uparūpari caṅkamati alippamāno mīḷhena, ayaṃ pañcamo mahāsupino pāturahosi. Ime pañca mahāsupinā.
தத்த² பட²மோ அனுத்தராய ஸம்மாஸம்போ³தி⁴யா புப்³ப³னிமித்தங், து³தியோ அரியஸ்ஸ அட்ட²ங்கி³கஸ்ஸ மக்³க³ஸ்ஸ தே³வமனுஸ்ஸேஸு ஸுப்பகாஸிதபா⁴வஸ்ஸ புப்³ப³னிமித்தங், ததியோ ப³ஹூனங் ஓதா³தவஸனானங் கி³ஹீனங் ப⁴க³வந்தங் உபஸங்கமித்வா ஸரணக³மனஸ்ஸ புப்³ப³னிமித்தங், சதுத்தோ² க²த்தியாதீ³னங் சதுன்னங் வண்ணானங் ததா²க³தப்பவேதி³தே த⁴ம்மவினயே அகா³ரஸ்மா அனகா³ரியங் பப்³ப³ஜித்வா அனுத்தரவிமுத்திஸச்சி²கிரியாய புப்³ப³னிமித்தங், பஞ்சமோ சதுன்னங் பச்சயானங் லாபி⁴தாய தேஸு ச அனுபலித்தபா⁴வஸ்ஸ புப்³ப³னிமித்தங்.
Tattha paṭhamo anuttarāya sammāsambodhiyā pubbanimittaṃ, dutiyo ariyassa aṭṭhaṅgikassa maggassa devamanussesu suppakāsitabhāvassa pubbanimittaṃ, tatiyo bahūnaṃ odātavasanānaṃ gihīnaṃ bhagavantaṃ upasaṅkamitvā saraṇagamanassa pubbanimittaṃ, catuttho khattiyādīnaṃ catunnaṃ vaṇṇānaṃ tathāgatappavedite dhammavinaye agārasmā anagāriyaṃ pabbajitvā anuttaravimuttisacchikiriyāya pubbanimittaṃ, pañcamo catunnaṃ paccayānaṃ lābhitāya tesu ca anupalittabhāvassa pubbanimittaṃ.
அபிச யங் ஸோ சக்கவாளமஹாபத²விங் ஸிரிஸயனபூ⁴தங் அத்³த³ஸ, தங் பு³த்³த⁴பா⁴வஸ்ஸ புப்³ப³னிமித்தங். யங் ஹிமவந்தங் பப்³ப³தராஜானங் பி³ம்போ³ஹனங் அத்³த³ஸ, தங் ஸப்³ப³ஞ்ஞுதஞ்ஞாணபி³ம்போ³ஹனஸ்ஸ புப்³ப³னிமித்தங். யங் சத்தாரோ ஹத்த²பாதே³ ஸமுத்³த³ஸ்ஸ உபரூபரிபா⁴கே³ன க³ந்த்வா சக்கவாளமத்த²கே டி²தே அத்³த³ஸ, தங் த⁴ம்மசக்கஸ்ஸ அப்படிவத்தியபா⁴வே புப்³ப³னிமித்தங். யங் அத்தானங் உத்தானகங் நிபன்னங் அத்³த³ஸ, தங் தீஸு ப⁴வேஸு அவகுஜ்ஜானங் ஸத்தானங் உத்தானமுக²பா⁴வஸ்ஸ புப்³ப³னிமித்தங். யங் அக்கீ²னி உம்மீலெத்வா பஸ்ஸந்தோ விய அஹோஸி, தங் தி³ப்³ப³சக்கு²படிலாப⁴ஸ்ஸ புப்³ப³னிமித்தங். யங் யாவ ப⁴வக்³கா³ ஏகாலோகங் அஹோஸி, தங் அனாவரணஞாணஸ்ஸ புப்³ப³னிமித்தங். ஸேஸங் வுத்தனயமேவ. இதி தங்தங்விஸேஸாதி⁴க³மனிமித்தபூ⁴தே பஞ்ச மஹாஸுபினே பஸ்ஸி. தேன வுத்தங் ‘‘போ³தி⁴ஸத்தோ விய பஞ்ச மஹாஸுபினே’’தி.
Apica yaṃ so cakkavāḷamahāpathaviṃ sirisayanabhūtaṃ addasa, taṃ buddhabhāvassa pubbanimittaṃ. Yaṃ himavantaṃ pabbatarājānaṃ bimbohanaṃ addasa, taṃ sabbaññutaññāṇabimbohanassa pubbanimittaṃ. Yaṃ cattāro hatthapāde samuddassa uparūparibhāgena gantvā cakkavāḷamatthake ṭhite addasa, taṃ dhammacakkassa appaṭivattiyabhāve pubbanimittaṃ. Yaṃ attānaṃ uttānakaṃ nipannaṃ addasa, taṃ tīsu bhavesu avakujjānaṃ sattānaṃ uttānamukhabhāvassa pubbanimittaṃ. Yaṃ akkhīni ummīletvā passanto viya ahosi, taṃ dibbacakkhupaṭilābhassa pubbanimittaṃ. Yaṃ yāva bhavaggā ekālokaṃ ahosi, taṃ anāvaraṇañāṇassa pubbanimittaṃ. Sesaṃ vuttanayameva. Iti taṃtaṃvisesādhigamanimittabhūte pañca mahāsupine passi. Tena vuttaṃ ‘‘bodhisatto viya pañca mahāsupine’’ti.
கோஸலராஜா விய ஸோளஸ ஸுபினேதி –
Kosalarājā viya soḷasa supineti –
‘‘உஸபா⁴ ருக்கா² கா³வியோ க³வா ச,
‘‘Usabhā rukkhā gāviyo gavā ca,
அஸ்ஸோ கங்ஸோ ஸிங்கா³லீ ச கும்போ⁴;
Asso kaṃso siṅgālī ca kumbho;
பொக்க²ரணீ ச அபாகசந்த³னங்,
Pokkharaṇī ca apākacandanaṃ,
லாபூ³னி ஸீத³ந்தி ஸிலா ப்லவந்தி.
Lābūni sīdanti silā plavanti.
‘‘மண்டூ³கியோ கண்ஹஸப்பே கி³லந்தி,
‘‘Maṇḍūkiyo kaṇhasappe gilanti,
காகங் ஸுவண்ணா பரிவாரயந்தி;
Kākaṃ suvaṇṇā parivārayanti;
தஸா வகா ஏளகானங் ப⁴யா ஹீ’’தி. (ஜா॰ 1.1.77) –
Tasā vakā eḷakānaṃ bhayā hī’’ti. (jā. 1.1.77) –
இமே ஸோளஸ ஸுபினே பஸ்ஸந்தோ கோஸலராஜா விய.
Ime soḷasa supine passanto kosalarājā viya.
1. ஏகதி³வஸங் கிர கோஸலராஜா ரத்திங் நித்³தூ³பக³தோ பச்சி²மயாமே ஸோளஸ ஸுபினே பஸ்ஸி (ஜா॰ அட்ட²॰ 1.1.மஹாஸுபினஜாதகவண்ணனா). தத்த² சத்தாரோ அஞ்ஜனவண்ணா காளஉஸபா⁴ ‘‘யுஜ்ஜி²ஸ்ஸாமா’’தி சதூஹி தி³ஸாஹி ராஜங்க³ணங் ஆக³ந்த்வா ‘‘உஸப⁴யுத்³த⁴ங் பஸ்ஸிஸ்ஸாமா’’தி மஹாஜனே ஸன்னிபதிதே யுஜ்ஜ²னாகாரங் த³ஸ்ஸெத்வா நதி³த்வா க³ஜ்ஜித்வா அயுஜ்ஜி²த்வாவ படிக்கந்தா. இமங் பட²மங் ஸுபினங் அத்³த³ஸ.
1. Ekadivasaṃ kira kosalarājā rattiṃ niddūpagato pacchimayāme soḷasa supine passi (jā. aṭṭha. 1.1.mahāsupinajātakavaṇṇanā). Tattha cattāro añjanavaṇṇā kāḷausabhā ‘‘yujjhissāmā’’ti catūhi disāhi rājaṅgaṇaṃ āgantvā ‘‘usabhayuddhaṃ passissāmā’’ti mahājane sannipatite yujjhanākāraṃ dassetvā naditvā gajjitvā ayujjhitvāva paṭikkantā. Imaṃ paṭhamaṃ supinaṃ addasa.
2. கு²த்³த³கா ருக்கா² சேவ க³ச்சா² ச பத²விங் பி⁴ந்தி³த்வா வித³த்தி²மத்தம்பி ரதனமத்தம்பி அனுக்³க³ந்த்வாவ புப்ப²ந்தி சேவ ப²லந்தி ச. இமங் து³தியங் அத்³த³ஸ.
2. Khuddakā rukkhā ceva gacchā ca pathaviṃ bhinditvā vidatthimattampi ratanamattampi anuggantvāva pupphanti ceva phalanti ca. Imaṃ dutiyaṃ addasa.
3. கா³வியோ தத³ஹுஜாதானங் வச்சா²னங் கீ²ரங் பிவந்தியோ அத்³த³ஸ. அயங் ததியோ ஸுபினோ.
3. Gāviyo tadahujātānaṃ vacchānaṃ khīraṃ pivantiyo addasa. Ayaṃ tatiyo supino.
4. து⁴ரவாஹே ஆரோஹபரிணாஹஸம்பன்னே மஹாகோ³ணே யுக³பரம்பராய அயோஜெத்வா தருணே கோ³த³ம்மே து⁴ரே யோஜெந்தே அத்³த³ஸ, தே து⁴ரங் வஹிதுங் அஸக்கொந்தா ச²ட்³டெ³த்வா அட்ட²ங்ஸு, ஸகடானி நப்பவத்திங்ஸு. அயங் சதுத்தோ² ஸுபினோ.
4. Dhuravāhe ārohapariṇāhasampanne mahāgoṇe yugaparamparāya ayojetvā taruṇe godamme dhure yojente addasa, te dhuraṃ vahituṃ asakkontā chaḍḍetvā aṭṭhaṃsu, sakaṭāni nappavattiṃsu. Ayaṃ catuttho supino.
5. ஏகங் உப⁴தோமுக²ங் அஸ்ஸங் அத்³த³ஸ, தஸ்ஸ உபோ⁴ஸு பஸ்ஸேஸு யவஸீஸங் தெ³ந்தி, ஸோ த்³வீஹிபி முகே²ஹி கா²த³தி. அயங் பஞ்சமோ ஸுபினோ.
5. Ekaṃ ubhatomukhaṃ assaṃ addasa, tassa ubhosu passesu yavasīsaṃ denti, so dvīhipi mukhehi khādati. Ayaṃ pañcamo supino.
6. மஹாஜனோ ஸதஸஹஸ்ஸக்³க⁴னகங் ஸுவண்ணபாதிங் ஸம்மஜ்ஜித்வா ‘‘இத⁴ பஸ்ஸாவங் கரோஹீ’’தி ஏகஸ்ஸ ஜரஸிங்கா³லஸ்ஸ உபனாமேஸி, தங் தத்த² பஸ்ஸாவங் கரொந்தங் அத்³த³ஸ. அயங் ச²ட்டோ² ஸுபினோ.
6. Mahājano satasahassagghanakaṃ suvaṇṇapātiṃ sammajjitvā ‘‘idha passāvaṃ karohī’’ti ekassa jarasiṅgālassa upanāmesi, taṃ tattha passāvaṃ karontaṃ addasa. Ayaṃ chaṭṭho supino.
7. ஏகோ புரிஸோ ரஜ்ஜுங் வட்டெத்வா பாத³மூலே நிக்கி²பதி, தேன நிஸின்னபீட²ஸ்ஸ ஹெட்டா² ஸயிதா சா²தஸிங்கா³லீ தஸ்ஸ அஜானந்தஸ்ஸேவ தங் கா²த³தி. இமங் ஸத்தமங் ஸுபினங் அத்³த³ஸ.
7. Eko puriso rajjuṃ vaṭṭetvā pādamūle nikkhipati, tena nisinnapīṭhassa heṭṭhā sayitā chātasiṅgālī tassa ajānantasseva taṃ khādati. Imaṃ sattamaṃ supinaṃ addasa.
8. ராஜத்³வாரே ப³ஹூஹி துச்ச²கும்பே⁴ஹி பரிவாரெத்வா ட²பிதங் ஏகங் மஹந்தங் பூரிதகும்ப⁴ங் அத்³த³ஸ, சத்தாரோபி பன வண்ணா சதூஹி தி³ஸாஹி சதூஹி அனுதி³ஸாஹி ச க⁴டேஹி உத³கங் ஆஹரித்வா பூரிதகும்ப⁴மேவ பூரெந்தி, பூரிதபூரிதங் உத³கங் உத்தரித்வா பலாயதி, தேபி புனப்புனங் தத்தே²வ உத³கங் ஆஸிஞ்சந்தி, துச்ச²கும்பே⁴ ஓலோகெந்தாபி நத்தி². அயங் அட்ட²மோ ஸுபினோ.
8. Rājadvāre bahūhi tucchakumbhehi parivāretvā ṭhapitaṃ ekaṃ mahantaṃ pūritakumbhaṃ addasa, cattāropi pana vaṇṇā catūhi disāhi catūhi anudisāhi ca ghaṭehi udakaṃ āharitvā pūritakumbhameva pūrenti, pūritapūritaṃ udakaṃ uttaritvā palāyati, tepi punappunaṃ tattheva udakaṃ āsiñcanti, tucchakumbhe olokentāpi natthi. Ayaṃ aṭṭhamo supino.
9. ஏகங் பஞ்சபது³மஸஞ்ச²ன்னங் க³ம்பீ⁴ரங் ஸப்³ப³தோதித்த²ங் பொக்க²ரணிங் அத்³த³ஸ, ஸமந்ததோ த்³விபத³சதுப்பதா³ ஓதரித்வா தத்த² பானீயங் பிவந்தி, தஸ்ஸா மஜ்ஜே² க³ம்பீ⁴ரட்டா²னே உத³கங் ஆவிலங், தீரப்பதே³ஸே த்³விபத³சதுப்பதா³னங் அக்கமனட்டா²னே அச்ச²ங் விப்பஸன்னங் அனாவிலங். அயங் நவமோ ஸுபினோ.
9. Ekaṃ pañcapadumasañchannaṃ gambhīraṃ sabbatotitthaṃ pokkharaṇiṃ addasa, samantato dvipadacatuppadā otaritvā tattha pānīyaṃ pivanti, tassā majjhe gambhīraṭṭhāne udakaṃ āvilaṃ, tīrappadese dvipadacatuppadānaṃ akkamanaṭṭhāne acchaṃ vippasannaṃ anāvilaṃ. Ayaṃ navamo supino.
10. ஏகிஸ்ஸாயேவ ச கும்பி⁴யா பச்சமானங் ஓத³னங் அபாகங் அத்³த³ஸ, ‘‘அபாக’’ந்தி விசாரெத்வா விப⁴ஜித்வா ட²பிதங் விய தீஹாகாரேஹி பச்சமானங் ஏகஸ்மிங் பஸ்ஸே அதிகிலின்னோ ஹோதி, ஏகஸ்மிங் உத்தண்டு³லோ, ஏகஸ்மிங் ஸுபக்கோதி. அயங் த³ஸமோ ஸுபினோ.
10. Ekissāyeva ca kumbhiyā paccamānaṃ odanaṃ apākaṃ addasa, ‘‘apāka’’nti vicāretvā vibhajitvā ṭhapitaṃ viya tīhākārehi paccamānaṃ ekasmiṃ passe atikilinno hoti, ekasmiṃ uttaṇḍulo, ekasmiṃ supakkoti. Ayaṃ dasamo supino.
11. ஸதஸஹஸ்ஸக்³க⁴னகங் சந்த³னஸாரங் பூதிதக்கேன விக்கிணந்தே அத்³த³ஸ. அயங் ஏகாத³ஸமோ ஸுபினோ.
11. Satasahassagghanakaṃ candanasāraṃ pūtitakkena vikkiṇante addasa. Ayaṃ ekādasamo supino.
12. துச்ச²லாபூ³னி உத³கே ஸீத³ந்தானி அத்³த³ஸ. அயங் த்³வாத³ஸமோ ஸுபினோ.
12. Tucchalābūni udake sīdantāni addasa. Ayaṃ dvādasamo supino.
13. மஹந்தமஹந்தா கூடாகா³ரப்பமாணா க⁴னஸிலா நாவா விய உத³கே ப்லவமானா அத்³த³ஸ. அயங் தேரஸமோ ஸுபினோ.
13. Mahantamahantā kūṭāgārappamāṇā ghanasilā nāvā viya udake plavamānā addasa. Ayaṃ terasamo supino.
14. கு²த்³த³கமது⁴கபுப்ப²ப்பமாணா மண்டூ³கியோ மஹந்தே கண்ஹஸப்பே வேகே³ன அனுப³ந்தி⁴த்வா உப்பலனாளே விய சி²ந்தி³த்வா மங்ஸங் கா²தி³த்வா கி³லந்தியோ அத்³த³ஸ. அயங் சுத்³த³ஸமோ ஸுபினோ.
14. Khuddakamadhukapupphappamāṇā maṇḍūkiyo mahante kaṇhasappe vegena anubandhitvā uppalanāḷe viya chinditvā maṃsaṃ khāditvā gilantiyo addasa. Ayaṃ cuddasamo supino.
15. த³ஸஹி அஸத்³த⁴ம்மேஹி ஸமன்னாக³தங் கா³மகோ³சரங் காகங் கஞ்சனவண்ணவண்ணதாய ‘‘ஸுவண்ணா’’தி லத்³த⁴னாமே ஸுவண்ணராஜஹங்ஸே பரிவாரெந்தே அத்³த³ஸ. அயங் பன்னரஸமோ ஸுபினோ.
15. Dasahi asaddhammehi samannāgataṃ gāmagocaraṃ kākaṃ kañcanavaṇṇavaṇṇatāya ‘‘suvaṇṇā’’ti laddhanāme suvaṇṇarājahaṃse parivārente addasa. Ayaṃ pannarasamo supino.
16. புப்³பே³ தீ³பினோ ஏளகே கா²த³ந்தி, தே பன ஏளகே தீ³பினோ அனுப³ந்தி⁴த்வா முராமுராதி கா²த³ந்தே அத்³த³ஸ, அத²ஞ்ஞே தஸா வகா ஏளகே தூ³ரதோவ தி³ஸ்வா தஸிதா தாஸப்பத்தா ஹுத்வா ஏளகானங் ப⁴யா பலாயித்வா கு³ம்ப³க³ஹனானி பவிஸித்வா நிலீயிங்ஸு. அயங் ஸோளஸமோ ஸுபினோ.
16. Pubbe dīpino eḷake khādanti, te pana eḷake dīpino anubandhitvā murāmurāti khādante addasa, athaññe tasā vakā eḷake dūratova disvā tasitā tāsappattā hutvā eḷakānaṃ bhayā palāyitvā gumbagahanāni pavisitvā nilīyiṃsu. Ayaṃ soḷasamo supino.
1. தத்த² அத⁴ம்மிகானங் ராஜூனங் அத⁴ம்மிகானஞ்ச மனுஸ்ஸானங் காலே லோகே விபரிவத்தமானே குஸலே ஓஸன்னே அகுஸலே உஸ்ஸன்னே லோகஸ்ஸ பரிஹீனகாலே தே³வோ ந ஸம்மா வஸ்ஸிஸ்ஸதி, மேக⁴பாதா³ சி²ஜ்ஜிஸ்ஸந்தி, ஸஸ்ஸானி மிலாயிஸ்ஸந்தி, து³ப்³பி⁴க்க²ங் ப⁴விஸ்ஸதி, வஸ்ஸிதுகாமா விய சதூஹி தி³ஸாஹி மேகா⁴ உட்ட²ஹித்வா இத்தி²காஹி ஆதபே பத்த²டானங் வீஹிஆதீ³னங் தேமனப⁴யேன அந்தோ பவேஸிதகாலே புரிஸேஸு குதா³லபிடகே ஆதா³ய ஆளிப³ந்த⁴னத்தா²ய நிக்க²ந்தேஸு வஸ்ஸனாகாரங் த³ஸ்ஸெத்வா க³ஜ்ஜித்வா விஜ்ஜுலதா நிச்சா²ரெத்வா உஸபா⁴ விய அயுஜ்ஜி²த்வா அவஸ்ஸித்வாவ பலாயிஸ்ஸந்தி. அயங் பட²மஸ்ஸ விபாகோ.
1. Tattha adhammikānaṃ rājūnaṃ adhammikānañca manussānaṃ kāle loke viparivattamāne kusale osanne akusale ussanne lokassa parihīnakāle devo na sammā vassissati, meghapādā chijjissanti, sassāni milāyissanti, dubbhikkhaṃ bhavissati, vassitukāmā viya catūhi disāhi meghā uṭṭhahitvā itthikāhi ātape patthaṭānaṃ vīhiādīnaṃ temanabhayena anto pavesitakāle purisesu kudālapiṭake ādāya āḷibandhanatthāya nikkhantesu vassanākāraṃ dassetvā gajjitvā vijjulatā nicchāretvā usabhā viya ayujjhitvā avassitvāva palāyissanti. Ayaṃ paṭhamassa vipāko.
2. லோகஸ்ஸ பரிஹீனகாலே மனுஸ்ஸானங் பரித்தாயுககாலே ஸத்தா திப்³ப³ராகா³ ப⁴விஸ்ஸந்தி, அஸம்பத்தவயாவ குமாரியோ புரிஸந்தரங் க³ந்த்வா உதுனியோ சேவ க³ப்³பி⁴னியோ ச ஹுத்வா புத்ததீ⁴தாஹி வட்³டி⁴ஸ்ஸந்தி. கு²த்³த³கருக்கா²னங் புப்ப²ங் விய ஹி தாஸங் உதுனிபா⁴வோ, ப²லங் விய ச புத்ததீ⁴தரோ ப⁴விஸ்ஸந்தி. அயங் து³தியஸ்ஸ விபாகோ.
2. Lokassa parihīnakāle manussānaṃ parittāyukakāle sattā tibbarāgā bhavissanti, asampattavayāva kumāriyo purisantaraṃ gantvā utuniyo ceva gabbhiniyo ca hutvā puttadhītāhi vaḍḍhissanti. Khuddakarukkhānaṃ pupphaṃ viya hi tāsaṃ utunibhāvo, phalaṃ viya ca puttadhītaro bhavissanti. Ayaṃ dutiyassa vipāko.
3. மனுஸ்ஸானங் ஜெட்டா²பசாயிககம்மஸ்ஸ நட்ட²காலே ஸத்தா மாதாபிதூஸு வா ஸஸ்ஸுஸஸுரேஸு வா லஜ்ஜங் அனுபட்ட²பெத்வா ஸயமேவ குடும்ப³ங் ஸங்வித³ஹந்தாவ கா⁴ஸச்சா²த³னமத்தம்பி மஹல்லகானங் தா³துகாமா த³ஸ்ஸந்தி, அதா³துகாமா ந த³ஸ்ஸந்தி, மஹல்லகா அனாதா² ஹுத்வா அஸயங்வஸீ தா³ரகே ஆராதெ⁴த்வா ஜீவிஸ்ஸந்தி தத³ஹுஜாதானங் வச்சா²னங் கீ²ரங் பிவந்தியோ மஹாகா³வியோ விய. அயங் ததியஸ்ஸ விபாகோ.
3. Manussānaṃ jeṭṭhāpacāyikakammassa naṭṭhakāle sattā mātāpitūsu vā sassusasuresu vā lajjaṃ anupaṭṭhapetvā sayameva kuṭumbaṃ saṃvidahantāva ghāsacchādanamattampi mahallakānaṃ dātukāmā dassanti, adātukāmā na dassanti, mahallakā anāthā hutvā asayaṃvasī dārake ārādhetvā jīvissanti tadahujātānaṃ vacchānaṃ khīraṃ pivantiyo mahāgāviyo viya. Ayaṃ tatiyassa vipāko.
4. அத⁴ம்மிகராஜூனங் காலே அத⁴ம்மிகராஜானோ பண்டி³தானங் பவேணிகுஸலானங் கம்மனித்த²ரணஸமத்தா²னங் மஹாமத்தானங் யஸங் ந த³ஸ்ஸந்தி, த⁴ம்மஸபா⁴யங் வினிச்ச²யட்டா²னேபி பண்டி³தே வோஹாரகுஸலே மஹல்லகே அமச்சே ந ட²பெஸ்ஸந்தி. தப்³பி³பரீதானங் பன தருணதருணானங் யஸங் த³ஸ்ஸந்தி, ததா²ரூபே ஏவ ச வினிச்ச²யட்டா²னே ட²பெஸ்ஸந்தி, தே ராஜகம்மானி சேவ யுத்தாயுத்தஞ்ச அஜானந்தா நேவ தங் யஸங் உக்கி²பிதுங் ஸக்கி²ஸ்ஸந்தி, ந ராஜகம்மானி நித்த²ரிதுங், தே அஸக்கொந்தா கம்மது⁴ரங் ச²ட்³டெ³ஸ்ஸந்தி, மஹல்லகாபி பண்டி³தா அமச்சா யஸங் அலப⁴ந்தா கிச்சானி நித்த²ரிதுங் ஸமத்தா²பி ‘‘கிங் அம்ஹாகங் ஏதேஹி, மயங் பா³ஹிரகா ஜாதா, அப்³ப⁴ந்தரிகா தருணதா³ரகா ஜானிஸ்ஸந்தீ’’தி உப்பன்னானி கம்மானி ந கரிஸ்ஸந்தி, ஏவங் ஸப்³ப³தா²பி தேஸங் ராஜூனங் ஹானியேவ ப⁴விஸ்ஸதி, து⁴ரங் வஹிதுங் அஸமத்தா²னங் வச்ச²த³ம்மானங் து⁴ரே யோஜிதகாலோ விய, து⁴ரவாஹானஞ்ச மஹாகோ³ணானங் யுக³பரம்பராய அயோஜிதகாலோ விய ப⁴விஸ்ஸதி. அயங் சதுத்த²ஸ்ஸ விபாகோ.
4. Adhammikarājūnaṃ kāle adhammikarājāno paṇḍitānaṃ paveṇikusalānaṃ kammanittharaṇasamatthānaṃ mahāmattānaṃ yasaṃ na dassanti, dhammasabhāyaṃ vinicchayaṭṭhānepi paṇḍite vohārakusale mahallake amacce na ṭhapessanti. Tabbiparītānaṃ pana taruṇataruṇānaṃ yasaṃ dassanti, tathārūpe eva ca vinicchayaṭṭhāne ṭhapessanti, te rājakammāni ceva yuttāyuttañca ajānantā neva taṃ yasaṃ ukkhipituṃ sakkhissanti, na rājakammāni nittharituṃ, te asakkontā kammadhuraṃ chaḍḍessanti, mahallakāpi paṇḍitā amaccā yasaṃ alabhantā kiccāni nittharituṃ samatthāpi ‘‘kiṃ amhākaṃ etehi, mayaṃ bāhirakā jātā, abbhantarikā taruṇadārakā jānissantī’’ti uppannāni kammāni na karissanti, evaṃ sabbathāpi tesaṃ rājūnaṃ hāniyeva bhavissati, dhuraṃ vahituṃ asamatthānaṃ vacchadammānaṃ dhure yojitakālo viya, dhuravāhānañca mahāgoṇānaṃ yugaparamparāya ayojitakālo viya bhavissati. Ayaṃ catutthassa vipāko.
5. அத⁴ம்மிகராஜகாலேயேவ அத⁴ம்மிகபா³லராஜானோ அத⁴ம்மிகே லோலமனுஸ்ஸே வினிச்ச²யே ட²பெஸ்ஸந்தி, தே பாபபுஞ்ஞேஸு அனாத³ரா பா³லா ஸபா⁴யங் நிஸீதி³த்வா வினிச்ச²யங் தெ³ந்தா உபி⁴ன்னம்பி அத்த²பச்சத்தி²கானங் ஹத்த²தோ லஞ்ஜங் க³ஹெத்வா கா²தி³ஸ்ஸந்தி அஸ்ஸோ விய த்³வீஹி முகே²ஹி யவஸீஸங். அயங் பஞ்சமஸ்ஸ விபாகோ.
5. Adhammikarājakāleyeva adhammikabālarājāno adhammike lolamanusse vinicchaye ṭhapessanti, te pāpapuññesu anādarā bālā sabhāyaṃ nisīditvā vinicchayaṃ dentā ubhinnampi atthapaccatthikānaṃ hatthato lañjaṃ gahetvā khādissanti asso viya dvīhi mukhehi yavasīsaṃ. Ayaṃ pañcamassa vipāko.
6. அத⁴ம்மிகாயேவ விஜாதிராஜானோ ஜாதிஸம்பன்னானங் குலபுத்தானங் ஆஸங்காய யஸங் ந த³ஸ்ஸந்தி, அகுலீனே வட்³டெ⁴ஸ்ஸந்தி, ஏவங் மஹாகுலானி து³க்³க³தானி ப⁴விஸ்ஸந்தி, லாமககுலானி இஸ்ஸரானி. தே ச குலீனா புரிஸா ஜீவிதுங் அஸக்கொந்தா ‘‘இமே நிஸ்ஸாய ஜீவிஸ்ஸாமா’’தி அகுலீனானங் தீ⁴தரோ த³ஸ்ஸந்தி, இதி தாஸங் குலதீ⁴தானங் அகுலீனேஹி ஸத்³தி⁴ங் ஸங்வாஸோ ஜரஸிங்கா³லஸ்ஸ ஸுவண்ணபாதியங் பஸ்ஸாவகரணஸதி³ஸோ ப⁴விஸ்ஸதி. அயங் ச²ட்ட²ஸ்ஸ விபாகோ.
6. Adhammikāyeva vijātirājāno jātisampannānaṃ kulaputtānaṃ āsaṅkāya yasaṃ na dassanti, akulīne vaḍḍhessanti, evaṃ mahākulāni duggatāni bhavissanti, lāmakakulāni issarāni. Te ca kulīnā purisā jīvituṃ asakkontā ‘‘ime nissāya jīvissāmā’’ti akulīnānaṃ dhītaro dassanti, iti tāsaṃ kuladhītānaṃ akulīnehi saddhiṃ saṃvāso jarasiṅgālassa suvaṇṇapātiyaṃ passāvakaraṇasadiso bhavissati. Ayaṃ chaṭṭhassa vipāko.
7. க³ச்ச²ந்தே க³ச்ச²ந்தே காலே இத்தி²யோ புரிஸலோலா ஸுராலோலா அலங்காரலோலா விஸிகா²லோலா ஆமிஸலோலா ப⁴விஸ்ஸந்தி து³ஸ்ஸீலா து³ராசாரா. தா ஸாமிகேஹி கஸிகோ³ரக்கா²தீ³னி கம்மானி கத்வா கிச்சே²ன கஸிரேன ஸம்ப⁴தங் த⁴னங் ஜாரேஹி ஸத்³தி⁴ங் ஸுரங் பிவந்தியோ மாலாக³ந்த⁴விலேபனங் தா⁴ரயமானா அந்தோகே³ஹே அச்சாயிகம்பி கிச்சங் அனோலோகெத்வா கே³ஹபரிக்கே²பஸ்ஸ உபரிபா⁴கே³னபி சி²த்³த³ட்டா²னேஹிபி ஜாரே உபதா⁴ரயமானா ஸ்வே வபிதப்³ப³யுத்தகங் பீ³ஜம்பி கொட்டெத்வா யாகு³ப⁴த்தக²ஜ்ஜகானி ஸஜ்ஜெத்வா கா²த³மானா விலும்பிஸ்ஸந்தி ஹெட்டா²பீட²கனிபன்னகசா²தகஸிங்கா³லீ விய வட்டெத்வா வட்டெத்வா பாத³மூலே நிக்கி²த்தரஜ்ஜுங். அயங் ஸத்தமஸ்ஸ விபாகோ.
7. Gacchante gacchante kāle itthiyo purisalolā surālolā alaṅkāralolā visikhālolā āmisalolā bhavissanti dussīlā durācārā. Tā sāmikehi kasigorakkhādīni kammāni katvā kicchena kasirena sambhataṃ dhanaṃ jārehi saddhiṃ suraṃ pivantiyo mālāgandhavilepanaṃ dhārayamānā antogehe accāyikampi kiccaṃ anoloketvā gehaparikkhepassa uparibhāgenapi chiddaṭṭhānehipi jāre upadhārayamānā sve vapitabbayuttakaṃ bījampi koṭṭetvā yāgubhattakhajjakāni sajjetvā khādamānā vilumpissanti heṭṭhāpīṭhakanipannakachātakasiṅgālī viya vaṭṭetvā vaṭṭetvā pādamūle nikkhittarajjuṃ. Ayaṃ sattamassa vipāko.
8. க³ச்ச²ந்தே க³ச்ச²ந்தே காலே லோகோ பரிஹாயிஸ்ஸதி, ரட்ட²ங் நிரோஜங் ப⁴விஸ்ஸதி, ராஜானோ து³க்³க³தா கபணா ப⁴விஸ்ஸந்தி. யோ இஸ்ஸரோ ப⁴விஸ்ஸதி, தஸ்ஸ ப⁴ண்டா³கா³ரே ஸதஸஹஸ்ஸமத்தா கஹாபணா ப⁴விஸ்ஸந்தி, தே ஏவங் து³க்³க³தா ஸப்³பே³ ஜனபதே³ அத்தனோ கம்மங் காரயிஸ்ஸந்தி, உபத்³து³தா மனுஸ்ஸா ஸகே கம்மந்தே ச²ட்³டெ³த்வா ராஜூனங்யேவ அத்தா²ய புப்³ப³ண்ணாபரண்ணானி வபந்தா ரக்க²ந்தா லாயந்தா மத்³த³ந்தா பவேஸெந்தா உச்சு²கெ²த்தானி கரொந்தா யந்தானி வாஹெந்தா பா²ணிதாதீ³னி பசந்தா புப்பா²ராமே ப²லாராமே ச கரொந்தா தத்த² தத்த² நிப்ப²ன்னானி புப்ப²ப²லாதீ³னி ஆஹரித்வா ரஞ்ஞோ கொட்டா²கா³ரமேவ பூரெஸ்ஸந்தி, அத்தனோ கே³ஹேஸு துச்ச²கொட்டே² ஓலோகெந்தாபி ந ப⁴விஸ்ஸந்தி, துச்ச²துச்ச²கும்பே⁴ அனோலோகெத்வா பூரிதகும்ப⁴பூரணஸதி³ஸமேவ ப⁴விஸ்ஸதி. அயங் அட்ட²மஸ்ஸ விபாகோ.
8. Gacchante gacchante kāle loko parihāyissati, raṭṭhaṃ nirojaṃ bhavissati, rājāno duggatā kapaṇā bhavissanti. Yo issaro bhavissati, tassa bhaṇḍāgāre satasahassamattā kahāpaṇā bhavissanti, te evaṃ duggatā sabbe janapade attano kammaṃ kārayissanti, upaddutā manussā sake kammante chaḍḍetvā rājūnaṃyeva atthāya pubbaṇṇāparaṇṇāni vapantā rakkhantā lāyantā maddantā pavesentā ucchukhettāni karontā yantāni vāhentā phāṇitādīni pacantā pupphārāme phalārāme ca karontā tattha tattha nipphannāni pupphaphalādīni āharitvā rañño koṭṭhāgārameva pūressanti, attano gehesu tucchakoṭṭhe olokentāpi na bhavissanti, tucchatucchakumbhe anoloketvā pūritakumbhapūraṇasadisameva bhavissati. Ayaṃ aṭṭhamassa vipāko.
9. க³ச்ச²ந்தே க³ச்ச²ந்தே காலே ராஜானோ அத⁴ம்மிகா ப⁴விஸ்ஸந்தி, ச²ந்தா³தி³வஸேன அக³திங் க³ச்ச²ந்தா ரஜ்ஜங் காரெஸ்ஸந்தி, த⁴ம்மேன வினிச்ச²யங் நாம ந த³ஸ்ஸந்தி, லஞ்ஜவித்தகா ப⁴விஸ்ஸந்தி த⁴னலோலா, ரட்ட²வாஸிகேஸு தேஸங் க²ந்திமெத்தானுத்³த³யங் நாம ந ப⁴விஸ்ஸதி, கக்க²ளா ப²ருஸா உச்சு²யந்தே உச்சு²க³ண்டி²கா விய மனுஸ்ஸே பீளெந்தா நானப்பகாரங் ப³லிங் உப்பாதெ³த்வா த⁴னங் க³ண்ஹிஸ்ஸந்தி, மனுஸ்ஸா ப³லிபீளிதா கிஞ்சி தா³துங் அஸக்கொந்தா கா³மனிக³மாத³யோ ச²ட்³டெ³த்வா பச்சந்தங் க³ந்த்வா வாஸங் கப்பெஸ்ஸந்தி, மஜ்ஜி²மஜனபதோ³ ஸுஞ்ஞோ ப⁴விஸ்ஸதி, பச்சந்தோ க⁴னவாஸோ ஸெய்யதா²பி பொக்க²ரணியா மஜ்ஜே² உத³கங் ஆவிலங் பரியந்தே விப்பஸன்னங். அயங் நவமஸ்ஸ விபாகோ.
9. Gacchante gacchante kāle rājāno adhammikā bhavissanti, chandādivasena agatiṃ gacchantā rajjaṃ kāressanti, dhammena vinicchayaṃ nāma na dassanti, lañjavittakā bhavissanti dhanalolā, raṭṭhavāsikesu tesaṃ khantimettānuddayaṃ nāma na bhavissati, kakkhaḷā pharusā ucchuyante ucchugaṇṭhikā viya manusse pīḷentā nānappakāraṃ baliṃ uppādetvā dhanaṃ gaṇhissanti, manussā balipīḷitā kiñci dātuṃ asakkontā gāmanigamādayo chaḍḍetvā paccantaṃ gantvā vāsaṃ kappessanti, majjhimajanapado suñño bhavissati, paccanto ghanavāso seyyathāpi pokkharaṇiyā majjhe udakaṃ āvilaṃ pariyante vippasannaṃ. Ayaṃ navamassa vipāko.
10. க³ச்ச²ந்தே க³ச்ச²ந்தே காலே ராஜானோ அத⁴ம்மிகா ப⁴விஸ்ஸந்தி, தேஸு அத⁴ம்மிகேஸு ராஜயுத்தாபி ப்³ராஹ்மணக³ஹபதிகாபி நேக³மஜானபதா³பீதி ஸமணப்³ராஹ்மணே உபாதா³ய ஸப்³பே³ மனுஸ்ஸா அத⁴ம்மிகா ப⁴விஸ்ஸந்தி, ததோ தேஸங் ஆரக்க²தே³வதா ப³லிபடிக்³கா³ஹிகதே³வதா ருக்க²தே³வதா ஆகாஸட்ட²கதே³வதாதி ஏவங் தே³வதாபி அத⁴ம்மிகா ப⁴விஸ்ஸந்தி, அத⁴ம்மிகராஜூனங் ரஜ்ஜே வாதா விஸமா க²ரா வாயிஸ்ஸந்தி, தே ஆகாஸட்ட²கவிமானானி கம்பெஸ்ஸந்தி, தேஸு கம்பிதேஸு தே³வதா குபிதா தே³வங் வஸ்ஸிதுங் ந த³ஸ்ஸந்தி, வஸ்ஸமானோபி ஸகலரட்டே² ஏகப்பஹாரேனேவ ந வஸ்ஸிஸ்ஸதி, வஸ்ஸமானோபி ஸப்³ப³த்த² கஸிகம்மஸ்ஸ வா வப்பகம்மஸ்ஸ வா உபகாரோ ஹுத்வா ந வஸ்ஸிஸ்ஸதி. யதா² ச ரட்டே², ஏவங் ஜனபதே³பி கா³மேபி ஏகதளாகஸ்ஸரேபி ஏகப்பஹாரேனேவ ந வஸ்ஸிஸ்ஸதி, தளாகஸ்ஸ உபரிபா⁴கே³ வஸ்ஸந்தோ ஹெட்டா²பா⁴கே³ ந வஸ்ஸிஸ்ஸதி, ஹெட்டா² வஸ்ஸந்தோ உபரி ந வஸ்ஸிஸ்ஸதி, ஏகஸ்மிங் பா⁴கே³ ஸஸ்ஸங் அதிவஸ்ஸேன நஸ்ஸிஸ்ஸதி, ஏகஸ்மிங் அவஸ்ஸந்தோ மிலாயிஸ்ஸதி, ஏகஸ்மிங் ஸம்மா வஸ்ஸமானோ ஸம்பாதெ³ஸ்ஸதி, ஏவங் ஏகஸ்ஸ ரஞ்ஞோ ரஜ்ஜே வுத்தா ஸஸ்ஸா திப்பகாரா ப⁴விஸ்ஸந்தி ஏககும்பி⁴யா ஓத³னோ விய. அயங் த³ஸமஸ்ஸ விபாகோ.
10. Gacchante gacchante kāle rājāno adhammikā bhavissanti, tesu adhammikesu rājayuttāpi brāhmaṇagahapatikāpi negamajānapadāpīti samaṇabrāhmaṇe upādāya sabbe manussā adhammikā bhavissanti, tato tesaṃ ārakkhadevatā balipaṭiggāhikadevatā rukkhadevatā ākāsaṭṭhakadevatāti evaṃ devatāpi adhammikā bhavissanti, adhammikarājūnaṃ rajje vātā visamā kharā vāyissanti, te ākāsaṭṭhakavimānāni kampessanti, tesu kampitesu devatā kupitā devaṃ vassituṃ na dassanti, vassamānopi sakalaraṭṭhe ekappahāreneva na vassissati, vassamānopi sabbattha kasikammassa vā vappakammassa vā upakāro hutvā na vassissati. Yathā ca raṭṭhe, evaṃ janapadepi gāmepi ekataḷākassarepi ekappahāreneva na vassissati, taḷākassa uparibhāge vassanto heṭṭhābhāge na vassissati, heṭṭhā vassanto upari na vassissati, ekasmiṃ bhāge sassaṃ ativassena nassissati, ekasmiṃ avassanto milāyissati, ekasmiṃ sammā vassamāno sampādessati, evaṃ ekassa rañño rajje vuttā sassā tippakārā bhavissanti ekakumbhiyā odano viya. Ayaṃ dasamassa vipāko.
11. க³ச்ச²ந்தே க³ச்ச²ந்தே காலே ஸாஸனே பரிஹாயந்தே பச்சயலோலா அலஜ்ஜிகா ப³ஹூ பி⁴க்கூ² ப⁴விஸ்ஸந்தி, தே ப⁴க³வதா பச்சயலோலுப்பங் நிம்மதெ²த்வா கதி²தத⁴ம்மதே³ஸனங் சீவராதி³சதுபச்சயஹேது பரேஸங் தே³ஸெஸ்ஸந்தி, பச்சயேஹி முச்சி²த்வா நிரத்த²கபக்கே² டி²தா நிப்³பா³னாபி⁴முக²ங் கத்வா தே³ஸேதுங் ந ஸக்கி²ஸ்ஸந்தி, கேவலங் ‘‘பத³ப்³யஞ்ஜனஸம்பத்திஞ்சேவ மது⁴ரஸத்³த³ஞ்ச ஸுத்வா மஹக்³கா⁴னி சீவரானி த³ஸ்ஸந்தி’’இச்சேவங் தே³ஸெஸ்ஸந்தி. அபரே அந்தரவீதி²சதுக்கராஜத்³வாராதீ³ஸு நிஸீதி³த்வா கஹாபணஅட்³ட⁴கஹாபணபாத³மாஸகரூபாதீ³னிபி நிஸ்ஸாய தே³ஸெஸ்ஸந்தி. இதி ப⁴க³வதா நிப்³பா³னக்³க⁴னகங் கத்வா தே³ஸிதங் த⁴ம்மங் சதுபச்சயத்தா²ய சேவ கஹாபணஅட்³ட⁴கஹாபணாதி³அத்தா²ய ச விக்கிணித்வா தே³ஸெந்தா ஸதஸஹஸ்ஸக்³க⁴னகங் சந்த³னஸாரங் பூதிதக்கேன விக்கிணந்தா விய ப⁴விஸ்ஸந்தி. அயங் ஏகாத³ஸமஸ்ஸ விபாகோ.
11. Gacchante gacchante kāle sāsane parihāyante paccayalolā alajjikā bahū bhikkhū bhavissanti, te bhagavatā paccayaloluppaṃ nimmathetvā kathitadhammadesanaṃ cīvarādicatupaccayahetu paresaṃ desessanti, paccayehi mucchitvā niratthakapakkhe ṭhitā nibbānābhimukhaṃ katvā desetuṃ na sakkhissanti, kevalaṃ ‘‘padabyañjanasampattiñceva madhurasaddañca sutvā mahagghāni cīvarāni dassanti’’iccevaṃ desessanti. Apare antaravīthicatukkarājadvārādīsu nisīditvā kahāpaṇaaḍḍhakahāpaṇapādamāsakarūpādīnipi nissāya desessanti. Iti bhagavatā nibbānagghanakaṃ katvā desitaṃ dhammaṃ catupaccayatthāya ceva kahāpaṇaaḍḍhakahāpaṇādiatthāya ca vikkiṇitvā desentā satasahassagghanakaṃ candanasāraṃ pūtitakkena vikkiṇantā viya bhavissanti. Ayaṃ ekādasamassa vipāko.
12. அத⁴ம்மிகராஜகாலே லோகே விபரிவத்தந்தேயேவ ராஜானோ ஜாதிஸம்பன்னானங் குலபுத்தானங் யஸங் ந த³ஸ்ஸந்தி, அகுலீனானஞ்ஞேவ த³ஸ்ஸந்தி, தே இஸ்ஸரா ப⁴விஸ்ஸந்தி, இதரே த³லித்³தா³. ராஜஸம்முகே²பி ராஜத்³வாரேபி அமச்சஸம்முகே²பி வினிச்ச²யட்டா²னேபி துச்ச²லாபு³ஸதி³ஸானங் அகுலீனானங்யேவ கதா² ஓஸீதி³த்வா டி²தா விய நிச்சலா ஸுப்பதிட்டி²தா ப⁴விஸ்ஸதி, ஸங்க⁴ஸன்னிபாதேபி ஸங்க⁴கம்மக³ணகம்மட்டா²னேஸு சேவ பத்தசீவரபரிவேணாதி³வினிச்ச²யட்டா²னேஸு ச து³ஸ்ஸீலானங் பாபபுக்³க³லானங்யேவ கதா² நிய்யானிகா ப⁴விஸ்ஸதி, ந லஜ்ஜிபி⁴க்கூ²னந்தி ஏவங் ஸப்³ப³தா²பி துச்ச²லாபூ³னங் ஸீத³னகாலோ விய ப⁴விஸ்ஸதி. அயங் த்³வாத³ஸமஸ்ஸ விபாகோ.
12. Adhammikarājakāle loke viparivattanteyeva rājāno jātisampannānaṃ kulaputtānaṃ yasaṃ na dassanti, akulīnānaññeva dassanti, te issarā bhavissanti, itare daliddā. Rājasammukhepi rājadvārepi amaccasammukhepi vinicchayaṭṭhānepi tucchalābusadisānaṃ akulīnānaṃyeva kathā osīditvā ṭhitā viya niccalā suppatiṭṭhitā bhavissati, saṅghasannipātepi saṅghakammagaṇakammaṭṭhānesu ceva pattacīvarapariveṇādivinicchayaṭṭhānesu ca dussīlānaṃ pāpapuggalānaṃyeva kathā niyyānikā bhavissati, na lajjibhikkhūnanti evaṃ sabbathāpi tucchalābūnaṃ sīdanakālo viya bhavissati. Ayaṃ dvādasamassa vipāko.
13. தாதி³ஸேயேவ காலே அத⁴ம்மிகராஜானோ அகுலீனானங் யஸங் த³ஸ்ஸந்தி, தே இஸ்ஸரா ப⁴விஸ்ஸந்தி, குலீனா து³க்³க³தா. தேஸு ந கேசி கா³ரவங் கரிஸ்ஸந்தி, இதரேஸுயேவ கரிஸ்ஸந்தி, ராஜஸம்முகே² வா அமச்சஸம்முகே² வா வினிச்ச²யட்டா²னே வா வினிச்ச²யகுஸலானங் க⁴னஸிலாஸதி³ஸானங் குலபுத்தானங் கதா² ந ஓகா³ஹித்வா பதிட்ட²ஹிஸ்ஸதி. தேஸு கதெ²ந்தேஸு ‘‘கிங் இமே கதெ²ந்தீ’’தி இதரே பரிஹாஸமேவ கரிஸ்ஸந்தி, பி⁴க்கு²ஸன்னிபாதேபி வுத்தப்பகாரேஸு டா²னேஸு நேவ பேஸலே பி⁴க்கூ² க³ருகாதப்³பே³ மஞ்ஞிஸ்ஸந்தி, நாபி நேஸங் கதா² பரியோகா³ஹித்வா பதிட்ட²ஹிஸ்ஸதி, ஸிலானங் ப்லவகாலோ விய ப⁴விஸ்ஸதி. அயங் தேரஸமஸ்ஸ விபாகோ.
13. Tādiseyeva kāle adhammikarājāno akulīnānaṃ yasaṃ dassanti, te issarā bhavissanti, kulīnā duggatā. Tesu na keci gāravaṃ karissanti, itaresuyeva karissanti, rājasammukhe vā amaccasammukhe vā vinicchayaṭṭhāne vā vinicchayakusalānaṃ ghanasilāsadisānaṃ kulaputtānaṃ kathā na ogāhitvā patiṭṭhahissati. Tesu kathentesu ‘‘kiṃ ime kathentī’’ti itare parihāsameva karissanti, bhikkhusannipātepi vuttappakāresu ṭhānesu neva pesale bhikkhū garukātabbe maññissanti, nāpi nesaṃ kathā pariyogāhitvā patiṭṭhahissati, silānaṃ plavakālo viya bhavissati. Ayaṃ terasamassa vipāko.
14. லோகே பரிஹாயந்தேயேவ மனுஸ்ஸா திப்³ப³ராகா³தி³ஜாதிகா கிலேஸானுவத்தகா ஹுத்வா தருணதருணானங் அத்தனோ ப⁴ரியானங் வஸே வத்திஸ்ஸந்தி, கே³ஹே தா³ஸகம்மகராத³யோபி கோ³மஹிங்ஸாத³யோபி ஹிரஞ்ஞஸுவண்ணம்பி ஸப்³ப³ங் தாஸங்யேவ ஆயத்தங் ப⁴விஸ்ஸதி, ‘‘அஸுகஹிரஞ்ஞஸுவண்ணங் வா பரிச்சே²தா³தி³ஜாதங் வா கஹ’’ந்தி வுத்தே ‘‘யத்த² வா தத்த² வா ஹோது, கிங் துய்ஹிமினா ப்³யாபாரேன, த்வங் மய்ஹங் க⁴ரே ஸந்தங் வா அஸந்தங் வா ஜானிதுகாமோ ஜாதோ’’தி வத்வா நானப்பகாரேஹி அக்கோஸித்வா முக²ஸத்தீஹி கொட்டெத்வா தா³ஸசேடகங் விய வஸே கத்வா அத்தனோ இஸ்ஸரியங் பவத்தெஸ்ஸந்தி, ஏவங் மது⁴கபுப்ப²ப்பமாணமண்டூ³கபோதிகானங் ஆஸீவிஸே கண்ஹஸப்பே கி³லனகாலோ விய ப⁴விஸ்ஸதி. அயங் சுத்³த³ஸமஸ்ஸ விபாகோ.
14. Loke parihāyanteyeva manussā tibbarāgādijātikā kilesānuvattakā hutvā taruṇataruṇānaṃ attano bhariyānaṃ vase vattissanti, gehe dāsakammakarādayopi gomahiṃsādayopi hiraññasuvaṇṇampi sabbaṃ tāsaṃyeva āyattaṃ bhavissati, ‘‘asukahiraññasuvaṇṇaṃ vā paricchedādijātaṃ vā kaha’’nti vutte ‘‘yattha vā tattha vā hotu, kiṃ tuyhiminā byāpārena, tvaṃ mayhaṃ ghare santaṃ vā asantaṃ vā jānitukāmo jāto’’ti vatvā nānappakārehi akkositvā mukhasattīhi koṭṭetvā dāsaceṭakaṃ viya vase katvā attano issariyaṃ pavattessanti, evaṃ madhukapupphappamāṇamaṇḍūkapotikānaṃ āsīvise kaṇhasappe gilanakālo viya bhavissati. Ayaṃ cuddasamassa vipāko.
15. து³ப்³ப³லராஜகாலே ராஜானோ ஹத்தி²ஸிப்பாதீ³ஸு அகுஸலா யுத்³தே⁴ஸு அவிஸாரதா³ ப⁴விஸ்ஸந்தி, தே அத்தனோ ராஜாதி⁴பச்சங் ஆஸங்கமானா ஸமானஜாதிகானங் குலபுத்தானங் இஸ்ஸரியங் அத³த்வா அத்தனோ பாத³மூலிகன்ஹாபககப்பகாதீ³னங் த³ஸ்ஸந்தி, ஜாதிகொ³த்தஸம்பன்னா குலபுத்தா ராஜகுலே பதிட்ட²ங் அலப⁴மானா ஜீவிகங் கப்பேதுங் அஸமத்தா² ஹுத்வா இஸ்ஸரியட்டா²னே ஜாதிகொ³த்தஹீனே அகுலீனே உபட்ட²ஹந்தா விசரிஸ்ஸந்தி, ஸுவண்ணராஜஹங்ஸேஹி காகஸ்ஸ பரிவாரிதகாலோ விய ப⁴விஸ்ஸதி. அயங் பன்னரஸமஸ்ஸ விபாகோ.
15. Dubbalarājakāle rājāno hatthisippādīsu akusalā yuddhesu avisāradā bhavissanti, te attano rājādhipaccaṃ āsaṅkamānā samānajātikānaṃ kulaputtānaṃ issariyaṃ adatvā attano pādamūlikanhāpakakappakādīnaṃ dassanti, jātigottasampannā kulaputtā rājakule patiṭṭhaṃ alabhamānā jīvikaṃ kappetuṃ asamatthā hutvā issariyaṭṭhāne jātigottahīne akulīne upaṭṭhahantā vicarissanti, suvaṇṇarājahaṃsehi kākassa parivāritakālo viya bhavissati. Ayaṃ pannarasamassa vipāko.
16. அத⁴ம்மிகராஜகாலேயேவ ச அகுலீனாவ ராஜவல்லபா⁴ இஸ்ஸரா ப⁴விஸ்ஸந்தி, குலீனா அப்பஞ்ஞாதா து³க்³க³தா. தே ராஜவல்லபா⁴ ராஜானங் அத்தனோ கத²ங் கா³ஹாபெத்வா வினிச்ச²யட்டா²னாதீ³ஸு ப³லவந்தோ ஹுத்வா து³ப்³ப³லானங் பவேணிஆக³தானி கெ²த்தவத்து²ஆதீ³னி ‘‘அம்ஹாகங் ஸந்தகானி ஏதானீ’’தி அபி⁴யுஞ்ஜித்வா தே ‘‘ந தும்ஹாகங், அம்ஹாக’’ந்தி ஆக³ந்த்வா வினிச்ச²யட்டா²னாதீ³ஸு விவத³ந்தே வெத்தலதாதீ³ஹி பஹாராபெத்வா கீ³வாயங் க³ஹெத்வா அபகட்³டா⁴பெத்வா ‘‘அத்தனோ பமாணங் ந ஜானாத², அம்ஹேஹி ஸத்³தி⁴ங் விவத³த², இதா³னி வோ ரஞ்ஞோ கதெ²த்வா ஹத்த²பாத³ச்சே²தா³தீ³னி காரெஸ்ஸாமா’’தி ஸந்தஜ்ஜெஸ்ஸந்தி, தே தேஸங் ப⁴யேன அத்தனோ ஸந்தகானி கெ²த்தவத்தூ²னி ‘‘தும்ஹாகங்யேவ தானி, க³ண்ஹதா²’’தி நிய்யாதெத்வா அத்தனோ கே³ஹானி பவிஸித்வா பீ⁴தா நிபஜ்ஜிஸ்ஸந்தி. பாபபி⁴க்கூ²பி பேஸலே பி⁴க்கூ² யதா²ருசி விஹேடெ²ஸ்ஸந்தி, பேஸலா பி⁴க்கூ² படிஸரணங் அலப⁴மானா அரஞ்ஞங் பவிஸித்வா க³ஹனட்டா²னேஸு நிலீயிஸ்ஸந்தி, ஏவங் ஹீனஜச்சேஹி சேவ பாபபி⁴க்கூ²ஹி ச உபத்³து³தானங் ஜாதிமந்தகுலபுத்தானஞ்சேவ பேஸலபி⁴க்கூ²னஞ்ச ஏளகானங் ப⁴யேன தஸவகானங் பலாயனகாலோ விய ப⁴விஸ்ஸதி . அயங் ஸோளஸமஸ்ஸ விபாகோ. ஏவங் தஸ்ஸ தஸ்ஸ அத்த²ஸ்ஸ புப்³ப³னிமித்தபூ⁴தே ஸோளஸ ஸுபினே பஸ்ஸி. தேன வுத்தங் – ‘‘கோஸலராஜா விய ஸோளஸ ஸுபினே’’தி. எத்த² ச புப்³ப³னிமித்ததோ அத்தனோ அத்தா²னத்த²னிமித்தங் ஸுபினங் பஸ்ஸந்தோ அத்தனோ கம்மானுபா⁴வேன பஸ்ஸதி, கோஸலராஜா விய லோகஸ்ஸ அத்தா²னத்த²னிமித்தங் ஸுபினங் பஸ்ஸந்தோ பன ஸப்³ப³ஸத்தஸாதா⁴ரணகம்மானுபா⁴வேன பஸ்ஸதீதி வேதி³தப்³ப³ங்.
16. Adhammikarājakāleyeva ca akulīnāva rājavallabhā issarā bhavissanti, kulīnā appaññātā duggatā. Te rājavallabhā rājānaṃ attano kathaṃ gāhāpetvā vinicchayaṭṭhānādīsu balavanto hutvā dubbalānaṃ paveṇiāgatāni khettavatthuādīni ‘‘amhākaṃ santakāni etānī’’ti abhiyuñjitvā te ‘‘na tumhākaṃ, amhāka’’nti āgantvā vinicchayaṭṭhānādīsu vivadante vettalatādīhi pahārāpetvā gīvāyaṃ gahetvā apakaḍḍhāpetvā ‘‘attano pamāṇaṃ na jānātha, amhehi saddhiṃ vivadatha, idāni vo rañño kathetvā hatthapādacchedādīni kāressāmā’’ti santajjessanti, te tesaṃ bhayena attano santakāni khettavatthūni ‘‘tumhākaṃyeva tāni, gaṇhathā’’ti niyyātetvā attano gehāni pavisitvā bhītā nipajjissanti. Pāpabhikkhūpi pesale bhikkhū yathāruci viheṭhessanti, pesalā bhikkhū paṭisaraṇaṃ alabhamānā araññaṃ pavisitvā gahanaṭṭhānesu nilīyissanti, evaṃ hīnajaccehi ceva pāpabhikkhūhi ca upaddutānaṃ jātimantakulaputtānañceva pesalabhikkhūnañca eḷakānaṃ bhayena tasavakānaṃ palāyanakālo viya bhavissati . Ayaṃ soḷasamassa vipāko. Evaṃ tassa tassa atthassa pubbanimittabhūte soḷasa supine passi. Tena vuttaṃ – ‘‘kosalarājā viya soḷasa supine’’ti. Ettha ca pubbanimittato attano atthānatthanimittaṃ supinaṃ passanto attano kammānubhāvena passati, kosalarājā viya lokassa atthānatthanimittaṃ supinaṃ passanto pana sabbasattasādhāraṇakammānubhāvena passatīti veditabbaṃ.
குத்³தா⁴ ஹி தே³வதாதி நாக³மஹாவிஹாரே மஹாதே²ரஸ்ஸ குத்³தா⁴ தே³வதா விய. ரோஹணே கிர நாக³மஹாவிஹாரே மஹாதே²ரோ பி⁴க்கு²ஸங்க⁴ங் அனபலோகெத்வாவ ஏகங் நாக³ருக்க²ங் சி²ந்தா³பேஸி. ருக்கே² அதி⁴வத்தா² தே³வதா தே²ரஸ்ஸ குத்³தா⁴ பட²மமேவ நங் ஸச்சஸுபினேன பலோபெ⁴த்வா பச்சா² ‘‘இதோ தே ஸத்ததி³வஸமத்த²கே உபட்டா²கோ ராஜா மரிஸ்ஸதீ’’தி ஸுபினே ஆரோசேஸி. தே²ரோ தங் கத²ங் ஆஹரித்வா ராஜோரோதா⁴னங் ஆசிக்கி². தா ஏகப்பஹாரேனேவ மஹாவிரவங் விரவிங்ஸு. ராஜா ‘‘கிங் ஏத’’ந்தி புச்சி². தா ‘ஏவங் தே²ரேன வுத்த’’ந்தி ஆரோசயிங்ஸு. ராஜா தி³வஸே க³ணாபெத்வா ஸத்தாஹே வீதிவத்தே தே²ரஸ்ஸ ஹத்த²பாதே³ சி²ந்தா³பேஸி. ஏகந்தஸச்சமேவ ஹோதீதி ப²லஸ்ஸ ஸச்சபா⁴வதோ வுத்தங், த³ஸ்ஸனங் பன விபல்லத்த²மேவ. தேனேவ பஹீனவிபல்லாஸா புப்³ப³னிமித்தபூ⁴தம்பி ஸுபினங் ந பஸ்ஸந்தி, த்³வீஹி தீஹி வா காரணேஹி கதா³சி ஸுபினங் பஸ்ஸந்தீதி ஆஹ ‘‘ஸங்ஸக்³க³பே⁴த³தோ’’தி. ‘‘அஸெக்கா² ந பஸ்ஸந்தி பஹீனவிபல்லாஸத்தா’’தி வசனதோ சதுன்னம்பி காரணானங் விபல்லாஸோ ஏவ மூலகாரணந்தி த³ட்ட²ப்³ப³ங்.
Kuddhā hi devatāti nāgamahāvihāre mahātherassa kuddhā devatā viya. Rohaṇe kira nāgamahāvihāre mahāthero bhikkhusaṅghaṃ anapaloketvāva ekaṃ nāgarukkhaṃ chindāpesi. Rukkhe adhivatthā devatā therassa kuddhā paṭhamameva naṃ saccasupinena palobhetvā pacchā ‘‘ito te sattadivasamatthake upaṭṭhāko rājā marissatī’’ti supine ārocesi. Thero taṃ kathaṃ āharitvā rājorodhānaṃ ācikkhi. Tā ekappahāreneva mahāviravaṃ viraviṃsu. Rājā ‘‘kiṃ eta’’nti pucchi. Tā ‘evaṃ therena vutta’’nti ārocayiṃsu. Rājā divase gaṇāpetvā sattāhe vītivatte therassa hatthapāde chindāpesi. Ekantasaccameva hotīti phalassa saccabhāvato vuttaṃ, dassanaṃ pana vipallatthameva. Teneva pahīnavipallāsā pubbanimittabhūtampi supinaṃ na passanti, dvīhi tīhi vā kāraṇehi kadāci supinaṃ passantīti āha ‘‘saṃsaggabhedato’’ti. ‘‘Asekkhā na passanti pahīnavipallāsattā’’ti vacanato catunnampi kāraṇānaṃ vipallāso eva mūlakāraṇanti daṭṭhabbaṃ.
தந்தி ஸுபினகாலே பவத்தங் ப⁴வங்க³சித்தங். ரூபனிமித்தாதி³ஆரம்மணந்தி கம்மனிமித்தக³தினிமித்ததோ அஞ்ஞங் ரூபனிமித்தாதி³ஆரம்மணங் ந ஹோதி. ஈதி³ஸானீதி பச்சக்க²தோ அனுபூ⁴தபுப்³ப³பரிகப்பிதரூபாதி³ஆரம்மணானி சேவ ராகா³தி³ஸம்பயுத்தானி ச. ஸப்³போ³ஹாரிகசித்தேனாதி பகதிசித்தேன. த்³வீஹி அந்தேஹி முத்தோதி குஸலாகுஸலஸங்கா²தேஹி த்³வீஹி அந்தேஹி முத்தோ. ஆவஜ்ஜனததா³ரம்மணக்க²ணேதி இத³ங் யாவ ததா³ரம்மணுப்பத்தி, தாவ பவத்தங் சித்தவாரங் ஸந்தா⁴ய வுத்தங். ‘‘ஸுபினேனேவ தி³ட்ட²ங் விய மே, ஸுதங் விய மேதி கத²னகாலே பன அப்³யாகதோயேவ ஆவஜ்ஜனமத்தஸ்ஸேவ உப்பஜ்ஜனதோ’’தி வத³ந்தி. ஏவங் வத³ந்தேஹி பஞ்சத்³வாரே து³தியமோக⁴வாரே விய மனொத்³வாரேபி ஆவஜ்ஜனங் த்³வத்திக்க²த்துங் உப்பஜ்ஜித்வா ஜவனட்டா²னே ட²த்வா ப⁴வங்க³ங் ஓதரதீதி அதி⁴ப்பேதந்தி த³ட்ட²ப்³ப³ங் ஏகசித்தக்க²ணிகஸ்ஸ ஆவஜ்ஜனஸ்ஸ உப்பத்தியங் ‘‘தி³ட்ட²ங் விய மே, ஸுதங் விய மே’’தி கப்பனாய அஸம்ப⁴வதோ.
Tanti supinakāle pavattaṃ bhavaṅgacittaṃ. Rūpanimittādiārammaṇanti kammanimittagatinimittato aññaṃ rūpanimittādiārammaṇaṃ na hoti. Īdisānīti paccakkhato anubhūtapubbaparikappitarūpādiārammaṇāni ceva rāgādisampayuttāni ca. Sabbohārikacittenāti pakaticittena. Dvīhi antehi muttoti kusalākusalasaṅkhātehi dvīhi antehi mutto. Āvajjanatadārammaṇakkhaṇeti idaṃ yāva tadārammaṇuppatti, tāva pavattaṃ cittavāraṃ sandhāya vuttaṃ. ‘‘Supineneva diṭṭhaṃ viya me, sutaṃ viya meti kathanakāle pana abyākatoyeva āvajjanamattasseva uppajjanato’’ti vadanti. Evaṃ vadantehi pañcadvāre dutiyamoghavāre viya manodvārepi āvajjanaṃ dvattikkhattuṃ uppajjitvā javanaṭṭhāne ṭhatvā bhavaṅgaṃ otaratīti adhippetanti daṭṭhabbaṃ ekacittakkhaṇikassa āvajjanassa uppattiyaṃ ‘‘diṭṭhaṃ viya me, sutaṃ viya me’’ti kappanāya asambhavato.
எத்த² ச ‘‘ஸுபினந்தேபி ததா³ரம்மணவசனதோ பச்சுப்பன்னவஸேன வா அதீதவஸேன வா ஸபா⁴வத⁴ம்மாபி ஸுபினந்தே ஆரம்மணங் ஹொந்தீ’’தி வத³ந்தி. ‘‘யதி³பி ஸுபினந்தே விபூ⁴தங் ஹுத்வா உபட்டி²தே ரூபாதி³வத்து²ம்ஹி ததா³ரம்மணங் வுத்தங், ததா²பி ஸுபினந்தே உபட்டி²தனிமித்தஸ்ஸ பரிகப்பவஸேன க³ஹேதப்³ப³தாய து³ப்³ப³லபா⁴வதோ து³ப்³ப³லவத்து²கத்தாதி வுத்த’’ந்தி தீஸுபி க³ண்டி²பதே³ஸு வுத்தங். கேசி பன ‘‘கரஜகாயஸ்ஸ நிருஸ்ஸாஹஸந்தபா⁴வப்பத்திதோ தன்னிஸ்ஸிதங் ஹத³யவத்து² ந ஸுப்பஸன்னங் ஹோதி, ததோ தன்னிஸ்ஸிதாபி சித்துப்பத்தி ந ஸுப்பஸன்னா அஸுப்பஸன்னவட்டினிஸ்ஸிததீ³பப்பபா⁴ விய, தஸ்மா து³ப்³ப³லவத்து²கத்தாதி எத்த² து³ப்³ப³லஹத³யவத்து²கத்தா’’தி அத்த²ங் வத³ந்தி, வீமங்ஸித்வா யுத்ததரங் க³ஹேதப்³ப³ங்.
Ettha ca ‘‘supinantepi tadārammaṇavacanato paccuppannavasena vā atītavasena vā sabhāvadhammāpi supinante ārammaṇaṃ hontī’’ti vadanti. ‘‘Yadipi supinante vibhūtaṃ hutvā upaṭṭhite rūpādivatthumhi tadārammaṇaṃ vuttaṃ, tathāpi supinante upaṭṭhitanimittassa parikappavasena gahetabbatāya dubbalabhāvato dubbalavatthukattāti vutta’’nti tīsupi gaṇṭhipadesu vuttaṃ. Keci pana ‘‘karajakāyassa nirussāhasantabhāvappattito tannissitaṃ hadayavatthu na suppasannaṃ hoti, tato tannissitāpi cittuppatti na suppasannā asuppasannavaṭṭinissitadīpappabhā viya, tasmā dubbalavatthukattāti ettha dubbalahadayavatthukattā’’ti atthaṃ vadanti, vīmaṃsitvā yuttataraṃ gahetabbaṃ.
ஸுபினந்தசேதனாதி மனொத்³வாரிகஜவனவஸேன பவத்தா ஸுபினந்தே சேதனா. ஸுபினஞ்ஹி பஸ்ஸந்தோ மனொத்³வாரிகேனேவ ஜவனேன பஸ்ஸதி, ந பஞ்சத்³வாரிகேன. படிபு³ஜ்ஜ²ந்தோ ச மனொத்³வாரிகேனேவ படிபு³ஜ்ஜ²தி, ந பஞ்சத்³வாரிகேன. நித்³தா³யந்தஸ்ஸ ஹி மஹாவட்டிங் ஜாலெத்வா தீ³பே சக்கு²ஸமீபங் உபனீதே பட²மங் சக்கு²த்³வாரிகங் ஆவஜ்ஜனங் ப⁴வங்க³ங் ந ஆவட்டேதி, மனொத்³வாரிகமேவ ஆவட்டேதி, அத² ஜவனங் ஜவித்வா ப⁴வங்க³ங் ஓதரதி. து³தியவாரே சக்கு²த்³வாரிகங் ஆவஜ்ஜனங் ப⁴வங்க³ங் ஆவட்டேதி, ததோ சக்கு²விஞ்ஞாணாதீ³னி ஜவனபரியோஸானானி பவத்தந்தி, தத³னந்தரங் ப⁴வங்க³ங் பவத்ததி. ததியவாரே மனொத்³வாரிகஆவஜ்ஜனேன ப⁴வங்கே³ ஆவட்டிதே மனொத்³வாரிகஜவனங் ஜவதி, தேன சித்தேன ‘‘கிங் அயங் இமஸ்மிங் டா²னே ஆலோகோ’’தி ஜானாதி. ததா² நித்³தா³யந்தஸ்ஸ கண்ணஸமீபே தூரியேஸு பக்³க³ஹிதேஸு கா⁴னஸமீபே ஸுக³ந்தே⁴ஸு வா து³க்³க³ந்தே⁴ஸு வா புப்பே²ஸு உபனீதேஸு முகே² ஸப்பிம்ஹி வா பா²ணிதே வா பக்கி²த்தே பிட்டி²யங் பாணினா பஹாரே தி³ன்னே பட²மங் ஸோதத்³வாரிகாதீ³னி ஆவஜ்ஜனானி ப⁴வங்க³ங் ந ஆவட்டெந்தி , மனொத்³வாரிகமேவ ஆவட்டேதி, அத² ஜவனங் ஜவித்வா ப⁴வங்க³ங் ஓதரதி. து³தியவாரே ஸோதத்³வாரிகாதீ³னி ஆவஜ்ஜனானி ப⁴வங்க³ங் ஆவட்டெந்தி, ததோ ஸோதகா⁴னஜிவ்ஹாகாயவிஞ்ஞாணாதீ³னி ஜவனபரியோஸானானி பவத்தந்தி, தத³னந்தரங் ப⁴வங்க³ங் பவத்ததி. ததியவாரே மனொத்³வாரிகஆவஜ்ஜனேன ப⁴வங்கே³ ஆவட்டிதே மனொத்³வாரிகஜவனங் ஜவதி, தேன சித்தேன ஞத்வா ‘‘கிங் அயங் இமஸ்மிங் டா²னே ஸத்³தோ³, ஸங்க²ஸத்³தோ³ பே⁴ரிஸத்³தோ³’’தி வா ‘‘கிங் அயங் இமஸ்மிங் டா²னே க³ந்தோ⁴, மூலக³ந்தோ⁴ ஸாரக³ந்தோ⁴’’தி வா ‘‘கிங் இத³ங் மய்ஹங் முகே² பக்கி²த்தங், ஸப்பி பா²ணித’’ந்தி வா ‘‘கேனம்ஹி பிட்டி²யங் பஹடோ, அதித²த்³தோ⁴ மே பஹாரோ’’தி வா வத்தா ஹோதி, ஏவங் மனொத்³வாரிகஜவனேனேவ படிபு³ஜ்ஜ²தி, ந பஞ்சத்³வாரிகேன. ஸுபினம்பி தேனேவ பஸ்ஸதி, ந பஞ்சத்³வாரிகேன.
Supinantacetanāti manodvārikajavanavasena pavattā supinante cetanā. Supinañhi passanto manodvārikeneva javanena passati, na pañcadvārikena. Paṭibujjhanto ca manodvārikeneva paṭibujjhati, na pañcadvārikena. Niddāyantassa hi mahāvaṭṭiṃ jāletvā dīpe cakkhusamīpaṃ upanīte paṭhamaṃ cakkhudvārikaṃ āvajjanaṃ bhavaṅgaṃ na āvaṭṭeti, manodvārikameva āvaṭṭeti, atha javanaṃ javitvā bhavaṅgaṃ otarati. Dutiyavāre cakkhudvārikaṃ āvajjanaṃ bhavaṅgaṃ āvaṭṭeti, tato cakkhuviññāṇādīni javanapariyosānāni pavattanti, tadanantaraṃ bhavaṅgaṃ pavattati. Tatiyavāre manodvārikaāvajjanena bhavaṅge āvaṭṭite manodvārikajavanaṃ javati, tena cittena ‘‘kiṃ ayaṃ imasmiṃ ṭhāne āloko’’ti jānāti. Tathā niddāyantassa kaṇṇasamīpe tūriyesu paggahitesu ghānasamīpe sugandhesu vā duggandhesu vā pupphesu upanītesu mukhe sappimhi vā phāṇite vā pakkhitte piṭṭhiyaṃ pāṇinā pahāre dinne paṭhamaṃ sotadvārikādīni āvajjanāni bhavaṅgaṃ na āvaṭṭenti , manodvārikameva āvaṭṭeti, atha javanaṃ javitvā bhavaṅgaṃ otarati. Dutiyavāre sotadvārikādīni āvajjanāni bhavaṅgaṃ āvaṭṭenti, tato sotaghānajivhākāyaviññāṇādīni javanapariyosānāni pavattanti, tadanantaraṃ bhavaṅgaṃ pavattati. Tatiyavāre manodvārikaāvajjanena bhavaṅge āvaṭṭite manodvārikajavanaṃ javati, tena cittena ñatvā ‘‘kiṃ ayaṃ imasmiṃ ṭhāne saddo, saṅkhasaddo bherisaddo’’ti vā ‘‘kiṃ ayaṃ imasmiṃ ṭhāne gandho, mūlagandho sāragandho’’ti vā ‘‘kiṃ idaṃ mayhaṃ mukhe pakkhittaṃ, sappi phāṇita’’nti vā ‘‘kenamhi piṭṭhiyaṃ pahaṭo, atithaddho me pahāro’’ti vā vattā hoti, evaṃ manodvārikajavaneneva paṭibujjhati, na pañcadvārikena. Supinampi teneva passati, na pañcadvārikena.
அஸ்ஸாதி அஸ்ஸ ஆபத்தினிகாயஸ்ஸ. நனு ச அயுத்தோயங் நித்³தே³ஸோ ‘‘ஸங்கோ⁴ ஆதி³ம்ஹி சேவ ஸேஸே ச இச்சி²தப்³போ³ அஸ்ஸா’’தி. ந ஹி ஆபத்தினிகாயஸ்ஸ ஆதி³ம்ஹி சேவ ஸேஸே ச ஸங்கோ⁴ இச்சி²தோ, கிஞ்சரஹி வுட்டா²னஸ்ஸாதி இமங் சோத³னங் மனஸி ஸன்னிதா⁴ய யதா² ந விருஜ்ஜ²தி, ததா² அதி⁴ப்பாயங் விவரந்தோ ‘‘கிங் வுத்தங் ஹோதீ’’திஆதி³மாஹ. ஆபத்திதோ வுட்டா²னஸ்ஸ ஆதி³ம்ஹி சேவ ஸேஸே ச இச்சி²தோ ஸங்கோ⁴ ஆபத்தியாவ இச்சி²தோ நாம ஹோதீதி அயமெத்த² அதி⁴ப்பாயோ. ஆபத்திவுட்டா²னந்தி ஆபத்திதோ வுட்டா²னங், அனாபத்திகபா⁴வூபக³மனந்தி அத்தோ². வசனகாரணந்தி ‘‘ஸங்கா⁴தி³ஸேஸோ’’தி ஏவங் வசனே காரணங். ஸமுதா³யே நிருள்ஹோ நிகாய-ஸத்³தோ³ ததே³கதே³ஸே பவத்தமானோபி தாய ஏவ ருள்ஹியா பவத்ததீதி ஆஹ ருளீஸத்³தே³னாதி. அத² வா கிஞ்சி நிமித்தங் க³ஹெத்வா ஸதிபி அஞ்ஞஸ்மிங் தங்னிமித்தயுத்தே கிஸ்மிஞ்சிதே³வ விஸயே ஸம்முதியா சிரகாலதாவஸேன நிமித்தவிரஹேபி பவத்தனிருள்ஹோ ருள்ஹீ நாம. யதா² மஹியங் ஸேதீதி மஹிங்ஸோ, க³ச்ச²தீதி கோ³தி, ஏவங் நிகாய-ஸத்³த³ஸ்ஸபி ருள்ஹிபா⁴வோ வேதி³தப்³போ³. ஏகஸ்மிம்பி விஸிட்டே² ஸதிபி ஸாமஞ்ஞா விய ஸமுதா³யே பவத்தவோஹாரோ அவயவேபி பவத்ததீதி ஆஹ அவயவே ஸமூஹவோஹாரேன வாதி. நவமஸ்ஸ அதி⁴ப்பாயஸ்ஸாதி வீமங்ஸாதி⁴ப்பாயஸ்ஸ.
Assāti assa āpattinikāyassa. Nanu ca ayuttoyaṃ niddeso ‘‘saṅgho ādimhi ceva sese ca icchitabbo assā’’ti. Na hi āpattinikāyassa ādimhi ceva sese ca saṅgho icchito, kiñcarahi vuṭṭhānassāti imaṃ codanaṃ manasi sannidhāya yathā na virujjhati, tathā adhippāyaṃ vivaranto ‘‘kiṃ vuttaṃ hotī’’tiādimāha. Āpattito vuṭṭhānassa ādimhi ceva sese ca icchito saṅgho āpattiyāva icchito nāma hotīti ayamettha adhippāyo. Āpattivuṭṭhānanti āpattito vuṭṭhānaṃ, anāpattikabhāvūpagamananti attho. Vacanakāraṇanti ‘‘saṅghādiseso’’ti evaṃ vacane kāraṇaṃ. Samudāye niruḷho nikāya-saddo tadekadese pavattamānopi tāya eva ruḷhiyā pavattatīti āha ruḷīsaddenāti. Atha vā kiñci nimittaṃ gahetvā satipi aññasmiṃ taṃnimittayutte kismiñcideva visaye sammutiyā cirakālatāvasena nimittavirahepi pavattaniruḷho ruḷhī nāma. Yathā mahiyaṃ setīti mahiṃso, gacchatīti goti, evaṃ nikāya-saddassapi ruḷhibhāvo veditabbo. Ekasmimpi visiṭṭhe satipi sāmaññā viya samudāye pavattavohāro avayavepi pavattatīti āha avayave samūhavohārena vāti. Navamassa adhippāyassāti vīmaṃsādhippāyassa.
238-239. லோமா ஏதேஸங் ஸந்தீதி லோமஸா, ப³ஹுலோமாதி வுத்தங் ஹோதி. அரோகோ³ ப⁴விஸ்ஸாமீதி ராக³பரிளாஹவூபஸமதோ நிரோகோ³ ப⁴விஸ்ஸாமி. மோசனேனாதி மோசனத்தா²ய உபக்கமகரணேன. உபக்கமகரணஞ்ஹெத்த² மோசனந்தி அதி⁴ப்பேதங் மோசேதி ஏதேனாதி கத்வா. பீ³ஜங் ப⁴விஸ்ஸதீதி சோளக்³க³ஹணாதி³கம்மங் ஸந்தா⁴ய வுத்தங்.
238-239. Lomā etesaṃ santīti lomasā, bahulomāti vuttaṃ hoti. Arogo bhavissāmīti rāgapariḷāhavūpasamato nirogo bhavissāmi. Mocanenāti mocanatthāya upakkamakaraṇena. Upakkamakaraṇañhettha mocananti adhippetaṃ moceti etenāti katvā. Bījaṃ bhavissatīti coḷaggahaṇādikammaṃ sandhāya vuttaṃ.
240. த்³வே ஆபத்திஸஹஸ்ஸானீதி க²ண்ட³சக்காதி³பே⁴த³ங் அனாமஸித்வா வுத்தங், இச்ச²ந்தேன பன க²ண்ட³சக்காதி³பே⁴தே³னபி ஆபத்திக³ணனா காதப்³பா³. மிஸ்ஸகசக்கந்தி உப⁴தோவட்³ட⁴னகங் ஸந்தா⁴ய வுத்தங். எத்த² ச நீலஞ்ச பீதகஞ்சாதிஆதி³னா ஏகக்க²ணே அனேகவண்ணானங் மோசனாதி⁴ப்பாயவசனங் யதா²தி⁴ப்பாயேன மோசனங் ப⁴வது வா மா வா, இமினாபி அதி⁴ப்பாயேன உபக்கமித்வா மோசெந்தஸ்ஸ ஆபத்தி ஹோதீதி த³ஸ்ஸனத்த²ங். ந ஹி ஏகஸ்மிங் க²ணே நீலாதீ³னங் ஸப்³பே³ஸம்பி முத்தி ஸம்ப⁴வதி. அஞ்ஞங் வத³தீதி அத்தனோ தோ³ஸங் உஜுங் வத்துங் அஸக்கொந்தோ புன புட்டோ² அஞ்ஞங் ப⁴ணதி.
240.Dveāpattisahassānīti khaṇḍacakkādibhedaṃ anāmasitvā vuttaṃ, icchantena pana khaṇḍacakkādibhedenapi āpattigaṇanā kātabbā. Missakacakkanti ubhatovaḍḍhanakaṃ sandhāya vuttaṃ. Ettha ca nīlañca pītakañcātiādinā ekakkhaṇe anekavaṇṇānaṃ mocanādhippāyavacanaṃ yathādhippāyena mocanaṃ bhavatu vā mā vā, imināpi adhippāyena upakkamitvā mocentassa āpatti hotīti dassanatthaṃ. Na hi ekasmiṃ khaṇe nīlādīnaṃ sabbesampi mutti sambhavati. Aññaṃ vadatīti attano dosaṃ ujuṃ vattuṃ asakkonto puna puṭṭho aññaṃ bhaṇati.
மோசனஸ்ஸாதோ³தி மோசனஸ்ஸ புப்³ப³பா⁴கே³ பவத்தஅஸ்ஸாதோ³. தேனேவ ‘‘மோசேதுங் அஸ்ஸாதோ³ மோசனஸ்ஸாதோ³’’தி வுத்தங். கே³ஹஸ்ஸிதபேமந்தி எத்த² கே³ஹ-ஸத்³தே³ன கே³ஹே டி²தா மாதுப⁴கி³னீஆத³யோ அஜ்ஜ²த்திகஞாதகா க³ஹிதா. தேஸு மாதுபேமாதி³வஸேன உப்பன்னோ ஸினேஹோ கே³ஹஸ்ஸிதபேமங், அஞ்ஞத்த² பன கே³ஹஸ்ஸிதபேமந்தி பஞ்சகாமகு³ணிகராகோ³ வுச்சதி. ஸம்பயுத்தஅஸ்ஸாத³ஸீஸேனாதி ராக³ஸம்பயுத்தஸுக²வேத³னாமுகே²ன. ஏகேன பதே³னாதி கே³ஹஸ்ஸிதபேம-பதே³ன.
Mocanassādoti mocanassa pubbabhāge pavattaassādo. Teneva ‘‘mocetuṃ assādo mocanassādo’’ti vuttaṃ. Gehassitapemanti ettha geha-saddena gehe ṭhitā mātubhaginīādayo ajjhattikañātakā gahitā. Tesu mātupemādivasena uppanno sineho gehassitapemaṃ, aññattha pana gehassitapemanti pañcakāmaguṇikarāgo vuccati. Sampayuttaassādasīsenāti rāgasampayuttasukhavedanāmukhena. Ekena padenāti gehassitapema-padena.
ததே²வாதி மோசனஸ்ஸாத³சேதனாய ஏவ. புப்³ப³பா⁴கே³ மோசனஸ்ஸாத³வஸேன கதப்பயோக³ங் அவிஜஹித்வாவ ஸயிதத்தா ‘‘ஸசே பன…பே॰… ஸங்கா⁴தி³ஸேஸோ’’தி வுத்தங். புன ஸுத்³த⁴சித்தே உப்பன்னே தஸ்ஸ பயோக³ஸ்ஸ படிப்பஸ்ஸத்³த⁴த்தா ‘‘ஸுத்³த⁴சித்தோ…பே॰… அனாபத்தீ’’தி வுத்தங். ஜக்³க³னத்தா²யாதி தோ⁴வனத்தா²ய. அனோகாஸந்தி அங்க³ஜாதப்பதே³ஸங்.
Tathevāti mocanassādacetanāya eva. Pubbabhāge mocanassādavasena katappayogaṃ avijahitvāva sayitattā ‘‘sace pana…pe… saṅghādiseso’’ti vuttaṃ. Puna suddhacitte uppanne tassa payogassa paṭippassaddhattā ‘‘suddhacitto…pe… anāpattī’’ti vuttaṃ. Jagganatthāyāti dhovanatthāya. Anokāsanti aṅgajātappadesaṃ.
263-264. கே³ஹஸ்ஸிதகாமவிதக்கந்தி பஞ்சகாமகு³ணஸன்னிஸ்ஸிதங் காமவிதக்கங். வத்தி²ங் த³ள்ஹங் க³ஹெத்வாதி அங்க³ஜாதஸ்ஸ அக்³கே³ பஸ்ஸாவனிக்³க³மனட்டா²னே சம்மங் த³ள்ஹங் க³ஹெத்வா. நிமித்தே உபக்கமாபா⁴வதோ ‘‘மோசனஸ்ஸாதா³தி⁴ப்பாயஸ்ஸபி முத்தே அனாபத்தீ’’தி வுத்தங்.
263-264.Gehassitakāmavitakkanti pañcakāmaguṇasannissitaṃ kāmavitakkaṃ. Vatthiṃ daḷhaṃ gahetvāti aṅgajātassa agge passāvaniggamanaṭṭhāne cammaṃ daḷhaṃ gahetvā. Nimitte upakkamābhāvato ‘‘mocanassādādhippāyassapi mutte anāpattī’’ti vuttaṃ.
265. ‘‘ஏஹி மே த்வங், ஆவுஸோ, ஸாமணேராதி ஆணத்தியா அஞ்ஞேன கதோபி பயோகோ³ அத்தனாவ கதோ நாம ஹோதீதி கத்வா ஆபத்தி வுத்தா. யதி³ பன அனாணத்தோ ஸயமேவ கரோதி, அங்க³பாரிபூரியா அபா⁴வதோ அனாபத்தீ’’தி வத³ந்தி. ஸுத்தஸாமணேரவத்து²ஸ்மிங் அஸுசிம்ஹி முத்தேபி அங்க³ஜாதஸ்ஸ க³ஹணபச்சயா து³க்கடங் வுத்தங், ந பன முத்தபச்சயா.
265. ‘‘Ehi me tvaṃ, āvuso, sāmaṇerāti āṇattiyā aññena katopi payogo attanāva kato nāma hotīti katvā āpatti vuttā. Yadi pana anāṇatto sayameva karoti, aṅgapāripūriyā abhāvato anāpattī’’ti vadanti. Suttasāmaṇeravatthusmiṃ asucimhi muttepi aṅgajātassa gahaṇapaccayā dukkaṭaṃ vuttaṃ, na pana muttapaccayā.
266. காயத்த²ம்ப⁴னவத்து²ஸ்மிங் சலனவஸேன யதா² அங்க³ஜாதேபி உபக்கமோ ஸம்ப⁴வதி, ததா²பி விஜம்பி⁴தத்தா ஆபத்தி வுத்தா. ‘‘பச்ச²தோ வா’’தி வசனதோ உபோ⁴ஸு பஸ்ஸேஸு கடியங் ஊருப்பதே³ஸோபி க³ஹிதோயேவாதி த³ட்ட²ப்³ப³ங், தஸ்மா உபோ⁴ஸுபி பஸ்ஸேஸு ட²த்வா இமஸ்மிங் ஓகாஸே நிமித்தந்தி உபனிஜ்ஜா²யந்தஸ்ஸபி ஆபத்தியேவ. ‘‘அங்க³ஜாத’’ந்தி வசனதோ நிமித்தந்தி பஸ்ஸாவமக்³கோ³வ வுத்தோ. உம்மீலனநிமீலனவஸேன பன ந காரேதப்³போ³தி உம்மீலனநிமீலனப்பயோக³வஸஏன ஆபத்திபே⁴தோ³ ந காரேதப்³போ³தி அத்தோ². அனேகக்க²த்தும்பி உம்மீலெத்வா நிமீலெத்வா உபனிஜ்ஜா²யந்தஸ்ஸ ஏகமேவ து³க்கடந்தி வுத்தங் ஹோதி. அக்கீ²னி அவிப்ப²ந்தெ³த்வா அபி⁴முக²ங் ஸம்பத்தஸ்ஸ மாதுகா³மஸ்ஸ நிமித்தோலோகனேபி ஆபத்தியேவாதி த³ட்ட²ப்³ப³ங். ‘‘தா³ருதீ⁴தலிகலேபசித்தானங் அங்க³ஜாதுபனிஜ்ஜா²னேபி து³க்கட’’ந்தி வத³ந்தி.
266.Kāyatthambhanavatthusmiṃ calanavasena yathā aṅgajātepi upakkamo sambhavati, tathāpi vijambhitattā āpatti vuttā. ‘‘Pacchato vā’’ti vacanato ubhosu passesu kaṭiyaṃ ūruppadesopi gahitoyevāti daṭṭhabbaṃ, tasmā ubhosupi passesu ṭhatvā imasmiṃ okāse nimittanti upanijjhāyantassapi āpattiyeva. ‘‘Aṅgajāta’’nti vacanato nimittanti passāvamaggova vutto. Ummīlananimīlanavasena pana na kāretabboti ummīlananimīlanappayogavasaena āpattibhedo na kāretabboti attho. Anekakkhattumpi ummīletvā nimīletvā upanijjhāyantassa ekameva dukkaṭanti vuttaṃ hoti. Akkhīni avipphandetvā abhimukhaṃ sampattassa mātugāmassa nimittolokanepi āpattiyevāti daṭṭhabbaṃ. ‘‘Dārudhītalikalepacittānaṃ aṅgajātupanijjhānepi dukkaṭa’’nti vadanti.
267. புப்பா²வலீதி கீளாவிஸேஸஸ்ஸாதி⁴வசனங். தங் கீளந்தா நதீ³ஆதீ³ஸு சி²ன்னதடங் உத³கேன சிக்க²ல்லங் கத்வா தத்த² உபோ⁴ பாதே³ பஸாரெத்வா நிஸின்னா பபதந்தி. ‘‘புப்பா²வலிய’’ந்திபி பாடோ². பவேஸெந்தஸ்ஸாதி த்³விகம்மகத்தா வாலிகங் அங்க³ஜாதந்தி உப⁴யத்தா²பி உபயோக³வசனங் கதங். வாலிகந்தி வாலிகாயாதி அத்தோ². சேதனா, உபக்கமோ, முச்சனந்தி இமானெத்த² தீணி அங்கா³னி வேதி³தப்³பா³னி.
267.Pupphāvalīti kīḷāvisesassādhivacanaṃ. Taṃ kīḷantā nadīādīsu chinnataṭaṃ udakena cikkhallaṃ katvā tattha ubho pāde pasāretvā nisinnā papatanti. ‘‘Pupphāvaliya’’ntipi pāṭho. Pavesentassāti dvikammakattā vālikaṃ aṅgajātanti ubhayatthāpi upayogavacanaṃ kataṃ. Vālikanti vālikāyāti attho. Cetanā, upakkamo, muccananti imānettha tīṇi aṅgāni veditabbāni.
ஸுக்கவிஸ்ஸட்டி²ஸிக்கா²பத³வண்ணனா நிட்டி²தா.
Sukkavissaṭṭhisikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. ஸுக்கவிஸ்ஸட்டி²ஸிக்கா²பத³ங் • 1. Sukkavissaṭṭhisikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. ஸுக்கவிஸ்ஸட்டி²ஸிக்கா²பத³வண்ணனா • 1. Sukkavissaṭṭhisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. ஸுக்கவிஸ்ஸட்டி²ஸிக்கா²பத³வண்ணனா • 1. Sukkavissaṭṭhisikkhāpadavaṇṇanā
